ⴰⵙⵎⵏⵉⴷ ⵏ ⵓⵎⴰⵡⵙⴰⵙ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⴷⴰⵔ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵉⵙⵡⵓⴷⴷⵓⵜⵏ ⵏ ⵜⵎⴰⵡⴰⵙⵜ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⴷⴼⴼⵉⵔ ⵏⵏⵙ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⵙⵉⵏⴰⵙ 09 ⵢⵓⵏⵢⵓ 2020 ⵜⴰⵙⵎⵓⵏⵉ ⵍⵍⵉ ⵜⵙⵙⵉⵅⴼ ⵜⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵎⴰⵙⵙⴰ ⵙⴰⵄⵉⴷⴰ ⴰⵢⵜ ⴱⵓⵄⵍⵉ, ⵙ ⵜⵉⵍⵉⵜ ⵏ ⵎⴰⵙⵙ ⴰⵎⴰⵡⵙⴰⵙ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⵎⴰⵙⵙ ⵎⵓⵃⴰⵎⵎⴰⴷ ⴰⵎⴽⵔⴰⵣ, ⵜⵥⵍⵉ ⵉ ⵓⵎⴹⴰⴽⴰⵕ ⵏ ⵓⵙⵓⵔⵙ ⵏ ⵓⵙⵡⵓⵔⵉ ⵖ ⵜⵎⴰⵣⵉⵔⵜ ⵏⵏⵖ ⴷ ⵉⵙⵡⵓⴷⴷⵓⵜⵏ ⵏ ⵜⵎⴰⵡⴰⵙⵜ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⴷⴼⴼⵉⵔ ⵏⵏⵙ, ⴷ ⵜⵉⵕⵡⵉ ⴷ ⵉⴷⵔⵉⵣⵏ ⵏⵏⵙⵏ ⴼ ⵢⵉⴳⵔ ⴰⴷ, ⴷ ⵜⵎⵏⵜⴰⵍ ⵍⵍⵉⵖ ⵓⵔ ⵓⵎⵥⵏ ⵜⵓⴽⵜ ⵏ ⵉⵎⵙⵡⵓⵔⵉⵢⵏ ⵜⵉⵖⵔⴰⴷ ⵏⵏⵙⵏ, ⴷ ⵜⵎⵙⴽⴰⵔ ⵏ ⵓⴹⴼⵕ ⵉ ⵓⵙⵏⴰⵍ ⵏ ⵡⵉⵍⵍⵉ ⵜⵜⵓⴹⵕⵕⴰⵏⵏⵉⵏ.

ⵉⵙⵏⵜⵉ ⵎⴰⵙⵙ ⴰⵎⴰⵡⵙⴰⵙ ⴰⵙⵎⵏⵉⴷ ⵙ ⵡⴰⵡⴰⵍ ⴼ ⴽⵕⴰⴹⵜ ⵜⵖⴰⵡⵙⵉⵡⵉⵏ: ⵜⵉⵎⵙⴽⴰⵔ ⵏ ⵓⴹⴼⵕ ⵏ ⵉⵎⵙⵡⵓⵔⵉⵢⵏ ⴷ ⵜⵎⵙⵙⵏⵜⴰⵢ ⵎⵓ ⵜⵣⵣⵉⴳⵣ ⵜⵡⵓⵔⵉ ⵏⵏⵙⵏⵜ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵓⵎⵍⴰⵏ ⵣⴷⵉⵏⵉⵏ  ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⴷ ⵉⵎⵙⵡⵓⵔⵉⵢⵏ  ⴷ ⵉⵙⵡⵓⴷⴷⵓⵜⵏ ⵍⵍⵉ ⵔⴰⴷ ⵢⴰⵡⵙ ⵖ ⵓⵖⵓⵍ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ.

ⵉⵙⵙⴽⵜⵉ ⴷ  ⵎⴰⵙⵙ ⴰⵎⴰⴽⵔⴰⵣ ⵜⵉⵎⵙⵓⵜⵍⵉⵏ ⵛⴷⴷⴰⵏⵉⵏ ⵖ ⵜⵍⵍⴰ ⵜⴷⵎⵙⴰ ⵜⴰⵎⴰⴹⵍⴰⵏⵜ, ⴰⵢⵍⵍⵉ ⵏⵉⵜ ⵉⵍⵍⴰⵏ ⵖ ⵉⵏⵇⵇⵉⵙⵏ ⵉⴳⵔⴰⵖⵍⴰⵏⵏ, ⴰⵙⵓⵔⵙ ⴰⴷ ⵔⴰⴷ ⵉⵣⵣⵉⴳⵣ ⵓⵍⴰ ⴷⴼⴼⵉⵔ ⵏ ⵓⵥⵍⴰⵢ ⴰⴷⵓⵙⴰⵏ.

ⵖ ⵓⵙⵡⵉⵔ ⴰⵏⴰⵎⵓⵔ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⴽⵓ ⵉⵙⵡⵓⴷⴷⵓⵜⵏ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⵉ ⵓⴹⴼⵕ ⵏ ⵓⵙⵓⵔⵙ ⴰⴷⵎⵙⴰⵏ ⴷ ⵓⵏⴰⵎⵓⵏ ⵏ ⵜⵎⵔⵙⴰⵍ ⵍⵍⵉ ⴷ ⵜⴽⴽⴰⵏ ⵉⵎⴳⴳⵉⵡⴰⵙ ⵏ ⵜⵡⵓⵔⵉ, ⵙⵍⴰⵡⴰⵏ ⴰⴽⴽⵯ ⵜⵉⴷ ⵎⵓ ⵜⵣⵣⵉⴳⵣ ⵜⵉⵍⴰⵍⴰⵜ ⵏⵏⵙⵏⵜ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵙ ⴽⵓⵍⵍⵓ ⵜⵜ ⵏⵖ ⵉⵎⵉⴽⴽ ⴳⵉⵙ, ⵉⵙⴷⴷⵉⴷ:" ⵍⵍⵉⵖ ⴱⵃⵃⵕⴰ ⵍⵍⴰⵏ ⵡⴰⴷⴷⴰⴷⵏ ⵉⵎⵣⵡⵓⵔⴰ, ⵜⵎⵎⴰⵖ ⵜⵎⴰⵡⴰⵙⵜ ⴰⴷ ⵜⵣⵣⵉⴳⵣ ⵜⵉⵍⴰⵍⵜ ⵏ ⵜⵎⵙⵙⵏⵜⴰⵢ ⴷ ⵓⵃⵟⵟⵓ ⵏ ⵜⵣⵣⵓⵍⵉⵏ ⵏ ⵜⵡⵓⵔⵉ ⵙ ⵓⵡⵇⵇⵔ ⵏ ⵜⴼⴰⴷⵉⵡⵉⵏ ⵏ ⵡⴰⵔⴰⵢ", ⵢⵉⵏⵉ:"ⵉⴳⴰ ⵡⴰⵡⴰⵜⵜⴰⵙ ⴰⴷ ⴼⴽⵉⵏ ⵉⴷ ⴱⴰⴱ ⵏ ⵜⵡⵓⵔⵉ ⵜⵉⵏⵓⵕⵥⴰⵎ ⵜⵉⵎⵙⵙⵓⴳⵓⵔⵉⵏ ⵉ ⵉⵎⵙⵡⵓⵔⵉⵢⵏ ⵡⴰⵅⵅⴰ ⵓⵔⵜⴰ ⵜⵍⴽⵉⵎ ⵜⵉⵣⵉ ⵏⵏⵙⵏⵜ, ⵏⵖ ⵜⵓⵔⴰⴳⵉⵏ ⵜⵉⵎⵥⵍⴰⵢ, ⴷ ⵓⵙⵔⵇⴱ ⵏ ⵜⵡⵓⵔⵉ ⵙ ⵜⵉⴳⴳⵓⴳⵜ ⵏⵖ ⵙ ⵜⵡⴰⵍⴰ ⵃⵎⴰ ⴰⴷ ⵜⵉⴱⵙⵓⵙ ⵜⵉⵍⵉⵜ ⵖ ⵓⵙⵖⵉⵎ ⵏ ⵜⵡⵓⵔⵉ, ⵢⵉⵍⵉ ⵓⵍⴰ ⵓⵡⵇⵇⵔ ⵏ ⵜⴼⴰⴷⵉⵡⵉⵏ ⵏ ⵜⴷⵓⵙⵉ ⴷ ⵜⴼⴰⵜⵉⵜ ⵖ ⵉⵙⴰⵢⵔⵓⵔⵏ ⵏ ⵜⵡⵓⵔⵉ".

ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ:" ⵖ ⵜⵉⵣⵉ ⵉⵍⵍⴰⵏ ⵏⴳⵔ 13 ⵎⴰⵕⵚ ⴰⵔ 14 ⵉⴱⵔⵉⵔ ⵣⵔⵉⵏⵉⵏ, ⴹⴼⵕⵏⵜ ⵜⵎⵀⵍⵉⵡⵉⵏ ⵜⵉⵏⵎⵏⴰⴹⵉⵏ ⵎⴰ ⴷ ⵉⴳⴰⵏ 7616 ⵏ ⵜⵎⵔⵙⵍⵜ ⵙ ⵓⵙⵎⵎⵜⵔ ⴷ ⵓⵙⴼⵔⴽ, ⵙ ⵜⵡⵓⵔⵉ ⵍⵍⵉ ⵙⴽⵔⵏ ⵉⵎⴰⵡⴰⵙⵏ ⵏ ⵜⵎⴳⴳⵉⵡⵙⵜ ⵏ ⵜⵡⵓⵔⵉ ⴼ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵖ ⵓⴼⵉⵔⵓⵙ ⵏ ⴽⵓⵕⵓⵏⴰ".

ⵉⵏⵏⴰ:" ⵏⴳⵔ 15 ⵉⴱⵔⵉⵔ ⴷ 04 ⵢⵓⵏⵢⵓ, ⵜⵜⵓⵙⴽⴰⵔⵏ ⵉⵔⵣⴰⴼⵏ ⵉ ⵎⴰ ⴷ ⵉⴳⴰⵏ 10546 ⵏ ⵜⵎⵙⵙⵏⵜⵉⵜ, 85% ⴳⵉⵙⵏⵜ ⵙⴽⵔⵏⵜ ⵙ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵖ ⵓⴼⵉⵔⵓⵙ ⵏ ⴽⵓⵕⵓⵏⴰ".

ⵜⵜⵓⵙⴽⴰⵔⵏⵜ ⵓⵍⴰ ⵜⵙⵇⵇⵉⵎⵉⵏ ⵜⵉⵙⴳⴰⵡⴰⵏⵉⵏ ⵖ ⵍⵍⴰⵏ ⵉⴳⵔⴰⵏ ⵏ: ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ, ⴷ ⵜⴳⵯⵏⵙⴰⵏⵜ ⴷ ⵜⴷⵓⵙⵉ ⴷ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ ⵃⵎⴰ ⴰⴷ ⵜⵉⵍⵉ ⵜⴱⵉⴷⴷⴰⴷⵜ ⴼ ⵓⵡⵇⵇⵔ ⵏ ⵜⵎⵙⵙⵏⵜⴰⵢ ⵎⵓ ⵜⵣⵣⵉⴳⵣ ⵜⵡⵓⵔⵉ ⵏⵏⵙⵏⵜ ⴷ ⵜⵉⵍⵍⵉ ⵜⵜ  ⵉⵙⵏⵜⵉⵏ ⵉ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⴰⵏⵉⵏ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵖ ⵍⵍⴰⵏⵜ ⵜⵎⵙⴽⴰⵔ ⵏ ⵓⵙⵖⵓⵙ ⵏ ⵉⴷⵖⴰⵔⵏ ⵏ ⵜⵡⵓⵔⵉ ⴷ ⵓⵙⴼⵔⴽ ⴷ ⵜⵎⵙⵓⵜⵍⵉⵏ ⵏ ⵜⵡⵓⵔⵉ.

ⵖ ⵓⵎⵏⵉⴷ ⵏ ⵓⵎⵛⴰⵡⴰⵔ ⴼ ⵉⵙⵡⵓⴷⴷⵓⵜⵏ ⵍⵍⵉ ⵜⵙⴽⵔ ⵜⵏⴱⴰⴹⵜ, ⵙⵍⴰⵡⴰⵏ ⴰⴽⴽⵯ ⵎⴰ ⴷ ⵉⵥⵍⵉⵏ ⴷ ⵜⵎⵙⵓⵜⵍⵉⵏ ⵏ ⵜⵡⵓⵔⵉ ⴷ ⵓⵃⵟⵟⵓ ⴰⵏⴰⵎⵓⵏ, ⵉⵏⵏⴰ ⵓⵎⴰⵡⵙⴰⵙ ⵎⴰⵙ ⵉⵙⴽⵔ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵜⴰⵙⵎⵓⵏⵉ ⴷ ⴽⴽⵓⵥ ⵉⵏⵎⵓⵍⵍⴰ ⵉⵏⴰⵎⵎⴰⵙⵏ ⵍⵍⵉ ⵟⵟⴰⴼⵏⵉⵏ ⴰⵙⵎⴷⵢⴰ ⵉⴳⴳⵓⵜⵏ ⵉ ⵓⵎⵛⴰⵡⴰⵕ ⴼ ⵉⵙⵡⵓⴷⴷⵓⵜⵏ ⴰⴷ, ⵜⵙⴽⵔⵜ ⵜⵎⴰⵡⵙⴰⵙⵜ ⵓⵍⴰ ⵜⴰⵙⵎⵓⵏⵉ ⵏ ⵓⵎⵛⴰⵡⴰⵕ ⴷ ⵉⵏⵎⵓⵍⵍⴰ ⴰⴷ, ⵜⵥⵍⵉ ⵉ ⵓⵎⴹⴰⴽⴰⵕ ⴼ ⵉⵙⵡⵓⴷⴷⵓⵜⵏ ⵏ ⵡⴰⵔⴰⵢ ⵖ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵖ ⵜⵡⵓⵔⵉ, ⵖⵎⴽ ⴰⵏⵏ ⴷ ⵓⴹⵓⴼ ⴷ ⵓⵙⴼⵔⴽ ⵏ ⵉⵎⵙⵡⵓⵔⵉⵢⵏ ⴷ ⵉⴷ ⴱⴰⴱ ⵏ ⵜⵡⵓⵔⵉ, ⵢⵉⵏⵉ ⵎⴰⵙ ⵉⵜⵜⵓⵙⴽⴰⵔ ⵓⵍⴰ ⵓⵏⵎⵓⵇⵇⴰⵔ ⵏ ⵓⵃⵉⵢⵢⵍ ⵏ ⵜⵙⵎⵓⵏⵉ ⵏ ⵓⵙⵇⵇⵉⵎ ⵏ ⵜⵙⵏⵉⵊⵊⵉⵜ ⵏ ⵜⵡⵓⵔⵉ ⵖ ⵎⴰⵏⵏ ⵓⵔ ⵢⴰⴳⴳⵓⴳⵏ.

ⵉⵙⵉⵙⴼⵉⵡ ⵎⴰⵙⵙ ⴰⵎⴽⵔⴰⵣ ⵎⴰⵙ ⴷ "ⵉⵡⵉⵏ ⵉⵔⵣⴰⴼⵏ ⵍⵍⵉ ⵙⴽⵔⵏⵜ ⵜⵙⵇⵇⵉⵎⵉⵏ ⵉⵛⵛⴰⵔⵏ ⴷ ⵜⵙⵇⵇⵉⵎⵉⵏ ⵜⵉⵙⴳⴰⵡⴰⵏⵉⵏ ⵎⵎⵔⴽⵙⵏⵉⵏ ⴷ ⵉⵎⴰⵡⴰⵙⵏ ⵏ ⵜⵎⴳⴳⵉⵡⵙⵜ ⵏ ⵜⵡⵓⵔⵉ, ⴰⴱⴷⴷⴰⴷ ⴼ 104958 ⵏ ⵓⵙⵡⵓⴷⴷⵓ ⵏ ⵡⴰⵔⴰⵢ, ⵙⴽⵔⵏⵜ ⴳⵉⵙⵏ ⵜⵎⵙⵙⵏⵜⴰⵢ 89240, ⵖⵎⴽ ⵍⵍⵉ ⵓⵔ ⵜⵜⵓⵙⴽⴰⵔⵏ 15772 ⵏ ⵓⵙⵡⵓⴷⴷⵓ".

ⵜⵙⴽⵔ ⵜⵎⴰⵡⴰⵙⵜ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⵢⴰⵜ ⵜⵙⵉⵍⴰ ⵏ ⵓⵎⵢⴰⵡⴰⴹ ⵙ ⵜⵜⵉⵍⵉⴼⵓⵏ "ⴰⵍⵓ 2233", ⵜⵥⵍⵉ ⵉ ⵓⵎⵢⴰⵡⴹ ⴷ ⵜⵉⴽⴽⵉ ⵏ ⵓⵙⵎⵎⵜⵔ ⴷ ⵜⵏⵎⵎⴰⵍⵉⵏ, ⴷ ⵉⵎⵉⵥ ⵏ ⵉⵙⵎⵓⵎⵎⵢⵏ ⵏ ⵉⵎⵙⵡⵓⵔⵉⵢⵏ ⴷ ⵉⴷ ⴱⴰⴱ ⵏ ⵜⵡⵓⵔⵉ ⵖ ⵉⵎⵏⵉⴷⵏ ⵏ ⵜⴷⵓⵙⵉ ⴷ ⵜⴼⴰⵜⵉⵜ, ⵉⵍⵉⵏ ⴽⵓ ⵉⵎⵙⵖⴰⵏⵏ ⵏ ⵜⵎⴰⵡⴰⵙⵜ ⵖ ⵎⵏⵉⴷ ⵏⵏⵙⵏ ⵖ ⵍⵍⴰⵏ ⵉⵎⴳⴳⵉⵡⴰⵙ ⴷ ⵉⴹⴱⵉⴱⵏ, ⵙ ⵓⵣⴷⴷⵓⵢ ⴷ ⵓⵙⵉⵏⴰⴳ ⴰⵏⴰⵎⵓⵔ ⵏ ⵜⵎⵙⵓⵜⵍⵉⵏ ⵏ ⵜⵓⴷⵔⵜ ⵜⴰⵣⵣⵓⵍⴰⵏⵜ, ⵉⵣⵣⵔⵉ ⵉⵎⵉⵙⵙ ⴰⴷ ⵎⴰ ⴷ ⵉⴳⴰⵏ 3591 ⵏ ⵓⵏⵢⴰⵍⴽⴰⵎ ⵙ ⵜⵖⴰⵔⴰⵙⵜ ⵏ ⵜⵜⵉⵍⵉⴼⵓⵏ ⵏⴳⵔ 8 ⵎⴰⵢⵢⵓ ⴷ 4 ⵢⵓⵏⵢⵓ.

ⵍⵍⵉⵖ ⵉⵙⵎⵏⵉⴷ ⵓⵎⴰⵡⵙⴰⵙ ⵉⵙⵡⵓⴷⴷⵓⵜⵏ ⵏ ⵜⵏⴱⴰⴹⵜ ⵉ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⴷ ⵉⵎⵙⵡⵓⵔⵉⵢⵏ, ⵉⵏⵏⴰ ⵎⴰⵙ ⵏⵏⴰⵏⵜ 94% ⵏ ⵜⵎⵙⵙⵏⵜⴰⵢ ⵏ ⵓⵙⵏⵓⴱⴳ ⴷ ⵓⵜⵛⵓ ⴰⵙⴱⴷⴷⵉ ⵏⵏⵙⵏⵜ ⴰⵎⵙⵉⴽⵓⴷ ⵖ ⵜⵡⵓⵔⵉ, ⵢⵉⵍⵉ ⵓⵙⵏⵖⵎⵙ ⵙ ⵓⵙⴱⴷⴷⵉ  ⴰⵎⵙⵉⴽⵓⴷ ⵏ 76%  ⵏ ⵉⵎⵙⵡⵓⵔⵉⵢⵏ ,  55 % ⵖ ⵢⵉⴳⵔ ⵏ ⵜⵥⵓⵕⵉ ⴷ ⵓⵙⴰⵔⵓⵔ ⴷ ⵜⵉⵍⴰⵍ ⵏ ⵉⵙⴼⵙⵔⵏ, 52% ⵖ ⵢⵉⴳⵔ ⵏ ⵜⵎⴳⵓⵔⵉⵏ ⵏ ⵓⵙⵏⴼⵍ, 47 % ⵖ ⵓⵚⴽⴰⵡ, ⵉⴳⵔⴰⵏ ⵍⵍⵉ ⴱⴰⵀⵔⴰ ⵓⵔ ⵜⵜⵓⴹⵕⵕⴰⵏⵉⵏ ⴳⴰⵏ ⵡⵉⵏ ⵜⴼⵍⵍⴰⵃⵜ, ⴷ ⵜⵉⵍⴰⵍ ⵜⵉⵥⵕⴼⴰⵏⵉⵏ ⴷ ⵜⵉⵏ ⵓⵙⴼⵍⵙ ⵙ 5.6%, ⴷ ⵢⵓⴳⵔ ⵏ ⵓⵙⵏⵖⵎⵙ ⴷ ⵓⵎⵢⴰⵡⴰⴹ ⵙ8.7 %   .

ⵖ ⵎⴰ ⴷ ⵉⵥⵍⵉⵏ ⵙ ⵉⵙⵡⵓⴷⴷⵓⵜⵏ ⵏ ⵓⴹⴼⵕ ⵏ ⵓⵖⵓⵍ ⵏ ⵜⵉⵍⴰⵍⵜ ⵜⴰⴷⵎⵙⴰⵏⵜ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ:" ⵔⴰⴷ ⵢⵉⵍⵉ ⵓⵙⴽⵔ ⵙ ⵉⵙⵖⵡⴰⵏ ⵏ ⵓⵖⴰⵡⴰⵙ ⵓⵏⴱⵉⴹ ⵖ ⵓⵙⵎⵖⵔ ⵏ ⵜⴷⵓⵙⵉ ⴷ ⵜⴼⴰⵜⵉⵜ ⵜⴰⵣⵣⵓⵍⴰⵏⵜ, ⴷ ⵉⵙⵖⴰⵡⴰⵏ ⵉⴳⵔⴰⵖⵍⴰⵏⵏ ⵏ ⵍⵎⵖⵔⵉⴱ ⵍⵍⵉⵖ ⵉⵙⵖⵣⵏ ⵜⴰⵎⵢⴰⵇⵇⴰⵜ ⵏ ⵜⵡⵓⵔⵉ  ⵜⴰⴳⵔⴰⵖⵍⴰⵏⵜ ⵓⵟⵟⵓⵏ 187 ⵉⵣⴷⵉⵏ ⵙ ⵓⵙⴰⵜⵉ ⵏ ⵓⵣⵓⵣⵣⵔ ⵏ ⵜⴼⴰⵜⵉⵜ ⴷ ⵜⴷⵓⵙⵉ ⵜⴰⵣⵣⵓⵍⴰⵏⵜ, ⵖⵉⴽ ⴰⵏⵏ ⴰⴼ ⵉⵎⴹⴰⴽⴰⵕ ⵓⵙⵇⵇⵉⵎ ⵓⵏⴱⵉⴹ ⵉⵜⵜⵓⵙⴽⴰⵔⵏ, ⴰⵙⵙ ⵏ ⵓⴽⵡⴰⵙ ⵍⵍⵉ ⵉⵣⵔⵉⵏ, ⵜⴰⵙⵔⵜⵉⵜ ⴷ ⵓⵖⴰⵡⴰⵙ ⵉⵏⴰⵎⵓⵔⵏ ⵉ ⵜⴼⴰⵜⵉⵜ ⴷ ⵜⴷⵓⵙⵉ ⵖ ⵜⵡⵓⵔⵉ ⵍⵍⵉ ⵜⵙⵓⵊⴰⴷ ⵜⵎⴰⵡⴰⵙⵜ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ ⵙ ⵓⵎⵛⴰⵡⴰⵕ ⴷ ⴽⵓ ⵉⴳⵔⴰⵏ ⵓⵏⴱⵉⴹⵏ ⵉⵎⵏⵜⴰⵢⵏ, ⴷ ⵜⵎⴰⴷⴷⴰⵙⵉⵏ ⵜⵉⵣⵣⵓⵍⴰⵏⵉⵏ ⵏ ⵉⴷ ⴱⴰⴱ ⵏ ⵜⵡⵓⵔⵉ ⴷ ⵉⵏⵎⵓⵍⵍⴰ ⵍⵍⵉ ⵎⵓ ⵉⴳⴳⵓⵜ ⵓⵙⵎⴷⵢⴰ".

ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ, ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵎⵙⴽⴰⵔ ⵍⵍⴰⵏⵉⵏ ⵙ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ, ⴷ ⵓⵙⵏⴰⵍ ⵍⵍⵉ ⵉⵚⴰⵃⴰⵏ ⵉ ⵜⴰⵡⵊⵉⵡⵉⵏ ⵜⵉⵎⵖⵔⵉⴱⵉⵢⵉⵏ ⵖ ⵓⵣⵎⵣ ⴰⴷ, ⵖⵔⵉⵏ ⵃⵎⴰ ⴰⴷ ⵢⵉⵍⵉ ⵓⵙⵏⴰⵍ ⵏ ⵉⵏⵎⵓⵔⴰⵏ ⵎⵓ ⵜⴷⴷⴰ ⵜⵡⵓⵔⵉ ⵏⵏⵙⵏ, ⴷ ⵉⴳⵔ ⵏ ⵜⴼⵍⵍⴰⵃⵜ ⵍⵍⵉ ⵉⵜⵜⵓⴹⵕⴰⵏ ⵖ ⵓⵣⵎⵣ ⵖ ⵜⵜⵓⵇⵇⴰⵏⵏ ⵉⴳⴰⴷⴰⵣⵏ ⵉⵏⵎⵍⴰⵙⵙⵏ ⴷ ⵉⵙⴼⵙⵔⵏ ⵉⵏⵎⵏⴰⴹⵏ, ⵖⵎⴽ ⴰⵏⵏ ⴷ ⵓⵔⵣⵣⵓ ⵏ ⵉⴼⵙⵙⴰⵢⵏ ⵉ ⵢⵉⴳⵔ ⵓⵚⴽⵉⵡ, ⴷ ⵓⵙⵓⵔⵙ ⵏ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⵓⵙⵍⵉⴳ ⵉ ⵓⵃⵟⵟⴰ ⵏ ⵉⵏⵙⴷⴰⵔⵏ ⵏ ⵉⵎⵙⵡⵓⵔⵉⵢⵏ ⵍⵍⵉⵖ ⵉⵜⵜⵉⵎⴽⵏ ⴰⴷ ⴼⴼⵖⵏ ⵖ  ⵜⵡⵓⵔⵉ, ⴰⵢⵍⵍⵉ ⵖ ⵔⴰⴷ ⵉⵍⵉⵏⵜ ⴽⵔⴰ ⵏ ⵜⴰⵕⵥⵉⵡⵉⵏ ⵏ ⵓⵙⵍⴳⵏ, ⵉⵇⵇⴰⵏ ⴷ ⴰⴷ ⵜⵉⵍⵉ ⵜⵉⴹⴰⴼ ⵏ ⵓⵥⵟⵟⴰ ⴰⴷⵎⵙⴰⵏ ⴷ ⵓⵡⵇⵇⵔ ⵏ ⵉⵙⵡⵓⴷⴷⵓⵜⵏ ⵉⵣⵣⵔⴰⴼⵏ ⵖ ⵓⵣⵎⵣ ⴰⴷ.

ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⴰⴷ ⵢⵉⵍⵉ ⵓⵏⵏⵓⵕⵥⵎ ⴼ ⴽⵔⴰ ⵏ ⵉⴷ ⴱⴰⴱ ⵏ ⵜⵎⵙⵙⵏⵜⴰⵢ ⵙⵡⵓⵔⵉⵏⵉⵏ ⵖ ⵢⵉⴳⵔ ⵏ ⵜⵏⵓⴼⴰ ⵙⵍⴰⵡⴰⵏ ⴰⴽⴽⵯ ⵉⴷ ⴱⴰⴱ ⵏ ⵍⵇⵀⴰⵡⵉ ⴷ ⵉⵙⵉⵔⵎⵏ ⴷ ⵓⵙⴳⴼⴰⵔ ⵏ ⵜⴼⵓⴳⵍⵉⵡⵉⵏ ⵍⵍⵉⵖ ⴱⴰⵀⵔⴰ ⵉⵜⵜⵓⴹⵕⵕⴰ ⵢⵉⴳⵔ ⴰⴷ ⵖ ⵙⵡⵓⵔⵉⵏ ⴽⵉⴳⴰⵏ ⵏ ⵎⵉⴷⴷⵏ, ⵃⵎⴰ ⴰⴷ ⵢⵉⵍⵉ ⵓⵎⵙⴰⵡⴰⵍ ⵉⴷⵓⵙⵏ ⵖ ⵜⵉⵣⵉ ⴰⴷ ⵖ ⵜⵍⵍⴰ ⵜⵎⴰⵣⵉⵔⵜ ⵏⵏⵖ, ⴰⴼⴰⴷ ⴰⴷ ⵜⵜⵓⴼⴽⵉⵏ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ ⵖ ⴷⴷⵔⵏⵜ ⵜⵎⵙⵙⵏⵜⴰⵢ ⵎⵥⵥⵉⵏⵉⵏ ⴷ ⵜⵉⴷ ⴱⴰⵀⵔⴰ ⵎⵥⵥⵉⵏⵉⵏ, ⴷ ⵓⵙⵡⵉⵏⴳⵎ ⵖ ⵉⵙⵡⵓⴷⴷⵓⵜⵏ ⵕⵡⴰⵏⵉⵏ, ⵣⵓⵏ ⴷ ⴰⴷ ⴰⵙⵏⵜ ⵚⵉⵃⵉⵏⵜ ⵜⵎⵙⴽⴰⵔ ⵖ ⵉⵎⵏⵉⴷⵏ ⵏ ⵜⴷⵎⵙⴰ ⴷ ⵓⵔⴳⴰⵢ.

ⵣⵣⵔⵉⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴽⵔⴰ ⵏ ⵜⵎⵓⴽⵔⵉⵙⵉⵏ ⵏ ⵓⴱⵟⵟⵓ ⵏ ⵓⵙⵏⴰⵍ, ⵖ ⵎⴰ ⴷ ⵉⵥⵍⵉⵏ ⵙ ⵓⵙⵡⵓⵜⵜⵓ ⵏ ⵡⵉⵍⵍⵉ ⵎⵓ ⵔⴰⴷ ⵉⵚⵉⵃⵉ ⵖ ⵉⴳⵔⴰⵏ ⵜⵜⵓⴹⵕⵕⴰⵏⵏⵉⵏ, ⵜⴰⵎⵓⴽⵔⵉⵙⵜ ⵍⵍⵉⵖ ⵉⴳⴳⵯⵔⴰ ⵓⴱⵟⵟⵓ ⵏ ⵓⵙⵏⴰⵍ ⵖ ⵢⵉⴳⵔ ⴰⴼⴰⵔⴰⵏ, ⴷ ⵚⴰⵃⴰ ⵉⴷⵔⵓⵙⵏ ⴷⴰⵔ ⵢⵉⴳⵔ ⵓⵚⴽⵉⵡ, ⴷ ⵜⵎⵔⴰⵔⵓⵜ ⴼ ⵉⵙⵎⵓⵎⵎⵓⵢⵏ. 

ⵉⵍⵍⴰ ⵓⵍⴰ ⵓⵣⵣⵓⵔⴰⵢ ⵏ ⵓⵙⵓⵔⵙ ⵏ ⵜⵎⵙⵙⵏⵜⴰⵢ ⴷ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵜⵏⵉⴷⵉ, ⵡⵉⵍⵍⵉ ⴱⴰⵀⵔⴰ ⵜⵜⵓⴹⵕⵕⴰⵏⵉⵏ, ⵉⵍⵉⵏⵜ ⵜⵓⵜⵔⵉⵡⵉⵏ ⴰⴷ ⵜⵜⵓⴼⴽⵉⵏ ⵉⴼⵙⵙⴰⵢⵏ, ⴷ ⵉⴳⵔⴰⵏ ⵏ ⵓⵙⵉⴼⴹ ⵖ ⵍⵍⴰⵏ ⴽⵉⴳⴰⵏ ⵏ ⵉⵎⵙⵡⵓⵔⵉⵢⵏ, ⴷ ⵜⵣⵣⵓⵍⵉⵏ ⵉⵔⵡⴰⵙⵏ ⵜⵉⵏ ⵜⵙⵏⴰⵊⵊⴰⵢⵜ ⵍⵍⵉ ⴷ ⵉⵇⵇⴰⵏ ⵓⵅⵎⵎⴻⵎ ⵉⵥⵍⵉⵏ ⵖ ⵜⵉⵣⵉ ⵏ ⵜⴰⵙⵙⴰⵙⵜ ⴰⴷ, ⵎⵛⴰⵛⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵎⴰⵙ ⴱⴰⵀⵔⴰ ⵉⵜⵜⵓⴹⵕⵕⴰ ⵉⴳⵔ ⵏ ⵜⴼⵍⵍⴰⵃⵜ ⵙⵍⴰⵡⴰⵏ ⴰⴽⴽⵯ ⵜⵉⵎⵢⴰⵡⴰⵙⵉⵏ ⵜⵉⵏⴼⵍⴰⵃⵉⵏ ⵖ ⵓⴱⴰⵢⵢⵓⵕ ⵏ ⴽⵓⴼⵉⴷ 19. ⵖ ⵓⵎⵏⵉⴷ ⵏ ⵓⵣⵣⵔⴰⴼ, ⵖⵔⴰⵏ ⵉⴳⵎⴰⵎⵏ ⵉ ⵓⵙⵓⴼⵖ ⵏ ⵓⵙⵍⴳⵏ ⵉⵙⵏⵎⴰⵍⴰⵏ ⵜⴰⵣⵣⵓⵍⵉⵏ, ⵜⵉⵍⵉ ⵓⵍⴰ ⵜⴷⵉⵏⴰⵎⵉⵜ ⵜⴰⵣⵣⵔⴰⴼⵜ ⵙ ⵓⵙⵎⴰⵢⵏⵓ ⵏ ⵉⴹⵕⵉⵚⵏ ⴷ ⵓⵙⵓⴼⵖ ⵏ ⴽⵓ ⵉⴹⵕⵉⵚⵏ ⵣⴷⵉⵏⵉⵏ ⴷ ⵓⵖⴰⵎⵓⵙ ⴰⵏⴰⵎⵓⵏ ⴷ ⵓⴷⵓⵙⴰⵏ  ⵉ ⵡⵉⴷⴰ ⵙⵡⵓⵔⵉⵏⵉⵏ ⵖ ⴽⵔⴰ ⵏ ⵉⴳⵔⴰⵏ.

ⵙⴰⵡⵍⵏ ⵉⵎⵓⵔⴰ ⵏ ⵜⵎⵜⵜⵉ ⵓⵍⴰ ⴼ ⵉⵖⴰⵡⴰⵙⵏ ⵏ ⵜⵏⴱⴰⴹⵜ ⵥⵍⵉⵏⵉⵏ ⵙ ⵓⵙⵎⵓⵙⵙⵓ ⵏ ⵜⴷⵎⵙⴰ ⴷ ⵓⵣⵔⴰⵢ ⵏ ⵜⴰⵙⵙⴰⵙⵜ ⵏ ⵡⴰⵔⵡⵓⵔⵉ, ⵢⵉⵍⵉ ⵓⵙⵥⵕⴼ ⴷ ⵓⵍⵜⴰⵖ ⵏ ⵍⴰⴱⵏⴰⴽ ⴷ ⵓⵙⵓⵊⴷ ⵏ ⵜⵎⵙⵓⵜⵍⵉⵏ ⵏ ⵜⵡⵓⵔⵉⵡⵉⵏ ⵃⵎⴰ ⴰⴷ ⵜⵓⵔⵔⵉ ⵜⵓⴷⵔⵜ ⵉ ⵜⴷⵎⵙⴰ, ⵢⵉⵍⵉ ⵓⵃⵟⵟⵓ ⵏ ⵓⴼⵔⴰ ⴰⵏⴰⵎⵓⵏ, ⵙ ⵓⵙⴷⵓⵙ ⵏ ⵉⵎⵏⵣⴰⵢⵏ ⵏ ⵜⵡⵓⵔⵉ ⴷ ⵢⵓⵙⴰⵏ  ⴷ ⵓⵙⵎⵖⵔ ⵏ ⵜⴷⵓⵙⵉ ⴷ ⵜⴼⴰⵜⵉⵜ ⵜⴰⵣⵣⵓⵍⴰⵏⵜ ⵖ ⵉⴷⵖⴰⵔⵏ ⵏ ⵜⵡⵓⵔⵉ, ⴷ ⵓⵙⴷⵓⵙ ⵏ ⵓⴹⴼⵕ ⴷ ⵓⵙⵎⵎⵜⵔ ⵖ ⵢⵉⴳⵔ ⵏ ⵜⵡⵓⵔⵉ, ⴷ ⵓⵙⴷⵓⵙ ⵏ ⵜⵉⴹⴰⴼ ⵖ ⵢⵉⴳⵔ ⵏ ⵓⵙⵏⵙⵉ ⵏ ⵓⵣⵣⵔⴰⴼ ⵏ ⵜⵡⵓⵔⵉ ⴷ ⵓⵙⵡⵓⴷⴷⵓ ⴷ ⵓⵙⵎⴽⵍ ⵏ ⵉⵙⵎⵎⵓⵎⵢⵏ ⵍⵍⴰⵏⵉⵏ ⴷ ⵓⵙⴷⵓⵙ ⵏ ⵜⵉⴹⴰⴼ ⵜⴰⵣⵣⵔⴰⴼⵜ.