ⵙⵜⵔⴰⵙⴱⵓⵔⴳ: ⴰⵥⵎⴰⵥⵥⵍ ⴰⵎⴰⵢⵏⵓ ⴳ ⵓⵙⵔⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⴰⵎⴷⵔⴰⵡ ⵉ ⵜⴷⵉⵎⵓⵇⵔⴰⵟⵉⵜ ⴷⴰⵔ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ
ⵜⴷⵔⵓ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ ⵙⴳ ⴰⵢⵏⴰⵙ 24 ⵢⵓⵏⵢⵓ 2024 ⴳ ⵓⴳⵣⵣⵓⵎ ⵡⵉⵙ ⴽⵕⴰⴹ ⵏ ⵜⵙⵓⵜⵍⵜ ⵜⴰⵏⵎⵢⵓⵔⵜⵏ ⵓⵙⴳⴳⵯⴰⵙ ⵏ 2024 ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴳ ⵙⵜⵔⴰⵙⴱⵓⵔⴳ.
ⴷⵔⵓⵏ ⵉⴱⵕⵍⴰⵎⴰⵏⵉⵢⵏ ⵉⵎⵖⵔⵉⴱⵉⵢⵏ ⴳ ⵜⵖⵉⵎⵉⵜⵉⵏ ⵜⵉⵎⴰⵜⴰⵢⵉⵏ ⵏ ⵜⵙⵓⵜⵍⵜ, ⴷ ⵜⵡⵓⵔⵉⵡⵉⵏ ⵏ ⵎⴰⵕⵕⴰ ⵜⵉⵙⵇⵇⵉⵎⵉⵏ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵔⵓⴱⴱⴰ: ⵜⴰⵙⵇⵇⵉⵎⵜ ⵏ ⵜⵎⵙⴰⵔⵉⵏ ⵜⵉⵙⵔⵜⴰⵏⵉⵏ ⴷ ⵜⴷⵉⵎⵓⵇⵔⴰⵟⵉⵜ, ⵜⴰⵙⵇⵇⵉⵎⵜ ⵏ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⵜⴰⵣⵇⵇⵉⵎⵜ ⵏ ⵓⵣⵡⴰⴳ ⴷ ⵉⵎⵣⵡⴰⴳ, ⵜⴰⵙⵇⵇⵉⵎⵜ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵏⵉⵏ ⴷ ⵓⴷⵡⴰⵙ ⴷ ⵜⴳⵎⵉ ⵜⴰⵙⵓⵍⴰⵏⵜ, ⵜⴰⵙⵇⵇⵉⵎⵜ ⵏ ⵜⴷⵍⵙⴰ ⴷ ⵜⵎⴰⵙⵙⴰⵏⵉⵏ ⴷ ⵓⵙⴳⵎⵉ ⴷ ⵓⵙⵏⵛⵎⵙ, ⵜⴰⵙⵇⵇⵉⵎⵜ ⵏ ⵢⵉⵙⴽⵉⵍ ⴷ ⵓⵙⴱⴷⴷⵉ ⵏ ⵓⵙⵏⵓⵃⵢⵓ.
ⵉⵍⵍⴰ ⴳ ⵜⵙⵓⵜⵍⵜ ⴰⴷ ⵓⵙⵖⵣⵏ, ⴳ ⵜⵖⵉⵎⵉⵜ ⵜⴰⵎⴰⵜⴰⵢⵜ, ⵏ ⵓⵙⵏⴼⵍ ⵏ ⴽⵔⴰ ⵏ ⵉⵎⵏⵏⵉⵜⵏ ⵏ ⵓⵏⴳⵔⴰⵡ ⴰⴳⵯⵏⵙⴰⵏ ⵏ ⵜⵎⵙⵎⵓⵏⵜ. ⵜⴳⴰ ⵜⵖⵜⴰⵙⵜ ⴰⴷ ⵜⴰⴷ ⵉⵙⵜⴰⵡⵀⵎⵎⴰⵏ ⵉ ⵍⵎⵖⵔⵉⴱ ⵍⵍⵉ ⵉⴳⴰⵏ ⴰⵎⴷⵔⴰⵡ ⵉ ⵜⴷⵉⵎⵓⵇⵔⴰⵟⵉⵜ, ⴰⵛⴽⵓ ⵉⵍⵍⴰ ⵓⵙⴷⵓⵙ ⵏ ⵓⵙⵔⵙ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙⴳ 2011 ⵙ ⴽⵉⴳⴰⵏ ⵏ ⵜⵎⵥⵍⴰⵢ ⵍⵍⵉ ⵟⵟⴰⴼⵏ ⵉⵎⴷⵔⴰⵡⵏ, ⴰⵎ: ⴰⵣⵔⴼ ⵏ ⵜⴷⵔⴰⵡⵜ ⴳ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵜ ⵜⴰⵙⵓⵍⴰⵏⵜ, ⴰⵣⵔⴼ ⴳ ⵓⵙⵔⵙ ⵏ ⵜⵙⵓⵎⴰⵔ ⴷ ⵉⵙⵖⵍⴰⴼ ⵏⵖ ⵜⵉⵖⵜⴰⵙⵉⵏ, ⴰⵙⵔⵙ ⵏ ⵉⵙⵏⴼⵍⵏ, ⵎⴰⵛ ⴰⴷ ⵜⵜⵓⵣⵎⵎⵉⵎⵏⵜ ⵙ ⵜⵖⴰⵔⴰⵙⵜ ⵉⵛⵛⴰⵔⵏ ⵙⴳ ⵢⴰⵏ ⴳ ⵉⴳⵎⴰⵎⵏ ⵏ ⵜⵎⵙⵎⵓⵏⵜ. ⵎⴽ ⵍⵍⵉ ⴰⴽⴽⴰⵏⵜ ⵜⵓⵎⴰⵢⵉⵏ ⵜⵉⵎⴰⵢⵏⵓⵜⵉⵏ ⵏ ⵉⵎⴷⵔⴰⵡⵏ ⴰⵣⵔⴼ ⵏ ⵜⵓⵜⵔⴰ ⵏ ⵉⵎⴹⴰⴽⴰⵕⵏ ⵉⴷⵖⵢⴰⵏⵏ, ⴷ ⵓⵙⵎⵍ ⵉ ⵓⵏⵏⵓⵕⵣⵎ ⵏ ⵉⵎⴹⴰⴽⴰⵕⵏ, ⴷ ⵓⵙⵔⵙ ⵏ ⵉⵙⵉⵡⴹⵏ ⵜⵜⵢⵓⵔⴰⵏⵉⵏ, ⴷ ⵓⵣⵔⴼ ⴳ ⵜⵉⵍⵉⵜ ⵏ ⵜⵣⵣⵓⵍⵜ ⵏ ⵓⵎⵖⵜⴰⵙ ⴼ ⴽⵔⴰ ⵏ ⵜⵙⵎⵉⴳⴰⵍ ⵏ ⵓⵙⴰⴳⴳⵯ.
ⵙ ⵜⵖⵜⴰⵙⵜ ⴰⴷ, ⵉⵍⵍⴰ ⵓⵣⵔⴼ ⴷⴰⵔ ⵉⴳⵎⴰⵎⵏ ⵏ ⵉⴽⴰⴱⴰⵕⵏ ⵜⵉⴽⴽⵉ ⵏ ⵉⵙⵇⵙⵉⵜⵏ ⵉⵎⵉⵔⴰⵢⵏ ⵉ ⵓⵎⴰⵔⴰ ⴰⵎⴰⵜⴰⵢ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⵃⵎⴰ ⴰⴷ ⵉⵍⵉⵏⵜ ⵜⵎⵔⴰⵔⵓⵜⵉⵏ ⵜⵉⵎⵉⵡⴰⵢⵉⵏ.
ⵍⵍⵉⵖ ⵉⴳⴰ ⴰⵎⴷⵔⴰⵡ ⴰⵏⴰⵡ, ⵉⵣⵣⵉⴳⵣ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⵏ ⵍⵎⵖⵔⵉⴱ ⴳ ⵜⵣⴷⴰⵢⵜ ⵏⵏⵙ ⵜⴰⵎⵔⵙⵍⴰⵏⵜ ⴰⴽⴷ ⵜⴰⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ. ⵉⵍⵍⴰ ⵓⵙⵉⵙⵙⵏ ⵙ ⵜⵖⵜⴰⵙⵜ ⴰⴷ ⵙ ⵜⵓⴳⴳⴰⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵓⵎⵏⵉⴷ ⵏ ⵓⵙⵎⴰⵢⵏⵓ ⴰⴷⵉⵎⵓⵇⵔⴰⵟⵉ. ⵍⵍⵉⵖ ⵎⵙⴰⵙⴰⵏⵜ ⵜⵎⵥⵍⴰⵢⵉⵏ ⵜⵉⵎⴰⵢⵏⵓⵜⵉⵏ ⵎⵏⵉⴷ ⵏ ⵜⵓⵜⵔⴰⵡⵉⵏ ⵏ ⵍⵎⵖⵔⵉⴱ ⵃⵎⴰ ⴰⴷ ⵉⵟⵟⴼ ⴰⵙⵔⵙ ⴱⴰⵀⵔⴰ ⵉⵣⵣⵉⴳⵣⵏ ⴷⴰⵔ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ. .