ⴰⴱⵉⴷⵊⵓⵏ: ⴰⵙⵖⵡⵏ ⵏ ⵍⵎⵖⵔⵉⴱ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ

ⵉⵍⵍⴰ, ⴰⵙⵙ ⵏ ⵓⵙⵉⵏⴰⵙ ⴳ ⴰⴱⵉⴷⵊⵓⵏ, ⵓⵙⵉⵙⴼⵉⵡ ⵏ ⵜⵎⵙⴽⴰⵔ ⵏ ⵍⵎⵖⵔⵉⴱ ⵎⵏⵉⴷ ⵏ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ, ⴳ ⵜⵙⵓⵜⵍⵜ ⵜⵉⵙ 18 ⵏ ⵓⴳⵔⴰⵡ ⵏ ⵜⴰⵎⵓⵏⵜ ⵏ ⵉⵙⵇⵇⵉⵎⵏ ⵏ ⵉⵡⴰⵏⴽⵏ ⵉⴳⵎⴰⵎⵏ ⴳ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⵓⵙⵍⵉⵎ.

ⵜⵏⵏⴰ ⵜⵎⴰⵔⵉⵜ ⵏⴰⵊⵡⴰ ⴽⵓⴽⴽⵓⵙ, ⵙ ⵉⵙⵎ ⵏ ⵜⴰⵢⵢⴰⵡⵜ ⵜⴰⴱⵕⵍⴰⵎⴰⵏⵉⵜ ⵜⴰⵎⵖⵔⵉⴱⵉⵜ, ⵎⴰⵙ ⵉⵍⵍⴰ ⵓⵙⵖⵡⵏ ⴰⴷ ⵙ ⵓⵙⵏⵎⴰⵍⴰ ⵏ ⵓⴳⵔⴰⵡ ⵏ ⵓⵏⵣⵡⵉ “ⴽⵓⴱ 22” ⴳ ⵡⴰⵎⵓⵔ ⵏ ⵡⴰⴽⵓⵛ ⴳ 2016, ⴷ ⵓⵏⵎⵓⵇⵇⴰⵔ ⴰⴱⵕⵍⴰⵎⴰⵏⵉ ⴰⴼⵔⵉⵇⵉ ⴳ ⵕⵕⴱⴰⵟ ⴳ 2017 ⴼ: “ⴰⵏⵣⵡⵉ ⴷ ⵜⴳⵎⵉ ⵜⴰⵙⵓⵍⴰⵏⵜ, ⵙⴳ ⵜⵎⵢⴰⵇⵇⴰⵏⵉⵏ ⴰⵔ ⵜⵡⵓⵔⵉ...ⴰⵙⵎⴰⵇⵇⵍ ⵏ ⵉⴱⵕⵍⴰⵎⴰⵏⵉⵢⵏ ⵉⴼⵔⵉⵇⵉⵢⵏ”.

ⵜⵙⴰⵡⵍ ⵎⴰⵙⵙⴰ ⴽⵓⴽⴽⵓⵙ ⵓⵍⴰ ⴼ ⵉⴷⵔⵉⵣⵏ ⵏ ⵉⵙⵏⴼⵍⵏ ⵏ ⵓⵏⵣⵡⵉ ⴳ ⵓⵙⵡⵉⵔ ⴰⴷⵎⵙⴰⵏ ⴷ ⵓⵏⴰⵎⵓⵏ ⴷ ⵡⴰⵏⴰⵡⵏ ⵏ ⵜⵓⴷⵔⵜ ⴳ ⵓⵎⴰⴹⴰⵍ, ⵖⵎⴽ ⴰⵏⵏ ⴷ ⵜⵓⵎⴰⵏⵉⵏ ⵢⴰⴹⵏⵉⵏ ⴰⵎ ⴰⵥⵍⴰⴹ ⴷ ⵍⴰⵥ ⴷ ⴼⴰⴷ ⴷ ⵜⴽⵕⴷⵉ ⴷ ⵓⴱⵔⵙⵙⵉⴷ ⴷ ⵓⴱⴽⴽⴰⴹ ⴷ ⵉⵎⴰⵖⵏ ⴷ ⵓⵙⵖⵏⵣⵉ ⴳ ⵓⴼⴳⴰⵏ ⴷ ⵓⵣⵡⴰⴳ ⴷ ⵓⵙⵔⵡⵍ ⵏ ⵉⵔⴱⴰⴱⵏ ⴷ ⵉⵙⴷⵓⴷⴷⵓⵢⵏ.

ⵜⵙⴰⵡⵍ ⵜⵎⴰⵔⵉⵜ ⵓⵍⴰ ⴼ ⵜⵉⵍⴰⵍⵜ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⵏ ⵜⴳⵍⴷⵉⵜ ⴳ ⵓⴳⵔⴰⵡ ⴰⴷ, ⵜⵙⴷⴷⵉⴷ ⴼ ⵓⵙⵖⵡⴰⵏ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⵎⵏⵉⴷ ⵏ ⵉⵡⵜⵜⴰⵙⵏ ⵏ ⵜⵎⴰⴷⴷⴰⵙⵜ ⴷ ⵜⵔⵙⴰⵍ ⵏⵏⵙ ⵜⵉⵙⵔⵜⴰⵏⵉⵏ. ⵜⵖⵔ ⵓⵍⴰ ⵉ ⵜⵣⵣⵉⴳⵣⵜ ⵏ ⵜⵓⴳⴳⴰⵙ ⵉ ⵓⵙⵎⵖⵔ ⵏ ⵜⵎⴰⴷⴷⴰⵙⵜ ⴷ ⵓⵥⵏⵥⵕ ⵏⵏⵙ.

ⵢⵓⵎⴰ ⵓⴽⴰⴱⴰⵕ: ⵎⴰⵙⵙⴰ ⵏⴰⵊⵡⴰ ⴽⵓⴽⴽⵓⵙ, ⵙⴳ ⵜⵥⵖⵕⵜ ⴷ ⵜⵎⴰⵜⵔⴰⵔⵜ, ⵎⴰⵙⵙ ⵎⵓⵃⴰⵎⵎⴰⴷ ⵛⵛⴱⴱⴰⴽ ⵙⴳ ⵓⴳⵔⴰⵡ ⴰⵏⴰⵎⵓⵔ ⵏ ⵉⵏⵙⵉⵎⴰⵏⵏ, ⵎⴰⵙⵙ ⵅⴰⵍⵉⴷ ⵛⵛⵏⵏⴰⵇ ⵙⴳ ⵜⵔⴰⴱⴱⵓⵜ ⵜⴰⵙⵉⵎⴰⵏⵜ ⵉ ⵜⵎⵓⵏⵉ ⴷ ⵢⵉⵙⴽⵉⵍ, ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙ ⵅⴰⵍⵉⴷ ⵙⵙⵟⵟⵉ ⵙⴳ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ.