ⵜⴰⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵜⵎⴹⴰⴽⴰⵕ ⴼ ⵓⵙⵏⴼⵍ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵥⵍⵉⵏⵉⵏ ⵙ ⵜⵏⴽⴷⴰ ⵏ ⵜⵓⵜⵔⵉⵡⵉⵏ ⴷ ⵜⵓⵍⴽⵉⵎⵉⵏ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵡⴰⵢⵏⴰⵙ 15 ⵢⵓⵏⵢⵓ 2020 ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵕⴰⵛⵉⴷ ⵍⵄⴰⴱⴷⵉ, ⵜⵥⵍⵉ ⵉ ⵓⵎⴹⴰⴽⴰⵕ ⴼ ⵓⵙⵏⴼⵍ  ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵓⵟⵟⵓⵏⵏ 64.14 ⴷ 44.14 ⵥⵍⵉⵏⵉⵏ ⵙ ⵜⵏⴽⴷⴰ ⵏ ⵜⵓⵜⵔⵉⵡⵉⵏ ⵖ ⵢⵉⴳⵔ ⵏ ⵓⵣⵣⵔⴰⴼ ⴷ ⵜⵏⴽⴷⴰ ⵏ ⵜⵓⵍⴽⵉⵎⵉⵏ.

ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⴰⵡⵍ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⴼ ⵉⵙⵉⵜⴰⵎ ⵏⵏⵙ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵉⵊⵊⵉ ⴷ ⵓⵍⴳⴳⵓⴷ, ⵢⵉⵏⵉ ⵖ ⵜⴳⵓⵔⵉ ⵏⵏⵙ:"ⵜⴽⵛⵎ ⵜⵙⵎⵓⵏⵉ ⴰⴷ ⵖ ⵓⵏⵏⵓⵕⵥⵎ ⵏ ⵜⵙⴰⵡⵔⵜ ⵏ ⵓⵣⵣⵔⴰⵢ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ, ⴰⵢⵍⵍⵉ ⵢⵓⵊⵊⴰⵏ ⵜⴰⵙⵇⵇⵉⵎⵜ ⴰⴷ ⵜⴰⵡⵙ ⵖ ⵓⵙⴱⵓⵖⵍⵓ ⵏ ⵓⵎⴹⴰⴽⴰⵕ ⵙ ⵜⵙⵓⵎⴰⵔ ⵥⵍⵉⵏⵉⵏ ⵙ ⵜⵙⵇⵇⵉⵎⵜ, ⵃⵎⴰ ⴰⴷ ⵜⵉⵍⵉ ⵜⵡⵉⵙⵉ ⵖ ⵓⵙⵔⵙ ⵏ ⵓⵙⵡⵉⵏⴳⵎ ⴰⵎⴰⵢⵏⵓ ⵏ ⵓⵏⴳⵔⴰⵡ ⴰⴳⵯⵏⵙⴰⵏ". ⵉⵍⵇⵎ ⵢⵉⵏⵉ:"ⴷⴼⴼⵉⵔ ⵎⴰ ⴷ ⵉⵙⴽⵔ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵢⴰⵜ ⵜⵙⵇⵇⵉⵎⵜ ⵍⵍⵉ ⵔⴰⴷ ⵉⵥⵕ ⵉⵙⵏⴼⵍⵏ ⵍⵍⵉ ⵔⴰⴷ ⵉⵜⵜⵓⵙⴽⵉⵔ, ⵜⵙⵡⵓⵔⵉ ⵜⵙⵇⵇⵉⵎⵜ ⴰⴷ ⵖ ⵜⵙⴰⵡⵔⵜ ⴰⴷ, ⴰⵛⴽⵓ ⵜⵙⴳⵓⴷⵉ ⵢⴰⵜ ⵜⵉⵔⵎⵉⵜ ⵖ ⵓⵎⵏⵉⴷ ⴰⴷ, ⵜⵏⵏⵓⵕⵥⵎ ⵓⵍⴰ ⴼ ⵜⵉⵔⵎⵉⵜⵉⵏ ⵏ ⵉⵡⴰⵏⴽⵏ ⵉⵎⴷⴷⵓⴽⴽⵯⴰⵍ".

ⵍⵍⴰⵏⵜ ⵙⴳ ⵜⴰⵏⵏⴰⵢⵉⵏ ⵜⵜⵓⴼⴽⴰⵏⵉⵏ ⵖ ⵜⵙⵎⵓⵏⵉ ⵍⵍⵉ ⵉⵣⵔⵉⵏ, ⵜⴰⵎⵓⴽⵔⵉⵙⵜ ⵏ ⵉⵎⵉⵥ ⴷ ⵓⵙⴽⵔ ⵙ ⵉⵎⵉⵙⵙ ⴰⴷ ⴰⴷⵉⵎⵓⵇⵔⴰⵟⵉ, ⴰⵛⴽⵓ ⴰⵏⵛⴽ ⵏ ⵉⵙⴳⵎⴰⴹ ⵉⴳⴳⵓⵜ ⴱⴰⵀⵔⴰ, ⴷ ⵜⵓⵙⵙⵏⴰ ⵏ ⵜⵎⴰⴳⵉⵜ ⵏ ⵉⴷ ⴱⴰⴱ ⵏ ⵜⵡⵓⵔⵉ ⵓⵔ ⴱⴰⵀⵔⴰ ⵜⵉⵡⵙ ⵖ ⵜⵉⵕⵡⵉ ⵏ ⵜⵡⵓⵔⵉ ⵏ ⵜⵏⴽⴷⴰ.

ⵙ ⵉⵙⵖⵍⴰⴼ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ, ⵜⴳⴰ ⵜⵙⵎⵓⵏⵉ ⴰⴷ ⵜⴰⵎⵍⴷⴰ ⵏ ⵜⵏⴽⴷⴰ ⵏ ⵓⵙⵎⵏⵉⴷ ⵉⵣⵣⵓⵣⵔⵏ ⴼ ⵜⵙⵓⵎⴰⵔ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵉⵎⵉⵏ, ⵢⵉⵍⵉ ⵓⵎⴹⴰⴽⴰⵕ ⵏⵏⵙⵏⵜ ⴷ ⵓⵎⵛⴰⵡⴰⵕ ⴷⴰⵜ ⵏ ⵜⵏⴽⴷⴰ ⵏ ⵜⵢⴰⴼⵓⵜ ⵏ ⵜⵡⵓⵔⵉ.

ⵉⵙⵎⵏⵉⴷ ⵎⴰⵙⵙ ⵍⵄⴰⴱⴷⵉ ⵖ ⵜⴳⵓⵔⵉ ⵏⵏⵙ "ⵜⵉⵡⵓⵔⵉⵡⵉⵏ ⵏ ⵜⵙⵇⵇⵉⵎⵜ ⴷ ⵜⵉⵏⵏⴰⵡⵉⵏ ⵍⵍⵉ ⵉⵙⵏⵎⴰⵍⴰ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵉ ⵓⵣⵣⵔⴰⵢ ⵏ ⵓⴱⵔⵉⴷ ⵏ ⵜⵡⵓⵔⵉ ⵏ ⵜⴷⵉⵎⵓⴽⵔⴰⵟⵉⵜ ⵜⴰⵎⴰⴷⵔⴰⵡⵜ, ⴷ ⵜⵉⵔⵎⵉⵜ ⵉⵜⵜⵓⵙⴽⴰⵔⵏ, ⵉⵔⵣⴰⴼⵏ ⵏ ⵉⴱⴰⵔⴰⵣⵏ, ⵜⵉⵡⵓⵔⵉⵡⵉⵏ ⵜⵉⵏⴰⵎⵓⵔⵉⵏ ⴰⵎ ⵜⵉⵢⴰⴼⵓⵜⵉⵏ ⵏ ⵓⵎⵙⴰⵡⴰⵍ ⴰⵏⴰⵎⵓⵔ ⴼ ⵡⴰⵎⵓⵏ ⵓⵖⵔⵉⵎ ⵍⵍⵉ ⴳⴰⵏⵉⵏ ⵢⴰⵏ ⵓⵙⴰⵜⵉ ⴷ ⵢⴰⵜ ⵜⵙⵉⵍⴰ ⵍⵍⵉ ⵢⵉⵡⵙⵏ ⵉ ⵜⵙⵇⵇⵉⵎⵜ ⴰⴷ ⵜⴼⴽ ⵜⵉⵖⵔⵉ ⵏⵏⵙ ⵉ ⵓⵣⵣⵔⴰⵢ ⴷ ⵓⵙⵏⴼⵍ ⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵥⵍⵉⵏⵉⵏ ⵙ ⵜⵓⵍⴽⵉⵎⵉⵏ ⴷ ⵜⵓⵜⵔⵉⵡⵉⵏ ⴷ ⵜⴰⵏⵏⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⴽⵔⴰ ⵏ ⵉⵙⴰⵍⵎⴰⴷⵏ ⵏ ⵜⵙⴷⴰⵡⵉⵜ ⴷ ⵉⵎⵔⵣⵓⵜⵏ ⴷ ⵡⵉⴷ ⵜⵀⵎⵎⴰ ⵜⵡⵓⵔⵉ ⴰⴷ".

ⵜⵉⵡⵉ ⴷ ⵜⵡⵓⵔⵉ ⵏ ⵜⵙⵇⵇⵉⵎⵜ ⴰⴷ ⵢⵉⵍⵉ ⵓⵙⴰⵙⵜⵡⵓ ⵏ ⵓⴹⵕⵉⵚ ⴰⵣⵣⵔⴰⴼ ⴷ ⵉⵔⵎⵎⵓⵙⵏ ⵏⵏⵙ ⵉⵙⵉⵍⴰⵏⵏ, ⴷ ⵓⵣⵣⵔⴰⵢ ⵏ ⵜⴼⴰⴷⵉⵡⵉⵏ ⴷ ⵜⵔⵙⴰⵍ ⴼ ⵜⵜⵔⵙⵏⵜ ⵜⵓⵜⵔⵉⵡⵏ ⴷ ⵜⵓⵍⴽⵉⵎⵉⵏ, ⴷ ⵓⵙⴷⵓⵙ ⵏ ⵉⵎⴰⵍⵏ ⵏ ⵜⵡⵓⵔⵉ ⵖ ⵓⵏⵢⴰⵍⴰⴽⵎ ⴷ ⵜⵓⵜⵔⵉⵡⵉⵏ ⴷ ⵜⵓⵍⴽⵉⵎⵉⵏ.

ⵖ ⵓⵙⵡⵉⵔ ⵏ ⵓⵙⴰⵙⵜⵡⵓ ⵏ ⵓⴹⵕⵉⵚ, ⵉⴼⴽⴰ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵙⴰⵜ ⵜⵢⴰⴼⵓⵜⵉⵏ ⵜⵉⴷⵙⵍⴰⵏⵉⵏ: ⴰⵙⵎⵓⵏ ⵏ ⵙⵉⵏ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵖ ⵢⴰⵏ ⵓⵙⵍⴳⵏ ⴰⵎⴰⴷⴷⴰⵙ, ⴰⵣⵣⵔⴰⵢ ⵙⵇⵇⵉⵇⵏ ⵏ ⵡⴰⵏⴰⵡ ⵏ ⵜⵓⵍⴽⵉⵎⵜ ⴷ ⵜⵓⵜⵔⴰ, ⵜⵓⵙⵙⵔⴰ ⵏ ⵓⵥⵍⴰⵢ ⵉⵚⴰⵃⴰⵏ ⵉ ⵉⵙⵍⴳⵏⵏ ⵉⵎⴰⴷⴷⴰⵙⵏ ⵖ ⵜⵓⵜⵔⵉⵡⵉⵏ, ⴰⵙⵇⵇⵙⴼ ⵏ ⵜⵓⵚⴽⵉⵡⵉⵏ ⵏ ⵜⵓⵍⴽⵉⵎⵜ ⵏⵖ ⵜⵓⵜⵔⴰ, ⴰⵙⵎⵖⵔ ⵏ ⵜⵉⵍⴰⵍⵜ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ, ⵓⵜⵓⵢ  ⴰⵣⵔⴼⴰⵏ ⵏ ⵜⴷⴰⴱⵓⵜ ⵜⴰⵍⵉⴽⵟⵕⵓⵏⵉⵜ, ⵜⴰⵏⴽⴷⴰ ⵏ ⵜⵢⴰⴼⵓⵜ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⴷ ⵓⵎⴹⴰⴽⴰⵕ ⵏⵏⵙ ⵖ ⵜⵖⵉⵎⵉⵜ ⵜⴰⵎⴰⵜⴰⵢⵜ.

ⵖ ⵓⵎⵏⵉⴷ ⵏ ⵓⵙⴷⵓⵙ ⵏ ⵉⵎⴰⵍⴰⵏ ⵏ ⵜⵡⵓⵔⵉ ⵏ ⵓⵏⵢⴰⵍⴽⴰⵎ ⴷ ⵜⵓⵜⵔⵉⵡⵉⵏ ⴷ ⵜⵓⵍⴽⵉⵎⵉⵏ, ⵃⵎⴰ ⴰⴷ ⵢⵉⵍⵉ ⵓⴷⵔⵉⵣ ⵉⴼⴰⵡⵏ ⵏ ⵉⵎⴰⵙⵙⵏ ⴰⴷ, ⵏⵏⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⴹⴼⵕ ⵏ ⵜⵓⵍⴽⵉⵎⵜ ⴷ ⵜⴱⵔⵉⴷⵜ ⵏⵏⵙ ⵙ ⵢⴰⵏ ⵉⵎⵉⵙⵙ ⴰⵍⵉⴽⵟⵕⵓⵏⵉ, ⴷ ⵓⵙⴼⵍⴷ ⵏ ⵜⵙⵇⵇⵉⵎⵜ ⵏ ⵜⵓⵍⴽⵉⵎⵉⵏ ⵉ ⵡⵉⵍⵍⵉ ⵙⵎⵏⵉⴷⵏⵉⵏ ⵜⵓⵍⴽⵉⵎⵜ, ⴷ ⵜⵉⵍⵉⵜ ⵏⵏⵙⵏ ⵖ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⵏⵖ ⵜⴰⵙⵇⵇⵉⵎⵜ ⵜⴰⴱⵕⵍⴰⵎⴰⵏⵉⵜ ⵉⵥⵍⵉⵏ, ⵜⵉⵍⵉ ⵜⵙⵓⵎⵔⵜ ⵏ ⵓⵙⵍⴳⵏ ⵍⵍⵉ ⵔⴰⴷ ⵢⴰⵊⵊ ⴽⵓ ⵉⵎⵓⵔⴰ ⴰⴷ ⴰⵙⵉⵏ ⵜⵓⵜⵔⴰ, ⵓⵔ ⴷ ⵖⴰⵙ ⵡⵉⵍⵍⵉ ⵍⵍⴰⵏⵉⵏ ⵖ ⵜⵙⵇⵇⵉⵎⵜ ⵎⵓ ⵜⵜⵓⵚⵕⴰⴼ ⵜⵓⵜⵔⴰ, ⵖⵎⴽ ⴰⵏⵏ ⴷ ⵉⵎⵉⵥ ⵏ ⵢⴰⵏ ⵓⵎⴰⵔⵉ ⵏⵖ ⵎⵏⵏⴰⵡ ⵏ ⵜⵓⵍⴽⵉⵎⵜ ⴷ ⵓⵙⵡⵓⵔⵔⵉ ⴼⵍⵍⴰⵙ ⴷⴰⵜ ⵏ ⵓⵙⵇⵇⵉⵎ.

ⴷⴼⴼⵉⵔ ⵏ ⵓⵙⵎⵏⵉⴷ, ⵉⵍⵍⴰ ⵓⵎⴹⴰⴽⴰⵕ ⵖ ⴷ ⵎⵛⴰⵛⴽⴰⵏ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉⴳⵏⵙⴰⵙ ⵏ ⵜⵓⴳⵜ ⵓⵍⴰ ⵜⵓⵣⵍⵜ ⵃⵎⴰ ⴰⴷ ⵢⵉⵍⵉ ⵓⵙⵎⴰⵢⵏⵓ ⵏ ⵜⵙⴰⵡⵔⵜ ⵏ ⵓⵎⵢⴰⵡⴰⴹ ⴷ ⵉⵏⵎⵓⵔⴰⵏ, ⵙ ⵓⵙⵎⴰⵢⵏⵓ ⵏ ⵉⵎⵉⵙⵙ ⴰⴷ ⵍⵍⵉ ⵔⴰⴷ ⵉⴼⴽ ⵓⵏⴼⵓⵙ ⴰⵎⴰⵢⵏⵓ ⵉ ⵜⵡⵓⵔⵉ ⵏ ⵜⵙⵇⵇⵉⵎⵜ, ⵉⵏⵉⵏ ⵎⴰⵙ ⵜⵛⵃⴰ ⵜⵢⴰⴼⵓⵜ ⵜⴰⵎⵓⵟⵟⵓⵏⵜ ⵏ ⵜⵓⵜⵔⵉⵡⵉⵏ, ⴰⵢⵍⵍⵉ ⵢⵉⵡⵉⵏ ⴰⴷ ⵢⵉⵍⵉ ⵓⵙⵡⵉⵏⴳⵎ ⵖ ⵓⵙⵀⵡⵏ ⵏ ⵜⴱⵔⵉⴷⵜ ⵍⵍⵉ ⴷ ⵉⵇⵇⴰⵏ ⴰⴷ ⵜⵉⵍⵉ ⵖ ⵓⵏⴳⵔⴰⵡ ⴰⴳⵯⵏⵙⴰⵏ ⵍⵍⵉ ⵔⴰⴷ ⵉⵜⵜⵓⵙⵏⴼⵉⵍ. ⵏⵏⴰⵏ ⵉⴳⵎⴰⵎⵏ ⵎⴰⵙ ⴷ ⵜⵉⵎⵓⴽⵔⵉⵙⵉⵏ ⵍⵍⵉ ⵜⵜⵓⴱⴷⴰⵔⵏⵉⵏ ⵣⴷⵉⵏⵜ ⴷ ⴽⵔⴰ ⵏ ⵜⴱⵔⵉⴷⵏ ⴰⵎ ⵜⵓⵙⵙⵏⴰ ⵙⵇⵇⵉⵇⵏ ⵏ ⵜⵎⴰⴳⵉⵜ ⴷ ⵓⵣⴷⴷⵓⵢ ⴷ ⵜⵎⵔⵙⴰⵍ, ⵖⵎⴽ ⴰⵏⵏ  ⴷ ⵓⵙⵎⵖⵔ ⵏ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵜ, ⴰⴷ ⵖⴰⵙ ⵓⵔ ⴳⵉⵏⵜ ⵜⵉⵏ ⵓⵎⵛⴰⵡⴰⵕ ⵙ ⵓⵙⵎⴰⵢⵏⵓ ⴷ ⵓⵙⵎⵓⵟⵟⵏ ⵏ ⵉⵎⴰⵙⵙⵏ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵙ ⵓⵎⵙⴰⵙⴰ ⴷ ⵉⵎⴰⵏ ⵏ ⵓⴷⵓⵙⵜⵓⵔ ⵏ 2011.