ⴰⵎⴹⴰⴽⴰⵕ ⵏ ⵓⵙⵓⵔⵙ ⵏ ⵓⵙⴳⵎⵉ ⴷ ⵓⵙⵙⵍⵎⴷ ⵖ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵙ ⵜⵉⵍⵉⵜ ⵏ ⵎⴰⵙⵙ ⴰⵎⵣⴰⵣⵉ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 30 ⵢⵓⵏⵢⵓ 2020 ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰⵍ, ⵙ ⵜⵉⵍⵉⵜ ⵏ ⵎⴰⵙⵙ ⵙⴰⵄⵉⴷ ⴰⵎⵣⴰⵣⵉ ⴰⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴰⵎⵙⵉⵡⵍ ⴰⵎⴰⴷⴷⵓⴷ ⵙ ⵢⵉⵙⵎ ⵏ ⵜⵏⴱⴰⴹⵜ, ⵜⵥⵍⵉ ⵉ ⵓⵎⴹⴰⴽⴰⵕ ⵏ ⵜⴰⵎ ⵉⵎⵔⵙⵉⵡⵏ ⴼ ⵢⵉⴳⵔ ⵏ ⵓⵙⵙⵍⵎⴷ ⵖ ⵜⵎⴰⵣⵉⵔⵜ ⵏⵏⵖ.

ⵖ ⵜⵣⵡⵉⵔⵉ, ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⴽⵛⵛⵓⵎⵉⵏ ⵏⵏⵙⵏ ⵖ ⵙⵓⵜⴳⵏ ⵜⵓⴳⴳⴰⵙ ⵏ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵉⵍⵖ ⴰⵣⵣⵓⵍⴰⵏ ⴷ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵖ ⵓⵙⵓⵊⴷ ⵏ ⵉⵎⴰⵙⵙⵏ ⵉⴱⵉⴷⴰⴳⵓⵊⵉⵢⵏ ⴷ ⵜⵥⵉⴹⴰⵕ ⵜⵉⵏⴼⴳⴰⵏⵉⵏ ⴷ ⵜⵍⵓⵊⵉⵙⵜⵉⵢⵉⵏ ⵃⵎⴰ ⴰⴷ ⵢⵉⵍⵉ ⵓⵎⵓⵔⵙ ⵏ ⵜⵡⵓⵔⵉ ⵏ ⵓⵙⵙⵍⵎⴷ ⵙ ⵜⵉⴳⴳⵓⴳⵜ, ⴷ ⵓⵙⵎⴰⴷ ⵏ ⵓⵙⴳⴳⵯⴰⵙ ⴰⵏⵎⵍⴰⵏ ⵡⴰⵅⵅⴰ ⵍⵍⴰⵏⵜ ⵜⵏⴰⵥⴰⵕⵉⵏ ⵣⴷⵉⵏⵉⵏ ⴷ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.

ⵙⴷⴷⵉⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⴷ ⵉⵇⵇⴰⵏ “ⴰⴷ ⵢⵉⵍⵉ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⵖ ⵜⴼⵓⵍⵜ ⴷⴰⵔ ⴽⵓ ⵉⵎⵏⴽⴰⴷⵏ ⵍⵍⵉ ⵔⴰⴷ ⵉⵣⵣⵔⵉ ⵉⵔⵉⵎⵏ ⵉⵎⴳⴳⵓⵔⴰ, ⵢⵉⵍⵉ ⵓⵙⵎⵓⵙⵙⵓ ⵏ ⴽⵓ ⵜⵉⵥⵉⴹⴰⵕ ⴰⴷ ⵜⵜⵓⵙⴽⵉⵔⵏ ⵉⵙⵡⵓⴷⴷⵓⵜⵏ ⵍⵍⵉ ⵔⴰⴷ ⴷ ⵢⴰⵡⵉ ⵜⴰⴼⴰⵜⵉⵜ ⵜⴰⴷⵓⵙⴰⵏⵜ ⵍⵍⵉ ⵔⴰⴷ ⵢⴰⵡⵙ ⵉ ⵉⵎⵏⴽⴰⴷⵏ ⴰⴷ ⵣⵣⵔⵉⵏ ⵉⵔⵉⵎⵏ ⵖ ⵜⵎⵙⵓⵜⵍⵉⵏ ⴷ ⵢⵓⵙⴰⵏ”.

ⴱⴷⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⴼ ⵜⵎⵓⴽⵔⵉⵙⵜ ⵏ ⵓⴽⵛⵎ ⵏ ⵉⵏⵍⵎⴰⴷⵏ ⴷ ⵉⵎⵣⵔⴰⵡⵏ ⵙ ⵉⴱⴰⵔⴰⵣⵏ ⵏ ⵓⵎⵍⴰⵏ, ⵍⵍⵉⵖ ⵉⵍⵍⴰ ⵓⵙⵡⵓⵔⵉ ⵙ ⵜⴻⵜⵉⵇⵏⵉⵜ ⵏ ⵓⵙⵙⵍⵎⴷ ⵙ ⵜⵉⴳⴳⵓⴳⵜ ⵖ ⵍⴰⵏⵜⵉⵔⵏⵉⵜ ⴷ ⵓⵥⵟⵟⴰ ⴰⵏⴰⵎⵓⵔ ⵏ ⵉⵙⵓⵔⴰ, ⵖⵎⴽ ⴰⵏⵏ ⴷ ⵡⴰⵍⵓⴳⵏ ⵏ ⵓⵙⵏⴰⵍ ⵜⵜⴰⵡⵚⵕⴰⴼⵏⵉⵏ ⵉ ⵜⵎⵉⵣⴰⵔ ⵜⵉⴼⴰⵔⴰⵏⵉⵏ ⵖ ⵍⵍⴰⵏⵜ ⴽⵉⴳⴰⵏ ⵏ ⵜⵎⵓⴽⵔⵉⵙⵉⵏ ⵏ ⵓⵙⵙⵍⵎⴷ ⴷ ⵓⵍⵎⵎⵓⴷ ⵖⵎⴽ ⵏⵉⵜ ⵏⵏⴰⵏ ⵉⴷ ⵎⴰⵙⵙ ⵉⵎⵓⵔⴰ, ⵖⵔⵉⵏ ⴰⴷ ⵜⵉⵍⵉ ⵢⴰⵜ ⵜⵎⵢⴰⴷⴰⵙⵜ ⵉⵙⵔⵙⵏ ⵜⵉⵎⵉⵣⴰⵔ ⵜⵉⴼⴰⵔⴰⵏⵉⵏ ⵖ ⵜⵣⵔⴼⵜ ⵜⴰⴷⵖⴰⵔⴰⵏⵜ, ⵉⵍⵉⵏ ⵉⵎⴰⵙⵙⵏ ⴷⴰⵔ ⴽⵓ ⵉⵏⵍⵎⴰⴷⵏ ⵃⵎⴰ ⴰⴷ ⴽⵛⵛⵎⵏ ⵙ ⵜⵙⴰⵍⵉⵡⵉⵏ ⵏ ⵓⵙⵙⵍⵎⴷ ⵙ ⵜⵉⴳⴳⵓⴳⵜ ⴰⵎ ⵜⵉⵎⵔⵙⴰⵍ ⵢⴰⴹⵏⵉⵏ ⵖ ⵜⵙⴳⵉⵡⵉⵏ ⵢⴰⴹⵏⵉⵏ.

ⴱⴷⵔⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵜⴰⵎⵓⴽⵔⵉⵙⵜ ⵏ ⵓⴼⵔⵓ ⵏ ⵉⴷ ⴱⴰⴱ ⵏ ⵉⵏⵍⵎⴰⴷⵏ ⵏ ⵜⵖⵔⴰⴷ ⵏ ⵓⵙⵙⵍⵎⴷ ⵖ ⵜⵎⵔⵙⴰⵍ ⵜⵓⵙⵍⵉⴳⵉⵏ, ⵖⵔⵉⵏ ⴰⴷ ⵜⵉⵍⵉ ⵢⴰⵜ ⵜⵖⴰⵔⴰⵙⵜ ⵏ ⵓⵎⵛⴰⵛⴽⴰ ⵏⴳⵔ ⴽⵓ ⵜⴰⵙⴳⵉⵡⵉⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵍⵍⴰⵏⵜ ⵜⵓⴳⵜ ⵏ ⵜⵎⵓⴽⵔⵉⵙⵉⵏ ⵜⵉⵥⵕⴼⴰⵏⵉⵏ ⴷⴰⵔ ⴽⵉⴳⴰⵏ ⵏ ⵜⴰⵡⵊⵉⵡⵉⵏ ⵜⵉⵎⵖⵔⵉⴱⵉⵢⵉⵏ, ⵖⵎⴽ ⴰⵏⵏ ⴷ ⵓⵙⵎⵀⵍ ⵏ ⵓⵙⵍⴳⵏ ⴰⵙⴰⵜⵉ ⵓⵟⵟⵓⵏ 51.17 ⵉⵣⴷⵉⵏ ⴷ ⵓⵏⴳⵔⴰⵡ ⵏ ⵓⵙⴳⵎⵉ ⴷ ⵓⵙⵎⵓⵜⵜⴳ ⴷ ⵓⵔⵣⵣⵓ ⴰⵎⴰⵙⵙⴰⵏ, ⵙⴷⴷⵉⴷⵏ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵢⵉⵎⴰⵏ ⴰⵏⴰⵎⵓⵔ ⵏ ⵜⵡⵉⵣⵉ ⴷⴰⵔ ⵜⵎⵔⵙⴰⵍ ⵜⵓⵙⵍⵉⴳⵉⵏ, ⵍⵍⵉⵖ ⴳⴰⵏⵜ ⵜⴰⵙⴳⴰ ⵉⵜⵜⴰⵡⵙⵏ ⵖ ⵜⵡⵓⵔⵉ ⵜⴰⵙⴳⵎⴰⵏⵜ”.

ⵖ ⵓⵎⵏⵉⴷ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⴽⵛⵎ ⵙ ⵜⵉⵏⵎⴰⵍ ⵃⵓⴷⴷⴰⵏⵉⵏ, ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵜⴰⵖⵜⴰⵙⵜ ⵏ ⵓⵙⴽⵔ ⵙ ⵓⵙⵜⴰⵢ ⵖ ⵓⴽⵛⵎ ⵙ ⴽⵔⴰ ⵖ ⵜⵏⵎⴰⵍ ⴰⴷ, ⵉⵏⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵉⵍⵉⵏⵜ ⴽⵓ ⵜⵉⴼⴰⴷⵉⵡⵉⵏ ⵃⵎⴰ ⴰⴷ ⵣⵔⵉⵏ ⵉⵔⵉⵎⵏ ⵏ ⵓⴽⵛⵎ ⵙ ⵜⵖⵉⵡⴰⵏⵉⵏ ⵏ ⵜⵙⵏⴰⵊⵊⵉⵜ ⴷ ⵜⵙⵏⴰⵊⵊⵉⵜ ⵏ ⵜⵖⵎⴰⵙ ⴷ ⵜⵙⴰⵙⴼⵔⵜ ⵖ ⵜⵎⵙⵓⵜⵍⵉⵏ ⵥⵉⵍⵏⵉⵏ. ⵍⵍⴰⵏ ⵉⵙⵇⵙⵉⵜⵏ ⵓⵍⴰ ⴼ ⵓⵙⵡⵓⴷⴷⵓ ⵏ ⵜⴼⵔⴽⴰ ⵏ ⵉⵔⵉⵎⵏ ⵖ ⵢⵉⴳⵔ ⵏ ⵓⵙⵙⵍⵎⴷ ⴰⵏⴰⴼⵍⵍⴰ ⴷ ⵓⵙⵉⵍⵖ ⴰⵣⵣⵓⵍⴰⵏ.  

ⵍⵍⵉⵖ ⵉⵔⵓⵔ ⵎⴰⵙⵙ ⴰⵎⴰⵡⵙⴰⵙ ⴼ ⵜⴽⵛⵛⵓⵎⵉⵏ ⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ, ⵉⵙⴷⴷⵉⴷ ⵎⴰⵙ “ⴳⴰⴷⴷⴰⵏⵜ ⴽⵓ ⵜⵎⵙⵓⵜⵍⵉⵏ ⵖ ⵓⵙⵡⵉⵔ ⴰⵏⴰⵎⵓⵔ ⵃⵎⴰ ⴰⴷ ⵣⵣⵔⵉⵏ ⵉⵏⵍⵎⴰⴷⵏ ⵉⵔⵉⵎⵏ ⵖ ⵜⵎⵙⵓⵜⵍⵉⵏ ⵜⵉⴷⵓⵙⴰⵏⵉⵏ ⴷ ⵜⵉⵏ ⵡⴰⵔⵢ ⵖ ⵜⵍⵍⴰ ⵜⴼⴰⵜⵉⵜ”, ⵢⵉⵏⵉ ⵎⴰⵙ “ⵜⵙⵜⵉ ⵜⴳⵍⴷⵉⵜ ⴰⴷ ⵉⵣⵣⵉⴳⵣ ⵓⵙⴳⴳⵯⴰⵙ ⴰⵏⵎⵍⴰⵏ ⵡⴰⵅⵅⴰ ⵍⵍⴰⵏⵜ ⵜⵎⵙⵓⵜⵍⵉⵏ ⵥⵍⵉⵏⵉⵏ ⵏ ⵓⴱⴰⵢⵢⵓⵕ”. ⵙ ⵜⵎⵍⴷⴰ ⴰⴷ, ⵉⴼⴽⴰ ⴽⵉⴳⴰⵏ ⵏ ⵜⵎⵓⵛⴰ ⵣⴷⵉⵏⵉⵏ ⴷ ⵉⵔⵉⵎⵏ ⴰⴷ:"ⵍⵍⴰⵏ 441238 ⵏ ⵓⵎⵏⴽⴰⴷ ⵖ ⵉⵔⵉⵎ ⴰⴷ, ⴳⵉⵙⵏ 64% ⵖ ⵓⵙⵙⵍⵎⴷ ⴰⴳⴷⵓⴷⴰⵏ ⴷ 8% ⵖ ⵓⵙⵙⵍⵎⴷ ⵓⵙⵍⵉⴳ, ⴳⴰⵏ 72% ⵏ ⵡⵉⵍⵍⵉ ⴹⴼⵕⵏⵉⵏ ⵜⵉⵖⵔⵉ ⵏⵏⵙⵏ ⴷ 28% ⵏ ⵉⵎⵏⴽⴰⴷⵏ ⵉⵍⴻⵍⵍⵉⵢⵏ (122000  ⵏ ⵓⵎⵏⴽⴰⴷ). ⵜⵍⵍⴰ ⵖ ⵓⵙⴳⴳⵯⴰⵙ ⴰⴷ ⵢⴰⵜ ⵜⵣⵣⵉⴳⵣⵜ ⵏ 0.4% ⵙ ⵓⵙⵎⵣⴰⵣⴰⵍ ⴷ ⵓⵙⴳⴳⵯⴰⵙ ⵉⵣⵔⵉⵏ ⵍⵍⵉⵖ ⵉⵣⵣⵉⴳⵣ ⵓⵙⵖⵍ ⵏ ⵉⵎⵏⴽⴰⴷⵏ ⵉⵍⴻⵍⵍⵉⵢⵏ ⵙ 12.5%  ⴷ ⵓⵙⵙⵍⵎⴷ ⵓⵙⵍⵉⴳ ⵙ 7% ⵖ ⵜⵉⵣⵉ ⵖ ⵢⵓⴳⴳⵓⵣ ⵓⵙⵙⵍⵎⴷ ⴰⴳⴷⵓⴷⴰⵏ ⵙ 5%".

ⵉⵙⴷⴷⵉⴷ ⵎⴰⵙⵙ ⴰⵎⵣⴰⵣⵉ ⵎⴰⵙ ⴷ “ⵉⵇⵇⴰⵏ ⴼ ⵜⵎⵔⵙⴰⵍ ⵏ ⵓⵙⵙⵍⵎⴷ ⵓⵙⵍⵉⴳ ⴰⴷ ⵅⵎⵎⵉⵎⵏⵜ ⵖ ⵜⵎⵙⵓⵜⵍⵉⵏ ⵏ ⵜⴰⵡⵊⵉⵡⵉⵏ, ⵜⵎⵎⴰⵖ ⵜⵎⴰⵡⴰⵙⵜ ⴰⴷ ⵢⵉⵍⵉ ⵓⵎⵢⴰⵡⴰⴹ ⵏⴳⵔ ⵜⵎⵔⵙⴰⵍ ⴰⴷ ⴷ ⵜⵡⴰⵊⵉⵡⵉⵏ ⵃⵎⴰ ⴰⴷ ⵍⴽⵎⵏⵜ ⵢⴰⵏ ⵓⵎⵛⴰⵛⴽⴰ”. ⵢⵉⵏⵉ ⵎⴰⵙ ⴷ “ⵜⵓⴳⵜ ⵏ ⵜⵎⵔⵙⴰⵍ ⵙⵎⴰⵜⵜⵉⵏⵜ ⵜⵉⵣⵉ ⵏ ⵓⴼⵔⵓ ⵏ ⵜⵙⵓⵔⵉ ⵏⵖ ⵙⴽⵔⵏⵜ ⴰⵙⵉⵣⴷⵔ ⵏⵏⵙ, ⵉⵍⵍⵉⵏⵜ ⵜⵉⴷ ⵍⵍⵉ ⵜⵜ ⵉⵙⵉⵜⵜⵉⵏ”.

ⵉⵎⵍⴰ ⴷ ⵎⴰⵙⵙ ⴰⵎⵡⴰⵙⴰⵙ ⵎⴰⵙ ⵍⵍⴰⵏⵜ “5828 ⵏ ⵜⵎⵔⵙⵍⵜ ⵖ ⵓⵙⵡⵉⵔ ⴰⵏⴰⵎⵓⵔ, ⴳⵉⵙⵏⵜ ⵎⵍⵢⵓⵏ ⴷ 46 ⵏ ⵉⴼⴹ ⵏ ⵓⵏⵍⵎⴰⴷ, ⴰⵙⵙⵍⵎⴷ ⵓⵙⵍⵉⴳ ⴰⵔ ⵉⵙⴽⴰⵔ ⵢⴰⵜ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵉⴳ ⴰⵖⵔⵔⴷ ⵏ ⵓⵙⵙⵍⵎⴷ ⴰⴳⴷⵓⴷⴰⵏ, ⵜⵉⵎⵔⵙⴰⵍ ⴰⴷ ⴳⵉⵙⵏⵜ ⵜⵉⴷ ⴱⴰⵀⵔⴰ ⵎⵥⵥⵉⵏⵉⵏ, ⵜⵉⴷ ⵎⵥⵥⵉⵏⵉⵏ ⴷ ⵜⵎⵊⵀⴷⴰⵢ, ⵖⵎⴽ ⴰⵏⵏ ⴰⴼ ⴰⵙⵏⵜ ⵉⴳⴰ ⵓⵥⵓⵥⴹ ⴰⵙⴷⵉⴷⴷⵉⵢ ⵍⵍⵉⵖ ⴰⴽⴽⵯ ⴷⴷⵔⵏⵜ ⵖⴰⵙ ⵖ ⵜⵖⵔⴰⴷ ⵏ ⵜⴰⵡⵊⵉⵡⵉⵏ”.

ⵖ ⵓⵎⵏⵉⴷ ⵢⴰⴹⵏ, ⵉⵏⵢⴰⵍⴰⴽⴰⵎ ⵎⴰⵙⵙ ⴰⵎⵣⴰⵣⵉ ⴷ ⵜⴽⵛⵛⵓⵎⵉⵏ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ, ⵉⵏⵏⴰ ⵎⴰⵙ ⴷ “ⵖ ⵓⵙⴳⴳⵯⴰⵙ ⴰⴷ ⵔⴰⴷ ⵉⵜⵜⵓⵙⴽⵉⵔ ⵢⴰⵏ ⵉⵔⵉⵎ ⵉⴳⴰⵏ ⵢⴰⵏ ⵉ ⵜⵙⵏⴰⵊⵊⵉⵜ ⴷ ⵜⵙⵏⴰⵊⵊⵉⵜ ⵏ ⵜⵖⵎⴰⵙ ⴷ ⵜⵙⴰⵙⴼⵔⵜ. ⵉⵎⵣⵔⴰⵡⵏ ⵍⵍⵉ ⴷⴰⵔ ⵍⴱⴰⴽⴰⵍⵓⵕⵉⵢⴰ ⵔⴰⴷ ⵜ ⵣⵣⵔⵉⵏ ⵖ ⵉⴷⵖⴰⵔⵏ ⵏⵏⵙⵏ, ⵉⵍⵍⴰ ⵓⵙⵓⵊⴷ ⵏ 45 ⵏ ⵡⴰⵎⵎⴰⵙ ⵏ ⵉⵔⵉⵎ, ⴷⴼⴼⵉⵔ ⵔⴰⴷ ⵢⵉⵍⵉ ⵓⴱⵟⵟⵓ ⵏⵏⵙⵏ ⵙ ⵜⵖⴰⵔⴰⵙⵜ ⵜⴰⵏⵎⵏⴰⴹⵜ ⵎⴽ ⵍⵍⵉ ⵙ ⵏⵉⵜ ⴰⴷⵍⵉⵉ ⵜⵍⵍⴰ ⵜⵡⵓⵔⵉ ⵖ ⵎⴰ ⴷ ⵉⵣⵔⵉⵏ”.