ⴰⵎⴹⴰⴽⴰⵕ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⴼ ⵓⵙⵡⵓⴷⴷⵓ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⵉ ⵓⵙⵓⵔⵙ ⵏ ⵓⴱⴰⵢⵢⵓⵕ ⵖ ⵜⵎⴰⵣⵉⵔⵜ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵡⴰⵙ 17 ⵛⵓⵜⴰⵏⴱⵉⵔ 2020 ⵜⴰⵙⵎⵓⵏⵉ ⵍⵍⵉ ⵜⵙⵙⵉⵅⴼ ⵎⴰⵙⵙⴰ ⵙⴰⵄⵉⴷⴰ ⴰⵢⵜ ⴱⵓⵄⵍⵉ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵜⴷⵓⵙⵉ ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⵉ ⵜⵖⵔⵉ ⵏ ⵉⵎⵔⵙⵉⵡⵏ ⵣⴷⵉⵏⵉⵏ ⴷ ⵜⵏⵎⴰⵇⵇⴰⵙⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵖ ⵓⵣⵎⵣ ⵏ ⵓⴱⴰⵢⵢⵓⵕ, ⴷ ⵜⵣⵣⵉⴳⵣⵜ ⵉⵀⵔⵛⵏ ⵏ ⵓⵙⵓⵔⵙ ⵏ ⵓⴱⴰⵢⵢⵓⵕ ⵖ ⵜⴳⴰⵔⵉⵡⵉⵏ ⴰⴷ, ⴷ ⵉⴷⵔⵉⵣⵏ ⵏ ⵉⴷⵖⴰⵔⵏ ⵏ ⵓⴱⴰⵢⵢⵓⵕ ⵖ ⴽⵔⴰ ⵏ ⵜⴼⵔⴽⵉⵏ ⴷ ⵉⴼⵔⴷⴰⵙ ⵏ ⵓⴼⴰⵔⵙ ⴷ ⵜⵎⴳⵓⵔⵉ, ⴷ ⵓⴽⴰⵎ ⵏ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⵏ ⵜⴷⵓⵙⵉ, ⴷ ⵓⵣⵣⵔⴰⵢ ⵏ ⵓⵥⵍⴰⵢ ⴰⴷⵓⵙⴰⵏ.

ⵖ ⵓⵙⵎⵏⵉⴷ ⵏⵏⵙ ⴷⴰⵜ ⵏ ⵜⵙⵇⵇⵉⵎⵜ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ “ ⵎⴰⵙ ⵜⵜⵓⵙⴽⴰⵔ 247 ⵏ ⵜⵏⵎⴰⵇⵇⴰⵙⵜ ⴷ ⵓⴳⴳⴰⵔ ⵏ 98 ⵏ ⵜⵎⵙⵙⵓⵔⵜ ⵙ ⵢⴰⵏ ⵓⵏⵛⴽ ⵉⵍⴽⵎⵏ ⴰⵔ ⵖⵉⵍⴰ ⴷ ⵎⴰ ⴷ ⵉⴳⴰⵏ 1.9 ⵎⵍⵢⴰⵕ ⵏ ⴷⵔⵀⵎ ⵖ ⵓⵏⵛⴽ ⵉⵜⵜⵓⵥⵍⴰⵢⵏ ⵉ ⵜⵎⴰⵡⴰⵙⵜ ⵖ ⵓⴼⵏⵉⵇ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴽⵓⴼⵉⴷ 19”.

ⵉⵙⵙⵉⵙⴼⵉⵡ ⵎⴰⵙⵙ ⴰⵢⵜ ⵟⵟⴰⵍⴱ ⵖ ⵓⵙⵎⵏⵉⴷ ⵏⵏⵙ ⴷⴰⵜ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⴷ ⵉⵡⵉⵏⵜ ⵜⵏⵎⴰⵇⵇⴰⵙⵉⵏ ⴰⴷ ⴰⴷ ⵜⵜⵓⵙⵖⵉⵏ ⵉⵎⴰⵙⵙⵏ ⵉⵜⵉⵇⵏⵉⵢⵏ ⵏ ⵜⵙⵏⵉⵊⵊⵉⵜ ⴷ ⴰⵢⵍⵍⵉ ⵙⵉⴳⴳⵍⵏ ⵙ 25 % ⵖ ⵓⵏⵛⴽ ⴰⵎⴰⵜⴰⵢ,  ⵉⵎⵙⵙⵓⵜⵏ ⵙ 12%, ⵉⵎⴰⵙⵙⵏ ⵏ ⵓⵙⵓⵍⴼ ⵙ ⵉⵥⵏⵥⴰⵕⵏ ⵙ 8%, ⵉⵎⴰⵙⵙⵏ ⵏ ⵓⵙⵉⵊⵊⵉ ⵙ 0.1%, ⵉⵎⴰⵙⵙⵏ ⵏ ⵉⵙⵓⵔⴰⵎ ⵙ 19.1 %, ⵉⵙⴰⴼⴰⵔⵏ ⴷ ⵉⵎⴰⵙⵙⵏ ⵏ ⵜⵙⵏⵉⵊⵊⵉⵜ ⵙ 17%, ⵖⵎⴽ ⴰⵏⵏ ⴷ ⵜⵖⴰⵡⵙⵉⵡⵉⵏ ⵢⴰⴹⵏⵉⵏ ⵖ ⴱⵕⵕⴰ ⵏ ⵜⵎⴰⵣⵉⵔⵜ ⵀⵎⵎⴰⵏⵉⵏ ⵉⵎⴰⵙⵙⵏ ⵉⵜⵉⵇⵏⵉⵢⵏ ⵏ ⵜⵙⵏⵉⵊⵊⵉⵜ ⴷ ⵜⵎⵜⵜⴰⵡⵉⵏ ⵜⵉⵎⵣⵡⵓⵔⴰ ⴽⵛⵛⵎⵏⵉⵏ ⵖ ⵓⴼⴰⵔⵙ ⵏ ⵉⵙⴰⴼⴰⵔⵏ ⵏ ⵓⴱⵕⵓⵟⵓⴽⵓⵍ ⵏ ⵓⵙⵉⵊⵊⵉ”.

ⵉⵣⵎⵎⵉⵎ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⴷ ⴰⵎⵕⵚⵓⵎ ⵓⵟⵟⵓⵏ 349.12.2 ⵏ 20 ⵎⴰⵕⵚ 2020 ⴷ ⵓⵎⵕⵚⵓⵎ ⵓⵟⵟⵓⵏ 270.20.2 ⵏ 16 ⵎⴰⵕⵚ 2020 ⴳⴰⵏ ⴰⵙⴰⵜⵉ ⴰⵣⵣⵔⴰⴼ ⵖ ⵣⵔⵉⵏⵜ ⵜⵏⵎⴰⵇⵇⴰⵙⵉⵏ ⴰⴷ, ⵢⵉⵍⵉ ⵓⵙⵡⵓⴷⴷⵓ ⵏ ⵜⵎⵙⴰⵖⵜ ⵏ ⵉⵎⴰⵙⵙⵏ ⵏ ⵜⵙⵏⵉⵊⵊⵉⵜ ⴷ ⵜⵙⵏⵉⵊⵊⵉⵜ ⵜⵓⴷⴷⵉⵔⵜ ⴷ ⵉⵎⴰⵙⵙⵏ ⵓⴼⵔⵉⴷⵏ ⵏ ⵡⴰⵔⴰⵢ ⴷ ⵉⵙⴰⴼⴰⵔⵏ ⵙ ⵓⵡⵇⵇⵔ ⵏ ⵜⴼⵔⴽⵉⵡⵉⵏ ⵏ ⵓⵣⵣⴳⵉⵔ ⵏ ⵜⵏⵎⴰⵇⵇⴰⵙⵉⵏ ⵏ ⵓⵎⵀⴰⵡⴰⴹ”. ⵉⵙⴷⴷⵉⴷ ⵎⴰⵙ “ ⵜⵥⴹⴰⵕ ⵜⵎⴰⵡⴰⵙⵜ ⵙ ⵓⵎⵀⴰⵡⴰⴹ ⴷ ⵜⵎⵙⵙⵓⵔⵉⵏ ⴰⴷ ⵜⵙⵖ ⵉⵎⴰⵙⵙⵏ ⴰⴷ ⵙ ⵓⵏⵛⴽ ⵉⴷⵔⵓⵙⵏ ⴼ ⵓⵏⵛⴽ ⵍⵍⵉ ⴰⴷ ⵜⵙⵔⵙ, ⵢⴰⵡⵙ 83% ⵏ ⵜⵏⵎⴰⵇⵇⴰⵙⵉⵏ ⴰⴷ ⵃⵎⴰ ⴰⴷ ⴷ ⵉⵛⵉⴹ 20% ⵏ ⵓⵏⵛⴽ ⵏⵏⵙⵏⵜ”.

ⵍⵍⵉⵖ ⵉⵜⵜⵓⵕⵥⴰⵎ ⵓⵎⴹⴰⴽⴰⵕ, ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⴰⵏⵏⴰⵢⵉⵏ ⴷ ⵉⵙⵇⵙⵉⵜⵏ ⵣⴷⵉⵏⵉⵏ ⴷ ⵓⵙⵓⵔⵙ ⵏ ⵓⴱⴰⵢⵢⵓⵕ ⴷ ⵓⵙⵡⵓⴷⴷⵓ ⵏ ⵜⵎⵙⵓⵜⵍⵉⵏ ⵏ ⵓⵎⴰⵡⴰ ⴷ ⵓⵍⴳⴳⵓⴷ ⵏ ⵜⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵏ ⵓⵏⴳⵔⴰⵡ ⴰⴷⵓⵙⴰⵏ ⴰⵏⴰⵎⵓⵔ ⴷ ⵓⵙⵖⵔⵜ ⵏ ⵜⵥⴹⴰⵕⵉⵏ ⵏⵏⵙ, ⵙ ⵓⵡⵇⵇⵔ ⵏ ⵉⵣⵣⵔⴰⴼⵏ ⵍⵍⴰⵏⵉⵏ, ⵙⵍⴰⵡⴰⵏ ⴰⴽⴽⵯ ⵎⴰ ⴷ ⵉⵥⵍⵉⵏ ⴷ ⵜⵏⵎⴰⵇⵇⴰⵙⵉⵏ ⵏ ⵎⵙⵓⵖⵜ ⵏ ⵉⵔⵉⵎⵏ ⵏ ⵓⵣⵣⵔⴰⵢ ⴷ ⵓⵎⴰⵡⴰ ⵏ ⵚⴹⵉⵚ ⵉⵙⴳⵏⴰⴼⵏ ⵙ ⵜⵎⵜⵜⴰⵡⵉⵏ ⵉⵏⵙⴼⴰⵔⵏ  ⴷ ⵉⵎⴰⵙⵙⵏ ⵏ ⵜⵙⵏⵉⵊⵊⵉⵜ.

ⵖⵎⴽ ⵍⵍⵉ ⵙⴰⵡⵍⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⴼ ⵉⵙⵓⴳⴰⵎ ⵉⵏⴼⴳⴰⵏⵏ ⵍⵍⴰⵏⵉⵏ ⵖ ⵜⵎⴰⵖⵜ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵎⵛⴰⵛⴽⴰⵏ ⴷ ⴼ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ ⵏ ⵉⴹⴱⵉⴱⵏ ⴷ ⵉⴼⵔⵎⵍⵉⵢⵏ ⴷ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⴷⵓⵙⴰⵏ, ⵖⵎⴽ ⴰⵏⵏ ⴷ ⵓⵙⵎⵔⵙⵍ ⵏ ⵜⵎⴰⴷⵔⴰⵡⵜ ⴷ ⵢⵉⴳⵔ ⵓⵙⵍⵉⴳ ⵖ ⵜⵎⵙⵓⵜⵍⵉⵏ ⴰⴷ, ⵖⵔⵉⵏ ⴰⴷ “ⵉⵍⵉⵏⵜ ⵜⵎⵙⵓⵜⵍⵉⵏ ⴳⴰⴷⴷⴰⵏⵉⵏ ⴷⴰⵔ ⵉⵙⵓⴳⴰⵎ ⵉⵏⴼⴳⴰⵏⵏ ⵏ ⵢⵉⴳⵔ ⵏ ⵜⴷⵓⵙⵉ  ⵃⵎⴰ ⴰⴷ ⵉⵔⵅⵓ ⵓⵙⴽⵔ ⵏ ⵜⵡⵓⵔⵉⵡⵉⵏ ⵏⵏⵙⵏ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⴰⴷ”.

ⵖ ⵎⴰ ⴷ ⵉⵥⵍⵉⵏ ⵙ ⵍⵍⵓⵊⵉⵙⵜⵉⴽ, ⵙⴰⵡⵍⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴼ “ⵜⵎⴰⵎⴽⵜ ⵍⵍⵉ ⵙ ⵜⵏⵢⴰⵍⴰⴽⵎ ⵜⵎⴰⵡⴰⵙⵜ ⴷ ⵓⵙⴼⵔⵓⵔⵜ ⵏ ⵉⴷⵖⴰⵔⵏ ⵏ ⵓⴱⴰⵢⵢⵉⵕ ⵖ ⵉⵙⵓⵏⵏ ⴷ ⵜⴼⵔⴽⵉⵏ ⴷ ⵉⴼⵔⴷⵙ ⵏ ⵓⴼⴰⵔⵙ ⴷ ⵜⵎⴳⵓⵔⵉ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵛⵃⴰⵏⵜ ⵜⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵖ ⴽⵔⴰ ⵏ ⵜⵙⴳⴳⵉⵡⵉⵏ. ⵖⵎⴽ ⴰⵏⵏ ⴷ ⵓⵙⵎⴰⵇⵇⵍ ⵏ ⵉⵎⴰⵍ ⵏ ⵜⴼⵔⴽⴰ ⴰⴷ ⴷ ⵓⵙⵓⵊⴷ ⵏ ⵉⵙⵉⵏⴰⵔⵢⵓⵜⵏ ⵍⵍⴰⵏⵉⵏ ⵉ ⵜⵎⴰⵖⵜ ⴷ ⵓⵙⵓⵔⵙ ⵏ ⵓⴱⴰⵢⵢⵓⵕ”.