ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⴷ ⵚⴹⵉⵚ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵍⴰⵏⵉⵏ ⴰⴼⵔⵉⵙ ⴰⵏⴰⵎⵓⵏ ⴷ ⵓⵎⴰⴷⴷⴰⵙ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵡⴰⵢⵏⴰⵙ 20 ⵢⵓⵍⵢⵓⵣ 2020 ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵉ ⵓⵙⴳⴳⵯⴰⵙ ⴰⵥⵕⴼⴰⵏ 2020 ⵖ ⵜⵖⵔⵉ ⵜⵉⵙ ⵙⵏⴰⵜ, ⴷ ⵚⴹⵉⵚ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⴷ ⵜⴽⴰⵕⴹⴰ ⵜⴰⵏⴰⵎⵓⵔⵜ ⵜⴰⵍⵉⴽⵟⵕⵓⵏⵉⵜ ⴷ ⵓⵏⴳⵔⴰⵡ ⵏ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵓⵙⵏⵎⴰⵍⴰ ⵏ ⵜⵣⵣⵓⵍⵜ ⵏ ⵓⵎⵙⵙⵉⴹⵏ ⵓⵏⵚⵉⴱ ⴷ ⵓⵙⴽⵔ ⵏ ⵜⵎⵔⵙⴰⵍ ⵏ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ, ⵖ ⵜⵖⵉⵎⵉⵜ ⵜⵓⵙⵎⵉⴷⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⴷ ⵎⴰⵙⵙ ⵏⵓⵕ ⴷⴷⵉⵏ ⴱⵓⵟⵢⵢⴱ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ.
ⵖ ⵓⵙⵙⴼⵔⵓ ⵏ ⵓⵙⵜⴰⵢ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵓⵟⵟⵓⵏ 35.20 ⵏ ⵓⵙⴳⴳⵯⴰⵙ ⴰⵥⵕⴼⴰⵏ 2020, ⵙⴷⴷⵉⴷⵏⵜ ⵜⵔⵓⴱⴱⴰ ⵏ ⵜⵓⵣⵍⵜ ⴷ ⵜⵓⴳⵜ ⴼ ⵓⵙⵏⴰⵍ ⵏ ⵓⵎⴰⴹⴰⵍ ⴰⴼⴰⵔⴰⵏ, ⴷ ⵓⵙⵙⵔⵇⴱ ⵏ ⵓⵙⵙⴰⵔⵓ ⴷ ⵜⵙⵎⵓⵔⵜ, ⴷ ⵓⵙⴰⵍⵉ ⵏ ⵜⵣⵎⵔⵜ ⵏ ⵉⵏⵎⵓⵔⴰⵏ ⵖ ⵎⵙⵓⵖⵜ, ⴷ ⵓⵙⵏⵎⴰⵍⴰ ⵏ ⵢⵉⴳⵔ ⵓⵔ ⵉⴳⴰⴷⴷⴰⵏ, ⴼⴽⵉⵏ ⵜⵉⵙⵓⵎⵔⵉⵏ ⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.
ⵉⵏⵉⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⵣⵣⵓⵍⵉⵏ ⴷ ⵓⵙⵏⴰⵍ ⵏ ⵉⴳⵔⴰⵏ ⵜⵜⵓⴹⵕⵕⴰⵏⵏⵉⵏ, ⴷ ⵓⵙⵙⵉⴷⵔ ⵏ ⵜⵎⵙⵙⵏⵜⴰⵢ ⵜⵉⵏⴰⵎⵓⵔⵉⵏ, ⴷ ⵓⵙⵏⴰⵍ ⵏ ⵓⵢⴰⴼⵓ ⴰⵏⴰⵎⵓⵔ ⵍⵍⵉ ⵔⴰⴷ ⵉⴳ ⵜⵉⵎⵣⵡⵓⵔⴰ ⵏ ⵍⵎⵖⵔⵉⴱ ⴷⴼⴼⵉⵔ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ. ⵍⵍⵉⵖ ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⵏ ⵓⵥⵕⴼ ⵉⵜⵜⴰⵡⵙⵏⴼⴰⵍⵏ ⵉ ⵓⵙⴳⴳⵯⴰⵙ ⵏ 2020, ⵉⵙⵎⴷ ⵓⵙⵏⴼⴰⵔ ⴰⴷ ⵜⴰⴱⵔⵉⴷⵜ ⵏ ⵜⵖⵔⵉ ⵏⵏⵙ ⵖ ⵓⴱⵕⵍⴰⵎⴰⵏ, ⵔⴰⴷ ⵉⵜⵜⵓⵙⴽⵉⵔ ⴷⴼⴼⵉⵔ ⵏ ⵜⵥⵕⵉⴳⵜ ⵏⵏⵙ ⵖ ⵓⵖⵎⵉⵙ ⴰⵎⴰⴷⴷⵓⴷ.
ⵍⵍⵉⵖ ⵉⵙⵎⵏⵉⴷ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 53.19 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⵓⵟⵟⵓⵏ 127.12 ⵉⵣⴷⵉⵏ ⴷ ⵓⵙⵏⵎⴰⵍⴰ ⵏ ⵜⵣⵣⵓⵍⵜ ⵏ ⵓⵎⵙⵙⵉⴹⵏ ⵓⵏⵚⵉⴱ ⴷ ⵓⵙⴽⵔ ⵏ ⵜⵎⴰⴷⴷⴰⵙⵜ ⵜⴰⵣⵣⵓⵍⴰⵏⵜ ⵏ ⵉⵎⵙⵙⵉⴹⵏⵏ ⵓⵏⵚⵉⴱⵏ ⴷ ⵓⵙⵔⵓⵙ ⵏ ⵉⴱⴹⵉⵢⵏ ⵏ ⵓⵎⵎⴰⵜⵜⵉ ⴷ ⵉⵎⵥⵍⵉⵢⵏ ⵣⴷⵉⵏⵉⵏ ⵙ ⵜⵉⴽⴽⵉ ⵏ ⵓⴼⵔⵉⵙ ⵏ ⵓⵎⵙⵙⵉⴹⵏ ⵓⵏⵚⵉⴱ, ⵉⵙⴷⴷⵉⴷ ⵎⴰⵙ ⵉⵡⴰⵜⵜⵙ ⵓⵙⵏⴼⴰⵔ ⴰⴷ ⴰⵣⵔⴰⵢ ⵏ ⵡⴰⴷⴷⴰⴷ ⵖ ⵜⵍⵍⴰ ⵜⵎⴰⴷⴷⴰⵙⵜ ⵜⴰⵣⵣⵓⵍⴰⵏⵜ ⵏ ⵉⵎⵙⵙⵉⴹⵏⵏ ⵓⵏⵚⵉⴱⵏ ⴷ ⵜⵎⵓⴽⵔⵉⵙⵉⵏ ⵉⵍⵍⴰⵏ ⵖ ⵜⵙⵏⵙⵉ ⵏ ⵓⵙⵍⴳⵏ 127.12 ⵙ ⵜⵎⵢⴷⴰⵙⵜ ⵜⴰⵎⴰⴷⵔⴰⵡⵜ ⴷ ⵉⴷ ⴱⴰⴱ ⵏ ⵜⵣⵣⵓⵍⵜ ⴰⴷ.
ⵉⵙⵙⵉⵙⴼⵉⵡ ⵎⴰⵙⵙ ⵏⵓⵕ ⴷⴷⵉⵏ ⴱⵓⵟⵢⵢⴱ ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ, ⵎⴰⵙ ⵉⵔⴰ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 04.20 ⵉⵣⴷⵉⵏ ⴷ ⵜⴽⴰⵕⴹⴰ ⵜⴰⵍⵉⴽⵟⵕⵓⵏⵉⵜ ⵜⴰⵏⴰⵎⵓⵔⵜ ⴰⵙⴽⵔ ⵏ ⵢⴰⵜ ⵜⴰⵙⵓⵜ ⵜⴰⵎⴰⵢⵏⵓⵜ ⵏ ⵜⴽⴰⵕⴹⴰ ⴰⴷ ⵙ ⵜⵙⵓⵖⴰⵍ ⵣⵣⵉⴳⵣⵏⵉⵏ ⵏ ⵍⴰⵎⴰⵏ ⵢⵉⵡⵙⵏ ⵖ ⵓⵃⵟⵟⵓ ⵏ ⵓⵏⵎⵓⵔⵉ, ⴷ ⵓⵙⴱⴷⴷⵉ ⵏ ⴽⵓ ⵓⴷⵎⴰⵡⵏ ⵏ ⵓⵥⵡⵡⵕ ⵉⵜⵜⵓⵎⴽⴰⵏⵏ ⵏ ⵜⵎⴰⴳⵉⵜ ⵏⵏⵙ ⵜⴰⵎⴰⵢⵏⵓⵜ, ⵖⵎⴽ ⴰⵏⵏ ⴷ ⵓⵙⵉⴷⴼ ⵏ ⵜⵡⵓⵔⵉⵡⵉⵏ ⵢⴰⴹⵏⵉⵏ ⵍⵍⵉ ⵔⴰⴷ ⵢⴰⵡⵙ ⵖ ⵓⴹⴼⵕ ⵏ ⵓⵙⵎⴰⵇⵇⵍ ⵓⵏⴳⵉⵎ ⴰⵎⵓⵟⵟⵓⵏ ⵍⵍⵉ ⵜⵙⴽⴰⵔ ⵜⴳⵍⴷⵉⵜ, ⵢⵉⵡⵉ ⴷ ⵓⵙⵏⴼⴰⵔ ⵓⵍⴰ ⴰⵙⵙⵉⴳⵣ ⵏ ⵓⵡⵜⴰⵢ ⵏ ⵓⵙⴽⵔ ⵏ ⵜⴽⴰⵕⴹⴰ ⵜⴰⵏⴰⵎⵓⵔⵜ ⴰⵔ 16 ⵏ ⵓⵙⴳⴳⵯⴰⵙ.
ⵖ ⵓⵎⴹⴰⴽⴰⵕ ⵏ ⵓⵙⵏⴼⴰⵔ ⴰⴷ, ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵏⴼⴰⵔ ⴰⴷ ⵏ ⵓⵙⵍⴳⵏ ⵍⵍⵉ ⵔⴰⴷ ⵉⵔⴰⵔ ⵉ ⵉⵏⴰⵔⵓⵣⵏ ⵏ ⵉⵏⵎⵓⵔⴰⵏ ⴷ ⴽⵓ ⵉⵎⵙⴽⴰⵔⵏ ⵖ ⵓⵙⴱⴷⴷⵉ ⵏ ⵓⴷⵎⴰⵡⵏ ⵏ ⵓⵥⵡⵡⵕ ⵏ ⵜⵎⴰⴳⵉⵜ, ⴷ ⵓⴹⴼⵕ ⵏ ⵓⵙⵏⴼⵍ ⴰⵎⵓⵟⵟⵓⵏ ⵍⵍⵉ ⵜⵙⴽⴰⵔ ⵜⴳⵍⴷⵉⵜ, ⵖⵔⵉⵏ ⴰⴷ ⵢⵉⵍⵉ ⵓⵙⵎⵀⵍ ⵏ ⵜⵓⵎⴰⵢⵉⵏ ⵏⵏⵙ, ⴷ ⵓⵙⵓⵔⴼ ⵉ ⵉⵏⵎⵓⵔⴰⵏ ⵖ ⵜⵉⴽⴽⵉ ⵏ ⵡⴰⵔⵔⴰⵜⵏ ⵢⴰⴹⵏⵉⵏ ⵉⵖ ⵙⵉⴳⴳⵍⵏ ⴽⵔⴰ ⵏ ⵜⵏⵓⴼⴰ. ⵉⵏⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵜⵉⵍⵉ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵜⴰⵎⴰ ⵏ ⵜⵓⵜⵍⴰⵢⵜ ⵜⴰⵄⵕⴰⴱⵜ ⴷ ⵉⵙⴽⴽⵉⵍⵏ ⵉⵍⴰⵜⵉⵏⵉⵢⵏ ⵖ ⵜⴽⴰⵕⴹⴰ ⵙ ⵓⵎⵙⴰⵙⴰ ⴷ ⵓⵎⵏⵏⵉ ⵡⵉⵙ ⵙⵎⵎⵓⵙ ⵏ ⵓⴷⵓⵙⵜⵓⵔ, ⴷ ⵓⵙⵍⴳⵏ ⴰⵎⴰⴷⴷⴰⵙ ⵓⵟⵟⵓⵏ 16.26 ⵉⵣⴷⵉⵏ ⵙ ⵓⵙⵔⵓⵙ ⵏ ⵜⴼⵔⴽⵉⵡⵉⵏ ⵏ ⵓⵙⵎⵀⵍ ⵏ ⵓⴼⵔⵉⵙ ⴰⵎⴰⴷⴷⵓⴷ ⵏ ⵜⵎⴰⵣⵉⵖⵜ, ⴷ ⵓⵙⴷⵓⵙ ⵏ ⵉⵎⵓⵙⵙⵓⵜⵏ ⵍⵍⵉ ⵜⵙⴽⴰⵔ ⵜⵎⵔⵙⵍⵜ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⵖ ⴽⵓ ⵜⴰⵙⴳⵉⵡⵉⵏ ⵏ ⵍⵎⵖⵔⵉⴱ ⵃⵎⴰ ⴰⴷ ⵜⵉⵍⵉ ⵜⴽⴰⵕⴹⴰ ⴰⴷ ⵜⴰⵏⴰⵎⵓⵔⵜ ⴷⴰⵔ ⴽⵓ ⵢⴰⵏ.
ⵉⵍⵍⴰ ⵓⵍⴰ ⵓⵙⵖⵣⵏ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 72.18 ⵉⵣⴷⵉⵏ ⴷ ⵓⵏⴳⵔⴰⵡ ⵏ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵉⵣⵎⵎⵉⵎⵏ. ⵉⵡⴰⵜⵜⵙ ⴰⴷ ⵢⵉⵍⵉ ⵓⵏⴳⵔⴰⵡ ⴰⵏⴰⵎⵓⵔ ⵉⵙⵎⴷⵏ ⵉ ⵓⵣⵎⵎⴻⵎ ⵏ ⵜⴰⵡⵊⵉⵡⵉⵏ ⴷ ⵉⵡⴷⴰⵏ ⵔⴰⵏⵉⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ, ⴷ ⵓⵙⴽⵔ ⵏ ⵉⵎⴰⵙⵙⵏ ⵏ ⵓⵙⴷⵓⵙ ⵏ ⵓⵣⴷⴷⵓⵢ ⵊⴰⵔ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ, ⵢⵉⵡⵉ ⴷ ⴰⴷ ⵢⵉⵍⵉ ⵓⵣⵎⵎⴻⵎ ⴰⵏⴰⵎⵓⵔ ⵏ ⵉⵎⵣⴷⴰⵖⵏ, ⴷ ⵓⵣⵎⵎⴻⵎ ⴰⵏⴰⵎⵓⵏ ⵉⵎⵓⵏⵏ, ⴷ ⵓⵃⵟⵟⵓ ⵏ ⵜⵎⵓⵛⴰ ⵜⵉⵏⵉⵎⴰⵏⵉⵏ ⵏ ⵉⵡⴷⴰⵏ ⵜⵜⵓⵣⵎⵎⴰⵎⵏⵉⵏ, ⴷ ⵓⵙⴽⵔ ⵏ ⵜⵙⵏⵓⵔⴰⵢⵜ ⵜⴰⵏⵎⵓⵔⵜ ⵏ ⵉⵣⵎⵎⵉⵎⵏ.
ⵖ ⵓⵎⴹⴰⴽⴰⵕ ⴰⵎⴰⵜⴰⵢ, ⴱⴷⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴼ ⵡⴰⵜⵉⴳ ⵏ ⵓⵙⵏⴼⴰⵔ ⴰⴷ, ⵉⵏⵉⵏ ⵎⴰⵙ ⵉⵎⵙⴰⵙⴰ ⴷ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ ⵔⴰⵏⵉⵏ ⴰⵙⵖⵓⴷⵓ ⵏ ⵜⵢⴰⴼⵓⵜ ⵏ ⵉⵖⴰⵡⴰⵙⵏ ⵉⵏⴰⵎⵓⵏⵏ ⴷ ⵓⵙⵔⵓⵙ ⵏ ⵉⵙⵖⴰⵍⵏ ⵙⵇⵇⵉⵇⵏⵉⵏ ⴳⴰⵏⵉⵏ ⵉⵎⵙⵖⵓⵔⴰ ⵉ ⵓⵙⵡⵓⵜⵜⵓ ⵏ ⵉⵡⴷⴰⵏ ⵎⵓ ⵚⴰⵃⴰⵏ ⵉⵖⴰⵡⴰⵙⵏ ⵏ ⵓⵙⵏⴰⵍ ⴰⵏⴰⵎⵓⵏ.
ⵃⵎⴰ ⴰⴷ ⵢⵉⵍⵉ ⵓⵙⵎⵖⵔ ⵏ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵏ ⵉⵎⵙⵖⴰⵏⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ, ⴷ ⵉⵎⵙⴽⴰⵔⵏ ⵏ ⵜⵏⴱⴰⴹⵜ ⴹⴼⵕⵏⵉⵏ ⵜⴰⵎⴰⵡⴰⵙⵜ ⵏ ⵜⴳⵯⵏⵙⴰⵏⵜ, ⴷ ⵉⵎⵙⵡⵓⵔⵉⵢⵏ ⵖ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵡⴰⵔⴰⵢ ⵓⵖⵔⵉⵎ, ⵉⵙⵖⵣⵏ ⵓⵙⵇⵇⵉⵎⵏ ⵉⵎⵓⵔⴰ ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 37.18 ⵉⵣⴷⵉⵏ ⴷ ⵜⵎⵔⵙⵍⵜ ⵏ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ ⵏ ⵉⵎⵙⵖⴰⵏⵏ ⴷ ⵉⵎⵙⵡⵓⵔⵉⵢⵏ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵔⵓⴱⴱⴰ ⵏⵏⵙⵏⵜ ⴷ ⵉⵏⴳⵎⴰⵎⵏ ⵏⵏⵙⵏⵜ, ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 38.18 ⵉ ⵓⵙⵎⴰⵢⵏⵓ ⵏ ⵓⵙⵏⵎⴰⵍⴰ ⵏ ⵜⵎⵔⵙⵍⵜ ⵍⵃⴰⵙⴰⵏ ⵡⵉⵙ ⵙⵉⵏ ⵉ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ ⵉ ⵚⴰⵃⴰ ⵏ ⵉⵎⵙⴽⴰⵔⵏ ⵏ ⵜⵏⴱⴰⴹⵜ ⴹⴼⵕⵏⵉⵏ ⵜⴰⵎⴰⵡⴰⵙⵜ ⵏ ⵜⴳⵯⵏⵙⴰⵏⵜ, ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 60.18 ⵉⵣⴷⵉⵏ ⴷ ⵜⵎⵔⵙⵍⵜ ⵏ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ ⵏ ⵉⵎⵙⵡⵓⵔⵉⵢⵏ ⵖ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵡⴰⵔⴰⵢ ⵓⵖⵔⵉⵎ.