ⵜⴰⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵜⵣⵣⵔⵉ ⵉⵙⵡⵓⴷⴷⵓⵜⵏ ⵏ ⵜⵎⴰⵡⴰⵙⵜ ⵏ ⵜⵙⴱⴷⴰⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⵖ ⵓⵣⵎⵣ ⵏ ⴽⵓⵕⵓⵏⴰ

ⵜⵙⵏⵎⵍⴰⵍ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⴽⵡⴰⵙ 28 ⵎⴰⵢⵢⵓ 2020, ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵎⴰⵙⵙ ⵢⵓⵙⵓⴼ ⵖⴰⵔⴱⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙ ⴰⵃⵎⴰⴷ ⵜⴰⵡⴼⵉⵇ, ⴰⵎⴰⵡⵙⴰⵙ ⵏ ⵜⵙⴱⴷⴰⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ, ⵉ ⵜⵖⵔⵉ ⵏ ⵉⵎⵔⵙⵉ ⵏ ⵉⵙⵡⵓⴷⴷⵓⵜⵏ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵉ ⵓⵙⵙⵍⵖⵜ ⵏ ⴽⵓ ⵜⵉⵍⴰⵍ ⵍⵍⵉ ⴼ ⵜⵍⵍⴰ ⵙⵍⴰⵡⵏ ⴰⴽⴽⵯ ⵎⴰ ⴷ ⵉⵥⵍⵉⵏ ⵙ ⵓⵙⵏⴰⵍ ⴷ ⵓⵙⴷⵓⵙ ⵏ ⵓⵜⵓⵢ ⴰⵙⴳⴷⴰⵏ ⵏ ⵉⵏⵎⵓⵔⴰ ⵖ ⵓⵣⵎⵣ ⵏ ⵓⴱⴰⵢⵢⵓⵕ ⴰⴷ.

ⵉⵙⴷⴷⵉⴷ ⵎⴰⵙⵙ ⴰⵃⵎⴰⴷ ⵜⴰⵡⴼⵉⵇ, ⴰⵎⴰⵡⵙⴰⵙ ⵏ ⵜⵙⴱⴷⴰⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ, ⵖ ⵓⵙⵎⵏⵉⴷ ⵏⵏⵙ ⵎⴰⵙ ⵔⴰⴷ "ⵜⵜⵓⵕⵥⵉⵎⵏⵜ ⵜⵎⵣⴳⵉⴷⵉⵡⵉⵏ ⵉ ⵉⵎⵥⵥⴰⵍⵍⴰⵏ ⵉⵖ ⵜⵍⵍⴰ ⵜⵖⵜⴰⵙⵜ ⵏ ⵜⵏⴱⴰⴹⵉⵏ ⵜⵉⵎⵥⵍⴰⵢ ⵙ ⵓⵖⵓⵍ ⵏ ⵡⴰⴷⴷⴰⴷ ⴰⴷⵓⵙⴰⵏ ⵙ ⵡⴰⴷⴷⴰⴷ ⵏⵏⵙ ⴰⴳⴰⵎⴰⵏ".

ⵉⵙⵉⵙⴼⵉⵡ ⵎⴰⵙⵙ ⵜⴰⵡⴼⵉⵇ ⵎⴰⵙ "ⵜⵉⵡⵙ ⵜⵙⵇⵇⵉⵎⵜ ⵏ ⵜⵙⴱⴷⴰⴷⵉⵏ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⵙⴳ ⵜⵣⵡⵉⵔⵉ ⵖ ⵜⵙⵇⵇⵉⵎⵉⵏ ⵏ ⵓⴹⴼⵓⵕ, ⵜⵙⴽⵔ ⵉⵙⵡⵓⴷⴷⵓⵜⵏ  ⵉⴷⵓⵙⴰⵏⵏ ⵉ ⵓⵙⴱⴷⴷⵉ  ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⵙ ⵡⴰⵔⵔⴰⵙ ⴷ ⵓⵙⵉⵣⴷⴳ ⵏ ⵜⵎⵣⴳⵉⴷⵉⵡⵉⵏ ⴷ ⵓⵔⴳⴰⵍ ⵏⵏⵙⵏⵜ".

ⵖ ⵜⵎⵙⴽⴰⵔ ⴷ ⵉⵙⵡⵓⴷⴷⵓⵜⵏ ⵍⵍⵉ ⵜⵙⴽⵔ ⵜⵎⴰⵡⴰⵙⵜ ⵉ ⵓⵙⴱⴷⴷⵉ ⵏ ⵓⵙⴼⵔⵓⵔⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵍⵍⴰ ⵓⵔⴳⴰⵍ ⵏ 52 ⵏ ⵉⴼⴹ ⵏ ⵜⵎⵣⴳⵉⴷⵉⵡⵉⵏ  ⴷ 1500 ⵏ ⵣⵣⴰⵡⵉⵜ ⴷ 5000  ⵏ ⵓⵙⵎⴹⵍ, ⴷ 300 ⵏ ⵜⵎⵔⵙⵍⵜ ⵏ ⵓⵙⵙⵍⵎⴷ ⴰⵇⴱⵓⵔ ⴷ 14 ⵏ ⵉⴼⴹ ⵏ ⵜⵉⵏⵎⵍ ⵏ ⵓⵙⵙⵍⵎⴷ ⵏ ⵍⵇⵓⵔⴰⵏ, ⵖⵎⴽ ⴰⵏⵏ ⴷ ⵡⴰⵎⵎⴰⵙⵏ ⵏ ⵜⵎⵙⵉⵔⵉⵏ ⵏ ⵓⵙⵉⵜⵜⵉ ⵏ ⵜⵄⴰⵎⵉⵜ ⵖ 7077 ⵏ ⵜⵎⵣⴳⵉⴷⴰ, ⴷ ⵉⵙⵉⵏⴰⴳⵏ ⵏ ⵜⵙⴷⴰⵡⵉⵜ ⵏ ⵍⵇⴰⵔⴰⵡⵉⵢⵢⵉⵏ ⴷ ⵎⴰ ⴷ ⵉⵥⵍⵉⵏ ⵙ ⵜⵎⵔⵙⵍⵜ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵉⵎⴰⵙⵙⴰⵏⵏ ⵉⴼⵔⵉⵇⵉⵢⵏ ⴷ ⵜⵉⵍⴰⵍⵜ ⵏ ⵜⵎⵔⵙⵍⵜ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ ⵉ ⵉⵎⵙⵡⵓⵔⵉⵢⵏ ⵉⵙⴳⴷⴰⵏⵏ.

ⵖⵎⴽ ⵍⵍⵉ ⵉⵍⵍⴰ ⵓⵙⴱⴷⴷⵉ ⵏ ⵉⵏⵎⵓⵇⵇⴰⵔⵏ ⵉⵙⴳⴷⴰⵏⵏ ⴰⵛⴽⵓ ⴰⵔ ⵉⵣⵣⵉⴳⵉⵣ ⵓⴱⴰⵢⵢⵓⵕ ⵙ ⵡⴰⴷⴰⵙ, ⵉⴳ ⵡⴰⵔⴳⴰⵍ ⵏ ⵜⵎⵣⴳⵉⴷⵉⵡⵉⵏ ⴰⵙⵎⵀⵍ ⵏ ⵍⴼⴰⵜⵡⴰ ⵍⵍⵉ ⵉⵜⵜⵔ ⵓⴳⵍⴷⵓⵏ ⵏ ⵉⵎⵓⵎⵏⵏ ⵖ ⵓⵙⵇⵇⵉⵎ ⴰⵎⴰⵙⵙⴰⵏ ⴰⵏⴰⴼⵍⵍⴰ. ⵉⵍⵍⴰ ⵓⵙⵏⵏⵉⵔⵙ ⵏ ⵉⵏⵎⵓⵔⴰ ⵎⴰⵙ ⵓⵔ ⵜⵙⵓⵍ ⵜⵎⵙⴽⵔⵜ ⵏ ⵓⵔⴳⴰⵍ, ⴷ ⵔⴰⴷ ⵜⵉⵍⵉ ⵜⵥⴰⵍⵍⵉⵜ ⵖ ⵜⵎⵣⴳⵉⴷⵉⵡⵉⵏ ⵉⵖ ⵀⵍⵍⵉ ⵜⵍⵍⴰ ⵜⵖⵜⴰⵙⵜ ⵏ ⵜⵏⴱⴰⴹⵉⵏ ⵜⵉⵎⵥⵍⴰⵢ ⵙ ⵓⵖⵓⵍ ⵏ ⵡⴰⴷⴷⴰⴷ ⴰⴷⵓⵙⵏ ⵙ ⵡⴰⴷⴷⴰⴷ ⵏⵏⵙ ⴰⴳⴰⵎⴰⵏ.

ⵖ ⵉⵙⵡⵓⴷⴷⵓⵜⵏ ⵢⴰⴹⵏⵉⵏ ⵜⵜⵓⵙⴽⴰⵔⵏⵉⵏ, ⵉⵏⵏⴰ ⵎⴰⵙⵙ ⴰⵃⵎⴰⴷ ⵜⴰⵡⴼⵉⵇ ⵎⴰⵙ "ⵜⴼⴼⵖ ⵜⵎⴰⵡⴰⵙⵜ ⴰⴷ ⵢⵉⵍⵉ ⵓⵙⵏⴰⵍ ⵏ ⵜⴻⵜⵉⵇⵏⵉⵢⵉⵏ ⵙ ⵜⵉⴳⴳⵓⴳⵜ ⵉ ⵚⴰⵃⴰ ⵏ ⵜⵉⵏⵎⴰⵍ ⵏ ⵓⵙⵙⵍⵎⴷ ⴰⵇⴱⵓⵔ, ⴷ ⵓⵍⵜⴰⵖ ⵖ ⵓⵙⵎⵓⵙⵙⵓ ⴰⵏⴰⵎⵓⵔ ⵙ ⵜⵡⵉⵣⵉ ⵏ ⵉⵎⵙⵖⴰⵏⵏ ⵏ ⵜⵎⴰⵡⴰⵙⵜ ⵖ ⵓⴼⵏⵉⵇ ⵏ ⵓⵙⵡⵓⴷⴷⵓ ⴷ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵖⵎⴽ ⴰⵏⵏ ⴷ ⵜⵖⵜⴰⵙⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵓⵙⵓⵔⴼ ⵉ ⵉⴽⵔⵔⴰⵢⵏ ⵏ ⵉⴷⵖⴰⵔⵏ ⵏ ⵍⴰⵃⴱⴰⵙ ⵖ ⵓⴼⵔⵔⵓ ⵏ ⵜⵖⵓⵏⵉⵏ  ⵏ ⵉⵖⵓⴼⴰⵔ".

ⵖ ⵎⴰ ⴷ ⵉⵥⵍⵉⵏ ⵙ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ, ⵉⵥⵍⵉ ⵓⵙⴰⵔⵓ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵍⵇⵓⵔⴰⵏ ⵍⴽⴰⵔⵉⵎ ⴰⴷⵖⴰⵔ ⵖ ⵓⵙⵖⵉⵡⵙ ⵏⵏⵙ ⵉ ⵓⵣⵓⵣⵣⵔ ⵏ ⵉⵙⵓⵢⴰⵙ ⵥⵍⵉⵏⵉⵏ ⵙ ⵉⵏⵎⵓⵔⴰ ⴰⴷ, ⵍⵍⵉⵖ ⵓⵔ ⵓⴼⵉⵏ ⵟⵟⵍⴱⴰ ⴷ ⵉⵎⴰⵏⴰⵔⵏ ⵉⵙⴳⴷⴰⵏⵏ ⴰⴷ ⵎⵎⵓⴷⴷⵓⵏ ⵙ ⵜⵎⵉⵣⴰⵔ ⵏ ⴱⵕⵕⴰ ⵍⵍⵉⵖ ⵜⵍⵍⴰ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ.

ⵙ ⵓⵣⵎⵎⵣⵓ ⴰⴷ, ⵙⵓⵜⴳⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵉⴳⵏⵙⴰⵙⵏ ⵏ ⵉⵎⵓⵔⴰ ⵏ ⵜⵎⵜⵜⵉ ⵖ ⵜⵙⵎⵓⵏⵉ ⴰⴷ ⵜⵓⴳⴳⴰⵙ ⵜⵉⵏⴰⵎⵓⵔⵉⵏ ⵍⵍⵉ ⴳⴰⵏⵉⵏ ⵢⴰⵏ ⵓⵎⴷⵢⴰ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵎⵍⵉⵏ ⴷ ⵉⴷ ⵎⴰⵙⵙ ⵉⵎⵓⵔⴰ ⴰⵙⵓⵜⴳ ⵏⵏⵙⵏ ⴰⵅⴰⵜⴰⵔ ⵏ ⵓⵎⵏⴰⴷ ⵏ ⵓⵙⵉⵣⵡⵔ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⴷ ⵜⵖⵜⴰⵙⵉⵏ ⵉⵍⴰⵏ ⴰⴼⵔⵉⵙ ⴰⵏⴼⴳⴰⵏ ⴰⵎ ⴰⵙⵓⵔⴼ ⵉ ⵉⴽⵔⵔⴰⵢⵏ ⵏ ⵉⴷⵖⴰⵔⵏ ⵏ ⵍⴰⵃⴱⴰⵙ ⵖ ⵓⴼⵔⵔⵓ ⵏ ⵜⵖⵓⵏⵉⵏ ⵏ ⵉⵖⵓⴼⴰⵔ.

ⵖⵎⴽ ⵍⵍⵉ ⵏⵏⴰⵏ ⵉⴷ ⵎⴰⵙⵙ ⵉⵎⵓⵔⴰ ⵎⴰⵙ ⵜⴳⴰ ⵜⵙⵎⵓⵏⵉ ⴰⴷ ⴰⵣⵎⵣⵣⵓ ⵏ ⵓⵙⵏⴼⵍ ⵏ ⵉⵙⵡⵉⵏⴳⵉⵎⵏ ⴷ ⵜⵙⵓⵎⴰⵔ ⵥⵍⵉⵏⵉⵏ ⵙ ⵓⵙⵖⵔⵜ ⵏ ⵢⵉⴳⵔ ⴰⵙⴳⴷⴰⵏ, ⴷ ⵓⵜⵓⵢ ⵏ ⵜⵎⵣⴳⵉⴷⵉⵡⵉⵏ, ⴷ ⵓⵙⵖⵓⴷⵓ ⵏ ⵓⵙⵎⵓⵜⵜⴳ ⴷ ⵓⵙⵖⵓⴷⵓ ⵏ ⵓⵎⵢⴰⵡⴰⴹ ⴰⵎⵔⵙⵍⴰⵏ ⴰⵎⵓⵟⵟⵓⵏ ⵏ ⵜⵎⴰⵡⴰⵙⵜ.

ⵖ ⵢⵉⴳⵔ ⵏ ⵜⵏⴼⵔⵓⵜ ⵜⴰⵙⴳⴷⴰⵏⵜ ⵏ ⵉⵎⵖⵔⴰⴱⵉⵢⵏ, ⵏⵏⴰⵏ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⴽⵔ ⵙ ⵍⴼⴰⵜⴰⵡⴰ ⴷ ⵉⵎⵏⴰⴷⵏ ⵍⵍⵉ ⵜⵜⵉⵏⵉⵏⵜ ⵜⵎⵔⵙⴰⵍ ⵜⵓⵏⵚⵉⴱⵉⵏ, ⵉⵏⵉⵏ ⵎⴰⵙ ⴷ ⵉⵇⵇⴰⵏ ⵓⵍⴰ ⴰⴷ ⵢⵉⵍⵉ ⵓⵙⴼⵔⴽ ⵏ ⵉⵏⵎⵓⵔⴰ ⵉⵎⵖⵔⴰⴱⵉⵢⵏ ⵙ ⵜⵉⵍⴰⵍ ⵍⵍⵉ ⵙⴽⴰⵔⵏⵜ ⵜⵎⵔⵙⴰⵍ ⴰⴷ ⵖ ⵢⵉⴳⵔ ⴰⵙⴳⴷⴰⵏ.

ⵖ ⵓⵎⴹⴰⴽⴰⵕ ⴷ ⵎⴰⵙⵙ ⴰⵃⵎⴰⴷ ⵜⴰⵡⴼⵉⵇ, ⵉⵍⵍⴰ ⵡⴰⵡⴰⵍ ⴼ ⴽⵔⴰ ⵏ ⵜⵙⴰⵡⵔⵉⵏ  ⵍⵍⵉ ⵜⵙⵡⵓⴷⴷⵓ ⵜⵎⴰⵡⴰⵙⵜ ⴰⵎ ⴰⵏⵎⵓⵇⵇⴰⵔ ⵏ ⵍⵃⵉⵊⵊ ⵉ ⵓⵙⴳⴳⵯⴰⵙ ⴰⴷ, ⴷ ⵓⵙⵡⵓⴷⴷⵓ ⵏ ⵜⴼⵓⴳⵍⴰ ⵏ ⵜⴼⴰⵙⴽⴰ, ⴷ ⵓⵙⵏⵎⴰⵍⴰ ⵏ ⵣⵣⴽⴰ.

ⵖ ⵉⵎⵔⵙⵉ ⵏ ⵍⵃⵉⵊⵊ, ⵉⵙⴷⴷⵉⴷ ⵎⴰⵙⵙ ⵜⴰⵡⴼⵉⵇ:" ⵓⵔ ⴷⴰⵔⵏⵖ ⴽⵔⴰ ⵏ ⵜⵎⴰⵜⴰⵔⵜ ⵏⵖ ⴰⵙⵉⵡⴹ ⴰⵎⴰⴷⴷⵓⴷ ⵖⵔ ⵜⵎⴰⵡⴰⵙⵜ ⵜⴰⵙⴰⵄⵓⴷⵉⵜ ⵏ ⵍⵃⵉⵊⵊ ⴼ ⴰⵢⵍⵍⵉ ⵔⴰⴷ ⵉⵊⵕⵓ ⵖ ⵓⵙⵙⴰⵏ ⴷ ⵓⵛⴽⴰⵏⵉⵏ, ⵖ ⵡⴰⵢⵢⵓⵔ ⵏ ⵎⴰⵕⵚ ⵜⵍⴽⵎ ⴰⵖ ⴷ ⵜⴱⵔⴰⵜ ⵏ ⵓⵎⴰⵡⵙⴰⵙ ⵏ ⵍⵃⵉⵊⵊ ⴰⵙⴰⵄⵓⴷⵉ ⵖ ⵉⵜⵜⵔ ⴰⴷ ⵓⵔ ⵢⵉⵍⵉ ⵓⵙⴳⵎⴹ ⵏ ⵜⵎⵖⵓⵏⵉⵏ", ⵉⵙⴷⴷⵉⴷ :"ⴰⵔ ⵖⵉⵍⴰⴷ ⵓⵔⵜⴰ ⵏⵙⴳⵎⴹ ⵜⵉⵎⵖⵓⵏⵉⵏ ⵣⴷⵉⵏⵉⵏ ⵙ ⵓⵣⴷⴷⵓⵖ ⴷ ⵜⵉⵔⴰⵎ ⴷ ⵡⴰⵙⵙⴰⵢ ⴰⴳⵯⵏⵙⴰⵏ", ⵢⵉⵏⵓ ⵓⵍⴰ ⵎⴰⵙ ⴷ" ⵍⵃⵉⵊⵊ ⴰⵔ ⵉⵜⵜⵉⵍⵉ ⵙ ⵜⵓⴳⵜ ⵏ ⵜⵎⵙⴽⴰⵔ ⵉⵜⵜⴰⵡⵉⵏ ⵜⵉⵣⵉ, ⴷ ⵜⵡⵓⵔⵉ ⴰⴷ ⵜⵥⵍⵉ ⵙ ⵜⵖⵜⴰⵙⵜ ⵏ ⵜⵏⴱⴰⴹⵉⵏ ⵏ ⵙⵙⴰⵄⵓⴷⵉⵢⵢⴰ".

ⵖ ⵜⴼⵓⴳⵍⴰ ⵏ ⵜⴼⴰⵙⴽⴰ, ⵉⵏⵏⴰ ⵎⴰⵙⵙ ⴰⵎⴰⵡⵙⴰⵙ ⵎⴰⵙ ⵉⴳⴰ ⵜⵖⴰⵡⵙⴰ ⵜⴰⵎⵏⵣⵓⵜ ⴰⴷ ⵢⵉⵍⵉ ⵡⴰⵡⴰⵍ ⴼ ⵜⴼⵓⴳⵍⴰ, "ⴰⵛⴽⵓ ⴰⵡⴷ ⵢⴰⵏ ⵓⵔ ⵉⵙⵙⵉⵏ ⵎⴰⵎⵏⴽ ⵙ ⵔⴰⴷ ⵣⵣⵉⴳⵣⵏⵜ ⵜⵖⴰⵡⵙⵉⵡⵉⵏ".

ⵖ ⵎⴰ ⴷ ⵉⵥⵍⵉⵏ ⵙ ⵣⵣⴽⴰ, ⵉⴱⴷⵔ ⵎⴰⵙⵙ ⴰⵎⴰⵡⵙⴰⵙ ⵜⵉⵡⵉⵣⵉ ⵍⵍⵉ ⴷ ⵎⵍⴰⵏ ⵉⵎⵖⵔⴰⴱⵉⵢⵏ ⵖ ⵜⴰⵙⵙⴰⵙⵜ ⴰⴷ, ⵉⵙⴷⴷⵉⴷ ⵎⴰⵙ ⵜⴳⴰ " ⵜⵎⵙⴰⵔⵜ ⵏ ⵣⵣⴽⴰ ⴰⵎ ⵜⵉⵏ ⵜⵥⴰⵍⵍⵉⵜ, ⴰⵔ ⵜⵜ ⵢⴰⴽⴽⴰ ⵓⴼⴳⴰⵏ ⵙ ⴰⵢⵍⵍⵉ ⴷ ⵢⵉⵡⵉ ⵛⵛⵕⵄ, ⴰⵙⵏⵎⴰⵍⴰ ⵏⵏⵙ ⵉⴳⴰ ⵢⴰⵜ ⵜⵖⴰⵡⴰⵙ ⵉⵍⵍⴰⵏ ⵖ ⵓⴼⵓⵙ ⵏ ⵓⴳⵍⴷⵓⵏ ⵏ ⵉⵎⵓⵎⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵖ ⵜⵉⵣⵉ ⴷ ⵜⵎⴰⵎⴽⵜ ⴷ ⵢⵓⵙⴰⵏ”.

ⵉⵍⵇⵇⵎ ⵢⵉⵏⵉ:"ⵙⴳ ⵢⴰⵜ ⵜⵉⵣⵉ ⴰⴷ ⴰⵖ ⵉⵏⵏⴰ ⵓⴳⵍⴷⵓⵏ ⵏ ⵉⵎⵉⵎⵏⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵏⵙⵓⵊⵉⴷ ⵜⵉⵜⴳⴰⵔⵉⵏ ⴷ ⵉⵎⵏⵉⴷⵏ ⵥⵍⵉⵏⵉⵏ ⵙ ⵣⵣⴽⴰ ⴷ ⵢⴰⵏ ⵓⵎⴰⵏⴰⵔ ⵙⵔⵙ ⵉⵥⵍⵉⵏ, ⵖⵉⵍⴰⴷ ⵍⵍⴰⵏⵜ ⵜⴻⵜⴳⴰⵔⵉⵏ ⴰⴷ", ⵉⵙⴷⴷⵉⴷ ⵎⴰⵙ ⵔⴰⴷ "ⵉⴼⴽ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⵏⴰⴹⵜ ⵖ ⵓⵙⵏⵎⴰⵍⴰ ⵏ ⵜⵎⴰⵎⴽⵜ ⵏⵏⵙ ⵍⵍⵉ ⵙ ⵉⵥⵕⴰ ⵎⴰⵙ ⵜⵍⵍⴰ ⴷ ⵛⵛⵕⵄ ⴷ ⵍⵉⵊⵜⵉⵀⴰⴷ”.