ⴰⵣⵉⵔⴱⵉⵊⴰⵏ: ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⴳ ⵓⴳⵔⴰⵡ ⵏ ⵜⵎⵜⵜⴰ ⵎⵓⵏⵏⵉⵏ (COP 29)
ⵜⴷⵔⵓ ⵎⴰⵙⵙⴰ ⵍⴰⵢⵍⴰ ⴷⴰⵀ ⵙⴳ ⵜⵔⴰⴱⴱⵓⵜ ⵏ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ ⴷ ⵎⴰⵙⵙ ⵅⴰⴷⵉⵊⴰ ⴰⵕⵓⵀⴰⵍ ⵙⴳ ⵜⵔⴰⴱⴱⵓⵜ ⵏ ⵜⴳⵎⵉ ⴷ ⵜⵙⵔⵎⵓⵏⵜ ⴳ ⵓⴳⵔⴰⵡ ⵏ ⵜⵎⵜⵜⴰ ⵎⵓⵏⵏⵉⵏ (COP 29) ⴳ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵉⵍⵍⴰⵏ ⵊⴰⵔ 11 ⴷ 22 ⵏⵓⵡⴰⵏⴱⵉⵔ ⴳ ⴱⴰⴽⵓ ⴳ ⴰⵣⵉⵔⴱⵉⵊⴰⵏ.
ⵉⵙⵏⵎⴰⵍⴰ ⵓⴽⴰⴱⴰⵕ ⵏ ⵓⴱⵕⵍⴰⵎⴰⵏ ⴰⴼⵔⵉⵇⵉ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙ ⴼⵓⵔⵜⵛⵉⵏ ⵛⴰⵔⵓⵎⴱⵉⵔⴰ, ⴰⵎⵓⵙⵙⵓ ⵉⵙⵜⴰⵡⵀⵎⵎⴰⵏ ⴼ : “ⴰⵙⴷⵓⵙ ⵏ ⵜⵙⵓⴳⵔⵜ ⵏ ⵉⴼⵔⵉⵇⵢⴰ ⵉ ⵓⵎⵙⴰⵙⴰ ⴷ ⵉⵙⵏⴼⵍⵏ ⵏ ⵓⵏⵣⵡⵉ: ⴰⵙⵏⴰⵍ ⵏ ⵜⵙⵜⵔⴰⵜⵉⵊⵉⵢⵉⵏ ⵏ ⵓⵎⵙⴰⵙⴰ ⴷ ⵓⵙⴼⵍⵙ ⵏ ⵜⵣⵔⴼⵜ ⵏ ⵓⵏⵣⵡⵉ”, ⵎⵓⵏⵏ ⴳⵉⵙ ⵉⴱⵕⵍⴰⵎⴰⵏⵉⵢⵏ ⵉⴼⵔⵉⵇⵉⵢⵏ ⵉⵎⵏⵙⵜⴰⵢⵏ ⵙ ⵜⵎⵓⴽⵔⵉⵙⵏ ⵏ ⵓⵏⵣⵡⵉ ⵖⵎⴽ ⴰⵏⵏ ⴷ ⵉⵎⵙⵜⴳⴳⴰⵔⵏ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⵉ ⵓⵙⵎⴽⵍ ⵏ ⵜⵏⴰⵥⴰⵕⵉⵏ ⴷⴰⵜ ⵏ ⵉⴼⵔⵉⵇⵢⴰ ⴳ ⵓⵎⵙⴰⵙⴰ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵓⵙⴷⵓⵙ ⵏ ⵉⵎⵏⵣⴰⵢⵏ ⵏ ⵜⵣⵔⴼⵜ ⵏ ⵓⵏⵣⵡⵉ.
ⵖⵎⴽ ⵍⵍⵉ ⵉⵔⵣⴼ ⵎⴰⵙⵙ ⴼⵓⵔⵜⵛⵉⵏ ⵛⴰⵔⵓⵎⴱⵉⵔⴰ, ⴰⴽⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⴰⵙⴼⵙⵔ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖ ⵉⵎⵏⴰⵇⵇⴰⵔ ⴰⴽⴷ ⵉⴱⵕⵍⴰⵎⴰⵏⵉⵢⵏ ⵉⵎⵖⵔⵉⴱⵉⵢⵏ, ⵉⵙⴰⵡⵍ ⴼ ⵡⴰⵜⵉⴳ ⵏ ⵜⵉⵔⵎⵉⵜ ⵜⴰⵖⵔⵉⴱⵉⵜ ⵉⵣⵡⴰⵔⵏ ⴳ ⵓⵎⵏⵉⴷ ⵏ ⵓⵙⵡⵓⴷⴷⵓ ⵏ ⵜⵎⵓⴽⵔⵉⵙⵜ ⵏ ⵓⵏⵣⵡⵉ ⴷ ⵜⴳⵎⵉ ⵜⴰⵙⵓⵍⴰⵏⵜ, ⵉⵙⴷⴷⵉⴷ ⵎⴰⵙ ⵉⴳⴰ ⵍⵎⵖⵔⵉⴱ ⴰⵏⴰⵡ ⴳ ⵉⴳⵔⴰⵏ ⴰⴷ ⵉ ⵎⴰⵕⵕⴰ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.
ⴳ ⵜⵓⵏⵖⵉⵍⵜ ⵏⵏⵙ ⵜⵉⵙ 29, ⵉⵙⵎⵓⵏ ⵓⴳⵔⴰⵡ ⵉⵅⴰⵜⴰⵔⵏ ⵏ ⵜⵏⴱⴰⴹⵉⵏ ⴷ ⵢⵉⴳⵔ ⵏ ⵜⵡⵓⵔⵉⵡⵉⵏ ⴷ ⵡⴰⵎⵓⵏ ⴰⵖⵔⵎⴰⵏ ⵉ ⵜⵡⴰⴼⵉⵜ ⵏ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵜ ⵏ ⵓⵙⵏⴼⵍ ⵏ ⵓⵏⵣⵡⵉ, ⴷ ⵎⴰⴷ ⵉⵥⵍⵉⵏ ⵙ ⵓⵙⵙⵥⵕⴼ ⵉ ⵜⵡⵉⵙⵉ ⵏ ⵜⵎⵉⵣⴰⵔ ⵍⵍⴰⵏⵉⵏ ⴳ ⵓⴱⵔⵉⴷ ⵏ ⵜⴳⵎⵉ ⵉ ⵓⵙⵡⵓⵜⵜⵓ ⵏ ⵜⵎⵓⴽⵔⵉⵙⵉⵏ ⵏ ⵉⴳⴰⵣⵏ ⴷ ⵜⵔⵖⵉ ⵏ ⵡⴰⴽⴰⵍ ⴷ ⵓⴼⵔⴰⴳ ⵏ ⵉⵎⴰⵏⵏ ⴷ ⵜⵓⴷⵔⵜ ⵙⴳ ⴳⴰⵔ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ.
ⵉⴳⴰ ⵓⴳⵔⴰⵡ ⵓⵍⴰ ⵜⴰⵎⵍⴷⴰ ⵏ ⵓⵙⵎⵏⵉⴷ ⵏ ⵜⵎⵉⵣⴰⵔ ⵏ ⵉⵖⴰⵡⴰⵙⵏ ⵏⵏⵙⵏⵜ ⵅⴼ ⵓⵏⵣⵡⵉ ⵙ ⵓⵎⵙⴰⵙ ⴷ ⵓⵎⵇⵇⵏ ⵏ ⴱⴰⵔⵉⵣ ⵏ 2015, ⵃⵎⴰ ⴰⴷ ⵢⵉⵍⵉ ⵓⵙⵡⵓⵜⵜ ⵏ ⵜⵎⵓⴽⵔⵉⵙⵜ ⵏ ⵜⵔⵖⵉ ⴳ ⵓⵎⴰⴹⴰⵍ ⵉ ⵎⴰⴷ ⵉⴷⵔⵓⵙⵏ ⴳ 1.5 ⵏ ⵜⵙⴽⵯⴼⵍⵜ ⴳ ⵜⵎⵉⴹⵉ, ⵉⵖⴰⵡⴰⵙⵏ ⵏ ⵓⵙⵙⴰⵔⵓ ⵉ ⵓⵙⵎⵖⵔ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ.