ⵜⴰⴳⵓⵔⵉ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵖ ⵓⵏⵏⵓⵕⵥⵎ ⵏ ⵜⵡⵓⵔⵉⵡⵉⵏ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⴽⴽⵓⵥ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ,

ⵙ ⵓⵣⵣⴳⵉⵔ ⵏ ⵓⵎⴰⴳⵔⴰⴷ 65 ⵏ ⵓⴷⵓⵙⵜⵓⵔ, ⴰⵔ ⵏⵜⵜⵏⵓⵕⵥⵓⵎ ⵜⴰⵙⵓⵜⵍⵜ ⴰⴷ ⵜⵉⵙ ⵙⵏⴰⵜ ⵖ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⴽⴽⵓⵥ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ  ⵖ ⵜⵎⵙⵓⵜⴰⵍ ⴰⴷ ⴱⴰⵀⵔⴰ ⵥⵍⵉⵏⵉⵏ. ⴰⵔ ⵏⵜⵜⵕⵥⵓⵎ ⵜⴰⵙⵓⵜⵍⵜ ⴰⴷ ⵖ ⵢⴰⵏ ⵓⵎⵏⴰⴹ ⴷ ⵢⴰⵜ ⵜⵎⵙⵓⵜⵍⵜ ⵍⵍⵉ ⵓⵔ ⵏⵎⵢⴰⵔ ⵖ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⵎⴰⴹⵍⴰⵏ ⴷ ⵓⵏⴼⴳⴰⵏ. ⵢⴰⵏ ⵓⵎⵏⴰⴹ ⴱⴰⵀⵔⴰ ⵉⵥⵍⵉⵏ ⵖ ⵉⵍⵍⴰ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵍⵍⵉ ⵉⵎⵎⴰⵖⵏ ⴰⴷ ⵉⵙⴽⵔ ⵢⴰⵏ ⵓⵙⵏⴼⵍ ⵎⵇⵇⵓⵔⵏ ⵖ ⵓⵎⵣⵔⵓⵢ ⵏ ⵓⴼⴳⴰⵏ, ⵉⵥⴹⴰⵕ ⴰⴷ ⵉⵙⵏⴼⵍ ⵜⴰⵣⵣⵉⴳⵣⵜ ⵏ ⵓⵎⵣⵔⵓⵢ, ⵉⵙⴽⵔ ⵓⵍⴰ ⵢⴰⵜ ⵜⴼⵔⴽⴰ ⵜⴰⵎⵥⵍⴰⵢⵜ ⵖ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ, ⵖ ⵉⵏⴳⵔⴰⵡⵏ ⵉⵏⴰⵎⵓⵏⵏ, ⵖ ⵜⴷⵍⵙⴰ, ⵖ ⵉⵙⵎⴷⴰⵢⵏ ⴷ ⵡⴰⵜⵉⴳⵏ. ⵎⴰⵛⴰ ⴰⵢⵍⵍⵉ ⵉⴳⴰⵏ ⴰⴷⵙⵍⴰⵏ ⴰⵙⵙ ⴰⴷ , ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵙⵏⴳⴰⴷⴷⴰ ⵏ ⵜⵎⴰⵖⵜ ⴷ ⵓⴱⴰⵢⵢⵓⵕ ⴰⴷ ⵍⵍⵉ ⵔⴰⴷ ⵉⵙⴽⵔ ⵜⴰⵙⵙⴰⵙⵉⵏ ⴷ ⵉⵄⴷⵔⵉⵇⵏ ⵉⴷⴰⵡⵙⴰⵏⵏ,  ⵍⵍⵉ ⵊⵊⵓ ⵓⵔ ⵏⵥⵕⵉ, ⵉⵖ ⵓⵔ ⵓⴼⵉⵏ ⵉⵡⴰⵏⴽⵏ ⴷ ⵜⵎⴰⴷⴷⴰⵙⵉⵏ ⴷ ⵉⵎⴰⵙⵙⴰⵏⵏ ⴰⴷ ⵜ ⵙⴱⵉⴷⴷⵏ.  ⵎⴰ ⴰⴷ ⵓⵔ ⵉⴳⵉ ⴰⵏⴰⵎⴽ ⵏ ⵓⵙⴰⵍⴰⴽ, ⴰⵏⴰⵎⴽ ⵏⵏⴽ ⵏⵏⵙ ⵉⴳⴰ ⵜ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵏⴳⴰⴷⴷⴰ ⵏ ⵜⵎⴰⵖⵜ ⴷ ⵓⵙⴱⴷⴷⴰⴷ ⵏ ⵉⴷⵔⵉⵣⵏ ⵉⴷⴰⵡⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⵎⵙⵙⴰⵏⵏ ⵏ ⵓⵀⵔⴰⵛ ⴰⴷ, ⵓⵔ ⴷ ⵖⴰⵙ ⴰⵥⵓⵕ ⵏⵏⵙ, ⵉⴷⵔⵉⵣⵏ ⴰⴷ ⵍⵍⵉ ⵓⵔ ⴳⴰⵏⵉⵏ ⵡⵉⴷ ⴼⵙⵓⵙⵉⵏ ⴰⵛⴽⵓ ⵔⴰⴷ ⵙⵙⵕⵎⵉⵏ ⵜⵉⵎⵙⵓⵙⵜⵍⵉⵏ ⵜⵉⴳⴷⵓⴷⴰⵏⵉⵏ,  ⴰⵍⵍⵏ ⵜⵉⵎⴽⵕⴰⴹ ⵜⵉⴳⴷⵓⴷⴰⵏⵉⵏ ⴰⵎⵥⵏ ⵉⵎⴰⵍ ⵏ ⵓⵎⴰⴹⴰⵍ.

ⵉⵇⵇⴰⵏ ⴷ ⴰⴷ ⵏⵣⵎⵎⵉⵎ ⵙ ⴽⵉⴳⴰⵏ ⵏ ⵓⵙⵓⵜⴳ ⴰⴱⵔⵉⴷ ⵏ ⵜⵏⵣⴱⴰⵢⵜ ⵍⵍⵉ ⵜⵓⵎⵥ ⵜⵎⴰⵣⵉⵔⵜ ⵏⵏⵖ ⵖ ⵓⵎⵏⵉⴷ ⴰⴷ. ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴰⴷ ⴷ ⵉⴷⵔⵉⵣⵏ ⵏⵏⵙ, ⵉⴱⴰⵢⵢⵏ ⴷ ⵜⵉⴽⴽⵍⵉⵜ ⵢⴰⴹⵏⵉⵏ ⴰⵢⵍⵍⵉ ⵙ ⵉⵥⵍⵉ ⵡⴰⵏⴰⵡ ⴰⵎⵖⵔⵉⴱⵉ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵍⵍⵉⵖ ⵉⴳⴰ ⴰⵎⵣⵡⴰⵔⵓ, ⵖ ⵓⵎⵏⴰⴹ ⵏ ⵜⴰⵙⵙⴰⵙⵜ, ⴰⴷ ⵢⵉⵍⵉ ⵖ ⵜⵎⴰⵖⵜ ⵏ ⵍⵎⴰⵖⵔⵉⴱ ⴷ ⵓⴱⴰⵢⵢⵓⵕ ⵙ ⵓⵔⴱⴰⴱ ⵏ ⵜⵉⵔⴰⵜ ⵉⴷⵓⵙⵏ ⵉⴳⴰⵏ ⵜⴰⵎⴳⵔⵓⵜ ⴷ ⵜⵓⵏⵥⵉⵥⵜ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ , ⴰⵢⵍⵍⵉ ⵢⵉⵡⵙⵏ ⴰⴷ ⵢⵉⵍⵉ ⵢⴰⵏ ⵓⵙⵎⵓⵙⵙⵓ ⴰⵏⴰⵎⵓⵔ ⴰⵎⴳⵔⵓ ⵖ ⵜⵡⵓⵔⵉ ⵏ ⵓⵙⴱⴷⴷⵉ ⵖ ⴽⵔⴰⵢⴳⴰⵜⵜ ⴰⵎⵏⵉⴷ ⵖ ⵜⵎⵙⵓⵜⴰⵍ ⴰⴷ ⵉⵛⴷⴷⴰⵏ.

ⵜⵉⵎⵙⴽⴰⵔ ⵜⵉⵎⵣⵡⵓⵔⴰ ⵍⵍⵉ ⵙ ⵉⵏⵏⴰ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜⵜⵓⵙⴽⵉⵔⵏⵜ ⴳⴰⵏⵜ ⵜⴰⵎⴰⵜⴰⵔⵜ ⵏ ⵜⵎⵥⵍⴰ ⵜⴰⵎⵣⵔⴰⵢⵜ ⵖ ⵜⵉⵣⵉ ⴰⴷ ⵉⵛⵇⵇⴰⵏ, ⵖ ⵉⴳⴰ ⵓⵙⴽⴰⵔ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵖ ⵜⵎⴰⵣⵉⵔⵜ ⵃⵎⴰ ⴰⴷ ⵓⵔ ⵜⵣⵣⵉⴳⵣ ⵜⵎⴰⴹⵓⵏⵜ, ⵏⵖ ⴰⵙⵓⵊⴷ ⵏ ⵜⵖⴰⵡⵙⵉⵡⵉⵏ ⵏ ⵓⵙⵏⵉⵊⵊⵉ, ⴷ ⵓⵙⵓⵊⴷ ⵏ ⵜⵖⴰⵡⵙⵉⵡⵉⵏ ⵜⵉⵥⵕⴼⴰⵏⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵜⵓⵛⵛⵉⵍⵉⵏ ⵉⵎⵓⵏⵏ ⴷ ⵡⴰⴷⴷⴰⴷ  ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵍⵍⵉ ⵙ ⴷ ⵉⵇⵇⴰⵏ ⴰⴷ ⵉⵍⵉⵏⵜ ⵃⵎⴰ ⴰⴷ ⵓⵙⵜⵡⵓⵏⵜ ⵜⵎⵙⵓⵜⴰⵍ ⵜⵉⴷⵎⵙⴰⵏⵉⵏ ⵥⵍⵉⵏⵉⵏ ⵖⴰ ⵜⵣⵣⵔⴰⵢ ⵜⴷⵎⴰⵙ ⵜⴰⵏⴰⵎⵓⵔⵜ. 

ⵖ ⵜⵎⵙⵓⵜⵍⵜ ⴰⴷ ⵉⵥⵍⵉⵏ ⵍⵍⵉ ⴱⴰⵀⵔⴰ ⵉⵛⵇⵇⴰⵏ, ⵢⵉⵡⵙ ⵓⵙⵎⴰⵇⵇⵍ ⵉⴷⵔⴰⵏ  ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ  ⴷ ⵉⵙⵡⴰⵍⴰⵜⵏ ⵏⵏⵙ ⴰⵜⵜⵓⵢⵏⵉⵏ ⴰⴷ ⵢⵉⵍⵉ ⵓⵜⵡⴰⵍ ⵏ ⵉⵖⴰⵡⴰⵙⵏ  ⵏ ⵓⵙⴱⴷⴷⵉ ⵏ  ⵓⴱⴰⵢⵢⵓⵕ, ⴰⵢⵍⵍⵉ  ⵔⴰⴷ ⵢⴰⵡⵙ ⵉ ⵜⵎⴰⵣⵉⵔⵜ ⵏⵏⵖ, ⵙ ⵡⴰⵡⴰⵍ ⵏ ⵕⴱⴱⵉ, ⴰⴷ ⵜⵣⵣⵔⵉ ⵜⴰⴼⵔⴽⴰ ⴰⴷ ⵙ ⵡⴰⴽⴽⴰⵍⵏ ⴷⵔⵓⵙⵏⵉⵏ, ⵢⵉⵍⵉ ⵓⵣⵓⵣⵣⵔ ⵏ ⵡⴰⵎⵓⴷ ⵏ ⵓⵙⴼⴰⵍ ⴷ ⵓⵏⴰⵔⵓⵣ ⵖ ⵉⵎⴰⵍ ⵉⵥⵉⵍⵏ ⴷ ⵓⵙⵉⵜⵜⵉ  ⵏ ⵜⵣⵔⵔⴰⵡⵜ.

ⵖ ⵜⵎⵙⴽⴰⵔ ⵉⵍⵍⴰⵏ ⵍⵍⵉ ⵉⵙⵜⴰⵀⵍⵍⴰⵏ ⴰⵙⵓⵜⴳ ⴷ ⵓⵙⵉⵙⵙⵏ, ⵍⵍⵉⵖ ⵉⵏⵏⴰ ⵓⴳⵍⵍⵉⴷ  ⴱⴰⴱ ⵏ ⵡⴰⴷⴷⵓⵔ ⴰⴷ ⵉⵜⵜⵓⵙⴽⵉⵔ ⵢⴰⵏ ⵓⴼⵏⵉⵇ ⵉⴳⴰⵏ ⴰⵎⵉⴹⴰⵏ ⵉⵥⵍⵉⵏ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ. ⴰⵏⵛⴽ ⵏ ⵜⵡⵉⵙⵉ ⵖ ⵓⵎⵉⴹⴰⵏ ⴰⴷ  ⴷ ⵓⴽⴽⵓⵙ ⴰⵏⵎⵓⵔ ⴰⵏⵉⵔⴰⵏ ⵉ ⵓⵙⵏⴰⵍ ⵏⵏⵙ ⴷⴰⵔ ⵜⵎⵔⵙⴰⵍ ⴷ ⵎⵉⴷⴷⵏ ⴷ ⵓⴷⴳⴰⵔ ⴰⵏⴰⵎⵓⵔ, ⴰⵔ ⴷⴰⵖ ⵎⵎⴰⵍⴰⵏ ⵜⵉⴽⴽⵍⵉⵜ ⵢⴰⴹⵏⵉⵏ, ⴰⵜⵉⴳ ⴱⴰⵀⵔⴰ ⵉⵥⵉⵍⵏ ⵏ ⵓⵎⴰⴷⴰⵏ ⴰⵎⵖⵔⵉⴱⵉ, ⴷ ⵉⵙ ⵓⵎⵥⵏ ⵉⵎⵖⵔⴰⴱⵉⵢⵏ ⵖ ⵡⴰⵜⵉⴳⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵓⵙⴼⴰⵙⴽⴰ, ⴷ ⵓⵎⵏⵉⴷ ⵏⵏⵙⵏ ⴰⵎⴳⵔⵓ ⴰⴷ ⴽⵓⵍⵍⵓ ⵣⵔⵉⵏⵜ ⵜⵎⵙⵓⵜⴰⵍ ⴰⴷ ⵛⵇⵇⴰⵏⵉⵏ.

ⵖ ⵜⵙⴳⴰ ⵢⴰⴹⵏⵉⵏ, ⵎⵍⴰⵏⵜ ⵜⵎⵙⴽⴰⵔ ⵍⵍⵉ ⵙⴽⵔⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵖ ⵜⵍⵍⴰ ⵜⵏⴱⴰⴹⵜ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⵙ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ, ⴰⵡⵙⵏⵜ ⴳⵉⵙⵏⵜ ⵜⵎⵔⵙⴰⵍ ⵜⵉⵥⵕⴰⴼⵉⵏ ⵜⵉⵏⴰⵎⵓⵔⵉⵏ ⴷ ⵉⵏⴳⵎⴰⵎⵏ ⵏ ⵜⵡⵉⵣⵉ, ⵃⵎⴰ ⴰⴷ ⵢⵉⵍⵉ ⵓⵃⵟⵟⴰ ⵏ ⵜⵖⵔⴰⴷ ⵏ ⵎⵉⴷⴷⵏ ⵍⵍⵉ ⴽⵓⵍⵍⵓ ⵜⵜⵓⴹⵕⵕⴰⵏⵉⵏ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵎⵍⴰⵏⵜ ⵎⴰⵙ ⵙⵓⵍ ⴷⴷⵔⵏ ⵡⴰⵜⵉⴳⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵜⵎⴰⵙⴰⵢⵜ ⵏ ⵜⵎⵥⵍⴰ ⴷⴰⵔ ⵓⵡⴰⵏⴽ ⴰⵎⵖⵔⵉⴱⵉ ⵙ ⵜⵏⴰⵔⴰ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ, ⴰⴷ ⵓⵔ ⵉⴼⵍ ⴰⵡⴷ ⴽⵔⴰ ⵏ ⵢⴰⵏ ⵖ ⵜⴰⵔⵡⴰ ⵏ ⵜⵎⵓⵔⵜ ⴰⴷ ⵖ ⵜⵎⵙⵓⵜⵍⵉⵏ ⴰⴷ ⵛⵇⵇⴰⵏⵉⵏ. ⵎⴰ ⴰⴷ, ⵓⵔ ⵀⵍⵍⵉ ⵉⴳⴰ ⴰⵙⵎⵀⵍ ⵏ ⵢⵉⵎⴰⵏ ⵏ ⵓⴷⵓⵙⵜⵓⵔ ⵖ ⵓⵎⵏⵉⴷ ⵏⵏⵙ ⵉⵥⵍⵉⵏ ⵙ ⵜⵡⵉⵣⵉ  ⵖ ⵉⵍⵍⴰ ⵡⴰⵙⵙⴰⵢ ⵏ ⵡⴰⴳⴳⴰ ⵍⵍⵉ ⴷ ⵉⴽⴽⴰⵏ ⵜⴰⵙⵙⴰⵙⵉⵏ  ⴷ ⵉⵄⴷⵔⵉⵇⵏ, ⵎⴰⵛⴰ ⵉⴳⴰ ⵓⵍⴰ ⴰⵙⵎⵀⵍ ⵏ ⵡⴰⵜⵉⴳⵏⵜ ⵏ ⵜⵓⴷⵔⵜ ⵜⴰⵎⴳⵔⵓⵜ ⵖ ⵜⵎⵙⵓⵜⵍⵉⵏ ⴰⴷ ⵛⵇⵇⴰⵏⵉⵏ.

ⵜⵉⵎⵙⴽⴰⵔ ⵍⵍⵉ ⵉⵜⵜⵓⵙⴽⴰⵔⵏ ⵖ ⵉⵙⵡⵉⵔⵏ ⴽⵓⵍⵍⵓ ⵜⵏ ⴷ ⵜⵡⵓⵔⵉⵡⵉⵏ ⵏ ⵓⵎⵢⴰⵡⴰⵙ ⴳⴰⵏⵜ ⴰⵏⴰⵎⴽ ⵏ ⵓⵡⴰⵏⴽ ⵉⵜⵜⵃⴹⵓⵏ ⵜⴰⵔⵡⴰ ⵏⵏⵙ ⴽⵓⵍⵍⵓ ⵜⵏ, ⵉⴱⴷⴷ ⴼ ⵡⴰⴷⴷⴰⵏ ⵏⵏⵙⵏ.

ⵖ ⴷⴰⵜ ⵏ ⵜⵎⴰⵖⵜ ⵜⴰⴷⴰⵡⴰⵙⵏⵜ ⴷ ⵓⴱⴰⵢⵢⵓⵕ, ⵉⵍⵍⴰ ⵓⵙⵎⵓⵙⵙⵓ  ⵏ ⴽⵓ ⵜⵉⵥⵉⴹⴰⵕ ⵜⵉⵏⴼⴳⴰⵏⵉⵏ ⴷ ⵜⴻⵜⵉⵇⵏⵉⵢⵉⵏ ⴷ ⵉⵎⴰⵙⵙⵏ  ⵉⴷⵙⵍⴰⵏⵏ  ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ. ⵓⵔ ⴳⵉⵙ ⵜⵓⵔⴷⴰ, ⵎⴰⵙ ⵉⵍⵍⴰ ⵖ ⵓⵣⵔⵉⵔⵉⴳ ⴰⵎⵣⵡⴰⵔⵓ ⵏ ⵜⵎⴰⵖⵜ ⴰⴷ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⴷⴰⵡⵙⴰⵏ ⴷ ⵎⴰⴷ ⵜ ⵉⵔⵡⴰⵙⵏ, ⵉⵖⵔⵎⴰⵏⵏ ⴷ ⵉⵄⴰⵙⴽⴰⵔⵉⵢⵏ, ⵖ ⵉⴹⴱⵉⴱⵏ ⴷ ⵉⴼⵔⵎⵍⵉⵢⵉⵏ ⴷ  ⵉⵎⵙⵖⴰⵏⵏ ⵏ  ⵡⴰⵔⴰⵢ ⴰⵖⵔⵎⴰⵏ ⵍⵍⵉ ⴷⴰⵔⵏⵖ ⵉⵙⵜⴰⵀⵍⵍⴰⵏ ⴰⵙⵓⵜⴳ ⵎⵇⵇⵓⵔⵏ ⴼ ⵉⵙⴼⴰⵙⴽⴰⵜⵏ ⵏⵏⵙⵏ  ⵅⴰⵜⵔⵏⵉⵏ ⴷ ⵜⵓⴳⴳⴰⵙ ⵍⵍⵉ ⵏⵏ ⵜⴳⴳⴰⵏ ⵉ ⵓⵙⵉⵜⵜⵉ ⵏ ⵓⴱⴰⵢⵢⵓⵕ, ⴷ ⵜⵙⵏⵉⵊⵊⵉⵜ ⵏ ⵉⵎⵓⴳⴰⵙ. ⴰⵣⵓⵍ  ⴷ ⵓⵙⵓⵜⴳ ⵏⵏⵖ ⵉ ⵡⵉⴷ.

ⵖ ⵓⵣⵔⵉⵔⵉⴳ ⴰⵎⵣⵡⴰⵔ, ⵍⵍⴰⵏⵜ ⵓⵍⴰ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵍⵍⵉ ⵉⴱⴷⴷⵏ ⴼ ⵓⵃⵟⵟⵓ ⵏ ⵉⵡⵜⵜⴰ ⵏ ⵜⵎⵓⵔⵜ ⵏⵏⵖ, ⴱⴷⴷⵏⵜ ⵓⵍⴰ ⴰⵙⵙ ⴰⴷ ⵖ ⵓⵣⵔⵉⵔⵉⴳ ⴰⵎⵣⵡⴰⵔⵓ ⵉ ⵓⵙⵏⴰⵍ ⵉ ⵜⴳⴳⴰⵍⵉⵏ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵃⵎⴰ ⴰⴷ ⵢⵉⵍⵉ ⵓⵃⵟⵟⴰ ⵏ ⵉⵍⵓⴳⵏⵏ ⵏ ⵜⴼⴰⵜⵉⵜ ⴷ ⵓⵙⴽⴰⵔ ⵏ ⵜⵓⵎⴰⵢⵉⵏ ⵏ ⵓⵙⵍⴳⵏ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ. ⴰⵣⵓⵍ ⵏⵏⵖ ⴷ ⵓⵙⵓⵜⴳ ⵏⵏⵖ ⵉ ⵜⴳⴳⴰⵍⵉⵏ ⴰⴷ ⵙ ⵜⵏⴰⵔⴰ ⵏ ⵓⵅⴰⵜⴰⵔ  ⵏⵏⵙⵏⵜ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ.

ⵖ ⵓⵣⵔⵉⵔⵉⴳ ⴰⵎⵣⵡⴰⵔⵓ, ⴱⴷⴷⵏ ⵓⵍⴰ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵜⵏⴱⴰⴹⵜ ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⵊⴹⵕⵎⵜ ⵜⴰⴳⵍⴷⴰⵏⵜ ⴷ ⵜⴳⴳⴰⵍⵉⵏ ⵏ ⵜⵡⵉⵙⵉ ⵍⵍⵉ ⵉⵙⴼⴰⵙⴽⴰⵏ ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⵏⴼⵔⵓⵜ ⴷ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵏ ⵓⵙⵍⴳⵏ ⵏ ⵉⵖⴰⵡⴰⵍⵏ ⵙ ⵓⵡⵇⵇⵔ ⵏ ⵜⵎⵙⴽⴰⵔ ⵉⵍⵍⴰⵏ ⴷ ⵜⵣⵣⵉⴳⵣⵜ ⵏ ⵜⵓⴷⵔⵜ ⵙ ⴰⵢⵍⵍⵉ ⴷ ⵜⵉⵡⵉ ⵜⵎⵙⵓⵜⵍⵜ ⴰⴷ. ⴰⵙⵓⵜⴳ ⵏⵏⵖ ⵎⵇⵇⵓⵔⵏ ⵉ ⵡⵉⴷ ⴽⵓⵍⵍⵓ ⵜⵏ.

ⵖ ⵉⵣⵔⵉⵔⵉⴳⵏ ⴳⴳⵯⵔⴰⵏⵉⵏ ⵏ ⵜⵎⴰⵖⵜ, ⴱⴷⴷⵏ ⵓⵍⴰ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵓⵙⵍⵎⴷ ⵍⵍⵉ ⵉⵎⵎⴰⵖⵏ ⴰⴷ ⵜⵣⵣⵉⴳⵣ ⵜⵡⵓⵔⵉ ⵏ ⵓⵙⵍⵎⴷ ⵙ ⵓⵙⵎⵔⵙ ⵏ ⵜⴻⵜⵉⵇⵏⵉⵢⵉⵏ ⵜⵉⵎⴰⵢⵏⵓⵜⵉⵏ ⵏ ⵓⵎⵙⴰⵡⴰⴹ, ⵖⵎⴽ ⵍⵍⵉ ⵎⵎⴰⵖⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵓⵙⵏⵖⵎⵙ ⵃⵎⴰ ⴰⴷ ⵣⵣⵉⴳⵣⵏ ⵉⵏⵖⵎⵉⵙⵏ. ⴰⵙⵓⵜⴳ ⵏⵏⵖ ⵎⵇⵇⵓⵔⵏ ⵉ ⵡⵉⴷ ⴽⵓⵍⵍⵓ ⵜⵏ.

ⵖ ⵜⵙⴳⴰ ⵢⴰⴹⵏⵉⵏ, ⵉⵇⵇⴰⵏ ⴷ ⴰⴷ ⵏⵙⵓⵜⴳ ⵏⵙⵙⵎⵖⵔ ⵜⵉⵍⴰⵍⵜ ⵏ ⴽⵓ ⵡⴰⵏⵏⴰ ⵉⵎⵎⴰⵖⵏ ⴼ ⵜⵣⵣⵉⴳⵣⵜ ⵏ ⵜⵊⴰⵡⵜ ⵏ ⵉⴳⴰⴷⴰⵣⵏ ⵙ ⴰⵢⵍⵍⵉ ⵙ ⵜⵙⵖⴰⵡⵙⴰ ⵜⵓⴷⵔⵜ ⵖ ⵓⵣⵎⵣ ⴰⴷ ⵉⵥⵍⵉⵏ, ⵉⵍⵉⵏ ⴳⵉⵙⵏ ⵉⵙⴱⴱⴰⴱⵏ ⴷ ⵉⴼⵍⵍⴰⵃⵏ ⵖ ⵓⵙⵓⵏ ⴰⵎⵖⵔⵉⴱⵉ. ⵖ ⵓⵣⵎⵣ ⴰⴷ ⵉⵥⵍⵉⵏ, ⵓⵔ ⵔⴰⴷ ⵜⵜⵓⵖ ⴰⴷ ⴱⴰⵀⵔⴰ ⵙⵓⵜⴳⵖ ⵜⵓⴳⴳⴰⵙ ⴳⴳⵓⵜⵏⵉⵏ ⵍⵍⵉ ⵙⴽⴰⵔⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵉⵙⵡⵓⵔⵉⵏ ⵖ ⵢⵉⴳⵔ ⵏ ⵜⵖⵓⵙⵉ ⵍⵍⵉ ⵉⵙⵡⵓⵔⵉⵏ ⵖ ⵜⵎⵙⵓⵜⴰⵍ ⴷ ⵉⵎⵏⴰⴹⵏ ⵛⵇⵇⴰⵏⵉⵏ, ⴰⵙⵉⵏ ⴰⴳⴳⴰⵜⵏ ⵥⵥⴰⵢⵏⵉⵏ ⵖ ⵢⴰⵜ ⵜⵎⵙⵓⵜⵍⵜ ⵉⵛⵇⵇⴰⵏ.

ⵖ ⵜⵙⴳⴰ ⵢⴰⴹⵏⵉⵏ, ⵉⵇⵇⴰⵏ ⴷ ⴰⴷ ⵏⵙⵓⵜⴳ ⴽⵉⴳⴰⵏ ⵜⵓⴳⴳⴰⵙ ⵏ ⴽⵔⴰ ⵏ ⵜⵎⴳⵓⵔⴰ ⵜⵉⵏⴰⵎⵓⵔⵉⵏ ⵍⵍⵉ ⵉⵥⴹⴰⵕⵏ ⵖ ⵢⴰⵏ ⵓⵣⵎⵣ ⵉⴷⵔⵓⵙⵏ ⴰⴷ ⵙⴽⵔⵏⵜ ⵉⵎⴰⵙⵙⵏ ⴷ ⵉⵢⴰⴼⵓⵜⵏ ⵍⵍⵉ ⵙ ⵜⵙⵖⴰⵡⵙⴰ ⵜⵎⴰⵣⵉⵔⵜ ⵏⵏⵖ ⴷ ⵓⵎⴰⴹⴰⵍ ⵣⵓⵏ ⴷ ⵉⵎⴰⵙⵙⵏ ⵉⵎⴳⵓⵔⴰⵏ ⵉⴷⴰⵡⵙⴰⵏⵏ  ⵏ ⵓⵙⵓⵏⴼⵓⵙ ⴷ ⵜⴽⵎⴰⵎⵉⵏ ⴷ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ ⵏ ⵓⵙⴱⴷⴷⵉ ⵏ ⵜⵎⴰⴹⵓⵏⵜ. ⴰⵙⵓⵜⴳ ⵏⵏⵖ ⴽⵓⵍⵍⵓ ⵜ  ⵉ ⵜⵎⵓⵣⴰⵢⵉⵏ ⴷ ⵉⴼⵓⴽⵙⵏ ⵉⵏⴰⵎⵓⵔⵏ ⴷ ⵓⴷⴳⴰⵔ ⴰⵏⴰⵎⵓⵔ.

ⵜⵉⵏⴳⴳⵯⴰ  ⴷ ⵉⵏⴳⴳⵯⴰ,

ⵡⴰⵅⵅⴰ ⴰⵎⵏⴰⴹ ⴰⴷ ⵉⵛⵇⵇⴰⵏ, ⵣⵣⵉⴳⵣⵏⵜ ⵜⵎⵔⵙⴰⵍ ⵖ ⵓⵙⴽⴰⵔ ⵏ ⵜⵉⵍⴰⵍ ⵏⵏⵙⵏⵜ ⴷ ⵜⵥⵍⴰⵢⵉⵏ ⵏⵏⵙⵏⵜ, ⵙ  ⵡⴰⵏⵢⴰ  ⵍⵍⵉ ⵙ ⵜⵙⵖⴰⵡⵙⴰ ⵜⴼⵔⴽⴰ ⴰⴷ. ⵖⵉⴽ ⴰⵏⵏ ⴰⴼ ⵉⵣⵣⵉⴳⵣ ⵓⵙⵇⵇⵉⵎ ⵏⵏⵖ ⵖ ⵓⵙⴽⴰⵔ ⵏ ⵜⵎⵙⴽⵉⵔⵉⵏ ⵏⵏⵙ ⴷ ⵉⵣⵓⵛⵛⵍⵏ ⵏⵏⵙ ⵉⴷⵙⵜⴰⵔⵏ. ⵉⴳⴰ ⴰⴳⴰⵎⴰⵏ ⴰⴷ ⵏⴻⵏⵢⴰⵍⴽⴰⵎ ⴷ ⵓⵍⴳⴳⵓⴷ ⴰⴷ ⵜⵉⵍⵉ ⵜⵙⵎⵓⵏⵉ ⵏ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⴰⵙⵙ ⵏ ⵓⵙⵉⵏⴰⵙ 23 ⵎⴰⵕⵚ 2020, ⵍⵍⵉ  ⵉⵣⵣⵔⵉⵏ ⵙ ⵓⵎⴽⵕⴰⴹ ⵓⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⵉⵣⴷⵉⵏ ⴷ ⵓⵙⵔⵓⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵍⵍⵉ ⵉⴽⵛⵎⵏ ⵖ ⵓⵙⴰⵜⵉ ⵏ ⵉⵙⵡⵓⴷⴷⵓⵜⵏ  ⵏ ⵡⴰⵔⴰⵢ ⵏ ⵓⵍⴳⴳⵓⴷ, ⵙ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ, ⵖ ⵓⵙⴰⵜⵉ ⵏ ⵓⵡⵇⵇⵔ ⵓⵙⵎⵉⴷ  ⵉⵙⵇⵇⵉⵇⵏ ⵏ ⵉⴱⴹⵉⵢⵏ ⵏⵏⵙ ⴷ ⵜⵓⵎⴰⵢⵉⵏ ⵏ ⵓⵙⵍⴳⵏ  ⴰⴳⵯⵏⵙⴰⵏ.

ⴷⴰⵜ ⵏ ⵎⴰ ⴰⵏⵏ, ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵜⴰⵙⵎⵓⵏⵉ ⵉⵥⵍⵉⵏ ⵉ ⵜⵏⴽⴷⴰ ⵏ ⵓⵙⵏⴼⴰⵔ ⵏ ⵓⵎⵕⵚⵓⵎ ⵏ ⵓⵙⴽⴰⵔ ⵏ  ⵓⵎⵉⴹⴰⵏ ⵉⵜⵜⵓⴼⴽⴰⵏ ⵉ ⵜⵖⴰⵡⵙⵉⵡⵉⵏ ⵥⵍⵉⵏⵉⵏ ⵙ ⵉⵙⵎ ⵏ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ  ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴽⵓⴼⵉⴷ 19, ⵍⵍⵉ ⵉⵜⵜⵓⵙⴽⴰⵔⵏ ⵙ ⵉⵙⵡⴰⵍⴰⵜⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴰⴷ ⵖ ⵉⵙⵡⵉⵔⵏ ⵏ ⵓⴷⵡⴰⵙ ⴷ ⵡⴰⵎⵓⵏ ⴷ ⵜⴷⵎⵙⴰ ⴷ ⵓⵥⵕⴼ. ⵜⵙⴽⵔ ⵜⵙⵇⵇⵉⵎⵜ ⴰⴷ ⵓⵍⴰ ⵢⴰⵜ ⵜⵙⵎⵓⵏⵉ ⴰⵙⵙ ⵏ 07 ⵉⴱⵔⵉⵔ ⵜⵥⵍⵉ ⵉ ⵜⵏⴽⴷⴰ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⵉⵣⴷⵉⵏ ⴷ ⵓⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ ⵍⵍⵉ ⴷ ⵢⵉⵡⵉ ⵓⵣⵎⵣ ⴰⴷ ⵉⵥⵍⵉⵏ ⵖ ⵜⵍⵍⴰ ⵜⵎⴰⵣⵉⵔⵜ ⵏⵏⵖ ⵙ ⴰⵢⵍⵍⵉ ⵉⵍⵍⴰⵏ ⵖ ⵓⵎⴰⴳⵔⴰⴷ 81 ⵏ ⵓⴷⵓⵙⵜⵓⵔ.

ⵓⵛⴽⴰⵏ ⴷ ⵜⵙⵏⵜⴰⵢⵉⵏ ⴰⴷ ⵜⵉⵣⵣⵔⴰⴼⵉⵏ ⵙ ⵓⵣⵣⴳⵉⵔ ⵏ ⵉⴱⴹⵉⵢⵏ ⵏ ⵓⴷⵓⵙⵜⵓⵔ ⴷ ⵜⵓⵎⴰⵢⵉⵏ ⵏ ⵓⵙⵍⴳⵏ ⴰⴳⵯⵏⵙⴰⵏ ⴷ ⵓⵡⵇⵇⵔ ⵏ ⵜⴱⵔⵉⴷⵉⵏ ⵉⵍⵍⴰⵏ.

ⵖ ⵓⵎⵏⴰⴹ ⴰⴷ, ⵜⵎⵓⵏ ⵢⴰⴷ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵙ ⵜⵉⵍⵉⵜ  ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵓⵙⵉ ⵍⵍⵉ ⵉⴼⴽⴰⵏ ⵢⴰⵜ ⵜⴽⵛⵛⵓⵎⵜ ⴼ ⵜⵎⵙⴽⴰⵔ ⵜⵉⴷⴰⵡⵙⴰⵏⵉⵏ ⵏ ⵡⴰⵔⴰⵢ ⴷ ⵉⵙⵡⵓⴷⴷⵓⵜⵏ ⵍⵍⵉ ⵉⵜⵜⵓⵙⴽⴰⵔⵏ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ.

ⵔⵉⵖ ⴰⴷ ⵙⵓⵜⴳⵖ ⵜⵉⵡⵉⵙⵉ ⵏ ⴽⵓ ⵜⵉⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⵏⵉⵢⵉⵏ ⴷ ⵜⴰⵎⵓⵏⵜ ⵜⴰⵎⴳⵔⵓⵜ ⵏ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⵡⴰⵡⵜⵜⴰⵙ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵓⵔⵣⵣⵓ ⵏ ⵉⵎⴰⵙⵙⵏ ⵏ ⵓⵙⵉⵜⵜⵉ ⵏ ⵉⵎⵉⵣⵉⵢⵏ ⵏⵏⵙ, ⵖⵎⴽ ⴰⵏⵏ ⵓⵍⴰ ⴷ ⵓⵙⵓⵜⴳ ⵏ ⵓⵎⵢⴰⵡⴰⵙ ⴷ ⵓⵏⵔⴰⵎⴰⵙ ⵉⵍⵍⴰⵏ ⵏⴳⵔ ⵜⵏⴱⴰⴹⵉⵏ ⵜⴰⵣⵣⵔⴰⴼⵜ ⴷ ⵜⵎⵣⵣⴳⴰⵔⵜ.

ⴰⴷ ⵓⵔ ⵜⵜⵓⵖ ⵓⵍⴰ ⴰⴷ ⵙⵓⵜⴳⵖ ⴰⵍⵜⴰⵖ ⵏ ⴽⵓ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⵙⵍⴰⵡⴰⵏ  ⴰⴽⴽⵯ ⵙ ⵜⵡⵉⵙⵉ ⵜⴰⵥⵕⴼⴰⵏⵜ ⵖ ⵓⴼⵏⵉⵇ ⵉⵜⵜⵓⵙⴽⴰⵔⵏ ⵉ ⵡⴰⵡⵜⵜⴰⵙ ⴰⴷ, ⵓⵍⴰ ⵙ ⵜⵡⵓⵔⵉ ⵏ ⵓⴱⴰⵔⴰⵣ ⵍⵍⵉ ⵙⴽⴰⵔⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵖ ⵉⵔⵓⵜⵜⵢⵏ ⵏ ⵓⵙⵜⴰⵢ. ⴰⵙⵓⵜⴳ ⴰⴷ ⴰⵔ ⵜ ⵜⵜⵉⵏⵉⵖ ⵓⵍⴰ ⵉ ⵜⵎⵙⵖⴰⵏⵉⵏ ⴷ ⵉⵎⵙⵖⴰⵏⵏ ⵏ ⵓⵙⵇⵇⵉⵎ ⴷ ⵉⵎⴷⵔⴰⵡⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⴼ ⵜⵡⵉⵣⵉ ⵏⵏⵙⵏ ⵜⴰⵥⵕⴼⴰⵏⵜ ⴷ ⵓⵍⵜⴰⵖ ⵏⵏⵙⵏ ⵖ  ⵜⵙⵏⵜⴰⵢⵉⵏ  ⵏ ⵜⵎⵓⵔⵉ.

ⵜⵉⵏⴳⴳⵯⴰ  ⴷ ⵉⵏⴳⴳⵯⴰ,

ⵖ ⵜⵎⵙⵓⵜⵍⵜ ⴰⴷ ⵉⵙⵇⵇⵉⵇⵏ, ⵉⵇⵇⴰⵏ ⴰⵖ ⴷ ⴽⵉⴳⴰⵏ ⵏ ⵓⵎⵓⵎⵎⵉ ⴷ ⵜⵉⴹⴰⴼ, ⵃⵎⴰ ⴰⴷ ⵏⴰⵡⵉ ⵜⴰⵎⴰⵖⵜ  ⴼ ⵓⴱⴰⵢⵢⵓⵕ, ⵢⵉⵍⵉ ⵓⵃⵟⵟⵓ ⵏ ⵜⵎⴰⵣⵉⵔⵜ ⵏⵏⵖ, ⴷ ⵜⵣⵣⵉⴳⵣⵜ ⵖ ⵓⵙⵎⵓⵙⵙⵓ ⵉ ⵓⵙⵖⵡⴰⵏ ⵙ ⵜⵎⵙⴽⴰⵔ ⵍⵍⵉ ⵜⵜⵉⵏⵉⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵖ ⵉⴳⵔⴰⵏ ⵏ  ⵜⴼⴰⵜⵉⵜ ⴷ ⵜⵖⵓⵙⵉ ⴷ ⵓⵡⵇⵇⵔ ⵏ ⵜⵏⴰⴹⵉⵏ ⵏ ⵓⵖⵉⵎⵉ ⵖ ⵜⴷⴷⴰⵔⵉⵏ, ⴷ ⵓⵙⴽⴰⵔ ⵙ ⵢⵉⵎⴰⵏ ⵏ ⵜⵓⴷⵔⵜ ⵜⴰⵎⴳⵔⵓⵜ ⴷ ⵓⵎⵢⴰⵡⴰⵙ ⴷ ⵜⵡⵉⵣⵉ.

ⵎⴰ ⴰⴷ ⵓⵔ ⴰⴽⴽⵯ ⵉⵛⵇⵇⵉ ⴼ ⵓⵎⴰⴷⴰⵏ ⴰⵎⵖⵔⵉⴱⵉ ⴷ ⵓⵔ ⴼⵍⵍⴰⵙ ⵉⴳⵉ ⵜⴰⵖⴰⵡⵙⴰ ⵜⴰⴱⵕⵕⴰⵏⵉⵜ, ⵉⵎⵍⴰ ⴷ ⴷⴰⵖ ⴰⴼⵔⴰⴽ ⵏⵏⵙ ⵢⴰⵜⵜⵓⵢⵏ ⴷ ⵡⴰⵜⵉⴳⵏ ⵍⵍⵉ ⴳⵉⵙ ⵉⵍⵍⴰⵏ, ⴷ ⵓⵎⵢⴰⵎⴰⵥ ⴷ ⵜⴰⵎⵓⵏⵜ ⵉⴷⵓⵙⵏ, ⴰⵔ ⵜⵏ ⵜⵙⵙⵡⴰ ⵜⵏⴰⵔⴰ ⴷ ⵜⵉⵔⴰⵜ ⵜⴰⴳⵍⴷⴰⵏⵜ ⵉⴳⴰⵏ ⵜⴰⵏⴰⵔⴰ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵙ ⵜⵓⵏⵥⵉⵥⵜ, ⵃⵎⴰ ⴰⴷ ⵏⴰⵡⵉ ⵜⴰⵎⴰⵖⵜ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵓⵣⵔⴰⵢ ⵏ ⵜⴼⵔⴽⴰ ⴰⴷ ⵙ ⵎⴰ ⴰⴷ ⵉⴷⵔⵓⵙⵏ ⵖ ⵡⴰⴽⴽⴰⵍⵏ.

ⵖ ⵓⵎⵏⴰⴹ ⵏ ⵜⵙⵓⵜⵍⵜ ⴰⴷ ⵜⴰⵣⵣⵔⴰⴼⵜ ⵍⵍⵉ ⵏⵕⵥⵎ ⴰⵙⵙ ⴰ, ⵉⵍⵍⴰ ⴼⵍⵍⴰⵖ ⴰⴷ ⵉⵍⵉⵏⵜ  ⵜⵡⵓⵔⵉⵡⵉⵏ ⵏⵏⵙ ⵖ ⵓⵙⵏⵎⴰⵍⴰ ⴷ ⵜⵎⵙⴽⴰⵔ ⴷ ⵜⵉⵍⵉⵜ ⴷ ⵜⵓⵎⴰⵢⵜ, ⴷ ⵓⵎⵏⴰⴹ ⴷ ⵜⵎⵙⵓⵜⵍⵉⵏ ⵥⵍⵉⵏⵉⵏ, ⵏⵎⵎⴰⵖ ⵓⵍⴰ ⴰⴷ  ⵏⵓⵇⵇⵔ ⵙ ⵜⵖⴰⵔⴰⵙⵜ ⵙⵇⵉⵇⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⴷ ⵉⴱⴹⵉⵢⵏ ⵏ ⵓⵙⵍⴳⵏ  ⴰⴳⵯⵏⵙⴰⵏ.

ⵎⵛⴰⵛⴽⴰⵏ ⴷ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴼ ⴰⴷ ⵜⵣⵣⵉⴳⵣⵜ ⵜⵎⵔⵙⵍⵜ ⵖ ⵜⴰⵡⵓⵔⵉ ⵏⵏⵙ ⵖ ⵉⴳⵔⴰⵏ ⵏ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵢⵉⴳⵔ ⵏ ⵓⵣⵣⵔⴰⵢ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⴰⴷ ⵢⵉⵍⵉ ⵓⵙⵎⵀⵍ ⵏ ⵓⴷⵓⵙⵜⵓⵔ, ⴷ ⴰⴷ ⵜⴳ ⵢⴰⵏ ⵓⴳⵣⵣⵓⵎ ⵖ ⴽⵓ ⵜⵉⵎⵔⵙⴰⵍ ⵖ ⵜⵎⴰⵖⵜ ⴷ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⵙ ⵜⵏⴽⴷⴰ ⵏ ⵜⵙⵓⵎⴰⵔ ⴷ ⵉⴼⵙⵙⴰⵢⵏ ⴷ ⵓⵙⵏⴰⵍ ⴰⵙⵔⵜⴰⵏ ⴷ ⵓⵎⵔⵙⵍⴰⵏ ⵉ ⵜⵏⴱⴰⴹⵉⵏ ⵢⴰⴹⵏⵉⵏ. ⵎⴰ ⴰⴷ ⴳⵉⵙ ⵢⴰⵜ ⵜⴱⵔⴰⵜ ⵏ ⵜⵉⴹⴰⴼ ⵙ ⵓⵙⵡⵓⵔⵉ ⵙ ⴽⵓ ⵜⵉⵖⴰⵔⴰⵙⵉⵏ ⵉⵍⵍⴰⵏ ⵙ ⵓⵃⵟⵟⴰ ⵏ ⵎⴰ ⴰⴷ ⵜⵙⵉⴳⴳⵉⵍ ⵜⴼⴰⵜⵉⵜ ⵜⴰⴷⴰⵡⵙⴰⵏⵜ.

ⴰⵢⵍⵍⵉ ⴼ ⴷ ⵉⵇⵇⴰⵏ  ⴰⵙⵇⵇⵉⵎ ⵏⵏⵖ ⴰⴷ ⵜ ⵉⵙⴽⵔ, ⵖ ⵜⴹⴼⵕⵉ ⴷ ⵓⴽⴰⵎ ⵏ ⵜⵎⵙⴽⴰⵔ ⵜⵉⴳⴷⵓⴷⴰⵏⵉⵏ ⵍⵍⵉ ⵉⵜⵜⵓⵙⴽⵉⵔⵏ ⵖ ⵜⵎⴰⵖⵜ ⴷ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⴳⴳⵓⵜⵏⵉⵏ, ⵉⴳ ⵎⴰ ⴰⵏⵏ ⵖ  ⵓⴳⵯⵏⵙ ⵏ ⵜⵥⵍⴰⵢⵉⵏ ⵏⵏⵖ ⴷ ⵜⵎⵙⴽⴰⵔ ⵏⵏⵖ, ⵔⴰⴷ ⴼⵍⵍⴰⵖ ⵢⵉⵍⵉ ⴰⴷ ⵏⵣⵣⵉⴳⵣ ⵖ ⵓⵣⵣⴳⵉⵔ ⵏ ⵓⵖⴰⵡⴰⵙ ⵏⵏⵖ ⵖ ⵢⵉⴳⵔ ⵏ ⵜⵉⴹⴰⴼ ⴷ ⵓⵣⵣⵔⴰⴼ ⵙ ⵜⵖⵓⵔⵉ ⵏ ⵉⵙⵏⴼⴰⵔⵏ ⴷ ⵜⵙⵓⵎⴰⵔ ⵏ ⵉⵙⵍⴳⵏⵏ ⵍⵍⵉ ⴰⵖ ⴷ ⵉⵍⴽⵎⵏ ⵖ ⵜⵉⵣⵉ ⵉⵍⵍⴰⵏ ⵏⴳⵔ ⵙⵏⵜ ⵜⵙⵓⵜⵍⵉⵏ ⴷ ⴰⵢⵍⵍⵉ ⵔⴰⴷ ⴰⵖ ⴷ ⵉⵍⴽⵎ ⵖ ⵜⵙⵓⵜⵍⵜ ⴰⴷ, ⵙⵍⴰⵡⴰⵏ ⴰⴽⴽⵯ ⵎⴰ ⴰⴷ ⵉⵣⴷⵉⵏ ⴷ ⵓⵎⵏⴰⴹ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ.

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ, ⵀⴰⵏⵏ ⵏⵍⵍⴰ  ⴰⴽⴽⵯ ⵖ ⵢⴰⵜ ⵜⵎⴰⵖⵜ ⵜⴰⵎⴳⵔⵓⵜ, ⴰⵡⵜⵜⴰⵙ ⵉⵛⵛⴰⵔⵏ ⴰⵙⵙ ⴰⴷ, ⴷ ⵜⵎⵙⴽⵔⵜ ⵜⴰⴷⵙⵍⴰⵏⵜ ⵜⴰⵣⵎⵣⴰⵏⵜ ⴰⵙⵙ ⴰⴷ, ⴰⴷ ⵏⵎⵎⴰⵖ ⴷ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ, ⵖⵉⴽ  ⴰⵏⵏ ⴰⴼ ⵉⵅⴰⵚⵚⴰ ⴰⴷ ⵏⵙⵔⵙ ⴰⵢⵍⵍⵉ ⴰⵖ ⵉⵥⵍⵉⵏ  ⴼ ⵜⵙⴳⴰ ⵏⴰⵊⵊ ⵖⵉⵍⴰⴷ ⴰⵎⵃⵉⵣⵡⵔ ⴰⵙⵔⵜⴰⵏ ⵉⴳⴰⵏ ⵓⵍⴳⵉⵏ, ⵏⵙⴳⴳⵔⵓ ⴰⵣⵣⵔⴰⵢ. ⵎⴰ ⴰⴷ ⴰⴼ ⵏⵣⵣⵉⴳⵣ ⴰⵙⵙ ⴰⴷ ⵎⵍⵉⵏ ⵜ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⴰⵡⵙⵏ ⴳⵉⵙ, ⵢⵉⵍⵉ ⵓⵙⵎⵀⵍ ⵏ ⵜⵎⵓⵔⵉ ⵖ ⵜⵎⴰⵖⵜ ⴰⴷ ⵜⴰⵖⵓⵍⴰⵏⵜ.

ⵉⴳⴰ ⵖ ⵡⴰⵡⵜⵜⴰⵙ ⵏⵏⵖ ⴰⵙⵙ ⴰⴷ, ⴷ ⵜⵎⵙⴽⵔⵜ ⵏⵏⵖ ⵜⴰⵏⴰⵎⵎⴰⵙⵜ, ⴰⴷ ⵏⵎⵓⵏ ⵙ ⴽⵉⴳⴰⵏ ⴷ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ, ⵏⴰⵣⵏ ⵜⵉⴱⵔⴰⵜⵉⵏ ⵉ ⵓⴳⴷⵓⴷ, ⴷ ⵉⴷ ⴱⴰⴱ ⵏ ⵜⴷⴰⵡⵙⴰ, ⵉⵖⵔⵎⴰⵏⵏ ⴷ ⵉⵄⴰⵙⴽⴰⵔⵉⵢⵏ, ⵉ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⵉ ⵉⵃⵏⵊⴰⵔⵏ  ⵏⵏⵖ, ⵉ ⵉⵄⵔⵔⵉⵎⵏ ⵏⵏⵖ, ⵎⴰⵙ ⵜⴳⴰ ⵜⴼⵔⴽⴰ ⴰⴷ ⵜⵉⵏ ⵜⵉⴹⴰⴼ ⴷ ⵜⵎⴰⵙⴰⵢⵜ ⴷ ⵜⵡⵉⵣⵉ, ⴷ ⵓⵖⵉⵎⵉ ⵖ ⵜⴳⵯⵎⵎⴰ ⵏⵏⵖ, ⴰⵛⴽⵓ ⴰⵄⴷⴰⵡ ⵏⵏⵖ, ⴰⵄⴷⴰⵡ ⵏ ⵜⴼⴼⵓⴳⵏⴰ, ⵉⴳⴰ ⵎⵓⵔⵔⴰⵏ, ⵉⵇⵇⴰⵏ ⴷ ⵉ ⵓⵙⴱⴷⴷⵉ ⵏⵏⵙ ⴰⴷ ⵢⵉⵍⵉ ⵓⵎⵢⴰⵎⴰⵥ ⴰⵏⴰⵎⵓⵏ ⴷ ⵜⴰⵎⵓⵏⵜ ⵜⴰⵏⴰⵎⵓⵔⵜ ⴷ ⵓⵡⵇⵇⵔ ⵏ ⵜⵏⴰⴹⵉⵏ ⴷ ⵜⵎⵙⴽⴰⵔ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⵉⵡⴰⵜⵜⵙⵏ  ⴰⵃⵟⵟⵓ ⵏ ⵡⴰⵎⵓⵏ ⴷ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⴷ ⵓⵙⵡⵓⵜⵜⵓ ⵏ ⵉⴷⵔⵉⵣⵏ ⵏⵏⵙ.

ⵖ ⵜⴳⵉⵔⴰ, ⵏⵓⵜⵜⵔ ⵉ ⵕⴱⴱⵉ ⴰⴷ ⵉⴷⵍ ⵙ ⵜⵎⵍⵍⴰ ⵏⵏⵙ ⵡⵉⴷⴰ ⵎⵎⵓⵜⵏⵉⵏ ⵙ ⵓⴱⴰⵢⵢⵓⵕ  ⴰⴷ, ⵉⴼⴽ ⵜⵉⵥⵉⴹⵕⴰ ⵉ ⵜⴰⵡⵊⵉⵡⵉⵏ ⵏⵏⵙⵏ, ⵏⵓⵜⵜⵔ ⵉ ⵕⴱⴱⵉ ⴰⴷ ⴰⵖ ⵢⴰⵡⵙ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ, ⵉⵃⴼⴹ ⵜⴰⵎⴰⵣⵉⵔⵜ ⵏⵏⵖ ⵖ  ⴽⵓ ⵎⴰ ⴰⴷ ⵉⵀⵔⵛⵏ ⵃⵎⴰ ⴰⴷ ⵜⵙⵓⵍ ⵜⵣⵣⵉⴳⵣⵜ ⵏⵏⵙ ⵙ ⵜⵉⵔⴰⵜ ⵉⴷⵓⵙⵏ ⴷ ⵓⵎⵓⵎⵎⵉ ⵉⵊⵀⴷⵏ, ⵙ ⵜⵏⴰⵔⴰ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ.

ⵜⴰⵏⵎⵎⵉⵔⵜ ⴼ ⵓⵙⴼⵍⴷ ⵏⵏⵓⵏ