ⵏⵢⵓⵢⵓⵔⴽ: ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵙⵓⵜⵍⵜ 68 ⵏ ⵜⵙⵇⵇⵉⵎⵜ ⵏ ⵓⵙⵔⵙ ⵏ ⵜⵎⵖⴰⵔⵜ ⵏ ⵜⵎⵜⵜⴰ ⵎⵓⵏⵏⵉⵏ

ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⵙⴳ ⵜⵔⴰⴱⴱⵓⵜ ⵏ ⵜⵡⵓⵔⵉ ⵏ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ, ⴳ ⵜⵙⵓⵜⵍⵜ 68 ⵏ ⵜⵙⵇⵇⵉⵎⵜ ⵏ ⵓⵙⵔⵙ ⵏ ⵜⵎⵖⴰⵔⵜ ⵉⴹⴼⵕⵏ ⵜⵉⵎⵜⵜⴰ ⵎⵓⵏⵏⵉⵏ, ⵏⴳⵔ 11 ⴰⵔ 22 ⵎⴰⵕⵙ 2024 ⴳ ⵏⵢⵓⵢⵓⵔⴽ.

ⵢⵓⵎⴰ ⵓⴽⴰⴱⴰⵕ ⵎⴰⵙⵙⴰ ⵍⴰⵟⵉⴼⴰ ⵛⵛⵔⵉⴼ, ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ-ⵜⵓⵣⵍⵜ ⵏ ⵍⵉⵜⵜⵉⵃⴰⴷ, ⵎⴰⵙⵙⴰ ⴼⴰⵟⵉⵎⴰ ⵅⵉⵔ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙⴰ ⵙⴰⵎⵉⵔⴰ ⵃⵉⵊⴰⵣⵉ ⵙⴳ ⵜⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⵎⴰⵙⵙⴰ ⵄⴰⵣⵉⵣⴰ ⴱⵓⵊⵔⵉⴷⴰ ⵙⴳ ⵜⵔⴰⴱⴱⵓⵜ ⵜⴰⵃⴰⵔⴰⴽⵉⵜ, ⴷ ⵎⴰⵙⵙⴰ ⵅⴰⴷⵉⵊⴰ ⵓⵍⴱⴰⵛⴰ ⵙⴳ ⵜⵔⴰⴱⴱⵓⵜ ⵜⴰⴷⵙⵜⴰⵔⵜ ⵜⴰⴷⵉⵎⵓⵇⵔⴰⵟⵉⵜ ⵜⴰⵏⴰⵎⵓⵏⵜ, ⴷ ⵎⴰⵙⵙⴰ ⵜⵓⵔⵉⵢⵢⴰ ⵄⴰⴼⵉⴼ ⵙⴳ ⵜⵣⵔⴼⵜ ⴷ ⵜⴳⵎⵉ.

ⵜⵥⵍⵉ ⵜⵖⵉⵎⵉⵜ ⵜⴰⵎⵙⵡⴰⵔⵓⵜ ⵏ ⵓⵎⵓⵙⵙⵓ ⴰⴷ ⵙ ⵉⵎⵉⵥ ⵏ ⵜⵔⴰⴱⴱⵓⵜ ⵏ ⵜⵡⵓⵔⵉ ⵉ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⵏ ⵜⴳⵯⵏⵙⴰⵙⵜ ⵉ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵙ ⵎⴰⵙⵙⴰ ⵍⴰⵟⵉⴼⴰ ⵛⵛⵔⵉⴼ, ⴷⴰⵜ ⵏ ⵓⵙⴳⴳⴰⵡⵔ ⵏ ⵜⵎⴰⵡⴰⵙⵜ ⵏ ⵜⵡⵉⵣⵉ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵜⵓⵡⵊⴰ, ⴷ ⵜⴳⵯⵏⵙⴰⵙⵜ ⵜⴰⵙⵓⵍⴰⵏⵜ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷⴰⵔ ⵜⵎⵜⵜⴰ ⵎⵓⵏⵏⵉⵏ. ⵢⵉⵍⵉ ⵓⵙⵎⵏⵉⴷ ⵏ ⵓⵏⵇⵇⵉⵙ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴼ ⵜⵎⵙⴰⵔⵉⵏ ⵏ ⵜⵎⵖⴰⵔⵜ ⵙ ⵜⵉⵍⵉⵜ ⵙ ⵉⵡⵔⵉⴽⵏ ⵅⴰⵜⵔⵏⵉⵏ.

ⵉⴷⵔⵓ ⵓⴽⴰⴱⴰⵕ ⴰⴷ ⵓⵍⴰ ⴳ ⵜⵙⵎⵓⵏⵉ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵏ ⵓⵙⵇⵇⵉⵎ ⵏ ⵓⵕⵓⴱⴱⴰ ⴼ: “ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵉⵢⵏ ⴳ ⵓⵙⵉⵥⴹⵕ ⵏ ⵜⵎⵖⴰⵔⵜ”, ⵜⴰⵙⵎⵓⵏⵉ ⵏ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ ⴼ “ⵡⴰⵙⵙ ⴰⴳⵔⴰⵖⵍⴰⵏ ⵉ ⵜⵓⵡⵊⴰ”, ⵜⴰⵙⵎⵓⵏⵉ ⵏ ⵜⴰⵎⵓⵏⵜ ⵏ ⵉⵡⴰⵏⴽⵏ ⴰⵄⵕⴰⴱⵏ ⴼ “ⵓⵙⵓⵔⵙ ⵏ ⵜⵎⵖⴰⵔⵉⵏ ⴷ ⵜⴼⵔⵅⵉⵏ ⴳ ⵖⴰⵥⵥⴰ”.

ⵉⴷⵔⵓ ⵓⵍⴰ ⴳ ⵜⵙⵎⵓⵏⴰⵢ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⵙ ⵜⴷⵔⴰⵡⵜ ⴷ ⵜⴳⵔⴰⵡⵜ ⵏ ⵜⵎⵜⵜⴰ ⵎⵓⵏⵏⵉⵏ ⵉ ⵜⵎⵖⴰⵔⵜ ⴼ: “ⵉⴱⵕⵍⴰⵎⴰⵏⵏ ⴼⵔⴳⵏⵉⵏ ⴰⵏⴰⵡ ⴰⵏⴰⵎⵓⵏ: ⴰⵙⵎⵖⵔ ⵏ ⵢⵉⵙⴽⵉⵍ ⵉ ⵓⵙⴱⴷⴷⵉ ⵏ ⵓⵥⵍⴰⴹ”, “ⵉⵙⴽⵉⵍ ⴳ ⵜⵎⴷⵔⴰⵡⵜ ⴷ ⵜⵏⴰⵔⴰ ⵉ ⵓⴼⵔⴰ ⴰⵎⴰⴹⵍⴰⵏ”, “ⴰⵙⴷⵓⵙ ⵏ ⵜⴷⵔⴰⵡⵜ ⵏ ⵜⵎⵖⴰⵔⵉⵏ ⴳ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵜⵖⵜⴰⵙⵜ”.

ⵔⴰⴷ ⵜⵃⴰⴹⵔ ⵜⵔⴰⴱⴱⵓⵜ ⵏ ⵜⵡⵓⵔⵉ ⴼ ⵢⵉⵙⴽⵉⵍ ⴷ ⵜⵏⴳⴰⴷⴷⴰⵢⵜ ⴳ ⵓⴳⵔⴰⵡ ⴰⵎⴰⴷⵍⴰⵏ ⵏ ⵜⵎⵖⴰⵔⵉⵏ ⵉⵜⵜⵓⵙⴽⴰⵔⵏ ⵉ ⵢⵉⵙⴽⵉⵍ ⴷ ⵓⵙⵔⵙ ⵏ ⵉⵙⵖⵍⵏ, ⴷ ⵓⵙⵔⵙ ⵏ ⵜⵙⵔⵜⴰⵢ ⵏ ⵢⵙⴷⵓⵙ ⵏ ⵢⵉⵙⴽⵉⵍ ⴷ ⵓⵙⵎⵖⵔ ⵏ ⵓⵙⵔⵙ ⵏ ⵜⵎⵖⴰⵔⵜ ⴳ ⵓⵎⴰⴹⴰⵍ.