ⴰⵏⵎⵓⵇⵇⴰⵔ ⵏ ⵓⵎⵢⴰⵡⴰⴹ ⵅⴼ ⵜⴳⵔⴰⵡⵜ ⵜⴰⵏⴰⵎⵓⵔⵜ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴳ ⵜⵙⵇⵇⵉⵎⵜ ⵏ ⵜⵉⴹⴰⴼ ⵏ ⵜⴷⵔⵉⵎⵜ ⵜⴰⵎⴰⵜⴰⵢⵜ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵉⴹⴰⴼ ⵏ ⵜⴷⵔⵉⵎⵜ ⵜⴰⵎⴰⵜⴰⵢⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 14 ⴱⵕⴰⵢⵕ 2023, ⴰⵏⵎⵓⵇⵇⴰⵔ ⵏ ⵓⵎⵢⴰⵡⴰⴹ ⴼ ⵜⴳⵔⴰⵡⵜ ⵜⴰⵏⴰⵎⵓⵔⵜ ⵉ ⵜⵣⴷⴳⵉ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ, ⵍⵍⵉ ⵜⵙⵙⵉⵅⴼ ⵎⴰⵙⵙⴰ ⵍⴰⵟⵉⴼⴰ ⵍⴱⵍⵉⵃ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⴰⵛⵉⵔ ⵕⵕⴰⵛⵉⴷⵉ  ⴰⵏⵙⵙⵉⵅⴼ ⵏ ⵜⴳⵔⴰⵡⵜ ⴷ ⵉⴳⵎⴰⵎⵏ ⵏ ⵜⴳⵔⴰⵡⵜ: ⵏⴰⴷⵢⴰ ⵄⵎⵎⵓⵔ, ⵄⴰⴱⴷ ⵚⵚⴰⵎⴰⴹ ⵚⴰⴹⵓⵇ, ⵕⴰⵛⵉⴷ ⵍⵎⴷⵓⵡⵡⵕ, ⵄⴰⴱⴷⵍⵅⴰⵍⵇ ⵛⵛⵎⴰⵛⵉ, ⵄⴰⴱⴷⵍⵅⴰⵍⵇ ⵍⵢⴰⵄⵇⵓⴱⵉ, ⴰⵃⵎⴰⴷ ⵍⵄⵎⵓⵎⵔⵉ.

ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⵎⵣⵡⴰⵔⵓ, ⵔⴰⴷ ⵜ ⴹⴼⵕⵏⵜ ⵜⴽⵛⵛⵓⵎⵉⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⴼ ⵓⵏⵇⵇⵉⵙ ⵏ ⵜⴳⵔⴰⵡⵜ ⴳ 2021, ⵃⵎⴰ ⴰⴷ ⵢⵉⵍⵉ ⵓⵙⵓⵊⴷ ⵏ ⵓⵏⵇⵇⵉⵙ ⵍⵍⵉ ⵔⴰⴷ ⵉⵜⵜⵓⵚⵕⵉⴼ ⵉ ⵓⵙⵉⵔⴰ ⵏ ⵓⵙⵇⵇⵉⵎ.

ⵜⵏⵏⴰ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵎⴰⵙ ⵔⴰⴷ ⵢⴰⵡⵙ ⵓⵙⵎⵏⵉⴷ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⴼ ⵜⵓⵙⵙⵏⴰ ⵏ ⵓⵏⵇⵇⵉⵙ ⵏ ⵜⴳⵔⴰⵡⵜ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵎⴹⴰⴽⴰⵕ ⵉⵕⵛⵡⴰⵏ, ⵢⴰⵡⵙ ⵉ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵣⴷⵉⵏⵉⵏ ⴷ ⵡⴰⵔⴰⵢ ⵙⴳ ⵓⵙⴳⵓⴼⵙⵓ ⴷ ⵓⵙⴱⴷⴷⵉ ⵏⵏⵙ.

ⵉⵙⵎⵏⵉⴷ ⵎⴰⵙⵙ ⵎⵓⵃⴰⵎⵎⴰⴷ ⴱⴰⵛⵉⵔ ⵕⵕⴰⵛⵉⴷⵉ, ⴰⵏⵙⵙⵉⵅⴼ ⵏ ⵜⴳⵔⴰⵡⵜ, ⴰⵙⵎⵏⵉⴷ ⵉⵙⴰⵡⴰⵍⵏ ⴼ ⵜⴼⵔⴽⴰ ⵏ ⵓⵙⴽⵔ ⵉⴳⴰⵏ ⵜⴰⴼⵔⴽⴰ ⵜⴰⵎⴰⵢⵏⵓⵜ ⴳ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⵍⵍⵉ ⵜⴻⵟⵟⴰⴼ ⵜⴳⵔⴰⵡⵜ ⴰⴷⵖⵔ ⵏⵏⵙ ⴳ ⵓⵙⴰⵜⵉ ⵏ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⴰⵢⵍⵍⵉ ⵢⵉⵡⵙⵏ ⴳ ⵓⴼⵓⵖ ⵏ ⵓⵙⵍⴳⵏ 46.19 ⵉⵙⵣⴷⵉⵏ ⴷ ⵜⴳⵔⴰⵡⵜ, ⴰⵢⵍⵍⵉ ⵉⵙⴷⵓⵙⵏ ⴰⵚⴽⵓ ⴰⵎⵔⵙⵍⴰⵏ ⵏ ⵓⵙⴱⴷⴷⵉ ⵏ ⵓⵙⴳⵓⴼⵙⵓ.

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵜⴳⵔⴰⵡⵜ ⴰⵏⵇⵇⵉⵙ ⴰⵙⴳⴳⵯⵙⴰⵏ ⵏ 2021 ⵙⵖⵎⴽ ⴰⴷ:

1. ⵜⴰⵣⵣⵉⴳⵣⵜ ⵏ ⵓⵙⴼⵙⵉ ⴷ ⵓⵙⵎⵢⴰⵏⴰⵡ ⵏⵏⵙ ⴷⴷ ⵓⵙⵎⵏⵉⴷ ⵏ ⵓⵣⵣⵔⴰⵢ ⵉⵕⵡⴰⵏ;

2. ⴰⵙⴷⵔⴰⵡ ⵏ ⵜⵣⵔⴰⵡⵜ ⴷ ⵓⵔⵣⵣⵓ ⵅⴼ ⵉⵎⵕⵚⵉⵡⵏ ⵉⵎⵣⵡⵓⵔⴰ;

3. ⴰⵙⵎⵏⵉⴷ ⵏ ⵉⵎⴰⵙⵙⵏ ⵉⵣⵔⴼⴰⵏⵏ ⵅⴼ ⵉⵎⵉⵥ ⵏ ⵜⴰⵛⴽⵉⵢⴰⵜ ⴷ ⵓⵙⴽⵔ ⵏ ⵉⵔⵣⵣⵓⵜⵏ.

4. ⵜⵉⴽⴽⵉ ⵏ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⴳ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⴷ ⵓⵙⵕⵚⵓ ⵏ ⵜⴱⵔⵉⴷⵜ ⵏ ⵓⵣⵣⵔⴰⵢ ⵏ ⵓⵣⵔⵉⵣ;

5.ⴰⵙⵎⵏⵉⴷ ⵏ ⵜⵉⵍⴰⵍ ⵜⵉⵣⵣⵓⵍⴰⵏⵉⵏ.

ⵉⵙⵎⵏⵉⴷ ⵎⴰⵙⵙ ⵅⴰⵍⵉⴷ ⵍⵢⴰⵄⵇⵓⴱⵉ, ⴰⵎⵏⵇⵇⴰⵙ ⴰⵎⴰⵜⴰⵢ ⵏ ⵜⴳⵔⴰⵡⵜ, ⵉⵏⵇⵇⵉⵙⵏ ⵉⵙⴳⵓⵎⴰⵏⵏ ⵏ ⵜⴳⵔⴰⵡⵜ ⴼ ⵓⵙⴱⴷⴷⵉ ⵏ ⵓⵙⴳⵓⴼⵙⵓ ⵍⵍⵉ ⴳⴰⵏⵉⵏ:

1. ⴰⵙⴱⴷⴷⵉ ⵏ ⵓⵙⵖⵏⵓ ⵡⴰⵔⵓⵍⴳⵉⵏ, ⵉ ⵜⵉⵍⵉⵜ ⵏ ⵉⵣⵣⵔⴰⴼⵏ ⵍⵍⵉ ⵔⴰⴷ ⵉⵙⴱⴷⴷ ⴰⵎⵓⴽⵔⵉⵙ ⴰⴷ;

2. ⵜⴰⵏⵏⴰⵢⵜ ⵏ ⵜⴳⵔⴰⵡⵜ ⴼ ⵓⵎⵓⴽⵏ ⵏ ⵓⵙⵍⴳⵏ ⵉⵣⴷⵉⵏ ⴷ ⵜⴱⵔⵉⴷⵜ ⵜⴰⵏⴱⴽⴰⴹⵜ;

3. ⴰⵙⵎⵍ ⵏ ⵜⵔⴰⵄⴰⵢⵜ, ⵉ ⵜⴷⵉⵏⴰⵎⵉⵜ ⵜⴰⵏⴰⵎⵓⵏⵜ ⴷ ⵜⵎⵔⵙⵍⴰⵏⵜ ⵉ ⵓⵙⴱⴷⴷⵉ ⵏ ⵜⵔⴰⵄⴰⵢⵜ.

ⴳ ⵓⵙⴰⵜⵉ ⴰⴷ, ⵉⵖⵔⴰ ⵓⵏⵙⵙⵉⵅⴼ ⵏ ⵜⴳⵔⴰⵡⵜ ⵉ ⵓⴹⴼⵕ ⵏ ⵉⵎⴰⵍ ⵏ ⵉⵙⵖⵍⴰⴼ ⵏ ⵜⴳⵔⴰⵡⵜ ⴷ ⵓⵙⵎⴽⵍ ⵏ ⵉⵎⵕⵚⵉⵡⵏ ⵉⵎⵣⵡⵓⵔⴰ ⵙ ⵓⵙⵎⵙⴰⵙⴰ ⵏ ⵓⵙⵍⴳⵏ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ ⴷ ⵜⵎⵙⴽⴰⵔ ⵏ ⵓⵙⴱⴷⴷⵉ ⵏ ⵜⵔⴰⵄⴰⵢⵜ, ⴷ ⵓⵙⵔⵙ ⵏ ⵉⵣⵣⵔⴰⴼⵏ ⴷ ⵓⵙⴰⵏⵉⵏ ⵙ ⵓⵙⵖⵏⵓ ⵡⴰⵔⵓⵍⴳⵉⵏ ⴷ ⵓⵙⵔⵓⵙ ⵏ ⵉⵎⴰⵙⵙⵏ ⵕⵡⴰⵏⵉⵏ ⵉ ⵓⵙⴱⴷⴷⵉ ⵏⵏⵙ, ⴷ ⵓⵙⴷⵓⵙ ⵏ ⵓⵍⵜⴰⵖ ⴰⵎⴳⵔⵓ ⵉⴼⵔⴽⵏ ⵉ ⵓⵙⴱⴷⴷ ⴰⴷ. ⵉⵙⴷⴷⵉⴷ ⵓⵍⴰ ⴼ ⵡⴰⵜⵉⴳ ⵏ ⵜⵖⵔⵉ ⵏ ⵉⵙⵓⵖⴰⵍ ⵣⴷⵉⵏⵉⵏ ⴷ ⵓⵙⵖⵏⵓ ⵡⴰⵔⵓⵍⴳⵉⵏ ⴷ ⵜⵖⵔⵉ ⵏ ⵜⵓⵎⴰⵢⵉⵏ ⵏ ⵜⵡⵡⵓⵔⵉ ⴷ ⵉⵙⵏⴼⵍⵏ ⵣⴷⵉⵏⵉⵏ ⴷ ⵓⵙⵏⴼⴰⵔ ⵏ ⵜⴱⵔⵉⴷⵜ ⵜⴰⵏⴱⴽⴰⴹⵜ, ⴷ ⵓⴼⵔⴰⴳ ⵏ ⵜⵡⵡⵓⵔⵉⵡⵉⵏ ⵍⵍⴰⵏⵉⵏ ⴷ ⵉⴱⴽⴽⴰⴹⵏ ⵏ ⵜⵔⴰⵄⴰⵢⵜ ⴷ ⵜⵉⵍⵉⵜ ⵏ ⵜⵉⵕⵡⵉ ⵜⴰⵣⵔⴼⴰⵏⵜ ⴷ ⵓⴼⵔⴰⴳ ⵏ ⵉⴷ ⴱⴰⴱ ⵏ ⵉⵏⵖⵎⵉⵙⵏ ⴳ ⵓⵎⵏⵉⴷ ⴰⴷ.

 ⴳ ⵓⵎⵏⵉⴷ ⵏⵏⵙⵏ, ⵙⵓⵜⴳ ⵉⴷ ⵎⴰⵙⵙ ⵉⵎⵓⵔⴰ ⵜⴰⵡⵡⵓⵔ ⴷ ⵜⵓⴳⴳⴰⵙ ⵏ ⵜⴳⵔⴰⵡⵜ ⴳ ⵓⵙⴱⴷⴷⵉ ⵏ ⵓⵙⴳⵓⴼⵙⵓ, ⴷ ⵓⵏⵏⵓⵕⵥⵎ ⵏⵏⵙ ⴼ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵙⴷⴷⵉⴷⵏ ⴼ ⵡⴰⵜⵉⴳ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵜⴳⵔⴰⵡⵜ ⴷ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⵙⴱⴷⴷⵉ ⵏ ⵓⵙⴳⵓⴼⵙⵓ ⴷ ⵓⵙⵖⵓⴷⵓ ⵏⵓⵟⵟⵓⵏⵏ ⵍⵍⵉ ⴷⵉⵙ ⵣⴷⵉⵏⵉⵏ.