ⵜⴰⴳⵓⵔⵉ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵓⵏⵎⵓⵇⵇⴰⵔ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴼ ⵉⵄⵔⵔⵉⵎ

ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ,

ⵎⴰⵙⵙ ⴰⵏⵙⵙⵉⵅⴼ ⵏ ⵜⵏⴱⴰⴹⵜ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⴰⵡⵙⴰⵙⵏ,

ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵉⴱⵕⵍⴰⵎⴰⵏⵉⵢⵏ,

ⵉⵄⵔⵔⵉⵎⵏ ⵏⵏⵖ ⵄⵣⵣⴰⵏⵉⵏ,

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ.

ⵉⴳⴰ ⵉⵢⵉ ⴰⴷⴷⵓⵔ ⴰⴷ ⵃⴰⴹⵕⵖ ⴷⵉⴷⵉⵓⵏ ⴳ ⵜⵡⵡⵓⵔⵉⵡⵉⵏ ⴳ ⵜⵖⵉⵎⵉⵜ ⵏ ⵓⵏⵏⵓⵕⵥⵎ ⵏ ⵓⵏⵎⵓⵇⵇⴰⵔ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵉ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ, ⴷⴰ ⵙⵏⵉⵎⵎⵉⵔⵖ ⵎⴰⵙⵙ ⴰⵏⵙⵙⵉⵅⴼ ⵏⵏⵄⵎⴰ ⵎⵉⵢⵢⴰⵕⴰ ⴼ ⵜⵖⵓⵔⵉ ⵏⵏⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵜⴷⵔⴰⵡⵜ ⴳ ⵓⵏⵏⵓⵕⵥⵎ ⵏ ⵜⵡⵡⵓⵔⵉ  ⴰⴷ ⵜⴰⵎⵙⴽⴰⵔⵜ ⵏ ⵢⴰⵏ ⵓⵙⴰⵢⵔⵓⵔ ⵍⵍⵉ ⵔⴰⴷ ⵉⵙⵎⵓⵏⵏ ⴽⴰⵔ ⵓⵎⵔⵙⵍⴰⵏ ⴷ ⵓⵖⵔⵎⴰⵏ ⴷ ⵜⵏⴰⵥⴰⵕⵉⵏ ⵏ ⵜⵏⵎⵓⵔⵉ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵏⵜⵜⵢⴰⵍⴽⴰⵎ ⴷ ⵉⵄⵔⵔⵉⵎⵏ ⵙ ⵓⵎⵙⴰⵡⴰⵍ ⴷ ⵓⵎⵢⴰⵡⴰⵙ ⴷ ⵓⵙⴰⵜⵉ ⴷ ⵓⵙⵏⵎⴰⵍⴰ, ⵏⵡⴰⵜⵜⵙ ⴰⴷ ⵏⵣⵣⵉⴳⵣ ⵙ ⵉⵎⴰⵍ, ⵏⴱⴷⴷ ⴼ ⵢⴰⵜ ⵜⴷⵓⵍⵉ ⵍⵍⵉ ⵉⴳⴰⵏ ⴷ ⵔⴰⴷ ⴱⴷⴷⴰ ⵜⴳ ⵢⴰⵜ ⵜⴷⵓⵙⵉ ⵜⴰⵙⵉⵍⴰⵏⵜ ⴳ ⵜⴷⵉⵏⴰⵎⵉⵜⵉⵏ ⵜⵉⵏⴰⵎⵓⵏⵉⵏ, ⴰⵢⵍⵍⵉ ⵉⵍⵍⴰⵏ ⵙ ⵜⵎⵙⴽⵔⵜ ⴳ ⵡⴰⴷⴷⴰⴷ ⵏⵏⵖ ⴰⵎⵖⵔⵉⴱⵉ, ⵍⵍⵉⵖ ⵟⵟⴰⴼⵏ ⵉⵄⵔⵔⵉⵎ ⴷ ⵜⵉⵍⴰⵍ ⴳ ⵉⵙⵓⵔⵙⵏ ⵏ ⵓⵚⴽⵓ ⵏ ⵓⵡⴰⵏⴽ ⴰⵏⴰⵎⵓⵔ ⴷ ⵓⵙⵕⵚⵓ ⵏ ⵓⵚⴽⵓ ⴰⵎⵔⵙⵍⴰⵏ ⴷ ⵜⴷⵉⵎⵓⵇⵔⴰⵟⵉⵜ ⴷ ⵓⵙⴽⵔ ⵏ ⵜⴳⵎⵉ.

ⵍⵍⵉⵖ ⵏⴼⵔⴽ ⵙ ⵓⴷⵖⴰⵔ ⴰⴷ, ⴷ ⵜⵉⵍⴰⵍⵉⵏ ⴰⴷ, ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⵜⴰⵎⵣⵡⴰⵔⵓⵜ ⴳ ⵓⵙⴷⵙⵜⵔ ⵏ ⵉⵣⵔⴼⴰⵏ ⵏ ⵉⵄⵔⵔⵉⵎⵏ, ⵜⵙⵊⵔ ⴳⵉⵙⵏ ⵜⵓⵛⵛⵉⵍⵉⵏ ⵉ ⴽⵓ ⵢⴰⵏ ⵉⴽ ⵏⵏⴰ ⴳⴰⵏ ⵓⴽⵍⴰⵏ ⵉⵙⵔⵜⴰⵏⵏ ⵏ ⵜⵏⴱⴰⴹⵉⵏ ⵏⵖ ⵜⵉⵎⵔⵙⴰⵍ ⵏⵖ ⵜⵉⴳⵔⴰⵡⵉⵏ ⵜⵉⵏⴰⴽⴰⵍⵉⵏ, ⵉⵙⴰⵡⵍ ⵓⵎⵏⵏⵉ 33 ⵏ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴼ ⵓⵛⵛⵉⵍⵏ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵙ ⵉⵣⵔⴼⴰⵏ ⵏ ⵉⵄⵔⵔⵉⵎⵏ, ⴷ ⵓⵙⴽⵔ ⵏ ⵓⵙⵇⵇⵉⵎ ⴰⵎⵛⵡⴰⵕ ⵏ ⵉⵄⵔⵔⵉⵎⵏ ⴷ ⵜⵡⵡⵓⵔⵉ ⵜⴰⵏⴰⵎⵓⵏⵜ, ⴷ ⵎⴰⴷ ⵉⵙⵉⴳⴳⵉⵍ ⴳ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ, ⴳⴰⵏⵉⵏ ⵡⵉⵏ ⵉⵄⵔⵔⵉⵎⵏ, ⵍⵍⵉ ⵜⵜⵓⵙⵏⵜⴰⵏⵉⵏ ⵙ ⵓⵙⵙⵍⵎⴷ ⴷ ⵓⵙⵎⵓⵜⵜⴳ ⴷ ⵓⵏⵏⵓⵕⵥⵎ, ⵓⵔ ⵜⵜⵓⵙⵎⴰⴷⵏ ⵙ ⵓⵙⵡⵓⵔⵉ ⴷ ⵜⴷⵔⴰⵡⵜ ⴳ ⵜⴳⵎⵉ ⴷ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵜⴷⵎⵙⴰⵏⵜ ⴷ ⵜⴷⵍⵙⴰⵏⵜ, ⴷ ⵓⵙⵡⵓⴷⴷⵓ ⵏ ⵜⵖⴰⵡⵙⴰ ⵜⴰⵎⴰⵜⴰⵢⵜ, ⵎⵇⵇⴰⵔ ⴱⵕⵕⴰ ⵏ ⵜⵎⵔⵙⴰⵍ.  

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵡⴰⴷ ⵉⵥⵕⵕⴰⵏ ⴰⵙⵙ ⴰⴷ ⴰⴷⴷⴰⴷⵏ ⵏ ⵉⵄⵔⵔⵉⵎⵏ ⴳ ⵓⵎⴰⴹⴰⵍ, ⵔⴰⴷ ⵉⵥⵔ ⵎⴰⵙ ⵜⴷⵔⵓⵙ ⵜⴷⵔⴰⵡⵜ ⵏ ⵜⴷⵓⵍⵉ ⴰⴷ ⴳ ⵜⵖⴰⵡⵙⴰ ⵜⴰⵎⴰⵜⴰⵢⵜ, ⵉⴳ ⵓⴽⵛⵓⵎ ⵙ ⵜⵡⵡⵓⵔⵉ ⴷ ⵜⵏⵓⴼⴰ ⵜⴰⵉⵏⴰⵎⵓⵏⵉⵏ ⵙⴳ ⵉⵡⵜⵜⴰⵙⵏ ⵉⴷⵙⵍⴰⵏⵏ ⵉⵏⴰⵎⵎⴰⵙⵏ ⵉⵡⵉⵏⵉⵏ ⵉⵄⵔⵔⵉⵎⵏ ⴰⵙⵙ ⴰⴷ, ⵉⵍⵉⵏⵜ ⵜⵓⵡⵍⴰⴼⵉⵏ ⵓⵔ ⴳⴰⴷⴷⴰⵏⵉⵏ ⵅⴼ ⴰⴷⴷⴰⴷⵏ ⴰⴷ. ⴰⵊⵊⴰⵜ ⴰⵖ ⴰⴷ ⵏⵙⴼⴰⵍ, ⴰⴷ ⵓⵔ ⵏⵙⵎⵓⵏ ⵉⵏⴰⵔⵓⵣⵏ ⵏ ⵉⵄⵔⵔⵎ ⴼ ⵎⴰⴷ ⵉⴳⴰⵏ ⴰⴷⵔⵎⴰⵏ ⵙⵇⵇⵉⵇⵏ, ⵏⵥⵕ ⵉⵎⵓⵔⵙⵏ ⵍⵍⵉ ⵙⴽⴰⵔⵏ ⵉⵄⵔⵔⵉⵎⵏ, ⵙⵍⴰⵡⴰⵏ ⴰⴽⴽⵯ ⴳ ⵡⴰⴷⴷⴰⴷ ⴰⵎⵖⵔⵉⴱⵉ.

ⴳ ⵓⵎⵏⵉⴷ ⴰⴷ, ⴰⵔ ⵏⵙⵇⵙⴰ: ⵢⴰⴽ ⴰⴷ ⵉⵄⵔⵔⵉⵎⵏ ⴰⴷ ⵉⴼⵜⵜⵓⵏ ⵙ ⵉⴼⴹⵏⵏ ⵙ ⵜⵏⴰⴼⵜ ⵜⴰⵙⵔⴷⴰⵙⵜ ⵎⵍⵉⵏ ⴰⵍⵜⴰⵖ ⴷ ⵓⵙⴽⵔ ⵏ ⵜⵎⵙⴽⵔⵜ ⵜⴰⵏⴰⵎⵓⵔⵜ ⴷⴼⴼⵉⵔ ⵏ ⵡⴰⵍⴰⵙ ⵏ ⵓⵙⵖⵣⵏ ⵏ ⵜⵏⴰⴼⵜ ⵜⴰⵙⵔⴷⴰⵙⵜ, ⴰⵢⵍⵍⵉ ⵉⵎⵎⴰⵍⴰⵏ ⵢⴰⵜ ⵜⵓⴼⵔⴰⵢⵜ ⵜⴰⵏⴰⵎⵓⵔⵜ ⴷ ⵜⵉⵏ ⵜⵏⵎⵓⵔⵉ ⴷ ⵓⵙⵢⴰⴼⴰ ⵙ ⵜⵎⴰⵙⴰⵢⵜ ? ⵓⵔ ⴷ ⵉⵄⵔⵔⵉⵎⵏ ⴰⴷ ⵉⵟⵟⴰⴼⵏ ⴰⵙⵙ ⴰⴷ ⴰⴷⵔⵉⵣ ⵏⵏⵙⵏ ⴳ ⵓⵎⵏⴰⴷ ⴰⵎⴰⵜⴰⵢ ⵙ ⵉⴷⵖⴰⵔⵏ ⵏ ⵓⵎⵢⴰⵡⴰⴹ ⴰⵏⴰⵎⵓⵏ ⴷ ⵜⵉⴽⵏⵓⵍⵓⵊⵉⵏ ⵜⵉⵎⴰⵢⵏⵓⵜⵉⵏ ? ⵓⵔ ⴷ ⵉⵄⵔⵔⵉⵎⵏ ⴰⴷ ⵉⵙⵎⵓⵙⵙⵓⵏ ⴰⵙⵙ ⴰⴷ ⵜⵓⴷⵔⵜ ⵏ ⵜⵓⵏⵏⵓⵏⵜ ⴷ ⵜⵉⵏ ⵜⴷⵍⵙⴰ ⴳ ⵜⵎⵙⵎⵓⵏⵉⵏ ⴷ ⵉⵙⴰⵢⵔⵓⵔⵏ ? ⵓⵔ ⴷ ⵉⵄⵔⵔⵉⵎⵏ ⴰⴷ ⵉⵙⴽⴰⵔⵏ ⴰⵙⵙ ⴰⴷ ⵜⵉⵍⴰⵍⵜ ⵉⴱⴷⴷⵏ ⴳ ⵓⵙⴰⵜⵉ ⴰⵖⵔⵎⴰⵏ, ⴳ ⵓⵙⴰⵜⵉ ⵏ ⵜⵎⴰⴷⴷⴰⵙⵉⵏ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵜⵖⵔⵎⵉⵏ ⴷ ⵉⵙⵓⵏⵏ ?

ⴳⴰⵏ ⵓⴷⵎⴰⵡⵏ ⵥⵉⵍⵏⵉⵏ ⴼⴰⵡⵏⵉⵏ ⵙⵖⴰⵡⵙⴰⵏⵉⵏ ⴰⵙⵓⵜⴳ ⴷ ⵓⵙⵎⵖⵔ, ⴷ ⵓⵎⵏⴰⴷ ⵏ ⵓⵙⵎⵔⵙⵍ ⴷ ⵓⵙⴰⵜⵉ.

ⵉⴳⴰ ⵖ ⵡⴰⵏⵏⴰⵣ ⵏⵏⵖ ⵉⵥⵉⵍⵏ ⴳ ⵍⵎⵖⵔⵉⴱ, ⵎⴰⵙ ⵏⵡⴰⵏⵜ ⵜⵎⵢⵓⵔⵉⵏ ⵏⵏⵖ ⴷ ⵜⵎⵙⴽⴰⵔ ⵏⵏⵖ ⵜⵉⵙⵔⵜⴰⵏⵉⵏ, ⴰⵢⵍⵍⵉⵖ ⵉⴳⴰ ⵓⵙⴷⵔⵓ ⵏ ⵉⵄⵔⵔⵉⵎⵏ ⴰⴼⵔⴰⴽ ⵉⵛⵛⴰⵔⵏ ⴷ ⵉⵕⵚⵏ ⴷ ⵓⵛⵛⵉⵍ ⴰⵙⵔⵜⴰⵏ ⴷ ⵓⵏⴰⵎⵓⵏ. ⵉⵇⵇⴰⵏ ⴰⴷ ⵓⵔ ⵏⵜⵜⵓ ⵜⵉⵍⴰⵍⵜ ⵍⵍⵉ ⵙⴽⴰⵔⵏⵜ ⵜⵎⴰⴷⴷⴰⵙⵉⵏ ⵜⵉⵙⵔⵜⴰⵏⵉⵏ ⵏ ⵉⵄⵔⵔⵉⵎⵏ ⴳ ⵓⵙⵖⵏⵓ ⵏ ⵜⵡⵡⵓⵔⵉ  ⵜⴰⵙⵔⵜⴰⵏⵜ. ⴳⵏⵜ ⴰⴱⴰⵢⵏⵓ ⴰⵏⴼⴳⴰⵏ ⵉⴱⵓⵖⵍⴰⵏ ⵢⴰⴽⴰⵏ ⵉⵎⵙⵜⴳⴳⴰⵔⵏ ⴷ ⵜⵓⴼⵔⵉⵏⵉⵏ ⵉ ⵜⵡⵡⵓⵔⵉ ⵜⴰⵙⵔⵜⴰⵏⵜ, ⴳⵉⵏⵜ ⵓⵍⴰ ⴰⵙⴰⵜⵉ ⵏ ⵓⵙⵡⵉⵏⴳⵎ ⴷ ⵓⵎⴹⴰⴽⴰⵕ, ⴷ ⵓⵖⴱⴰⵍⵓ ⵏ ⵜⵙⵓⵎⵔⵉⵏ, ⴷ ⵓⵙⴰⵢⵔⵓⵔ ⵉⵜⵜⴰⵡⵉⵏ ⵙ ⵜⵡⵡⵓⵔⵉ ⵜⴰⵙⵔⵜⴰⵏⵜ ⵉⴳⴰⴷⴷⴰⵏ ⴷ ⵜⵎⴰⵙⴰⵢⵜ, ⵜⴳ ⵜⴰⵎⴰ ⵏ ⵡⴰⵎⵓⵏ ⴰⵖⵔⵎⴰⵏ ⵉⵙⴰⵡⵓⵔⵏ ⵏ ⵓⴼⴰⵔⵙ ⵏ ⵜⵓⴼⵔⴰⵢⵉⵏ ⴷ ⵉⵎⵙⵜⴳⴳⴰⵔⵏ.

ⴳ ⵜⵙⴳⴰ ⵢⴰⴹⵏⵉⵏ, ⴷⴰ ⵏⵙⵇⵙⴰ ⵅⴼ ⵜⵎⴰⵎⴽⵜ ⵏ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵉⵏ ⴷⴰ ⵏ ⵉⵄⵔⵔⵉⵎⵏ ⵃⵎⴰ ⴰⴷ ⵉⵙⴽⵔ ⵉⵡⵜⵜⴰⵙⵏ ⵏⵏⵙ ⴳ ⵜⵙⵔⵜⵉⵜ ⴷ ⵜⵡⵡⵓⵔⵉ ⵜⴰⴳⴷⵓⴷⴰⵏⵜ. ⵙⴳ ⵜⵉⵎⵔⴰⵔⵓⵜⵉⵏ ⵍⵍⴰⵏⵉⵏ, ⵉⵇⵇⴰⵏⴷ ⵙ ⵉⵣⵡⴰⵔ ⴰⴷ ⵏⵙⴼⵍ ⴰⵙⵎⴰⵇⵇⵍ ⵏⵏⵖ ⵉ ⵉⵄⵔⵔⵉⵎⵏ, ⵏⵣⵣⵔⵉ ⵉⵙⵡⵉⵏⴳⵉⵎⵏ ⵏⵏⵖ ⵅⴼ ⵏⵏⵙ ⵏⴼⵔⴽ ⵙ ⵜⵥⴹⴰⵕⵉⵏ ⴷ ⵜⵙⵓⴳⴰⵔ ⵏⵏⵙ ⴼ ⵓⵙⵏⴼⵍⵓⵍ, ⴳ ⵜⵉⵙ ⵙⵏⴰⵜ ⵉⵇⵇⴰⵏ ⴰⴷ ⵏⵉⵜⵜⵉ ⴼ ⵓⵙⵄⵎⵕ ⴰⴷⵢⵓⵍⵓⵊⵉ ⴷ ⴰⴷ ⵏⵙⵙⴰⵔⵓ ⴳ ⵓⵙⵉⵍⵖ, ⵜⴰⵔ ⵏ ⴳⴰⵔ ⴰⵙⵎⵙⵙⵓ ⵉⵇⵇⴰⵏ ⴷ ⴰⴷ ⵏⴼⵜⵓ ⵙ ⵓⵙⵉⴷⴼ ⴷ ⵓⴷⵔⵓ, ⴱⵍⴰ ⵏⵜⵜⵉⵏⵉ ⵉ ⵉⵄⵔⵔⵉⵎⵏ ⴳⴰⵔ ⵉⵏⴰⵡⵏ, ⵉⵇⵇⴰⵏ ⴷ ⴰⴷ ⵏⵕⵥⵎ ⵉⵎⵏⴰⴷⵏ ⵏ ⵓⵙⵡⵉⵏⴳⵎ ⵉⴱⴷⴷⵏ ⴼ ⵓⵏⵍⵉ ⴷⴰⵜ ⵏⵏⵙ ⵏⴼⴽ ⴰⵙ ⵉⵎⴰⵙⵙⵏ ⵍⵍⵉ ⵔⴰⴷ ⴰⵙ ⵢⴰⵡⵙ ⴰⴷ ⵉⴼⵔⴽ ⵙ ⵡⴰⵜⵉⴳⵏ ⵏ ⵜⴷⵉⵎⵓⵇⵔⴰⵜⵉⵜ ⴷ ⵜⵎⵢⵉⴷⵉⵔⵜ, ⵉⴼⵔⴽ ⵙ ⵜⵎⵥⵍⴰⵢ ⵏ ⵡⴰⵎⵓⵔ ⵏⵏⵙ ⴷ ⵜⵥⴹⴰⵕⵉⵏ ⵏⵏⵙ, ⵉⵙⵏⴼⵍⵓⵍ ⴳ ⵓⵙⵏⵎⴰⵍⴰ ⴰⴷⵎⵙⴰⵏ ⴷ ⵜⵎⴰⴷⴷⴰⵙⵉⵏ ⵏ ⵓⴼⴰⵔⵙ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⵡⵉⵏ ⴷ ⵉⵎⵓⴽⵏⵏ ⵉⵎⵔⵙⵍⴰⵏⵏ ⴷ ⵉⵣⵣⵔⴰⴼⵏ ⵍⵍⵉ ⵜⵙⵖⵣⵏ ⵜⵎⴰⵣⵉⵔⵜ ⵏⵏⵖ, ⴳ ⵙⵏⴰⵜ ⵜⵎⵔⴰⵡⵉⵏ ⵏ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵎⴰⴷ ⵉⵥⵍⵉⵏ ⵙ ⵉⵄⵔⵔⵉⵎⵏ, ⴰⵙⵜⴰⵢ ⵏ ⵜⵙⵓⴳⴰⵔ ⵜⵉⵄⵔⵔⵉⵎⵉⵏ ⴳ ⵜⵎⵔⵙⴰⵍ ⵏ ⵜⴳⵯⵏⵙⴰⵙⵜ ⴷ ⵜⵎⵣⵣⴳⴰⵔⵜ. ⴰⵢⵍⵍⵉ ⵉⴳⴰⵏ ⵜⴰⵎⴰⵜⴰⵔⵜ ⴳ ⵓⵏⵛⴽ ⵏ ⵉⵄⵔⵔⵉⵎⵏ ⵍⵍⴰⵏⵉⵏ ⴳ ⵉⵙⵇⵇⵉⵎⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵙ ⵓⵎⴷⵢⴰ ⵓⴳⴳⴰⵔ ⵏ 41 % ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⴷⵔⵓⵙ ⵡⴰⵡⵜⴰⵢ ⵏⵏⵙⵏ ⴼ 50 ⵏ ⵓⵙⴳⴳⵯⴰⵙ ⴷ ⵓⴳⴳⴰⵔ ⵏ 17 % ⵉⴷⵔⵓⵙ ⵡⴰⵡⵜⴰⵢ ⵏⵏⵙⵏ ⴼ 40 ⵏ ⵓⵙⴳⴳⵯⴰⵙ.

ⵓⵔ ⴰⴽⴽⵯ ⴰⴳⴳⵓⴳⵏ ⴰⵏⵛⴽ ⴰⴷ ⴼ ⵎⴰⴷ ⵉⵍⵍⴰⵏ ⴳ ⴽⵉⴳⴰⵏ ⵏ ⵉⴱⵕⵍⴰⵎⴰⵏⵏ ⵏ ⵉⵡⴰⴽⵏ ⵉⵇⴱⵓⵔⵏ ⴳ ⵜⴷⵉⵎⵓⵇⵔⴰⵟⵉⵜ, ⴰⵔ ⵎⵎⴰⵍⴰⵏ ⵉⵏⴰⵡⵏ ⵏ ⵓⵎⵣⴰⵣⴰⵍ ⴳ ⵉⴱⵕⵍⴰⵎⴰⵏⵏ ⵏ ⵓⵕⵓⴱⴱⴰ ⵙ ⵓⵎⴷⵢⴰ, ⵎⴰⵙ ⴷ ⵜⴰⴳⵯⵏⵙⴰⵙⵜ ⵏ ⵉⵄⵔⵔⵉⵎⵏ ⵉⵍⴽⵎⵏ 40 ⵏ ⵓⵙⴳⴳⵯⴰⵙ, ⵓⵔ ⴰⴽⴽⵯ ⵜⵎⵎⵣⵔⵉ ⴽⵉⴳⴰⵏ ⴼ ⵓⵚⴽⵓ ⵏ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⴳ ⵜⴷⵓⵍⴰ ⵏ ⵡⴰⵡⵜⴰⵢ. ⴳ ⵓⵙⴰⵜⵉ ⴰⴷ, ⵉⵇⵇⴰⵏ ⴷ ⴰⴷ ⵏⵙⵓⵜⴳⵎⴰⵙ ⴷ ⴽⵉⴳⴰⵏ ⵏ ⵉⴱⵕⵍⴰⵎⴰⵏⵉⵢⵏ ⵉⵄⵔⵔⵉⵎⵏ ⵣⵔⵉⵏⵉⵏ ⵓⵎⵥⵏ ⵜⵉⵎⵓⵣⴰⵢⵉⵏ ⴳⴳⵓⵜⵏⵉⵏ ⵙⵎⵔⵙⵏ ⵓⵍⴰ ⵜⴰⵖⴰⵡⵙⴰ ⵜⴰⵙⵔⵜⴰⵏⵜ ⴰⵢⵍⵍⵉⵖ ⵉⵡⵉⵏ ⵜⴰⵎⵢⵉⵎⴰⵏⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵍⵉ ⵜⵏ ⵉⵙⵎⵍⵏ ⴷ ⵉⴳⵎⴰⵎⵏ ⴳ ⵜⵏⴱⴰⴹⵜ ⴷ ⵉⵎⵙⵜⴳⴳⴰⵔⵏ ⴳ ⵜⵎⵔⵙⵍⴰ ⵏ ⵜⵎⵙⵙⵓⴳⵓⵔⵜ. ⴳ ⵓⵎⵏⵉⴷ ⵢⴰⴹⵏⵉⵏ, ⵉⵇⵇⴰⵏ ⴷ ⵓⵙⵙⴽⵯⵜⵉ ⵏ ⵎⴰⴷ ⵢⴰⴽⴽⴰ ⵓⴷⵓⵙⵜⵓⵔ ⵏ ⵜⴳⵍⴷⵉⵜ ⴳ ⵜⵥⴹⴰⵕⵉⵏ ⴷ ⵎⴰⴷ ⵢⴰⴷ ⵢⴰⴽⴽⴰ ⴳ ⵉⵣⵔⴼⴰⵏ ⵉ ⵡⴰⵎⵓⵏ ⴰⵖⵔⵎⴰⵏ, (ⵍⵍⵉⵖ ⴰ ⵜⵜⵎⵓⵙⵙⵓⵏ ⵉⵄⵔⵔⵉⵎⵏ ⵙ ⵜⴷⵓⵙⵉ) ⴳ ⵢⵉⴳⵔ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴷ ⵜⵏⵎⵓⵔⵉ ⴷ ⵜⴷⵔⴰⵡⵜ ⴳ ⵓⵙⵡⵓⴷⴷⵓ ⵏ ⵜⵖⴰⵡⵙⴰ ⵜⴰⵎⴰⵜⴰⵢⵜ ⴷ ⵉⵎⵏⴰⴷⵏ ⵍⵍⴰⵏⵉⵏ ⴷⴰⵜ ⵏ ⵉⵎⵙⴽⴰⵔⵏ ⵉⵏⴰⵎⵓⵏⵏ ⴳ ⵜⵥⴹⴰⵕⵉⵏ ⵏ ⵓⵙⴰⵜⵉ ⵏ ⵜⵙⵏⵜⴰⵢⵉⵏ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵢⵉⵏ ⴳ ⵢⵉⴳⵔ ⵏ ⵜⵓⵍⴽⵉⵎⵉⵏ ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏⴷ ⵜⵜⴰⵡⵙⴰⵜⴰⵢⵏ, ⴷ ⵜⵓⵜⵔⴰⵡⵉⵏ ⵉ ⵓⵣⵣⵔⴰⴼ, ⴷ ⵜⴷⵔⴰⵡⵜ ⴳ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵖⵓⴷⵓ ⵏ ⵓⵣⵣⵔⴰⴼ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴰⵔ ⵉⵎⵎⴰⵍ ⵓⵎⵣⵔⵓⵢ ⵎⴰⵙⴷ ⵜⴰⵣⵣⵉⴳⵣ ⵏ ⵜⵎⵜⵜⵉⵡⵉⵏ ⵜⵣⴷⵉ ⴷ ⵜⴷⵔⴰⵡⵜ ⵉⵕⵡⴰⵏ ⵏ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⴷ ⵓⵙⵉⴷⴼ ⵏⵏⵙⵏ ⴳ ⵜⴳⵎⵉ. ⴳ ⵡⴰⴷⴷⴰⴷ ⵏⵏⵖ ⴰⵏⴰⵎⵓⵔ, ⵉⵕⵥⵎ ⵡⴰⵏⴰⵡ ⵓⵏⴳⵉⵎ ⴷ ⵉⵎⵓⴽⵏⵏ ⵉⵎⵔⵙⵍⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵍⵍⵉ ⵜⵙⴽⴰⵔ ⵜⵎⴰⵣⵉⵔⵜ ⵏⵏⵖ, ⵉⵕⵥⵎ ⵉⵎⵏⴰⴷⵏ ⵅⴰⵜⵔⵏⵉⵏ ⴷⴰⵜ ⵏ ⵉⵄⵔⵔⵉⵎⵏ ⵏⵏⵖ ⵉⵎⵖⵉⵔⵉⴱⵉⵢⵏ ⵃⵎⴰ ⴰⴷ ⵏⵏⴰⵏ ⴰⵡⴰⵍ ⵏⵏⵙⵏ ⵎⵍⵉⵏ ⵜⵉⵥⴹⴰⵕⵉⵏ ⵏⵏⵙ ⴳ ⵜⵎⵙⵙⵏⵜⴰⵢⵜ ⴷ ⵜⵡⵡⵓⵔⵉ ⵜⴰⵏⴰⵎⵓⵏⵜ , ⴳⵉⵏ ⵉⵎⵙⵡⵓⵔⵉⵢⵏ ⵓⵔ ⴰⴷ ⵙⵉⴳⴳⵉⵍⵏ ⵜⴰⵡⵡⵓⵔⵉ.

ⴳ ⵢⵉⴳⵔ ⵏ ⵜⵎⵙⵙⵏⵜⴰⵢⵉⵏ ⵙⵡⵓⵔⵉⵏⵉⵏ ⴳ ⵜⴻⵜⵉⴽⵏⵓⵍⵓⵊⵉⵢⵉⵏ ⵜⵉⵎⴰⵢⵏⵓⵜⵉⵏ, ⵖ ⵜⴼⵍⵍⴰⵃⵜ ⴷ ⵜⵡⵡⵓⵔⵉ ⵜⴰⵏⴰⵎⵓⵏⵜ ⵉⵜⵜⵓⵙⵎⵔⵙⴰⵍⵏ, ⵉⵄⵔⵔⵉⵎⵏ ⵏⵏⵖ ⵖⵓⵔⵙⵏ ⵜⴰⴳⵓⵔⵉ ⵏⵏⵙⵏ ⴷ ⵜⵙⵓⴳⴰⵔ ⵏⵏⵙⵏ ⵍⵍⵉ ⵔⴰⴷ ⴰⵙⵏ ⵢⴰⵡⵙ ⴰⴷ ⴹⵎⵏⵏ ⵜⴰⵏⴼⵔⵓⵜ ⵏⵏⵖ ⵜⴰⵙⵉⴱⵉⵔⵏⵉⵜⵉⴽ ⴷ ⵓⵙⴼⵍⵙ ⵏ ⵜⵏⵓⴼⴰ ⵜⵉⵎⴰⵢⵏⵓⵜⵉⵏ ⴷ ⵜⵡⵉⵣⵉ ⴳ ⵜⵉⵍⵉⵜ ⵏ ⵜⵏⴼⵔⵓⵜ ⵏⵏⵖ ⵏ ⵢⵓⵜⵛⵓ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵉⵙⵔⵙ ⵓⵏⵎⵓⵇⵇⴰⵔ ⴰⴷ ⵏⵏⵓⵏ ⵉⵡⵜⵜⴰⵙⵏ  ⴳ ⵜⵏⴰⵥⴰⵕⵉⵏ ⵏⵏⵙ, ⵖⵎⴽ ⴰⵏⵏ ⴰⴼ ⵜ ⵙⵓⵜⴳ ⵙⵙⵉⵜⵉⵎⵖ ⴰⵙ ⵜⴰⵙⵓⵍⴰⵏⵜ ⴷ ⵓⵎⵓⵔⵙ.  

ⵜⴰⵏⵎⵎⵉⵔⵜ ⴼ ⵓⵙⵙⴼⵍⴷ ⵏⵏⵓⵏ