ⴰⵎⴹⴰⴽⴰⵕ ⵏ ⵓⵙⵓⵔⵙ ⴰⴷⵍⵙⴰⵏ ⴷ ⵓⵏⴰⵥⵓⵕ ⵖ ⵓⵣⵎⵣ ⵏ ⴽⵓⵕⵓⵏⴰ ⵖ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 30 ⵢⵓⵏⵢⵓ 2020 ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵓⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵎⴰⵙⵙ ⵎⵓⵃⴰⵎⵎⴰⴷ ⵎⴰⵍⴰⵍ ⵙ ⵜⵉⵍⵉⵜ ⵏ ⵎⴰⵙⵙ ⵄⵓⵜⵎⴰⵏ ⵍⴼⵉⵔⴷⴰⵡⵙ ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ, ⵜⵥⵍⵉ ⵉ ⵓⵎⴹⴰⴽⴰⵕ ⴼ ⵙⵉⵏ ⵉⵎⵔⵙⵉⵡⵏ ⵣⴷⵉⵏⵉⵏ ⴷ ⵓⵙⵓⵔⵙ ⴰⴷⵍⵙⴰⵏ ⴷ ⵓⵏⴰⵥⵓⵕ ⵖ ⵓⵣⵎⵣ ⵏ ⴽⵓⵕⵓⵏⴰ.

ⵉⵙⵙⵉⵙⴼⵉⵡ ⵎⴰⵙⵙ ⵍⴼⵉⵔⴷⴰⵡⵙ ⵖ ⵜⵣⵡⵉⵔⵉ ⵎⴰⵙ "ⵜⵙⴽⵔ ⵜⵎⴰⵡⴰⵙⵜ ⵢⴰⵏ ⵓⵖⴰⵡⴰⵙ ⵉⵥⵍⵉⵏ ⵉ ⵓⵙⵏⴰⵍ ⵏ ⵢⵉⴳⵔ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⵖ ⵓⵙⴳⴳⵯⴰⵙ ⵏ 2020, ⵙ ⵓⵏⵛⴽ ⵏ ⵉⴷⵔⵉⵎⵏ ⵉⵍⴽⵎⵏ 11 ⵎⵍⵢⵓⵏ ⵏ ⴷⵔⵀⵎ ⵉ ⵚⴰⵃⴰ ⵏ ⵉⵎⵙⴽⴰⵔⵏ ⵉⴷⵍⵙⴰⵏⵏ ⵖ ⵍⵍⴰⵏ ⵉⵎⴰⵔⴰⵜⵏ ⴷ ⵉⴷ ⴱⴰⴱ ⵏ ⵜⵥⵕⵉⴳⵜ ⴷ ⵉⴷ ⴱⴰⴱ ⵏ ⵜⵙⴷⵍⵉⵙⵉⵏ ⴷ ⵉⵎⵙⴽⴰⵔⵏ ⵉⵎⵙⵎⵓⵏⴰⵏⵏ, ⵖⵎⴽ ⵍⵍⵉ ⵍⵍⴰⵏⵜ ⵜⵓⵜⵔⵉⵡⵉⵏ ⵏ ⵉⵙⴽⴰⵏⵏ ⵉ ⵓⵙⵏⴰⵍ ⵏ ⵉⵙⵏⴼⴰⵔⵏ ⵉⵏⴰⵥⵓⵕⵏ ⵙ ⵓⵏⵛⴽ ⵉⵍⴽⵎⵏ 39 ⵎⵍⵢⵓⵏ ⵏ ⴷⵔⵀⵎ".

ⵖ ⵓⵙⵏⴰⵍ ⵏ ⵓⴷⵍⵉⵙ ⴷ ⵜⵥⵕⵉⴳⵜ, ⵉⵏⵏⴰ ⵎⴰⵙⵙ ⵍⴼⵉⵔⴷⴰⵡ ⵎⴰⵙ ⵉⵙⴽⵔ ⵢⵉⴳⵔ ⵏ ⵜⴷⵍⵙⴰ ⵉⵙⵡⵓⴷⴷⵓⵜⵏ ⵏ ⵓⴼⵔⵓ ⵏ ⵜⵖⵔⴰⴷ ⵜⵉⵥⵕⴼⴰⵏⵉⵏ ⴳⴰⵏⵉⵏ 13.5 ⵎⵍⵢⵓⵏ ⴷⵔⵀⵎ ⴳⴰⵏⵉⵏ ⵜⵉⵏ ⵉⵙⴳⴳⵯⴰⵙⵏ ⵣⵔⵉⵏⵉⵏ.

ⵢⵓⵎⴰ ⵓⵙⵏⴰⵍ ⴰⴷ ⵎⵙⵓⵖⵜ ⵏ ⵉⴷⵍⵉⵙⵏ ⴷⴰⵔ ⵜⵙⴷⵍⵉⵙⵉⵏ ⴷ ⵉⴷ ⴱⴰⴱ ⵏ ⵜⵥⵕⵉⴳⵜ ⵃⵎⴰ ⴰⴷ ⵢⵉⵍⵉ ⵓⴱⵟⵟⵓ ⵏⵏⵙⵏ ⴼ ⵜⵙⴷⵍⵉⵙⵉⵏ ⵜⵉⵏⵎⵍⴰⵏⵉⵏ ⴷ ⵜⴳⴷⵓⴷⴰⵏⵉⵏ, ⴷ ⵜⵥⵕⵉⴳⵜ ⵏ ⵜⵙⵖⵓⵏⵉⵏ ⵜⵉⴷⵍⵙⴰⵏⵉⵏ (ⵜⵉⵏ ⵓⴼⵔⴽⵓⴽ ⴷ ⵜⵉⵍⵉⴽⵟⵕⵓⵏⵉⵢⵉⵏ), ⴷ ⵓⵙⴼⵔⴽ ⵙ ⵡⴰⵜⵉⴳ ⵏ ⵜⵖⵔⵉ, ⴷ ⵜⵡⵉⵙⵉ ⵉ ⵉⵎⴰⵔⴰⵜⵏ ⵉⵎⵖⵔⴰⴱⵉⵢⵏ ⵖ ⵜⵣⴷⵓⵖⵉⵏ ⵏ ⵉⵎⴰⵔⴰⵜⵏ.

ⵖ ⵓⵎⵏⵉⴷ ⵏ ⵓⵙⵏⴰⵍ ⵏ ⵢⵉⴳⵔⴰⵏ ⵏ ⵜⵥⵓⵕⵉ, ⵉⵣⵎⵎⵉⵎ ⵓⵎⴰⵡⵙⴰⵙ ⵎⴰⵙ " ⵜⵙⴽⵔ ⵜⵎⴰⵡⴰⵙⵜ ⵜⵓⴳⵜ ⵏ ⵉⵙⵡⵓⴷⴷⵓⵜⵏ ⵀⵎⵎⴰⵏⵉⵏ ⵉⴳⵔⴰⵏ ⵏ ⵉⵣⵔⴼⴰⵏ ⵏ ⵉⵎⴰⵔⴰⵜⵏ, ⴷ ⵓⵙⵓⵔⵙ ⵏ ⵉⴷ ⴱⴰⴱ ⵏ ⵙⵙⵓⵍⵉⵎⴰ ⴷ ⵓⵎⵣⴳⵓⵏ ⴷ ⵓⵥⴰⵡⴰⵏ ⴷ ⵜⵥⵓⵕⵉⵡⵉⵏ ⵏ ⵓⴽⵍⴰⵏ, ⵃⵎⴰ ⴰⴷ ⵜⵙⵙⵉⴱⵙⵓⵙ ⴼ ⵉⴷⵔⵉⵣⵏ ⵍⵍⵉⵖ ⴱⴷⴷⵏⵜ ⵜⵉⵍⴰⵍ ⵏ ⵉⴳⵔⴰⵏ ⴰⴷ".

ⵖ ⵓⵎⵏⵉⴷ ⵏ ⵉⵣⵔⴼⴰⵏ ⵏ ⵉⵎⴰⵔⴰⵜⵏ, ⵉⵙⵙⵉⵙⴼⵉⵡ ⵎⴰⵙⵙ ⵍⴼⵉⵔⴷⴰⵡⵙ ⵎⴰⵙ "ⵉⵙⴽⵔ ⵓⵙⵉⵔⴰ ⴰⵎⵖⵔⵉⴱⵉ ⵏ ⵉⵣⵔⴼⴰⵏ ⵏ ⵉⵎⴰⵔⴰⵜⵏ ⵜⵓⴳⵜ ⵏ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵉ ⵚⴰⵃⴰ ⵏ ⵉⵏⴰⵥⵓⵕⵏ ⴷ ⵉⵎⵙⵏⴼⵍⵓⵍⵏ ⵉⵎⵍⵜⴰⵖⵏ ⵖ ⵓⵙⵉⵔⴰ, ⴳⵉⵙⵏ ⴰⵙⵎⴰⵢⵏⵓ ⵏ ⵓⵖⴰⵡⴰⵙ ⵏ ⵓⴱⵟⵟⵓ, ⴰⵖⵔⵔⴷ ⵏ ⵓⵣⵎⵣ ⵏ ⵜⵉⴽⴽⵉ ⵏ ⵜⵖⵔⴰⴷ ⵉ ⵉⵎⴰⵔⴰⵜⵏ (ⵙⴳ 25 ⵎⴰⵕⵚ 2020). ⵉⵍⵍⴰ ⵓⴱⵟⵟⵓ ⵏ ⵓⵏⵛⴽ ⵉⵍⴽⵎ 10 ⵎⵍⵢⵓⵏ ⵏ ⴷⵔⵀⵎ ⴳⴰⵏⵉⵏ ⵜⵉⵖⵔⴰⴷ ⵏ ⵜⵓⵏⵖⵉⵍⵜ ⵉⵥⵍⵉⵏ, ⴷ ⵓⴱⵟⵟⵓ ⵏ ⵜⵖⵔⴰⴷ ⵉ ⵉⵎⴰⵔⴰⵜⵏ ⴷ ⵉⵎⵙⵏⴼⵍⵓⵍⵏ ⵉⵎⵍⵜⴰⵖⵏ ⵖ ⵓⵙⵉⵔⴰ ⵙ ⵓⵏⵛⴽ ⵉⵍⴽⵎ 9 ⵎⵍⵢⵓⵏ ⵏ ⴷⵔⵀⵎ ⴼ ⵉⵙⴽⵛⵓⵎⵏ ⵏ ⵉⵣⵔⴼⴰⵏ ⵏ ⵓⵎⴰⵔⴰ (ⵙⴳ 22 ⵉⴱⵔⵉⵔ 2020)".

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⵙⴽⵔ ⵢⵉⴳⵔ ⵏ ⵜⴷⵍⵙⴰ ⵎⵏⵏⴰⵡ ⵉⵙⵡⵓⴷⴷⵓⵜⵏ ⵉⵖⴰⵡⴰⵍⵏ ⵏ ⵓⴹⴼⵕ ⵖ ⵉⵍⵍⴰ ⵓⵏⵏⵓⵕⵥⵎ ⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵉ ⵉⵎⵉⵥ ⵏ ⵜⵓⵜⵔⵉⵡⵉⵏ ⵏ ⵓⵍⵜⴰⵖ ⵏ ⵉⵎⴰⵔⴰⵜⵏ ⴷ ⵉⵎⵙⵏⴼⵍⵓⵍⵏ ⴷ ⵓⵣⵎⵎⴻⵎ ⵏ ⵜⵡⵓⵔⵉⵡⵉⵏ ⵏⵏⵙⵏ ⵉ ⵓⵃⵟⵟⵓ ⵏ ⵡⴰⵢⴷⴰ ⵏⵏⵙⵏ, ⵢⵉⵍⵉ ⵓⵙⵉⵜ ⴰⵍⵉⴽⵟⵕⵓⵏⵉ ⴰⵎⴰⵢⵏⵓ ⴷ ⵓⵙⵎⴰⵜⵜⵉ ⵏ ⴽⵓ ⵜⵉⵏⵓⴼⴰ ⵜⵜⵓⴼⴽⴰⵏⵉⵏ.

ⵖ ⵓⵙⵓⵔⵙ ⵏ ⵉⴷ ⴱⴰⴱ ⵏ ⵙⵙⵓⵍⵉⵎⴰ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ "ⵙⴱⴷⴷⵏ ⵉⴷⵔⵉⵣⵏ ⵏ ⵜⴰⵙⵙⴰⵙⵜ ⵜⴰⴷⵓⵙⴰⵏⵜ ⵜⵉⵍⴰⵍⵜ ⵏ ⵓⴼⴰⵔⵙ ⵏ ⵙⵙⵓⵍⵉⵎⴰ ⴷ ⵓⵙⵍⵉⵥⵉⵕ ⵏ ⵓⴳⴳⴰⵔ ⵏ 50  ⵏ ⵜⵎⵙⵙⵓⵔⵜ ⵏ ⵓⴼⴰⵔⵙ, ⵜⵜⵓⵇⵇⵉⵏⵏⵜ ⵓⵍⴰ ⵜⴷⴰⵍⵉⵡⵉⵏ ⵏ ⵙⵙⵓⵍⵉⵎⴰ, ⵉⵎⵎⴰⵜⵜⵉ ⵓⵙⵓⴼⵖ ⵏ ⵉⴼⵉⵍⵎⵏ, ⵜⵉⵍⵉ ⵜⴰⵔⵡⵓⵔⵉ ⵏ ⵉⵜⵉⵇⵏⵉⵢⵏ ⵏ ⵜⵎⴳⵓⵔⵉ ⵢⴰⴷ ⴷ ⵉⵏⴰⵥⵓⵕⵏ". ⵢⵉⵏⵉ ⵎⴰⵙ "ⵉⴳⴰ ⵍⵃⴰⵍ ⵜⴰⵎⵓⴽⵔⵉⵙⵜ ⵏ ⵉⴷ ⴱⴰⴱ ⵏ ⵜⴽⴰⵕⴹⴰ ⵜⴰⵣⵣⵓⵍⴰⵏⵜ ⵍⵍⵉ ⵢⴰⴽⴽⴰ ⵡⴰⵎⵎⴰⵙ ⴰⵙⵉⵏⵉⵎⴰⵜⵓⴳⵕⴰⴼⵉ ⴰⵎⵖⵔⵉⴱⵉ ⵏⵖ ⵡⵉⵍⵍⵉ ⴷⴰⵔ ⵓⵔ ⵜⵍⵍⵉ, ⵉⵎⵍⵜⴰⵖⵏ ⵖ ⵓⴼⵏⵉⵇ ⴰⵏⴰⵎⵓⵔ ⵏ ⵜⵏⴼⵔⵓⵜ ⵜⴰⵏⴰⵎⵓⵏⵜ, ⴷ ⵉⴷ ⴱⴰⴱ ⵏ ⵓⵔⴳⴰⵢ ⴰⵣⵣⵓⵍⴰⵏ ⵏⵖ ⵡⵉⵍⵍⵉ ⵙⵡⵓⵔⵉⵏⵉⵏ ⵖ ⵢⵉⴳⵔ ⵓⵔ ⵉⴳⴰⴷⴷⴰⵏ".

ⵖ ⵉⴳⵔⴰⵏ ⵏ ⵓⵎⵣⴳⵓⵏ ⴷ ⵓⵥⴰⵡⴰⵏ ⴷ ⵜⵥⵓⵕⵉⵡⵉⵏ ⵏ ⵓⴽⵍⴰⵏ, ⵉⵙⴷⴷⵉⴷ ⵓⵎⵙⵜⴳⴳⴰⵔ ⵓⵏⴱⵉⴹ, ⵎⴰⵙ"ⵜⵙⴽⵔ ⵜⵎⴰⵡⴰⵙⵜ ⵉⵙⵡⵓⴷⴷⵓⵜⵏ ⴷ ⵓⵣⴷⴷⵓⵢ ⴷ ⵜⵎⴰⵡⴰⵙⵜ ⵏ ⵜⴷⵎⵙⴰ ⴷ ⵜⵥⵕⴼⵜ ⵉ ⵓⵙⴳⵉⴷⴷⵉ ⵏ ⵉⵙⴷⴰⵡⵏ ⵉⴷⵍⵙⴰⵏⵏ ⴷ ⵉⵏⴰⵥⵓⵕⵏ ⵉ ⵓⵙⴳⴳⵯⴰⵙ ⵏ 2019, ⵍⵍⵉⵖ ⵉⵍⵍⴰ ⵓⴼⵔⵓ ⵏ 80% ⵏ ⵓⵏⵛⴽ ⵏ ⵓⵙⵏⴰⵍ ⵍⵍⵉ ⴷ ⵉⵖⴰⵎⴰⵏ (22 ⵎⵍⵢⵓⵏ ⵏ ⴷⵔⵀⵎ) ⵉ ⵚⴰⵃⴰ ⵏ ⵉⵏⴰⵥⵓⵕⵏ ⴷ ⵜⵔⵓⴱⴱⴰ ⵜⵉⵏⴰⵥⵓⵕⵉⵏ ⵍⵍⵉ ⵓⴼⴰⵏⵉⵏ ⵙ ⵉⵙⴷⴰⵡⵏ ⵏ ⵓⵙⵏⴰⵍ.

ⵖ ⵓⵎⵏⴰⴹ ⴰⴷ, ⵉⵜⵜⵔⵙ ⵓⵏⵛⴽ ⵉⴳⴰⵏ 20 ⵎⵍⵢⵓⵏ ⵏ ⴷⵔⵀⵎ ⵉ ⵉⵎⵓⴷⴷⵓⵜⵏ ⵉⵎⵣⴳⵓⵏⵏ ⵉⵏⴰⵎⵓⵔⵏ, ⴷ 12  ⵎⵍⵢⵓⵏ ⵏ ⴷⵔⵀⵎ ⵉ ⵓⵥⴰⵡⴰⵏ ⴷ ⵍⵍⵖⴰ ⴷ ⵜⵥⵓⵕⵉⵡⵉⵏ ⵏ ⵓⵙⴼⵙⵔ ⴷ ⵜⵥⵓⵕⵉⵡⵉⵏ ⵏ ⵍⴽⴰⵕⵉⴳⵕⴰⴼⵉ, ⴷ 2 ⵎⵍⵢⵓⵏ ⵏ ⴷⵔⵀⵎ ⵉ ⵉⵙⴼⵙⵔⵏ ⵏ ⵜⵥⵓⵕⵉⵡⵉⵏ ⵏ ⵓⴽⵍⴰⵏ ⴷ ⵜⵥⵓⵕⵉⵡⵉⵏ ⵏ ⵉⵥⵕⵉ ⵖ ⵜⴷⴰⵍⵉⵡⵉⵏ ⵏ ⵉⵙⴼⵙⵔⵏ, ⴷ ⵎⵙⵓⵖⵜ ⵏ ⵜⵡⵓⵔⵉⵡⵉⵏ ⵜⵉⵏⴰⵥⵓⵕⵉⵏ ⴷⴰⵔ ⵉⵏⴰⵥⵓⵕⵏ ⵙ ⵓⵏⵛⴽ ⵉⵍⴽⵎⵏ 3 ⵎⵍⵢⵓⵏ ⵏ ⴷⵔⵀⵎ ⴷ ⵓⴷⵔⴰⵡ ⵖ ⵜⵙⵏⵜⴰⵢⵜ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵜⵙⵏⵏⵉⵖⵉⵏ ⵉ ⵜⵎⵙⴰⵖⵜ ⵏ ⵜⵡⵓⵔⵉⵡⵉⵏ ⵜⵉⵏⴰⵥⵓⵕⵉⵏ ⵙ ⵙⵉⵏ ⵉⴷ ⵎⵍⵢⵓⵏ ⵏ ⴷⵔⵀⵎ.

ⵖ ⵓⵎⵏⵉⴷ ⵏ ⵜⴽⴰⵕⴹⴰ ⵏ ⵓⵏⴰⵥⵓⵕ ⴷ ⵓⵙⵓⵔⵙ ⵏ ⵉⵏⴰⵥⵓⵕⵏ, ⵉⵎⵍⴰ ⴷ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵜⵜⵓⵙⴽⴰⵔⵏⵜ ⵙ ⵜⵉⴳⴳⵓⴳⵜ ⵜⵙⵎⵓⵏⴰⵢ ⵏ ⵜⵙⵇⵇⵉⵎⵜ ⵏ ⵜⴽⴰⵕⴹⴰ ⵜⴰⵣⵣⵓⵍⴰⵏⵜ ⵏ ⵓⵏⴰⵥⵓⵕ ⵖ ⵜⵍⵍⴰ ⵜⵖⵔⵉ ⵏ ⵓⴳⴳⴰⵔ ⵏ 4000 ⵏ ⵓⵙⴷⴰⵡ, ⵢⵉⵏⵉ ⵎⴰⵙ ⵔⴰⴷ ⵢⵉⵍⵉ ⵓⵙⵓⴼⵖ ⵏ 2000 ⵏ ⵜⴽⴰⵕⴹⴰ ⵜⴰⵎⴰⵢⵏⵓⵜ ⵖ ⵓⵙⵙⴰⵏ ⴷ ⵓⵛⴽⴰⵏⵉⵏ, ⵢⵉⵏⵉ ⵎⴰⵙ "ⵉⵍⵍⴰ ⵚⴰⵃⴰ ⵖ ⵓⵖⴰⵡⴰⵙ ⵏ ⵜⵡⵉⵣⵉ ⵏ « ⴽⵓⴼⵉⴷ19 » ⵉ 3700 ⵏ ⴱⴰⴱ ⵏ ⵜⴽⴰⵕⴹⴰ ⵏ ⵓⵏⴰⵥⵓⵕ ⴰⵢⵍⵍⵉ ⵉⴳⴰⴷⴷⴰⵏ ⴷ 70%".

ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⴰⵏⵏⴰⵢⵉⵏ ⵏⵏⵙⵏ ⵅⴼ ⵓⵙⵎⵏⵉⴷ ⵏ ⵎⴰⵙⵙ ⴰⵎⴰⵡⵙⴰⵙ, ⵢⵉⵍⵉ ⵓⵎⵛⴰⵛⴽⴰ ⴼ "ⵡⴰⵜⵉⴳ ⵏ ⵢⵉⴳⵔ ⴰⴷⵍⵙⴰⵏ ⵉⴳⴰⵏ ⵢⴰⵏ ⵉⵎⵉⵙⵙ ⵏ ⵓⵙⴳⵎⵉ ⴼ ⵡⴰⵜⵉⴳⵏ ⵉⵏⴰⵎⵓⵔⵏ, ⵢⴰⵡⵙ ⵓⵍⴰ ⵖ ⵜⴷⵉⵏⴰⵎⵉⵜ ⵏ ⵡⴰⵎⵓⵏ ⵙⵍⴰⵡⴰⵏ ⴰⴽⴽⵯ ⵖ ⵉⵙⵏⴼⵍⵏ ⵣⴷⵉⵏⵉⵏ ⴷ ⵜⵉⵣⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ".

ⵉⵍⵍⴰ ⵡⴰⵡⴰⵍ ⴼ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵉ ⵓⵙⴽⵔ ⵏ ⵜⵎⴳⵓⵔⵉ ⵜⴰⴷⵍⵙⴰⵏⵜ ⵜⴰⵏⴰⵎⵓⵔⵜ ⵙ ⵓⵙⵎⵖⵔ ⵏ ⵓⴷⴳⴰⵔ ⴰⵔⴽⵎⴰⵎ ⵃⵎⴰ ⴰⴷ ⵉⵟⵟⵉⴼ ⴰⵜⵉⴳ ⴰⴷⵎⵙⴰⵏ ⵓⵙⵔⵉⴷ, ⵜⵉⵍⵉ ⵜⵖⵔⵉ ⵉ ⵓⵙⴽⵔ ⵏ ⵜⵎⵢⴰⴷⴰⵙⵜ ⵜⴰⵎⴰⵢⵏⵓⵜ ⵖ ⵍⵍⴰⵏⵜ ⵜⵙⴰⵍⵉⵡⵉⵏ ⵜⵉⵏⴰⵥⵓⵕⵉⵏ ⴷ ⵜⴷⵍⵙⴰⵏⵉⵏ ⵉ ⵜⴷⵉⵏⴰⵎⵉⵜ ⴷ ⵡⴰⵏⴰⵡⵏ ⵉⴷⵎⵙⴰⵏⵏ ⵢⴰⴹⵏⵉⵏ ⵉ ⵓⵙⵙⵥⵕⴼ ⵏ ⵉⵙⵏⴼⵔⵏ ⴰⵎ ⴰⵎⵎⴰⵙ ⴰⵙⵉⵏⵉⵎⴰⵜⵓⴳⵕⴰⴼⵉ ⴰⵎⵖⵔⵉⴱⵉ ⵉⴳⴰⵏ ⴰⵏⴰⵡ ⵉⵕⵡⴰⵏ, ⵢⵉⵍⵉ ⵢⴰⵏ ⵓⵏⴳⵔⴰⵡ ⵉⴳⴰⵏ ⴰⵎⵖⵔⵉⴱⵉ ⵏ ⵓⵃⵟⵟⵓ ⵏ ⵉⵣⵔⴼⴰⵏ ⵏ ⵓⵎⴰⵔⴰ ⵍⵍⵉ ⵔⴰⴷ ⵉⵙⴽⵔ ⵢⴰⵏ ⵓⵙⵡⵓⴷⴷⵓ ⵉⵥⵉⵍⵏ ⵏ ⵢⵉⴳⵔ ⴰⴷ ⵓⴷⴷⵉⵔ.

ⵖ ⵓⵙⵡⵉⵔ ⴰⴷⵖⴰⵔⴰⵏ, ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵉ ⵓⵙⵙⵉⵥⴹⵕ ⵏ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⵃⵎⴰ ⴰⴷ ⵙⴽⵔⵏⵜ ⵜⴰⵡⵓⵔⵉ ⵏⵏⵙⵏⵜ ⴷ ⵉⴷ ⴱⴰⴱ ⵏ ⵓⵙⵏⴰⵍ ⴰⴼⴰⴷ ⴰⴷ ⵢⵉⵍⵉ ⵓⵙⵙⵉⴷⵔ ⵏ ⵜⵉⵍⴰⵍⵜ ⵜⴰⴷⵍⵙⴰⵏⵜ ⵖ ⵜⴳⵉⵔⴰ ⵏ ⵜⴰⵙⵙⴰⵙⵜ ⴰⴷ, ⵢⵉⵍⵉ ⵓⵅⵎⵎⴻⵎ ⵖ ⵉⴷ ⴱⴰⴱ ⵏ ⵜⵓⵙⵙⵏⴰ ⴷ ⵉⵏⴰⵥⵓⵕⵏ ⵍⵍⴰⵏⵉⵏ ⵖ ⵓⵙⵓⵔⵙ ⵉⵛⵃⴰⵏ, ⵖⵎⴽ ⴰⵏⵏ ⴷ ⵉⵜⵉⵇⵏⵉⵢⵏ ⵙⵡⵓⵔⵉⵏⵉⵏ ⵖ ⵢⵉⴳⵔ ⴰⴷ. ⵖⵔⵉⵏ ⵉⴷ ⵎⴰⵙⵙ ⵉⴳⵎⴰⵎⵏ ⴰⴷ ⵢⵉⵍⵉ ⵢⴰⵏ ⵓⵙⵏⴼⵍ ⴰⵎⵓⵟⵟⵓⵏ ⵉⵕⵡⴰⵏ ⵉⴳⴰⵏ ⵡⵉⵏ ⵓⵍⴳⴳⵓⴷ ⵉ ⵜⵉⵍⴰⵍ ⵜⵉⴷⵍⵙⴰⵏⵉⵏ ⵖ ⵓⵙⵡⵉⵔ ⴰⴷⵖⴰⵔⴰⵏ ⵃⵎⴰ ⴰⴷ ⵢⵉⵍⵉ ⵓⴹⴼⵕ ⵏ ⵡⴰⴷⴷⴰⴷ ⴰⴷⵓⵙⴰⵏ ⴰⵎⴰⵜⴰⵢ ⵖ ⵜⴳⵍⴷⵉⵜ.

ⵎⵛⴰⵛⴽⴰⵏ ⴷ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⴼ ⵓⵙⵓⵔⵙ ⵉⵛⵃⴰⵏ ⵏ ⴽⵉⴳⴰⵏ ⵏ ⵉⵏⴰⵥⵓⵕⵏ ⴷ ⵉⵎⴰⵔⴰⵜⵏ ⵍⵍⵉ ⵉⵡⵙⵏⵉⵏ ⵖ ⵓⵙⴱⵓⵖⵍⵓ ⵏ ⵡⴰⵢⴷⴰ ⴰⴷⵍⵙⴰⵏ ⴰⵏⴰⵎⵓⵔ, ⵉⵏⵉⵏ ⵎⴰⵙ ⴷ ⵉⵇⵇⴰⵏ ⵓⵙⵏⴰⵍ ⵉⴳⴳⵓⵜⵏ ⵉ ⵓⵥⴰⵡⴰⵏ ⴷ ⵜⵥⵓⵕⵉⵡⵉⵏ ⵏ ⵍⴽⴰⵕⵉⴳⵕⴰⴼⵉ ⴷ ⵜⵎⴳⵓⵔⵉ ⵏ ⵓⴷⵍⵉⵙ ⵙⵡⴰ ⵖ ⵓⵙⵍⴳⵏ ⵏ ⵜⵥⵕⴼⵜ ⵉⵜⵜⴰⵡⵙⵏⴼⴰⵍⵏ ⵏⵖ ⴰⵙⵍⴳⵏ ⵏ ⵜⵥⵕⴼ ⵏ 2021.

ⵖ ⵢⵉⴳⵔ ⵏ ⵓⵙⵏⴰⵍ ⵏ ⵉⴷ ⴱⵓ ⵜⵎⴼⴽⴰ, ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵉ ⵓⵙⴽⵔ ⵏ ⵜⵎⴰⴷⵔⴰⵡⵜ ⴷ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⵓⵖⵔⵉⵎ ⵃⵎⴰ ⴰⴷ ⵜⵜⵓⵕⵥⵉⵎⵏⵜ ⵜⵎⵔⵙⴰⵍ ⵜⵉⵙⴳⵎⴰⵏⵉⵏ ⵉ ⵜⵉⵍⴰⵍ ⵜⵉⴷⵍⵙⴰⵏⵉⵏ ⴷ ⵓⵙⵙⵔⵇⴱ ⵏ ⵜⵖⵔⵉ, ⵜⵜⵓⴼⴽⵉⵏ ⵉⵙⵙⵔⵅⵓⵜⵏ ⵉ ⵉⵄⵔⵔⵉⵎⵏ ⵉ ⵓⴽⵛⵎ ⵙ ⵜⴷⴰⵍⵉⵡⵉⵏ ⵏ ⵙⵙⵓⵍⵉⵎⴰ ⴷ ⵓⵎⵣⴳⵓⵏ ⵉ ⵓⵙⵙⵔⵇⴱ ⵏ ⵓⵢⴰⴼⵓ ⴰⴷⵍⵙⴰⵏ ⴰⵏⴰⵎⵓⵔ.