ⵜⴰⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⵜⵣⵣⵔⵉ ⴼ ⵉⴷⵔⵉⵣⵏ ⵏ ⵜⵣⵣⵉⴳⵣⵜ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴷ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵏ ⵓⵙⴱⴷⴷⵉ ⵏⵏⵙⵏ
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ ⵖ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵡⴰⵢⵏⴰⵙ 4 ⵎⴰⵢⵢⵓ 2020, ⵜⴰⵙⵎⵓⵏⵉ ⵍⵍⵉ ⵉⵙⵙⵉⵅⴼ ⵎⴰⵙⵙ ⵙⴰⵄⵉⴷ ⵛⴱⴰⵄⵜⵓ ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ, ⵙ ⵜⵉⵍⵉⵜ ⵏ ⵎⴰⵙⵙⴰ ⵏⴰⴷⵢⴰ ⴼⵜⵜⴰⵃ ⵜⴰⵎⴰⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵏⵉⴹⵉ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⴷ ⵜⴷⵎⵙⴰ ⵜⴰⵏⴰⵎⵓⵏⵜ, ⵜⵥⵍⵉ ⵉ ⵜⵖⵔⵉ ⵏ ⵜⵓⵜⵔⵉⵡⵉⵏ ⵏ ⵜⵔⵓⴱⴱⴰ ⵣⴷⵉⵏⵉⵏ ⴷ ⵉⴷⵔⵉⵣⵏ ⵏ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⵉⵙⵡⵓⴷⴷⵓⵜⵏ ⴷ ⵜⵎⵙⴽⴰⵔ ⵉⵍⵍⴰⵏ ⵉ ⵓⵙⴱⴷⴷⵉ ⵏⵏⵙⵏ.
ⵜⵙⴰⵡⵍ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵖ ⵜⴽⵛⵛⵓⵎⵜ ⵏⵏⵙ ⴼ ⵓⵖⴰⵡⴰⵙ ⵏ ⵜⵡⵓⵔⵉ ⵍⵍⵉ ⵜⵙⴽⵔ ⵜⵎⴰⵡⴰⵙⴰⵜ ⵃⵎⴰ ⴰⴷ ⵜⵓⵔⵔⵉ ⵜⵓⴷⵔⵜ ⵉ ⵜⵉⵍⴰⵍⵜ ⵏ ⵜⵎⴰⵍⵍⴰⵢⵜ. ⵙⴳ ⵎⵏⵏⴰⵡ ⵉⵎⴰⵍⴰⵙⵙⵏ, ⵜⵍⵍⴰ ⵜⵡⵓⵔⵉ ⴼ ⵓⵙⴷⵓⵙ ⵏ ⵓⵔⵣⵣⵓ ⴷ ⵓⵙⵎⵓⵏ ⵏ ⵜⵎⵓⵛⴰ ⵎⵓ ⵔⴰⴷ ⵉⵜⵜⵓⵙⴽⵉⵔ ⵓⵙⴼⵙⵉ, ⵉⵍⵉⵏ ⵓⵍⴰ ⵉⵏⵇⵇⵉⵙⵏ ⵍⵍⵉ ⵔⴰⴷ ⵉⵍⴽⵎ ⵜⴰⵙⵇⵇⵉⵎⵜ ⵏ ⵜⵉⴹⴰⴼ ⵜⴰⴷⵎⵙⴰⵏⵜ.
ⵜⵏⵏⴰ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⵜⴼⵔⴽ ⵜⵙⵇⵇⵉⵎⵜ ⵏ ⵜⵉⴹⴰⴼ ⵜⴰⴷⵎⵙⴰⵏⵜ ⵉⵙ ⵉⵙⵖⴰⵡⵙⴰ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⵉ ⵓⵙⵏⴰⵍ ⵃⵎⴰ ⴰⴷ ⵓⵔ ⴱⴷⴷⵏⵜ ⵜⵎⵙⵙⵓⵔⵉⵏ ⵏ ⵢⵉⴳⵔ ⴰⴷ, ⵢⵉⵍⵉ ⵓⵃⵟⵟⵓ ⵏ ⵜⵣⵣⵓⵍⵉⵏ, ⵖ ⵜⵉⵣⵉ ⵖ ⵜⵜⵓⴹⵕⵕⴰⵏⵜ ⴱⴰⵀⵔⴰ ⵙ ⵓⴱⴰⵢⵢⵓⵕ.
ⵜⵏⵏⴰ ⵎⴰⵙⵙⴰ ⵜⴰⵎⴰⵡⵙⴰⵙⵜ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵓⵙⵙⵔⵇⴱ ⵏ ⵜⵎⴰⵍⵍⴰⵢⵜ ⵜⴰⴳⵯⵏⵙⴰⵏⵜ ⵉⵍⵉⵏⵜ ⵜⵓⴳⴳⴰⵙ ⵃⵎⴰ ⴰⴷ ⴷⴰⵖ ⵉⴱⵓⵖⵍⵓ ⵢⵉⴳⵔ ⵏ ⵡⴰⵙⵙⴰⵢ ⵏ ⵉⴳⵏⵏⴰ, ⵢⵉⵍⵉ ⵓⵎⵣⵉⵣⵣⵍ ⴰⵎⵓⵟⵟⵓⵏ ⵏ ⵓⵙⵉⵙⵙⵏ ⵃⵎⴰ ⴰⴷ ⵜⵣⵔⵉ ⵜⴰⵙⵙⴰⵙⵜ ⵖ ⵉⵍⵍⴰ ⵢⵉⴳⵔ ⴰⴷ. ⵖⵎⴽ ⴰⵏⵏ ⴷ ⵓⵙⵏⴰⵍ ⵏ ⵉⴷ ⴱⴰⴱ ⵏ ⵜⵡⵓⵔⵉ ⵖ ⵢⵉⴳⵔ ⴰⴷ, ⴰⴷ ⴷⴰⵔⵙⵏ ⵉⵍⵉⵏ ⵡⴰⵎⵎⴰⴽⵏ ⵉⵎⵓⵟⵟⵓⵏⵏ. ⵉⵇⵇⴰⵏ ⴷ ⵓⵍⴰ ⴰⴷ ⵉⵍⵉⵏⵜ ⵜⵥⵉⴹⴰⵕ ⵍⵍⵉ ⵔⴰⴷ ⵉⵙⵙⵉⴷⵔ ⵉⴳⵔⴰ ⴰⴷ ⵉⵎⵉⴽ ⵙ ⵉⵎⵉⴽ, ⵜⵉⵎⵖⵓⵔ ⵓⵍⴰ ⵜⵣⵎⵔⵜ ⵏ ⵜⵎⵣⴳⵓⵔⵉⵢⵜ ⵏ ⵜⴳⵍⴷⵉⵜ ⴰⴼⴰⴷ ⴰⴷ ⵢⵉⵍⵉ ⵚⴰⵃⴰ ⵖ ⵓⵙⵓⵎⵍ ⵏ ⵍⵎⵖⵔⵉⴱ ⴰⴷ ⴷ ⵢⴰⵡⵉ ⵉⵎⴰⵍⵍⴰⵢⵏ ⵉⵖ ⵉⵣⵔⵉ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ.
ⵜⵙⵙⵉⵙⴼⵉⵡ ⵎⴰⵙⵙⴰ ⵜⴰⵎⵡⵙⴰⵙⵜ ⵏ ⵜⵎⴰⵍⵍⴰⵢⵜ ⴷ ⵜⵏⵉⴹⵉ ⴷ ⵡⴰⵙⵙⴰⵢ ⵏ ⵉⴳⵏⵏⴰ ⴷ ⵜⴷⵎⵙⴰ ⵜⴰⵏⴰⵎⵓⵏⵜ ⵎⴰⵙ ⵜⵙⵡⵓⵔⵉ ⵜⵎⴰⵡⴰⵙⵜ ⴼ ⵓⵣⴰⵣⵣⵓ ⵏ ⵓⵣⵓⵣⵣⵔ ⵏ ⵓⵖⴰⵎⵓⵙ ⴰⴷⵓⵙⴰⵏ ⵉ ⴽⵓ ⵉⵎⴰⵏⴰⵔⵏ ⵏ ⵜⵎⴰⵍⵍⴰⵢⵜ, ⵖⵎⴽ ⴰⵏⵏ ⴷ ⵓⵙⵓⵊⴷ ⵏ ⵢⴰⵏ ⵓⴼⵙⵙⴰⵢ ⴰⵎⵓⵟⵟⵓⵏ ⵉⵥⵍⵉⵏ ⵙ ⵓⵣⵣⵔⴰⵢ ⵏ ⵜⵙⵓⴳⵔⵜ ⵏⵏⵙⵏ ⴷ ⵓⵙⴷⵓⵙ ⵏ ⵉⵣⵣⵔⴰⴼⵏ ⵉ ⵓⵃⵟⵟⵓ ⵏ ⵉⵎⵙⵡⵓⵔⵉⵢⵏ ⵖ ⵜⵏⵉⴹⵉ.
ⵙ ⵓⵣⵎⵎⵣⵣⵓ ⴰⴷ, ⵓⵣⵏⵏ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵙⵢⴰⴼⵓⵜⵏ, ⵉⴳⵏⵙⴻⵙⵏ ⵏ ⵜⵔⵓⴱⴱⴰ ⵜⵉⴱⵕⵍⴰⵎⴰⵏⵉⵢⵉⵏ, ⴰⵣⵓⵍ ⵏ ⵓⵙⵉⵙⵙⵏ ⴷ ⵓⵙⵓⵜⴳ ⵉ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⵏ ⵜⴷⵓⵙⵉ ⴷ ⵉⵣⵔⵉⵔⵉⴳⵏ ⵉⵎⵣⵡⵓⵔⴰ ⵉ ⵓⵙⴱⴷⴷⵉ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ, ⵖⵎⴽ ⴰⵏⵏ ⵓⵍⴰ ⴷ ⵉⴷ ⴱⴰⴱ ⵏ ⵜⵡⵓⵔⵉ ⵖ ⵢⵉⴳⵔ ⵏ ⵜⵎⴰⵍⵍⴰⵢⵜ ⴷ ⵉⴷ ⴱⴰⴱ ⵏ ⵉⵙⵏⵙⴰ ⵍⵍⵉ ⵉⵙⴱⵔⵔⴽⵏ ⵉⵎⵙⵡⵓⵔⵉⵢⵏ ⵏ ⵜⴷⵓⵙⵉ ⴷ ⵡⵉⵍⵍⵉ ⵊⵊⵉⵏⵉⵏ.
ⵖⵎⴽ ⵍⵍⵉ ⵙⵓⵜⴳⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⵓⴳⴳⴰⵙ ⵏ ⵜⵎⴰⵡⴰⵙⵜ ⵉ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵏ ⵜⵎⴰⵍⵍⴰⵢⵜ, ⵖ ⵉⵍⵍⴰ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 30.20 ⵉ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵣⴷⵉⵏⵉⵏ ⵙ ⵜⵎⵖⵓⵏⵉⵏ ⵏ ⵉⵎⵓⴷⴷⵓⵜⵏ ⴷ ⵜⵣⴷⵓⵖⵉⵏ ⵏ ⵜⵎⴰⵍⵍⴰⵢⵜ ⴷ ⵜⵎⵖⵓⵏⵉⵏ ⵏ ⵡⴰⵙⵙⴰⵢ ⵏ ⵉⴳⵏⵏⴰ ⵏ ⵉⵏⵎⵓⴷⴷⴰ.
ⵖⵔⵉⵏ ⵉⴳⵎⴰⵎⵏ ⵏ ⵜⵙⵙⵇⵉⵎⵜ ⵉ ⵓⵙⵖⵓⴷⵓ ⵏ ⵓⵖⴰⵡⴰⵙ ⵏ “ⴹⴰⵎⴰⵏ ⵓⴽⵙⵉⵊⵉⵏ” ⵍⵍⵉⵖ ⵟⵟⴰⴼⵏⵜ ⵜⵎⵙⵙⵏⵜⴰⵢ ⵏ ⵜⵎⴰⵍⵍⴰⵢⵜ ⵜⵉⵎⵥⵍⴰⵢ ⵏⵏⵙⵏⵜ, ⵖⵎⴽ ⴰⵏⵏ ⴷ ⵓⵙⴽⵔ ⵏ ⵓⵙⴰⵜⵉ ⴰⵣⵣⵔⴰⴼ ⵉ ⵓⵙⵎⵖⵔ ⵏ ⵢⵉⴳⵔ ⴰⴷ, ⴷ ⵓⵙⵉⴷⴼ ⵏ ⵍⴰⴱⵏⴰⴽ ⵍⵍⵉⵖ ⴳⴰⵏ ⴰⵎⴷⵔⴰⵡ ⵏ ⵜⵎⵙⵙⵏⵜⴰⵢ ⵏ ⵜⵎⴰⵍⵍⴰⵢⵜ ⵃⵎⴰ ⴰⴷ ⵉⵍⵉⵏ ⵉⴼⵙⵙⴰⵢⵏ ⵍⵍⵉ ⵔⴰⴷ ⵢⴰⵡⵙ ⵉ ⵢⵉⴳⵔ ⴰⴷ ⵉⴷⴷⵔ ⵉⵖ ⵉⵙⵎⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ.
ⴼⴽⴰⵏ ⵉⴳⵎⴰⵎⵏ ⵏ ⵜⵙⵇⵇⵉⵎⵜ ⵜⵉⵙⵓⵎⴰⵔ ⵏⵏⵙⵏ ⵙ ⴰⴷ ⵉⵍⵉⵏ ⵉⵙⵉⵏⴼⵏ ⵙ ⵜⵎⴰⵎⴽⵉⵏ ⵜⵉⵏⴰⵎⵓⵔⵉⵏ ⵜⵉⵎⵓⵟⵟⵓⵏⵉⵏ, ⵢⵉⵍⵉ ⵓⵎⵢⴰⵏⴰⵡ ⵏ ⵓⵙⴽⴰⵏ ⴰⴳⵯⵏⵙⴰⵏ ⵏ ⵜⵎⴰⵍⵍⴰⵢⵜ ⴷ ⵓⵙⵙⵔⵇⴱ ⵏ ⵓⵎⵍⵓⵍⵍⵓⵢ ⴰⵎⵖⵔⵉⴱⵉ ⴰⴷ ⵉⵙⵎⵔⵙ ⴰⵢⴰⴼⵓ ⵏ ⵜⵎⴰⵍⵍⴰⵢⵜ ⴰⵏⴰⵎⵓⵔ, ⵢⵉⵍⵉ ⵓⵅⵎⵎⴻⵎ ⵉⵥⵍⵉⵏ ⵖ ⵢⵉⴳⵔ ⵏ ⵜⵏⵉⴹⵉ ⵃⵎⴰ ⴰⴷ ⵢⵉⵍⵉ ⴰⵙⵏⵊⵎ ⵏ ⵢⵉⴳⵔ ⴰⴷ ⵖ ⵜⵎⵓⴽⵔⵉⵙⵉⵏ ⵍⵍⵉ ⵔⴰⴷ ⵉⵙⵙⵓⴳⵣ ⵜⴰⵢⵢⴰⴼⵓⵜ ⵏⵏⵙ, ⵍⵍⵉⵖ ⵜⵛⵃⴰ ⵜⵓⵚⴽⵉⵡⵜ ⵜⴰⵏⴰⵎⵓⵏⵜ ⵏ ⵉⵎⵙⵡⵓⵔⵉⵢⵏ ⵏⵏⵙ.