ⵉⴷⵔⵓ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴳ ⵓⴳⵔⴰⵡ ⴰⴱⵕⵍⴰⵎⴰⵏⵉ ⴼ ⵓⵣⵡⴰⴳ
ⵉⴷⵔⵓ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴳ ⵓⴳⵔⴰⵡ ⴰⴱⵕⵍⴰⵎⵏⵉ ⴼ ⵓⵣⵡⴰⴳ, ⵍⵍⵉ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴳⵔⴰⵖⵍⴰⵏⵜ ⴷ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⴰⵅⴰⵜⴰⵔⵜ ⵏ ⵜⵓⵕⴽⵢⴰ ⴷⴷⵓ ⵜⵎⴰⵜⴰⵔⵜ: ⵉⴱⵕⵍⴰⵎⴰⵏⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴼ ⵓⵣⵡⴰⴳ ⴷ ⵉⵎⵣⵡⴰⴳ: ⵜⴰⵎⴰⵎⴽⵜ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵣⵣⴳⵉⵔ ⴳ ⵓⵙⵡⵉⵔ ⴰⵏⴰⵎⵓⵔ, ⵓⵙⵙⴰⵏ ⵏ 20 ⴷ 21 ⵢⵓⵏⵢⵓ 2022 ⴳ ⵉⵚⵟⴰⵏⴱⵓⵍ ⴳ ⵜⵓⵕⴽⵢⴰ.
ⵉⵡⴰⵜⵜⵙ ⵓⴳⵔⴰⵡ ⴰⵣⵣⵔⴰⵢ ⵏ ⵓⵙⴽⵔ ⵏ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⴼ ⵓⵣⵡⴰⴳ ⴷ ⵜⴱⴰⵥⴰⵕⵉⵏ ⵏ ⵜⵡⵡⵓⵔⵉ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⴷ ⵓⵙⵉⵏⵔⴰⵏ ⴷ ⵓⵏⴰⵎⵓⵔ, ⴷ ⵜⵖⵔⵉ ⵏ ⵜⵎⵙⴽⴰⵔ ⵥⵉⵍⵏⵉⵏ ⴷ ⵓⵙⵡⵓⵜⵜⵓ ⵏ ⵉⵙⵡⵓⴷⴷⵓⵜⵏ ⵉⵎⴰⵢⵏⵓⵜⵏ ⵉ ⵓⵙⴱⴷⴷⵉ ⵏ ⵓⵣⵡⴰⴳ ⵡⴰⵔⵓⵙⵍⵉⴳ.
ⵉⴷⵔⵓ ⵓⴽⴰⴱⴰⵕ ⴰⵎⵖⵔⵉⴱⵉ ⴳ ⵜⵖⵉⵎⵉⵜⵉⵏ ⵏ ⵓⴳⵔⴰⵡ ⴰⴷ ⵙ ⵜⵖⴰⵔⴰⵙⵜ ⵉⵕⵡⵏ, ⵉⵙⴷⴷⵉⴷ ⵎⴰⵙⵙ ⴰⵎⴰⵔⵉ ⴰⵃⵎⴰⴷ ⵜⵜⵡⵉⵣⵉ ⴳ ⵜⴳⵓⵔⵉ ⵏⵏⵙ ⵎⴰⵙ ⵉⴳⴰ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵓⵙⵔⵓⵙ ⵏ ⵜⵙⵜⵔⴰⵜⵉⵊⵉⵢⵉⵏ ⴷⵓⵙⴰⵏⵉⵏ ⵉⴳⴰ ⵜⴰⵖⴰⵡⵙⴰ ⵜⴰⵙⵉⵍⴰⵏⵜ ⵉ ⵓⵙⵡⵓⴷⴷⵓ ⵉⵕⵡⴰⵏ ⵏ ⵜⵎⵓⴽⵔⵉⵙⵜ ⵏ ⵓⵣⵡⴰⴳ. ⵉⵇⵇⴰⵏⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵉ ⵓⵎⵓⵔⵙ ⵏ ⵜⵙⵜⵔⴰⵜⵉⵊⵉⵢⵉⵏ ⴷ ⵓⵙⵏⴼⵍ ⵏ ⵜⵎⵙⴽⴰⵔ ⵥⵉⵍⵏⵉⵏ ⴷ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵏ ⵉⵎⴰⵙⵙⵏ ⵉⴳⵜⵉⵔⴰⵏⵏ ⴷ ⵜⵎⴷⵔⴰⵡⵉⵏ ⴰⴽⴷ ⵜⵉⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⴰⵎⵏ ⴷ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ, ⵉ ⵓⵙⴽⵔ ⴷ ⵓⵣⵣⴳⵉⵔ ⵏ ⵉⵡⵜⵜⴰ ⴷ ⵜⵓⵎⴰⵢⵉⵏ ⵏ ⵓⵎⵇⵇⵏ ⴰⵎⴰⴹⵍⴰⵏ ⴼ ⵓⵥⵡⴰⴼ ⵏ ⵜⵏⴼⵔⵓⵜ ⵉⴳⴰⵏ ⵓⵍⴳⵉⵏ.
ⵢⵉⵏⵉ ⵎⴰⵙ ⵜⴳⴰ ⵜⵙⵔⵜⵉⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⵏ ⵓⵣⵡⴰⴳ ⵜⴰⴷ ⵉⴳⴰⵏ ⵜⵓⵏⵥⵉⵥⵜ ⴷ ⵜⵎⵣⵡⴰⵔⵓⵜ, ⵜⴱⴷⴷ ⴼ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵍⵍⵉ ⵉⵙⵖⵣⵏ ⵍⵎⵖⵔⵉⴱ, ⴰⵔ ⵉⵙⵡⵓⵔⵉ ⴼ ⵜⵎⵙⴰⵔⵜ ⵏ ⵓⵣⵡⴰⴳ ⵙ ⵉⵎⴰⵏ ⴰⵏⴼⴳⴰⵏ ⵉⵡⵇⵇⵔⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⵎⵓⴰⵡⴰⵙ ⴰⴽⴷ ⵜⵉⵎⵉⵣⴰⵔ ⵜⴰⴷⵊⴰⵕⵉⵏ.
ⵉⵖⵔ ⵓⵎⵛⵛⵉⵡⵕ ⴽⴰⵎⴰⵍ ⴰⵢⵜ ⵎⵉⴽ ⵉ ⵓⵙⵖⵡⵏ ⴰⵎⴳⵔⵓ ⵉⵙⵉⴷⴼⵏ ⵜⵉⵎⵙⴽⴰⵔ ⵥⵉⵍⵏⵉⵏ ⴳ ⵢⵉⴳⵔ ⵏ ⵓⵙⵡⵓⴷⴷⵓ ⵏ ⵜⵙⵔⵜⴰⵢ ⵏ ⵓⵣⵡⴰⴳ ⵙ ⵎⴰⴷ ⵉⵍⵍⴰⵏ ⴳ ⵓⵎⵇⵇⵏ ⵏ ⵡⴰⵎⵓⵔ ⵏ ⵡⴰⴽⵓⵛ ⴰⵎⴰⴹⵍⴰⵏ ⴼ ⵓⵣⵡⴰⴳ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵓⴼⵓⴽⴽⵓ ⵏ ⵉⵙⵓⵔⵙⵏ ⵉⵣⵔⴼⴰⵏⵏ ⴷ ⵉⵏⴰⵎⵓⵏⵏ ⴷ ⵉⵏⴼⴳⴰⵏⵏ ⵏ ⵉⵎⵣⵡⴰⴳ, ⵢⴰⵡⵙ ⴳ ⵓⵙⵉⵜⵜⵉ ⵏ ⴳⴰⵔ ⵉⵏⴰⵡⵏ ⵍⵍⵉ ⴼⵍⵍⴰⵙⵏ ⵜⵜⵉⵍⵉⵏⵉⵏ, ⴷ ⵓⵙⵎⵖⵔ ⵏ ⵜⴱⵔⵉⴷⵉⵏ ⵏ ⵓⵎⵢⴰⵡⴰⵙ ⴷ ⵜⵡⵉⵣⵉ ⴳ ⵢⵉⴳⵔ ⵏ ⵓⵙⵡⵓⴷⴷⵓ ⵏ ⵓⵣⵡⴰⴳ ⵊⴰⵔ ⵜⵉⵎⵉⵣⴰⵔ ⵏ ⵉⵥⵥⵍⵎⴷ ⴷ ⵉⴼⴼⵓⵙ ⴷ ⵜⵎⵉⵣⴰⵔ ⵏ ⵉⴼⴼⵓⵙ.
ⵜⵙⴷⴷⵉⴷ ⵎⴰⵙⵙ ⵅⴷⴷⵓⵊ ⵙⵙⵍⴰⵙⵉ ⴼ ⵜⵉⵍⵉⵜ ⵏ ⵜⵎⵢⴰⴷⴰⵙⵜ ⵜⴰⵎⵣⵡⴰⵔⵓⵜ ⵏ ⵜⵎⵓⴽⵔⵉⵙⵜ ⵏ ⵓⵣⵡⴰⴳ ⴳ ⵓⵙⵓⵔⵙ ⴳ ⵍⵍⴰⵏⵜ ⵜⴰⵙⵙⴰⵏⵉⵏ ⵣⴷⵉⵏⵉⵏ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴳ ⵓⵙⴰⵜⵉ ⵏ ⵢⴰⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⵎⵇⵇⵓⵔⵏ, ⵜⵙⴰⵡⵍ ⵓⵍⴰ ⴼ ⵉⵙⵏⴼⵍⵏ ⵍⵍⴰⵏⵉⵏ ⴳ ⵓⵎⵏⵉⴷ ⵏ ⵜⵎⵓⴽⵔⵉⵙⵜ ⵏ ⵉⵎⵣⵡⴰⴳ ⵍⵍⵉⵖ ⵜⵜⵣⵓⴳⵏ ⵉⵄⵔⵔⵉⵎⵏ ⵏ ⵖⵉⵍⴰⴷ ⵉ ⵓⵙⵉⴳⴳⵍ ⵏ ⵓⵙⵖⵣⵏ ⵏ ⵜⵎⵔⵙⴰⵍ.
ⵉⵙⴷⴷⵉⴷ ⵎⴰⵙⵙ ⵍⵎⵓⵚⵟⴰⴼⴰ ⵔⴷⴷⴰⴷ ⵎⴰⵙ ⴰⵢⵙⴽⴰⵔ ⵍⵎⵖⵔⵉⴱ ⵜⵓⴳⴳⴰⵙ ⵅⴰⵜⵔⵏⵉⵏ ⴳ ⵓⵙⴱⴷⴷⵉ ⵏ ⵓⵣⵡⴰⴳ ⵡⴰⵔⵓⵍⴳⵉⵏ, ⵙ ⵓⵙⴱⴷⴷⵉ ⵏ ⵓⵙⵔⵡⵍ ⵏ ⵉⵎⵣⵡⴰⴳ ⴷ ⵜⵉⵔⵎⵉⵜⵉⵏ ⵏ ⵓⵣⵡⴰⴳ ⵡⴰⵔⵓⵍⴳⵉⵏ, ⵉⵙⴰⵡⵍ ⵓⵍⴰ ⴼ ⵜⵓⵎⴰⵢⵉⵏ ⵏ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵣⵡⴰⴳ ⵉⴽⵛⵎⵏ ⴳ ⵜⵡⵡⵓⵔⵉ ⵙ ⵜⵎⵙⴽⴰⵔ ⵍⵍⴰⵏⵉⵏ ⴳ ⵢⵉⴳⵔ ⵏ ⵓⵣⵡⴰⴳ ⵙⴳ ⵛⵓⵜⴰⵏⴱⵉⵔ 2013, ⵜⴰⵙⵜⵔⴰⵜⵉⵊⵉⵜ ⴰⴷ ⵉⴱⴷⴷⵏ ⴼ ⵜⵎⵙⴽⵔⵜ ⵜⴰⵎⴷⵔⴰⵡⵜ ⵉⴱⴷⴷⵏ ⴼ ⵓⵙⴼⵙⵉ ⵏ ⵜⵎⵓⴽⵔⵉⵙⵜ ⵏ ⵓⵣⵡⴰⴳ ⴷ ⵜⵉⵔⵎⵉⵜⵉⵏ ⵜⵉⴳⵔⴰⵖⵍⴰⵏⵉⵏ ⵜⵉⵎⵣⵡⵓⵔⴰ ⵍⵍⴰⵏⵉⵏ ⴳ ⵓⵎⵏⵉⴷ ⴰⴷ.
ⵢⵓⵎⴰ ⴰⴽⵓⴱⴰⵕ ⴰⴱⵕⵍⴰⵎⵏⵉ ⵉⴷⵔⵓⵏ ⴳ ⵓⴳⵔⴰⵡ ⴰⴷ:
- ⵎⴰⵙⵙ ⴰⵎⴰⵔⵉ ⴰⵃⵎⴰⴷ ⵜⵜⵡⵉⵣⵉ, ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⵥⵖⵕⵜ ⴷ ⵜⵎⴰⵜⵔⴰⵔⵜ.
- ⵎⴰⵙⵙ ⴰⵎⴰⵔⵉ ⵍⵎⵓⵚⵟⴰⴼⴰ ⵔⴷⴷⴰⴷ, ⵜⴰⵔⴰⴱⴱⵓⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ.
- ⵎⴰⵙⵙⴰ ⵜⴰⵎⴰⵔⵉⵜ ⵅⴷⴷⵓⵊ ⵙⵙⵍⴰⵙⵉ, ⵜⴰⵔⴰⴱⴱⵓⵜ ⵜⴰⵙⵔⵎⵓⵏⵜ.
- ⵎⴰⵙⵙ ⴰⵎⵛⵛⵉⵡⵕ ⴽⴰⵎⴰⵍ ⴰⵢⵜ ⵎⵉⴽ, ⵜⴰⵔⴰⴱⴱⵓⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ.
- ⵎⴰⵙⵙ ⴰⵎⵛⵛⵉⵡⵕ ⵃⴰⵙⴰⵏ ⵛⵎⵉⵙ, ⵜⴰⵔⴰⴱⴱⵓⵜ ⵏ ⵜⵥⵖⵔⵜ ⴷ ⵜⵎⴰⵜⵔⴰⵔⵜ.
ⵉⵙⵏⵎⴰⵍⴰ ⴰⴷ ⵓⴱⵕⵍⴰⵎⴰⵏ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵓⵎⵢⴰⵡⴰⵙ ⴰⴽⴷ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵜⴰⵙⵎⵓⵏⵉ ⵜⴰⴱⵕⵍⴰⵎⵏⵉⵜ ⴼ ⵓⴳⵔⴰⵡ ⴰⴷ, ⵓⵙⵙⴰⵏ ⵏ 6 ⴷ 7 ⴷⵓⵊⴰⵏⴱⵉⵔ 2018 ⴳ ⵓⵙⵖⵉⵎ ⵏⵏⵙ ⴳ ⵕⵕⴱⴰⵟ, ⴳ ⵓⵙⴰⵜⵉ ⵏ ⵓⴹⴼⵕ ⴰⴱⵕⵍⴰⵎⴰⵏⵉ ⵏ ⵓⴳⵔⴰⵡ ⴰⴳⵔⴰⵖⵍⴰⵏ ⴼ ⵓⵣⵡⴰⴳ ⵍⵍⵉ ⵜⵙⵏⵓⴱⴳ ⵜⵖⵔⵎⵜ ⵏ ⵡⴰⵎⵓⵔ ⵏ ⵡⴰⴽⵓⵛ ⵓⵙⵙⴰⵏ ⵏ 10 ⴷ 11 ⴷⵓⵊⴰⵏⴱⵉⵔ 2018, ⵃⵎⴰ ⴰⴷ ⵢⵉⵍⵉ ⵓⵣⵣⴳⵉⵔ ⵏ ⵓⵎⵇⵇⵏ ⴰⵎⴰⴹⵍⴰⵏ ⵉ ⵓⵣⵡⴰⴳ ⵏ ⵓⴼⵔⴰ ⵉⴳⴰⵏ ⵓⵍⴳⵉⵏ.