ⵜⴰⴷⵔⴰⵡⵜ ⵏ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⵖ ⵜⵖⵉⵎⵉⵜ ⵏ ⵓⵙⵙⴼⵍⴷ ⵍⵍⵉ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵙ ⵜⵎⴷⵔⴰⵡⵜ ⵏ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵉⵎⵓⵏⵏ ⴼ ⵓⵙⵍⵎⴷ ⴷ ⵜⴳⵎⵉ ⵜⴰⵙⵓⵍⴰⵏⵜ
ⵉⴷⵔⵓ ⵢⴰⵏ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵓⵙⵙⴰⵏ ⵏ 17 ⴷ 18 ⴱⵕⴰⵢⵕ 2020 ⵖ ⵜⵖⵉⵎⵉⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵙⴼⵍⴷ ⵍⵍⵉ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴳ ⵏⵢⵓⵢⵓⵕⴽ ⵙ ⵜⵎⴷⵔⴰⵡⵜ ⵏ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵉⵎⵓⵏⵏ ⴼ:«ⴰⵙⵍⵎⴷ ⴷ ⵜⵙⴰⵔⵓⵜ ⵏ ⵓⴼⵔⴰ ⴷ ⵜⴳⵎⵉ ⵜⴰⵙⵓⵍⴰⵏⵜ: ⵉ ⵓⵣⵣⴳⵉⵔ ⵏ ⵡⴰⵡⵜⵜⴰⵙ ⵡⵉⵙ 4 ⵖ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ».
ⵉⵍⵍⴰ ⵖ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ:
ⵣⵖ ⵓⵙⵇⵇⵉⵎ ⵏ ⵉⵎⵓⵔⴰ:
- ⵜⴰⵎⴰⵔⵉⵜ ⵎⴰⵙⵙⴰ ⵃⴰⵢⴰⵜ ⴱⵓⴼⴰⵔⴰⵛⵏ, ⵜⴰⵔⴰⴱⴱⵓⵜ ⵏ ⵜⵥⵖⵓⵕⵜ ⴷ ⵜⵎⴰⵜⵔⴰⵔⵜ.
- ⴰⵎⴰⵔⵉ ⵎⴰⵙⵙ ⵏⵓⵕⴷⴷⵉⵏ ⵍⴰⵥⵕⴰⵇ, ⵜⴰⵔⴰⴱⴱⵓⵜ ⵏ ⵓⴳⵔⴰⵡ ⴰⴷⵙⵜⴰⵔ.
- ⴰⵎⴰⵔⵉ ⵎⴰⵙⵙ ⴰⵃⵎⴰⴷ ⵜⵜⵓⵎⵉ, ⵜⴰⵔⴰⴱⴱⵓⵜ ⵜⴰⵙⵉⵎⴰⵏⵜ ⵏ ⵜⵎⵓⵏⵉ ⴷ ⵢⵉⵙⴽⵉⵍ.
ⵣⵖ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ:
- ⴰⵎⵛⵛⵉⵡⵕ ⵎⴰⵙⵙ ⴰⵃⵎⴰⴷ ⵜⵜⵡⵉⵣⵉ, ⴰⴳⵎⴰⵎ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ.
- ⴰⵎⵛⵛⵉⵡⵕ ⵎⴰⵙⵙ ⵎⵓⵃⴰⵎⵎⴰⴷ ⵙⴰⵍⵎ ⴱⵏⵎⵙⵄⵓⴷ, ⵜⴰⵔⴰⴱⴱⵓⵜ ⵜⴰⵙⵉⵎⴰⵏⵜ ⵏ ⵜⵎⵓⵏⵉ ⴷ ⵢⵉⵙⴽⵉⵍ.
ⴷⵔⵓⵏ ⵖ ⵓⵎⵓⵙⵙⵓ ⴰⴷ ⴰⴱⵕⵍⴰⵎⴰⵏⵉ ⵉⵙⵜⴰⵡⵀⵎⵎⴰⵏ ⵉⴳⵎⴰⵎⵏ ⵏ ⵜⴰⵢⵢⴰⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵉⵍⵍⴰⵏ ⵖ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵙⴳ ⵙⵎⵎⵓⵙ ⵉⵎⵏⵥⴰⵡⵏ ⵏ ⵓⵎⴰⴹⴰⵍ, ⵉⵎⵓⵣⴰⵢⵏ ⵙⴳ ⵍⵢⵓⵏⵉⵙⴽⵓ ⴷ ⵍⵢⵓⵏⵉⵙⵉⴼ, ⵉⵏⵎⵖⵓⵔⵏ ⵙⴳ ⵜⵏⴱⴰⴹⵉⵏ ⴷ ⵡⴰⵎⵓⵏ ⵓⵖⵔⵉⵎ.
ⵜⴽⵛⵎ ⵜⵖⵉⵎⵉⵜ ⴰⴷ ⵖ ⵜⵓⴳⴳⴰⵙ ⵍⵍⵉ ⵏⵏ ⵜⴳⴳⴰ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵉⵎⵓⵏⵏ ⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵃⵎⴰ ⴰⴷ ⵎⵓⵏⵏ ⵡⴰⴷⴷⴰⴷⵏ ⴷ ⵓⴽⴰⵎ ⵏ ⵉⴱⵕⵍⴰⵎⴰⵏⵉⵢⵏ ⵉ ⴽⵉⴳⴰⵏ ⵏ ⵓⵙⵎⵉⵎⴷ ⴰⵙⵔⵜⴰⵏ ⵃⵎⴰ ⴰⴷ ⵉⵜⵜⵓⵙⴽⵉⵔ ⵡⴰⵡⵜⵜⴰⵙ ⵏ ⵜⴳⵎⵉ ⵜⴰⵙⵓⵍⴰⵏⵜ ⵖ ⵢⵉⴳⵔ ⵏ ⵓⵙⵍⵎⴷ ⴽⵓⵍⵍⵓⵜ ⵙ ⵓⵙⴳⴳⵯⴰⵙ ⵏ 2030, ⵍⵍⵉⵖ ⵉⴳⴰ ⵓⵙⵍⵎⴷ ⵜⴰⵣⵡⵓⵔⵉⵜ ⴷ ⵜⴼⴰⴷⴰ ⵜⵓⵛⵛⵉⵍⵜ ⴷ ⵜⵙⵉⵍⴰⵏⵜ ⵉ ⵜⴳⵎⵉ ⵜⴰⵙⵓⵍⴰⵏⵜ ⵙ ⴽⵓⵍⵍⵓ ⵉⵎⵏⴰⴷⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⵡⵏⴹⴰⵏⵏ. ⵉⵖ ⵓⵔ ⵍⵍⵉⵏ ⵉⵎⴰⴷⴰⵏⵏ ⵖⵔⴰⵏⵉⵏ, ⵓⵔ ⵔⴰⴷ ⵜⵉⵍⵉ ⵜⴷⵉⵎⵓⵇⵔⴰⵟⵉⵜ ⴷ ⵓⴼⵔⴰ ⴷ ⵓⴱⵓⵖⵍⵓ.
ⵔⴰⴷ ⵜⴽⴽ ⵜⵖⵉⵎⵉⵜ ⴰⴷ ⵙⵉⵏ ⵡⵓⵙⵙⴰⵏ, ⵢⵉⵍⵉ ⵖ ⵓⵖⴰⵡⴰⵙ ⵏⵏⵙ ⵏ ⵓⵙⵡⵓⵔⵉ ⵓⵎⴹⴰⴽⴰⵕ ⴼ ⴽⵉⴳⴰⵏ ⵏ ⵉⴼⵔⵙⵉⵡⵏ:
- ⴰⵙⵍⵎⴷ ⵉ ⵓⴼⵔⴰ ⴷ ⵜⴷⵉⵎⵓⵇⵔⴰⵟⵉⵜ: ⴰⵚⴽⵓ ⵏ ⵜⵔⵙⴰⵍ ⵏ ⵜⵎⵓⵔⵉ ⵉⵕⵡⴰⵏ.
- ⴰⵙⵍⵎⴷ ⴷ ⵢⵉⵎⵉⵙⵙ ⴰⵙⵉⵍⴰⵏ ⵏ ⵓⵙⴷⵔⴼⵉ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ.
- ⵜⴰⵡⵓⵔⵉ ⴷ ⵢⵓⵙⴰⵏ ⵉ ⴽⵓ ⵢⴰⵏ ⵙ ⵓⵍⵎⵎⵓⴷ, ⴷ ⵓⵙⵉⵍⵖ ⴰⵣⵣⵓⵍⴰⵏ ⴽⵓ ⵎⴰ ⴰⴷ ⵜⵍⴰ ⵜⵓⴷⵔⵜ.
- ⵜⴰⴳⵔⵡⵍⴰ ⵜⴰⵎⴳⵓⵔⴰⵏⵜ: ⵎⴰⵏ ⴰⵏⴰⵎⴽ ⴷⴰⵔ ⵉⵏⴳⵔⴰⵡⵏ ⵏ ⵓⵙⵍⵎⴷ ?
- ⴰⵃⵟⵟⵓ ⵏ ⵉⵜⵔⵉ ⵏⵏⵖ ⵙ ⵓⵙⵍⵎⴷ ⵙ ⵉⵙⵎ ⵏ ⵜⵙⵓⵜⵉⵏ ⵏ ⵉⵎⴰⵍ.
- ⴰⵙⵙⴷⵓⵙ ⵏ ⵓⵙⵙⵥⵕⴼ ⴰⵎⴰⵜⴰⵢ ⵉ ⵜⵢⴰⴼⵓⵜⵉⵏ ⵥⵉⵍⵏⵉⵏ ⵖ ⵓⵙⵍⵎⴷ.
ⵜⴳⴰ ⵜⵖⵉⵎⵉⵜ ⴰⴷ ⵢⴰⵜ ⵜⵎⵍⴷⴰ ⵖ ⵉⵎⵍⴰ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴰⵎⵖⵔⵉⴱⵉ ⵜⵓⴳⴳⴰⵙ ⵍⵍⵉ ⵏⵏ ⵜⴳⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖ ⵢⵉⴳⵔ ⵏ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⵍⵎⴷ ⴷ ⵓⵙⴳⵎⵉ, ⵙ ⴰⵢⵍⵍⵉ ⵔⴰⴷ ⵢⴰⵡⵉ ⵉ ⵜⵉⵕⵡⵉ ⵏ ⵓⵙⵍⵎⴷ ⵉ ⴽⵓ ⵢⴰⵏ, ⴰⵙⵓⵎⵓ, ⴰⵙⵙⵎⵖⵔ ⵏ ⵓⴼⴳⴰⵏ ⴷ ⵡⴰⵎⵓⵏ, ⴰⵙⵙⴷⵓⵙ ⵏ ⵡⴰⵜⵉⴳⵏ ⵏ ⵜⵎⵓⵔⵉ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⴷⵍⵙⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ.