ⴰⵙⵉⵡⴹ ⵏ ⵜⵙⵎⵓⵏⵉ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 7 ⵢⵓⵍⵢⵓⵣ 2020

ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵏⵏⵙ ⵜⴰⵏⵎⵍⴰⵙⵙⵜ ⵙ ⵜⵏⵙⵙⵉⵅⴼⵜ ⵏ  ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵙⵙ ⵏ ⵓⵙⵉⵏⴰⵙ 07 ⵢⵓⵍⵢⵓⵣ 2020, ⵜⵥⵍⵉ ⵉ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⴷ ⵓⵎⵢⴰⵙⵙⴰ ⵏⵏⵙ ⴷ ⴽⵔⴰ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ.

ⵖ ⵜⵉⴹⴰⴼ: ⵉⵙⵔⵙ ⵓⵙⵉⵔⴰ ⵏ ⵓⵙⵇⵇⵉⵎ ⴰⵖⴰⵡⴰⵙ ⵏ ⵜⵡⵓⵔⵉⵡⵉⵏ ⵏ ⵜⵖⵉⵎⵉⵜ ⵜⴰⵏⵎⵍⴰⵙⵙⵜ ⵏ ⵡⴰⵢⵏⴰⵙ 13 ⵢⵓⵍⵢⵓⵣ ⵍⵍⵉ ⵔⴰⴷ ⵢⵉⵍⵉ ⴼ ⴽⵕⴰⴹ ⵉⴳⵔⴰⵏ ⵓⵏⴱⵉⴹⵏ: ⵜⴰⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⴰⵏⵜ ⴷ ⵜⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵉⵏ, ⴰⵎⴰⵡⴰ ⴷ ⵡⴰⵙⵙⴰⵢ ⴷ ⵍⵓⵊⵉⵙⵜⵉⴽ ⴷ ⵡⴰⵎⴰⵏ, ⴰⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ.

ⵖ ⵓⵙⵓⵊⴷ ⵏ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵉⵣⴷⵉⵏ ⴷ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵏ ⵡⴰⵢⵏⴰⵙ 20 ⵢⵓⵍⵢⵓⵣ, ⵉⵙⴷⴷⵉⴷ ⵓⵙⵉⵔⴰ ⵏ ⵓⵙⵇⵇⵉⵎ ⴼ ⵡⴰⵜⵉⴳ ⵏ ⵉⵎⵔⵙⵉ ⵏ ⵉⵄⵔⵔⵉⵎⵏ ⵙ ⵉⵎⵏⴰⴷⵏ ⵏⵏⵙ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⴷ ⵡⵉⵏ ⵜⵓⵡⵊⴰ, ⵍⵍⴰⵏⵜ ⴷⴰⵔⵙ ⵜⵏⴰⵥⴰⵕⵉⵏ ⵎⵇⵇⵓⵔⵏⵉⵏ ⵍⵍⵉⵖ ⵉⴳⴰ ⵜⴰⵔⵙⵍⵜ ⴷ ⵡⴰⵡⵜⵜⴰⵙ ⴷ ⵉⵎⵉⵙⵙ ⵏ ⵜⴳⵎⵉ. ⵉⵙⵙⴽⵜⵉ ⴷ ⵓⵏⵙⵙⵉⵅⴼ ⴷ ⵉⴳⵎⴰⵎⵏ ⵏ ⵓⵙⵉⵔⴰ ⵜⵉⵙⵖⴰⵍ ⵥⵍⵉⵏⵉⵏ ⵙ ⵜⴷⵓⵍⵉ ⴰⴷ ⵜⴰⵏⴰⵎⵓⵏⵜ ⵖ ⵓⵙⵡⵉⵔ ⵏ ⵉⵣⵔⴼⴰⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ: ⴰⵙⵉⴷⴼ ⵙ ⵜⵡⵓⵔⵉ, ⵜⴰⴷⵓⵙⵉ, ⴰⵙⵙⵍⵎⴷ, ⴰⵙⵎⵓⵜⵜⴳ, ⵜⴰⵣⴷⵓⵖⵜ. ⴷ ⴽⵓ ⵎⴰ ⵔⴰⴷ ⵢⴰⵡⵙ ⵖ ⵓⵙⴷⵓⵙ ⵏ ⵓⵙⵉⴷⴼ ⴷ ⵜⵡⵉⵙⵉ ⵖ ⵜⵓⴷⵔⵜ ⵜⴰⵎⴰⵜⴰⵢⵜ ⵜⵓⵖⵔⵉⵎⵜ ⴷ ⵜⵙⵔⵜⴰⵏⵜ ⵙ ⵜⵖⴰⵔⴰⵙⵜ ⵉⵕⵡⴰⵏ ⴷ ⵉⵎⵙⴰⵙⴰⵏ ⴷ ⵜⴷⵓⵍⵉ ⴰⴷ ⴷ ⵡⴰⵜⵉⴳ ⴷⴰⵔⵙ ⵉⵍⵍⴰⵏ.

ⵉⵏⵏⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⵉⴳⴰ ⵓⵍⴰ ⴰⵎⴹⴰⴽⴰⵕ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⴷ ⵜⵏⵙⵙⵉⵅⴼⵜ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵢⵉⵍⵉ ⴼⵍⵍⴰⵙ ⵓⵅⵎⵎⴻⵎ ⵉⵛⵛⴰⵔⵏ.

ⵉⴼⴼⵖ ⵓⵙⵉⵔⴰ ⵏ ⵓⵙⵇⵇⵉⵎ ⴰⴷ ⵉⴳ ⵉⵎⵔⵙⵉ ⵏ ⵉⵄⵔⵔⵉⵎⵏ ⵙ ⴽⵓ ⵓⴷⵎⴰⵡⵏ ⵏⵏⵙ ⴷ ⵜⵏⴰⵥⴰⵕⵉⵏ ⵏⵏⵙ ⴷ ⴰⵢⵍⵍⵉ ⴽⵓⵍⵍⵓ ⵙⵉⴳⴳⵉⵍⵏ, ⵉⵎⵔⵙⵉ ⵏ ⵜⵖⵉⵎⵉⵜ ⵜⴰⵢⵢⵓⵔⴰⵏⵜ ⵏ ⵡⴰⵢⵏⴰⵙ 20 ⵢⵓⵍⵢⵓⵣ ⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ.

ⵖ ⵓⵣⵣⵔⴰⴼ: ⵉⵥⵕⴰ ⵓⵙⵉⵔⴰ ⵉⴹⵕⵉⵚⵏ ⵍⵍⵉ ⵜⵉⴷ ⵍⴽⵎⵏⵉⵏ, ⵉⵙⵓⵜⴳ ⵜⵓⴳⴳⴰⵙ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵙ ⴽⵓ ⵉⴳⵎⴰⵎⵏ ⵏⵏⵙ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⵓⵎⴹⴰⴽⴰⵕ ⵉⵕⵡⴰⵏ ⵖ ⵜⵖⵔⵉ ⵏ ⵓⵙⵏⴼⴰⵔ ⵉⵣⴷⵉⵏ ⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⵓⵙⴰⵏⵏ ⴷ ⵜⵎⵙⴽⴰⵔ ⵏ ⵓⵙⵉⵡⴹ ⵏⵏⵙⵏ. ⵖⵎⴽ ⵍⵍⵉ ⵉⵥⵕⴰ ⵓⵙⵉⵔⴰ ⵢⴰⵣⵏ ⵉ ⵜⵙⵇⵇⵉⵎⵜ ⵏ ⵜⵣⵔⴼⵜ ⴷ ⵓⵣⵣⵔⴰⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵏⴼⴰⵔ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⵏⴳⵎⴰⵎ ⴰⵏⴰⵎⵓⵔ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵖ ⵜⵖⵔⵉ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ: ⵍⵍⵉ ⵔⴰⴷ ⵉⵜⵜⵓⵙⵎⵏⵉⴷ ⵖ ⵜⵖⵉⵎⵉⵜ ⵜⴰⵎⴰⵜⴰⵢⵜ ⵉⵛⵛⴰⵔⵏ ⵏ ⵙⵉⵏ ⵉⵙⵇⵇⵉⵎⵏ ⴰⵙⵙ ⵏ ⵓⴽⵕⴰⵙ 08 ⵢⵓⵍⵢⵓⵣ, ⵉⵙⵔⵙ ⵓⵙⵉⵔⴰ ⴰⵖⴰⵡⴰⵙ ⵉⵣⴷⵉⵏ ⵙ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ. ⵉⵙⵏⵎⴰⵍⴰ ⵓⵍⴰ ⴰⴽⵓⴷ ⵏ ⵓⵎⴹⴰⴽⴰⵕ ⵙ ⵓⵎⵛⴰⵡⴰⵕ ⴷ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ.

ⵖ ⵓⵎⵢⴰⵙⵙⴰ ⵊⴰⵔ ⵓⵙⵇⵇⵉⵎ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ: ⵉⵙⴷⴷⵉⴷ ⵓⵙⵇⵇⵉⵎ ⴼ ⵡⴰⵜⵉⴳ ⵏ ⵉⵎⵢⴰⵙⵙⴰⵜⵏ ⴰⴷ ⵖ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⴰⴳⴷⵓⴷⴰⵏ ⵃⵎⴰ ⴰⴷ ⵢⵉⵍⵉ ⵚⴰⵃⴰ ⵖ ⵜⵎⵓⵣⴰⵢⵉⵏ ⵥⵍⵉⵏⵉⵏ ⵍⵍⵉ ⴷ ⵙⵙⴼⵖⵏⵜ ⵜⵎⵔⵙⴰⵍ ⴰⴷ, ⵎⴰ ⴰⵏⵏ ⴰⴼ ⵏⵉⵜ ⵙⴰⵡⵍⵏ ⴽⵓ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵓⵙⵉⵔⴰ.

ⵖⵎⴽ ⴰⵏⵏ ⴰⴼ ⴷ ⵉⵎⵛⴰⵛⴽⴰ ⵓⵙⵉⵔⴰ ⴼ ⵜⵓⵜⵜⵔⴰ ⵏ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵉ ⵓⵙⵇⵇⵉⵎ ⵏ ⵓⵎⵣⵉⵣⵡⵔ ⴰⴷ ⵉⴼⴽ ⵜⴰⵏⵏⴰⵢⵜ ⵏⵏⵙ ⴼ ⵉⵍⵓⴳⵏⵏ ⵏ ⵓⵎⵣⵉⵣⵡⵔ ⵖ ⵜⵎⵔⵙⴰⵍ ⵏ ⵓⵙⵙⵍⵎⴷ ⵓⵙⵍⵉⴳ ⵙ ⵓⵎⵙⴰⵙⴰ ⴷ ⵓⵎⵏⵏⵉ 5 ⵏ ⵓⵙⵍⴳⵏ ⵏ ⵜⵎⵔⵙⵍⵜ ⵉⵜⵜⵓⴱⴷⴰⵔⵏ. 

ⵖ ⵓⵎⵙⴰⵙ ⴷ ⵓⵎⵏⵏⵉ 340 ⵏ ⵓⵙⵍⴳⵏ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵓⵜⵜⵔⴰ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ, ⵉⵎⵛⴰⵛⴽⴰ ⴷ ⵓⵙⵉⵔⴰ ⴰⴷ ⵜⵉⵍⵉ ⵜⵓⵜⵜⵔⴰ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ ⴰⴷ ⵉⵙⵎⵏⵉⴷ ⵢⴰⵏ ⵖ ⵉⴳⵎⴰⵎⵏ ⵏⵏⵙ ⴷⴰⵜ ⵏ ⵜⵙⵇⵇⵉⵜ ⴰⴷ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⵅⴼ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 72.18 ⵉⵣⴷⵉⵏ ⴷ ⵓⵏⴳⵔⴰⵡ ⵏ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵣⵎⵎⵉⵎⵏ.

ⵖ ⵓⵎⵢⴰⵙⵙⴰ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ: ⵉⵎⵛⴰⵛⴽⴰ ⴷ ⵓⵙⵉⵔⴰ ⴼ ⵜⵓⵜⵜⵔⴰ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⴼ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵅⴼ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 04.20 ⵉⵣⴷⵉⵏ ⴷ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵜⴰⵍⵉⴽⵟⵕⵓⵏⵉⵜ ⵙ ⵓⵎⵙⴰⵙ ⴷ ⵓⵎⵏⵏⵉ 25 ⵖ ⵓⵙⵍⴳⵏ ⵏ ⵜⵎⵔⵙⵍⵜ ⴰⴷ ⴷ ⵓⵎⵏⵏⵉ 344 ⵏ ⵓⵙⵍⴳⵏ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ.