ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴰⵕⵥⵥⵓⵎ ⵏ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵊⴰⵔ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⴽⵔⴰ ⵏ ⵉⴱⵕⵍⴰⵎⴰⵏⵏ ⵙⴳ ⵓⵕⵓⴱⴱⴰ

ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵎⵡⴰⵙ 23 ⵛⵓⵜⴰⵏⴱⵉⵔ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴰⵕⵥⵥⵓⵎ ⵏ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵊⴰⵔ ⵓⵙⵇⵇⵉⵎ ⴷ ⵉⴱⵕⵍⴰⵎⴰⵏⵏ ⵏ ⵓⵕⵓⴱⴱⴰ, ⵙ ⵜⵉⵍⵉⵜ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⵎⴰⵏ ⴷ ⵉⵎⵙⵇⵇⴰⴷⵏ ⵏ ⵓⵕⵓⴱⴱⴰ

ⵜⵃⴰⴹⵕ ⴳ ⵓⵏⵎⵓⵇⵇⴰⵔ ⴰⴷ ⵎⴰⵙⵙⴰ ⵉⵍⵢⴰⵏ ⵜⵉⵍⵉⵢⵓ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⴱⵉⵍⵊⵉⴽⴰ, ⵎⴰⵙⵙⴰ ⴼⴰⵍⵉⵔⵉ ⵔⴰⴱⵓ ⵜⴰⵎⴰⵣⵔⵉⵜ ⵜⴰⵎⵣⵡⴰⵔⵓⵜ ⵏ ⵜⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⴳ ⴼⵕⴰⵏⵚⴰ, ⵎⴰⵙⵙ ⵢⴰⵔⵓⵣⵍⴰⴼ ⴱⴰⵣⵓⵅ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⵛⵉⴽ, ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵊⴰⵔ ⵍⵎⵖⵔⵉⴱ ⴷ ⴼⵕⴰⵏⵚⴰ, ⵉⴳⵎⴰⵎⴰⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ, ⵜⴰⵎⵙⵇⵇⴰⴷⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⵎⵙⵇⵇⴰⴷⵏⴷ ⵉⴳⵏⵙⴰⵙ ⵏ ⴱⵉⵍⵊⵉⴽⴰ ⴷ ⵀⴰⴱⵖⴰⵕⵢⴰ ⴷ ⵜⵛⵉⴽ ⴷ ⵍⵢⵓⵏⴰⵏ ⴷ ⵍⴱⵓⵔⵜⵓⵖⴰⵍ.

ⵉⵙⴰⵡⵍ ⵎⴰⵙⵙ ⵕⴰⵛⵉⴷ ⵜⴰⵍⴱⵉ ⵍⵄⴰⵍⴰⵎⵉ ⴼ ⵜⵢⵢⴰⴼⵓⵜ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵜⴰⵎⵣⵡⴰⵔⵓⵜ ⵉⵍⵍⴰⵏ ⵊⴰⵔ ⵓⵙⵇⵇⵉⵍ ⴷ ⵙⵎⵎⵓⵙ ⵉⴱⵕⵍⴰⵎⴰⵏⵏ ⵏ ⵓⵕⵓⴱⴱⴰ, ⵜⵍⵍⴰ ⴼ ⵓⴱⵕⵍⴰⵎⴰⵏ ⴰⵎⵓⵟⵟⵓⵏ ⴷ ⵍⴰⵔⵛⵉⴼ ⴷ ⵓⵙⵏⴰⵍ ⵏ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⵙⵖⵏⵓ ⵏ ⵜⵙⴷⵍⵉⵙⵜ ⵜⴰⴱⵕⵍⴰⵎⴰⵏⵉⵜ.

ⵢⵉⵏⵉ ⵎⴰⵙ ⵢⵉⵡⵙ ⵓⵙⴳⵓⴷⵉ ⴰⴷ ⴳ ⵓⵙⵡⵉⵏⴳⵎ ⴳ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⵉⵙ ⵙⵏⴰⵜ ⴳ ⵍⵍⵏ ⵙⵉⵏ ⵉⴳⵣⵣⵓⵎⵏ, ⵡⵉⵏ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴳ ⵜⵎⵙⵙⵓⴳⵓⵔⵜ ⵜⴰⴱⵕⵍⴰⵎⴰⵏⵉⵜ, ⴷ ⵓⵙⴷⵓⵙ ⵏ ⵜⵙⵓⴳⴰⵔ ⵏ ⵓⵙⵇⵇⵉⵎ ⴳ ⵓⵙⴽⵔ ⵏ ⵜⵎⵥⵎⴰⵢⵉⵏ ⵏⵏⵙ ⴳ ⵓⴳⵣⵣⵓⵎ ⵡⵉⵙ ⵙⵉⵏ.

ⵢⵉⵏⵉ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵢⵓⵎⴰ ⵓⵙⵏⴼⴰⵔ ⴰⴷ ⴰⵎⴰⵢⵏⵓ ⵓⵍⴰ ⴰⵙⵓⴷⵓⵙ ⵏ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵉⴱⵕⵍⴰⵎⴰⵏⵏ, ⵍⵍⵉ ⵉⴳⴰⵏ ⵢⴰⵏ ⵓⵅⵎⵎⴻⵎ ⴰⵏⴰⵎⵓⵏ ⴰⵏⴰⵎⵎⴰⵙ.

ⵢⵉⵏⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⵜⵡⴰⵜⵜⵙ ⵜⴳⵯⵎⴰⵜ ⴰⴷ ⴰⴷ ⵉⵙⵙⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵉⵙⵙⵏ ⵜⵉⵎⵙⴽⴰⵔ ⵥⵉⵍⵏⵉⵏ ⴳ ⵓⵎⵏⵉⴷ ⵏ ⵓⵙⵏⴰⵍ ⵏ ⵜⵎⵏⵏⴰⵡⵜ ⵜⴰⵙⵏⵉⵍⵙⵜ ⴳ ⵜⵎⵔⵙⴰⵍ ⴷ ⵜⵓⴷⵔⵜ ⵜⴰⵎⴰⵜⴰⵢⵜ ⵍⵍⵉⵖ ⵉⵍⵍⴰ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴷ ⵓⵙⵉⴷⴼ ⵏⵏⵙ ⴳ ⵓⵙⵙⵍⵎⴷ ⴷ ⵉⴳⵔⴰⵏ ⵉⵎⵣⵡⵓⵔⴰ ⴳ ⵜⵓⴷⵔⵜ ⵜⴰⵎⴰⵜⴰⵢⵜ.

ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵢⵉⵏⵉ ⵎⴰⵙ ⵉⴳⴰ ⵍⵎⵖⵔⵉⴱ ⴰⵏⴳⴰⵙ ⵏ ⵓⵙⴷⴷⵓⵔⵔⵉ, ⵢⴰⵎⵥ ⵜⴰⵙⵉⵎⴰⵏⵜ ⵏⵏⵙ ⴳ 1956, ⵉⵙⵎⴷ ⵜⴰⵢⴰⵏⵜ ⵏⵏⵙ ⵜⴰⵏⴰⴽⴰⵍⵜ ⵙ ⵓⵎⴷⵉⵡⴰⵍ ⴷ ⵓⵙⵍⴳⵏ ⴷ ⵜⵍⵍⵓⴳⵏⴰ ⵜⴰⴳⵔⴰⵖⵍⴰⵏⵜ, ⵉⵟⵟⴼ ⵜⵉⵅⵅⵓⵜⵔⴰ ⵏⵏⵙ ⴼ ⵜⵎⵏⴰⴹⵉⵏ ⵏⵏⵙ ⴳ ⵉⴼⴼⵓⵙ ⴳ 1975. ⴷⴼⴼⵉⵔ ⵏ 47 ⵏ ⵓⵙⴳⴳⵯⴰⵙ, ⵉⵜⵜⵓⵙⵏⴼⴰⵍ ⵓⴷⵎ ⵏ ⵜⵙⴳⴳⵉⵡⵉⵏ ⴰⴷ ⴳⵉⵏⵜ ⵉⵎⵔⴰⵙⵏ ⵏ ⵓⵙⵙⴰⵔⵓ, ⴳⵉⵙⵏⵜ ⵓⵍⴰ ⴰⵎⴰⵡⴰ ⴰⵙⵉⵍⴰⵏ ⴰⵅⴰⵜⴰⵔ, ⵖⵎⴽ ⴰⵏⵏ ⴰⴼ ⵓⵔ ⵉⵇⴱⵍ ⵍⵎⵖⵔⵉⴱⵓⵍⴰ ⵔⴰⴷ ⵉⵇⴱⵍ ⴰⴷ ⵉⴳ ⴰⵏⴳⴰⵙ ⵏ ⵓⴱⵟⵟⵓ ⴷ ⵜⵓⵔⴷⴰ ⴳ ⵜⵢⴰⵏⵜ ⵏⵏⵙ ⵜⴰⴽⴰⵍⴰⵏⵜ ⵙⴳ ⵟⴰⵏⵊⴰ ⴰⵔ ⵍⴳⵡⵉⵔⴰ. ⵉⴳ ⵡⴰⵡⴰⵍ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵚ ⴰⴱⴷⴷⴰⴷ ⴰⵏⴰⵎⵓⵔ ⵉⴳⴰⵏ ⵡⵉⵏ ⵖⵉⵍⴰⴷ: “ⵉⴳⴰ ⵓⵙⴷⴰⵡ ⵏ ⵚⵚⵃⵕⴰ ⵜⴰⵙⵎⵓⵇⵇⵓⵍⵜ ⵍⵍⵉ ⵙ ⵉⵥⵕⵕⴰ ⵍⵎⵖⵔⵉⴱ ⴰⵎⴰⴹⴰⵍ, ⵉⴳ ⵜⴰⵙⵖⵍⵜ ⵉⴼⴰⵡⵏ ⴷ ⵜⴼⵔⴰⵔⵜ ⵍⵍⵉ ⵙ ⵉⵜⵜⵙⵖⴰⵍ ⴰⵖⵥⴰⵏ ⴷ ⵜⴷⴷⵓⴽⴽⵯⵍⴰ ⴷ ⵜⵉⵕⵡⵉ ⵏ ⵜⵎⴷⵔⴰⵡⵉⵏ”.

ⵜⵉⵏⵉ ⵎⴰⵙⵙ ⴼⴰⵍⵉⵔⵉ ⵕⴰⴱⵓ ⵎⴰⵙ ⵉⴳⴰ ⵓⵙⵏⴼⴰⵔ ⵏ ⵜⴳⵯⵎⴰⵜ ⴰⵙⴽⵔ ⵏ ⵜⵣⴷⴰⵢⵉⵏ ⵍⵍⴰⵏⵉⵏ ⵊⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ, ⵙ ⵎⴰⴷ ⵉⴼⴽⴰ ⵓⴷⵓⵙⵜⵓⵔ ⵏ 2011  ⴳ ⵜⵎⵥⵍⴰⵢ ⵉ ⵓⴱⵕⵍⴰⵎⴰⵏ ⴳ ⵓⵙⵓⵜⴳ ⵏ ⵜⴷⵔⵜⴰⵢ ⴷ ⵜⵉⴹⴰⴼ ⵏ ⵜⵏⴱⴰⴹⵜ ⴷ ⵓⵖⴰⵡⴰⵙ ⴰⵙⵜⵔⴰⵜⵉⵊⵉ ⵏ ⵓⵙⵎⵖⵜ ⵏ ⵜⵡⵡⵓⵔⵉ ⵏ ⵓⵙⵇⵇⵉⵎ.

ⵔⴰⴷ ⵜⴰⵡⵙ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵕⴰⵏⵚⴰ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ  ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵙ ⵓⵙⵏⴼⵍ ⵏ ⵜⵎⵓⵣⴰⵢⵜ ⴷ ⵜⵉⵔⵔⴰ ⵏ ⵓⵖⴰⵡⴰⵙ ⵏ ⵜⵡⵡⵓⵔⵉ ⴳ ⵓⵙⴰⵜⵉ ⵏ ⵓⵙⵏⴼⴰⵔ ⵏ ⵓⵎⵢⴰⵡⴰⵙ.

ⵜⵙⵓⵜⴳ ⵎⴰⵙⵙⴰ ⵉⵍⵢⴰⵏ ⵜⵉⵍⵢⵓ ⴰⵙⵏⴼⴰⵔ ⵏ ⵜⴳⵯⵎⴰⵜ ⴷ ⵜⵉⵍⴰⵍ ⵏ ⵉⴱⵕⵍⴰⵎⴰⵏⵏ ⴳ ⵓⴼⵔⴰⴳ ⵏ ⵜⴷⵉⵎⵓⵇⵔⴰⵟⵉⵜ, ⵜⵉⵏⵉ ⵎⴰⵙ ⵜⵎⵓⵔⵙ ⵜⵓⵏⵖⵉⵍⵜ ⵜⴰⵎⵣⵡⴰⵔⵓⵜ ⵏ ⵓⵙⵏⴼⴰⵔ ⵏ ⵜⴳⵯⵎⴰⵜ.

ⵉⵙⴰⵡⵍ ⵎⴰⵙⵙ ⵢⴰⵔⵓⵣⵍⴰⴼ ⴱⴰⵣⵓⵅ ⴼ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵜⵛⵉⴽ, ⵉⴱⴷⵔ ⴰⵔⵣⴰⴼ ⵏ ⵜⵡⵡⵓⵔⵉ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵜⵛⵉⴽ, ⴷ ⵜⵏⴰⵥⴰⵕⵉⵏ  ⴷ ⵜⵉⵍⴰⵍⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵎⵏⵉⴷ ⵏ ⵓⵎⴷⵔⴰⵡ ⵏⵏⵙ ⴳ ⵓⵕⵓⴱⴱⴰ, ⵉⵙⵙⴽⵯⵜⵉⴷ ⵜⵉⵍⴰⵍⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⵎⵏⵉⴷ ⵏ ⵜⴳⴷⵓⴷⴰⵏⵜ ⵏ ⵜⵛⵉⴽ ⴷ ⵓⴱⵕⵍⴰⵎⴰⵏ ⵏⵏⵙ ⵉ ⵓⵙⵕⵚⵓ ⵏ ⵜⴷⵉⵎⵓⵇⵔⴰⵟⵉⵜ  ⴷⴼⴼⵉⵔ ⵏ ⵜⴼⵔⴽⴰ ⵜⴰⵙⵓⴼⵢⴰⵜⵉⵜ, ⵉⵔⴰ ⵓⴱⵕⵍⴰⵎⴰⵏ ⵏⵜⵛⵉⴽ ⴰⴷ ⵉⴷⵔⵓ ⵜⵉⵔⵎⵉⵜ ⴰⴷ ⴰⴽⴷ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵍⵎⵖⵔⵉⴱ.

ⴳ ⵜⵙⴳⴰ ⵏⵏⵙ, ⵜⵏⵏⴰ ⵜⵎⵙⵇⵇⴰⴷⵜ ⵎⴰⵙⵙⴰ ⴱⴰⵜⵔⵉⵙⵢⴰ ⵍⵓⵎⴱⴰⵔ ⴽⵓⵙⴰⴽ ⵎⴰⵙ ⵜⴳⴰ ⵜⴳⵯⵎⴰⵜ ⴰⴷ ⴰⵙⵉⵡⵍ ⵉⴼⴰⵡⵏ ⴼ ⵜⵎⵏⴰⴳⴰⵔⵜ ⵏ ⵜⵉⵔⴰⵜ ⵏ ⵍⵎⵖⵔⵉⴱ ⴷ ⵓⵕⵓⴱⴱⴰ, ⵜⵉⵏⵉ ⵎⴰⵙ ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⵎⴷⵔⴰⵡ ⴰⵎⵣⵔⴰⵢ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⵉⴳⴰⵏ ⴰⵎⴷⵔⴰⵡ ⴰⴷⵎⵙⴰⵏ ⴰⵎⵣⵡⴰⵔⵓ ⵉ ⵍⵎⵖⵔⵉⴱ, ⵜⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵜⴰⵎⵣⵡⴰⵔⵓⵜ ⵙⴳ ⵉⵖⴰⵡⴰⵙⵏ  ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ.

ⵉⵙⴰⵡⵍ ⵎⴰⵙⵙ ⵏⵉⴽⵓⵍⴰⵡⵙ ⴰⵔⴳⵉⵔⵓⵙ ⴰⵎⵙⵇⵇⴰⴷ ⵏ ⵍⵢⵓⵏⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵎⴰⵙ ⵔⴰⴷ ⵢⵉⵍⵉ ⵓⵙⵎⵏⵉⴷ ⵏ ⵜⵎⵓⵣⴰⵢⵜ ⵉ ⵓⵙⵇⵇⵉⵎ ⵏ ⵉⵎⵓⵔⴰ  ⵉ ⵓⵙⵎⵖⵔ ⵏ ⵜⵡⵡⵓⵔⵉ ⵏⵏⵙ ⴷ ⵓⵙⴷⵓⵙ ⵏ ⵓⵎⵔⴰⵙ ⵏ ⵜⵏⴱⴰⴹⵜ ⵜⴰⵣⵣⵔⴰⴼ ⴷ ⵜⵉⵔⵎⵉⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵎⵖⵔⵉⴱⵉⵜ.

ⵉⵙⴰⵡⵍ ⵎⴰⵙⵙ ⵎⵉⴽⵍⵓⵙ ⵉⵔⵉⴽ ⵜⵔⵓⵎⵍⵔ ⴰⵎⵙⵇⵇⴰⴷ ⵏ ⵀⴰⵏⵖⴰⵕⵢ ⴼ ⵜⴷⵉⵏⴰⵎⵉⵜ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵀⴰⵏⵖⴰⵕⵢⴰ, ⵉⵍⵉⵏ ⵉⵔⵣⴰⴼⵏ ⵏ ⵉⵎⵙⵜⴰⵢⵏ ⴷ ⵜⵡⵡⵓⵔⵉ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵊⴰⵔ ⵀⴰⵏⵖⴰⵕⵢⴰ ⴷ ⵍⵎⵖⵔⵉⴱ, ⴷ ⵓⵎⵢⴰⵡⴰⵙ ⴰⵣⵔⴼⴰⵏ ⴷ ⵓⴷⵍⵙⴰⵏ ⴷ ⵓⴷⵎⵙⴰⵏ, ⵉⵙⵓⵜⴳ ⵓⵍⴰ ⵜⴰⵙⵏⵜⴰⵢⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⵉⴳⴰⵏ ⵜⴰⵔⵙⵍⵜ ⵏ ⵜⵎⴷⵔⴰⵡⵉⵏ ⴷ ⵓⵎⵢⴰⵡⴰⵙ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ.     

ⵉⵙⴷⴷⵉⴷ ⵎⴰⵙⵙ ⴱⴰⵙⴽⴰⵍ ⴰⵏⵟⵓⵏⵢⵓ ⴰⵎⵛⵛⵉⵡⵕ ⵏ ⵜⵖⴰⵡⵙⵉⵡⵉⵏ ⵜⵉⵙⵔⵜⴰⵏⵉⵏ ⵏ ⵓⵎⵙⵇⵇⴰⴷ ⵏ ⵉⵟⴰⵍⵢⴰ ⴼ ⵓⵙⵏⴼⴰⵔ ⵏ ⵜⴳⵯⵎⴰⵜ ⵉⴳⴰⵏ ⵜⴰⵙⴰⵔⵓⵜ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴳ ⵓⵙⵡⵉⵔ ⴰⵏⴰⵎⵎⴰⵙ ⴷ ⵉⵎⵉⵙⵙ ⵏ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⴳ ⵢⵉⴳⵔ ⵏ ⵜⵎⵙⴽⵔⵜ ⵜⴰⴷⵉⵎⵓⵇⵔⴰⵟⵉⵜ ⴷ ⵜⵣⵣⵔⴰⴼⵜ.

ⴳ ⵓⵏⵎⵓⵇⵇⴰⵔ ⴰⴷ, ⵉⵙⵎⵏⵉⴷ ⵎⴰⵙⵙ ⵏⴰⵊⵉⴱ ⵍⵅⴰⴷⴷⵉ ⴰⵎⴰⵔⴰ ⴰⵎⴰⵜⴰⵢ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵎⴰⵇⵇⵍ ⴼ ⵜⴳⵯⵎⴰⵜ ⵉⵡⴰⵜⵜⵙⵏ ⴰⵙⵖⵓⴷⵓ ⵏ ⵜⵎⵙⴽⴰⵔ ⵏ ⵓⵙⵇⵇⵉⵎ ⴳ ⵓⵙⴽⵔ ⵏ ⵜⵙⵎⵉⴳⴰⵍ ⵏⵏⵙ ⵜⵉⴷⵙⵜⴰⵔⵉⵏ.

ⵉⵙⵎⵓⵏ ⵓⵙⵏⴼⴰⵔ ⴰⴷ ⴰⴽⴷ ⴽⵕⴰⴹ ⵉⵙⵇⵇⵉⵎⵏ ⵏ ⴼⵕⴰⵏⵚⴰ ⴷ ⴱⵉⵍⵊⵉⴽⴰ ⴷ ⵜⵛⵉⴽ, ⵔⴰⴷ ⵉⵙⵏⴰⵍ ⴽⴽⵓⵥ ⵉⵙⵇⵇⵉⵎⵏ ⵢⴰⴹⵏⵉⵏ: ⵀⴰⵏⵖⴰⵕⵢⴰ, ⵍⴱⵓⵔⵜⵓⵖⴰⵍ, ⵉⵟⴰⵍⵢⴰ, ⴱⵉⵍⵊⵉⴽⴰ.

ⵉⵍⵍⴰ ⵓⵙⵏⴼⴰⵔ ⴰⴷ ⵉ ⵙⵉⵏ ⵉⵙⴳⴳⵯⴰⵙⵏ (2022-2024), ⵔⴰⴷ ⵉⵎⵓⵏ ⴷ ⵓⵏⵙⴼⴰⵔ ⵏ ⵓⵙⵏⴰⵍ ⴷ ⵓⵙⵎⵖⵔ ⵏ ⵜⵉⵍⴰⵍⵜ ⵏ ⵓⴱⵕⵍⴰⵎⴰⵏ ⴳ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵜⵉⵜ ⴳ ⵍⵎⵖⵔⵉⴱ ⵍⵍⵉ ⵜⵙⵙⵥⵕⴼ ⵜⴰⵎⵓⵏⵜ ⵏ ⵓⵕⵓⴱⴱⴰ, ⵉⵡⴰⵍⴰ ⴰⵣⵣⴳⵉⵔ ⵏⵏⵙ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴷ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵉⵕⵓⴱⴱⴰ.