ⴰⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 04.20 ⵉⵣⴷⵉⵏ ⵙ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵜⴰⵍⵉⴽⵟⵕⵓⵏⵉⵜ ⴷⴰⵔ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵖ ⵓⵙⵇⵇⵉⵎ ⵏ ⵉⵎⵓⵔⴰ
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵕⴰⵙ 17 ⵢⵓⵏⵢⵓ 2020, ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵎⵓⵍⴰⵢ ⵀⵉⵛⴰⵎ ⵍⵎⵀⴰⵊⵕⵉ ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵎⴰⵙⵙ ⵄⴰⴱⴷ ⵍⵡⴰⴼⵉ ⵍⴼⵜⵉⵜ, ⵜⵥⵍⵉ ⵉ ⵜⵏⴽⴷⴰ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 04.20 ⵉⵣⴷⵉⵏ ⴷ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵜⴰⵍⵉⴽⵟⵕⵓⵏⵉⵜ.
ⵖ ⵓⵎⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 04.20, ⵉⵏⵏⴰ ⵎⴰⵙⵙ ⵍⴼⵜⵉⵜ:" ⵍⵍⵉⵖ ⵣⵔⵉⵏ ⵓⴳⴳⴰⵔ ⵏ ⵎⵔⴰⵡ ⵏ ⵉⵙⴳⴳⵯⴰⵙⵏ ⴼ ⵓⵙⴽⵔ ⵏ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵜⴰⵍⵉⴽⵟⵕⵓⵏⵉⵜ, ⵉⵍⵍⴰ ⵓⵙⵡⵉⵏⴳⵎ ⵖ ⵓⵙⵎⴰⵢⵏⵓ ⵏ ⵡⴰⵔⵔⴰ ⴰⴷ ⵏ ⵓⵙⵉⵙⵙⵏ ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵓⴷⵎⴰⵡⵏ ⵉⵎⴰⵢⵏⵓⵜⵏ ⵏ ⵓⵙⴽⵔⴽⵙⴰⵡ, ⵢⵉⵍⵉ ⵓⵙⵉⴷⴼ ⵏ ⵜⵡⵓⵔⵉⵡⵉⵏ ⵜⵉⵎⴰⵢⵏⵓⵜⵉⵏ ⵉ ⵉⵎⵉⵙⵙ ⴰⴷ ⵍⵍⵉ ⵔⴰⴷ ⵢⴰⵡⵙ ⵖ ⵓⴹⴼⵕ ⵏ ⵓⵙⵎⴰⵇⵇⵍ ⴰⵎⵓⵟⵟⵓⵏ ⴰⵏⴳⵎⵓ ⵍⵍⵉ ⵙ ⵜⵙⵡⵓⵔⵉ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵖⵎⴽ ⴰⵏⵏ ⴰⴼ ⵔⴰⴷ ⵢⵉⵍⵉ ⵓⵙⵉⵣⴷⵔ ⵏ ⵓⵡⵜⴰⵢ ⵓⵛⵛⵉⵍ ⵏ ⵉⵎⵉⵥ ⵏ ⵜⴽⴰⵕⴹⴰ ⴰⴷ ⵙⴳ 18 ⵏ ⵓⵙⴳⴳⵯⴰⵙ ⴰⵔ 16 ⵏ ⵓⵙⴳⴳⵯⴰⵙ, ⵖⵎⴽ ⵍⵍⵉ ⵓⴼⴰⵏ ⵓⵎⵥⵉⵢⵏ ⴰⴷ ⴷⴰⵔⵙⵏ ⵜⵉⵍⵉ ⵙ ⵜⵓⵜⵔⴰ ⵏ ⵓⵎⴰⵔⵉ ⵏⵏⵙⵏ ⵓⵍⴳⵉⵏ, ⵙ ⵜⴼⴰⴷⴰ ⵏ ⵓⵙⵎⴰⵢⵏⵓ ⵏⵏⵙ ⵖ 18 ⵏ ⵓⵙⴳⴳⵯⴰⵙ ⵃⵎⴰ ⴰⴷ ⵢⵉⵍⵉ ⵉⵎⵉⵥ ⵏ ⵜⵉⵡⴳⴳⴰⴹ, ⵖⵎⴽ ⵍⵍⵉ ⵔⴰⴷ ⵢⵉⵍⵉ ⵓⵙⵏⴼⵍ ⵏ ⵜⵎⴰⵜⴰⵔⵜ ⵏ ⵜⴽⴰⵕⴹⴰ ⵏ ⵖⵉⵍⴰⴷ ⵙ ⵜⴷⵖⴰⵔⵜ ⵉⵜⵜⵓⵖⵔⴰⵏ ⵙ ⵜⵖⴰⵔⴰⵙⵜ ⵜⴰⵎⵉⴽⴰⵏⵉⴽⵜ, ⴷ ⵓⵙⴽⵔ ⵏ ⵜⵎⴰⵜⴰⵔⵜ ⵏ ⵓⴽⵛⵎ ⵉⵍⵍⴰⵏ ⵖ ⵉⴳⴳⵉ ⵏ ⵜⴽⴰⵕⴹⴰ”.
ⵉⵙⵙⵉⵙⴼⵉⵡ ⵎⴰⵙⵙ ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵎⴰⵙ ⴷ “ⵙⵏⴰⵜ ⵜⵖⴰⵡⵙⵉⵡⵉⵏ ⴰⴷ ⵔⴰⴷ ⴰⵡⵙⵏⵜ ⵖ ⵓⴽⵛⵎ ⵙ ⵜⵓⵏⵖⵉⵍⵜ ⵉⵍⵍⴰⵏ ⵖ ⵜⴷⵖⴰⵔⵜ ⵜⴰⵍⵉⴽⵟⵕⵓⵏⵉⵜ ⵖ ⵍⵍⴰⵏ ⵓⵎⵍⴰⵏ ⵉⵜⵜⵓⵣⵎⵎⴰⵎⵏ ⵖ ⵙⵉⵏ ⵓⴷⵎⴰⵡⵏ ⵏ ⵜⴽⴰⵕⴹⴰ”. ⵢⵉⵏⵉ ⵓⵍⴰ ⵎⴰⵙ “ⵔⴰⴷ ⵜⴰⵡⵙ ⵜⴽⴰⵕⴹⴰ ⴰⴷ ⵖ ⵓⵣⵎⵎⴻⵎ ⵏ ⵓⵎⵍⴰⵏ ⵢⴰⴹⵏⵉⵏ ⵙ ⵓⵙⵜⴰⵢ ⵏ ⴱⴰⴱ ⵏⵏⵙ ⵖ ⵉⵍⵍⴰ ⵡⴰⵏⵙⴰ ⴰⵍⵉⴽⵟⵕⵓⵏⵉ ⴷ ⵓⵟⵟⵓⵏ ⵏ ⵜⵜⵉⵍⵉⴼⵓⵏ ⴷ ⵉⵙⵎ ⵏ ⵓⴼⴳⴰⵏ ⵍⵍⵉ ⵔⴰⴷ ⴷ ⵢⵉⵍⵉ ⵓⵏⵢⴰⵍⴽⴰⵎ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ”, ⵉⵎⵍⵉ ⴷ ⵎⴰⵙ ⵔⴰⴷ ⵜⵙⵓⵔⴼ ⵖ ⵜⵉⴽⴽⵉ ⵏ ⵉⵙⵍⴽⵉⵏⵏ ⵏ ⵜⵍⴰⵍⵉⵜ ⴷ ⵓⵣⴷⴷⵓⵖ ⴷ ⵜⵓⴷⵔⵜ ⴷ ⵜⵏⴰⵎⵓⵔⵉⵜ.
ⵜⵓⵎⴰ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵢⴰⵜ ⵜⴷⵖⴰⵔⵜ ⵓⵔ ⵉⴼⴰⵡⵏ ⵖ ⵜⵍⵍⴰ ⵢⴰⵜ ⵜⵎⴰⵜⴰⵔⵜ, ⴷ ⵢⴰⵜ ⵜⵙⴳⴰ ⵉⵜⵜⵓⵖⵔⴰⵏ ⵙ ⵜⵖⴰⵔⴰⵙⵜ ⵜⴰⵎⵉⴽⴰⵏⵉⴽⵜ ⵖ ⵓⵔ ⵍⵍⵉⵏⵜ ⴽⵔⴰ ⵏ ⵜⵎⵉⵜⴰⵔ, ⵜⵜⵎⴽⵏ ⵜⵖⵔⵉ ⵏⵏⵙ ⵙ ⵉⵎⴰⵙⵙⵏ ⴷ ⵢⵓⵙⴰⵏ, ⵍⵍⴰⵏ ⴳⵉⵙ ⵉⵙⵍⴽⵉⵏⵏ ⵉⵎⵓⵟⵟⵓⵏⵏ ⵏ ⵜⵏⴼⵔⵓⵜ ⵍⵍⵉ ⴷ ⵜⵙⴼⴼⵓⵖ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴳⴰⵏ ⵓⵎⵍⴰⵏ ⵉⵍⵉⴽⵟⵕⵓⵏⵉⵢⵏ ⵖ ⵍⵍⴰⵏ ⴽⵔⴰ ⵏ ⵜⵎⵉⵜⴰⵔ ⵣⴷⵉⵏⵉⵏ ⴷ ⵜⴽⴰⵕⴹⴰ ⴷ ⴱⴰⴱ ⵏⵏⵙ.
ⵉⵍⵍⴰ ⵖ ⵓⵙⵏⴼⴰⵔ ⵏ ⵓⵙⵍⴳⵏ ⵎⴰⵙ ⴷ ⵉⵎⵙⵖⴰⵏⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵉⵎⵏⵜⴰⵢⵏ ⴷ ⵉⵎⵙⵖⴰⵏⵏ ⵏ ⵜⴳⵔⴰⵡⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵓⵙⵍⵉⴳⵉⵏ ⵎⵓ ⵜⵙⵓⵔⴼ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴰⴷ ⵢⵓⴼⴰⵏ ⴰⴷ ⵙⵎⵔⵙⵏ ⵓⵎⵍⴰⵏ ⴷ ⵓⵙⴷⵓⵙ ⵏ ⵜⵎⴰⴳⵉⵜ. ⵉⵖ ⵉⵍⵍⴰ ⵓⵙⵡⵓⵔⵉ ⵙ ⵓⵙⵍⴳⵏ ⴰⵎⴰⵢⵏⵓ ⵉⵥⵍⵉⵏ ⵙ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵜⴰⵍⵉⴽⵟⵕⵓⵏⵉⵜ, ⵜⵉⴽⴰⵕⴹⵉⵡⵉⵏ ⵍⵍⵉ ⴷ ⴼⴼⵖⵏⵉⵏ ⴷⴰⵜ ⵏ ⵓⵙⵍⴳⵏ ⴰⴷ, ⵉⵖⴰⵎⴰ ⵙⵓⵍ ⵓⵙⵎⵔⵙ ⵏⵏⵙⵏⵜ ⴰⵔ ⴷ ⵙⵎⴷⵏⵜ, ⵏⵖ ⵉⵖ ⵉⵍⵍⴰ ⵓⵙⵏⴼⵍ ⵏ ⴽⵔⴰ ⵏ ⵓⵎⵍⴰⵏ ⵏⵏⵙⵏⵜ.