ⴰⵎⴷⴰⵡⴰⵍ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 42.08 ⵉⵣⴷⵉⵏ ⴷ ⵜⵉⴹⴰⴼ ⵏ ⵓⵙⵉⴼⴹ ⴷ ⵓⵙⴽⵛⵎ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵕⴰⵙ 17 ⵢⵓⵏⵢⵓ 2020, ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵎⴰⵙⵙ ⵙⴰⵄⵉⴷ ⵛⴱⴰⵄⵜⵓ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ, ⵎⵓⵍⴰⵢ ⵃⴰⴼⵉⴹ ⵍⵄⴰⵍⴰⵎⵉ, ⵉ ⵓⵎⴹⴰⴽⴰⵕ ⵏ ⵓⵙⵏⴼⴰⵔ ⵏ ⵓⵙⵍⴳⵏ 42.18 ⵉⵣⴷⵉⵏ ⴷ ⵓⵙⵉⴼⴹ ⴷ ⵓⵙⴽⵛⵎ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ.
ⵢⵓⵛⴽⴰ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵖ ⵓⵙⴰⵜⵉ ⵏ ⵓⵡⵇⵇⵔ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵏ ⵉⵣⵣⵔⴰⴼⵏ ⵉⴳⵔⴰⵖⵍⴰⵏⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ ⵣⴷⵉⵏⵉⵏ ⴷ ⵢⵉⴳⵔ ⴰⴷ, ⴷ ⵉⵙⵖⵡⴰⵏ ⵏⵏⵙ ⵉ ⵓⵙⵏⴰⵍ ⵏ ⵜⵓⴳⴳⴰⵙ ⵏ ⵡⴰⵎⵓⵏ ⴰⴳⵔⴰⵖⵍⴰⵏ ⵉ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵉⵔⴱⴰⴱⵏ ⵏ ⵓⵏⵏⴳⵣⴰ ⵉⵙⵎⴷⵏ, ⵙ ⵓⵙⵔⵓⵙ ⴷ ⵓⵣⵣⴳⵉⵔ ⵏ ⵢⴰⵏ ⵓⵙⴰⵜⵉ ⴰⵣⵣⵔⴰⴼ ⵍⵍⵉ ⵔⴰⴷ ⵢⴰⵡⵙ ⵖ ⵜⵉⴹⴰⴼ ⵏ ⵓⵙⵉⴼⴹ ⴷ ⵓⵙⴽⵛⵎ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ.
ⵖⵎⴽ ⵍⵍⵉ ⴷ ⵉⵎⵛⴰⵛⴽⴰ ⵓⵙⵏⴼⴰⵔ ⵏ ⵓⵙⵍⴳⵏ ⴷ ⵜⵖⵜⴰⵙⵜ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵓⵟⵟⵓⵏ 1540 ⵖⵉ ⵍⵍⴰ ⵎⴰⵙ ⴷ ⵉⵇⵇⴰⵏ " ⴼ ⵉⵡⴰⵏⴽⵏ ⴰⴷ ⵓⵔ ⴰⴽⴽⴰⵏ ⴽⵔⴰⵢⴳⴰⵜⵜ ⴰⵙⵏⴰⵍ ⵉ ⵜⵙⴳⵉⵡⵉⵏ ⵡⴰⵔⵜⵓⵏⴱⵉⴹⵉⵏ ⵉⵔⴰⵏ ⴰⴷ ⵙⴽⵔⵏⵜ ⴷ ⴰⴷ ⵟⵟⴼⵏⵜ ⴷ ⴰⴷ ⵙⵏⴼⵍⵏⵜ ⴷ ⴰⴷ ⵙⵎⴰⵜⵜⵉⵏⵜ ⴷ ⴰⴷ ⵙⵎⵔⵙⵏⵜ ⵉⵔⴱⴰⴱⵏ ⵉⵏⴰⵡⴰⵡⵉⵢⵏ ⴷ ⵉⴽⵉⵎⴰⵡⵉⵢⵏ ⴷ ⵉⴱⵢⵓⵍⵓⵊⵉⵢⵏ ⴷ ⵉⵎⴰⵙⵙⵏ ⵏ ⵓⵙⵍⴽⵎ ⵏⵏⵙⵏ".
ⵉⵍⵍⴰ ⵖ ⵓⵙⵏⴼⴰⵔ ⵏ ⵓⵙⵍⴳⵏ ⵉⵜⵜⵓⵎⴹⴰⴽⴰⵕⵏ ⵎⴰⵙ ⴷ ⵉⵇⵇⴰⵏ ⴰⴷ ⵟⵟⴼⵏ ⵉⵙⵉⴼⴹⵏ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ ⴷ ⵜⵏⵓⴼⴰ ⵙⵔⵙⵏⵜ ⵉⵥⵍⵉⵏ ⵢⴰⵜ ⵜⵓⵔⴰⴳⵜ ⵜⴰⵎⵣⵡⴰⵔⵓⵜ ⵉⴳⴰⵏ ⴰⵎ « ⵜⵓⵔⴰⴳⵜ ⵏ ⵓⵙⵉⴼⴹ », ⴷ ⵜⵉⴹⴰⴼ ⵏ ⵜⵎⵜⵜⴰⵡⵉⵏ ⴰⴷ ⵉⵖ ⴷ ⴽⵛⵎⵏ, ⵉⵖ ⵍⵍⴰⵏⵜ ⵜⵓⵔⴷⵉⵡⵉⵏ ⴱⴷⴷⵏⵉⵏ ⴼ ⵓⵎⵍⴰⵏ ⵎⴰⵙ ⴷ ⵜⵉⴳⵓⵔⴰ ⴰⴷ ⵔⴰⴷ ⴰⵡⵙⵏⵜ ⵙ ⵜⵖⴰⵔⴰⵙⵜ ⵉⵙⵎⴷⵏ ⵏⵖ ⵜⴰⴳⵣⵎⴰⵏⵜ ⵖ ⵜⵣⵣⵉⴳⵣⵜ ⵏ ⵉⵔⴱⴰⴱⵏ ⵏ ⵓⵏⵏⴳⵣⴰ ⵉⵙⵎⴷⵏ.
ⵉⵙⵔⵙ ⵓⵙⵏⴼⴰⵔ ⵏ ⵓⵙⵍⴳⵏ ⵜⴰⵙⵇⵇⵉⵎⵜ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ ⵃⵎⴰ ⴰⴷ ⵉⵜⵜⵓⴹⵎⵉⵏ ⵓⵣⴷⴷⵓⵢ ⵉⵕⵡⴰⵏ ⵏ ⵜⵉⴹⴰⴼ ⵏ ⵓⵙⵉⴼⴹ ⴷ ⵓⵙⴽⵛⵎ ⵏ ⵜⴳⵓⵔⴰ ⴰⴷ ⵙ ⵜⴷⵔⴰⵡⵜ ⵏ ⴽⵓ ⵜⵉⵎⵙⵙⵓⴳⵓⵔⵉⵏ ⵍⵍⵉ ⵀⵎⵎⴰⵏⵜ ⵜⵎⵙⴰⵔⵉⵏ ⵏ ⵜⵏⴼⵔⵓⵜ ⴷ ⵜⵎⵙⴰⵔⵉⵏ ⵜⵉⴷⵎⵙⴰⵏⵉⵏ ⴱⴷⴷⵏⵉⵏ ⴼ ⵓⵙⴱⵓⵖⵍⵓ ⵏ ⵉⵙⵉⴼⴹⵏ. ⵖⵎⴽ ⵍⵍⵉ ⵉⵙⵔⵓⵙ ⵉⵙⵖⵡⴰⵏ ⵏ ⵡⵉⴷⴰ ⵙⵙⵉⴼⵉⴹⵏⵉⵏ ⴷ ⵡⵉⵍⵍⵉ ⵙⵙⴽⵛⵎⵏⵉⵏ ⵜⵉⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ, ⴷ ⵜⴼⴳⵓⵔⵉⵏ ⵍⵍⴰⵏⵉⵏ ⵖ ⵡⴰⴷⴷⴰⴷ ⵏ ⵜⵕⵥⵉ ⵏ ⵉⴱⴹⵉⵢⵏ ⵏ ⵓⵙⵍⴳⵏ ⴰⴷ.
ⵙⴽⵔⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴰⵎⴹⴰⴽⴰⵕ ⵉⵣⵓⵣⵣⵔⵏ ⵏ ⵉⵎⵏⵏⵉⵜⵏ ⵏ ⵓⵙⵏⴼⴰⵔ, ⵙⵍⴰⵡⵏ ⴰⴽⴽⵯ ⵜⵉⵎⵥⵍⴰⵢ ⴷ ⵜⵡⵓⵔⵉⵡⵉⵏ ⵏ ⵜⵙⵇⵇⵉⵎⵜ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ, ⴷ ⵓⵏⴳⵔⴰⵡ ⵉⵍⵍⴰⵏ ⴼ ⵓⵙⵉⴼⴹ ⵏ ⵜⴳⵓⵔⴰ ⴰⴷ.
ⵏⵏⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵎⴰⵙ"ⵉⴳⴰ ⵓⵙⵏⴼⴰⵔ ⴰⴷ ⵢⴰⵏ ⵓⵙⵏⴼⴰⵔ ⵉⵥⵍⵉⵏ ⵖ ⵍⵍⴰⵏ ⵙⵉⵏ ⵉⵙⵡⵉⵔⵏ, ⵢⴰⵏ ⵓⵙⵡⵉⵔ ⴰⵣⵣⵔⴰⴼ ⴷ ⵓⵙⵡⵉⵔ ⵉⵥⵍⵉⵏ ⵙ ⵜⴰⵏⵏⴰⵢⵜ ⵏ ⵓⵡⴰⵏⴽ ⵉ ⴽⵉⴳⴰⵏ ⵏ ⵜⵎⵙⴰⵔⵉⵏ ⵜⵉⵙⵜⵔⴰⵜⵉⵊⵉⵢⵉⵏ, ⵙⴷⴷⵉⴷⵏ ⴼ ⵡⴰⵜⵉⴳ ⵏ ⵓⵙⵏⵎⴰⵍⴰ ⵏ ⵉⵎⵏⵏⵉⵜⵏ ⴷ ⵓⵙⵖⵓⴷⵓ ⵏ ⴽⵔⴰ ⴳⵉⵙⵏ ⴷ ⵓⵙⵔⵓⵙ ⵏ ⵓⵎⵏⵏⵉ ⵖ ⵜⵍⵍⴰ ⵜⵍⴳⴰⵎⵜ ⵏ ⵜⴳⵓⵔⴰ ⵏ ⵓⵙⴽⵛⵎ ⴷ ⵓⵙⵉⴼⴹ ⴰⵙⵉⵏⵔⴰⵏ ⵙ ⵓⴹⵕⵉⵚ ⴰⵎⴰⴷⴷⴰⵙ".
ⵖ ⵓⵏⵢⴰⵍⴽⴰⵎ ⵏⵏⵙ ⴷ ⵜⴽⵛⵛⵓⵎⵉⵏ ⴷ ⵜⴰⵏⵏⴰⵢⵉⵏ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ, ⵙⵍⴰⵡⴰⵏ ⴰⴽⴽⵯ ⵎⴰ ⴷ ⵉⵥⵍⵉⵏ ⵙ ⵜⵎⵥⵍⴰⵢ ⵏ ⵜⵙⵇⵇⵉⵎⵜ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ ⴷ ⵜⵏⵓⴼⴰ ⴷⵉⵙⵏⵜ ⵉⵣⴷⵉⵏ, ⵉⵣⵎⵎⵉⵎ ⵎⴰⵙⵙ ⵎⵓⵍⴰⵢ ⵃⴰⴼⵉⴹ ⵍⵄⴰⵍⴰⵎⵉ ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ, ⵎⴰⵙ ⴷ "ⵜⵉⵎⵥⵍⴰⵢ ⵏ ⵜⵙⵇⵇⵉⵎⵜ ⵓⵔ ⵥⵍⵉⵏⵜ ⵖⴰⵙ ⵙ ⵜⵎⴰⵡⴰⵙⵜ ⵡⴰⵃⴷⵓⵜⵜ, ⵎⴰⵛ ⵍⵍⴰⵏⵜ ⵜⵙⴳⵉⵡⵉⵏ ⵢⴰⴹⵏⵉⵏ ⵍⵍⵉ ⴷⵔⵓⵏⵉⵏ". ⵉⵍⵇⵎ :"ⵉⵇⵇⴰⵏ ⴷ ⴰⴷ ⵜⴻⵟⵟⵉⴼ ⵜⵙⵇⵇⵉⵎⵜ ⴰⴷ ⵉⵎⴰⵙⵙⵏ ⴷ ⵓⵍⵖⴷⵓⴷⵉ ⵉ ⵓⵔⵣⵣⵓ ⴷ ⵉⵎⵉⵥ ⵏ ⵓⵎⵍⴰⵏ ⵥⵍⵉⵏⵉⵏ ⵙ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ, ⵍⵍⵉⵖ ⴱⴰⵀⵔⴰ ⵉⵥⵍⵉ ⵡⴰⵏⴰⵡ ⵏ ⵜⴳⵓⵔⴰ ⴰⴷ, ⵉⵎⵍⵉ ⴷ ⵎⴰⵙ ⴷ ⵜⴰⵙⵇⵇⵉⵎⵜ ⴰⴷ ⵓⵔ ⴰ ⵜⴰⴽⴽⴰ ⵜⵓⵔⴰⴳⵉⵏ ⵏ ⵓⵙⵉⴼⴹ ⴷ ⵓⵙⴽⵛⵎ ⵖⴰⵙ ⵉⵖ ⴷⴰⵔⵙ ⵍⵍⴰⵏ ⵓⵎⵍⴰⵏ ⵀⵎⵎⴰⵏⵉⵏ ⵜⵉⴳⵓⵔⴰ ⴰⴷ, ⵖⵉⴽ ⴰⵏⵏ ⴰⴼ ⵜⴳⴰ ⵜⴰⵏⵏⴰⵢⵜ ⵏⵏⵙ ⵜⵓⵛⵛⵉⵍⵜ".
ⵉⵙⵙⵉⵙⴼⵉⵡ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ" ⴽⵓ ⵉⵡⴰⵏⴽⵏ ⴼⴼⵖⵏ ⵙ ⵜⵖⵜⴰⵙⵜ ⴰⴷ ⵢⵉⵍⵉ ⵓⵙⵉⴼⴹ ⴷ ⵓⵙⴽⵛⵎ ⵏ ⵜⴳⵓⵔⴰ ⵏ ⵓⵙⵎⵔⵙ ⴰⵙⵉⵏⵔⴰⵏ ⵖ ⵉⵍⵍⴰ ⵉⵎⵉⵣⵉ ⵖ ⵓⵙⵎⵔⵙ ⵏⵏⵙⵏⵜ ⵉ ⴽⵔⴰ ⵏ ⵉⵡⵜⵜⴰⵙⵏ ⵓⵔ ⴼⴰⵡⵏⵉⵏ, ⵙ ⵢⴰⵜ ⵜⵓⵔⴰⴳⵜ ⵍⵍⵉ ⵜⴰⴽⴽⴰ ⵢⴰⵜ ⵜⵙⵇⵇⵉⵎⵜ ⵉⵥⵍⵉⵏ ⵙ ⵜⵡⵓⵔⵉ ⴰⴷ, ⴷⴼⴼⵉⵔ ⵎⴰ ⴷ ⵜⵜ ⵍⴽⵎⵏ ⴽⵓ ⵓⵎⵍⴰⵏ ⴳⵓⵎⵏⵉⵏ ⴼ ⵜⴳⵓⵔⴰ ⴰⴷ, ⵢⵉⵏⵉ ⵎⴰⵙ ⵉⴳⴰ ⵍⵃⴰⵍ ⵢⴰⵏ ⵓⵎⵛⴰⵛⴽⴰ ⴰⴳⵔⴰⵖⵍⴰⵏ ⵍⵍⵉ ⵉⵙⴳⵎⴹ ⵍⵎⵖⵔⵉⴱ".