ⴰⵏⵎⵓⵇⵇⴰⵔ ⵉⵥⵍⵉⵏ ⵙ ⵓⵙⵎⵏⵉⴷ ⵏ ⵜⵣⵔⴰⵡⵜ ⵜⴰⵏⴰⵎⵓⵔⵜ ⴼ ⵡⴰⵜⵉⴳⵏ ⴷ ⵓⵙⵎⵀⵍ ⴰⵙⵎⵔⵙⵍⴰⵏ: ⵉⵙⵏⴼⵍⵏ ⴷ ⵉⴳⴰⵏⵉⵜⵏ ⵏ ⵉⵎⵖⵔⵉⴱⵉⵢⵏ, ⴰⴽⵕⴰⵙ 8 ⴱⵕⴰⵢⵕ 2023
ⵉⵙⵜⴰⵡⵀⵎⵎⴰ ⵉⵎⵔⵙⵉ ⵏ ⵜⵣⵔⴰⵡⵜ ⴰⴷ ⵙ ⵜⵖⵔⵉ ⵏ ⵉⵙⵏⴼⵍⵏ ⵏ ⵡⴰⵜⵉⴳⵏ ⵍⵍⴰⵏⵉⵏ ⴳ ⵡⴰⵎⵓⵏ ⴰⵎⵖⵔⵉⴱⵉ ⵏ ⵖⵉⵍⴰⴷ, ⴷ ⵉⵙⵡⴰⵍⴰⵢⵏ ⴷ ⵉⴳⴰⵏⵉⵜⵏ ⵏ ⵓⵏⵎⵓⵔⴰⵏ ⵅⴼ ⵓⵙⵎⵀⵍ ⵏ ⵡⴰⵜⵉⴳⵏ ⴳ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ ⴷ ⵜⵖⵔⵎⴰⵏⵉⵏ ⴰⵎ ⵜⴰⵡⵊⴰ ⴷ ⵓⵙⴳⵏⴰⴼ ⴷ ⵜⵎⵙⵙⵏⵜⴰⵢⵜ ⴷ ⵜⵙⴷⴰⵡⵉⵜ ⴷ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵜⵎⵙⵎⵓⵏⵜ...ⵉⵣⴷⵉ ⵓⵙⵎⵀⵍ ⴰⵎⵔⵙⵍⴰⵏ ⵏ ⵡⴰⵜⵉⴳⵏ ⴷ ⵉⵎⵙⵜⴳⴳⴰⵔⵏ ⴷ ⵉⵎⵙⵡⵓⵔⵉⵢⵏ ⴳ ⵜⵎⵔⵙⴰⵍ ⵖⵎⴽ ⴰⵏⵏ ⵓⵍⴰ ⵉⵏⵎⵓⵔⴰⵏ. ⵜⵉⵎⵏⵜⵍⵉⵏ ⵍⵍⴰⵏⵉⵏ ⴷⴰⵜ ⵏ ⵓⵙⵜⴰⵢ ⵏ ⵉⵎⵔⵙⵉ ⴰⴷ ⵣⴷⵉⵏ ⴷ ⵓⵙⵎⵀⵍ ⴰⵎⵔⵙⵍⴰⵏ ⵏ ⵡⴰⵜⵉⴳⵏ, ⴷⴷ ⵍⵍⵉⵖ ⵓⵔ ⵉⵜⵜⵓⵖⵔⵉ ⴳ ⵎⴰⴷ ⵉⵣⵔⵉⵏ ⴳ ⵜⵎⵔⵙⴰⵍ ⵜⵉⴽⴰⴷⵉⵎⵉⵢⵉⵏ ⴷ ⵜⵖⵔⵎⴰⵏⵉⵏ.
ⵉⵙⵜⴰⵡⵀⵎⵎⴰ ⵉⵎⵔⵙⵉ ⵏ ⵡⴰⵜⵉⴳⵏ ⵍⵍⵉⵖ ⴳⴰⵏ ⴰⴼⵔⴷⴰⵙ ⴰⴷⵙⵍⴰⵏ ⵏ ⵜⴷⵍⵙⴰ ⵏ ⵜⵎⵔⵙⵍⵜ, ⴰⵔ ⵙⵡⴰⵍⴰⵏ ⵜⵉⵖⵜⴰⵙⵉⵏ ⴷ ⵉⵙⵜⴰⵢⵏ ⴷ ⵜⵎⵙⴽⵔⵜ ⵏ ⵉⵎⵙⴽⴰⵔⵏ ⵉⵎⵔⵙⵍⴰⵏⵏ, ⴷ ⵜⵣⴷⴰⵢⵉⵏ ⵏ ⵜⵎⵔⵙⵍⵜ ⴰⴽ ⵓⵎⴰⴹⴰⵍⴰ ⵏ ⴱⵕⵕⴰ, ⵜⵙⵔⵙ ⵉⵏ ⵉⴳⵎⴰⵎⵏ ⵏⵏⵙ ⵉⵣⵔⵉⵔⵉⴳⵏ ⵍⵍⵉ ⴷ ⵓⵔ ⵉⵇⵇⴰⵏ ⵓⵙⵉⵜⵜⵉ. ⵉⵇⵇⴰⵏ ⴷ ⴼ ⴽⵓ ⵜⵉⵎⵔⵙⵍⵜ ⴰⴷ ⵜⴻⵟⵟⵉⴼ ⴰⵜⵉⴳⵏ ⵏⵏⵙ ⵉⵎⵔⵙⵍⴰⵏⵏ ⵏⵏⵙ ⵍⵍⵉ ⴰⵙ ⴰⴽⴽⴰⵏⵉⵏ ⵜⵉⵍⵉⵜ ⴷ ⵓⴷⵖⴰⵔ ⴳ ⴷⴰⵔ ⵡⴰⵎⴰⵙ, ⵜⵙⴷⵓⵙ ⵓⵍⴰ ⵜⴰⵎⴰⴳⵉⵜ ⵏⵏⵙ ⴷ ⵓⵎⵛⴰⴱⴱⴰⴽ ⵏⵏⵙ, ⵜⴰⵡⵙ ⴳ ⵓⵙⵔⵓⵙ ⵏ ⵜⴰⵏⵏⴰⵢⵢⵉⵏ ⴷ ⵜⵙⵜⵔⴰⵜⵉⵊⵉⵏ ⵏ ⵓⵙⵡⵓⵔⵉ ⵏⵏⵙ.
ⵍⵍⵉⵖ ⵟⵟⴰⴼⵏ ⵡⴰⵜⵉⴳⵏ ⵜⵉⵎⵉⵜⴰⵔ ⵏⵏⵙⵏ ⴷ ⵜⵥⴹⴰⵕⵉⵏ ⵣⴷⵉⵏⵉⵏ ⴷ ⵓⵙⴽⵔ ⵏ ⵜⵣⵣⵉⴳⵣⵜ ⴷ ⵜⴳⵎⵉ, ⵙⵔⵙⵏ ⵉⵎⵏⴰⴷⵏ ⵉⵏⴳⴰⵏⵏ ⴷ ⵉⵣⵔⴼⴰⵏⵏ ⴷ ⵉⵏⴰⵎⵓⵏ ⴷ ⵡⵉⵏ ⵜⵖⴰⵔⵉⵡⵉⵏ,ⵔⴰⴷ ⵢⴰⵡⵙ ⵓⵔⵣⵣⵓ ⴰⵎⴰⵙⵙⴰⵏ ⴳ ⵜⵓⵙⵙⵏⴰ ⵏ ⵉⵙⵏⴼⵍⵏ ⵍⵍⴰⵏⵉⵏ ⴷ ⵜⴱⵔⵉⴷⵉⵏ ⵏ ⵏ ⵓⵙⵏⴼⵍ ⵏ ⵜⵥⴹⴰⵕⵉⵏ ⴰⴷ ⵙ ⵉⵙⵏⴼⴰⵔⵏ ⴷ ⵉⵖⴰⵡⴰⵙⵏ ⵏ ⵜⵡⵡⵓⵔⵉ ⴷ ⵓⵙⵔⵓⵙ ⵏ ⵎⴰⴷ ⵉⵜⵜⵓⵙⴽⴰⵔⵏ ⴷ ⵎⴰⴷ ⵓⵔ ⵉⵜⵜⵓⵙⴽⴰⵔⵏ.
