ⴰⵙⵇⵇⵉⵎ ⵏ ⵉⵎⵓⵔⴰ ⵉⵙⵖⵣⵏ ⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⵎⵓⴽⵔⵉⵙⵉⵏ ⵏⵏⵙⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ ⵏ ⵓⴽⵡⴰⵙ 30 ⵉⴱⵔⵉⵔ 2020 ⴽⵕⴰⴹ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵣⴷⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ : ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 23.20 ⵉ ⵓⵙⵖⵣⵏ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.292 ⵉⵣⴷⵉⵏ ⵙ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⵎⵙⴽⴰⵔ ⵏ ⵓⵙⵉⵡⴹ ⵏⵏⵙⵏ, ⴰⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 26.20 ⵉⵣⴷⵉⵏ ⵙ ⵓⵙⵖⵣⵏ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.320 ⵉⵣⴷⵉⵏ ⵙ ⵓⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ, ⴷ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 27.20 ⵏ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵜⵣⵣⵉⴳⵣⵜ ⵏ ⵜⵡⵓⵔⵉⵡⵉⵏ ⵏ ⵉⵏⴳⵎⴰⵎⵏ ⵏ ⵜⵎⵙⵙⵓⴳⵓⵔⵜ ⵏ ⵜⵎⵙⵙⵓⵔⵉⵏ ⵏ ⵜⵡⵉⵣⵉ ⴷ ⵜⵎⴰⵎⴽⵉⵏ ⵏ ⵓⵙⴽⵔ ⵏ ⵜⵙⵎⵓⵏⴰⵢ ⵏⵏⵙⵏⵜ ⵜⵉⵎⴰⵜⴰⵢⵉⵏ ; ⵖ ⵜⵖⵉⵎⵉⵜ ⵜⵓⵙⵎⵉⴷⵜ ⵍⵍⵉ ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵜⵉⵍⵉⵜ ⵏ ⵎⴰⵙⵙ ⵄⴰⴱⴷ ⵍⵡⴰⴼⵉ ⵍⴼⵜⵉⵜ, ⴰⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ , ⴷ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ.
ⵜⵍⵍⴰ ⵜⵏⴽⴷⴰ ⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⵓⵟⵟⵓⵏ 23.20 ⴷ ⵓⵟⵟⵓⵏ 26.20 ⵣⴷⵉⵏⵉⵏ ⵙ ⵓⵙⵖⵣⵏ ⵏ ⵙⵉⵏ ⵉⵎⵕⵚⵓⵎⵏ ⵙ ⵉⵙⵍⴳⵏⵏ ⵓⵟⵟⵓⵏ 2.20.292 ⴷ ⵓⵟⵟⵓⵏ 2.20.320 ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵣⵣⴳⵉⵔ ⵏ ⵉⴱⴹⵉⵢⵏ ⵏ ⵓⵎⴰⴳⵔⴰⴷ 81 ⵏ ⵓⴷⵓⵙⵜⵓⵔ, ⴷⴼⴼⵉⵔ ⵏ ⵓⵙⵖⵣⵏ ⵏ ⵜⵙⵇⵇⵉⵎⵉⵏ ⵥⵍⵉⵏⵉⵏ ⵖ ⵙⵉⵏ ⵉⵙⵇⵇⵉⵎⵏ ⵏ ⵓⴱⵕⵍⴰⵎⴰⵏ ⵏ ⵙⵉⵏ ⵉⵎⵕⵚⵓⵎⵏ ⵏ ⵉⵙⵍⴳⵏⵏ ⵖ ⵜⵉⵣⵉ ⵉⵍⵍⴰⵏ ⵏⴳⵔ ⵙⵏⴰⵜ ⵜⵙⵓⵜⵍⵉⵏ ⵜⵉⵣⵣⵔⴰⴼⵉⵏ, ⴷ ⵓⵣⵓⵣⵣⵔ ⵏⵏⵙⵏ ⵖ ⵓⵖⵎⵉⵙ ⴰⵎⴰⴷⴷⵓⴷ.
ⵖ ⵜⵏⴽⴷⴰ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 23.20, ⵉⵏⵏⴰ ⵓⵎⴰⵡⵙⴰⵙ ⵏ ⵜⴳⵯⵏⵙⴰⵏⵜ ⵎⴰⵙⵙ ⵄⴰⴱⴷ ⵍⵡⴰⴼⵉ ⵍⴼⵜⵉⵜ ⵎⴰⵙ ⴷ ⵢⵉⵡⵉ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.292 ⵉⵣⴷⵉⵏ ⵙ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵜⵎⵙⴽⴰⵔ ⵏ ⵓⵙⵉⵡⴹ ⵏⵏⵙⵏ, ⴰⴷ ⵢⵉⵍⵉ ⵡⴰⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵖ ⵜⵎⴰⵣⵉⵔⵜ ⴰⵔ 20 ⵉⴱⵔⵉⵔ 2020, ⵢⵉⵍⵉ ⵓⵙⵎⴰⵢⵏⵓ ⵏⵏⵙⵏ ⴰⵔ 20 ⵎⴰⵢⵢⵓ ⴷ ⵢⵓⵛⴽⴰⵏ, ⵙ ⴰⵢⵍⵍⵉ ⴷ ⵜⵉⵡⵉ ⵜⵎⵙⵓⵜⵍⵜ ⵉ ⵜⵉⵕⵡⵉ ⵏ ⵉⵙⵡⵓⴷⴷⵓⵜⵏ ⵉⵍⵍⴰⵏ ⵉ ⵓⵃⵟⵟⵓ ⵏ ⵜⵓⴷⵔⵜ ⵏ ⵎⵉⴷⴷⵏ ⴷ ⵜⴼⴰⵜⵉⵜ ⵏⵏⵙⵏ ⴷ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴽⵓⴼⵉⴷ 19.
ⵖ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⵎⴰⵙⵙ ⵎⵓⵃⴰⵎⵎⴰⴷ ⴱⵏⵛⵄⴱⵓⵏ, ⵎⴰⵙ ⴽⵛⵎⵏⵜ ⵜⵎⵙⴽⴰⵔ ⵉⵍⵍⴰⵏ ⵖ ⵓⵙⴰⵜⵉ ⵏ ⵓⵎⵕⵚⵓⵎ ⵙ ⵓⵙⵍⴳⵏ ⵓⵟⵟⵓⵏ 2.20.320 ⵉⵣⴷⵉⵏ ⵙ ⵓⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⵏ ⵏ ⴱⵕⵕⴰ ⵖ ⵉⵙⵡⵓⴷⴷⵓⵜⵏ ⵉⵍⵍⴰⵏ ⵉ ⵓⵙⴱⴷⴷⵉ ⵏ ⴳⴰⵔ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⵏ ⵓⴼⵉⵔⵓⵙ ⵏ ⴽⵓⵕⵓⵏⴰ ⴼ ⴽⵓ ⵉⴳⵔⴰⵏ ⵓⴷⴷⵉⵔⵏ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⵢⵉⵏⵉ ⵎⴰⵙ ⵓⴽⴰⵏ ⴳⴰⵏⵜ ⵜⵎⵔⵙⴰⵍ ⵜⵉⵥⵕⴼⴰⵏⵉⵏ ⵜⴰⵎⵢⵉⵎⴰⵏⵜ ⵏⵏⵙⵏⵜ ⵖ ⵜⴳⵍⴷⵉⵜ ⵡⴰⵅⵅⴰ ⵜⵍⵍⴰ ⵜⵎⵙⵓⵜⵍⵜ ⴰⴷ, ⴰⵢⵍⵍⵉ ⵔⴰⴷ ⴰⵙ ⵉⴼⴽ ⴰⴷ ⵜⴰⵎⵥ ⴰⵙⵙⵥⵕⴼ ⵏ ⴱⵕⵕⴰ ⵙ ⵜⴼⴰⴷⵉⵡⵉⵏ ⴷ ⵢⵓⵙⴰⵏ.
ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⵓⵟⵟⵓⵏ 27.20 ⵏ ⵓⵙⵔⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵜⵣⵣⵉⴳⵣⵜ ⵏ ⵜⵡⵓⵔⵉⵡⵉⵏ ⵏ ⵉⵏⴳⵎⴰⵎⵏ ⵏ ⵜⵎⵙⵙⵓⴳⵓⵔⵜ ⵏ ⵜⵎⵙⵙⵓⵔⵉⵏ ⵏ ⵜⵡⵉⵣⵉ ⴷ ⵜⵎⴰⵎⴽⵉⵏ ⵏ ⵓⵙⴽⵔ ⵏ ⵜⵙⵎⵓⵏⴰⵢ ⵏⵏⵙⵏⵜ ⵜⵉⵎⴰⵜⴰⵢⵉⵏ ⵖ ⵜⵉⵣⵉ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴰⵙⵎⴰⴷ ⵏ ⵜⵎⵙⴽⴰⵔ ⵍⵍⵉ ⵉⵙⴽⵔ ⵓⵡⴰⵏⴽ ⵉ ⵚⴰⵃⴰ ⵏ ⵜⵎⵙⵙⵏⵜⴰⵢ ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ ⵏ ⵜⵣⵣⵉⴳⵣⵜ ⵏ ⵉⴳⵔⴰⵏ ⵓⴷⴷⵉⵔⵏ, ⴷ ⵓⵣⵎⵎⴻⵎ ⵏ ⵜⵓⵎⴰⵢⵉⵏ ⵉⵣⵔⵉⵏ ⵉⵍⵓⴳⵏⵏ ⵉⵍⵍⴰⵏ ⵖ ⵓⵙⵍⴳⵏ ⵏ ⵜⵎⵙⵙⵓⵔⵉⵏ ⵏ ⵜⵡⵉⵣⵉ ⵣⴷⵉⵏⵉⵏ ⵙ ⵜⵖⵓⵔⵉ ⴷ ⵓⵙⵏⵖⵎⵙ ⴷ ⵓⵎⴷⴰⵡⴰⵍ ⴷ ⵓⵙⴽⵔ ⵏ ⵜⵙⵎⵓⵏⵉ ⵜⴰⵎⴰⵜⴰⵢⵜ ⴷ ⵉⵏⴳⵎⴰⵎⵏ ⵏ ⵜⵎⵙⵙⵓⴳⵓⵔⵜ ⴷ ⵜⵉⴹⴰⴼ ⵉ ⵜⵎⵙⵙⵓⵔⵉⵏ ⵏ ⵜⵡⵉⵣⵉ ⵖ ⵓⵣⵎⵣ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⵃⵎⴰ ⴰⴷ ⵉⵍⵉⵏⵜ ⵜⵎⵙⴽⴰⵔ ⴱⵙⵓⵙⵏⵉⵏ ⴷ ⵢⵓⵙⴰⵏ ⵉ ⵚⴰⵃⴰ ⵏ ⵜⵎⵙⵙⵓⵔⵉⵏ ⴰⴷ.
ⵙ ⵓⵣⵎⵣⵣⵓ ⵏ ⵓⵎⴹⴰⴽⴰⵕ ⵏ ⵉⵙⵏⴼⴰⵔⵏ ⴰⴷ, ⵏⵏⴰⵏ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⴰⵙⵓⵜⴳ ⵏⵏⵙⵏ ⵢⴰⵜⵜⵓⵢⵏ ⵉ ⵜⵙⵔⵜⵉⵜ ⵜⴰⵎⵣⵡⴰⵔⵓⵜ ⵏ ⵓⵎⵓⵔⵙ ⴷ ⵜⵏⴰⵔⴰ ⵜⵓⵏⵥⵉⵥⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵖ ⵓⵙⵡⵓⴷⴷⵓ ⴷ ⵓⵙⵎⴽⵍ ⵏ ⵉⴷⵔⵉⵣⵏ ⵉⴷⴰⵡⵙⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⵏ ⵓⴱⴰⵢⵢⵓⵕ, ⵙⵓⵜⴳⵏ ⵓⵍⴰ ⵜⴰⵙⵏⵜⴰⵢⵜ ⵏ ⴱⴰⴱ ⵏ ⵡⴰⴷⴷⵓⵔ ⵖ ⵓⵙⵎⵓⵏ ⵏ ⵜⵓⴳⴳⴰⵙ ⵏ ⵓⵎⵏⵥⴰⵡ ⵏ ⵉⴼⵔⵉⵇⵢⴰ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ.
ⵙⵓⵜⴳⵏ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⴰⴼⵔⴰⴽ ⴷ ⵜⵡⵉⵣⵉ ⵍⵍⵉ ⴷ ⵉⵎⵍⴰ ⵓⵎⴰⴷⴰⵏ ⴰⵎⵖⵔⵉⴱⵉ ⴷ ⵜⴰⵣⵣⵍⴰ ⵏ ⴽⵓ ⵢⴰⵏ ⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵏⵚⵕ ⵕⴱⴱⵉ, ⵖ ⵜⵍⵍⴰ ⵜⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵉⵎⵓⵍⵍⵉⵜⵏ ⵉⵙⵔⵜⴰⵏⵏ ⴷ ⵉⵏⵎⵓⵍⵍⴰ ⴷ ⵜⵏⴱⴰⴹⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵔⵙⴰⵍ ⵏ ⵜⵏⴼⵔⵓⵜ ⵜⴰⵏⴰⵎⵓⵔⵜ ⴷ ⵜⴳⴳⴰⵍⵉⵏ ⵏ ⵜⵡⵉⵙⵉ ⴷ ⵡⴰⵔⴰⵢ ⴰⵖⵔⵎⴰⵏ ⴷ ⵉⵎⵙⵡⵓⵔⵉⵢⵏ ⵏ ⵜⵖⵓⵙⵉ ⴷ ⵉⵎⵙⵖⴰⵏⵏ ⵏ ⵜⴷⵓⵙⵉ ⵉⵖⵔⵎⴰⵏⵏ ⴷ ⵉⵄⵚⴽⵕⵉⵢⵏ ⴷ ⵉⵙⵍⵎⴰⴷⵏ, ⴷ ⴽⵓ ⵉⵏⵎⵓⵔⴰ ⴷ ⵜⵏⵎⵓⵔⴰ ⴷ ⵡⴰⵎⵓⵏ ⴰⵖⵔⵎⴰⵏ ⴷ ⵜⵎⵔⵙⴰⵍ ⵏ ⵓⵙⵏⵖⵎⵙ ⵖ ⵓⵙⵎⵓⵙⵙⴰ ⴰⴷ, ⴰⵢⵍⵍⵉ ⵢⵉⵡⵙⵏ ⵉ ⵜⵎⴰⵣⵉⵔⵜ ⵏⵏⵖ ⴰⴷ ⵜⴻⵟⵟⵉⴼ ⵖ ⵜⵉⵣⵉ ⵜⴰⵎⵏⵣⵓⵜ ⵢⴰⵜ ⵜⵙⵔⵜⵉⵜ ⵏ ⵓⵙⵉⵣⵡⵔ ⵉ ⵓⵙⴱⴷⴷⵉ ⵏ ⵜⵣⵣⵉⴳⵣⵜ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ.
ⵖⵔⴰⵏ ⵉⴳⵎⴰⵎⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴷ ⵢⵉⵍⵉ ⴷ ⵓⵍⴳⴳⵓⴷ ⴰⵙⵉⴷⴼ ⵏ ⵢⵉⴳⵔ ⴰⵡⴰⵔⵙⴽⵍⴰⵏ ⴷ ⵓⵙⵏⴰⵍ ⵏ ⵜⵎⵙⵙⵏⵜⴰⵢ ⵎⵥⵥⵉⵏⵉⵏ ⴷ ⵜⵎⵊⵀⴷⴰⵢ ⴷ ⵜⴷⵓⵍⴰ ⵉⵛⵃⴰⵏ, ⴷ ⵜⵏⵣⵣⴰ ⵏ ⵉⵏⵎⵓⵔⴰ ⵖ ⵉⴳⴰⵡⵢⵏ ⵏ ⵍⴰⴱⵏⴰⴽ ⵖ ⵓⵣⵎⵣ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⴷ ⵡⴰⵣⵣⴰⵣ ⵏ ⵡⴰⵏⵢⴰ ⵏ ⵜⵎⵓⵟⵟⵓⵏⵜ, ⴷ ⵓⵙⴷⵓⵙ ⵏ ⵜⵎⵢⴰⵎⴰⵏⵜ ⵖ ⵉⵄⵔⵔⵉⵎⵏ ⴷ ⵜⵙⵏⵜⴰⵢⵜ ⵜⵉⵍⴻⵍⵍⵉⵜ, ⵉⵏⵉⵏ ⴰⴱⵓⵔⵣ ⵏⵏⵙⵏ ⵉ ⵜⵎⴳⵓⵔⵉ ⵜⴰⵏⴰⵎⵓⵔⵜ ⴷ ⵜⵥⵉⴹⴰⵕ ⵏⵏⵙ ⵉ ⵓⵙⵎⴰⵢⵏⵓ ⵖ ⵜⵉⵣⴰⵉ ⴰⴷ.
ⵖⵎⴽ ⵍⵍⵉ ⵖⵔⴰⵏ ⵉⴷ ⵎⴰⵙⵙ ⵉⵎⵓⵔⴰ ⴷ ⵉⵙⵜ ⵎⴰⵙⵙⴰ ⵜⵉⵎⵓⵔⴰ ⵉ ⵓⵙⵎⵔⵙ ⵉⵥⵉⵍⵏ ⵏ ⵜⵎⴽⵕⴰⴹ ⵜⵉⴳⴷⵓⴷⴰⵏⵉⵏ , ⴷ ⵓⵙⵡⵉⵏⴳⵎ ⵖ ⵜⴼⵔⴽⴰ ⴷⴼⴼⵉⵔ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⴷ ⵓⵙⴽⵔ ⵏ ⵜⵙⵔⵜⵉⵜ ⵏ ⵜⵙⵎⵓⵔⵜ ⵢⴰⴽⴽⴰⵏ ⴰⵙⵉⵣⵡⵔ ⵉ ⵉⵢⴰⴼⵓⵜⵏ ⵉⵏⴰⵎⵓⵔⵏ, ⴷ ⵓⵙⵙⴰⵔⵓ ⵖ ⵓⴷⴳⴰⵔ ⴰⵏⴼⴳⴰⵏ, ⵉⵜⵜⵓⴼⴽⵉ ⵓⵙⵉⵣⵡⵔ ⵉ ⵉⴳⵔⴰⵏ ⵏ ⵜⴷⵓⵙⵉ ⴷ ⵓⵙⵙⵍⵎⴷ.