ⵉⵍⵍⴰ ⵖ ⵓⵎⵏⵏⵉ 28 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴰ ⵜⵜⵉⵍⵉ, ⵙ ⵓⵎⵙⴰⵙⴰ ⴷ ⵉⴱⴹⵉⵢⵏ ⵏ ⵓⵎⴰⴳⵔⴰⴷ 62 ⵏ ⵓⴷⵓⵙⵜⵓⵔ, ⵜⵉⵖⵉⵎⵉⵜ ⵜⴰⴳⴷⵓⴷⴰⵏⵜ ⵉⵥⵍⵉⵏ ⵙ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⵓⴳⵏⵙⴰⵙ ⴰⵙⵖⵍⴰⵏ ⵏ ⴽⵓ ⵜⴰⵔⴰⴱⴱⵓⵜ, ⵖ ⵜⵣⵡⵉⵔⵉ ⵏ ⵜⵡⴰⵍⴰ ⵜⴰⵣⵣⵔⴰⴼⵜ, ⴷ ⵓⵙⴳⴳⵯⴰⵙ ⵡⵉⵙ ⴽⵕⴰⴹ ⵏ ⵜⵙⵓⵜⵍⵜ ⵏ ⵉⴱⵔⵉⵔ ⵖ ⵎⴰ ⴷ ⵉⵖⴰⵎⴰⵏ ⵖ ⵜⵉⵣⵉ ⵏ ⵜⵡⴰⵍⴰ ⵉⵜⵜⵓⴱⴷⴰⵔⵏ.

ⵓⵔ ⵉⵜⵜⵓⵎⴽⴰⵏ ⴰⴷ ⵉⴳ ⵓⵎⴰⵔⵉ ⴰⴳⵎⴰⵎ ⵖ ⵓⵙⵉⵔ ⴷ ⵓⵏⵙⵙⵉⵅⴼ ⵏ ⴽⵔⴰ ⵖ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴷ ⵓⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⴷ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵉⴹⴰⴼ ⵏ ⵓⵙⵡⵓⴷⴷⵓ ⵏ ⵜⵎⵙⴰⵙⵜⵍⵜ ⵏ ⵓⵙⵇⵇⵉⵎ ⴷ ⵓⴳⵎⴰⵎ ⵖ ⵓⵙⵉⵔⴰ ⵏ ⴽⵔⴰ ⵏ ⵜⵙⵇⵇⵉⵎⵜ.

ⵙ ⵓⵎⵏⵏⵉ 29, ⴰⵔ ⵜⵜⴰⵣⵏ ⴽⵔⴰⵢⴳⴰⵜ ⵜⴰⵔⴰⴱⴱⵓⵜ ⵜⴰⴱⵕⵍⴰⵎⴰⵏⵉⵜ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵢⴰⵜ ⵜⵍⴳⴰⵎⵜ ⵙ ⵉⵙⵎⴰⵡⵏ ⵏ ⵉⵎⵏⴽⴰⴷⵏ ⵉ ⵓⵙⵉⵔⴰ ⵖ 24 ⵏ ⵜⵙⵔⴰⴳⵜ ⵖ ⵓⵙⵉⴷⵔⵓⵙ ⴷⴰⵜ ⵏ ⵓⵏⵏⵓⵕⵥⵎ ⵏ ⵜⵖⵉⵎⵉⵜ ⵏ ⵓⵙⵜⴰⵢ ⵏ ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ. ⵓⵔ ⴰ ⵜⵣⵣⵔⴰⵢ ⵜⵍⴳⴰⵎⵜ ⵏⵏⴰ ⵎⵓ ⵉⵣⵔⵉ ⵓⵏⵛⴽ ⵏ ⵉⵎⵏⴽⴰⴷⵏ ⵏⵏⵙ ⴰⵏⵛⴽ ⵉⵜⵜⵓⵖⵜⴰⵙⵏ. ⵉⵖ ⵓⵔ ⵉⵣⵔⵉ ⵓⵏⵛⴽ ⵏ ⵉⵎⵏⴽⴰⴷⵏ ⵉ ⴽⵔⴰⵢⴳⴰⵜ ⵜⴰⵙⵎⵉⴳⵍⵜ ⴰⵏⵛⴽ ⵏ ⵉⵙⴳⴰⵡⵔⵏ ⵍⵍⵉ ⴷ ⵇⵇⴰⵏⵏⵉⵏ ⴰⴷ ⵉⵍⵉⵏ, ⴰⵔ ⵉⵜⵜⵉⵍⵉ ⵓⵙⵎⵏⵉⴷ ⵏ ⵉⵎⵏⴽⴰⴷⵏ ⵖ ⵢⴰⵜ ⵜⵍⴳⴰⵎⵜ ⵉⵎⵓⵏⵏ ⵖ ⵍⵍⴰⵜⵏ ⵜⵎⴰⵙⴰⵢⵉⵏ.

ⵙ ⵓⵎⵏⵏⵉ 31, ⵉⵖ ⵜⵍⵍⴰ ⴽⵔⴰ ⵏ ⵜⵎⴰⵙⴰⵢⵜ ⵢⵓⵔⴰⵏ ⵖ ⵉⴳⵎⴰⵎⵏ ⵏ ⵓⵙⵉⵔⴰ, ⴰⵔ ⵉⵜⵜⵉⵍⵉ ⵓⵙⵏⴼⵍ ⵏⵏⵙ ⵙ ⵜⵖⴰⵔⴰⵙⵜ ⵉⵜⵜⵓⴱⴷⴰⵔⵏ ⵖ ⵉⵎⵏⵏⵉⵜⵏ 28, 29,30 ⵖ ⵓⵏⴳⵔⴰⵡ ⴰⴳⵯⵏⵙⴰⵏ , ⵖ ⵜⵖⵉⵎⵉⵜ ⵜⴰⵎⵣⵡⴰⵔⵓⵜ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵉ ⵎⴰ ⴷ ⵉⵖⴰⵎⴰⵏ ⵖ ⵜⵉⵣⵉ ⵏ ⵓⵙⵜⴰⵢ ⵏ ⵓⵙⵉⵔⴰ.

ⵙ ⵓⵎⵏⵏⵉ 36 ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵔ ⵉⵜⵜⵡⴰⵍⴰ ⵓⵙⵉⵔⴰ ⵜⵉⵙⵎⵉⴳⴰⵍ ⵍⵍⵉ ⴰⵙ ⵉⴼⴽⴰ ⵓⴷⵓⵙⵜⵓⵔ ⴷ ⵓⵏⴳⵔⴰⵡ ⴰⴳⵯⵏⵙⴰⵏ, ⵖⵎⴽ ⵍⵍⵉ ⵏⵏ ⵉⵜⵜⵡⴰⵍⴰ ⴰⵙⵡⵓⴷⴷⵓ ⵏ ⵉⵙⴽⴽⵉⵏⵏ ⵏ ⵓⵙⵉⵔⴰ ⵖ ⵍⵍⴰⵏⵜ ⵜⵙⵎⵉⴳⴰⵍ ⴰⴷ: ⴰⵙⵎⵖⵔ ⴷ ⵓⵙⵖⵔⵜ ⵏ ⵜⵡⵓⵔⵉ ⵏ ⵓⵙⵇⵇⵉⵎ, ⴰⵙⵏⵎⴰⵍⴰ ⵏ ⵜⵣⴷⴰⵢⵉⵏ ⵏ ⴱⵕⵕⴰ, ⵉⵙⴽⴽⵉⵏⵏ ⵏ ⵜⵎⵓⵔⴰ ⴷ ⵉⵎⵓⵔⴰ, ⵉⵙⵓⴳⴰⵎ ⵉⵏⴼⴳⴰⵏⵏ, ⴰⵃⵟⵟⵓ ⵏ ⵡⴰⵢⴷⴰ ⵏ ⵓⵙⵇⵇⵉⵎ, ⴰⵎⵙⴰⵡⴰⴹ ⴷ ⵓⵙⵏⵖⵎⵙ ⴷ ⵓⵏⵜⴰⵎ.

ⵙ ⵓⵎⵏⵏⵉ 37, ⴰⵔ ⵉⵜⵜⴱⴷⴰⴷ ⵓⵙⵉⵔⴰ ⵏ ⵓⵙⵇⵇⵉⵎ ⵙ ⵓⵎⵛⴰⵛⴽⴰ ⴷ ⵜⵏⴱⴰⴹⵜ ⴰⴷ ⵢⵉⵍⵉ ⵓⴷⵖⴰⵔ ⴷⴰⵔ ⵜⵉⵍⴰⵍ ⵏ ⵓⵙⵇⵇⵉⵎ ⵖ ⴽⵓ ⵉⵎⴰⵙⵙⵏ ⵉⴳⴷⵓⴷⴰⵏⵏ ⵏ ⵓⵙⵏⵖⵎⵙ, ⵢⵉⵍⵉ ⵓⵡⵇⵇⵔ ⵏ ⵓⵣⵔⴼ ⵏ ⵜⵣⵓⵍⵜ ⵍⵍⵉ ⵉⵜⵜⵓⴱⴷⴰⵔⵏ ⵖ ⵓⵎⴰⴳⵔⴰⴷ ⵡⵉⵙ 10 ⵏ ⵓⴷⵓⵙⵜⵓⵔ.

ⵙ ⵓⵎⵏⵏⵉ 38, ⴰⵔ ⵉⵙⵔⵓⵙ ⵓⵙⵉⵔⴰ ⵜⴰⵎⵙⴰⵙⵜⵍⵜ ⵏ ⵓⵙⵇⵇⵉⵎ, ⵉⵙⴽⵔ ⴰⵙⵡⵓⴷⴷⵓ ⵏ ⵉⵙⴽⴽⵉⵏⵏ ⵏⵏⵙ ⵉⵥⵕⴼⴰⵏⵏ, ⴰⵔ ⵜⵜⵉⵍⵉ ⵜⵎⵙⴰⵙⵜⵍⵜ ⵏ ⵓⵙⵇⵇⵉⵎ ⵖ ⵜⵎⵙⴰⵙⵜⵍⵜ ⵜⴰⵎⴰⵜⴰⵢⵜ ⵏ ⵓⵡⴰⵏⴽ.

ⴰⵔ ⵜⵜⵓⵙⵜⴰⵢⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵙ ⵜⴳⵏⵙⴰⵙⵜ ⵜⴰⵙⵖⵍⴰⵏⵜ ⵏ ⵜⵔⵓⴱⴱⴰ.

ⵙ ⵓⵎⵙⴰⵙⴰ ⴷ ⵓⵎⵏⵏⵉ 23 ⵏ ⵓⵏⴳⵔⴰⵡ ⴰⴳⵯⵏⵙⴰⵏ, ⵜⵍⵍⴰ ⵜⵣⵡⵉⵔⵉ ⴷⴰⵔ ⵜⵓⵣⵍⵜ ⴰⴷ ⵜⵡⴰⵍⴰ ⵜⴰⵎⴰⵙⴰⵢⵜ ⵏ ⵓⵎⵙⵉⴹⵏ ⵏⵖ/ⴷ ⴰⵏⴼⵍⵓⵙ ⵖ ⵓⵙⵉⵔⴰ ⵏ ⵓⵙⵇⵇⵉⵎ.