ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ ⵙ ⵜⵓⴳⵜ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵉⵏⴰⵙ 16 ⵢⵓⵍⵢⵓⵣ 2024 ⵙ ⵜⵓⴳⵜ, ⵜⴰⵙⵓⵎⵔⵜ ⵏ ⵓⵙⵏⴼ ⵏ ⵓⵏⴳⵔⴰⵡ ⵏⵏⵙ ⴰⴳⵯⵏⵙⴰⵏ, ⴳ ⵜⵖⵉⵎⵉⵜ ⵉⵙⵙⵉⵅⴼ ⵎⴰⵙⵙ ⴰⵏⵙⵙⵉⵅⴼ ⵕⴰⵛⵉⴷ ⵟⴰⵍⴱⵉ ⵍⵄⴰⵍⵎⵉ, ⴰⴳⵯⵉⵏⵜ ⵙⵏⴰⵜ ⵜⵎⵓⵔⴰ ⴰⵙⵜⴰⵢ.
ⵉⵍⵍⴰ ⵓⵙⵖⵣⵏ ⵏ ⵉⵙⵏⴼⵍⵏ ⵏ 27 ⵏ ⵓⵎⵏⵏⵉ ⴼ ⵜⴳⵯⵏⵙⴰⵙⵜ ⵏ ⵜⵓⵣⵍⵜ ⵜⴰⴱⵕⵍⴰⵎⴰⵏⵉⵜ ⴳ ⵜⵣⵣⵓⵍⵉⵏ ⵏ ⵓⵎⵙⵉⵟⵏ ⴷ ⵓⵏⴼⵍⵓⵙ ⵏ ⵓⵙⵇⵇⵉⵎ, ⴷ ⵓⵙⵎⵍ ⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵉⵏ ⵏ ⵓⵙⴳⴳⵯ,ⴷ ⵓⵙⴳⵉⴷⴷⵉ ⵏ ⵜⵎⵥⵍⴰⵢ ⵏ ⵜⵙⵇⵇⵉⵎⵉⵏ ⵜⵉⵙⵓⵍⴰⵏⵉⵏ ⵎⵏⵉⴷ ⵏ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ.
ⵍⵍⴰⵏ ⵉⵙⵏⴼⵍⵏ ⵏ ⵓⵍⵓⴳⵏ ⵏ ⵜⵖⵓⵔⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵎⴰⴷ ⵉⵥⵍⵉⵏ ⵙ ⵜⵙⵏⵙⵉ ⵏⵏⵙ ⴷ ⵓⵙⵙⵕⵚⵓ ⵏ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ ⵜⵜⴰⵡⵙⵜⴰⵢⵏⵉⵏ ⴷ ⵓⵙⵖⵓⴷⵓ ⵏ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ.
ⵢⵉⵡⵉ ⴷ ⵓⵙⵏⴼⵍ ⵏ ⵓⵏⴳⵔⴰⵡ ⴰⴷ ⵜⵉⵖⴰⵡⵙⵉⵡⵉⵏ ⵜⵉⵎⴰⵢⵏⵓⵜⵉⵏ ⴱⴷⴷⵏⵉⵏ ⴼ ⵜⴱⵔⴰⵜ ⵜⴰⴳⵍⴷⴰⵏⵜ ⵙ ⵜⵎⵍⴷⴰ ⵏ ⵓⴽⵜⵜⵓⵢ 60, ⵖ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ ⴼ ⵓⵙⵖⵓⴷⵓ ⵏ ⵜⵓⴷⵔⵜ ⵜⴰⴱⵕⵍⴰⵎⴰⵏⵉⵜ ⵙ ⵓⵙⵖⵣⵏ ⵏ ⵓⵍⵓⴳⵏ ⵏ ⵜⵖⴰⵔⵉⵡⵉⵏ ⴳ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵙ ⵙⵉⵏ ⵉⵙⵇⵇⵉⵎⵏ ⵏⵏⵙ, ⵉⴳⴰⵏ ⵓⵛⵛⵉⵍ ⵉⵙⴽⴰⵔⵏ ⴰⵎⵢⴰⵙ ⵊⴰⵔ ⵜⵎⵙⴽⵔⵜ ⵏ ⵜⴷⵉⵎⵓⵇⵔⴰⵟⵉⵜ ⵜⴰⴳⵯⵏⵙⴰⵙⵜ ⴷ ⵜⵎⴷⵔⴰⵡⵜ, ⵖⵎⵖ ⴰⵏⵏ ⵙ ⵓⵙⵍⵖⵔ ⵏ ⵓⵙⵖⵓⴷⵓ ⵏ ⵜⵓⴼⵔⵉⵏⵜ ⵜⴰⴱⵕⵍⴰⵎⴰⵏⵉⵜ.
ⵓⵎⴰⵏ ⵉⵙⵏⴼⵍⵏ ⵓⵍⴰ ⵜⵉⴽⴽⵉ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⴽⵓ ⵎⴰⴷ ⵉⵎⵎⵣⵔⵉⵏ ⴷ ⵜⵏⴳⵎⴰⵎⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵓⵙⵏⵖⵎⵙ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵜⴰⵔⵔⴰⴳⵉⵏ ⴷⴰ ⵜⵜⴰⵎⵥⵏ ⵙ ⵜⵎⵍⴷⴰ ⵏ ⵜⵙⵎⵉⴳⴰⵍ ⵜⵉⵎⴰⴷⴷⵓⴷⵉⵏ ⴷ ⵓⵙⵔⵙ ⵏⵏⵙⵏⵜ ⴳ ⵜⵙⵏⵏⵉⵖⵜ ⵏ ⵓⵙⵇⵇⵉⵎ.
ⵃⵎⴰ ⴰⴷ ⵢⵉⵍⵉ ⵓⵙⴼⵔⴽ ⵙ ⵓⵍⵓⴳⵏ ⵏ ⵜⵖⴰⵔⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ , ⵉⵎⵙⴰⵙⴰ ⵓⵙⵇⵇⵉⵎ ⴼ ⵓⵙⵓⵊⴷ ⵏ ⵓⵙⵉⵔⴰ ⵏⵏⵙ ⵏ ⵢⴰⵜ ⵜⵏⴼⵓⵍⵜ ⵅⴼ ⵜⴰⵙⴳⵓⵔⵉ ⵏ ⵡⴰⴷⴷⵓⵔ ⵏ ⴽⵓ ⴰⴳⵎⴰⵎ ⵍⵍⵉ ⵉⵜⵜⵣⵎⵎⵉⵎ ⴳ ⵜⵣⵡⵉⵔⵉ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵎⴰⵙ ⵉⵥⵕⴰ ⴰⵏⴳⵔⴰⵡ ⴰⴳⵯⵏⵙⴰⵏ ⵏ ⵓⵙⵇⵇⵉⵎ ⴳ ⵎⴰⴷ ⵉⵥⵍⵉⵏ ⵙ ⵜⵖⴰⵔⵉⵡⵉⵏ ⴰⴷ.
ⵢⵓⵎⴰ ⵓⵏⴳⵔⴰⵡ ⴰⴳⵯⵏⵙⴰⵏ ⴰⵎⴰⵢⵏⵓ 405 ⵏ ⵓⵎⵏⵏⵉ, 12 ⵏ ⵓⴳⵣⵣⵓⵎ, ⴼ ⵜⵓⵚⴽⴰ ⴷ ⵉⵏⴳⵎⴰⵎⵏ ⴷ ⵜⵥⵍⴰⵢⵉⵏ ⴷ ⵜⵙⵎⵉⴳⴰⵍ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵉⴳⵔⴰⵏ ⵏ ⵓⵣⵣⵔⴰⴼ ⴷ ⵜⵉⴹⴰⴼ ⴷ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ, ⴷ ⵓⵎⵢⴰⵡⴰⴹ ⴷ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⴷ ⵜⵣⴷⴰⵢⵜ ⵏ ⵓⵙⵇⵇⵉⵎ ⴰⴽⴷ ⵜⵉⵎⵔⵙⴰⵍ ⵜⵉⴷⵙⵜⴰⵔⵉⵏ ⴷ ⵓⵍⵓⴳⵏ ⵏ ⵜⵖⴰⵔⵉⵡⵉⵏ ⵜⵉⴱⵕⵍⴰⵎⴰⵏⵉⵢⵉⵏ.
