ⵜⴰⴳⵓⵔⵉ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⵙⵎⵎⵓⵙ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ

ⵎⴰⵙⵙ ⴰⵎⴰⵡⵙⴰⵙ ⵏ ⵓⵡⴰⵏⴽ

ⵜⵉⵏⴳⴳⵯ ⴷ ⵉⵏⴳⴳⵯⴰ ⴷ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⴷⴰ ⵏⵜⵜⵕⵣⵓⵎ ⵜⴰⵙⵓⵜⵍⵜ ⵜⴰⵣⵣⵔⴰⴼⵜ ⵜⴰⵎⴳⴳⴰⵔⵓⵜ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ, ⴳ ⵜⵎⵙⵓⵜⵍⵉⵏ ⵥⵍⵉⵏⵉⵏ ⴷ ⵓⵎⵏⴰⴹ ⴳ ⵍⵍⴰⵏ ⵉⵙⵏⴼⵍⵏ ⵍⵍⵉ ⴷ ⵢⵉⵡⵉ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵙ ⵉⴷⵔⵉⵣⵏ ⵏⵏⵙ ⵍⵍⵉ ⵉⵙⴽⵔ ⴳ ⴽⵓ ⵉⴳⵔⴰⵏ ⵏ ⵜⵓⴷⵔⵜ ⵜⴰⵙⵔⵜⴰⵏⵜ ⴷ ⵜⴷⵎⵙⴰⵏⵜ ⴷ ⵜⵏⴰⵎⵓⵏⵜ, ⴳ ⵉⵙⵡⵉⵎⵏⴳⵉⵎⵏ ⴷ ⵜⵎⵙⴽⴰⵔ.

ⴷ ⵏⵜⵜⵕⵣⵓⵎ ⵜⴰⵙⵓⵜⵍ ⴰⴷ ⴷⴼⴼⵉⵔ ⵏ ⵢⴰⵜ ⵉⵥⵍⵉⵏ, ⵉⴳⴰⵏ ⵜⵉⵙ ⴽⵕⴰⴹⵜ ⴳ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ, ⴳ ⵏⵙⵖⵣⵏ ⵜⵟⴰ ⵏ ⵉⴹⵕⵉⵚⵏ ⴳⴰⵏⵉⵏ ⵉⵎⴰⴷⴷⴰⵙⵏ ⴷ ⵉⵏⵎⵢⴰⵔⵏ, ⵉⴹⵕⵉⵚⵏ ⵟⵟⴰⴼⵏⵉⵏ ⴰⵜⵉⴳ ⵏⵏⵙⵏ ⴰⵙⵔⵜⴰⵏ ⴷ ⵓⵎⵔⵙⵍⴰⵏ, ⴳⴰⵏ ⵉⵣⵣⵔⴰⴼⵏ ⴼ ⵉⵙⵜⴰⵢⵏ ⵍⵍⵉ ⵔⴰⴷ ⵜⵙⵏⵎⴰⵍⴰ ⵜⵎⴰⵣⵉⵔⵜ ⵏⵏⵖ ⴳ ⵓⵙⴳⴳⵯⴰⵙ ⴰⴷ, ⵉⵍⵉⵏ ⵓⵍⴰ ⵡⵉⵏ ⵓⵏⴱⴰⴹ ⴷ ⵜⵎⴰⴼⴰⵡⵜ ⵍⵍⵉ ⵙ ⵉⵇⵇⵍ ⵓⵎⵏⵉⴷ ⴰⵎⴰⵜⴰⵢ ⴳ ⵓⵎⵏⴰⴹ ⵏ ⵓⵙⴽⵔ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ ⵏ 2011.

ⵉⵇⵇⴰⵏ ⴷ ⴰⴷ ⵏⴼⵔⴽ ⵙ ⵡⴰⵜⵉⴳ ⵏ ⵓⵙⵖⵣⵏ ⵏ ⵉⴹⵕⵉⵚⵏ ⴰⴷ ⴳ ⵓⵙⵕⵚⵓ ⵏ ⵓⵚⴽⵓ ⴰⵎⵔⵙⵍⴰⵏ, ⴷ ⵓⴹⵎⵏ ⵏ ⵜⵍⵍⵓⴳⵏⴰ ⵏ ⵜⵡⵓⵔⵉⵡⵉⵏ ⵏ ⵉⵙⵜⴰⵢⵏ ⵉⵍⴻⵍⵍⵉⵢⵏ, ⵙⴽⵔⵏⵉⵏ ⴰⴱⴰⴹ ⴰⴷⵏⴰⵏ, ⵡⴰⵅⵅⴰ ⵉⵍⵍⴰ ⵓⵎⵏⴰⴹ ⵉⵥⵍⵉⵏ.

ⵉⵇⵇⴰⵏ ⴷ ⴰⴷ ⴷⴰⵔⵏⵖ ⵢⵉⵍ ⴳ ⵍⵎⵖⵔⵉⴱ, ⴰⵡⴰⵏⴽ ⴰⵇⴱⵓⵔ, ⵉⵟⵟⴰⴼⵏ ⵉⵥⵓⵕⴰⵏ ⵏⵏⵙ ⴳ ⵓⵎⵣⵔⵓⵢ, ⵎⴰⵙ ⴷ ⴰⵅⵎⵎⴻⵎ ⴳ ⵜⵍⵍⵓⴳⵏⴰ ⵏ ⵉⵙⵜⴰⵢⵏ ⵉⴳⴰ ⴰⵙⴽⵔ ⵏ ⵓⵡⴰⵏⴽ ⵏ ⵜⵎⵔⵙⴰⵍ ⴷ ⵓⵔⴳⴳⵉⴳ ⵏⵏⵙⵏⵜ ⴷ ⵜⵣⵣⵉⴳⵣⵜ ⵏⵏⵙⵏⵜ, ⴷ ⵍⵍⵉⵖ ⵜⴳⴰ ⵜⵎⴰⵣⵉⵔⵜ ⵏⵏⵖ ⴰⴳⵣⵣⵓⵎ ⴳ ⵓⵎⴰⴹⴰⵍ ⴰⴷⵉⵎⵓⵇⵔⴰⵟⵉ ⵉⵍⴻⵍⵍⵉ, ⵉⴳⴰⴷⴷⴰ ⵓⵅⵎⵎⴻⵎ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⴷ ⴽⵓ ⵜⵉⵏⴱⴰⴹⵉⵏ ⴼ ⵉⴼⵔⴷⴰⵙ ⵉⵙⵔⵜⴰⵏⵏ ⴼ ⵜⵍⵍⵓⴳⵏⴰ ⵏ ⵉⵙⵜⴰⵢⵏ, ⵉⴳⴰⴷⴷⴰ ⴷ ⵓⵅⵎⵎⴻⵎ ⴰⵎⴳⵔⵓ ⴼ ⵜⵎⴰⴼⴰⵡⵜ ⵏⵏⵙⵏ, ⴷ ⵓⵙⴽⵔ ⵏⵏⵙⵏ ⵙ ⵓⵙⴰⵜⵉ ⵏ ⵜⵎⴰⴼⴰⵡⵜ ⴷ ⵜⵏⴳⴰⴷⴷⴰⵢⵜ ⴳ ⵡⴰⵏⵏⴰⵣⵏ ⵏ ⵉⴽⴰⴱⴰⵕⵏ ⵓⴷⴷⵉⵔⵏ ⵉⵎⵖⵏⴰⵏⵏ. ⴰⵔ ⵉⵜⵜⵚⵉⵃⵉ ⵓⴼⵓⵍⴽⵉ ⵉ ⵜⵎⴰⵣⵉⵔⵜ ⴷ ⵓⴱⵓⵔⵣ ⵏⵏⵙ ⴷ ⵓⴷⵖⴰⵔ ⵏⵏⵙ ⴰⴳⵔⴰⵖⵍⴰⵏ ⴷ ⵓⵊⵢⵓⵙⵔⵜⴰⵏ, ⵖⵎⴽ ⴰⵏⵏ ⴷ ⵓⵔⴳⴳⵉⴳ ⵏ ⵜⵎⵓⵔⵜ ⴷ ⵡⴰⵏⴰⵡ ⵏⵏⵙ ⴰⴷⵉⵎⵓⵇⵔⴰⵟⵉ ⴳ ⵓⵎⵏⴰⴹ ⴰⵏⵎⵏⴰⴹ ⵓⵔ ⵉⴳⴰⴷⴷⴰⵏ, ⵙ ⵜⵎⵓⴽⵔⵉⵙⵉⵏ ⴷ ⵜⴰⵙⵙⴰⵙⵉⵏ ⵍⵍⵉ ⴷ ⵉⴼⵍ, ⵓⵔ ⵉⴱⴰⵢⵏ ⵉⵙ ⵔⴰⴷ ⵢⵉⵍⵉ ⵓⴼⵙⵙⴰⵢ ⵏⵏⵙⵏⵜ ⴳ ⵎⴰⴷ ⵢⴰⵥⵏ.

ⵉⵇⵇⴰⵏ ⴷ ⴰⴷ ⵏⵉⵍⵉ ⴳ ⵓⵙⵡⵉⵔ ⵏ ⵜⵢⴰⴼⵓⵜⵉⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵜⵎⵙⴽⴰⵔ ⵏⵏⵙ ⵜⵉⵙⵔⵜⴰⵏⵉⵏ ⴷ ⵉⵎⵓⴽⵏⵏ ⵍⵍⵉ ⵜⵙⴽⵔ ⵙ ⵉⵎⵙⴰⵙⴰⵏ ⵉⵅⴰⵜⴰⵔⵏ ⴷ ⵉⵎⵣⵔⴰⵢⵏ, ⵙ ⵓⵙⴳⵓⴷⵉ ⵏ ⵉⵎⵓⴽⵏⵏ ⴳ ⵜⴰⵙⵓⵜⵉⵏ ⵏ ⵡⴰⴽⵓⴷ, ⵙ ⵜⵓⵏⵥⵉⵥⵜ ⴷ ⵉⵥⵕⵉ ⵉⴷⵔⴰⵏ ⵏ ⵉⴳⵍⴷⴰⵏ ⵏⵏⵙ ⵉⵅⴰⵜⴰⵔⵏ ⵉⴳⵍⵍⵉⵏ ⵏ ⵓⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵙⵎⵎⵓⵙ ⴷ ⵉⴳⵍⵍⵉⵏ ⴱⴰⴱ ⵏ ⵡⴰⴷⴷⵓⵔ ⵍⵃⴰⵙⴰⵏ ⵡⵉⵙ ⵙⵉⵏ ⴰⴷ ⵜⵏ ⵉⵕⵃⵎ ⵕⴱⴱⵉ, ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ.

ⵙ ⵓⵙⴷⴷⴻⴷ, ⵜⴳⴰ ⵜⵍⵍⵓⴳⵏⴰ ⵏ ⵉⵎⵛⴰⵡⴰⵕⵏ ⵉⵎⵙⵜⴰⵢⵏ ⴷ ⵜⵎⴰⴼⴰⵜ ⵏⵏⵙⵏ, ⵜⴰⴷ ⵉⴹⵎⵏⵏ ⴰⵔⴳⴳⵉⴳ ⵏ ⵜⵎⵔⵙⴰⵍ, ⴳⵉⵏ ⴰⵙⴽⵔ ⵏ ⵜⴷⵉⵎⵓⵇⵔⴰⵔⴰⵟⵉⵜ ⴷ ⵜⵎⵍⴷⴰ ⵉ ⵉⴽⴰⴱⴰⵕⵏ ⵉⵙⵔⵜⴰⵏⵏ ⵉ ⵓⵏⵢⴰⵍⴽⴰⵎ ⵏ ⵉⵎⵙⵜⵉⵢⵏ ⴷ ⵓⵙⴽⵔ ⵏ ⵜⵉⵍⴰⵍⵜ ⵏⵏⵙ ⵍⵍⵉ ⵓⵔ ⵉⵜⵜⵢⵓⴼⴰ ⴰⴷ ⵉⵜⵜⵓⵙⵉⵜⵜⵉ ⵏⵖ ⵉⵍⵍⴰ ⴼ ⵜⵙⴳⴰ. ⵉⵇⵇⴰⵏ ⴰⵖ ⴷ ⵓⵙⵓⵜⴳ ⵏ ⵓⵔⴳⴳⵉⴳ ⴰⴷ ⴰⵔⵙⵍⴰⵏ, ⵖ ⵏⴳⴰ ⴰⵎⴰⴷⴰⵏ ⴷ ⵜⵎⵔⵙⴰⵍ ⴷ ⵉⴼⵔⴷⴰⵙ ⵉⵙⵔⵜⴰⵏⵏ, ⴰⵢⵍⵍⵉ ⵔⴰⴷ ⵉⵙⴽⵔ ⵜⵉⴳⵎⵉ ⵙ ⵜⵎⴰⵎⴽⵜ ⵉⵕⵡⴰⵏ. ⴰⵢⵍⵍⵉ ⵉⵜⵜⵕⵥⵓⵎⵏ ⴷⴰⵜ ⵏⵏⵖ ⴳ ⵉⵎⴰⵍ ⵜⵉⵎⵙⴽⴰⵔ ⵜⵉⵎⴰⵢⵏⵓⵜⵉⵏ ⵥⵉⵍⵏⵉⵏ, ⵉⵣⵣⵉⴳⵣ ⵓⵥⵏⵥⵕ ⵏⵏⵖ ⵍⵍⵉⵖ ⵏⴳⴰ ⵜⴰⵎⵜⵜⵉ ⵍⵍⵉ ⵉⴳⴰⵏ ⵎⴰⴷ ⵉⵍⴰ ⵓⵎⵣⵔⵓⵢ ⵢⴰⵜ ⵜⴷⵓⵙⵉ ⵉⵟⵟⴰⴼⵏ ⵜⵉⵍⴰⵍⵜ ⵏⵏⵙ ⴳ ⵓⵎⵏⴰⴹ ⵏ ⵓⵎⵏⵥⴰⵡ ⴷ ⵓⵕⵓ-ⴰⵏⴰⵎⵎⴰⵙ ⴷ ⵡⴰⵄⵕⴰⴱ ⴷ ⵓⵙⵍⵉⵎ, ⵜⴻⵟⵟⴼ ⴰⴷⵔⵉⵣ ⴳ ⵓⵎⵣⵔⵓⵢ ⴰⵏⴼⴳⴰⵏ.

ⵉⵏⴳⴳⵯⴰ ⵜⵉⵏⴳⴳⵯⴰ,

ⵜⵣⴷⵉ ⵜⴼⵔⴽⴰ ⴰⴷ ⵏ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵉⵟⵟⴰⴼⵏ ⵉⴷⵔⵉⵣⵏ ⴳ ⴽⵓ ⵉⴳⵔⴰⵏ ⵏ ⵜⵓⴷⵔⵜ ⵉⴷⵓⵙⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⵍⵍⵉⵖ ⵉⴳⴰ ⵓⴱⴰⵢⵢⵓⵕ ⵉⵙⴷⵔ ⵏ ⵜⴼⴼⵓⴳⵏⴰ ⴳ ⵜⴰⵙⵓⵜ ⵜⵉⵙ ⴽⵕⴰⴹⵜ ⴳ ⵜⵏⵉⴼⴹⵜ ⵜⵉⵙ ⴽⵕⴰⴹⵜ, ⵉⴳⴰ ⵓⵙⴱⴷⴷⵉ ⵏⵏⵙ ⴷ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⵍⵍⵉ ⵉⵙⴽⵔ ⴰⴼⵔⴷⵉⵙ ⵍⵍⵉ ⵔⴰⴷ ⵉⵥⵍⵉ ⵏⴳⵔ ⵉⵡⴰⵏⴽⵏ.

ⴳⴰⵏⵜ ⵜⵥⴹⴰⵕⵉⵏ ⵜⵉⵥⵕⴼⴰⵏⵉⵏ ⴷ ⵜⵎⵜⵜⴰⵡⵉⵏ ⴷ ⵜⴷⵎⵙⴰⵏⵉⵏ ⴷ ⵜⵓⵚⴽⵉⵡⵉⵏ ⵏ ⵜⵙⵏⵉⵊⵊⵉⵜ ⴷ ⵉⵙⵓⴳⴰⵎ ⵉⵏⴼⴳⴰⵏⵏ ⵜⵜⵎⵓⵙⵙⴰⵏⵉⵏ ⵉ ⵡⴰⵡⵜⵜⴰⵙ ⴰⴷ ⵜⵉⴷⵙⵍⴰⵏⵉⵏ, ⵎⴰⵛ ⴰⵔ ⵜⵉⵍⴰⵡⵜ ⴰⵔ ⵜⵎⵎⴰⵍ ⵓⵍⴰ ⵎⴰⵙ ⵜⴳⴰ ⵜⵏⴰⵔⴰ ⵜⴳ ⵓⴽⴰⵏ ⵙⵓⵍ ⴰⴼⵔⴷⵉⵙ ⵉⵜⵜⴱⴷⴰⴷⵏ ⴼ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ.

ⵢⵉⵡⵉ ⴷ ⵓⵙⵡⵓⴷⴷⵓ ⵏ ⵜⵎⴰⵣⵉⵔⵜ ⵏⵏⵖ ⵏ ⵜⴰⵙⵙⴰⵙⵜ ⵏ ⵓⴱⴰⵢⵢⵓⵕ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ, ⴷ ⵓⵍⵜⴰⵖ ⴽⵓ ⵜⵉⵎⵔⵙⴰⵍ ⴰⴷ ⵜⵉⵍⵉ ⵢⴰⵜ ⵜⵉⵔⵎⵉⵜ ⴷ ⵢⴰⵏ ⵡⴰⴷⴷⴰⴷ ⴰⵎⵖⵔⵉⴱⵉ ⵉⵥⵉⵍⵏ ⵉⴳⴰⵏ ⴰⵎⵣⵡⴰⵔ, ⴰⵢⵍⵍⵉ ⵙⵓⵜⴳⵏⵜ ⵜⵎⴰⴷⴷⴰⵙⵉⵏ ⵜⵉⴳⵔⴰⵖⵍⴰⵏⵉⵏ ⴷ ⵉⵎⴰⴷⵔⴰⵡⵏ ⵉⴱⵕⵕⴰⵏⵉⵢⵏ, ⴷ ⵉⵎⵥⵕⴰⵢⵏ ⵉⵎⵙⵖⵓⵔⵉⵢⵏ. ⵉⴳⴰ ⵡⴰⴷⴷⴰⴷ ⴰⴷ ⴰⵎⵖⵔⵉⴱⵉ ⵜⵉⵙⵔⵜⴰⵢ ⴷ ⵉⵙⵡⵓⴷⴷⵓⵜⵏ ⴷ ⵉⵣⵣⵔⴰⴼⵏ ⴷ ⵜⵎⴰⵎⴽⵉⵏ ⵏ ⵓⵙⵥⵕⴼ ⴷ ⵜⵎⴳⵓⵔⵉ ⴷ ⵓⵙⵏⵎⴰⵍⴰ ⵏ ⵜⵎⵣⵡⵓⵔⴰ, ⵙ ⵎⴰⴷ ⵉⵎⵙⴰⵙⴰⵏ ⴷ ⵓⵎⵏⴰⴹ ⴰⵎⵖⵔⵉⴱⵉ, ⴷ ⵜⵎⵥⵍⴰⵢ ⴷ ⵜⵎⵢⵓⵔⵉⵏ ⵏ ⵍⵎⵖⵔⵉⴱ ⴳ ⵓⵣⵎⵣ ⵏ ⵜⴰⵙⵙⴰⵙⵜ ⴷ ⵜⵎⵙⵓⵜⵍⵉⵏ ⵥⵍⵉⵏⵉⵏ. ⵉⴳⴰ ⴳ ⵜⵎⵥⵍⴰⵢ ⵏ ⵡⴰⴷⴷⴰⴷ ⴰⴷ ⵍⵍⵉⵖ ⵜⵎⵔⵙ ⵜⵎⴰⵣⵉⵔⵜ ⵏⵏⵖ ⴰⴷ ⵜⵙⴳⵍⵍⴱ ⵉⵎⵉⵣⵉⵢⵏ ⵙ ⵉⵇⵉⵍⵏ, ⴷ ⵓⵛⵃⵓ ⴳ ⵉⵙⵓⴳⴰⵎ ⵙ ⵜⵙⵏⵜⴰⵢⵉⵏ ⵕⵡⴰⵏⵉⵏ, ⵜⴰⵙⵙⴰⵙⵜ ⵙ ⵡⴰⵏⵏⴰⵣⵏ, ⵓⴷⵎⴰⵡⵏ ⵏ ⵜⵛⵛⴰⵃⵓⵔⵜ ⵙ ⵜⵡⵉⵙⵉ ⴷ ⵜⵏⴽⵔⴰ ⵏ ⵓⵎⵛⴰⴱⴱⴰⴽ ⴰⵏⴰⵎⵓⵔ.

ⵉⵍⵍⴰ ⵎⴰ ⵔⴰⴷ ⵉⵙⵇⵙⴰ ⴳ ⵎⴰⵏⵉ ⴳ ⵉⵍⵍⴰ ⵓⵎⵣⵔⴰⵢ?  ⵜⵉⴽⴽⵍⵉⵜ ⵢⴰⴹⵏⵉⵏ ⴷⴰ ⵏⵙⴷⴷⵉⴷ ⵎⴰⵙ ⵉⵍⵍⴰ ⴳ ⵓⵙⵡⵓⴷⴷⵓ ⴰⴷ ⵡⴰⵜⵉⴳ ⵏ ⵜⵏⴰⵔⴰ, ⴷ ⵜⴷⵓⵙⵉ ⵏ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ. ⵍⵍⵉⴳ ⵉⵎⵔⵙ ⵍⵎⵖⵔⵉⴱ ⴳ ⵉⵎⵉⵥ ⵏ ⵜⵎⵓⴽⵔⵉⵙⵉⵏ ⵜⵉⵎⵣⵡⵓⵔⴰ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⴷ ⵡⴰⵍⴰⵢ ⵏ ⵜⵏⴰⵥⴰⵕⵉⵏ ⴰⵏⵏ, ⴳ ⵜⴼⵔⴽⴰ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵉⵙⵖⴰⵡⵙⴰⵜⵏ ⵏⵏⵙ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ, ⴷ ⵜⵙⵏⵉⵊⵊⵉⵜ ⵏ ⵉⵎⵓⴹⴰⵏ, ⴷ ⵜⵡⵓⵔⵉ ⵜⴰⴱⵉⴷⴰⴳⵓⵊⵉⵜ ⵉⵥⵉⵍⵏ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵜⵉⵏⴰⵎⵎⴰⵙⵉⵏ ⴷ ⵜⴷⵖⴰⵔⴰⵏⵉⵏ, ⴷ ⵓⵙⵎⵓⵙⵙⵓ ⴰⵏⴰⵎⵓⵏ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ, ⴷⴰ ⵉⵙⴽⴰⵔ ⴰⵎⵓⵔⵙ ⵓⵍⴰ ⴳ ⵓⵙⵎⵓⵙⵙⵓ ⵏ ⵓⴳⵣⵣⴰⵢ ⵍⵍⵉ ⵉⵕⵥⵎ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ 28 ⵉⵏⵏⴰⵢⵔ 2021, ⵍⵍⵉⴳ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵢⴰⵜ ⵜⵙⵜⵔⴰⵜⵉⵊⵉⵜ ⵏ ⵓⵚⴽⵓ ⵏⵏⵙ ⴼ ⵜⵔⵙⴰⵍ ⴷ ⵉⵙⵓⵖⴰⵍ ⴷ ⵉⵙⵖⵉⵡⵙⵏ  ⴳ ⵍⵍⴰⵏ ⵜⴰⵙⵍⴽⴰ, ⴰⵙⵏⵎⴰⵍⴰ ⵏ ⵜⵎⵣⵡⵓⵔⴰ ⴷ ⵓⴱⵟⵟⵓ ⴰⵣⵔⴼⴰⵏ ⴼ ⵉⴷⵖⴰⵔⵏ ⴷ ⵉⵡⴷⴰⵏ, ⴷ ⵜⵉⴽⴽⵉ ⵏ ⵜⵣⵡⵉⵔⵉ ⵉ ⵡⵉⴷⴰ ⵙⵜⴰⵀⵍⵍⴰⵏⵉⵏ ⴷ ⵡⵉⴷⴰ ⴱⴷⴷⵏⵉⵏ ⴳ ⵉⵣⵔⵉⵔⵉⴳⵏ ⵉⵎⵣⵡⵓⵔⴰ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ, ⴷ ⵓⵡⵇⵇⵔ ⵏ ⵉⵙⵖⴰⵍ ⵙⵇⵇⵉⵇⵉⵏ ⴳ ⵓⵣⵣⴳⵉⵔ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ,

ⵉⵇⵇⴰⵏ ⴰⵖ ⴷ ⴰⴷ ⴱⴰⵀⵔⴰ ⵏⵙⵓⵜⴳ ⴰⵜⵉⴳ ⴷ ⵓⵏⵛⴽ ⴷ ⵡⴰⵏⴰⵡ ⵏ ⵎⴰ ⵔⴰⴷ ⵏⵙⴽⵔ ⴳ ⵓⵣⵎⵣ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴰⴷ ⵡⵉⵙ ⵚⴹⵉⵚ ⴷ ⵜⵏⴰⵔⴰ ⵏⵏⵙ ⵉⵙⵙⴼⴰⵡⵏ ⵉⴳⴰⵏ ⵜⴰⵎⵣⵡⴰⵔⵓⵜ.

ⵔⴰⴷ ⵏⵙⴽⵔ ⵉⵙⵏⴼⵍⵏ ⴷ ⵉⵎⵓⵜⵜⵓⵢⵏ ⵅⴰⵜⵔⵏⵉⵏ ⴳ ⴽⵓ ⵉⴳⵔⴰⵏ - ⵙ ⵜⵏⴰⵥⴰⵕⵉⵏ ⵏⵏⵙⵏ- ⵍⵍⵉ ⵙⵖⴰⵡⵙⴰⵏⵉⵏ ⵙ ⵓⴼⵓⵍⵙ ⵏⵏⵖ ⴰⵎⴳⵔⵓ ⴷ ⵓⵙⵎⵓⵙⵙⵓ ⵏⵏⵖ ⴰⵎⴳⵔⵓ ⴹⴰⵕⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⴳⴰⵏ ⴽⵕⴰⴹ ⵉⵎⵓⵜⵜⵓⵢⵏ ⵎⵇⵓⵔⵏⵉⵏ:

ⴰⵎⵣⵡⴰⵔⵓ, ⵔⴰⴷ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ ⵍⵍⵉ ⵙ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵙⴳ ⴽⵟⵓⴱⵕ 2017 ⴷ ⵢⵓⵍⵢⵓⵣ 2018, ⵉⵙⵎⴳⵍ ⵜⴰⵙⵇⵇⵉⵎⵜ ⵉⵥⵍⵉⵏ ⵉ ⵓⵙⵓⵊⴷ ⵏ ⵓⵙⵡⵉⵏⴳⵎ ⵢⵓⵎⴰⵏ ⴳ ⴽⵉⴳⴰⵏ ⵏ ⵉⴳⵔⴰⵏ ⵙ ⵜⵎⵢⴰⴷⴰⵙⵜ ⵏ ⵜⵎⴷⵔⴰⵡⵜ ⴷ ⵓⵎⵛⴰⵡⴰⵕ ⴳ ⵉⵍⵍⴰ ⵓⵎⵙⴰⵡⴰⵍ ⴷ ⵡⴰⴽⴰⵣ ⴷ ⵓⵏⵏⵓⵕⵥⵎ ⴼ ⴽⵓ ⵜⴰⵏⵏⴰⵢⵉⵏ. ⴰⵏⴰⵡ ⴰⴷ ⵔⴰⴷ ⴷⴰⵔⵙ ⵉⵍⵉⵏ ⵉⵙⵖⴰⵡⵙⴰⵜⵏ ⴳ ⵢⵉⴳⵔ ⵏ ⵓⵣⵣⵔⴰⴼ ⴷ ⵓⵙⴰⵜⵉ ⴰⵣⵔⴼⴰⵏ ⴷ ⵓⵎⵔⵙⵍⴰⵏ, ⴷ ⵉⴳⵔ ⵏ ⵜⵉⴹⴰⴼ ⴷ ⵓⵣⵣⵔⴰⵢ ⴳ ⵉⵍⵍⴰ ⵓⵙⵖⴰⵡⵙⴰ ⵙ ⵓⵎⵢⴰⵡⴰⵙ ⵏ ⵜⵏⴱⴰⴹⵜ ⴷ ⵓⵙⵎⴰⴷ ⵏⵏⵙⵏ ⴳ ⵓⵙⴽⵔ ⵙ ⵉⵙⵖⵍⵏ ⵏ ⵓⵏⴱⴰⴹ ⴷ ⵓⵙⵡⵓⴷⴷⵓ ⵉⵥⵉⵍⵏ, ⴷ ⵓⵙⵎⵓⵙⵙⵓ ⵉ ⵓⵙⵎⵔⵙ ⵏ ⵉⵙⴰⵡⵓⵔⵏ ⵏ ⵓⵎⵓⴽⵏ ⴳ ⵔⴰⴷ ⵜⵉⵍⵉ ⵜⵉⵕⵡⵉ ⴷ ⵉⵎⴰⵍ, ⴷ ⵔⴰⴷ ⵉⴳ ⴳ ⵓⴳⵯⵏ ⵙ ⵏ ⵡⴰⵏⴰⵡ ⴰⴷ. ⵜⵉⵍⴰⵍⵜ ⵏ ⵜⵎⵔⵙⵍⵜ ⵜⴰⵣⵣⵔⴰⴼⵜ ⴷ ⵜⴼⵔⴷⴰⵙ ⵏⵏⵙ ⵉⵙⵔⵜⴰⵏⵏ ⵔⴰⴷ ⵜⴳ ⵜⴰⵅⴰⵜⴰⵔⵜ ⴳ ⵓⵙⴰⵡⵓⵔ ⴰⴷ ⴰⵙⵜⵔⴰⵜⵉⵊⵉ.

ⴰⵢⵍⵍⵉ ⵉⵙⴳⵓⴷⵉ ⵍⵎⵖⵔⵉⴱ ⴳ ⵓⴳⴳⴰⵔ ⵙ ⵙⵉⵏ ⵡⴰⴳⵏⴰⵔⵏ ⴷ ⵎⵔⴰⵡ (50) ⵏ ⵓⵙⴳⴳⵯⴰⵙ ⵙ ⵜⵎⵙⴽⴰⵔ ⴷ ⵜⵢⴰⴼⵓⵜⵉⵏ ⴳ ⵉⴳⵔ ⵏ ⵓⵎⴰⵡⴰ ⴰⵙⵉⵍⴰⵏ ⴷ ⵓⵎⵓⴽⵏ ⴰⵥⵕⴼⴰⵏ ⴷ ⵓⵎⵔⵙⵍⴰⵏ ⴼ ⵓⵏⵏⵓⵕⵥⵎ ⴷ ⵓⵙⵍⴻⵍⵍⵉ ⵏ ⵉⴳⴰⴷⴰⵣⵏ, ⵔⴰⴷ ⴳⵉⵏ ⵜⴰⵙⵉⵍⴰ ⵉⴷⵓⵙⵏ ⴼ ⵔⴰⴷ ⵢⵉⵍⵉ ⵓⵚⴽⵓ ⵉ ⵓⵙⴽⵔ ⵏ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ.

ⵡⵉⵙ ⵙⵉⵏ, ⴳ ⵓⵎⵏⴰⴹ ⵏ ⵡⴰⵏⴰⵡ ⴰⵎⴰⵢⵏⵓ, ⵙ ⵓⵙⴽⵔ ⵏ ⵉⵎⵏⴰⴷⵏ ⵏⵏⵙ ⵉⵏⴰⵎⵓⵏⵏ, ⵔⴰⴷ ⵜⵙⴽⵔ ⵜⵎⴰⵣⵉⵔⵜ ⵏⵏⵖ ⵢⴰⵏ ⵓⵎⵎⴰⵜⵜⵉ ⴰⵅⴰⵜⴰⵔ ⴳ ⵢⵉⴳⵔ ⵏ ⵓⴼⵔⴰⴳ ⴰⵏⴰⵎⵓⵏ. ⴷⴼⴼⵉⵔ ⵍⵍⵉⵖ ⵏⵙⵖⵣⵏ ⴰⵙⵍⴳⵏ-ⴰⵙⴰⵜⵉ ⵉⵥⵍⵉⵏ ⵙ ⵓⵙⴰⵡⵓⵔ ⴰⴷ ⵉⵥⵉⵍⵏ, ⵉⵇⵇⴰⵏ ⴷ ⴰⴷ ⵏⵙⵖⵣⵏ ⵉⴹⵕⵉⵚⵏ ⴰⵢⵢⴰⵡⵏ ⵏ ⵓⵙⵍⴳⵏ ⴰⴷ ⴰⵙⴰⵜⵉ. ⵉⴳⴰ ⵍⵃⴰⵍ ⵢⴰⵏ ⵓⵙⵏⴼⴰⵔ ⵉⵟⵟⴰⴼⵏ ⴽⵉⴳⵏⴰ ⵏ ⵉⵎⵏⴰⴷⵏ ⴷ ⵉⴼⵔⴷⴰⵙ ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵓⵕⵥⵥⵓⵎ ⵏⵏⵙ ⵉⵙⵔⵙ ⵜⵉⵔⵙⴰⵍ ⴷ ⵉⵡⵜⵜⴰⵙⵏ ⵏⵏⵙ ⵉⵅⴰⵜⴰⵔⵏ ⴳ ⵢⵓⵍⵢⵓⵣ 2020. ⵓⵔ ⵀⵍⵍⵉ ⵉⵜⵜⵓⴼⴽⴰ ⵉ ⵜⵡⵉⵣⵉ ⵢⴰⵏ ⵓⵔⵎⵎⵓⵙ ⴰⵎⴰⵢⵏⵓ ⴰⵜⵔⴰⵔ ⴰⵣⵔⴼⴰⵏ ⴷ ⵓⵎⵔⵙⵍⴰⵏ ⵙ ⵜⵡⵉⵙⵉ ⵏ ⴽⵓ ⵉⵎⵙⵜⴳⴳⴰⵔⵏ, ⵉⴳⴰ ⵢⴰⵏ ⵓⵙⵙⴰⵔⵓ ⴰⵙⵜⵔⴰⵜⵉⵊⵉ ⵉ ⵓⴼⴳⴰⵏ ⴷ ⵓⴹⵎⵏ ⵏ ⵉⵣⵔⴼⴰⵏ ⵏⵏⵙ ⴳ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵥⵉⵍⵏⵉⵏ, ⴳ ⵓⵙⵙⵍⵎⴷ ⵉⵕⵡⴰⵏ ⴰⵎⴼⵔⴰⵙ, ⵉⵙⵏⴳⵉⴷⴷⵉⵏ ⴳ ⵡⴰⵏⵏⴰⵣⵏ ⵉⴳ ⵜⴰⵙⴰⵔⵓⵜ ⵏ ⵜⵏⴽⵔⴰ ⵜⴰⵏⴰⵎⵓⵏⵜ, ⴷ ⵓⵙⵉⵜⵜⵉ ⵏ ⵓⵥⵍⴰⴹ ⴷ ⵉⵎⵣⵔⴰⵢⵏ, ⴷ ⵜⵏⴰⴼⵜ ⵏ ⵓⵙⵓⵏⴼⵓ ⵉⴹⵎⵏⵏ ⴰⴷⴷⵓⵔ. ⵏⵎⵛⴰⵛⴽⴰ ⴷ, ⴷ ⵉⴼⵔⴷⴰⵙ ⵉⵙⵔⵜⴰⵏⵏ ⴼ ⵡⴰⵜⵉⴳ ⴰⵅⴰⵜⴰⵔ ⵏ ⵓⵙⵏⴼⴰⵔ ⴰⴷ ⴰⵙⵜⵔⴰⵜⵉⵊⵉ ⴳ ⵓⵙⵎⵖⵔ ⵏ ⵡⴰⵢⴷⴰ ⵏ ⵜⵎⵢⵉⵎⴰⵏⵜ ⴳ ⵜⵎⵔⵙⴰⵍ ⴷ ⵓⵙⴷⵓⵙ ⵏ ⵓⵎⵛⴰⴱⴱⴰⴽ ⴰⵏⴰⵎⵓⵏ. ⵜⴰⵢⴰⴼⵓⵜ ⵏ ⵓⵙⴰⵡⵓⵔ ⴰⴷ ⵔⴰⴷ ⵜⴳ ⵜⴰⵎⴳⵔⵓⵜ ⴷ ⵜⴳⴷⵓⴷⴰⵏⵜ, ⵔⴰⴷ ⵜⴳ ⵢⴰⵜ ⵜⵔⵙⵍⵜ ⵏ ⵡⴰⵍⴰⵢ  ⴰⵎⵖⵔⵉⴱⵉ, ⴷ ⵔⴰⴷ ⵜⵙⴽⵔ ⴰⵔⵎⵎⵓⵙ ⵏ ⵉⵣⵔⴼⴰⵏ ⵉⵏⴰⵎⵓⵏⵏ ⵍⵍⴰⵏⵉⵏ ⴳ ⵓⴷⵓⵙⵜⵓⵔ. ⵉⴳⴰ ⵍⵃⴰⵍ ⵢⴰⵜ ⵜⵎⵖⵓⵏⵜ ⵜⴰⵎⴰⵢⵏⵓⵜ, ⵙ ⵢⴰⵏ ⵓⵙⵏⴼⴰⵔ ⴰⵏⴰⵎⵓⵔ ⵉⴳⴰⴷⴷⴰⵏ ⵉ ⵜⵏⵓⴼⴰ ⵜⴰⵏⴰⵎⵓⵏⵜ ⴷ ⵜⵡⵉⵣⵉ ⴷ ⵓⵎⵛⴰⴱⴱⴰⴽ ⵍⵍⵉ ⵔⴰⴷ ⵉⵙⵙⵕⵚⵓ ⴰⵥⴰⵏ ⵙ ⵜⵎⵓⵔⵜ.

ⵡⵉⵙ ⴽⵕⴰⴹ, ⵙ ⵓⵣⴷⴰⵢ ⴷ ⵉⵎⵓⵜⵜⵓⵢⵏ ⴰⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵍⵍⵉ ⵏⴻⵏⵏⵓⵔⵣ ⴰⴷ ⵜⵜⵓⵙⴽⵉⵔⵏ, ⵃⵎⴰ ⴰⴷ ⵓⵊⵉⴷⵏ ⵉⵙⵖⴰⵡⵙⴰⵜⵏ ⵏⵏⵙⵏ ⵉⵥⵕⴼⴰⵏⵏ ⵍⵍⵉ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵉⵏⴰⵡ ⵏ ⵓⴷⴰⴱⵓ ⴳ ⵢⵓⵍⵢⵓⵣ 2020, ⴷ ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⵉ ⵜⵎⵜⵜⵉ ⴳ ⵓⵕⵥⵥⵓⵎ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2020-2021 ⴳ 9 ⴽⵟⵓⴱⵕ 2020, ⵃⵎⴰ ⴰⴷ ⵉⵜⵜⵓⵙⴽⵉⵔ “ⵓⴼⵏⵉⵇ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵙⴰⵔⵓ”, ⵍⵍⵉⵖ ⵉⴳⴰ ⴰⴼⵏⵉⵇ ⵏ ⵓⵙⵙⴰⵔⵓ ⴰⵙⵜⵔⴰⵜⵉⵊⵉ ⵉ ⵓⵙⵙⴰⵔⵓ ⴷ ⵜⵉⵍⵉⵜ ⵏ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⴳ ⵓⵙⵙⴰⵔⵓ ⵙ ⵉⵎⵏⴰⴷⵏ ⵏ ⵉⴷⵖⴰⵔⵏ ⴷ ⵡⴰⴽⴰⵍ ⴷ ⵉⴳⵔⴰⵏ ⴳⴰⵏⵉⵏ ⵉⵎⵏⵏⴰⵡⵏ, ⵙ ⵉⴷⵔⵉⵣⵏ ⵥⵉⵍⵏⵉⵏ ⴼ ⵓⵙⵡⵓⵔⵉ ⴷ ⵓⵙⵉⴷⴼ ⴰⵏⴰⵎⵓⵏ ⴷ ⵓⵣⵓⵣⵣⵔ ⵏ ⵉⵎⴰⵏ ⴷ ⵜⴷⵍⵙⴰ ⵏ ⵜⵎⵙⵙⵏⵜⵉⵜ. ⵙ ⵓⴼⵏⵉⵇ ⴰⴷ, ⵔⴰⴷ ⴷⴰⵖ ⵜⵥⵉⵍ ⵜⵎⴰⵣⵉⵔⵜ ⵏⵏⵖ ⵍⵍⵉⵖ ⵔⴰⴷ ⵜⵙⵓⵊⵉⴷ ⵉⵎⴰⵙⵙⵏ ⵉⵥⵕⴼⴰⵏⵏ, ⴷ ⵉⵎⴰⵙⵙⵏ ⵏ ⵓⵙⵡⵓⵔⵉ ⴰⴳⴷⵓⴷⴰⵏ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴳ ⵉⵙⵡⵉⵔⵏ ⴰⵏⴰⵎⵎⴰⵙ ⴷ ⵓⵎⴰⴳⴳⵓⴳ, ⵔⴰⴷ ⵜⵜⵙⵓⵏⴼⵉⵍⵏⵜ ⵜⵎⵓⴽⵔⵉⵙⵉⵏ ⵏ ⵓⴱⴰⵢⵢⵢⵕ ⵙ ⵡⴰⵏⵏⴰⵣⵏ ⵏ ⵓⵎⵓⴽⵏ ⴷ ⵓⵙⵓⵊⴷ ⵏ ⵉⴷⵔⵉⵎⵏ ⵉ ⵓⵙⵙⴰⵔⵓ ⴷ ⵓⴼⴰⵔⵙ.

ⵔⴰⴷ ⵉⴳ ⴳ ⵜⵎⵙⵖⴰⵔⵓⵜ, ⴷ ⵓⵙⵓⵜⴳ ⴷ ⵓⵙⵉⵙⵙⵏ ⴷ ⵓⵡⵇⵇⵔ, ⵎⴰⵙ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⴰⵎⴷ ⵡⵉⵙ ⵚⴹⵉⵚ, ⵙ ⵉⵙⴰⵡⵓⵔⵏ ⴰⴷ ⵉⵎⴰⵢⵏⵓⵜⵏ ⴳ ⵉⵍⵍⴰ ⵓⵏⴰⵔⵓⵣ, ⵉⵙⵏⴰⵔⴰ ⵍⵎⵖⵔⵉⴱ ⴳ ⵜⵎⵙⵓⵜⵍⵜ ⴰⴷ ⵜⴰⵏⴰⵎⵓⵔⵜ ⴷ ⵜⴳⵔⴰⵖⵍⴰⵏⵜ ⵉⵛⴷⴷⴰⵏ, ⵙ ⵜⵓⵏⵥⵉⵥⵜ ⴷ ⵓⵙⵎⴰⵇⵍ ⵉⴷⵔⴰⵏ ⵉⵣⵡⴰⵔⵏ, ⵙ ⵡⴰⵏⴰⵡ ⵏ ⵓⵡⴰⵏⴽ ⵏ ⵓⴼⵔⴰⴳ ⴰⵏⴰⵎⵓⵏ ⵍⵍⵉ ⵙ ⴱⴰⵀⵔⴰ ⵏⵙⵖⴰⵡⵙⴰ ⴳ ⵓⵎⵏⴰⴹ ⵏ ⵓⴱⴰⵢⵢⵓⵕ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⴰⵔ ⴰⵖ ⵙⵙⵔⵓⵙⵏ ⵉⵙⴰⵡⵓⵔⵏ ⴰⴷ ⵅⴰⵜⵔⵏⵉⵏ ⵍⵍⵉ ⵔⴰⴷ ⵢⵉⵍⵉ ⴳ ⵎⴰ ⵏⵏ ⵓⵔ ⵢⴰⴳⴳⵓⴳⵏ, ⵏⴽⴽⵏⵉ ⵉⴼⵔⴷⴰⵙ ⵉⵙⵔⵜⴰⵏⵏ ⴷ ⵜⵎⵔⵙⴰⵍ ⵏ ⵜⴳⵏⵙⴻⵙⵜ ⴷ ⵜⵓⴼⵔⵉⵏⵉⵏ ⴷⴰⵜ ⵏ ⵜⵎⴰⵙⴰⵢⵉⵏ ⵏ ⵓⵎⵣⵔⵓⵢ. ⵜⵙⵖⴰⵡⵙⴰ ⵙ ⵓⵙⵎⵓⵙⵙⵓ ⵉⵥⵍⵉⵏ, ⴷ ⵓⵎⵙⴰⵙⴰ ⵓⵔ ⵉⴳⵉⵏ ⵎⴳⴰⵍ ⵏ ⵓⵎⵣⴰⵔⴰⵢ, ⴷ ⵓⵙⵓⵜⴳ ⵉⵙⴽⵔⵏ ⵓⵙⴳⵓⴷⵉ.

ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵇⵇⴰⵏ ⴰⵖ ⴷ ⵓⵙⵎⵓⵙⵙⵓ ⵉ ⵓⵙⴽⵔ ⵏ ⵜⵎⵙⴽⴰⵔ ⵏⵏⵖ ⵜⵉⵣⵣⵔⴰⴼⵉⵏ ⴷ ⵜⵉⵏ ⵜⵉⴹⴰⴼ, ⴷ ⴰⴷ ⴳⵉⵏ ⵉⵎⴹⴰⴽⴰⵕⵏ ⵏⵏⵖ ⵉ ⵜⵙⵔⵜⴰⵢ ⴷ ⵉⵖⴰⵡⴰⵙⵏ ⴷ ⵉⵣⵣⵔⴰⴼⵏ ⵣⴷⵉⵏⵉ ⴷ ⵉⵙⴰⵡⵓⵔⵏ ⴰⴷ, ⴰⵣⵎⵣⵣⵓ ⵍⵍⵉ ⵔⴰⴷ ⴰⵖ ⵢⴰⵡⵙ ⴳ ⵉⵎⵉⵥ ⴷ ⵓⵍⵜⴰⵖ, ⴽⵔⴰⵢⴳⴰⵜ ⵢⴰⵏ ⴳ ⵓⴷⵖⴰⵔ ⵏⵏⵙ, ⴰⵙⵏⴼⴰⵔ ⴰⴷ ⴰⵏⴰⵎⵓⵏ ⵉⵥⵉⵍⵏ ⵉⵡⴰⵜⵜⵙⵏ ⴰⵙⵎⴰⵢⵏⵓ ⴷ ⵜⴷⵉⵎⵓⵇⵔⴰⵟⵉⵜ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⵓⵙⵉⵜⵜⵉ ⴼ ⵜⵙⴳⴰ ⴷ  ⵉⵏⴰⵡ ⵏ ⵡⴰⵔⴰⵏⴰⵔⵓⵣ, ⵓⵔ ⴰⴷ ⵉⵜⵜⴰⵊⵊⴰ ⴰⵊⵍⵓ ⵏ ⵓⵣⵎⵣ ⴰⵙⵔⵜⴰⵏ ⴳ ⵓⵎⴰⴹⴰⵍ ⴳ ⵜⵜⴰⵣⵣⵍⴰⵏⵜ ⵜⵜⵎⵜⴰ ⵃⵎⴰ ⴰⴷ ⵖⵓⵔⵙⵏⵜ ⴰⴷⵖⴰⵔ ⵏⵏⵙⵏⵜ ⴳ ⵓⵏⴳⵔⴰⵡ ⴰⵎⴰⴹⵍⴰⵏ ⴷⴼⴼⵉⵔ ⵏ ⵓⴱⴰⵢⵢⵓⵕ.

ⴳ ⵓⵎⵏⴰⴹ ⴰⴷ, ⵉⵇⵇⴰⵏ ⴷ ⴰⴷ ⵏⴽⵜⵉ ⴰⵢⵍⵍⵉ ⴷ ⵉⴼⵍ ⵓⴱⴰⵢⵢⵓⵕ ⴳ ⵓⵙⵡⵉⵔ ⴰⴳⵔⴰⵖⵍⴰⵏ ⵙ ⵉⴽⴰⵢⴰⴹⵏ ⴳ ⵉⵍⵍⴰ ⵉⵏⴰⵡ ⵏ ⵜⵏⵎⵓⵔⵉ, ⴰⵎ ⴰⵎⵃⵉⵣⵡⵔ ⵙ ⵉⴳⵣⵣⴰⵢⵏ ⵏ ⴽⵓⴼⵉⴷ 19, ⴰⵢⵍⵍⵉ ⵉⵙⴷⴷⵉⴷⵏ ⵎⴰⵙ ⴷ ⵜⴰⵢⴰⵏⵜ ⵜⴰⵏⴰⴽⴰⵍⵜ ⴷ ⵓⵎⵛⴰⴱⴱⴰⴽ ⴼ ⵜⵎⵔⵙⴰⵍ ⴷ ⵓⵙⵡⵓⴷⴷⵓ ⵏ ⵉⵎⵣⵔⴰⵢⵏ ⵓⵍⴰ ⵉⵙⵏⵓⵃⵢⵓⵜⵏ, ⵙ ⵓⵎⵙⴰⵡⴰⵍ ⴳ ⵉⵍⵍⴰ ⵡⴰⵡⵜⵜⴰⵙ, ⴳⴰⵏ ⵜⵉⵔⵙⴰⵍ ⵏ ⵓⴼⵔⴰⴳ ⵏ ⵜⵎⵓⵔⵜ ⴷ ⵜⵎⵥⵍⵉⵜ ⵏⵏⵙ ⴷ ⵜⴷⵓⵙⵉ ⵏⵏⵙ ⴷ ⵜⵣⵣⵉⴳⵣⵜ ⵏⵏⵙ.

ⵙ ⵜⵣⴷⴰⵢⵜ ⴷ ⵎⴰⵢⴰⴷ, ⵉⵇⵇⴰⵏ ⴰⵖ ⴷ ⵓⵙⵎⵓⵙⵙⵓ ⴰⵎⴳⵔⵓ ⴷ ⵜⵡⵓⵔⵉ ⵉⵙⵓⵍⵏ ⴷ ⵜⵉⴹⴰⴼ ⵃⵎⴰ ⴰⴷ ⵉⵣⵣⵉⴳⵣ ⵓⵙⵕⵚⵓ , ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ ⴷ ⵓⵙⴱⴷⴷⵉ ⵏ ⵜⵜⵓⵎⵓⵄⴰⵜ ⵜⵉⵇⴱⵓⵔⵉⵏ/ⵜⵉⵎⴰⵢⵏⵓⵜⵉⵏ, ⴷ ⴳⴰⵔ ⵜⵉⵡⵓⵔⵉⵡⵉⵏ ⵏ ⵡⴰⵄⴷⵉⵡⵏ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ ⵍⵍⵉ ⵉⵔⴰⵏ ⴰⴷ ⵢⵓⵔⵔⵉ ⵓⵎⵣⵔⵓⵢ ⵙ ⵜⵖⵔⴷⵉⵏ ⵃⵎⴰ ⴰⴷ ⴼⵙⵉⵏ ⵜⴰⵙⵙⴰⵙⵉⵏ ⵏⵏⵙⵏ. ⴰⵙⵇⵇⵉⵎ ⵏ ⵉⵎⵓⵔⴰ ⵔⴰⴷ ⵉⵣⵣⵉⴳⵣ ⴳ ⵓⵙⵎⵓⵙⵙⵓ ⵏⵏⵙ ⵉ ⵚⴰⵃⴰ ⵏ ⵜⵎⵙⴰⵔⵜ ⴰⴷ ⴳ ⵜⵎⴰⴷⴷⴰⵙⵉⵏ ⵜⵉⵙⵉⵏⵔⴰⵏⵉⵏ ⴷ ⵜⵉⴳⵜⵉⵔⴰⵏⵉⵏ ⵉ ⵓⵎⵣⴰⵖ ⵏ ⵉⵣⵔⴼⴰⵏ ⵓⵍⴳⵉⵏⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵓⵙⴱⴷⴷⵉ ⵏ ⴳⴰⵔ ⵜⵉⵡⵓⵔⵉⵡⵉⵏ ⵏ ⵡⴰⵄⴷⵉⵡⵏ ⵏ ⵜⵎⵙⴰⵔⵜ ⵏⵏⵖ ⵜⴰⵏⴰⵎⵓⵔⵜ ⵜⴰⵎⵣⵡⴰⵔⵓⵜ. ⵙ ⵜⵣⴷⴰⵢⵜ ⴷ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ, ⵉⵇⵇⴰⵏ ⴷ ⴰⴷ ⴷⴰⵔⵏⵖ ⵢⵉⵍⵉ ⵓⴱⵓⵔⵣ ⵎⴰⵙ ⵍⵍⴰⵏⵜ ⵜⵙⴳⴳⵉⵡⵉⵏ ⵏⵏⵖ ⵏ ⵉⴼⴼⵓⵙ ⵙⴳ ⵉⵙⴳⴳⵯⴰⵙⵏ ⴳ ⵜⵣⵡⵉⵔⵉ ⵏ ⵜⵙⴳⴳⵉⵡⵉⵏ ⴳ ⵎⴰⴷ ⵉⵜⵜⵓⵙⴽⴰⵔⵏ ⵙ ⵢⴰⵏ ⵡⴰⵏⴰⵡ ⵓⵏⴳⵉⵎ ⴰⵙⵉⴷⴼⴰⵏ ⴷ ⵉⵙⵙⴰⵔⵓⵜⵏ ⵉⴳⴷⵓⴷⴰⵏⵏ ⵅⴰⵜⵔⵏⵉⵏ ⴳⴰⵏⵉⵏ ⵉⵎⵏⵏⴰⵡⵏ ⴰⵢⵓⵍⵍⵉ ⴳⵉⵙⵏⵜ ⵉⵙⴽⵔⵏ ⴰⵎⵎⴰⵙ ⵏ ⵉⵙⵙⴰⵔⵓⵜⵏ ⵓⵙⵍⵉⴳⵏ ⵉⵏⴰⵎⵓⵔⵏ ⴷ ⵉⴳⵔⴰⵖⵍⴰⵏⵏ, ⴷ ⵡⴰⵎⵎⴰⵙ ⵏ ⵓⵣⴷⴰⵢ ⵉⵣⵣⵉⴳⵣⵏ ⵉⴳⴰⵏ ⴰⵜⵔⴰⵔ ⴷ ⵜⵎⵉⵣⴰⵔ ⵢⴰⴹⵏⵉⵏ ⵏ ⵉⴼⵔⵉⵇⵢⴰ.

ⵉⴳⴰ ⵢⴰⵏ ⵓⵎⵙⴰⵔⴰⵔ ⵉⵜⵜⵓⵙⴽⴰⵔⵏ, ⵙ ⵎⴰⴷ ⵉⵙⵎⵓⵏⵏ ⵍⵎⵖⵔⵉⴱ ⴳ ⵜⵣⴷⴰⵢⵉⵏ ⴷⵓⵙⵏⵉⵏ ⵣⵣⵉⴳⵣⵏⵉⵏ ⴳ ⴽⵓ ⵉⴳⵔⴰⵏ, ⴷ ⴰⵢⵜⵎⴰⵙ ⴳ ⵉⴼⵔⵉⵇⵢⴰ, ⴷ ⵉⵙⵏⴼⴰⵔⵏ ⵍⵍⵉⵖ ⵜⵉⵡⵙ ⵜⵎⴰⵣⵉⵔⵜ ⵏⵏⵖ ⴳ ⵓⵎⵏⵥⴰⵡ ⴰⴼⵔⵉⵇⵉ ⴷ ⵜⵙⵔⵜⵉⵜ ⵏⵏⵙ ⵜⴰⴼⵔⵉⵇⵉⵜ ⵙ ⵜⵏⴰⵔⴰ ⵏ ⴱⴰⴱ ⵏⵡⴰⴷⴷⵓⵔ ⴰⴳⵍⵍⵉⴷ ⵍⵍⵉ ⵉⴱⴷⴷⵏ ⴼ ⵓⴼⴰⵡ ⴷ ⵚⴰⵃⴰ ⵉⵛⵛⴰⵔⵏ, ⴷ ⵓⵙⵉⵣⵡⵔ ⵏ ⵉⴼⵔⵉⵇⵢⴰ, ⴷ ⵓⵏⵄⴰⵔ ⴼ ⵉⵎⴰⴷⴰⵏⵏ ⴷ ⵜⵎⵙⴰⵔⵉⵏ ⵏⵏⵙ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⴳ ⵜⴷⵉⵏⴰⵎⵉⵜ ⴰⴷ ⵜⴰⵏⴰⵎⵓⵔⵜ ⵜⴰⵅⴰⵜⴰⵔⵜ, ⵉⵇⵇⴰⵏ ⴰⵖ ⴷ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵏⵙⵙⵉⴳⵓⵜ ⵜⴰⵡⵓⵔⵉ ⵏ ⵓⵣⵣⵔⴰⴼ ⵉ ⵓⵙⵖⵣⵏ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵍⵍⴰⵏⵉⵏ ⴳ ⵓⵙⵇⵇⵉⵎ, ⵏⵥⵕ ⵜⵉⵙⵓⵎⵔⵉⵏ ⵏ ⵉⵙⵍⴳⵏⵏ ⴳⴰⵏⵉⵏ 229 ⵏ ⵜⵙⵓⵎⵔⵜ, ⵉ ⵓⵙⵓⵜⴳ ⵏ ⵜⵙⵏⵜⴰⵢⵉⵏ ⵜⵉⵣⵣⵔⴰⴼⵉⵏ ⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵉ ⵓⵙⵕⵚⵓ ⵏ ⵜⵎⵥⵍⵉⵜ ⴷ ⵓⵙⴽⵔ ⵏ ⵜⵓⵎⴰⵢⵉⵏ ⵏ ⵓⴷⵓⵙⵜⵓⵔ, ⴷ ⵓⵙⵎⵖⵔ ⵏ ⵜⵎⵢⵓⵔⵉⵏ ⵏⵏⵖ ⵜⵉⴷⵙⵜⴰⵔⵉⵏ.

ⴳ ⵓⵎⵏⵉⴷ ⵢⴰⴹⵏⵉⵏ, ⵔⴰⴷ ⵏⵣⵣⵉⴳⵣ ⴳ ⵜⵙⵎⵉⴳⴰⵍ ⵏⵏⵖ ⵏ ⵜⵉⴹⴰⴼ ⵙ ⵓⵙⵖⵡⵉⵡⵙ ⵏ ⵉⵙⵇⵙⵉⵜⵏ ⴼ ⵜⵙⵔⵜⵉⵜ ⵜⴰⵎⴰⵜⴰⵢⵜ ⴷ ⵜⵙⵔⵜⴰⵢ ⵏ ⵉⴳⵔⴰⵏ, ⵃⵎⴰ ⴰⴷ ⵏⵉⵍⵉ ⴷ ⵎⴰⴷ ⵙⵉⴳⴳⵉⵍⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰⵜⵉⵏ, ⵏⵙⵎⴽⵍ ⵜⵉⵎⵙⴰⵔⵉⵏ ⵏ ⵡⴰⵎⵓⵏ ⵙ ⵓⵎⵙⴰⵡⴰⵍ ⵉⵀⴷⴷⵏⵏ ⵙ ⵓⵎⵢⴰⵡⴰⵙ ⴷ ⵓⵙⵎⴰⴷ ⵏⴳⵔ ⵜⵉⵏⴱⴰⴹⵉⵏ.

ⴳ ⵓⵎⵏⴰⴹ ⴰⴷ, ⵉⵇⵇⴰⵏ ⴷ ⴰⴷ ⵏⵙⵎⴷ ⵜⵉⵙⵎⵉⴳⴰⵍ ⵏ ⵓⵙⴰⴳⴳⵯ ⵏ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵙ ⵡⴰⵜⵉⴳ ⵏⵏⵙⵏⵜ ⵏ ⵜⵉⴹⴰⴼ ⵙ ⵎⴰⴷ ⴳⵉⵙⵏⵜ ⵉⵍⵍⴰⵏ ⴳ ⵜⵡⵓⵔⵉ ⵜⴰⴱⵉⴷⴰⴳⵓⵊⵉⵜ ⴷ ⵡⴰⴽⴰⵣ ⵏ ⵡⴰⴷⴷⴰⴷ ⵏ ⴽⵉⴳⴰⵏ ⵏ ⵜⵎⵔⵙⴰⵍ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵎⴰⴷ ⴳⵉⵙⵏⵜ ⵉⵍⵍⴰⵏ ⵙ ⵜⵙⵓⵎⵔⵉⵏ ⴷ ⵉⵙⵖⵍⴰⴼ ⵏ ⵓⵙⵖⵓⴷⵓ ⵏ ⵜⵙⵔⵜⴰⵢ ⴷ ⵓⵙⵉⵜⵜⵉ ⵏ ⵜⵎⵓⴽⵔⵉⵙⵉⵏ ⵏⵏⵙⵏⵜ, ⴳⴰⵏⵜ ⵜⵙⵎⵉⴳⴰⵍ ⴰⴷ ⵜⴰⵎⵜ, ⵔⴰⴷ ⵢⵉⵍⵉ ⵓⵍⴰ ⵓⵙⵎⵏⵉⴷ ⴷ ⵓⵎⴹⴰⴽⴰⵕ ⵏ ⵓⵏⵇⵇⵉⵙ ⵏ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵉⵜⵜⵓⵙⵎⴰⴳⴰⵍⵏ ⵙ ⵓⵙⵓⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵙⵡⵓⵔⵉⵏ ⴼ ⵓⵙⵙⵍⵎⴷ ⴰⵎⵏⵣⵓ, ⵉⴳⴰⵏ ⵢⴰⵏ ⵉⴳⵔ ⵉⵙⵜⴰⵡⵀⵎⵎⴰⵏ ⴳ ⵜⴳⵎⵉ ⵜⴰⵏⴰⵎⵓⵔⵜ.

ⴳ ⵜⵙⴳⴰ ⵢⴰⴹⵏⵉⵏ, ⵔⴰⴷ ⵢⴰⵡⵙ ⵓⵙⵇⵇⵉⵎ ⴳ ⵓⵙⵓⵊⴷ ⵏ ⵓⵎⵏⴰⴷ ⴰⵏⴰⵎⵓⵔ ⵉ ⵓⵎⵓⴽⵏ ⵏ ⵓⵏⴳⵔⴰⵡ ⴰⴷⵓⵙⴰⵏ ⵙ ⵓⵎⴹⴰⴽⴰⵕ ⴷ ⵓⵙⵖⵏⵓ ⵏ ⵓⵏⵇⵇⵉⵙ ⵍⵍⵉ ⵜⵙⵓⵊⴰⴷ ⵜⵔⴰⴱⴱⵓⵜ ⵜⴰⵙⴳⵓⵎⴰⵏⵜ ⵍⵍⵉ ⴰⴷ ⵉⵜⵜⵓⵙⴽⴰⵔⵏ ⵉ ⵡⴰⵡⵜⵜⴰⵙ ⴰⴷ.

ⵜⵉⵏⴳⴳⵯⴰ ⴷ ⵉⵏⴳⴳⵯⴰ

ⵉⴳⴰ ⵎⴰⵢⴰ ⵏⵏ ⵜⵉⵢⴰⴼⵓⵜⵉⵏ ⴳ ⵓⵙⴽⵔ ⵏⵏⵖ ⴰⵏⴰⵎⵓⵔ ⴰⵎⴳⵔⵓ, ⴷ ⴽⵔⴰ ⵏ ⵉⵙⵡⵉⵏⴳⵉⵎⵏ ⴼ ⵎⴰⴷ ⴰⵖ ⴷ ⵉⵇⵇⴰⵏⵏ ⴳ ⵜⵎⵙⴽⴰⵔ ⴷ ⵜⵡⵓⵔⵉⵡⵉⵏ ⵏⵏⵖ ⵍⵍⵉ ⵙ ⴷ ⵉⵇⵇⴰⵏ ⴰⴷ ⵜⵏⵜ ⵏⵙⴽⵔ ⵙ ⵜⴼⵍⵙⴰⵢⵉⵢ, ⴷ ⵓⵙⵖⵓⴷⵓ ⴳ ⵓⵙⴰⵜⵉ ⴷ ⵓⵙⵖⵡⵏ ⴰⵙⵔⵜⴰⵏ ⴷ ⵡⵉⵏ ⵜⵖⴰⵔⵉⵡⵉⵏ, ⵉ ⵜⵏⵓⴼⴰ ⵏ ⵜⵎⵙⴰⵔⵉⵏ ⵏ ⵜⵎⴰⵣⵉⵔⵜ ⵏⵏⵖ ⴷ ⵜⵣⵣⵉⴳⵣⵜ ⵏⵏⵙ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ.

ⵜⴰⵏⵎⵎⵉⵔⵜ ⴼ ⵓⴷⵡⴰⵍ ⵏⵏⵓⵏ.