ⴰⵎⴷⴰⵡⴰⵍ ⵏ ⵓⵙⵓⵔⵙ ⵏ ⵢⵉⴳⵔ ⵏ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⴷⴰⵔ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 23 ⵢⵓⵏⵢⵓ 2020 ⵜⴰⵙⵎⵓⵏⵉ ⵍⵍⵉ ⵜⵙⵙⵉⵅⴼ ⵎⴰⵙⵙⴰ ⵙⴰⵄⵉⴷⴰ ⴰⵢⵜ ⴱⵓⵄⵍⵉ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵜⴷⵍⵙⴰ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⵎⴰⵙⵙ ⵄⵓⵜⵎⴰⵏ ⵍⴼⵉⵔⴷⴰⵡⵙ, ⵉ ⵓⵎⴹⴰⴽⴰⵕ ⵏ ⵓⵙⵓⵔⵙ ⵏ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ ⵖ ⵓⵣⵎⵣ ⵏ ⴽⵓⵕⵓⵏⴰ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵏ ⵜⵎⴰⵡⴰⵙⵜ ⵖ ⵎⴰ ⴷ ⵉⵥⵍⵉⵏ ⵙ ⵢⵉⴳⵔ ⵏ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ, ⴷ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⴷ ⵓⵖⴰⵡⴰⵙ ⵏ ⵜⵡⵓⵔⵉ ⵏⵏⵙ ⴷⴼⴼⵉⵔ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵓⴷⵔⵉⵣ ⵏ ⵜⴼⵔⴽⴰ ⴰⴷ ⴼ ⵜⵓⵏⵏⵓⵏⵉⵏ ⵜⵉⵎⴳⵔⴰⵡⵉⵏ ⴷ ⵉⵙⴳⵔⴰⵡⵏ ⴷ ⵉⵎⵓⵙⵙⵓⵜⵏ ⵏ ⵜⵓⵏⵏⵓⵏⵜ ⴷ ⵉⵎⴰⵍ ⵏ ⵓⵙⵏⴱⴷⵓ ⵏ 2020.

ⵉⵙⵙⴽⵜⵉ ⴷ ⵎⴰⵙⵙ ⵄⵓⵜⵎⴰⵏ ⵍⴼⵉⵔⴷⴰⵡⵙ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵜⵜⵓⵙⴽⴰⵔⵏⵉⵏ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵙⵍⴰⵡⴰⵏ ⵍⵍⵉⵖ ⴱⴷⴷⵏⵜ ⵜⵉⵍⴰⵍ ⵏ ⵜⵎⵔⵙⴰⵍ ⵏ ⵉⵄⵔⵔⵉⵎⵏ ⴷ ⵜⵖⴰⵡⵙⵉⵡⵉⵏ ⵏ ⵜⵎⵖⴰⵔⵉⵏ, ⵜⵜⵓⵇⵇⵉⵏⵏ ⵉⵙⴰⵢⵔⵓⵔⵏ ⵏⵏⵙⵏⵜ, ⴷ ⵓⵙⴱⴷⴷⵉ ⵏ ⵜⵖⵔⵉ ⴷ ⵜⵉⵍⴰⵍ ⵏ ⵜⴷⵍⵙⴰ ⴷ ⵜⵓⵏⵏⵓⵏⵜ ⴷ ⵓⵙⴳⵎⵉ ⴷ ⵓⵙⵙⵍⵎⴷ ⵖ ⴽⵓ ⵜⵉⵎⵔⵙⴰⵍ ⴹⴼⵕⵏⵉⵏ ⵉ ⵜⵎⴰⵡⴰⵙⵜ, ⵢⵉⵍⵉ ⵓⵏⵙⵎⴰⵍⴰ ⵏ ⵜⵉⵏⵏⴰⵡⵉⵏ ⵜⵉⵎⵓⵟⵟⵓⵏⵉⵏ ⴼ ⵉⵎⵔⵙⵉⵡⵏ ⵀⵎⵎⴰⵏⵉⵏ ⵉⵄⵔⵔⵉⵎⵏ ⴷ ⵉⵎⵙⴽⴰⵔⵏ ⵉⵎⵙⵎⵓⵏⴰⵏⵏ, ⴷ ⵓⵙⵏⵎⴰⵍⴰ ⵏ ⵓⵖⵡⴰⵙⴰ ⵏ” ⵙⴰⵍⴰⵎⴰ” ⵉ ⵚⴰⵃⴰ ⵏ ⵉⵎⵣⴷⴰⵖⵏ ⵏ ⵡⴰⵎⵎⴰⵙⵏ ⵏ ⵓⵃⵟⵟⵓ ⵏ ⵜⵎⵥⵉ ⴷ ⵉⵙⴳⵔⴰⵡⵏ ⵏ ⵜⵎⵖⴰⵔⵉⵏ ⵖ ⵜⵙⴳⵉⵡⵉⵏ ⵜⵉⴼⴰⵔⴰⵏⵉⵏ ⴷ ⵜⵉⴷ ⵔⵡⵙⵏⵉⵏ ⵜⵉⵖⵔⵎⵉⵏ, ⵖⵎⴽ ⴰⵏⵏ ⴷ ⵉⵙⵡⵓⴷⴷⵓⵜⵏ ⵥⵍⵉⵏⵉⵏ ⵙ ⵓⵙⵉⵏⴰⴳ ⴰⴳⵍⴷⴰⵏ ⵏ ⵓⵙⵎⵓⵜⵜⴳ ⵏ ⵉⵎⵙⵖⴰⵏⵏ ⵏ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ.

ⵉⵏⵏⴰ ⵎⴰⵙⵙⴰ ⴰⵎⵡⵙⴰⵙ ⵖ ⵜⵙⵇⵇⵉⵎⵜ ⵎⴰⵙ ⵔⴰⴷ ⵢⵉⵍⵉ ⵓⵖⵓⵍ ⵏ ⵉⵎⵃⵉⵣⵡⴰⵔⵏ ⵏ ⵜⴱⵔⵣⴰ ⵜⴰⵏⴰⵎⵓⵔⵜ  ⵜⴰⵣⵣⵓⵍⴰⵏⵜ ⵖ ⵜⵓⵡⵊⵊⴰ ⵏ ⵓⴹⴰⵕ ⵖ ⵜⴳⵉⵔⴰ ⵏ ⵢⵓⵍⵢⵓⵣ ⵍⵍⵉ ⴷ ⵢⵓⵛⴽⴰⵏ, ⵔⴰⴷ ⵢⵉⵍⵉ ⵓⵙⵏⵜⵉ ⵏ ⵉⵙⴰⵏⵓⵏⵏ ⵖ ⵉⵎⴰⵍⴰⵙⵙ ⴰⴷ, ⵢⵉⵏⵉ ⵎⴰⵙ ⴷ ⵜⴰⵖⵜⴰⵙⵜ ⴰⴷ ⵜⵍⵍⴰ ⵙ ⵓⵎⵛⴰⵡⴰⵕ ⴷ ⵜⴼⵉⴷⵉⵕⴰⵍⵉⵜ ⵜⴰⴳⵍⴷⴰⵏⵜ ⵏ ⵜⵓⵡⵊⵊⴰ ⵏ ⵓⴹⴰⵕ ⴷ ⵜⵎⴰⵡⴰⵙⵉⵏ ⵏ ⵜⴳⵯⵏⵙⴰⵏⵜ ⴷ ⵜⴷⵓⵙⵉ, ⵢⵉⵍⵉ ⵓⵎⵛⴰⵛⴽⴰ ⴼ ⵓⴱⵕⵓⵟⵓⴽⵓⵍ ⴰⴷⵓⵙⴰⵏ ⵉⴹⵎⵏⵏ ⵜⵉⴼⴰⴷⵉⵡⵉⵏ ⵜⵉⴷⵓⵙⴰⵏⵉⵏ ⴷ ⵓⵡⵇⵇⵔ ⵉⵙⵎⴷⵏ ⵏ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵏ ⵜⵏⴱⴰⴹⵉⵏ.

ⵉⵍⵇⵎ ⵎⴰⵙⵙ ⴰⵎⴰⵡⵙⴰⵙ ⵢⵉⵏⵉ ⵎⴰⵙ “ⵉⵟⵟⴰⴼ ⵓⵙⴱⴷⴷⵉ ⵏ ⵉⵎⵓⵙⵙⵓⵜⵏ ⵏ ⵜⵓⵏⵏⵓⵏⵜ ⵉⴷⵔⵉⵣⵏ ⵀⵛⵔⵏⵉⵏ ⴼ ⵜⵉⵍⴰⵍ ⵏ ⵜⵓⵏⵏⵓⵏⵜ ⵙⵍⴰⵡⴰⵏ ⴰⴽⴽⵯ ⵜⵉⵎⴳⵔⴰⵡⵉⵏ, ⵎⴰⵛⵛ ⵎⴰⵢⴰ ⵏⵏ ⵓⵔ ⵉⴳⵉ ⴰⵙⵜⴰⵢ, ⵉⴳⴰ ⵓⵛⵛⵉⵍ ⵉ ⵓⵙⴱⴷⴷⵉ ⵏ  ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⴷ ⵓⵃⵟⵟⵓ ⵏ ⵜⴷⵓⵙⵉ ⴷ ⵜⴼⴰⵜⵉⵜ ⵏ ⵡⴰⵎⵓⵏ ⴷ ⵉⵏⵎⵓⵔⴰⵏ”.

ⵖ ⵓⵎⵏⵉⴷ ⵢⴰⴹⵏⵉⵏ, ⵉⵙⴰⵡⵍ ⵓⵎⴰⵡⵙⴰⵙ ⴼ ⵜⵎⵙⴽⴰⵔ ⵏ ⵜⵡⵓⵔⵉ ⴷ ⵓⵃⵉⵢⵢⵍ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵉ ⴷⴼⴼⵉⵔ ⵏ ⵓⵥⵍⴰⵢ ⴰⴷⵓⵙⴰⵏ, ⴰⵢⵍⵍⵉ ⵉⵀⵎⵎⴰⵏ ⵉⵙⴳⵔⴰⵡⵏ ⵏ ⵜⵎⵖⴰⵔⵉⵏ ⴷ ⵡⴰⵎⵎⴰⵙⵏ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⵏ ⵜⵎⵖⴰⵔⵉⵏ, ⵙ ⵓⵙⵔⵓⵙ ⵏ ⵢⴰⵏ ⵓⵖⴰⵡⴰⵙ ⵏ ⵜⵡⵓⵔⵉ ⵉ ⵓⵃⵉⵢⵢⵍ  ⴰⵎⵏⵣⵓ ⵉ ⵉⵎⴰⵍ, ⴷ ⵓⵙⵓⵊⴷ ⵏ ⵢⴰⵏ ⵓⵎⴰⵏⴰⵔ ⵏ ⵜⵡⵓⵔⵉ ⵉ ⵓⵙⵡⵓⴷⴷⵓ ⴰⵙⴳⵎⴰⵏ ⵏ ⵜⵎⵔⵙⴰⵍ ⵏ ⵜⵉⵏⵎⴰⵍ ⵜⵉⵎⵏⵣⵓⵜⵉⵏ ⵏ ⵜⴰⵣⵣⴰⵏⵉⵏ, ⴷ ⵓⵙⵓⵊⴷ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵢⵉⴳⵔ ⵏ ⵉⵄⵔⵔⵉⵎⵏ ⴷ ⵡⴰⵎⵎⴰⵙⵏ ⵏ ⵓⵙⵏⵓⴱⴳ ⴷ ⵡⴰⵎⵎⴰⵙⵏ ⵏ ⵓⵙⵏⴱⴷⵓ, ⴷ ⵓⵙⵡⵓⵔⵉ ⵙ ⵜⵎⵓⵟⵟⵓⵏⵜ ⵖ  ⵓⵙⵡⵓⴷⴷⵓ ⴷ ⵓⴹⴼⵕ ⵏ ⵜⵉⵍⴰⵍ ⵙ ⵜⵙⴰⵍⵉⵡⵉⵏ  ⵏ ⵓⵎⵢⴰⵡⴰⴹ ⵎⵓⵏⵏⵉⵏ ⴳⴰⵏⵉⵏ ⵜⵓⵏⵚⵉⴱⵉⵏ, ⵖⵎⴽ ⴰⵏⵏ ⴷ ⵜⵎⵙⴽⴰⵔ ⵏ ⵡⴰⵔⴰⵢ ⴷ ⵉⵙⵡⵓⴷⴷⵓⵜⵏ ⵉⴷⵓⵙⴰⵏⵏ.

ⵖ ⵓⵎⵓⵙⵙⵓ ⵏ ⵓⵙⵏⴱⴷⵓ,  ⵉⵙⴷⴷⵉⴷ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⵛⵇⴰ ⵖⵉⵍⴰⴷ ⴰⴷ ⵜⵜⵓⵕⵥⵉⵎⵏ ⵡⴰⵎⵎⴰⵙⵏ ⵏ ⵓⵙⵏⴱⴷⵓ ⵉ ⵓⵙⵏⵓⴱⴳ ⵏ ⵜⵉⵍⴰⵍ ⵜⵜⵓⵙⴽⵉⵔⵏⵉⵏ ⵖ ⴱⵕⵕⴰ ⵙ ⵜⵎⴰⵎⴽⵜ ⵜⴰⵎⴳⵔⴰⵡⵜ.

ⵉⵎⵍⵉ ⴷ ⵓⵎⴰⵡⵙⴰⵙ ⵎⴰⵙ “ⵉⵜⵜⵎⴽⵏ ⴰⴷ ⵜⵜⵓⵕⵥⵉⵎⵏ ⵡⴰⵎⴰⵎⵙⵏ ⵏ ⵓⵙⵏⴱⴷⵓ ⵙⴳ ⴰⵢⵢⵓⵔ ⵏ ⵛⵓⵜⴰⵏⴱⵉⵔ ⴷ ⵢⵓⵛⴽⴰⵏ, ⵖⴰⵙ ⵉ ⵓⵙⵏⵓⴱⴳ ⵏ ⵜⵉⵍⴰⵍ ⵏ ⴽⵔⴰ ⵏ ⵜⵎⵙⵎⵓⵏⵉⵏ ⵙⵡⵓⵔⵉⵏⵉⵏ ⵖ ⵓⴱⴰⵔⴰⵣ ⴰⴷ, ⴰⵎ ⵉⵙⴰⵏⵓⵏⵏ ⴷ ⵉⵙⵎⵓⵜⵜⴳⵏ ⴷ ⵉⵏⵎⵓⵇⵇⴰⵔⵏ. ⵔⴰⴷ ⵢⵉⵍⵉ ⵓⵙⵏⴰⵍ ⵏ ⵜⵎⵙⵎⵓⵏⵉⵏ ⴰⴷ ⵙ ⵓⵙⵓⵊⴷ ⵏ ⵡⴰⵎⵎⴰⵙⵏ ⵏ ⵜⵎⴰⵡⴰⵙⵜ ⵉ ⵓⵙⵏⵎⴰⵍⴰ ⵏ ⵜⵉⵍⴰⵍ ⵏⵏⵙⵏⵜ, ⵙ ⴰⵢⵍⵍⵉ ⴷ ⵜⵉⵡⵉ ⵜⵣⵣⵉⴳⵣⵜ ⵏ ⵓⵙⵓⵔⵙ ⵏ ⵓⴱⴰⵢⵢⵓⵕ ⴷ ⵓⵎⵛⴰⵡⴰⵕ ⴷ ⵜⵏⴱⴰⴹⵉⵏ ⵥⵍⵉⵏⵉⵏ”.

ⵢⵉⵏⵉ ⵎⴰⵙ ⵜⵙⴽⵔ ⵜⵎⴰⵡⴰⵙⵜ ⵢⴰⵏ ⵓⵎⴰⵏⴰⵔ ⵏ ⵜⵎⵙⴽⴰⵔ ⵉ ⵚⴰⵃⴰ ⵏ ⵉⵏⴱⴷⴰⴷⵏ ⵏ ⵡⴰⵎⵎⴰⵙⵏ ⴰⴷ ⴷ ⵡⵉⴷⴰ ⵎⵓ ⵚⴰⵃⴰⵏⵜ ⵜⵏⵓⴼⴰ ⵏⵏⵙⵏ, ⵍⵍⴰⵏⵜ ⴳⵉⵙ ⴽⵓ ⵜⵉⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵙⴳ ⵓⴼⵉⵔⵓⵙ ⵏ ⴽⵓⵕⵓⵏⴰ, ⴰⵎ ⵜⴰⵖⵓⵙⵉ ⴷ ⵓⵙⵉⵣⴷⴳ ⵢⵓⵎⴰⵏ ⵏ ⵡⴰⵎⵎⴰⵙⵏ ⵏ ⵓⵙⵏⴱⴷⵓ ⴷ ⵓⵙⴼⵔⴽ ⵏ ⵡⵉⵍⵍⵉ ⵎⵓ ⵚⴰⵃⴰⵏⵜ ⵜⵏⵓⴼⴰ ⵏⵏⵙⵏ, ⴷ ⵓⵛⵛⵉⵍ ⵏ ⵜⵎⵙⴽⴰⵔ ⵢⴰⴹⵏⵉⵏ ⵏ ⵡⴰⵔⴰⵢ ⴰⵎ ⵜⵉⴽⵎⴰⵎⵉⵏ ⴷ ⵜⵎⵢⴰⴳⴳⵓⴳⵜ ⵜⴰⵏⴰⵎⵓⵏⵜ.

ⵖ ⵓⵎⵏⵉⴷ ⵏⵏⵙⵏ ⵏⵏⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⵉⴳⴰ ⵓⵛⵛⵉⵍ ⴰⴷ ⵜⵜⵓⵙⴽⵉⵔⵏ ⵉⵙⵡⵓⴷⴷⵓⵜⵏ ⴷ ⵓⵍⴳⴳⵓⴷ ⵉ ⵓⵙⵏⴰⵍ ⵏ ⵜⵎⵙⵎⵓⵏⵉⵏ ⵥⵍⵉⵏⵉⵏ ⵙ ⵜⵓⵏⵏⵓⵏⵉⵏ ⵜⵓⴼⵔⵉⴷⵉⵏ, ⵙⵓⵜⴳⵏ ⵜⴰⵖⵜⴰⵙⵜ ⵏ ⵜⵉⴽⴽⵉ ⵏ ⵜⴰⴳⴳⴰⵣⵉⵏ ⵉ ⵜⴼⵉⴷⵉⵕⴰⵍⵉⵢⵉⵏ ⵜⵉⵏⴰⵎⵓⵔⵉⵏ ⵏ ⵜⵓⵏⵏⵓⵏⵜ, ⵖⵔⵉⵏ ⴰⴷ ⵢⵉⵍⵉ ⵓⵙⵡⵓⵔⵉ ⵙ ⵜⵣⵔⴰⵡⵜ ⵍⵍⵉ ⵉⵙⴽⵔ ⵓⵙⵇⵇⵉⵎ ⴰⵏⴰⵎⵓⵏⵏ ⴷ ⵓⴷⵎⵙⴰⵏ ⴷ ⵓⵡⵏⴹⴰⵏ ⴼ ⵜⵙⵔⵜⵉⵜ ⵜⴰⵏⴰⵎⵓⵔⵜ ⵏ ⵜⵓⵏⵏⵓⵏⵜ ⵙ ⵓⵙⴽⵛⵎ ⵏⵏⵙ ⵖ ⵜⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵉ ⵜⵓⵏⵏⵓⵏⵜ ⴰⴷ ⵜⴳ ⵜⴰⵙⵔⵜⵉⵜ ⵜⴰⴳⴷⵓⴷⴰⵏⵜ ⵖ ⵓⵙⵍⴳⵏ ⴰⵙⴰⵜⵉ, ⴷ ⵓⵙⵏⴰⵍ ⵏ ⵜⵓⵏⵏⵓⵏⵜ ⵖ ⵜⵏⵎⴰⵍ ⴷ ⵜⵙⴷⴰⵡⵉⵢⵉⵏ.

ⵖⵔⵉⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵎⴰⵙ ⴷ ⵉⵇⵇⴰⵏ ⵓⵙⵎⴰⵢⵏⵓ ⵏ ⵓⵙⵍⴳⵏ ⵓⵟⵟⵓⵏ 09.30 ⴷ ⵜⵎⴰⵎⴽⵜ ⵏ ⵓⵙⴱⴷⴷⵉ ⵏ ⵜⵎⵓⴽⵔⵉⵙⵜ ⵏ ⵜⵥⵥⵡⵉⵕⵉⵏ ⴷ ⵓⵣⵡⴰⴳ ⵏ ⵉⴷ ⴱⵓ ⵜⵓⵏⵏⵓⵏⵜ, ⴷ ⵓⵙⵏⴰⵍ ⵏ ⵜⴼⵉⴷⵉⵕⴰⵍⵉⵢⵉⵏ ⵏ ⵜⵓⵏⵏⵓⵏⵜ ⵖ ⵓⵙⴱⴷⴷⵉ ⵏ ⵉⴷⵔⵉⵣⵏ ⵀⵔⵛⵏⵉⵏ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵍⵍⵉⵖ ⵍⵍⴰⵏⵜ ⵖ ⵓⵙⵓⵔⵙ ⵉⵛⵃⴰⵏ, ⴷ ⵓⵣⵔⴰⵢ ⵏ ⵓⵙⵓⵔⵙ ⵖ ⵉⵍⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵓⵙⵎⵓⵜⵜⴳ ⵏ ⵉⵎⵙⵖⴰⵏⵏ. ⵉⵏⵉⵏ ⵎⴰⵙ ⴷ ⵉⵇⵇⴰⵏ ⴰⴷ ⵜⵜⵓⵕⵥⵉⵎ ⵜⵙⴰⵡⵔⵜ ⵏ ⵓⵎⵢⴰⵡⴰⴹ ⴷ ⵜⵎⵓⵟⵟⵓⵏⵜ ⴷⴰⵔ ⴽⵓ ⵉⴳⵔⴰⵏ ⵉⵎⴰⵡⵙⴰⵙⵏ, ⴷ ⵓⵙⵕⵚⵓ ⵏ ⵓⵏⴱⴰⴹ ⴷ ⵜⵎⴰⴼⴰⵡⵜ ⵖ ⴽⵓ ⵜⵉⵎⵔⵙⴰⵍ ⴹⴼⵕⵏⵉⵏ ⵉ ⵜⵎⴰⵡⴰⵙⵜ.

ⵖ ⵎⴰⴷ ⵉⵥⵍⵉⵏ ⵙ ⵜⵏⵎⴰⵍ ⵜⵉⵎⵏⵣⵓⵜⵉⵏ ⵏ ⵉⵎⵥⵢⴰⵏⵏ, ⵙⴷⴷⵉⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴼ ⵓⵛⵛⵉⵍ ⵏ ⵓⵅⵎⵎⴻⵎ ⵖ ⵓⵙⵏⴰⵍ ⵏ ⵜⴷⵓⵍⵉ ⴰⴷ ⵉⵜⵜⵓⴹⵕⵕⴰⵏ ⵖ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⵓⵙⵡⵓⵔⵉ ⴼ ⵓⵙⵏⴰⵍ ⴰⴱⵙⵉⴽⵓⵍⵓⵊⵉ ⵏ ⵉⵎⵥⵢⴰⵏⵏ ⴷ ⵉⵄⵔⵔⵉⵎⵏ ⵜⵜⵓⴹⵕⵕⴰⵏⵉⵏ ⵖ ⵉⴷⵔⵉⵣⵏ ⵉⴱⵙⵉⴽⵓⵍⵉⵊⵉⵢⵏ ⵏ ⵓⴱⴰⵢⵢⵓⵕ ⴰⴷ. ⵉⵇⵇⴰⵏ ⴷ ⴰⴷ ⵉⵍⵉⵏ ⵉⵖⵡⴰⵙⴰⵏ ⵉⵙⴳⵎⴰⵏⵏ ⵏ ⵓⵙⴰⵔⵓⵔ ⵉ ⵓⵙⵙⵉⴱⵙⵓⵙ ⵖ ⵜⵎⵓⴽⵔⵉⵙⵜ ⵏ ⵜⴼⵔⴽⴰ ⵏ ⵓⵥⵍⴰⵢ ⴰⴷⵓⵙⴰⵏ, ⵢⵉⵍⵉ ⵓⵙⵎⵓⵙⵙⵓ ⵏ ⵡⴰⵎⵓⵏ ⴰⵖⵔⵎⴰⵏ ⴰⵙⴳⵎⴰⵏ ⵉⵙⵡⵓⵔⵉⵏ ⵖ ⵉⴳⵣⴷⵡⵏ ⵉ ⵓⵍⵜⴰⵖ ⵉⵥⵉⵍⵏ ⴰⴷ ⵜⵜⵓⴼⴽⵉⵏⵜ ⵜⵙⵓⵎⵔⵉⵏ ⵏ ⵓⵙⵎⵓⵙⵙⵓ ⴰⵏⴰⵎⵓⵏ ⴷ ⵓⵙⴳⵎⴰⵏ ⵖ ⵜⵉⵣⵉ ⵏ ⵓⵏⴱⴷⵓ ⵙ ⵓⵎⵙⴰⵙⴰ ⴷ ⵜⵎⵙⵓⵜⵍⵜ ⵜⴰⴷⵓⵙⴰⵏⵜ ⴷ ⵓⵙⵓⵔⵙ ⵏ ⵓⴱⴰⵢⵢⵓⵕ ⵖ ⵜⴳⵍⴷⵉⵜ.