ⵜⴰⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵜⵣⵣⵔⵉ ⵉⵙⵡⵓⴷⴷⵓⵜⵏ ⵏ ⵜⵎⴰⵡⴰⵙⵜ ⵏ ⵓⵎⵢⴰⵡⴰⵣ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵢⵉⵙⴽⵉⵍ ⴷ ⵜⴰⵡⵊⴰ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ

ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵕⴰⵙ 03 ⵢⵓⵏⵢⵓ 2020 ⵜⴰⵙⵎⵓⵏⵉ ⵍⵍⵉ ⵜⵙⵙⵉⵅⴼ ⵎⴰⵙⵙⴰ ⵙⴰⵄⵉⴷⴰ ⴰⵢⵜ ⴱⵓⵄⵍⵉ ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙⴰ ⵊⴰⵎⵉⵍⴰ ⵍⵎⵚⵍⵍⵉ ⵜⴰⵎⴰⵡⵙⴰⵙⵜ ⵏ ⵓⵎⵢⴰⵡⴰⵣ ⴷ ⵜⴳⵎⵉ ⵜⴰⵏⴰⵎⵓⵏⵜ ⴷ ⵢⵉⵙⴽⵉⵍ ⴷ ⵜⴰⵡⵊⴰ, ⵉ ⵜⵖⵔⵉ ⵏ ⵜⵓⵜⵔⵉⵡⵉⵏ ⵏ ⵜⵔⵓⴱⴱⴰ ⵥⵍⵉⵏⵉⵏ ⵙ ⵉⵙⵡⵓⴷⴷⵓⵜⵏ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⴷ ⵜⵉⵕⵡⵉ ⵏⵏⵙⵏ ⴷ ⵉⴷⵔⵉⵣⵏ ⵏⵏⵙⵏ ⴼ ⴽⵓ ⵜⵉⴷⵓⵍⴰ ⵛⵃⴰⵏⵉⵏ ⵜⵜⵓⴹⵕⵕⴰⵏⵉⵏ.

ⵜⵙⵙⵏⵜⵉ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵜⴰⴳⵓⵔⵉ ⵏⵏⵙ ⵙ ⵓⵙⵎⵏⵉⴷ ⵏ ⴽⵓ ⵉⵙⵡⵓⴷⴷⵓⵜⵏ ⵉⵍⴰⵏ ⴰⴼⵔⵉⵙ ⴰⵏⴰⵎⵓⵏ  ⵍⵍⵉ ⵀⵎⵎⴰⵏⵉⵏ ⵜⵉⵎⵖⴰⵔⵉⵏ ⵖ ⵓⵙⵓⵔⵙ ⵉⵛⴷⴷⴰⵏ, ⴷ ⵓⵙⵏⴰⵍ ⵏ ⵜⴰⵣⵣⴰⵏⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵉⵛⴷⴷⴰⵏ, ⴷ ⵓⵙⵓⵔⵙ ⵏ ⵓⵎⵎⵓⵄⴹⵕ, ⴷ ⵡⵉⵍⵍⵉ ⵓⵔ ⵟⵟⴰⴼⵏⵉⵏ ⵜⴰⵣⴷⵓⵖⵜ, ⴷ ⵜⵎⵙⴽⴰⵔ ⵏ ⵓⴹⴼⵕ ⵍⵍⴰⵏⵉⵏ ⵉ ⵓⵣⵣⴳⵉⵔ ⵏ ⵓⵖⴰⵡⴰⵙ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.

ⵜⵙⴰⵡⵍ ⵎⴰⵙⵙⴰ ⵍⵎⵚⵍⵍⵉ ⴼ ⵜⵎⵙⴽⴰⵔ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵏⵏⵙ ⵍⵍⵉⵖ ⵉⵍⵍⴰ ⵓⵙⵉⵡⴹ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵖ ⴽⵓ ⵜⴰⵙⴳⵉⵡⵉⵏ ⵏ ⵜⵎⴰⵣⵉⵔⵜ ⵖ 20 ⵎⴰⵕⵚ ⵉⵣⵔⵉⵏ, ⵃⵎⴰ ⴰⴷ ⵜⵣⵣⵉⴳⵣⵜ ⵜⵏⴰⴼⵓⵜ ⵜⴰⴳⴷⵓⴷⴰⵏⵜ ⵖⵎⴽ ⴰⵏⵏ ⴷ ⵜⵏⵓⴼⴰ ⵜⵉⵏⴰⵎⵓⵏⵉⵏ ⵏ ⵢⵉⴳⵔ ⴰⵏⴰⵎⵓⵏ.

ⵖⵎⴽ ⵍⵍⵉ ⵜⵣⵣⵉⴳⵣ ⵜⵎⴰⵡⴰⵙⵜ ⵖ ⵓⴹⴼⵕ ⵏ ⵓⵙⵓⵔⵙ ⵏ ⵉⵏⵎⵓⵔⴰ ⴷⴰⵜ ⵏ ⵉⵎⵉⵣⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵜⵉⵏⵉ ⵜⵎⴰⵡⵙⴰⵙⵜ  ⵎⴰⵙ ⵜⵙⴽⵔ ⵜⵎⴰⵡⴰⵙⵜ, ⵖ ⵓⵎⵏⴰⴹ ⴰⴷ, ⵙ ⵓⵣⴷⴷⵓⵢ ⴷ ⵓⵎⵢⴰⵡⴰⵣ ⴰⵏⴰⵎⵓⵔ, ⵜⵉⵙⵏⵜⴰⵢⵉⵏ  ⴳⴳⵓⵜⵏⵉⵏ ⵉ ⵓⵃⵟⵟⵓ ⵏ ⵢⴰⵜ ⵜⴷⵓⵍⵉ ⵉⴳⴳⵓⵜⵏ ⵏ ⵎⵉⴷⴷⵏ ⵍⵍⴰⵏⵉⵏ ⵖ ⵓⵙⵓⵔⵙ ⵉⵛⵃⴰⵏ, ⵙ ⵜⵡⵉⵙⵉ ⴷ ⵜⵏⴱⴰⴹⵉⵏ ⵜⵉⴷⵖⴰⵔⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵙⵎⵓⵏⵉⵏ ⴷ ⵜⵙⴳⵉⵡⵉⵏ ⵢⴰⴹⵏⵉⵏ.

ⵜⴱⴷⴷ ⵜⵎⴰⵡⵙⴰⵙⵜ, ⵖ ⵓⵙⵎⵏⵉⴷ ⵏⵏⵙ, ⴼ ⵓⵙⵏⴰⵍ ⵍⵍⵉ ⵢⵉⵡⵙⵏ ⴰⴷ ⵜⵚⵉⵃⵉ ⵜⵉⵢⴰⴼⵓⵜ ⵉ 5 ⵏ ⵎⵍⵢⵓⵏ ⴷ 300 ⵏ ⵉⴼⴹ ⵏ ⵓⵏⵎⵓⵔⵉ, « ⴰⵢⵍⵍⵉ ⵉⵎⵎⴰⵍⵏ ⴰⴼⵔⴰⴽ ⵏ ⵜⵡⵉⵣⵉ ⴷ ⵓⵎⵛⴰⴱⴱⴰⴽ ⴰⵏⴰⵎⵓⵔ  ⵏⴳⵔ ⴽⵓ ⵉⴼⵔⴷⴰⵙ ⵏ ⵓⵎⴰⴷⴰⵏ ⴰⵎⵖⵔⵉⴱⵉ », ⵖⵎⴽ ⵏⵉⵜ ⵜⵏⵏⴰ ⵜⵎⴰⵡⵙⴰⵙⵜ.  

ⵖ ⵢⵉⴳⵔ ⵉⵥⵍⵉⵏ ⵙ ⵜⵎⵖⴰⵔⵜ, ⵜⵏⵏⴰ ⵎⴰⵙⵙⴰ ⵍⵎⵚⵍⵍⵉ ⵎⴰⵙ « ⵜⵙⴽⵔ ⵜⵎⴰⵡⴰⵙⵜ ⵖ ⵓⵣⵎⵣ ⵏ ⵓⵥⵍⴰⵢ ⴰⴷⵓⵙⴰⵏ ⵢⴰⵏ ⵓⵖⴰⵡⴰⵙ ⴰⵏⴰⵎⵓⵔ ⴰⵙⵉⴷⴼⴰⵏ ⵉ ⵓⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ, ⴷ ⵓⵙⵎⴰⵢⵏⵓ ⵏ ⵜⵙⵉⵍⴰ ⵜⴰⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ  ⵉ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⴷ ⵓⵙⵓⵊⴷ ⵏ ⵓⵏⵇⵇⵉⵙ ⴼ ⵓⵔⵣⵣⵓ ⴰⵏⴰⵎⵓⵔ ⵡⵉⵙ ⵙⵉⵏ ⴼ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ, ⴷ ⵓⵙⵓⵊⴷ ⵏ ⵓⵏⵇⵇⵉⵙ ⴼ ⵓⵙⵓⵔⵙ ⵏ ⵜⵎⵖⴰⵔⵜ ⵜⴰⵎⵖⵔⵉⴱⵉⵜ ⵙ ⵓⵟⵟⵓⵏⵏ, ⵖⵎⴽ ⴰⵏⵏ ⵓⵍⴰ ⴰⵙⴽⵔ ⵏ ⵓⵏⵇⵇⵉⵙ ⴼ ⵜⵢⴰⴼⵓⵜ ⵏ « ⵉⴽⵕⴰⵎ2 » ⵉ ⵓⵙⴳⴳⵯⴰⵙ ⵏ 2019, ⴷ ⵓⵙⵓⵊⴷ ⵏ ⵓⵖⴰⵡⴰⵙ ⵏ ⵓⵙⵎⵓⵜⵜⴳ ⵏ ⵉⵎⵙⵡⵓⵔⵉⵢⵏ ⵖ ⵡⴰⵎⵎⴰⵙⵏ ⵉⴳⵓⵜⵙⵎⵔⴰⴷⴰⵏⵏ ⵉ ⵜⵎⵖⴰⵔⵉⵏ.

ⵖ ⵉⴳⵔ ⵏ ⵓⵙⴱⴷⴷⵉ ⵏ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ  ⵖ ⵜⵉⵣⵉ ⵏ ⵓⴱⴰⵢⵢⵓⵕ, ⵜⴱⴷⵔ ⵜⵎⴰⵡⵙⴰⵙⵜ ⵎⴰⵙ « ⵍⵍⴰⵏ 63 ⵏ ⵡⴰⵎⵎⵙ ⵏ ⵓⵃⵟⵟⵓ ⵏ ⵜⵎⵖⴰⵔⵉⵏ ⵜⵓⵏⴳⵉⵙⵉⵏ  ⵏ ⵜⴽⵕⴹⵉ, ⵙ ⵜⴼⴰⴷⵉⵡⵉⵏ ⵏ ⵓⵙⵏⵓⴱⴳ ⴷ ⵓⵙⵣⴷⵖ ⵏ ⵡⴰⴷⴷⴰⴷⵏ  ⵍⵍⴰⵏⵉⵏ, ⵙ ⵓⵣⴷⴷⵓⵢ ⴷ ⵉⵎⵙⴽⴰⵔⵏ ⵉⴷⵖⴰⵔⴰⵏⵏ ⵉ ⵓⵃⵟⵟⵓ ⵏ ⵜⵎⵖⴰⵔⵉⵏ ⴷ ⵓⵙⵏⵖⵎⵙ ⴷ ⵓⴹⴼⵕ».

ⵖ ⵓⵎⵏⴰⴹ ⴰⴷ ⵏⵉⵜ, ⵜⵙⴰⵡⵍ ⵎⴰⵙⵙⴰ ⵍⵎⵚⵍⵍⵉ ⴼ ⵚⴰⵃⴰ ⵍⵍⵉ ⵉⵡⵉⵏⵜ ⵜⵎⵖⴰⵔⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵉⵛⴷⴷⴰⵏ, ⵖ ⵍⵍⴰⵏⵜ ⵜⵏⵓⴼⴰ ⵏ ⵓⵙⴼⵍⴷ ⵙ ⵜⵉⴳⴳⵓⴳⵜ ⴷ ⵓⵙⵉⴷⴼ ⵖ ⵜⴰⵡⵊⴰ ⵉ ⴽⵉⴳⴰⵏ ⵏ ⵜⵎⵖⴰⵔⵉⵏ ⵖ ⵓⵙⵓⵔⵙ ⵏ ⵡⴰⵙⵓⴽ ⴷ ⵜⵎⵖⴰⵔⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵏ ⵓⵎⵎⵓⵄⴹⵕ ⴷ ⵜⵓⵙⵙⴰⵔⵉⵏ ⵖ ⵜⵉⵣⵉ ⵏ ⵓⵥⵍⴰⵢ ⴰⴷⵓⵙⴰⵏ, ⵙ ⵓⵣⴷⴷⵓⵢ ⴷ ⵜⵏⴱⴰⴹⵉⵏ ⵜⵉⴷⵖⴰⵔⴰⵏⵉⵏ.

ⵖ ⵎⴰ ⴷ ⵉⵥⵍⵉⵏ ⵙ ⵓⵙⵏⴰⵍ ⵏ ⵜⴰⵣⵣⴰⵏⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵉⵛⵃⴰⵏ, ⵜⵎⵍⴰ ⴷ ⵜⵎⴰⵡⵙⴰⵙⵜ « ⴰⵖⴰⵡⴰⵙ ⵏ ⵜⵡⵓⵔⵉ ⵍⵍⵉ ⵜⵙⵔⵙ ⵜⵎⴰⵡⴰⵙⵜ ⵉⵡⴰⵜⵜⵙⵏ ⴰⴷ ⵜⵉⵍⵉ ⵢⴰⵜ ⵜⵣⴳⴰⵡⵜ ⵏ ⵜⵏⵓⴼⴰ ⴷ ⵓⵍⴳⴳⵓⴷ ⵖ ⵜⵎⵔⵙⴰⵍ ⵏ ⵓⵙⵏⵓⴱⴳ ⴰⵏⴰⵎⵓⵏ ⴷ ⵜⴰⵣⵣⴰⵏⵉⵏ ⵍⵍⴰⵏⵉⵏ ⵖ ⵡⴰⵙⵓⴽ, ⵙ ⵓⵙⴷⵓⵙ ⵏ ⵜⵏⵓⴼⴰ ⵏ ⵡⴰⴷⴰⵙ ⵙ ⵓⵙⵏⴰⵍ ⵏ ⵉⵙⵏⴼⴰⵔⵏ ⵏ ⵜⵎⵙⵎⵓⵏⵉⵏ ⵉⵡⴰⵜⵜⵙⵏ ⴰⵙⵎⴽⵍ ⵏ ⵉⴷⵔⵉⵣⵏ ⵉⵏⴰⵎⵓⵏⵏ ⵏ ⵓⵥⵍⴰⵢ ⴰⴷⵓⵙⴰⵏ, ⴷ ⵓⵙⵔⵓⵙ ⵏ ⵉⵎⴰⵙⵙⵏ ⵏ ⵜⵉⴹⴰⴼ ⵏ ⵓⴹⴼⵕ ⵉⵙⵓⵍⵏ ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⴰⵣⵣⴰⵏⵉⵏ ⵙⴳ ⵜⴽⵕⴹⵉ ⴷ ⵓⵙⵏⵓⴱⴳ ⵏ ⵜⴰⵣⵣⴰⵏⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵏ ⵡⴰⵙⵓⴽ, ⴷ ⵜⵏⴽⴷⴰ ⵏ ⵓⵙⵏⴰⵍ ⵍⵍⵉ ⴷ ⴷⵉⵙⵏ ⵢⵓⵙⴰⵏ ⵙ ⵓⵙⵓⵣⴷⵖ ⵏⵏⵙⵏ ⵏⵖ ⵙ ⵓⵙⵖⵓⵍ ⴷⴰⵔ ⵜⴰⵡⵊⵉⵡⵉⵏ ⵏⵏⵙⵏ ».

ⵖ ⵓⵎⵏⴰⴹ ⴰⴷ, ⵜⵏⵏⴰ ⵜⵎⴰⵡⵙⴰⵙⵜ ⵎⴰⵙ ⵉⵍⵍⴰ ⵓⵖⴰⵡⴰⵙ ⵏ ⵜⵡⵓⵔⵉ ⵏ ⵡⴰⵔⴰⵢ ⴷ ⵓⵃⵟⵟⵓ ⵏ ⵜⴰⵣⵣⴰⵏⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵉⵛⵃⴰⵏ ⵖ ⵓⴱⴰⵢⵢⵓⵕ ⵏ « ⴽⵓⴼⵉⴷ 19», ⴳⵉⵙ ⵜⴰⵣⴳⴰⵡⵜ ⵏ ⵜⵏⵓⴼⴰ ⴷ ⵓⵍⴳⴳⵓⴷ ⵉ ⵚⴰⵃⴰ ⵏ ⵜⴰⵣⵣⴰⵏⵉⵏ ⵖ ⵜⵎⵔⵙⴰⵍ ⵏ ⵓⵙⵏⵓⴱⴳ ⴰⵏⴰⵎⵓⵏ ⴷ ⵜⴰⵣⵣⴰⵏⵉⵏ ⵍⵍⴰⵏⵉⵏ ⵖ ⵓⵙⵓⵔⵙ ⵏ ⵡⴰⵙⵓⴽ. 

ⵖⵎⴽ ⵍⵍⵉ ⵜⵙⴰⵡⵍ ⵜⵎⴰⵡⵙⴰⵙⵜ ⴼ ⴽⵓ ⵉⵙⵡⵓⴷⴷⵓⵜⵏ ⵜⵜⵓⵙⴽⴰⵔⵏⵉⵏ ⵉ ⵓⵙⵏⴰⵍ ⵏ ⵡⵉⴷⴰ ⵍⵍⴰⵏⵉⵏ ⵖ ⵓⵙⵓⵔⵙ ⵏ ⵓⵎⵎⵓⵄⴹⵕ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵓⵙⴽⵔ ⵏ ⵢⴰⵏ ⵓⵙⵉⵜ ⴰⵍⵉⴽⵟⵕⵓⵏⵉ ⵉⵥⵍⵉⵏ ⵙ ⴽⵓⴼⵉⴷ 19, ⵉ ⵎⵉⴷⴷⵏ ⵍⵍⴰⵏⵉⵏ ⵖ ⵓⵙⵓⵔⵙ ⴰⴷ, ⴷ ⵓⵙⵀⵡⵏ ⵏ ⵜⴱⵔⵉⴷⵉⵏ ⵜⵉⵎⵙⵙⵓⴳⵓⵔⵉⵏ, ⴷ ⵓⵙⵎⴰⵢⵏⵓ ⵏ ⵜⵏⵓⴼⴰ ⵏ ⵓⵙⵉⴷⴼ ⵙ ⵜⵉⴳⴳⵓⴳⵜ, ⴷ ⵓⵙⵏⵜⵉ ⵖ ⵜⵡⵓⵔⵉ  ⵜⵎⵓⵟⵟⵓⵏⵜ ⵏ ⵜⵉⴽⴽⵉ ⵏ ⵓⵙⵍⴽⵉⵏ ⵏ ⵓⵎⵎⵓⵄⴹⵕ.

ⵖ ⵢⵉⴳⵔ ⵏ ⵓⵣⵣⵔⴰⴼ, ⵜⵏⵏⴰ ⵜⵎⴰⵡⵙⴰⵙⵜ, ⵎⴰⵙ ⵉⵜⵜⵓⵙⴽⴰⵔ ⵓⵙⵓⵊⴷ ⴷ ⵓⵙⵎⵏⵉⴷ ⵏ ⵜⵓⵏⵖⵉⵍⵜ ⵜⴰⵎⴰⵢⵏⵓⵜ ⵏ ⵓⵙⵍⴳⵏ ⵓⵟⵟⵓⵏ 45.18 ⵉⵥⵍⵉⵏ ⵙ ⵓⵙⵏⵎⴰⵍⴰ ⵏ ⵜⵣⵣⵓⵍⵜ ⵏ ⵜⵎⵙⵡⵓⵔⵉⵢⵉⵏ ⴷ ⵉⵎⵙⵡⵓⵔⵉⵢⵏ ⵉⵏⴰⵎⵓⵏⵏ.

ⵖ ⵓⵙⴼⵍⴷ ⵉ ⵜⵙⵓⵎⴰⵔ ⵏ ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⵎⵓⵔⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉⴳⵏⵙⴰⵙⵏ ⵏ ⵉⵎⵓⵔⴰ ⵏ ⵜⵎⵜⵜⵉ ⵖ ⵜⵙⵎⵓⵏⵉ ⴰⴷ, ⴼⴽⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵜⵓⴳⵜ ⵏ ⵜⴰⵏⵏⴰⵢⵉⵏ, ⵙⴷⴷⵉⴷⵏ ⵓⵍⴰ ⴼ ⵡⴰⵜⵉⴳ ⵏ ⵜⵖⵜⴰⵙⵉⵏ ⵍⵍⵉ ⵙⴽⵔⵏⵜ ⵜⵏⴱⴰⴹⵉⵏ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵙ ⵜⵏⴰⵔⴰ ⵉⵥⵉⵍⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ.

ⵖ ⵜⵎⵙⵓⵜⴰⵍ ⴰⴷ ⵥⵍⵉⵏⵉⵏ ⵍⵍⵉ ⵜⴷⴷⵔ ⵜⴳⵍⴷⵉⵜ, ⵖⵔⴰⵏ ⵉⵎⵓⵔⴰ ⵃⴰⴹⵕⵏⵉⵏ ⴰⴷ ⵉⵜⵜⵓⴼⴽⵉ ⵡⴰⵜⵉⴳ ⵉ ⵜⵎⵔⵙⴰⵍ ⵏ ⵓⵙⵏⵓⴱⴳ ⴰⵏⴰⵎⵓⵏ, ⵖⵎⴽ ⵍⵍⵉ ⵜⵍⵍⴰ ⵜⵖⵓⵔⵉ ⵉ ⵜⵎⴰⵡⴰⵙⵜ ⵉ ⵓⵃⵟⵟⵓ ⵏ ⵜⴰⵣⵣⴰⵏⵉⵏ ⵉⵎⵖⵔⵉⴱⵉⵢⵏ ⵍⵍⵉ ⵏⵏ ⵜⵜⵎⵔⴰⵏⵉⵏ ⵖ ⵉⴷⵖⴰⵔⵏ ⵉⵜⵜⵢⴰⵎⴰⵥⵏ ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵓⴼⴰⵏ ⴰⴷ ⵓⴹⵏⵏ ⵙ ⵓⴱⴰⵢⵢⵓⵕ, ⵢⵉⵍⵉ ⵓⵙⵓⵊⴷ ⵏ ⵜⵣⴷⴰⵔⵙⴽⵉⵡⵜ ⴷ ⵉⵎⴰⵙⵙⵏ ⵏ ⵓⵙⵏⵓⴱⴳ ⵏⵏⵙⵏ ⴷ ⵓⵙⵉⴷⴼ ⵏⵏⵙⵏ, ⴷ ⴰⴷ ⵉⴷⴷⵓ ⵓⵖⴰⵡⴰⵙ ⵏ ⵓⵙⵉⵥⴹⵕ ⴰⴷⵎⵙⴰⵏ ⵏ ⵜⵎⵖⴰⵔⵉⵏ ⵉ ⵜⵉⴷ ⵙⵡⵓⵔⵉⵏⵉⵏ ⵖ ⵉⴳⵔⴰⵏ ⵛⵃⴰⵏⵉⵏ.

ⵖⵎⴽ ⵍⵍⵉ ⵖⵔⴰⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⵉ ⵡⴰⵣⵣⴰⵣ ⵏ ⵓⵙⵓⵊⴷ ⵏ ⵉⵏⵇⵇⵉⵙⵏ ⴼ ⵜⴽⵕⴹⵉ ⵖ ⵓⴳⵯⵏⵙ ⵏ ⵜⴰⵡⵊⴰ ⴷ ⵜⴽⵕⴹⵉ ⵎⴳⴰⵍ ⵏ ⵜⵎⵖⴰⵔⵉⵏ  ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵓⵙⵎⴰⵢⵏⵓ ⵏ ⵓⵏⴳⵔⴰⵡ ⵉⵙⵡⴰⵜⵜⵙⵏ ⵜⵉⴷⵓⵍⴰ ⵛⵃⴰⵏⵉⵏ ⵙ ⵓⵣⵎⵎⴻⵎ ⴰⵏⴰⵎⵓⵏ ⵉⵎⵓⵏⵏ.