ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵎⴰⵙⵙ ⵄⴰⵇⵉⵍⴰ ⵚⴰⵍⵉⵃ ⵄⵉⵙⴰ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵍⵉⴱⵉ ⵣⵎⵎⵉⵎⵏ ⵜⴰⵎⵢⴰⵇⵇⴰⵏⵜ ⵏ ⵓⵎⵢⴰⵡⴰⵙ ⵊⴰⵔ ⵙⵉⵏ ⵉⵙⵇⵇⵉⵎⵏ
ⵉⵙⴽⵔ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 27 ⵢⵓⵍⵢⵓⵣ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⵉⵎⴹⴰⴽⴰⵕⵏ ⴷ ⵎⴰⵙⵙ ⵄⴰⵇⵉⵍⴰ ⵚⴰⵍⵉⵃ ⵄⵉⵙⴰ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵍⵉⴱⵉ, ⵍⵍⵉ ⵉⵍⵍⴰⵏ ⵅ ⵢⵉⵅⴼ ⵏ ⵢⴰⵏ ⵓⴽⴰⴱⴰⵕ ⵉⵙⵜⴰⵡⵀⵎⵎⴰⵏ ⵖ ⵓⵔⵣⴰⴼ ⵓⵏⵚⵉⴱ ⵉ ⵜⵎⴰⵣⵉⵔⵜ ⵏⵏⵖ.
ⵖ ⵓⵏⵎⵓⵇⵇⴰⵔ ⴰⴷ ⵖ ⵉⵃⴰⴹⵕ ⵎⴰⵙⵙ ⴰⵎⵙⵇⴰⴷ ⵏ ⵍⵉⴱⵢⴰ ⵖ ⵕⵕⴱⴰⵟ, ⵉⵙⵓⵜⴳ ⴷ ⵉⵙⵏⵉⵎⵎⵔ ⵎⴰⵙⵙ ⵄⴰⵇⵉⵍⴰ ⵚⴰⵍⵉⵃ ⵄⵉⵙⴰ ⵜⵓⴳⴳⴰⵙ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ ⵃⵎⴰ ⴰⴷ ⵢⵉⵍⵉ ⵓⴼⵙⵙⴰⵢ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ. ⵉⵙⴷⴷⵉⴷ ⵎⴰⵙ ⵀⵔⵛⵏ ⵉⵙⵓⵔⵙⵏ ⵖ ⵍⵉⴱⵢⴰ ⵍⵍⵉⵖ ⵓⵔ ⵉⵍⵍⵉ ⵓⵙⴽⵔ ⵙ ⵓⵎⵛⴰⵛⴽⴰ ⵏ ⵚⵚⵅⵉⵕⴰⵜ ⵉⵜⵜⵓⵣⵎⵎⴰⵎⵏ ⵖ 2015 ⵙ ⵓⴱⴷⴷⴰⴷ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵙⵏⴰⵍ ⵏ ⵜⵎⵜⵜⴰ ⵉⵎⵓⵏⵏ.
ⵉⵏⵏⴰ ⵎⴰⵙⵙ ⵄⴰⵇⵉⵍⴰ ⵚⴰⵍⵉⵃ ⵄⵉⵙⴰ ⵎⴰⵙ ⵉⵙⴽⵔ ⵓⵙⵇⵇⵉⵎ ⵏ ⵉⵎⵓⵔⴰ ⴰⵍⵉⴱⵉ ⵢⴰⵜ ⵜⵙⵏⵜⴰⵢⵜ ⵜⴰⵎⴰⵢⵏⵓⵜ ⵉ ⵓⴼⵙⵙⴰⵢ ⵏ ⵜⵎⵓⴽⵔⵉⵙⵜ ⵜⴰⵍⵉⴱⵉⵜ « ⵓⵔ ⵉⵎⵎⵣⵔⵉⵏ ⴷ ⵓⵎⵛⴰⵛⴽⴰ ⵏ ⵚⵚⵅⵉⵕⴰⵜ ⴷ ⵜⵖⵜⴰⵙⵉⵏ ⵏ ⵜⵎⵜⵜⴰ ⵉⵎⵓⵏⵏ…ⵜⵍⵍⴰ ⴼ ⵜⵎⴰⴳⵉⵜ ⵏ ⵓⵎⴰⴷⴰⵏ ⴰⵍⵉⴱⵉ ⴷ ⵜⴳⵏⵙⴰⵙⵜ ⵏ ⴽⵓ ⵉⴼⵔⴷⴰⵙ ⵏⵏⵙ ⵖ ⵜⴳⵔⴰⵡⵉⵏ ⵜⵉⵎⵣⵣⴳⴰⵔⵉⵏ ⴷ ⵜⵣⵣⵔⴰⴼⵉⵏ ». ⵢⵉⵏⵉ ⵖ ⵓⵎⵏⴰⴹ ⴰⴷ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵓⵇⵔⵢⴰⵏ ⴷ ⵓⵙⵎⴰⴷ ⵏ ⵓⴽⵛⵛⵓⵎ ⵏ ⵉⵎⵣⵣⴰⵏ, ⵜⵉⵍⵉ ⵜⴼⴰⵜⵉⵜ ⴷ ⵜⵢⴰⵏⵜ ⵏ ⵉⴽⴰⵍⵉⵡⵏ ⵏ ⵍⵉⴱⵢⴰ ⴷ ⵜⴱⴰⵖⵓⵔⵉⵏ ⵏⵏⵙⵏ.
ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵜⵣⴷⴰⵢⵉⵏ ⵏ ⵜⴰⴳⵯⵎⴰⵜ ⵉⵥⵉⵍⵏ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ ⴷ ⵙⵉⵏ ⵉⵎⴰⴷⴰⵏⵏ, ⵢⵉⵏⵉ ⵎⴰⵙ ⵉⵙⴽⵔ ⵍⵎⵖⵔⵉⴱ « ⵖ ⵜⵏⴼⵔⵓⵜ ⴷ ⵓⵔⴳⴳⵉⴳ ⵏ ⵍⵉⴱⵢⴰ ⵢⴰⵏ ⵓⴳⵣⵣⵓⵎ ⵖ ⵜⵏⴼⵔⵓⵜ ⴷ ⵓⵔⴳⴳⵉⴳ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ». ⵢⵉⵏⵉ ⵎⴰⵙ ⵉⵕⵚⴰ ⵡⴰⴷⴷⴰⴷ ⵏ ⵍⵎⵖⵔⵉⴱ ⴷⴰⵜ ⵏ ⵜⴰⵙⵙⴰⵙⵜ ⵜⴰⵍⵉⴱⵉⵜ, ⵍⵍⵉⵖ ⵉⵍⵍⴰ ⴼ ⵓⵎⵣⴰⵖ ⵏ ⵜⵢⴰⵏⵜ ⴷ ⵓⵔⴳⴳⵉⴳ ⵏ ⵍⵉⴱⵢⴰ ⴷ ⵓⵙⵏⴰⵍ ⴷ ⵓⵎⵙⴰⵡⴰⵍ ⴰⵍⵉⴱⵉ-ⴰⵍⵉⴱⵉ ⵃⵎⴰ ⴰⴷ ⵢⵉⵍⵉ ⵓⵎⵛⴰⵛⴽⴰ ⵢⵓⵎⴰⵏ ⴼ ⵓⴼⵙⵙⴰⵢ ⴰⵙⵔⵜⴰⵏ ⵏ ⵜⴰⵙⵙⴰⵙⵜ.
ⵉⵣⵎⵎⵉⵎ ⵎⴰⵙⵙ ⵍⵎⴰⵍⴽⵉ ⵎⴰⵙ ⴳⴳⵓⵜⵏ ⵉⵙⴷⵉⴷⴷⵉⵢⵏ ⵎⴷⵉⵏⵉⵏ ⵉ ⵜⵙⴳⴰ ⴰⴷ ⵖ ⵍⵍⴰⵏ ⵉⵥⵟⵡⴰⵏ ⵏ ⵓⴱⵔⵙⵙⵉⵡⴷ ⴷ ⵜⴼⵔⵢⴰⵏⵉⵏ ⵎⴳⴰⴷⴷⴰⵏⵉⵏ ⴷ ⵓⵣⵡⴰⴳ ⵡⴰⵔⵓⵍⴳⵉⵏ, ⵢⵉⵏⵉ « ⵉⴳⴰ ⵡⴰⵡⵜⵜⴰⵙ ⴰⵅⴰⵜⴰⵔ ⵏ ⵍⵎⵖⵔⵉⴱ ⴰⴷ ⵢⴰⵖⵓⵍ ⵓⵔⴳⴳⵉⴳ ⵉ ⵍⵉⴱⵢⴰ ⴷ ⵓⴱⵔⵉⴷ ⵏ ⵓⵚⴽⵓ ⵏⵏⵙ ⴰⵎⵔⵙⵍⴰⵏ, ⵉⴳ ⵓⵎⵛⴰⵛⴽⴰ ⵏ ⵚⵚⵅⵉⵕⴰⵜ ⵢⴰⵜ ⵜⵙⴰⵖⵓⵍⵜ ⴷ ⵢⵓⵙⴰⵏ ⵉⵥⴹⴰⵕⵏ ⴰⴷ ⵜⵙⵎⵓⵏ ⵜⵉⵖⴰⵡⵙⵉⵡⵉⵏ ⵜⵉⵎⴰⵢⵏⵓⵜⵉⵏ ⵏ ⵜⵉⵍⴰⵡⵜ ⵜⴰⵍⵉⴱⵉⵜ ⵜⴰⵎⴰⵢⵏⵓⵜ… ».
ⵖ ⵜⴳⵉⵔⴰ ⵏ ⵓⵏⵎⵓⵇⵇⴰⵔ, ⵣⵎⵎⵉⵎⵏ ⵙⵉⵏ ⵉⵏⵙⵙⵉⵅⴼⵏ ⵢⴰⵜ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵉⵡⴰⵜⵜⵙⵏ ⴰⵙⴱⵓⵖⵍⵓ ⵏ ⵓⵎⵢⴰⵡⴰⵙ ⴰⴱⵕⵍⴰⵎⴰⵏⵉ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⵏ ⵙⵏⴰⵜ ⵜⵎⵉⵣⴰⵔ, ⴳⵉⵙ ⴰⵙⵏⴼⵍ ⵏ ⵓⵔⵣⴰⴼ ⵏ ⵉⴽⴰⴱⴰⵕⵏ ⵉⴱⵕⵍⴰⵎⴰⵏⵉⵢⵏ, ⴷ ⵓⵙⴷⵓⵙ ⵏ ⵓⴷⵔⴰⵡ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ ⴷ ⵜⴰⵏⵏⴰⵢⵉⵏ ⴷ ⵓⵙⴷⵓⵙ ⵏ ⵓⵣⴷⴷⵓⵢ ⵏⴳⵔⴰⵜⵜⵙⵏⵜ ⴷ ⵓⵎⵛⴰⵡⴰⵕ ⵅⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ ⵖ ⵉⴳⵔⴰⵡⵏ ⵉⵏⵎⵏⴰⴹⵏ ⴷ ⵉⵏⵎⵏⵥⴰⵡⵏ ⴷ ⵉⴳⵔⴰⵖⵍⴰⵏⵏ.