ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⴷⵔⵓ ⵖ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵎⵎⵓⵙ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵍⵍⵉ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ

ⵉⴷⵔⵓ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⵡⵓⵔⵉⵡⵉⵏ ⵏ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵎⵎⵓⵙ ⵏ ⵉⵏⵙⵙⵉⵅⴼⵏ ⵏ ⵉⴱⵕⵍⴰⵎⴰⵏⵏ ⵍⵍⵉ ⵜⵙⵏⵎⴰⵍⴰ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⵓⵙⵙⴰⵏ ⵏ 19 ⴷ 20 ⵖⵓⵛⵜ 2020, ⵍⵍⵉ ⵜⵙⵏⵓⴱⴳ ⵜⴳⴷⵓⴷⴰⵏⵜ ⵏ ⵏⵏⴰⵎⵙⴰ, ⵙ ⵜⴻⵜⵉⵇⵏⵉⵜ ⵏ ⵓⴼⵉⵣⵢⵓⴽⵓⵏⴼⵉⵕⵓⵏⵚ.

ⵖ ⵜⵖⵉⵎⵉⵜ ⵏ ⵓⵏⵏⵓⵕⵥⵎ, ⵙⵙⴼⵍⴷⵏ ⵉⵎⴷⵔⴰⵡⵏ ⵖ ⵓⴳⵔⴰⵡ ⴰⴷ ⵉ ⵜⴳⵓⵔⵉⵡⵉⵏ ⵏ ⵎⴰⵙⵙⴰ Gabriela Cuevas Barrón ⵜⴰⵏⵙⵙⵉⵅⴼⵜ ⵏ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⴷ ⵎⴰⵙⵙ Antonio Guterres  ⴰⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵉⵎⵓⵏⵏ.

ⵖ ⵓⵏⵎⵓⵇⴰⵔ ⴰⴷ ⴰⴱⵕⵍⴰⵎⴰⵏⵉ, ⵔⴰⴷ ⵢⵉⵍⵉ ⵓⵔⵣⵣⵓ ⴼ ⴽⵉⴳⴰⵏ ⵏ ⵜⵎⵙⴰⵔ ⵖ ⵉⵍⵍⴰ ⵓⵙⵓⴳⵜ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵃⵎⴰ ⴰⴷ ⵉⵍⵉⵏ ⵉⴼⵙⵙⴰⵢⵏ ⵏ ⵓⵍⴳⴳⵓⴷ ⵉ ⵜⵎⵓⴽⵔⵉⵙⵉⵏ ⵣⴷⵉⵏⵉⵏ ⴷ ⵓⵏⵣⵡⵉ, ⴰⵎⴰⵜⵜⴰⵢ ⵏ ⵉⴼⴳⴰⵏⵏ ⵉ ⵜⵓⴷⵔⵜ ⵉⵥⵉⵍⵏ: ⵜⵉⵏⴰⵥⴰⵕⵉⵏ ⴷ ⵡⴰⵏⵏⴰⵣⵏ ⴷ ⵉⴼⵙⵙⴰⵢⵏ, ⴰⵙⵖⵓⴷⵓ ⵏ ⵓⵏⴱⴰⴹ ⵉ ⵓⵙⵉⵣⴷⵔ ⵏ ⵉⵎⵣⴰⵔⴰⵢⵏ ⵏⴳⵔ ⵉⴱⵕⵍⴰⵎⴰⵏⵏ ⴷ ⵉⵎⴰⴷⴰⵏⵏ, ⴰⵚⴽⵓ ⵏ ⵉⵏⴳⵔⴰⵡⵏ ⵉⴷⵎⵙⴰⵏⵏ ⵉⵙⵓⵍⴰⵏⵏ ⵖ ⵉⵍⵍⴰ ⵓⵙⵉⴷⴼ ⵉⴹⵎⵏⵏ ⵜⴰⵏⵓⴼⵔⴰⵢⵜ ⴷ ⵜⵣⵔⴼⵜ ⵉ ⴽⵓ ⵢⴰⵏ, ⴰⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵜⵉⵡⵛⵛⵏⵜ: ⵜⴰⵏⵏⴰⵢⵉⵏ ⴷ ⵜⵓⴳⴳⴰ ⵏ ⵓⵏⴳⵉⵙⵏ.  

ⵖ ⵜⵙⵓⵜⵍⵜ ⴰⴷ, ⵔⴰⴷ ⵢⵉⵍⵉ ⵓⵙⵎⵏⵉⴷ ⵏ ⴽⵉⴳⴰⵏ ⵏ ⵉⵏⵇⵇⵉⵙⵏ ⵣⴷⵉⵏⵉⵏ ⴷ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵖ 2030, ⴷ ⵓⵙⵎⵖⵔ ⵏ ⵓⴷⵖⴰⵔ ⵏ ⵉⵄⵔⵔⵉⵎⵏ ⴷ ⵜⵓⴷⵔⵜ ⵜⴰⵙⵔⵜⴰⵏⵜ ⵓⵍⴰ ⵖ ⵉⴱⵕⵍⴰⵎⴰⵏⵏ, ⴷ ⵓⵙⴽⵔ ⵙ ⵓⵎⵏⵣⴰⵢ ⵏ ⵜⵎⵢⴰⴷⴰⵙⵜ ⵏ ⵡⴰⵏⴰⵡ ⴷ ⵓⵙⵙⵎⵖⵔ ⴰⴷⵎⵙⴰⵏ ⴷ ⵓⵏⴰⵎⵓⵏ ⵏ ⵜⵎⵖⴰⵔⵉⵏ ⴷ ⵜⵄⵔⵔⵉⵎⵉⵏ, ⴷ ⵉⵥⵕⵉ ⵏ ⵜⵎⵙⴽⴰⵔ ⵥⵉⵍⵏⵉⵏ ⵖ ⵢⵉⴳⵔ ⴰⴷ, ⴷ ⵜⴷⵉⵎⵓⵇⵔⴰⵟⵉⵜ ⴷ ⵉⴱⵕⵍⴰⵎⴰⵏⵏ, ⵖⵎⴽ ⴰⵏⵏ ⴷ ⵜⵏⴰⵥⴰⵕⵉⵏ ⵍⵍⵉ ⴷ ⵉⵡⵉⵏⵜ ⵜⵎⴰⵙⵙⴰⵏⵉⵏ ⴷ ⵜⴻⵜⵉⴽⵏⵓⵍⵓⵊⵉⵜ ⴷ ⵜⵖⴰⵔⵉⵡⵉⵏ  ⴷ ⵓⵙⵖⵉⵡⵙ ⵙ ⵉⴼⵙⵙⴰⵢⵏ ⴷ ⵓⵍⴳⴳⵓⴷ ⵖ ⵉⴳⵔⴰⵏ ⴰⴷ.

ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵖ ⵜⵙⵓⵜⵍⵜ ⴰⴷ ⵢⴰⵜ ⵜⴽⵛⵛⵓⵎⵜ ⴼ: “ⴰⵙⵎⵓⵙⵙⵓ ⵏ ⵜⵓⴳⴳⴰⵙ ⵏ ⵉⴱⵕⵍⴰⵎⴰⵏⵏ ⵉ ⵜⵣⴷⴰⵢⵉⵏ ⵜⵉⴳⵜⵉⵔⴰⵏⵉⵏ ⴱⴰⵀⵔⴰ ⵕⵡⴰⵏⵉⵏ ⵉⴹⵎⵏⵏ ⴰⴼⵔⴰ ⴷ ⵜⴳⵎⵉ ⵜⴰⵙⵓⵍⴰⵏⵜ ⵉ ⵉⵎⴰⴷⴰⵏⵏ ⴷ ⵓⵎⴰⴹⴰⵍ”, ⵉⵙⴰⵡⵍ ⴳⵉⵙ ⴼ ⵜⵎⵙⵓⵜⵍⵜ ⵉⵥⵍⵉⵏ ⵖ ⴷⴷⵔⵏⵜ ⴽⵓ ⵜⵉⵎⵉⵣⴰⵔ ⵍⵍⵉⵖ ⵉⵍⵍⴰ ⵓⴱⴰⵢⵢⵓⵕ ⵏ ⴽⵓⴼⵉⴷ 19, ⴰⵢⵍⵍⵉ ⴷ ⵢⵉⵡⵉⵏ ⴰⴷ ⴰⵡⵙⵏ ⵉⴱⵕⵍⴰⵎⴰⵏⵉⵢⵏ ⴷ ⵉⴱⵕⵍⴰⵎⴰⵏⵏ ⵖ ⴽⵓ ⵜⴰⵙⴳⵉⵡⵉⵏ ⵏ ⵓⵎⴰⴹⴰⵍ ⵙ ⵜⵖⴰⵔⴰⵙⵜ ⵉⵕⵡⴰⵏ ⵖ ⵜⵡⵓⵔⵉ ⵜⴰⵎⴳⵔⵓⵜ ⵖ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ.

ⵉⵙⵙⴽⵜⵉ ⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⵜⵉⵍⴰⵍⵜ ⵜⴰⵅⴰⵜⴰⵔⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⵖ ⵓⵙⴷⵓⵙ ⵏ ⵓⵎⵢⴰⵡⴰⵣ ⴰⵏⵎⵏⴰⴹ ⴷ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵙ ⵜⵙⵔⵜⴰⵢ ⵜⵓⵎⵀⵉⵍⵉⵏ, ⵉⴱⴷⵔ ⵜⴰⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵉⵏⵙⵙⵉⵅⴼⵏ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19 ⵖ ⵓⵎⵏⵥⴰⵡ, ⴷ ⵜⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⵖ ⵜⵡⵉⵙⵉ ⴷ ⵙⵎⵎⵓⵙⵜ ⴷ ⵎⵔⴰⵡⵜ ⵏ ⵜⵎⴰⵣⵉⵔⵜ ⵖ ⵉⴼⵔⵉⵇⵢⴰ ⵖ ⵍⵍⴰⵏ ⵉⵎⴰⵙⵙⵏ ⵏ ⵜⵙⵏⵉⵊⵊⵉⵜ ⴷ ⵡⴰⵔⴰⵢ ⵉ ⵓⵙⵏⴰⵍ ⵏ ⵜⵓⴳⴳⴰⵙ ⵏ ⵜⵎⵉⵣⴰⵔ ⴰⴷ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⴼⵉⴷ 19.

ⵉⵙⴷⴷⵉⴷ ⵎⴰⵙ ⴷ ⵜⵉⵡⵉⵙⵉ ⵉⵥⵉⵍⵏ ⵉⵣⵣⵉⴳⵣⵏ ⵏⴳⵔ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵎⵜⵜⴰ ⵉⵎⵓⵏⵏ, ⴰⵔ ⵜⵎⵎⴰⵍ ⵜⴰⵏⵏⴰⵢⵜ ⵜⴰⴳⵔⴰⵖⵍⴰⵏⵜ ⵍⵍⵉ ⴷ ⵉⵇⵇⴰⵏⵏ ⴰⴷ ⵜⵉⵍⵉ ⵖ ⵜⵎⵙⵙⵓⴳⵓⵔⵜ ⵜⴰⵙⵜⵔⴰⵜⵉⵊⵉⵜ ⵏ ⵉⵙⴽⴽⵉⵏⵏ ⵉⴳⵔⴰⵖⵍⴰⵏⵏ, ⵉⵙⵓⵜⴳ ⵜⵉⵡⵉⵙⵉ ⵏ ⵉⴱⵕⵍⴰⵎⴰⵏⵏ ⵖ ⵜⵡⵓⵔⵉ ⵉ ⵚⴰⵃⴰ ⵏ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵖ 2030, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵜⴱⴷⴷ ⴼ ⵉⵎⵏⵣⴰⵢⵏ ⵏ ⵓⵎⵇⵏ ⵏ ⵜⵎⵜⵜⴰ ⵉⵎⵓⵏⵏ, ⵜⴳ ⵜⵎⴰⴷⴷⴰⵙⵜ ⴰⴷ ⵜⴰⵔⵙⵍⵜ ⵏ ⵜⵡⵓⵔⵉ ⵜⴰⴳⵔⴰⵖⵍⴰⵏⵜ ⵉⵕⵡⴰⵏ.