ⴰⵎⴹⴰⴽⴰⵕ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵉⵣⴷⵉⵏ ⴷ ⵓⵏⴳⵔⴰⵡ ⵏ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵣⵎⵎⵉⵎⵏ ⵖ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵎⵓⵍⴰⵢ ⵀⵉⵛⴰⵎ ⵍⵎⵀⴰⵊⵕⵉ ⴰⵙⵙ ⵏ ⵓⵙⵉⵎⵡⴰⵙ 3 ⵢⵓⵍⵢⵓⵣ 2020  ⵙ ⵜⵉⵍⵉⵜ ⵏ ⵎⴰⵙⵙ ⵏⵓⵕ ⴷⴷⵉⵏ ⴱⵓⵟⵢⵢⴱ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ, ⵉ ⵜⵏⴽⴷⴰ ⴷ ⵓⵎⴹⴰⴽⴰⵕ ⴰⵎⴰⵜⴰⵢ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 72.18 ⵉⵣⴷⵉⵏ ⴷ ⵓⵏⴳⵔⴰⵡ ⵏ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵣⵎⵎⵉⵎⵏ.

ⵖ ⵜⵏⴽⴷⴰ ⵏ ⵓⵙⵏⴼⴰⵔ ⵏ ⵓⵙⵍⴳⵏ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ ⵢⵉⵡⵉ ⵓⴹⵕⵉⵚ  ⴰⴷ ⵉⵡⵜⵜⴰⵙⵏ ⵏⵏⵙ ⵙⴳ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ  ⵏ ⵉⵏⴰⵡ ⵏ  ⴱⴰⴱ  ⵏ ⵡⴰⴷⴷⵓⵔ ⴰⴳⵍⵍⵉⴷ ⵙ ⵜⵎⵍⴷⴰ ⵏ ⵓⴽⵜⵜⴰⵢ 19 ⵏ ⵜⵉⵍⵉⵜ ⵏ ⴱⴰⴱ ⵏ ⵡⴰⴷⴷⵓⵔ ⵖ ⵓⴷⴰⴱⵓ ⵏ ⵉⵎⵣⵡⵓⵔ ⵏⵏⵙ ⵉⴷ ⴱⴰⴱ ⵏ ⵡⴰⴷⴷⵓⵔ, ⴰⵙⵙ ⵏ 29 ⵢⵓⵍⵢⵓⵣ 2018 ⴼ ⵓⵙⵎⴰⵢⵏⵓ ⵢⵓⵎⴰⵏ ⴷ ⵉⴷⵔⴰⵏ ⵏ ⵉⵖⴰⵡⴰⵙⵏ ⴷ ⵜⵙⵔⵜⴰⵢ ⵜⵉⵏⴰⵎⵓⵔⵉⵏ ⵖ ⵢⵉⴳⵔ ⵏ ⵓⵙⵏⴰⵍ ⴷ ⵓⵃⵟⵟⵓ ⴰⵏⴰⵎⵓⵏ. ⵙ ⵜⵓⵎⴰⵢⵉⵏ ⵏ ⵉⵏⴰⵡ ⴰⴷ,  ⵜⵙⵔⵙ ⵜⵏⴱⴰⴹⵜ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 72.18  ⵙ ⵜⵖⴰⵔⴰⵙⵜ ⵖ ⵎⵓⵏⵏ ⵉⴼⵔⴷⴰⵙ ⵏⵏⵙ ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⴷ ⵓⵙⵖⵓⴷⵓ ⵏ ⵜⵢⴰⴼⵓⵜ ⵏⵏⵙⵏⵜ  ⵙ ⵢⴰⵏ ⵓⵏⴳⵔⴰⵡ ⴰⵏⴰⵎⵓⵔ ⵉⵙⵎⴷⵏ ⵉ ⵓⵣⵎⵎⵉⵎ ⵏ ⵜⴰⵡⵊⵉⵡⵉⵏ, ⴰⴷ ⴰⵡⵉⵏⵜ ⵚⴰⵃⴰ ⵖ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵜⵏⵓⴼⴰ ⵜⵉⵏⴰⵎⵓⵏⵉⵏ ⴼ ⵍⵍⴰⵏⵜ  ⵜⵎⵙⵙⵓⴳⴰⵔ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵉⴳⵔⴰⵡⵏ ⵉⴳⴷⵓⴷⴰⵏⵏ, ⵙ ⵓⵙⵎⵀⵍ ⵏ ⵓⵎⵏⵏⵉ 31 ⵏ ⵓⴷⵓⵙⵜⵓⵔ ⵍⵍⵉ ⵉⵜⵜⵉⵏⵉⵏ ⴰⴷ ⵢⵉⵍⵉ ⵓⵙⵎⵓⵙⵙⵓ ⵏ ⴽⵓ ⵉⵎⴰⵙⵙⵏ ⵍⵍⴰⵏⵉⵏ ⵃⵎⴰ ⴰⴷ ⵚⵉⵃⵉⵏⵜ ⵉ ⵉⵏⵎⵓⵔⴰⵏ  ⴷ  ⵜⵏⵎⵓⵔⴰⵜⵉⵏ,  ⵙ ⵜⵖⴰⵔⴰⵙⵜ ⵉⴳⴰⴷⴷⴰⵏ, ⵜⵉⵏⵓⴼⴰ ⵜⵉⵏⴰⵎⵓⵏⵉⵏ ⵏ ⵓⵡⴰⵏⴽ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ.

ⵉⵙⵎⵏⵉⴷ ⵎⴰⵙⵙ ⴱⵓⵟⵢⵢⴱ ⴽⴽⵓⵥⵜ ⵜⵎⵔⵙⴰⵍ ⴼ ⵉⴱⴷⴷ ⵓⵏⴳⵔⴰⵡ ⴰⴷ ⵃⵎⴰ ⴰⴷ ⵜⵜⵓⵍⴽⵉⵎⵏ ⵉⵡⵜⵜⴰⵙⵏ ⵏⵏⵙ: ⴰⵣⵎⵎⴻⵎ ⴰⵏⴰⵎⵓⵔ ⵏ ⵉⵎⵣⴷⴰⵖⵏ, ⴰⵣⵎⵎⴻⵎ ⴰⵏⴰⵎⵓⵔ ⵉⵎⵓⵏⵏ, ⴰⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵏ ⵉⵡⴷⴰⵏ  ⵜⵜⵓⵣⵎⵎⴰⵎⵏⵉⵏ ⵖ ⵉⵣⵎⵎⵉⵎⵏ,ⵜⴰⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵣⵎⵎⵉⵎⵏ.

ⵉⵙⵙⵉⵙⴼⵉⵡ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵜⵡⴰⵜⵜⵙ ⵜⵔⵙⵍⵜ ⵜⴰⵎⵣⵡⴰⵔⵓⵜ ⵉⴳⴰⵏ ⴰⵣⵎⵎⴻⵎ ⴰⵏⴰⵎⵓⵔ ⵏ ⵉⵎⵣⴷⴰⵖⵏ ⴰⴷ ⵜⵉⵍⵉ ⵜⵓⵙⵙⵏⴰ ⵏ ⵉⵡⴷⴰⵏ ⵍⵍⵉ ⵔⴰⵏⵉⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴼ  ⵍⵍⴰⵏⵜ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵉⴳⵔⴰⵡⵏ ⵉⴳⴷⵓⴷⴰⵏⵏ, ⵜⵓⵙⵙⵏⴰ ⵉⴷⵓⵙⵏ ⵏ ⵜⵎⴰⴳⵉⵜ ⵏⵏⵙⵏ ⴷ ⵜⵎⵓⵛⴰ ⴷ ⵓⵎⵍⴰⵏ ⴷⵉⵙⵙⵏ ⵣⴷⵉⵏⵉⵏ.

ⵜⴰⵔⵙⵍⵜ ⵏ ⵓⵣⵎⵎⴻⵎ ⴰⵏⴰⵎⵓⵏ ⵉⵎⵓⵏⵏ ⵏⵜⵜⴰⵜ ⵜⴳⴰ, ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵙⵍⴳⵏ,  ⵉⵎⵉⵙⵙ ⴰⵜⵉⵇⵏⵉ ⵏ ⵜⵉⴽⴽⵉ ⵏ ⵜⵏⵇⴰⴹ ⵉ ⵜⴰⵡⵊⵉⵡⵉⵏ ⴼ ⵓⵎⵍⴰⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⵏ  ⴷⵉⵙⵙⵏⵜ ⵣⴷⵉⵏⵉⵏ (ⴰⵏⴰⵡ ⵏ ⵜⵣⴷⵓⵖⵜ, ⵓⵟⵟⵓⵏ ⵏ ⵉⵃⵓⵏⴰ,  ⵜⴰⵙⵎⵓⵔⵜ ⵜⴰⵙⴳⵯⵙⴰⵏⵜ ⵏ ⵡⴰⵎⴰⵏ ⴷ ⵜⵉⴼⴰⵡⵜ, ⵜⵜⵉⵍⵉⴼⵓⵏ, ⵍⴳⴰⵣ…) ⵍⵍⵉ ⵉⵜⵜⵉⵏⵉ ⴱⴰⴱ ⵏ ⵜⵓⵡⵊⴰ. ⵜⴰⵡⵓⵔⵉ ⴰⴷ ⵔⴰⴷ ⵜⴱⴷⴷ ⴼ ⵉⵙⵖⴰⵍⵏ ⴷ ⵓⵎⵍⴰⵏ ⵣⴷⵉⵏⵉⵏ ⴷ ⵉⵙⵏⴼⵍⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⵏ ⵜⵓⴷⵔⵜ ⵏ ⵜⴰⵡⵊⵉⵡⵉⵏ ⴰⴷ, ⴷ ⵓⵙⵎⴰⵢⵏⵓ ⵏⵏⵙⵏ ⵙ  ⵜⵢⴰⴼⵓⵜ ⵏ ⵉⵔⵣⵣⵓⵜⵏ ⵏ ⵜⵙⵎⵉⵔⵉⵜ ⵜⴰⵎⴰⵜⵜⴰⵢⵜ ⵏ ⵓⵙⵖⵉⵡⵙ.

ⵜⴰⵔⵙⵍⵜ ⵜⵉⵙ ⴽⵕⴰⴹⵜ ⵔⴰⴷ ⵜⴹⵎⵏ ⴰⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵏ ⵉⵡⴷⴰⵏ ⵍⵍⴰⵏⵉⵏ ⵖ ⵓⵣⵎⵎⴻⵎ, ⵙ ⵓⵡⵇⵇⵔ ⵏ ⵉⴱⴹⵉⵢⵏ ⵏ ⵓⵙⵍⴳⵏ ⵓⵟⵟⵓⵏ 09.08 ⵉⵣⴷⵉⵏ ⴷ ⵓⵃⵟⵟⵓ ⵏ ⵉⵡⴷⴰⵏ ⵉⵏⵉⵎⴰⵏⵏ ⵎⵏⵉⴷ ⵏ ⵓⵙⵎⴽⵍ ⵏ ⵜⵎⵓⵛⴰ ⴷⴰⵔ ⵉⵍⵍⴰ ⵓⴼⵔⵉⵙ ⴰⵏⵉⵎⴰⵏ.

ⵜⵣⴷⵉ ⵜⵔⵙⵍⵜ ⵜⵉⵙ ⴽⴽⵓⵥⵜ ⵖ ⵓⵙⵏⴼⴰⵔ ⵏ ⵓⵙⵍⴳⵏ ⵙ ⵓⵙⴽⵔ ⵏ ⵜⵎⵔⵙⵍⵜ ⵜⴰⴳⴷⵓⴷⴰⵏⵜ ⵉⵍⴰⵏ ⴰⴼⵔⵉⵙ ⵉⴱⴷⴷⵏ ⴷ ⵜⵙⵉⵎⴰⵏⵜ ⵜⴰⵥⵕⴼⴰⵏⵜ, ⵔⴰⴷ ⵜⵡⴰⵍⴰ ⵜⴰⵎⵙⵙⵓⴳⵓⵔⵜ ⴷ ⵓⵙⵡⵓⴷⴷⵓ ⵏ ⴽⵓ ⵜⵉⵡⵓⵔⵉⵡⵉⵏ ⵣⴷⵉⵏⵉⵏ ⴷ ⵓⵣⵎⵎⴻⵎ ⴰⵏⴰⵎⵓⵏ ⵉⵎⵓⵏⵏ ⴷ ⵓⵣⵎⵎⴻⵎ ⴰⵏⴰⵎⵓⵔ ⵏ ⵉⵎⵣⴷⴰⵖⵏ, ⵖⵎⴽ ⵍⵍⵉ ⵔⴰⴷ ⵜⵙⵡⵓⵔⵉ ⵙ ⵜⵖⴰⵔⴰⵙⵜ ⵉⵙⵓⵍⵏ ⵖ ⵜⵍⵍⴰ ⵜⴼⴰⵜⵉⵜ ⵖ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵃⵎⴰ ⴰⴷ ⵉⵍⵉⵏⵜ ⵜⵏⵓⴼⴰ ⵏ ⵓⵣⵎⵎⴻⵎ ⴷ ⵓⵙⵎⴰⵢⵏⵓ ⵏ ⵓⵎⵍⴰⵏ ⵉⵏⵉⵎⴰⵏⵏ ⴷ ⵜⵉⴽⴽⵉ ⵏ ⵜⵏⵇⴰⴹ ⵉ ⵜⴰⵡⵊⵉⵡⵉⵏ ⴷ ⵜⵓⵙⵙⵏⴰ ⵉⴷⵓⵙⵏ ⵏ ⵓⵎⵍⴰⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ ⵍⵍⵉ ⵜⵜⵣⵎⵎⵉⵎⵏⵜ ⵜⴰⵡⵊⵉⵡⵉⵏ ⴷ ⵓⵙⵔⵙ ⵏ ⵜⵍⴳⴰⵎ ⵏ ⵜⵉⴷ ⵙⵜⴰⵀⵍⵍⴰⵏⵉⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ.

ⵖ ⵓⵎⴹⴰⴽⴰⵕ, ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⵉⴳⴰ ⵓⴹⵕⵉⵚ ⴰⴷ ⵢⴰⵏ ⵓⵏⵢⴰⵍⴽⴰⵎ ⵉⴼⴰⵡⵏ ⴷ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵜⴳⴰ ⵜⵡⵓⵔⵉ ⴰⴷ ⵜⵓⵛⵛⵉⵍⵜ ⵉ ⵜⵙⵏⵍⵉⵜ ⴷ ⵜⵉⴽⴽⵉ ⵏ ⵓⵙⵏⴰⵍ ⵉ ⵜⴷⵓⵍⴰ ⵛⵃⴰⵏⵉⵏ, ⴰⵢⵍⵍⵉ ⵔⴰⴷ ⵉⵙⵙⵔⵅⵓ ⴰⴷ ⵢⵉⵍⵉ ⵚⴰⵃⴰ ⵉ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ ⵙ ⵜⵖⴰⵔⴰⵙⵜ ⵉⴳⴰⴷⴷⴰⵏ ⵖ ⵜⵏⵓⴼⴰ ⵜⵉⵏⴰⵎⵓⵏⵉⵏ.  

ⵙⴷⴷⵉⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⵉⴳⴰ ⵓⵙⵏⴼⴰⵔ ⴰⴷ ⵢⴰⵜ ⵜⵚⴽⴰⵡⵜ ⵖ ⵢⴰⵏ ⵓⴱⵔⵉⴷ ⵖⵣⵣⵉⴼⵏ ⵖ ⵜⵉⵔⵎⵉⵜ ⵏ ⵍⵎⵖⵔⵉⴱ ⵃⵎⴰ ⴰⴷ ⵉⵙⵙⴷⵓⵙ ⴰⵎⵏⵉⴷ ⴰⵏⴰⵎⵓⵏ ⴷ ⵜⵏⴽⴷⴰ ⵏ ⵜⵏⵓⴼⴰ ⴷ ⵉⵖⴰⵡⴰⵙⵏ ⵖ ⵉⵍⵍⴰ ⵓⵍⴰⵍⵍⵓ ⵏ ⵓⵏⵎⵓⵔⵉ, ⵉⵏⵉⵏ ⵎⴰⵙ ⵉⴳⴰ ⵓⵙⵏⴼⴰⵔ "ⵜⴰⵙⴰⵡⵔⵜ ⵜⴰⵙⵜⵔⴰⵜⵉⵊⵉⵜ ⵜⴰⵅⴰⵜⴰⵔⵜ", ⵔⴰⴷ ⵢⴰⵡⵙ ⵖ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⴰⴽⴷ ⵓⵏⵎⵓⵔⵉ, ⵔⴰⴷ ⵉⴹⵎⵏ ⵓⵍⴰ ⴰⵏⵎⵏⴰⵇⵇⴰⵔ ⵏ ⵉⵙⵏⴼⴰⵔⵏ ⴷ ⵉⵖⴰⵡⴰⵙⵏ ⵉⴳⴷⵓⴷⴰⵏⵏ, ⴷ ⵓⵙⴷⵓⵙ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⵙ ⵓⵙⵡⵓⵜⵜⵓ ⵏ ⵜⴷⵓⵍⴰ ⵜⵉⵎⵏⵜⴰⵢⵉⵏ, ⵉⵏⵉⵏ ⵎⴰⵙ ⴷ ⵉⵇⵇⴰⵏ ⵓⵣⴷⴷⵓⵢ ⴷ ⵓⵙⵎⵔⵙⵍ ⵏ ⵓⵎⵢⴰⵡⴰⴹ ⵊⴰⵔ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵉⴳⵔⴰⵡⵏ ⵉⴳⴷⵓⴷⴰⵏⵏ ⵖ ⵉⵙⵡⵉⵔⵏ ⴰⵏⵎⵏⴰⴹ ⴷ ⵓⵏⴰⵎⵎⴰⵙ, ⵜⵜⵔⵏ ⴽⵉⴳⴰⵏ ⵏ ⵉⵙⵙⵉⵙⴼⵉⵡⵏ ⴼ ⵜⵡⵓⵔⵉ ⵏ ⵜⵏⵇⴰⴹ ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵎⵍⴰⵏ ⵉⵏⴰⵎⵓⵏⵏ ⴷ ⵉⴷⵎⵙⴰⵏⵏ.

ⵏⵏⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵎⴰⵙ ⵉⴳⴰ ⵓⴹⵕⵉⵚ ⴰⴷ ⴰⵣⵣⵔⴰⴼ ⵢⴰⵏ "ⵓⵙⵏⴼⴰⵔ ⴰⴷⵙⵍⴰⵏ ⵏ ⵜⵓⵚⴽⴰ", ⵉⴽⵛⵎ ⵖ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵍⵍⵉ ⵔⴰⴷ ⵉⵙⵎⴽⵍ ⵜⵉⵎⵓⴽⵔⵉⵙⵉⵏ ⵏ ⵓⵏⴳⵔⴰⵡ ⵏ ⵓⵃⵟⵟⵓ ⴰⵏⴰⵎⵓⵏ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴷ ⵢⵉⵡⵉ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵓⵛⵛⵉⵍ ⴰⴷ ⵢⵉⵍⵉ ⴷ ⵓⵍⴳⴳⵓⴷ ⵓⵙⵡⵓⵜⵜⵓ ⵏ ⵜⴷⵓⵍⴰ ⵜⵉⵏⴰⵎⵓⵏⵉⵏ ⵙⵜⴰⵀⵍⵍⴰⵏⵉⵏ ⴰⵙⵏⴰⵍ.

ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴰⴷ ⵜⵜⵓⴼⴽⵉⵏⵜ ⵜⵥⵉⴹⴰⵕ ⵜⵉⵏⴼⴳⴰⵏⵉⵏ ⵙⵜⴰⵡⵀⵎⵎⴰⵏⵉⵏ ⴷ ⵜⵎⵙⴰⵙⵜⵍⵜ ⵉⵥⵍⵉⵏ, ⴷ ⵓⵙⵓⵊⴷ ⵏ ⵓⵎⵏⵉⴷ ⴰⵜⵉⵇⵏⵉ ⵍⵍⵉ ⵉⴳⴰⵏ ⵜⴰⵔⵙⵍⵜ ⵖ ⵜⵙⴰⵡⵔⵜ ⴰⴷ ⵜⴰⵏⴰⵎⵓⵏⵜ, ⵔⴰⴷ ⵜⴰⵡⵙ ⵜⵎⵓⵟⵟⵓⵏⵜ ⵖ ⵓⵙⵏⴼⵍ ⵏ ⵓⵎⵍⴰⵏ ⵏⴳⵔ ⴽⵓ ⴰⵎⵎⴰⵙⵏ ⵉ ⵓⵙⵎⴰⵢⵏⵓ ⴷ ⵜⵉⵃⴹⵉⵜ ⵏ ⵜⵎⵓⵛⴰ ⵣⴷⵉⵏⵉⵏ ⴷ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ.

ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⴷ ⵜⵎⵛⴰⵛⴽⴰ ⵜⵡⵓⵔⵉ ⴰⴷ ⴷ ⵉⵙⵖⵡⴰⵏ ⵉⴳⵔⴰⵖⵍⴰⵏⵏ ⵏ ⵍⵎⵖⵔⵉⴱ ⵖ ⵓⴱⴰⵔⴰⵣ ⵏ ⵓⵃⵟⵟⵓ ⴰⵏⴰⵎⵓⵏ ⴷ ⵓⵙⴽⵔ ⵏ ⵜⴳⵎⵉ ⵜⴰⵙⵓⵍⴰⵏⵜ ⵢⴰⵎⴰⵏ  ⵉⴳⴰⵏ ⵜⴰⵙⴰⵖⵓⵍⵜ ⵏ ⵓⵙⵏⴼⴰⵔ ⴰⴷ, ⵉⵏⵉⵏ ⵎⴰⵙ ⵔⴰⴷ ⵢⴰⵡⵙ ⵓⵙⴽⵔ ⵏ ⵓⵣⵎⵎⴻⵎ ⴰⵏⴰⵎⵓⵏ ⵉⵎⵓⵏⵏ ⵖ ⵓⵙⵖⵓⴷⵓ ⵏ ⵉⴷⵔⵉⵣⵏ ⵓⵎⵏⵉⴳⵏ ⵏ ⵉⵖⴰⵡⴰⵙⵏ ⵉⵏⴰⵎⵓⵏⵏ ⵉ ⵜⴷⵓⵍⴰ ⵜⵜⵡⴰⵜⵜⵙⵏⵉⵏ, ⵍⵍⵉⵖ ⵔⴰⴷ ⵉⴳ ⵢⴰⵏ ⵓⵏⴳⵔⴰⵡ ⵉⵙⵎⴷⵏ ⵏ ⵓⵣⵎⵎⴻⵎ ⵏ ⵜⴰⵡⵊⵉⵡⵉⵏ ⴷ ⵢⴰⵏ ⵉⵎⵉⵙⵙ ⵏ ⵓⵙⵎⵔⵙⵍ ⵏ ⵓⵣⵔⴼ ⵖ ⵜⴳⵎⵉ.

 ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴰⴷ ⵢⵉⵍⵉ ⵓⵙⴽⵔ ⵏ ⵉⵎⴰⵙⵙⵏ ⵕⵡⴰⵏⵉⵏ ⵍⵍⵉ ⵔⴰⴷ ⵢⴰⵡⵙ ⵖ ⵓⵣⴷⴷⵓⵢ ⴷ ⵓⵏⵎⵏⴰⵇⵇⴰⵔ ⵏⴳⵔ ⴽⵓ ⵉⴳⵔⴰⵡⵏ ⴷ ⵉⵖⴰⵡⴰⵙⵏ ⵃⵎⴰ ⴰⴷ ⵓⵔ ⵢⵉⵍⵉ ⵓⵙⵎⵔⵙ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵙ ⴳⴰⵔ ⵜⴰⵖⴰⵔⴰⵙⵜ, ⴷ ⴰⴷ ⵓⵔ ⵢⵉⵍⵉ ⵓⵙⵎⵔⵙ ⴰⵙⵉⵏⵔⴰⵏ ⵏⵖ ⵓⴽⴽⵓⵙ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵏⵖ ⴰⵙⴽⵔ ⵙ ⴽⵔⴰ ⵏ ⵜⵉⴽⵉⵙⵜ. ⵔⴰⴷ ⵜⴰⵡⵙ ⵜⵉⵃⴹⵉⵜ ⵏ ⵓⵎⵍⴰⵏ ⵙ ⵜⵖⴰⵔⴰⵙⵜ ⵜⴰⵎⵓⵟⵟⵓⵏⵜ ⵖ ⵓⵙⵙⵔⵅⵓ ⵏ ⵜⵎⵙⵙⵓⴳⵓⵔⵜ ⵉⵕⵡⴰⵏ ⴷ ⵓⵙⵡⵓⴷⴷⵓ ⵏ ⵓⵙⵏⴰⵍ ⴷ ⵜⵏⵓⴼⴰ ⵜⵉⵏⴰⵎⵓⵏⵉⵏ. ⵉⴳⴰ ⵡⴰⵡⵜⵜⴰⵙ ⵏ ⵓⵙⵎⵓⵏ ⴷ ⵓⵣⵎⵎⴻⵎ ⴷ ⵜⵉⵃⴹⵉⵜ ⴷ ⵓⵙⵎⴰⵢⵏⵓ ⵏ ⵓⵎⵍⴰⵏ ⴰⴷ ⵜⵉⵍⵉ ⵢⴰⵜ ⵜⵙⵉⵍⴰ ⵜⴰⵎⵓⵟⵟⵓⵏⵜ ⵜⴰⵏⴰⵎⵎⴰⵙⵜ ⵉⴷⵓⵙⵏ ⵖ ⵜⵍⵍⴰ ⵜⴼⴰⵜⵉⵜ.