ⴰⵙⵉⵡⴹ ⴼ ⵜⵙⵎⵓⵏⵉ ⵏ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴰⴽⵕⴰⵙ 24 ⵢⵓⵏⵢⵓ 2020

ⵉⵙⵏⵎⴰⵍⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵙⵎⵓⵏⵉ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⴰⵙⵙ ⵏ ⵓⴽⵕⴰⵙ 24 ⵢⵓⵏⵢⵓ 2020, ⵜⵥⵍⵉ ⵉ ⵜⵡⵓⵔⵉ ⵏ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⵖ ⵜⵉⴹⴰⴼ ⴷ ⵓⵣⵣⵔⴰⴼ.

ⵖ ⵜⵣⵡⵉⵔⵉ ⵏ ⵜⵙⵎⵓⵏⵉ, ⵉⵙⵎⵏⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴷ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵏⵙⵙⵉⵅⴼⵏ ⵏ ⵜⵙⵇⵇⵉⵎⵉⵏ ⵜⵓⴼⵔⴰⵢⵉⵏ ⵏ ⵓⵙⵔⵖⴷ ⴷ ⵜⵉⵔⵔⵓⵖⴷⴰ ⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⵙ ⵜⵎⵍⴷⴰ ⵏ ⵓⵎⵓⵔⵙ ⵏ ⵓⴼⵍⴰⵢ ⵍⵍⵉ ⵉⵙⴽⵔ, ⵜⵜⵔⵏ ⵕⴱⴱⵉ ⴰⴷ ⵉⵃⴼⴹ ⴰⴳⵍⵍⵉⴷ ⵉⴷⴰⵡⵎ ⴼⵍⵍⴰⵙ ⵜⵉⵎⵍⵙⴰ ⵏ ⵜⴷⵓⵙⵉ ⵃⵎⴰ ⴰⴷ ⵉⵣⵣⵉⴳⵣ ⵖ ⵜⵡⴰⴷⴰ ⵜⴰⵎⵔⵏⵓⵜ ⵏ ⵍⵎⵖⵔⵉⴱ, ⵉⵙⴽⵔ ⵉ ⵓⵎⴰⴷⴰⵏ ⵏⵏⵙ ⴰⵢⵍⵍⵉ ⵉⵙⵉⴳⴳⵉⵍ ⵖ ⵜⴳⵎⵉ ⴷ ⵓⴱⵓⵖⵍⵓ.

ⵙ ⵜⵎⵍⴷⴰ ⴰⴷ, ⵙⵓⵜⴳⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴽⵓ ⵜⵉⵖⵜⴰⵙⵉⵏ ⵜⵓⵏⵥⵉⵥⵉⵏ ⵍⵍⵉ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ ⵖ ⴽⵓ ⵉⵙⵡⵉⵔⵏ: ⴰⵏⴰⵎⵓⵔ, ⴰⵙⴳⴰⵡⴰⵏ, ⴰⴼⵔⵉⵇⵉ, ⴰⴳⵔⴰⵖⵍⴰⵏ ⵜⵜⵓⵙⵙⴰⵏⵉⵏ ⵙ ⵓⵏⵥⴰⵥ ⵏ ⵜⴱⵔⵉⴷⵜ ⴼ ⴱⴷⴷⵏ ⵉⵙⵜⴰⵢⵏ ⵉⵅⴰⵜⴰⵔⵏ ⵏ ⵍⵎⵖⵔⵉⴱ ⵖ ⴽⵓ ⵉⴱⴰⵔⴰⵣⵏ ⵙ ⵜⵏⴰⵔⴰ ⵏⵏⵙ ⵉⵥⵉⵍⵏ.

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵉⵎ ⵖ ⵜⵙⵎⵓⵏⵉ ⴰⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⴰⵢⴰⴼⵓⵜ ⵏ ⵜⵡⵓⵔⵉ ⵏ ⵓⵙⵇⵇⵉⵎ ⵖ ⵜⵉⴹⴰⴼ ⴷ ⵓⵣⵣⵔⴰⴼ ⵙ ⵜⵏⵎⵎⴰⵍⵉⵏ ⴼⴰⵡⵏⵉⵏ ⴼ ⵜⴷⵉⵏⴰⵎⵉⵜ ⵏ ⵓⵙⵇⵇⵉⵎ ⴷ ⵓⵏⵢⴰⵍⴰⴽⵎ ⵏⵏⵙ ⴰⵡⵓⵙⵙⴰⵏ ⴷ ⵜⵎⵙⴰⵔⵉⵏ ⴷ ⵉⵅⵎⵎⵉⵎⵏ ⵏ ⵡⴰⵎⵓⵏ, ⵖⵎⴽ ⴰⵏⵏ ⴰⴼ ⵜⵜⵓⵙⴽⴰⵔ ⵜⵉⵍⴰⵍⵜ ⵉⴼⴰⵡⵏ ⵏ ⵜⵙⵇⵇⵉⵎⵉⵏ, ⵍⵍⵉⵖ ⵉⵍⵍⴰ ⵓⵎⴹⴰⴽⴰⵕ ⵏ 52 ⵏ ⵉⵎⵔⵙⵉ ⵉⵙⴰⵡⴰⵍⵏ ⴼ ⴽⵓ ⵜⵉⵎⵓⴽⵔⵉⵙⵉⵏ ⵏ ⵖⵉⵍⴰⴷ ⵍⵍⵉ ⴷ ⵢⵉⵡⵉ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⴼ ⵜⵏⵓⴼⴰ ⵜⵉⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⴷ ⵜⴷⵍⵙⴰⵏⵉⵏ ⴷ ⵜⵡⵏⴹⴰⵏⵉⵏ ⴷ ⵜⴷⵓⵙⴰⵏⵉⵏ ⴷ ⵜⵏⴼⴳⴰⵏⵉⵏ.

ⵙⴽⵔⵏⵜ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵍⵍⵉ ⵍⴽⵎⵏⵉⵏ 213 ⵏ ⵜⵙⵓⵎⵔⵜ ⵏ ⵓⵙⵍⴳⵏ, ⴳⵉⵙⵏⵜ 13 ⵍⵍⵉ ⵉⵙⵖⵣⵏ ⵓⵙⵇⵇⵉⵎ ⴷ 26 ⵍⵍⵉ ⴷ ⵢⵉⵡⵉⵏ ⵜⵉⵎⵔⴰⵔⵓⵜⵉⵏ ⴼ ⴽⵉⴳⴰⵏ ⵏ ⵉⴷⵔⵉⵣⵏ ⵣⴷⵉⵏⵉⵏ ⴷ ⵜⵎⵙⵓⵜⵍⵉⵏ ⵏ ⵜⴰⵙⵙⴰⵙⵜ ⵏ ⵖⵉⵍⴰⴷ.

ⵉⵡⵉⵏⵜ ⵜⵙⵏⵜⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴽⵉⴳⴰⵏ ⵏ ⵜⵉⵣⵉ ⵏ ⵓⵎⴹⴰⴽⴰⵕ, ⵎⵍⵉⵏ ⴷ ⴰⵅⵎⵎⴻⵎ ⵉⵥⵍⵉⵏ ⵙ ⵉⵎⴰⵍ ⵏⵏⵙⵏⵜ, ⴰⵢⵍⵍⵉ ⴱⴷⴷⴰ ⵜⵜⵉⵏⵉⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴷ ⴽⵓ ⵉⴳⵎⴰⵎⵏ ⵏⵏⵙ ⵖ ⴽⵔⴰⵢⴳⴰⵜⵜ ⴰⵣⵎⵣⵣⵓ ⵃⵎⴰ ⴰⴷ ⵜⵉⵍⵉ ⵢⴰⵜ ⵜⴷⵍⵙⴰ ⵜⴰⵎⴰⵢⵏⵓⵜ ⵖ ⵜⵣⵡⴰⵔ ⵜⵙⵏⵜⴰⵢⵜ ⵜⴰⴱⵕⵍⴰⵎⴰⵏⵉⵜ  ⵖ ⵓⵖⴰⵡⴰⵙ ⵏ ⵓⵙⵇⵇⵉⵎ ⵖ ⵉⴳⵔⴰ ⴰⵣⵣⵔⴰⴼ ⵏ ⵓⵙⵇⵇⵉⵎ.

ⵃⵎⴰ ⴰⴷ ⵜⵜⵓⵍⴽⵉⵎⵏ ⵉⵡⵜⵜⴰⵙⵏ ⵍⵍⵉ ⵉⵙⵉⴳⴳⵉⵍ ⴽⵓ ⵢⴰⵏ, ⵢⵉⵍⵉ ⵓⵏⵢⴰⵍⴽⴰⵎ ⴷ ⵡⴰⴷⴷⴰⴷⵏ ⵥⵉⵍⵏⵉⵏ ⵏ ⵜⵏⴱⴰⴹⵜ ⴼ ⵎⴰ ⴷ ⵉⴳⴰⵏ 50 ⵏ ⵜⵙⵓⵎⵔⵜ ⵏ ⵓⵙⵍⴳⵏ, ⵔⴰⴷ ⵢⵉⵍⵉ ⵓⵙⴽⵔ ⵙ ⵜⵓⵎⴰⵢⵉⵏ ⵏ ⵓⵎⵏⵏⵉ 180 ⵖ ⵓⵏⴳⵔⴰⵡ ⴰⴳⵯⵏⵙⴰⵏ ⵙ ⵓⵙⵖⵉⵡⵙ ⵏ ⵜⵙⵇⵇⵉⵎⵉⵏ ⵉ ⵜⵙⵓⵎⵔⵉⵏ ⵏ ⵉⵙⵍⴳⵏⵏ ⵜⵜⴰⵡⴱⴷⴰⵔⵏⵉⵏ, ⵍⵍⵉ ⴷⴰⵔⵙ ⵜⵜⴰⵡⴼⵙⴰⵔⵏⵉⵏ ⵙ ⵓⵎⵙⴰⵙⴰ ⴷ ⵉⵣⵎⴰⵣ ⵜⵜⵔⵙⵏⵉⵏ ⴷ ⵓⵙⵏⵖⵎⵙ ⵏ ⵜⵏⴱⴰⴹⵜ ⵙ ⵖⵎⴽ ⴰⵏⵏ.

ⵜⵎⴷⴰⵡⴰⵍ ⵜⵙⵎⵓⵏⵉ ⵓⵍⴰ ⴼ ⵉⵎⵔⵙⵉ ⵏ ⵉⵙⵖⵡⴰⵏ ⵓⵏⴱⵉⴹⵏ ⴷⴰⵔ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ ⴼ ⵉⵙⴰⵡⵍ ⵓⵏⴳⵔⴰⵡ ⴰⴳⵯⵏⵙⴰⵏ ⴰⵎⴰⵢⵏⵓ, ⵜⵙⴷⴷⵉⴷ ⵜⵙⵎⵓⵏⵉ ⴼ ⵡⴰⵜⵉⴳ ⵏ ⵜⵎⵙⴽⵔⵜ ⴰⴷ ⵖ ⵓⴹⴼⵕ ⵏ ⵓⵣⵣⴳⵉⵔ ⵏ ⵉⵙⵖⵡⴰⵏ ⵏ ⵜⵏⴱⴰⴹⵜ ⵖ ⵜⵉⵍⴰⵡⵜ, ⵉⵍⵍⴰ ⵓⵙⵡⵓⵔⵉ ⵓⵍⴰ ⵙ ⵜⵎⵙⴽⵔⵜ ⴰⴷ ⵖ ⵓⵙⵡⵉⵔ ⵏ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ, ⴰⵢⵍⵍⵉ ⵉⴳⴰⵏ ⵢⴰⵜ ⵜⴷⵍⵙⴰ ⵉⵍⵍⴰⵏ ⵖ ⵜⵡⵓⵔⵉ ⵜⴰⵡⵓⵙⵙⴰⵏⵜ ⵏ ⵓⵙⵇⵇⵉⵎ.

ⵖ ⵓⵎⵏⵉⴷ ⵏ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⴰⵏⵉⵏ ⵖ ⵓⴳⵯⵏⵙ ⵏ ⵜⵙⵇⵇⵉⵎⵉⵏ, ⵙⴷⴷⵉⴷⵏ ⵉⵎⴷⵔⴰⵡⵏ ⵖ ⵜⵙⵎⵓⵏⵉ ⴰⴷ ⴼ ⵓⵙⵡⵓⵔⵉ ⵏ ⴽⵓ ⵢⴰⵏ ⵙ ⵜⵓⵎⴰⵢⵉⵏ ⵏⵏⵙⵏⵜ, ⵙⴷⴷⵉⴷⵏ ⵓⵍⴰ ⴼ ⵜⵣⵣⵉⴳⵣⵜ ⵉⴼⴰⵡⵏ ⵏ ⵓⴹⴼⵕ ⴰⵡⵓⵙⵙⴰⵏ ⵉⵙⵓⵍⵏ ⵏ ⴽⵉⴳⴰⵏ ⵏ ⵉⵏⵎⵓⵔⴰⵏ ⵉ ⵜⵡⵓⵔⵉⵡⵉⵏ, ⵖⵎⴽ ⴰⵏⵏ ⴷ ⵓⴹⴼⵕ ⵏ ⴽⵓ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵉ ⵜⵡⵓⵔⵉⵡⵉⵏ ⵏⵏⵙⵏⵜ ⵙ ⵓⵏⵢⴰⵍⴽⴰⵎ ⴰⵙⵍⵉⵥⵉⵕ ⵖ ⵜⵉⴳⴳⵓⴳⵜ ⴷ ⵓⴷⵔⴰⵡ ⵉⵕⵡⴰⵏ ⵖ ⵜⵉⵍⴰⵍ ⵏⵏⵙⵏⵜ.

ⵃⵎⴰ ⴰⴷ ⵢⵉⵍⵉ ⵓⵙⵙⵉⴼⴹ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴰⵥⵕⴼⴰⵏ ⵉⵜⵜⵓⵙⵏⴼⴰⵍⵏ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⴼ ⵓⴼⵔⵉⵙ ⴰⵎⵛⴰⵡⴰⵕ ⴷ ⵓⵣⴷⴷⵓⵢ ⵉⵎⵎⵓⵏⵏ ⴷ ⵜⴼⵔⴽⴰ ⵏ ⴷⴰⵜ ⵏ ⵓⵙⵔⵓⵙ ⵏⵏⵙ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴷ ⵜⵏⴱⴰⴹⵜ ⴷ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⵉⵙⴷⴷⵉⴷ ⵓⵍⴰ ⴼ ⵡⴰⵜⵉⴳ ⵏ ⵜⵡⵓⵔⵉ ⴰⴷ ⵜⴰⵣⵣⵔⴰⴼⵜ ⵍⵍⵉ ⵔⴰⴷ ⵉⵙⵙⵉⵙⴼⵉⵡ ⵜⵓⴳⵜ ⵏ ⵉⵙⴷⴰⵡⵏ ⵉⵥⵕⴼⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵖⵎⴽ ⵍⵍⵉ ⵔⴰⴷ ⵜⴳ ⵜⴰⵎⵍⴷⴰ ⵏ ⵓⵎⵙⴰⵡⴰⵍ ⵉⵕⵡⴰⵏ ⴷⴰⵔ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ .