ⴰⵙⵎⴰⴷ ⵏ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵔⵙⵍⴰⵏⵜ ⵍⵎⵖⵔⵉⴱ-ⵜⴰⵎⵓⵏⵜ ⵏ ⵓⵕⵓⴱⴱⴰ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴷ ⵎⴰⵙⵙⴰ Yaël Braun-Pivet

ⵉⵙⵙⵉⵅⴼ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙⴰ Yaël Braun-Pivet ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵕⴰⵏⵚⴰ, ⴰⵙⵉⵎⵡⴰⵙ 13 ⴷⵓⵊⴰⵏⴱⵉⵔ 2024 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵕⵕⴱⴰⵟ, ⵜⴰⴼⵓⴳⵍⴰ ⵏ ⵓⵙⵎⴰⴷ ⵏ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵍⵎⵖⵔⵉⴱ-ⵜⴰⵎⵓⵏⵜ ⵏ ⵓⵕⵓⴱⴱⴰ (29 ⵉⴱⵔⵉⵔ 2022-28 ⴷⵓⵊⴰⵏⴱⵉⵔ 2024) ⵍⵍⵉ ⵜⵙⵙⵥⵕⴼ ⵜⴰⵎⵓⵏⵜ ⵏ ⵓⵕⵓⴱⴱⴰ ⵙ ⵜⴷⵔⴰⵡⵜ ⵏ ⵜⵎⵙⵍⵓⵏⵜ ⵜⴰⵏⴰⵎⵓⵔⵜ ⵏ ⴼⵕⴰⵏⵚⴰ (ⴰⵎⴷⵔⴰⵡ ⴰⵙⵉⵍⴰⵏ), ⴷ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵜⵜⵛⵉⴽⴽ ⴷ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⴱⵉⵍⵊⵉⴽⴽ (ⵉⵎⴷⵔⴰⵡⵏ ⵉⵙⵉⵏⴰⵏⵏ) ⴷ ⵓⵙⵏⴰⵍ ⵏ ⵉⴱⵕⵍⴰⵎⴰⵏⵏ ⵏ ⵉⵟⴰⵍⵢⴰ ⴷ ⵍⵢⵓⵏⴰⵏ ⴷ ⵀⴰⵏⵖⴰⵔⵢⴰ ⴷ ⵍⴱⵓⵔⵜⵓⵖⴰⵍ. 

ⴳ ⵜⴳⵓⵔⵉ ⵏⵏⵙ, ⵉⵙⵏⵉⵎⵎⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵎⵓⵏⵜ ⵏ ⵓⵕⵓⴱⴱⴰ ⵍⵍⵉ ⵉⵙⵙⵥⵕⴼⵏ ⴰⵙⵏⴼⴰⵔ ⵉ ⵓⵙⵏⴰⵍ ⵏ ⵜⴷⵉⵎⵓⵇⵔⴰⵟⵉⵜ, ⵜⴰⵎⴰⵜⴰⵔⵜ ⵏ ⵜⵎⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵙⵎⵓⵏⵏ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴰⵎⵓⵏⵜ ⵏ ⵓⵕⵓⴱⴱⴰ. 

ⵉⵙⴷⴷⵉⴷ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵉⵍⵍⴰ ⵓⵙⵏⴼⴰⵔ ⴼ ⵜⵎⵙⴰⵔⵉⵏ ⵏⵓⵙⴷⵓⵙ ⵏ ⵜⵏⵏⵓⴱⴹⴰ ⵜⴰⴱⵕⵍⴰⵎⴰⵏⵉⵜ, ⵉⵡⴰⵜⵜⵙ ⴰⴼⴰⵔⵙ ⵏ ⵉⵎⴰⵏⴰⵔⴰⵏ ⴷ ⵓⵙⴼⵙⵉ ⵏ ⵜⵎⵙⴽⴰⵔ ⴳ ⵜⴰⵎⵜ ⵜⵎⵔⵙⴰⵍ, ⵢⵉⵏⵉ ⵎⴰⵙ ⵢⵉⵡⵙ ⵓⵙⵏⴼⴰⵔ ⴰⴷ ⴳ ⵓⵙⵎⴽⵍ ⵏ ⵜⵎⵓⴽⵔⵉⵙⵉⵏ ⵍⵍ ⵙⵔⵙⵏⵜ ⵜⴻⵜⴳⴰⵔⵉⵏ ⵏ ⵜⴳⵯⵎⴰⵜ ⵙ ⵜⵎⵢⴰⴷⴰⵙⵜ ⵏ ⵓⵎⵣⴰⵣⴰⵍ, ⴷ ⵓⵙⴽⵯⵜⵉ ⵏ ⵜⵎⵙⴽⵔⵜ ⵉⵥⵍⵉⵏ ⴷ ⴽⵔⴰⵢⴳⴰⵜ ⵜⴰⵎⴰⵣⵉⵔⵜ.  

ⵉⴱⴷⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵥⵍⴰⵢⵉⵏ ⵜⵉⵎⴰⵢⵏⵓⵜⵉⵏ ⴳ ⵜⵎⵙⴽⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⴰⵎ ⴰⵙⵓⵜⴳ ⵏ ⵜⵎⵙⴽⴰⵔ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵙⵏⵙⵉ ⵏ ⵉⵙⵍⴳⵏⵏ ⴷ ⵜⵖⵔⵉ ⵏ ⵉⴷⵔⵉⵣⵏ ⴷ ⵢⵉⵙⴽⵉⵍ ⵊⴰⵔ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⴳ ⵜⵎⵔⵙⴰⵍ ⵜⵜⴰⵡⵙⵜⴰⵢⵏⵉⵏ ⴷ ⵓⵙⵏⴼⵍ ⵏ ⵜⵎⵓⵣⴰⵢⵉⵏ, ⴷ ⵓⵙⵙⵏ ⵏ ⵜⵎⵙⴽⴰⵔ ⴼ ⵜⵉⵍⵉⵜ ⵏ ⵜⵎⵖⴰⵔⵉⵏ ⴳ ⵡⴰⵎⵎⴰⵙⵏ ⵏ ⵜⵖⵜⴰⵙⵜ. 

ⵢⵉⵏⵉ ⵎⴰⵙⵙ ⵟⴰⵍⴱⵉ ⵍⵄⴰⵍⴰⵎⵉ ⵎⴰⵙ ⵔⴰⴷ ⵢⴰⵡⵙ ⵓⵙⵇⵇⵉⵎ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵉⵙⵏⴼⴰⵔⵏ ⵏ ⵓⴷⵔⴰⵡ ⴷ ⵓⵙⵉⴳⴳⵍ ⵏ ⵉⵎⵏⴰⴷⵏ ⵉⵎⴰⵢⵓⵜⵏ ⵉ ⵜⵎⴷⵔⴰⵡⵜ ⵜⴰⴱⵕⵍⴰⵎⴰⵏⵉⵜ ⵉⴱⴷⴷⵏ ⴼ ⵜⵎⵙⴰⵔⵉⵏ ⵜⵉⵎⴰⵢⵏⵓⵜⵉⵏ ⵉ ⵓⴹⴼⵕ ⵏ ⵜⵉⵍⴰⵍ ⵏ ⵉⴱⵕⵍⴰⵎⴰⵏⵏ ⵎⵏⵉⴷ ⵏ ⵜⵏⴰⵥⴰⵕⵉⵏ ⵏ ⵜⵎⵉⵣⴰⵔ ⵏⵏⵖ ⴷ ⵓⵎⴰⴹⴰⵍ ⴰⴽⴽⵯ. 

ⵜⵙⴷⴷⵉⴷ ⵎⴰⵙⵙⴰ Yaël Braun-Pivet ⵜⴰⵏⵙⵙⵉⵅⴼⵜ ⵏ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⴼⵕⴰⵏⵚⴰ ⴼ ⵜⴷⵓⵙⵉ ⵏ ⵜⵣⴷⴰⵢⵉⵏ ⵊⴰⵔ ⴼⵕⴰⵏⵚⴰ ⴷ ⵍⵎⵖⵔⵉⴱ, ⵍⵍⵉ ⵉⵍⵍⴰⵏ ⴳ ⵓⵙⵡⵉⵔ ⴰⵎⴰⵢⵏⵓ ⵙ “ⵜⴷⵔⴰⵡⵜ ⵉⵥⵍⵉⵏ ⵉⴷⵓⵙⵏ”, ⵍⵍⵉ ⵉⵣⵎⵎⵉⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⵓⵏⵙⵙⵉⵅⴼ ⵏ ⴼⵕⴰⵏⵚⴰ ⵎⴰⵙⵙ ⵉⵎⴰⵏⵡⵉⵍ ⵎⴰⴽⵕⵓⵏ. 

ⵜⵙⵎⴰⵢⵏⵓ ⵓⵍⴰ ⴰⴷⴷⴰⴷ ⵏ ⴼⵕⴰⵏⵚⴰ ⵍⵍⵉⵖ ⵜⵏⵏⴰ ⵎⴰⵙ ⴷ ⵜⵉⵍⵉⵜ ⴷ ⵉⵎⴰⵍ ⵏ ⵚⵚⵃⵕⴰ ⵍⵍⴰⵏ ⴳ ⵓⵙⴰⵜⵉ ⵏ ⵜⵅⵅⵓⵜⵔⴰ ⵏ ⵍⵎⵖⵔⵉⴱ, ⴷ ⵎⴰⵙ ⵔⴰⴷ ⵜⵙⴽⵔ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵜⵉⵍⴰⵍⵜ ⵏⵏⵙ ⴳ ⵓⵙⵏⴰⵍ ⵏ ⵜⴳⵎⵉ ⴳ ⵜⵙⴳⴰ ⴰⴽⴷ ⵉⴷ ⴱⴰⴱ ⵏ ⵜⵡⵓⵔⵉ ⴷ ⵜⵎⵙⵙⵓⵔⵉⵏ ⵏ ⴼⵕⴰⵏⵚⴰ. 

ⵉⵙⵎⴰⵢⵏⵓ ⵎⴰⵙⵙ Daniele Dotto ⴰⵎⴰⵔⵉ  ⵏ ⵜⵎⵙⵇⵇⴰⴷⵜ ⵏ ⵜⴰⵎⵓⵏⵜ ⵏ ⵓⵕⵓⴱⴱⴰ ⴳ ⵍⵎⵖⵔⵉⴱ ⴰⵍⵜⴰⵅ ⵏ ⵜⴰⵎⵓⵏⵜ ⴳ ⵜⵎⴷⵔⴰⵡⵜ ⵜⴰⴱⵕⵍⴰⵎⴰⵏⵉⵜ, ⵉⴱⴷⴷ ⴼ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⴳ ⵓⵙⴽⵔ ⵏ ⵢⵉⵙⴽⵉⵍ ⴷ ⵓⵣⵓⵣⵣⵔ ⵏ ⵜⴷⵉⵎⵓⵇⵔⴰⵟⵉⵜ, ⵉⵙⴰⵡⵍ ⴼ ⵜⵣⴷⴰⵢⵉⵏ ⴷⵔⴰⵏⵉⵏ ⵊⴰⵔ ⵜⴰⵎⵓⵏⵜ ⵏ ⵓⵕⵓⴱⴱⴰ ⴷ ⵍⵎⵖⵔⵉⴱ ⵉ ⵓⴳⴳⴰⵔ ⵏ 40 ⵏ ⵓⵙⴳⴳⵯⴰⵙ, ⵉⵖⵔ ⵉ ⵜⵡⵓⵔⵉ ⵉ ⵓⵙⴽⵔ ⵏ ⵜⵎⴷⵔⴰⵡⵉⵏ ⵜⵉⵎⴰⵢⵏⵓⵜⵉⵏ ⵉ ⵓⵙⵙⵕⵚⵓ ⵏ ⴽⵉⴳⴰⵏ ⵏ ⵜⵣⵣⵉⴳⵣⵜ. 

ⵜⵙⴷⴷⵉⴷ ⵎⴰⵙⵙⴰ Els Van Hoof   ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⴱⵉⵍⵊⵉⴽ ⵎⴰⵙ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵕⵕⴰ ⵉⵡⵜⵜⴰⵙⵏ ⵏ ⵓⵙⵏⴼⴰⵔ, ⴷ ⵎⴰⵙ ⵉⴱⵉⴷⴷ ⵓⵎⵢⴰⵡⴰⵙ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴳ ⵙⵏⴰⵜ ⵜⵎⵉⵣⴰⵔ ⴼ ⵜⵎⵢⴰⴷⴰⵙⵜ ⵏ ⵜⵎⴷⵔⴰⵡⵜ ⵉ ⵓⵙⵓⵜⴳ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⴷ ⵜⵡⵉⵙⵉ ⴳ ⵜⵉⵔⵔⴰ ⵏ ⵓⵙⵍⴳⵏ ⵏ ⵜⵖⴰⵔⵉⵡⵉⵏ ⴷ ⵓⵙⵖⵏⵓ ⵏ ⵓⴷⵎ ⴰⴷⵍⵙⴰⵏ ⴷ ⵓⵙⵏⵉⵍⵙ ⴷ ⵓⵙⵏⴰⵍ ⵏ ⵜⵎⴷⵔⴰⵡⵜ ⵏ ⵜⵎⵖⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⴽⵔ ⵏ ⵜⵖⵜⴰⵙⵜ. 

ⵜⵙⴰⵡⵍ ⵎⴰⵙⵙⴰ Hajnalka Juhász  ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴳ ⵜⵎⵙⵎⵓⵏⵜ ⵜⴰⵏⴰⵎⵓⵔⵜ ⵏ ⵀⴰⵏⵖⴰⵔⵢⴰ ⴼ ⵓⵙⵓⵜⴳ ⵏⵏⵙ ⵏ ⵜⵉⵍⴰⵍⵜ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵙⴰⵜⵉ ⵏ ⵜⴳⵯⵎⴰⵜ ⴰⴷ, ⵜⵙⴷⴷⵉⴷ ⴼ ⵜⴷⵓⵙⵉ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⴷ ⵜⴷⵉⴱⵍⵓⵎⴰⵙⵉⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴳ ⵓⵙⴰⵜⵉ ⵏ ⵡⴰⵜⵉⴳⵏ ⵏ ⵓⵡⴰⵇⵇⵕ ⵉⵜⵜⵓⵙⵏⴼⴰⵍⵏ ⴷ ⵓⵎⵢⴰⵡⴰⵙ ⵉⵛⵛⴰⵔⵏ. 

ⵜⵙⵓⵜⴳ ⵎⴰⵙⵙⴰ Maria Chatzioannidou ⵜⴰⴳⵎⴰⵎⵜ ⵏ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ ⵏ ⵢⵉⵙⴽⵉⵍ ⴷ ⵉⵄⵔⵔⵉⵎⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⴱⵕⵍⴰⵎⴰⵏ ⵏ ⵍⵢⵓⵏⴰⵏ ⵜⵉⵣⴷⴰⵢⵉⵏ ⴷⵔⴰⵏⵉⵏ ⴷ ⵍⵎⵖⵔⵉⴱ ⴳ ⵓⵙⴰⵜⵉ ⵏ ⵡⴰⵜⵉⴳⵏ ⵛⵛⴰⵔⵏⵉⵏ ⴳ ⵉⵙⵡⵉⵔⵏ ⴰⴷⵍⵙⴰⵏ ⴷ ⵓⵎⵣⵔⴰⵢ, ⵜⵙⴷⴷⵉⴷ ⴰⵍⵜⴰⵖ ⵏ ⵓⴱⵕⵍⴰⵎⴰⵏ ⵏ ⵍⵢⵓⵏⴰⵏ ⴳ ⵓⵙⵎⵏⵉⴷ ⵏ ⵜⵎⵓⵣⴰⵢⵉⵏ ⴷ ⵓⵎⵢⴰⵡⴰ ⴰⴽⴷ ⴰⵙⵇⵇⵉⵎ ⵏ ⵉⵎⵓⵔⴰ ⴰⵎⵖⵔⵉⴱⵉ. 

ⵜⵙⵓⵜⴳ ⵎⴰⵙⵙⴰ Elza Pais ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⵢⵢⴰⵡⵜ ⵉ ⵢⵉⵙⴽⵉⵍ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⴳ ⵓⴱⵕⵍⴰⵎⴰⵏ ⵏ ⵍⴱⵓⵔⵜⵓⵖⴰⴽ ⵜⵉⵢⵢⴰⴼⵓⵜⵉⵏ ⵜⵜⴰⵡⵙⴽⴰⵔⵏⵉⵏ ⴳ ⵙⵎⵎⵓⵙ ⵉⵙⴳⴳⵯⴰⵙⵏ ⴳⴳⵓⵔⴰⵏⵉⵏ, ⴷ ⵜⵣⴷⴰⵢⵉⵏ ⵊⴰⵔⵏ ⵉⵡⴰⵏⴽⵏ ⵍⵍⴰⵏⵉⵏ ⴳ ⵓⵙⵏⴼⴰⵔ ⵏ ⵜⴳⵯⵎⴰⵜ, ⵜⵙⵎⵏⵉⴷ ⵜⵉⵔⵎⵉⵜ ⵏ ⵎⴱⵓⵔⵜⵓⵖⴰⵍ ⴳ ⵢⵉⴳⵔ ⵏ ⵉⵣⵔⴼⴰⵏ ⵏ ⵜⵎⵖⴰⵔⵜ ⴷ ⵓⵙⴽⵔ ⵏ ⵡⴰⵎⵓⵏ ⵏ ⵢⵉⵙⴽⵉⵍ. 

ⵉⵙⵓⵜⴳ ⵎⴰⵙⵙ Ladislav Skerik ⴰⵎⵙⵇⵇⴰⴷ ⵏ ⵜⵜⵛⵉⴽⴽ ⴳ ⵕⵕⴱⴰⵟ ⴰⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵍⵍⵉ ⵉⴳⴰⵏ ⴰⴱⵓⵔⵣ ⵏ ⵜⴳⴷⵓⴷⴰⵏⵜ ⵏ ⵜⵜⵛⵉⴽⴽ, ⵖ ⵍⵍⴰⵏⵜ ⵜⵣⴷⴰⵢⵉⵏ ⵏ ⵜⵙⵉⵏⴰⵔⵏⵜ ⵉⴷⵓⵙⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵙⴰⵡⵍ ⴼ ⵡⴰⵜⵉⴳ ⵏ ⵓⵙⵏⴼⴰⵔ ⴰⴷ ⴳ ⵜⵉⵍⵉⵜ ⵏ ⵜⵉⵕⵡⵉ ⴷ ⵜⵣⵣⵓⵍⴰⵏⵜⴳ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ, ⵉⵖⵔ ⵉ ⵜⵣⵣⵉⴳⵣⵜ ⵏ ⵜⵡⵓⵔⵉ ⵉⵛⵛⴰⵔⵏ ⵉ ⵓⵙⴷⵓⵙ ⵏ ⵜⵣⴷⴰⵢⵉⵏ ⵏ ⵓⵎⵢⴰⵡⴰⵙ. 

ⵃⴰⴹⵕⵏ ⴳ ⵜⵉⵏⵏⴰⵡⵜ ⵏ ⵓⵙⵎⴰⴷ ⵏ ⵓⵙⵏⴼⴰⵔ ⵏ ⵜⴳⵯⵎⴰⵜ ⵜⴰⵎⵔⵙⵍⴰⵏⵜ ⵍⵎⵖⵔⵉⴱ-ⵜⴰⵎⵓⵏⵜ ⵏ ⵓⵕⵓⴱⴱⴰ, ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ.