ⴰⵏⵎⵓⵇⵇⴰⵕ ⴰⴱⵕⵍⴰⵎⴰⵏⵉ ⴰⵙⴳⴳⵯⵙⴰⵏ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ: ⵜⵉⵖⵔⵉ ⵉ ⵓⵙⵙⵔⵚⵓ ⵏ ⵓⴼⵔⴰⴽ ⴰⵏⴰⵎⵓⵏ ⴷ ⵓⵙⴷⵓⵙ ⵏ ⵓⵎⵎⵉⵥⵏ

ⴷⴷⵓ ⵉⵡⵉⵣ ⴰⵎⴰⵜⵜⵓⵢ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵎⵡⴰⵙ 22 ⵏⵓⵡⴰⵏⴱⵉⵔ 2024 ⴳ ⵕⵕⴱⴰⵟ, ⴰⵏⵎⵓⵇⵇⴰⵕ ⴰⴱⵕⵍⴰⵎⴰⵏⵉ ⴰⵙⴳⴳⵯⵙⴰⵏ ⴰⵎⵣⵡⴰⵔⵓ ⴼ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ ⴷⴷⵓ ⵜⵎⴰⵜⴰⵔⵜ: ⴰⴱⵕⵍⴰⵎⴰⵏ ⴰⵍⴰⵢ ⴰⵙⵉⵍⴰⵏ ⵉ ⵓⵙⴽⵔ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ, ⵙ ⵜⴷⵔⴰⵡⵜ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉⵜⵜⵓⵙⵎⴰⴳⴰⵍⵏ ⵙ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⴱⵕⵍⴰⵎⴰⵏⵉⵢⵏ ⴷ ⵉⴳⵯⵏⵙⴰⵙⵏ ⵏ ⵜⵎⴰⵡⴰⵙⵉⵏ ⴷ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵉⴱⵕⵍⴰⵎⴰⵏⵏ ⵉⵎⴷⴷⵓⴽⴽⵯⴰⵍ ⴷ ⵜⵎⴰⴷⴷⴰⵙⵜ ⵏ ⵜⵎⵜⵜⴰ ⵎⵓⵏⵏⵉⵏ ⴷ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴷ ⵉⵎⵓⵣⴰⵢⵏ ⴷ ⵉⵎⵔⵣⴰ. 

ⴳ ⵓⵏⵏⵓⵕⵣⵎ, ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⴳⴰⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵜⵉⵍⵉⵜ ⵏⵏⵙⵏⵜ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ ⴳⴰⵏ ⵜⵉⵎⵉⵜⴰⵔ ⵏ 25 ⵏ ⵓⵙⴳⴳⵯⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉ ⵉⴱⴷⴷⵏ ⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴷ ⵡⴰⴷⴷⵓⵔ ⵏⵏⵙⵏⵜ ⴳ ⵉⵎⵓⴽⵏⵏ ⵏ ⵜⴳⵍⴷⵉⵜ ⴳ ⵓⴼⴽⴽⵓⵥ ⵏ ⵓⵙⴳⴳⵯⴰⵙ. 

ⵉⵙⵎⵏⵉⴷ ⵓⵏⵙⵙⵉⵅⴼ ⵉⵎⵓⴽⴽⵏ ⵣⴷⵉⵏⵉⵏ ⴷ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⵍⵍⵉ ⵉⵙⴽⵔ ⵍⵎⵖⵔⵉⴱ, ⴷ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ. ⴷ ⵜⵉⵍⴰⵍⵜ ⵏ ⵓⵏⵎⵓⵇⵇⴰⵔ ⴰⴷ ⴳ ⵓⵙⵔⵙ ⵏ ⵜⵙⵓⵎⴰⵔ ⵏ ⵓⵙⴷⵓⵙ ⵏ ⵓⵎⵎⵉⵥⵏ ⴳ ⵓⵙⴰⵜⵉ ⵏ ⵓⴷⵓⵙⵜⵓⵔ ⴷ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⵍⵍⵉ ⵉⴱⴷⴷⵏ ⴼ ⵜⵓⵡⵊⴰ ⴷ ⵉⵣⵔⴼⴰⵏ ⵏⵏⵙ. 

ⵉⵙⴷⴷⵉⴷ ⵎⴰⵙⵙ ⵎⵓⵃⴰⵎⵎⴰⴷ ⵡⵍⴷ ⵕⵕⴰⵛⵉⴷ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵜⵉⵙⵓⵔⴰⴼ ⵎⵇⵇⵓⵔⵏⵉⵏ ⵉ ⵓⵙⴷⵓⵙ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ ⵊⴰⵔ ⵓⵔⴳⴰⵣ ⴷ ⵜⵎⵖⴰⵔⵜ, ⵍⵍⵉ ⵉⴳⴰⵏ ⵜⴰⵙⵉⵍⴰ ⴳ ⵓⵙⵔⵙ ⵏ ⵜⵙⵔⵜⴰⵢ ⵜⵉⵣⵣⵔⴰⴼⵉⵏ ⴷ ⵜⵙⵜⵔⴰⵜⵉⵊⵉⵢⵉⵏ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏ, ⴷⴷⴰⵡ ⵉⵡⵉⵣ ⴰⵎⴰⵜⵜⵓⵢ ⵏ ⵓⴳⵍⴷⵓⵏ ⵏ ⵉⵎⵓⵎⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ. 

ⵉⵙⴷⴷⵉⴷ ⵓⵍⴰ ⴼ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵓⵙⵊⵔ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⵉⵎⴰⵜⵜⵓⵢⵏ,  ⴷ ⵉⵎⵇⵇⵏⵏ ⵉⴳⵔⴰⵖⵍⴰⵏⵏ ⴷ ⵡⴰⵜⵉⴳⵏ ⵉⵎⴰⴹⵍⴰⵏⵏ ⴷ ⵉⵣⵣⵔⴰⴼⵏ ⵉⵏⴰⵎⵓⵔⵏ ⴱⴷⴷⵏⵉⵏ ⴼ ⵜⵏⴳⴰⴷⴷⴰⵢⵜ ⵜⴰⵔ ⴰⵙⵏⵓⵃⵢⵓ, ⴷ ⵓⵙⴷⵓⵙ ⵏ ⵜⵓⴳⴳⴰⵙ ⴳ ⵓⵎⵏⵉⴷ ⴰⴷ ⵙ ⵉⵡⵇⵇⵔ ⵏ ⵓⵎⵏⵣⴰⵢ ⴷ ⵡⴰⵜⵉⴳⵏ ⵥⵉⵍⵏⵉⵏ ⵍⵍⴰⵏⵉⵏ ⵖ ⵓⵙⴳⴷ ⵏⵏⵖ ⵍⵉⵙⵍⴰⵎ, ⵉⴳⴰⵏ ⵡⵉⵏ ⵜⵏⴰⵎⵎⴰⵙⵜ ⵉⴼⴽⴰⵏ ⴰⴷⴷⵓⵔ ⵉ ⵜⵎⵖⴰⵔⵜ ⴳ ⵉⴱⴹⵉⵢⵏ ⵏⵏⵏⵙ. 

ⵜⵙⵓⵜⴳ ⵎⴰⵙⵙⴰ ⵏⴰⵊⵡⴰ ⴽⵓⴽⴽⵓⵙ ⵜⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ, ⵓⵎⵎⵉⵥⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ, ⵜⵉⵏⵉⵜ ⵎⴰⵙ ⵉⴽⵛⵎ ⵓⵏⵎⵓⵇⵇⴰⵔ ⴰⴷ ⴳ ⵓⵖⴰⵡⴰⵙ ⵏ ⵜⵔⴰⴱⴱⵓⵜ, ⴰⵢⵍⵍⵉ ⵉⵎⵎⴰⵍⴰⵏ ⵜⵉⵔⴰⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⵎⵖⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⵙ ⵜⵎⵙⴽⴰⵔ ⵏⵏⵙ ⵜⵉⴷⵙⵜⴰⵔⵉⵏ.  

ⵜⵙⴷⴷⵉⴷ ⵎⴰⵙⵙⴰ ⵏⴰⵊⵡⴰ ⴽⵓⴽⴽⵙ ⵎⴰⵙ ⵉⵔⴰ ⵓⵙⴽⵔ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ ⴰⴽⵛⵓⵎ ⵏ ⵎⴰⵕⵕⴰ ⵉⴳⵔⴰⵏ ⴷ ⵓⵍⵜⴰⵖ ⵏ ⵎⴰⵕⵕⴰ ⵉⵎⵙⵜⴳⴳⴰⵔⵏ, ⴷ ⵓⵏⵏⵓⵕⵥⵎ ⵜⵉⴳⵔⴰⵖⵍⴰⵏⵉⵏ ⴳ ⵢⵉⴳⵔ ⴰⴷ ⵍⵍⵉ ⴷ ⵣⴷⵉⵏ ⴽⵉⴳⴰⵏ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ, ⵖⵎⴽ ⴰⵏⵏ ⵓⵍⴰ ⵜⴰⵡⵓⵔⵉ ⵉⵛⵛⴰⵔⵏ.

ⵜⵙⴰⵡⵍ ⵎⴰⵙⵙⴰ ⵏⴰⵄⵉⵎⴰ ⴱⵏ ⵢⴰⵃⵢⴰ, ⵜⴰⵎⴰⵡⵙⴰⵙⵜ ⵏ ⵜⵡⵉⵣⵉ ⴷ ⵓⵙⵉⴷⴼ ⴰⵏⴰⵎⵓⵏ  ⴷ ⵜⵓⵡⵊⴰ, ⴼ ⵓⵎⵎⵉⵥⵏ ⵉⴷⵎⵙⴰⵏⵏ ⵜⵜⴰⵡⵙⴽⴰⵔⵏⵉⵏ ⵉ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ, ⵜⵉⵏⵉ ⵎⴰⵙ ⵉⵜⵜⴰⵡⵙ ⵓⵙⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ ⴳ ⵓⵙⵙⵕⵚⵓ ⵏ ⵜⵏⴳⴰⴷⴷⴰⵢⵜ ⵊⴰⵔ ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ ⴳ ⵓⵙⴽⵔ ⵏ ⵜⴳⵎⵉ. 

ⵜⵙⵎⵏⵉⴷ ⵓⵍⵍⴰ ⵜⵓⴳⴳⴰⵙ ⵜⵜⴰⵡⵙⴽⴰⵔⵏⵉⵏ ⴳ ⵓⵎⵏⵉⴷ ⴰⴷ, ⵙ ⵓⵙⵎⵓⵙⵙ ⵏ ⵉⵎⵙⴽⴰⵔⵏ ⴷ ⵉⵖⴰⵡⴰⵙⵏ ⴷ ⵉⵙⵖⵍⵏ ⵏ ⵓⴹⴼⵕ, ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵎⴰⵕⵕⴰ ⵉⵎⵙⵜⴳⴳⴰⵔⵏ, ⵜⵖⵔ ⵉ ⵜⵉⵍⵉⵜ ⵏ ⵜⵎⵢⴰⴷⴰⵙⵜ ⵢⵓⵎⴰⵏ ⵅⴼ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴷ ⵓⵙⴽⵔ ⵏ ⵜⵏⴳⴰⴷⴷⴰⵢⵜ ⵙ ⵎⴰ ⵔⴰⵙ ⵉⵙⵎⵖⵔ ⴰⵙⵔⵙ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ. 

ⵉⵙⴷⴷⵉⴷ ⵎⴰⵙⵙ ⴰⵃⵎⴰⴷ ⵕⵉⴹⴰ ⵛⵛⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ, ⴼ ⵡⴰⵜⵉⴳ ⵏ ⵓⵙⵏⵎⴰⵍⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵏⵎⵓⵇⵇⴰⵔ ⴰⴷ, ⵉⵙⵓⵜⴳ ⵓⵎⵎⵉⵥⵏ ⵏ ⵜⵎⴰⵣⵉⵔⵜ ⵏⵏⵖ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⵙⴷⵓⵙ ⵏ ⵜⵏⴳⴰⴷⴷⴰⵢⵜ, ⴰⵢⵍⵍⵉ ⵉⴳⴰⵏ ⴰⵙⴰⵡⵓⵔ ⴰⵣⵔⴼⴰⵏ ⴷ ⵓⵏⴳⵉⵎ ⵉⵍⵍⴰⵏ ⴳ ⵓⵖⴰⵡⴰⵙ ⵏ ⵓⵙⵇⵇⵉⵎ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵓⵡⵏⴹⴰⵏ. 

ⵖⵎⴽ ⵍⵍⵉ ⵉⵙⴷⴷⵉⴷ ⴼ ⵓⵚⴽⵓ ⵉⵛⵛⴰⵔⵏ ⵉ ⵓⵙⵎⵖⵔ ⵏ ⵜⵏⴳⴰⴷⴷⴰⵢⵜ ⴷ ⵓⵙⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ ⵙ ⵉⵙⵏⴼⵍⵏ ⵉⵣⵔⴼⴰⵏⵏ ⴷ ⵉⵎⵔⵙⵍⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵍⵙⴰⵏⵏ. 

ⵉⵙⴷⴷⵉⴷ ⵎⴰⵙⵙ ⵎⵓⵄⵉⵣⵣ ⴷⵔⵉⵙ, ⴰⵏⵎⵀⴰⵍ ⴰⵙⴳⴰⵡⴰⵏ ⵜ ⵜⴳⵔⴰⵡⵜ ⵏ ⵜⵎⵎⵜⴰ ⵎⵓⵏⵏⵉⵏ ⵉ ⵜⵎⵖⴰⵔⵜ ⴳ ⵜⵎⵉⵣⴰⵔ ⵏ ⵡⴰⵄⵕⴰⴱⵏ ⴼ ⵓⵙⵡⵓⵔⵉ ⴰⴽⴷ ⴰⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⴷⵓⵙ ⵏ ⵓⵎⴹⴰⴽⴰⵔ ⴳ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵜⴰⵎⵏⵜⴰⵢⵜ, ⴷ ⵜⵙⵓⵔⴰⴼ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴳ ⵓⵎⵙⴰⵙⴰ ⵏ ⵉⵣⵣⵔⴰⴼⵏ ⴷ ⵉⵙⵖⵡⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ. 

ⵉⵙⴰⵡⵍ ⵓⵍⴰ ⴼ ⵜⵙⵓⵔⴰⴼ ⵏ ⵜⴳⵍⵙⵉⵜ ⵏ ⵍⵎⵖⵉⴱ ⵉⵙⵔⵙⵏ ⵜⴰⵙⴰⵙⵜⵍⵜ ⵏ ⵡⴰⵏⴰⵡ ⴰⵏⴰⵎⵓⵏ, ⵜⴳ ⴰⵏⴰⵡ ⴰⵎⴰⴹⵍⴰⵏ, ⴰⵢⵍⵍⵉ ⵉⵎⵎⴰⵍⴰⵏ ⴰⵙⵖⵡⴰⵏ ⴰⵣⵣⵔⴰⴼ ⴷ ⵓⵖⵔⵎⴰⵏ ⵉ ⵓⵙⵏⴰⵍ ⵏ ⵓⵙⵙⵉⵥⴹⵕ ⵏ ⵜⵎⵖⴰⵔⵉⵏ, ⵢⵉⵏⵉ ⵎⴰⵙ ⵜⴳⴰ ⵜⵙⵏⵜⴰⵢⵜ ⵜⴰⴳⵍⴷⴰⵏⵜ ⵏ ⵓⵎⵓⴽⵏ ⵏ ⵓⵙⵍⴳⵏ ⵏ ⵜⵓⵡⵊⴰ ⵜⵓⴳⴳⴰ ⴼ ⵜⵣⵡⵉⵔⵉ ⵏ ⵜⴳⵍⴷⵉⵜ ⵉ ⵓⵙⴷⵓⵙ ⵏ ⵉⵣⵔⴼⴰⵏ ⵏ ⵜⵎⵖⴰⵔⵉⵏ ⴳ ⵓⵙⴰⵜⵉ ⵏ ⵜⵓⵡⵊⴰ, ⴷ ⵜⵏⵙⵜⴰⵢⵜ ⵏ ⵡⴰⵏⴰ ⵓⵏⴳⵉⵎ ⴰⵎⴰⵢⵏⵓ ⵉⵡⴰⵜⵜⵙⵏ ⵓⵍⴰ ⴰⵙⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ. 

ⵜⵥⵍⵉ ⵜⵖⵉⵎⵉⵜ ⵜⴰⵎⵣⵡⴰⵔⵓⵜ ⵉ ⵓⵙⵎⵏⵉⴷ ⵏ ⵜⵉⵔⵎⵉⵜⵉⵏ ⵏ ⵉⵡⴰⵏⴽⵏ ⵏ ⵎⴰⵍⴰⵡⵉ ⴷ ⵥⴰⵎⴱⵢⴰ ⴷ ⵍⴱⵉⵏⵉⵏ, ⵜⵉⵍⵉ ⵜⵖⵓⵔⵉ ⵉ ⵓⵙⵔⵙ ⵏ ⵉⵙⵍⴳⵏⵏ ⵉ ⵚⴰⵃⴰ ⵏ ⵜⵎⵖⴰⵔⵜ ⴳ ⵜⵎⵉⵣⴰⵔ ⴰⴷ, ⴷ ⵓⵙⵎⵔⵙⵍ ⵏ ⵓⵎⴹⴰⴽⴰⵔ ⴰⴱⵕⵍⴰⵎⴰⵏⵉ ⵉⵣⵍⵉⵏ ⴷ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ. 

ⵖⵎⴽ ⴰⵏⵏ ⵓⵍⴰ ⴰⵙⵎⵖⵔ ⵏ ⵓⵎⴹⴰⴽⴰⵕ ⴼ ⵓⵙⵙⵉⵥⴹⵕ ⵏ ⵜⵎⵖⴰⵔⵉⵏ ⴷ ⵜⵉⴽⴽⵉ ⵏⵉⵣⵔⴼⴰⵏ ⴳ ⵓⵎⵏⵉⴷ ⵏ ⵜⵣⵣⵓⵍⵉⵏ ⴰⵜⵜⵓⵢⵏⵉⵏ, ⴷ ⵜⴷⵍⵙⴰ ⵏ ⵜⵏⴳⴰⴷⴷⴰⵢⵜ ⴷ ⵓⵙⵉⵜⵜⵉ ⵏ ⵉⵎⵣⴰⵔⴰⵢⵏ ⴳ ⵜⵖⵔⴰⴷ. 

ⴳ ⵜⵖⵉⵎⵉⵜ ⵜⵉⵙ ⵙⵏⴰⵜ, ⵉⵍⵍⴰ ⵓⵎⴹⴰⴽⴰⵕ ⴼ ⵜⴷⵔⴰⵡⵜ ⵏ ⵜⵎⵖⴰⵔⵜ ⴳ ⵜⵓⴷⵔⵜ ⵜⴰⵎⴰⵜⴰⵢⵜ, ⴷ ⵓⵙⴷⴷⵉⴷ ⴼ ⵓⵙⵙⵉⵥⵥⴹⵕ ⴰⵙⵔⵜⴰⵏ ⴷ ⵓⴷⵎⵙⴰⵏ, ⵙ ⵓⵣⵣⵔⴰⵢ ⵏ ⵉⵣⵣⵔⴰⴼⵏ, ⴷ ⵓⵙⵎⵔⵙⵍ ⵏ ⵡⴰⵏⴰⵡ ⴰⵏⴰⵎⵓⵏ ⴳ ⵜⵙⵔⵜⴰⵢ ⵙ ⵜⵎⵢⴰⴷⴰⵙⵜ ⵉⵙⵙⴷⵓⵙⵏ ⵜⴰⴷⵔⴰⵡ ⵏ ⵜⵎⵖⴰⵔⵜ ⴳ ⵓⴳⴰⴷⴰⵣ ⵏ ⵜⵡⵓⵔⵉ. 

ⵜⵉⵍⵉ ⵓⵍⴰ ⵜⵖⵓⵔⵉ ⵉ ⵓⵙⵎⵓⵜⵜⴳ ⴰⴷⵎⵙⴰⵏ ⵏ ⵜⵎⵖⴰⵔⵉⵏ ⵉ ⵓⵙⴽⵔ ⵏ ⵓⵙⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵜ ⴷ ⵓⵙⴽⵔ ⵏⵜ ⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ ⵉⴱⴷⴷⵏ ⴼ ⵜⵓⵎⴰⵢⵉⵏ ⵜⵉⴷⵙⵜⴰⵔⵉⵏ ⵍⵍⵉ ⴼⴽⴰⵏⵉⵏ ⴰⵜⵉⴳ ⵉ ⵓⵙⵙⵉⵥⴹⵕ ⵏ ⵜⵎⵖⴰⵔⵉⵏ ⴳ ⵉⴳⵔⴰⵏ ⵏ ⵜⴷⵎⵙⴰ ⴷ ⵡⴰⵎⵓⵏ ⴷ ⵜⵙⵔⵜⵉⵜ. 

ⵉⵍⵍⴰ ⴰⵡⴷ ⴰⵙⵎⵏⵉⴷ ⵏ ⵜⵎⵙⴽⴰⵔ ⵉ ⵓⵙⴷⵓⵙ ⵏ ⵜⴳⵯⵏⵙⴰⵙⵜ ⵜⴰⵙⵔⵜⴰⵏⵜ ⵏ ⵜⵎⵖⴰⵔⵉⵏ ⴳ ⵓⵙⵡⵉⵔ ⴰⵏⴰⴽⴰⵍ ⵉ ⵓⵙⵙⵔⵚⵓ ⵏ ⵢⵉⵙⴽⵉⵍ. 

ⴳ ⵜⵖⵉⵎⵉⵜ ⵜⵉⵙ ⴽⵕⴰⴹⵜ, ⵉⵍⵍⴰ ⵓⵎⴹⴰⴽⴰⵕ ⵏ ⵜⵙⵔⵜⴰⵢⵜ ⵜⵉⴳⴷⵓⴷⴰⵏⵉⵏ ⴷ ⵜⵏⴰⵎⵓⵏⵉⵏ ⵣⴷⵉⵏⵉⵏ ⴷ ⵢⵉⵙⴽⵉⵍ, ⵙ ⵓⵣⵣⵔⴰⵢ ⵏ ⵉⵙⵖⵍⵏ ⵏ ⵓⵙⴳⵎⵉ, ⴷ ⵓⴷⵖⴰⵔ ⵏ ⵜⵎⵖⴰⵔⵉⵏ ⴷ ⵜⵔⴱⴰⵜⵉⵏ ⴳ ⵓⵙⵙⵍⵎⴷ ⴳ ⵙⵎⵎⵓⵙ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ. 

ⴳ ⵢⵉⴳⵔ ⵏ ⵓⵙⵙⵍⵎⴷ ⴰⵎⴰⵜⵜⵓⵢ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴰⵔ ⵎⵎⴰⵍⴰⵏ ⵉⵙⵖⵍⵏ ⵜⵉⵣⵡⵉⵔⵉ ⵏ ⵜⵎⵖⴰⵔⵉⵏ ⴳ ⵉⵙⵖⵍⵏ ⵏ ⵓⴼⵓⵖ ⴼ ⵡⴰⴷⴰⴼ ⵏ ⵜⵥⵍⴰⵢⵉⵏ ⵜⵉⵎⴰⵙⵙⴰⵏⵉⵏ ⴷ ⵜⴻⵜⵉⵇⵏⵉⵢⵉⵏ, ⴰⵢⵍⵍⵉ ⵔⴰⴷ ⵉⵙⴽⵔ ⵉⵡⴰⵜⵜⴰⴷⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⴼ ⵢⵉⵙⴽⵉⵍ, ⴷ ⵓⵙⵙⴼⵔⴽ ⵙ ⵜⵎⵓⴽⵔⵉⵙⵜ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ.

ⴳ ⵢⵓⴳⵔ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ, ⵉⵍⵍⴰ ⵓⵣⵣⵔⴰⵢ ⵏ ⵜⵏⴰⵥⴰⵕⵉⵏ ⵏ ⵓⵙⵎⴰⵜⴰ ⵏ ⵓⵙⴼⵍⵙ ⴰⴷⵓⵙⴰⵏ, ⴷ ⵓⵙⴽⵔ ⵏ ⵜⵏⴳⴰⴷⴷⴰⵢⵜ ⴷ ⵓⵙⵙⵉⵥⴹⵕ ⴰⴷⵓⵙⴰⵏ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ, ⴷ ⵓⵙⵎⵖⵔ ⵏ ⵉⵏⴳⵔⴰⵡⵏ ⴷ ⵉⵙⵡⵓⴷⴷⵓⵜⵏ ⵏ ⵓⴼⵔⴰⴳ ⴰⵏⴰⵎⵓⵏ ⴷ ⵓⵙⵉⵜⵜⵉ ⵏ ⵓⵛⵃⵓ ⴳ ⵜⵏⵓⴼⴰ ⵜⵉⵙⵍⴰⵏⵉⵏ ⴷ ⵜⴷⵓⵙⴰⵏⵉⵏ. 

ⵢⵉⵍⵉ ⵓⵍⴰ ⵓⵣⵣⵔⴰⵢ ⵏ ⵜⵎⵓⵛⴰ ⵏ ⵉⵖⴰⵡⴰⵙⵏ ⵏ ⵓⴼⵔⴰⴳ ⴰⵏⴰⵎⵓⵏ, ⵉⴼⴰⵡ ⵓⵖⵓⵍ ⵏ ⵜⵉⵍⵉⵜ ⵏ ⵜⵎⵖⴰⵔⵜ ⴳ ⵓⴳⴰⴷⴰⵣ ⵏ ⵜⵡⵓⵔⵉ ⴳ ⵙⵎⵎⵓⵙ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ ⵙ 19% ⴳ 2023 ⴷ 21.5 % ⴳ 2019. 

ⴳ ⵜⵖⵉⵎⵉⵜ ⵉⴳⴳⵓⵔⴰⵏ, ⵜⵍⵍⴰ ⵜⵓⵜⵔⴰ ⵉ ⵓⵙⵏⴼⵍ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵏ ⵜⵏⴳⴰⴷⴷⴰⵢⵜ ⴷ ⵢⵉⵙⴽⵉⵍ  ⵙ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⴹⴼⵕ ⵏ ⵜⵎⵓⴽⵔⵉⵙⵉⵏ ⵏ ⵜⵎⵖⴰⵔⵜ, ⴷ ⵓⵙⵓⵊⴷ ⵏ ⵜⵙⵓⵎⴰⵔ ⵜⵜⴰⵡⴱⴷⴰⵔⵏⵉⵏ ⴳ ⵉⵏⵇⵇⵉⵙⵏ ⵏ ⵜⵔⴰⴱⴱⵓⵜ. 

ⵖⵎⴽ ⵍⵍⵉ ⵜⵍⵍⴰ ⵜⵖⵓⵔⵉ ⵉ ⵓⵙⴽⵔ ⵏ ⵉⵙⵡⵓⴷⴷⵓⵜⵏ ⵏ ⵉⵎⴰⵍ ⵍⵍⵉ ⵔⴰⴷ ⵉⴹⵎⵏ ⵜⴰⵏⴳⴰⴷⴷⴰⵢⵜ ⴷ ⵓⴼⵔⴰⴽ ⴰⵏⴰⵎⵓⵏ ⴷⵉⴷⵙ ⵉⵣⴷⵉⵏ. 

ⴳ ⵜⴳⵉⵔⴰ ⵏ ⵓⵏⵎⵓⵇⵇⴰⵔ ⴰⴷ ⴰⴱⵕⵍⴰⵎⴰⵏⵉ, ⵜⵜⵓⵖⵔⴰ ⵜⴱⵔⴰⵜ ⵏ ⵓⵙⵓⴼⵓ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵏⵚⵕ ⵕⴱⴱⵉ.