ⵜⴰⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵜⵎⴷⴰⵡⴰⵍ ⴼ ⵜⵉⵍⴰⵡⵜ ⴷ ⵜⵏⴰⵥⴰⵕⵉⵏ ⵏ ⵜⵏⵖⵎⴰⵙⵜ ⴷ ⵜⵎⵙⵙⵏⵜⴰⵢ ⵜⵉⵏⵖⵎⴰⵙⵉⵏ ⵖ ⵓⵣⵎⵣ ⵏ ⴽⵓⵕⵓⵏⴰ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰⵍ ⴰⵙⵙ ⵏ ⵓⵙⵉⵎⵡⴰⵙ 26 ⵢⵓⵏⵢⵓ 2020  ⵙ ⵜⵉⵍⵉⵜ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⵎⴰⵙⵙ ⵄⵓⵜⵎⴰⵏ ⵍⴼⵉⵔⴷⴰⵡⵙ, ⵜⵥⵍⵉ ⵉ ⵓⵎⴷⴰⵡⴰⵍ ⴼ ⵜⵉⵍⴰⵡⵜ ⵏ ⵓⵙⵏⵖⵎⵙ ⵉⵜⵜⵢⵓⵔⴰⵏ ⴷ ⵓⵍⵉⴽⵟⵕⵓⵏⵉ ⵖ ⵓⵣⵎⵣ ⵏ ⴽⵓⵕⵓⵏⴰ.

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙⵙ " ⵍⵍⴰⵏⵜ 200 ⵏ ⵎⵍⵢⵓⵏ ⵏ ⴷⵔⵀⵎ ⵉ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ ⵖ ⵓⵙⴰⵜⵉ ⵏ ⵢⴰⵏ ⵓⵖⴰⵡⴰⵙ ⴰⵖⴰⵡⵍⴰⵏ ⵉ ⵓⵙⵏⵊⵎ ⵏ ⵢⵉⴳⵔ ⴰⴷ ⵓⴷⴷⵉⵔ ⵉⵜⵜⴰⵡⵙⵏ ⵖ ⵓⵚⴽⴰⵡ ⴰⴷⵉⵎⵓⵇⵔⴰⵟⵉ". ⵉⵙⴷⴷⵉⴷ ⵎⴰⵙ " ⵓⵔ ⵉⴳⵓⵎ ⵓⵙⵏⴰⵍ ⴰⵎⵙⵉⵎⵢⴰⵔ ⵍⵍⵉⵖ ⴷ ⵉⵇⵇⴰⵏ ⴰⴷ ⵜⵉⵍⵉ ⵢⴰⵜ ⵜⵎⵙⴽⵔⵜ ⵉⵥⵍⵉⵏ, ⵢⵉⵍⵉ ⵓⵥⵍⴰⵢ ⵏ ⵜⵎⵙⵓⵜⵍⵉⵏ ⵥⵍⵉⵏⵉⵏ ⴷ ⵜⵉⴷ ⴳⴰⵏⵉⵏ ⵜⵉⵎⵙⵉⵎⵢⴰⵔⵉⵏ, ⵖⵎⴽ ⴰⵏⵏ ⴰⴼ ⵜⵍⵍⴰ ⵜⵡⵓⵔⵉ ⴷ ⵜⵎⴰⵡⴰⵙⵜ  ⵏ ⵜⴷⵎⵙⴰ ⴷ ⵜⵥⵕⴼⵜ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⴼ ⵢⴰⵏ ⵓⵖⴰⵡⴰⵙ ⴰⵖⴰⵡⵍⴰⵏ ⵉ ⵓⵙⵏⵊⵎ ⵏ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ ⵖ ⵍⵍⴰⵏⵜ ⴽⴽⵓⵥⵜ ⵜⵎⵙⴽⴰⵔ ⵣⴷⵉⵏⵉⵏ ⴷ ⵜⵎⵙⵓⵜⵍⵜ ⵏ ⵖⵉⵍⴰⴷ".

ⵙ ⵜⵎⵙⴽⵔⵜ ⵜⴰⵎⵣⵡⴰⵔⵓⵜ, ⵔⴰⴷ ⵉⴼⴽ ⵓⵡⴰⵏⴽ 75 ⵎⵍⵢⵓⵏ ⵏ ⴷⵔⵀⵎ ⴳⴰⵏⵉⵏ ⵜⵉⵖⵔⴰⴷ ⵏ ⵜⵎⵙⵙⵏⵜⴰⵢ ⴰⴷ ⵉ ⴽⵕⴰⴹ ⵢⵢⵉⵔⵏ (ⵢⵓⵍⵢⵓⵣ, ⵖⵓⵛⵜ, ⵛⵓⵜⴰⵏⴱⵉⵔ). ⵉⵎⵍⵉ ⴷ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ "130  ⵏ ⵜⵎⵙⵙⵏⵜⵉⵜ ⵜⴰⵏⵖⵎⴰⵙⵜ ⵜⵜⵔⵏⵜ ⴰⵙⵏⴰⵍ ⵙ ⵓⵖⵔ ⵏ ⵜⵔⵣⴼⵜ ⵍⵍⵉ ⵜⵕⵥⵎ ⵜⵎⴰⵡⴰⵙⵜ ⵉ ⵓⵙⵏⴰⵍ ⴰⵎⵙⵉⵎⵢⴰⵔ, ⴳⵉⵙⵏⵜ 30 ⵏ ⵜⵎⵙⵙⵏⵜⵉⵜ ⵜⴰⵎⴰⵢⵏⵓⵜ ⵉⵍⵍⴰⵏ ⵖ ⵜⴰⵙⵙⴰⵙⵜ ⵜⴰⵥⵕⴼⴰⵏⵜ.

ⵙ ⵜⵎⵙⴽⵔⵜ ⵜⵉⵙ ⵙⵏⴰⵜ, ⵜⵥⵍⵉ ⵜⵎⴰⵡⴰⵙⵜ 75 ⵎⵍⵢⵓⵏ ⵏ ⴷⵔⵀⵎ ⵉ ⵉⵏⴼⴽⴰⵢⵏ ⵏ ⵜⵎⵙⵙⵏⵜⴰⵢ ⵜⵉⵏⵖⵎⴰⵙⵉⵏ ⵃⵎⴰ ⴰⴷ ⵢⵉⵍⵉ ⵓⵡⴰⵍⴰ ⵏ ⵓⵏⵛⴽ ⴰⴷⵎⵙⴰⵏ ⵏ ⵢⵉⴳⵔ ⵏ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ ⴷ ⵓⵙⵉⴱⵙⵓⵙ ⴼⵍⵍⴰⵙⵏⵜ.

ⵙ ⵜⵎⵙⴽⵔⵜ ⵜⵉⵙ ⴽⵕⴰⴹⵜ, ⵜⵜⵓⵥⵍⴰⵢⵏ 15 ⵎⵍⵢⵓⵏ ⵏ ⴷⵔⵀⵎ ⵉ ⵜⵙⵉⴳⴳⴰⵣ ⵍⵍⵉ ⵙⴽⴰⵔⵏⵉⵏ ⵜⴰⵥⵕⵉⴳⵜ ⵏ ⵓⴳⴳⴰⵔ ⵏ 500 ⵏ ⵉⴼⴹ ⵏ ⵜⵓⵏⵖⵉⵍⵜ, ⵃⵎⴰ ⴰⴷ ⵥⴹⵉⵕⵏⵜ ⴰⴷ ⴼⴽⵉⵏⵜ ⵜⵉⵖⵔⴰⴷ ⵏ ⵉⴷ ⴱⴰⴱ ⵏ ⵓⵙⵡⵓⴷⴷⵓ. ⵜⴳⴰ ⵜⵎⵙⴽⵔⵜ ⵜⵉⵙ ⴽⴽⵓⵥⵜ ⴰⵙⵏⴰⵍ ⵓⵙⵔⵉⴷ ⵉ « ⵙⴰⴱⵕⵉⵙ » ⵉⵍⵍⴰⵏ ⴼ ⵓⴱⵟⵟⵓ ⵍⵍⵉⵖ ⵍⴽⵎⵏⵜ ⵜⵎⵓⴽⵔⵉⵙⵉⵏ ⵏⵏⵙ ⵉⵣⴷⵉⵏ ⴷ ⵜⵎⵙⵓⵜⵍⵜ ⴰⴷ 15 ⵎⵍⵢⵓⵏ ⵏ ⴷⵔⵀⵎ, ⵔⴰⴷ ⵏⵉⵜ ⵙⵓⵍ ⵜⵣⵣⵉⴳⵣ ⵜⵎⴰⵡⴰⵙⵜ ⵏ ⵜⵥⵕⴼⵜ ⵖ ⵓⵙⵏⴰⵍ ⵏⵏⵙ ⵉ ⵜⵎⵙⵙⵓⵔⵓⵜ ⴰⴷ ⵍⵍⵉ ⵜⵙⵙⵏⵜⵉ ⵖ ⵓⵙⴳⴳⵯⴰⵙ ⵉⵣⵔⵉⵏ ⵙ ⵓⵙⵎⴰⵢⵏⵓ ⵏ ⵓⵙⴰⴷⴳⵔ ⵏⵏⵙ ⵙ 10 ⵎⵍⵢⵓⵏ ⵏ ⴷⵔⵀⵎ.

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⵎⴰⵙ"ⵜⵜⵓⵥⵍⴰⵢⵏ 15 ⵎⵍⵢⵓⵏ ⵏ ⴷⵔⵀⵎ ⵉ ⵉⵏⵣⵡⴰⵢⵏ ⵓⵙⵍⵉⴳⵏ ⵍⵍⵉⵖ ⵏⵏ ⴳⴰⵏ ⵜⵓⴳⴳⴰⵙ ⵎⵇⵇⵓⵔⵏⵉⵏ ⵖ ⵓⵙⴼⵔⴽ ⵏ ⵉⵏⵎⵓⵔⴰⵏ ⵖ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵙ ⵢⴰⵜ ⵜⵓⵜⵍⴰⵢⵜ ⵉⵔⵅⴰⵏ ⵉⵇⵇⵔⴱⵏ ⵉ ⵉⵏⵎⵓⵔⴰⵏ ⴷ ⵜⵉⵏⵎⵓⵔⴰⵜⵉⵏ".

ⵖ ⵓⵎⵏⵉⴷ ⵏ ⵓⵙⴳⵉⴷⴷⵉ ⵏ ⵢⵉⴳⵔ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⵍⵍⴰ ⵓⵎⵛⴰⵛⴽⴰ ⴼ ⵓⵙⴽⵔ ⵏ ⵜⵔⴰⴱⴱⵓⵜ ⵉⵛⵛⴰⵔⵏ ⵏ ⵜⵡⵓⵔⵉ ⵍⵍⵉ ⵔⴰⴷ ⵉⵙⵡⵓⵔⵉ ⴼ ⵜⵎⵓⵛⴰ ⴷ ⵓⵎⵍⴰⵏ  ⵣⴷⵉⵏⵉⵏ ⴷ ⵡⴰⴽⴰⵣ ⵏ ⵓⵙⵓⵔⵙ, ⴷⴼⴼⵉⵔ ⵔⴰⴷ ⵜⵉⵍⵉ ⵜⵖⵔⵉ ⵏ ⵜⵙⵓⵎⵔⵉⵏ ⵏ ⵉⴷ ⴱⴰⴱ ⵏ ⵢⵉⴳⵔ ⴰⴷ ⵖ ⵉⵎⵏⵉⴷⵏ ⵏ ⵓⵙⵎⴰⵢⵏⵓ ⴷ ⵓⵙⵎⵓⵜⵜⴳ ⴷ ⵉⵙⵏⴼⴰⵔⵏ ⵏ ⵓⵙⵙⴰⵔⵓ ⵉ ⵜⵎⵙⵙⵏⵜⴰⵢ ⴰⴷ ⵙ ⵉⵖⴰⵡⴰⵙⵏ ⴰⴳⴳⵓⴳⵏⵉⵏ.

ⵉⵏⵏⴰ ⵎⴰⵙⵙ ⵍⴼⵉⵔⴷⴰⵡⵙ ⵎⴰⵙ ⴷ ⵜⵎⵍⴰ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵜⵓⴳⵜ ⵏ ⵜⵎⵓⴽⵔⵉⵙⵉⵏ ⵓⵔ ⵍⵍⵉⵏⵉⵏ ⵖⴰⵙ ⵖ ⵢⵉⴳⵔ ⵏ ⵓⵎⵢⴰⵡⴰⴹ, ⵎⴰⵛⵛ ⵣⴷⵉⵏⵜ ⴷ ⴽⵓ ⵉⴳⵔⴰⵏ, ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵙⵎⴽⵍ ⵏⵏⵙⵏⵜ ⵙ ⵢⴰⵜ ⵜⵎⵢⴰⴷⴰⵙⵜ ⵏ ⵓⵙⵏⵍⵉ ⵙ ⵓⵙⵡⵓⵜⵜⵓ ⵏ ⵜⵎⵓⴽⵔⵉⵙⵏ ⵣⴷⵉⵏⵉⵏ ⴷ ⵜⴰⵙⵙⴰⵙⵜ ⵙ ⵓⵙⵔⵙ ⵏ ⵉⵖⴰⵡⴰⵙⵏ ⵙⵔⵙⵏⵜ ⵥⵍⵉⵏⵉⵏ, ⴷ ⵜⵎⵓⴽⵔⵉⵙⵉⵏ ⵏ ⵓⵙⴳⵉⴷⴷⵉ ⵍⵍⵉ ⴷ ⵜⵇⵇⴰⵏ ⵜⵡⵓⵔⵉ ⵖ ⵉⵙⵡⵉⵔⵏ ⴰⵏⴰⵎⵎⴰⵙ ⴷ ⵓⵎⴰⴳⴳⵓⴳ.

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ ⵉⵇⵇⴰⵏ ⵓⵍⴰ ⴰⴷ ⵎⵎⵉⴳⴳⵉⵔⵏ ⵉⵙⵏⴼⴰⵔⵏ ⵏⴳⵔ ⵉⴳⵔⴰⵏ ⵏ ⵜⴷⵍⵙⴰ ⴷ ⵓⵙⵏⵖⵎⵙ ⴷ ⵉⵄⵔⵔⵉⵎⵏ ⵙ ⵉⵙⵏⴼⴰⵔⵏ ⴼⴰⵡⵏⵉⵏ, ⵖ ⵓⵎⵏⵉⴷ ⴰⴷ ⵉⵏⵏⴰ ⵎⴰⵙ ⵉⵙⴽⵔ ⵢⵉⴳⵔ ⵏ ⵉⵄⵔⵔⵉⵎⵏ ⴰⵖⴰⵡⴰⵙ ⵏ « ⵉⵎⵥⵢⴰⵏⵏ ⴷ ⵜⴷⵍⵙⴰ » ⵍⵍⵉ ⵉⴳⴰⵏ ⵜⴰⵙⵉⵍⴰ ⵏ ⵓⵎⵢⴰⵡⴰⴹ ⵉⵎⵎⴰⵍⵏ ⵉ ⵉⵎⵥⵢⴰⵏⵏ ⵜⴰⴷⵍⵙⴰ ⴷ ⵡⴰⵢⴷⴰ ⵏ ⵜⴳⵍⴷⵉⵜ, ⴷ ⵓⵖⴰⵡⴰⵙ ⵏ ⵉⵎⵃⵉⵣⵡⴰⵔⵏ ⵉⵡⵓⵙⵙⴰⵏⵏ ⵉⵥⵍⵉⵏ ⵉ ⵉⵎⵥⵢⴰⵏⵏ ⵖ ⵓⵙⴰⵔⵓ ⴰⵎⵣⵡⴰⵔ.  

ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⴼ ⵡⴰⵜⵉⴳ ⵏ ⵉⵙⵏⴼⵍⵏ ⵉⵜⵉⴽⵏⵓⵍⵓⵊⵉⵢⵏ ⴷ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ ⵍⵍⵉ ⵉⴹⵚⵏ ⴰⵔⵎⵎⵓⵙ ⵏ ⵜⴷⵉⵎⵓⵇⵔⴰⵟⵉⵜ, ⴷ ⵓⴳⴰⴷⴰⵣ ⵏ ⵓⵙⵉⵙⵙⵏ ⵉⵟⵟⴰⴼⵏ ⴰⵜⵉⴳ ⴰⵅⴰⵜⴰⵔ ⵖ ⵉⵙⵏⴼⵍⵏ ⴰⴷ.

ⵖ ⵓⵎⵏⵉⴷ ⴰⴷ, ⵉⴱⴷⵔ ⵎⴰⵙⵙ ⴰⵎⴰⵡⵙⴰⵙ ⴰⵎⴹⴰⴽⴰⵕ ⴰⴳⵔⴰⵖⵍⴰⵏ ⵉⵍⵍⴰⵏ ⵖⵉⵍⴰⴷ ⴷⴰⵔ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴷ ⵜⴳⵎⵉ ⵜⴰⴷⵎⵙⴰⵏⵜ ⴼ ⵜⵎⵓⴽⵔⵉⵙⵜ ⵏ ⵓⴷⵙⵔⵙ ⵏ ⵜⵙⴰⵍⵉⵡⵉⵏ ⵜⵉⵎⵓⵟⵟⵓⵏⵉⵏ, ⵉⵏⵏⴰ ⵎⴰⵙ ⵉⵟⵟⴰⴼ ⵓⵎⴹⴰⴽⴰⵕ ⴰⴷ ⴰⵜⵉⴳ ⵏⵏⵙ ⵉ ⵜⵎⵉⵣⴰⵔ ⴰⵎ ⵍⵎⵖⵔⵉⴱ, ⴰⵢⵍⵍⵉ "ⵔⴰⴷ ⵢⴰⵡⵙ ⵉ ⵜⴳⵍⴷⵉⵜ ⴰⴷ ⵜⵙⵙⴷⵓⵙ ⴰⵎⴹⴰⴽⴰⵕ ⴷ ⵜⵎⵙⵙⵓⵔⵉⵏ ⵜⵉⵅⴰⵜⴰⵔⵉⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵉⵟⵟⴰⴼ 15 ⵏ ⵎⵍⵢⵓⵏ ⵏ ⵓⵎⵖⵔⵉⴱⵉ ⴰⵎⵉⴹⴰⵏ ⵖ ⵓⴼⴰⵢⵙⴱⵓⴽ ⴳⵉⵙⵏ 8 ⵏ ⵎⵍⵢⵓⵏ ⵏ ⵓⵄⵔⵔⵉⵎ.

ⵖ ⵓⵎⴹⴰⴽⴰⵕ, ⵎⵛⴰⵛⴽⴰⵏ ⴷ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉⴳⵏⴰⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ  ⴼ ⵜⵉⵍⴰⵍⵜ ⵜⴰⴷⵙⵍⴰⵏⵜ ⵏ ⵓⵙⵏⵖⵎⵙ ⴰⴳⴷⵓⴷⴰⵏ ⴷ ⵓⵙⵍⵉⴳ ⵖ ⵓⵣⵎⵣ ⵏ ⵓⴱⴰⵢⵢⵓⵕ, ⵙⵓⵜⴳⵏ ⵜⴰⵎⵢⴰⴷⴰⵙⵜ ⵉⵍⵍⴰⵏ ⵖ ⵓⵙⵍⴽⵎ ⵏ ⵓⵎⵍⴰⵏ ⴷ ⵓⵙⴼⵔⴽ ⴷ ⵓⵙⴱⴷⴷⵉ ⵏ ⵜⴽⵔⴽⴰⵙ ⴷ ⴳⴰⵔ ⵉⵏⵖⵎⵉⵙⵏ ⵖ ⵜⵉⵣⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ. ⵖⵔⵉⵏ ⵉⴷ ⵎⴰⵙⵙ ⵉⵎⵓⵔⴰ ⵉ ⵓⵙⵎⵖⵔ ⵏ ⵢⵉⴳⵔ ⵏ ⵜⴷⵔⴼⵉⵜ ⵏ ⵜⵡⵓⵔⵉ ⵜⴰⵏⵖⵎⴰⵙⵜ, ⴷ ⵓⵃⵟⵟⵓ ⴰⵏⴰⵎⵓⵏ ⵏ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⴷ, ⴷ ⵓⵙⵖⵓⴷⵓ ⵏ ⵉⵙⵓⵔⵙⵏ ⵏ ⵜⵡⵓⵔⵉ ⵃⵎⴰ ⴰⴷ ⵙⵡⵓⵔⵉⵏ ⵖ ⵜⵎⵙⵓⵜⵍⵉⵏ ⵥⵉⵍⵏⵉⵏ.

ⴱⴷⴷⵏ ⵉⴷ ⵎⴰⵙⵙ ⵉⵎⵓⵔⴰ ⵃⴰⴹⵕⵏⵉⵏ ⴼ ⵡⴰⵜⵉⴳ ⵏ ⵜⵏⴼⵓⵔⵜ ⵏ ⵓⵎⵍⴰⵏ ⴷ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵖ ⵓⵣⵎⵣ ⵏ ⵓⵙⵏⴼⵍ ⴰⵎⵓⵟⵟⵓⵏ, ⵜⵍⵍⴰ ⵜⵖⵓⵔⵉ ⵉ ⵓⵍⵜⴰⵖ ⵖ ⵜⵎⴷⵔⴰⵡⵉⵏ ⴷ ⵉⴷ ⴱⴰⴱ ⵏ ⵜⴻⵜⵉⴽⵏⵓⵍⵓⵊⵉⵢⵉⵏ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵙ ⵢⴰⵜ ⵜⵎⵢⴰⴷⴰⵙⵜ ⵉⵡⴰⵜⵜⵙⵏ ⵜⵉⵍⵉⵜ ⵏ ⵜⵅⵅⵓⵜⵔⴰ ⵜⴰⵎⵓⵟⵟⵓⵏⵜ ⵏ ⵜⴳⵍⴷⵉⵜ, ⵖⵎⴽ ⴰⵏⵏ ⴷ ⵓⵛⵛⵉⵍ ⵏ ⵓⵙⵖⵓⴷⵓ ⵏ ⵡⴰⵏⴰⵡ ⴰⴷⵎⵙⴰⵏ ⴰⵎⴰⵢⵏⵓ ⵏ ⵜⵎⵔⵙⴰⵍ ⵜⵉⵏⵖⵎⴰⵙⵉⵏ ⵖ ⵓⵙⵡⵓⴷⴷⵓ ⵏ ⵓⴳⴰⴷⴰⵣ ⵏ ⵓⵙⵉⵙⵙⵏ ⴷⴰⵔ ⵜⵎⵔⵙⴰⵍ ⵏ ⵢⵉⴳⵔ ⴰⴳⴷⵓⴷⴰⵏ, ⵙ ⵜⵎⵢⴰⴷⴰⵙⵜ ⵉⴱⴷⴷⵏ ⴼ ⵜⵙⴰⵔⵡⴰ ⵉⵥⵉⵍⵏ ⵏ ⵓⵖⴱⴰⵍⵓ ⴰⴷ ⴰⵥⵕⴼⴰⵏ ⵉⵙⵜⴰⵡⵀⵎⵎⴰⵏ ⵉ ⵜⵎⵔⵙⴰⵍ ⵏ ⵓⵙⵏⵖⵎⵙ.

ⵖ ⵎⴰ ⴷ ⵉⵥⵍⵉⵏ ⴷ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵏⵖⵎⴰⵙⵜ, ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵉ ⵓⵙⵏⴰⵍ ⵏⵏⵙ ⵙ ⴽⵓ ⵉⵎⴰⵙⵙⵏ ⵍⵍⵉ ⵔⴰⴷ ⴰⵙ ⵢⴰⵡⵙ ⵖ ⵜⵎⵙⴽⴰⵔ ⵏⵏⵙ ⵉ ⵓⵙⵏⵎⴰⵍⴰ ⴷ ⵓⵙⵖⵔⵜ ⵏ ⵢⵉⴳⵔ ⴰⴷ, ⵖⵎⴽ ⵍⵍⵉ ⵏⵏⴰⵏ ⵎⴰⵙ ⵍⵍⴰⵏⵜ ⵖ ⵜⵉⴼⴰⵡⵜ ⵏ ⵓⵎⵇⵇⵏ ⵏ ⵜⵖⴰⵔⵉⵡⵉⵏ ⵏ ⵜⵣⵣⵓⵍⵜ ⵏ ⵜⵏⵖⵎⴰⵙⵜ ⴽⵔⴰ ⵏ ⵜⴰⵕⵥⵉⵡⵉⵏ ⵏ ⵉⵙⵍⴳⵏⵏ ⵏ ⵜⵣⵣⵓⵍⵜ ⵖ ⵜⵉⵣⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵖⵔⵉⵏ ⵉ ⵓⵙⵎⵀⵍ ⵏ ⵉⵙⵍⴳⵏⵏ ⴰⴷ. ⴼⴽⴰⵏ ⵓⵍⴰ ⵉⴼⵙⵙⴰⵢⵏ ⵍⵍⵉ ⵔⴰⴷ ⵉⵙⴱⵓⵖⵍⵓ ⵉⴳⵔ ⵏ ⵜⵏⵖⵎⴰⵙⵜ ⵉⵜⵜⵢⵓⵔⴰⵏ ⵎⵓ ⴷⵔⵓⵙⵏ ⵉⵎⵖⵔⵉⵜⵏ ⵏⵏⵙ, ⴷ ⵓⵙⴱⴷⴷⵉ ⵏ ⵜⵥⵔⵉⴳⵉⵏ ⵏ ⵓⴼⵔⴽⵓⴽ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ. ⵙⴰⵡⵍⵏ ⴼ ⵓⵙⵓⵜⴳ ⵏ ⵜⵉⵍⴰⵍⵜ ⵏ ⵜⵏⵖⵎⴰⵙⵜ ⴷ ⵜⵎⵙⵙⵏⵜⴰⵢ ⵜⵉⵏⵎⵏⴰⴹⵉⵏ ⵏ ⵓⵙⵏⵖⵎⵙ ⵍⵍⵉⵖ ⵙⴽⵔⵏⵜ ⵜⴰⵡⵓⵔⵉ ⵏⵏⵙⵏⵜ ⵖ ⵜⵉⵣⵉ ⵏ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵉⵍⵍⴰⵏ ⵖ ⵜⴳⵍⴷⵉⵜ, ⵖⵎⴽ ⴰⵏⵏ ⴷ ⵓⵙⵎⵓⵜⵜⴳ ⵏ ⵉⵏⵖⵎⴰⵙⵏ ⵖ ⵓⵙⵡⵉⵔ ⴰⵏⵎⵏⴰⴹ, ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵜⵉⵏⵖⵎⴰⵙⵉⵏ ⵎⵥⵥⵉⵏⵉⵏ ⴷ ⵜⵎⵊⵀⴷⴰⵢ ⵖ ⵓⵙⵡⵉⵔ ⴰⵥⵕⴼⴰⵏ.

ⴱⴷⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵓⵍⴰ ⴼ ⴽⵔⴰ ⵏ ⵜⵎⵥⵍⴰⵢ ⵣⴷⵉⵏⵉⵏ ⴷ ⵉⵎⵏⵉⴷⵏ ⵉⵥⵕⴼⴰⵏⵏ ⵏ ⵜⵎⵔⵙⴰⵍ ⵜⵉⵥⵕⴼⴰⵏⵉⵏ ⵖ ⵎⴰ ⴷ ⵉⵥⵍⵉⵏ ⴷ ⵉⵎⵉⵥ ⵏ ⵜⵔⵎⵙⵜⵉⵏ ⵏ ⵓⵙⵓⵙⵙⵏ ⴷ ⵜⵣⴷⴰⵢⵜ ⴷ ⵉⴷ ⴱⴰⴱ ⵏⵏⵙ, ⴷ ⵜⵎⵓⴽⵔⵉⵙⵉⵏ ⵏ ⵓⵔⴳⴰⵢ ⵖ ⵜⵎⵙⵙⵏⵜⵉⵜ ⵜⴰⵏⵖⵎⴰⵙⵜ, ⴰⵢⵍⵍⵉ ⵉⴽⴽⴰⵏ ⴼ ⵡ ⴰⵢⴷⴰ ⵏⵏⵙ ⴰⵥⵕⴼⴰⵏ ⴷ ⵉⵖⴱⵓⵍⴰ ⵢⴰⴹⵏⵉⵏ ⵏ ⵉⵖⵎⵉⵙⵏ ⵏ ⵓⴼⵔⴽⵓⴽ ⴷ ⵉⴷⵔⵉⵣⵏ ⴼ ⵜⵖⵔⴰⴷ ⵏ ⵉⵎⵙⵡⵓⵔⵉⵢⵏ ⴷ ⵜⵎⵙⵓⵜⵍⵉⵏ ⵏⵏⵙⵏ ⵜⵉⵏⴰⵎⵓⵏⵉⵏ.