ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴳ ⵉⴳⵔ ⵏ ⵜⴼⵍⵍⴰⵃⵜ ⴷ ⵉⵣⵔⴼⴰⵏ ⵏ ⵓⵎⴰⵔⴰ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 11 ⵉⴱⵔⵉⵔ 2022, ⵙⵉⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⴷ ⵉⴳⵔ ⵏ ⵜⴼⵍⵍⴰⵃⵜ ⵙ ⵓⵎⴽⵕⴰⴹ, ⵙ ⵜⵓⴳⵜ ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵉⵣⵔⴼⴰⵏ ⵏ ⵓⵎⴰⵔⴰ ⴷ ⵉⵣⵔⴼⴰⵏ ⵜⵏ ⵉⵔⵡⴰⵙⵏ, ⵖ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴷ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⵎⵀⴷⵉ ⴱⵏⵙⵄⵉⴷ ⴰⵎⴰⵡⵙⴰⵙ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ, ⴷ ⵎⴰⵙⵙ ⵎⵓⵃⴰⵎⵎⴰⴷ ⵚⴰⴷⵉⵇⵉ ⴰⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵯⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ.
ⵙ ⵜⵓⴳⵜ ⴰⵙ ⵙⵜⵉⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ 66.19 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 2.00 ⴼ ⵉⵣⵔⴼⴰⵏ ⵏ ⵓⵎⴰⵔⴰ ⴷ ⵉⵣⵔⴼⴰⵏ ⵜⵏ ⵉⵔⵡⴰⵙⵏ , ⵉⵡⴰⵜⵜⵙ ⴰⴼⵔⴰⴳ ⵏ ⵜⵍⴻⵍⵍⵉ ⵏ ⵓⵎⴰⵔⴰ ⴷ ⵉⵡⵏⵏⵉⵜⵏ ⵉⴷⵍⵙⴰⵏⵏ ⵜⵜⴰⵡⴱⴷⴰⵔⵏⵉⵏ ⴳ ⵓⵎⴳⵔⴰⴷ 5 ⵏ ⵓⴷⵓⵙⵜⵓⵔ, ⵖⵎⴽ ⴰⵏⵏ ⵓⵍⴰ ⵉⵎⵓⴽⵏⵏ ⵏ ⵢⵉⴳⵔ ⵏ ⵓⵎⵢⴰⵡⴰⴹ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⵙⵏⴼⵍⵓⵍ ⴷ ⵓⵙⴷⵓⵙ ⵏ ⵉⵙⵍⴳⵏⵏ ⴳ ⵓⵎⵏⵉⴷ ⴰⴷ.
ⴳ ⵜⵖⵉⵎⵉⵜ ⴰⴷ, ⵉⵍⵍⴰ ⵓⵙⵜⴰⵢ ⵙ ⵜⵓⴳⵜ ⵏ ⵓⵙⵏⴼⴰⵔ ⵏ ⵓⵙⵍⴳⵏ 80321 ⵉ ⵓⵙⴽⵔ ⵏ ⵓⵣⵎⵎⴻⵎ ⴰⵏⴰⵎⵓⵔ ⴰⵏⴼⵍⴰⵃ ⴳ ⵓⵎⵏⴰⴹ ⵏ ⵜⴱⵔⴰⵜ ⵜⴰⴳⵍⴷⴰⵏⵜ ⵜⴰⵎⴰⵜⵜⵓⵢⵜ ⵉⵜⵜⵓⵚⵕⴰⴼⵏ ⵉ ⵓⴳⵔⴰⵡ ⵙ ⵜⵎⵍⴷⴰ ⵏ ⵡⴰⵙⵙ ⴰⵎⴰⴹⵍⴰⵏ ⵏ ⵓⵚⵉⵟⵏ ⴰⵙⵙ ⵏ 20 ⴽⵟⵓⴱⵕ 2010 ⵍⵍⵉ ⵉⵙⴰⵡⵍⵏ ⴼ ⵓⵛⵛⵉⵍ ⵏ ⵓⵚⵉⵟⵏ ⴰⵎⴰⵜⴰⵢ ⵏ ⵜⴼⵍⵍⴰⵃⵜ.
ⵢⵉⵍⵉ ⵓⴹⵕⵉⵚ ⴰⴷ ⴰⵣⵣⵔⴰⴼ ⴳ ⵓⵙⴰⵜⵉ ⵏ ⵓⵎⵏⴰⴹ ⴰⴳⵔⴰⵖⵍⴰⵏ ⴳ ⵉⵍⵍⴰ ⵓⵅⵎⵎⴻⵎ ⵏ ⵉⵡⴰⵏⴽⵏ ⴳ ⵓⵙⴽⵔ ⵏ ⵓⵣⵎⵎⴻⵎ ⴰⵏⴼⵍⴰⵃ ⵉⵡⴰⵜⵜⵙⵏ ⴰⵙⵎⴰⵢⵏⵓ ⵏ ⵉⴳⵔ ⵏ ⵜⴼⵍⵍⴰⵃⵜ.
ⵔⴰⴷ ⵉⵙⴽⵔ ⵓⵣⵎⵎⴻⵎ ⴰⵏⴼⵍⴰⵃ ⴰⵏⴰⵎⵓⵔ ⵢⴰⵜ ⵜⵙⵉⵍⴰ ⵏ ⵜⵎⵓⵛⴰ ⴼ ⵜⵓⵔⵜⵉⵜⵉⵏ ⵜⵉⵏⴼⵍⴰⵃⵉⵏ, ⴷ ⵓⵙⵔⵙ ⵏ ⵜⵙⵔⴰⵜⵉⵊⵉⵢⵉⵏ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ ⴳ ⵢⵉⴳⵔ ⴰⴷ, ⴷ ⵓⴽⵛⵓⵎ ⵙ ⵉⵖⴰⵡⴰⵙⵏ ⵏ ⵜⴳⵎⵉ ⵜⴰⵏⴼⵍⴰⵃⵜ, ⴷ ⵜⵉⴽⴽⵉ ⵏ ⵜⵎⵉⵜⴰⵔ ⵉ ⵉⵢⴰⴼⵓⵜⵏ ⵉⵏⴼⵍⴰⵃⵏ ⴷ ⵜⴼⴰⵜⵉⵜ ⵜⴰⴷⵓⵙⴰⵏⵜ ⴷ ⵓⵙⵎⵖⵔ ⵏ ⵓⴼⴰⵔⵙ....
ⵙⵜⵉⵏ ⵉⵎⵓⵔⴰ ⵓⵍⴰ ⴰⵙⵏⴼⴰⵔ ⵏ ⵓⵙⵍⴳⵏ 81.21 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ 40.80 ⴼ ⵓⵙⴽⵔ ⵏ ⵓⵙⵉⵏⴰⴳ ⴰⵏⴰⵎⵓⵔ ⵏ ⵓⵔⵣⵣⵓ ⴰⵏⴼⵍⴰⵃ, ⵉⵡⴰⵜⵜⵙⵏ ⴰⵙⴷⵓⵙ ⴷ ⵓⵙⵏⴰⵍ ⵏ ⵓⵙⵉⵏⴰⴳ ⴰⴷ ⴳ ⵓⴹⴼⵕ ⵏ ⵜⵙⵔⵜⴰⵜⵉⵊⵉⵢⵉⵏ ⵜⵉⵏⴼⵍⴰⵃⵉⵏ ⵜⵉⵎⴰⵢⵏⵓⵜⵉⵏ “ⵜⴰⵙⵓⵜ ⵜⴰⵣⴳⵣⴰⵡⵜ 2020-2030” ⴷ ⵓⵙⵔⵙ ⵏ ⵓⵙⵏⵎⴰⵍⴰ ⴷ ⵢⵓⵙⴰⵏ ⴷ ⵜⵎⵥⵍⴰⵢ ⵏ ⵓⵙⵉⵏⴰⴳ ⴰⵏⴰⵎⵓⵔ ⵏ ⵓⵔⵣⵣⵓ ⵙ ⵜⵡⵡⵓⵔⵉ ⵏ ⵓⵙⵇⵇⵉⵎ ⵏⵏⵙ ⴰⵎⵙⵙⵓⴳⵓⵔ.
ⵉⵡⴰⵜⵜⵙ ⵓⵙⵍⴳⵏ ⴰⴷ ⵓⵍⴰ ⵣⵣⵔⴰⵢ ⵏ ⵜⵙⵎⵉⴳⴰⵍ ⵏ ⵓⵙⵉⵏⴰⴳ ⵉ ⵓⵙⴷⵓⵙ ⵏ ⵜⵉⵍⴰⵍⵜ ⵏⵏⵙ ⴳ ⵓⵏⴳⵔⴰⵡ ⵏ ⵓⵔⵣⵣⵓ ⴰⵎⴰⵙⵙⴰⵏ ⵙ ⵓⵙⵎⴰⵢⵏⵓ ⵏ ⵜⵙⵎⵉⴳⴰⵍ ⵏⵏⵙ.