ⵖ ⵓⵏⵏⵓⵕⵥⵎ ⵏ ⵜⵙⵓⵜⵍⵜ ⵜⴰⵣⵣⵔⴰⴼⵜ ⵜⴰⵎⴰⵢⵏⵓⵜ, ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵓⵜⴳ ⵜⴰⵏⴰⵔⴰ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵏ ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ “ ⴽⵓⵕⵓⵏⴰ” ⴷ ⵉⴷⵔⵉⵣⵏ ⵏⵏⵙ ⵉⴷⴰⵡⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⴰⵎⵙⴰⵏⵏ

ⵙ ⵓⵣⵣⴳⵉⵔ ⵏ ⵜⵓⵎⴰⵢⵉⵏ ⵏ ⵓⵎⴰⴳⵔⴰⴷ 65  ⵏ ⵓⴷⵓⵙⵜⵓⵔ, ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ  ⵓⵙⵉⵎⵡⴰⵙ 10 ⵉⴱⵔⵉⵔ 2020 ⵖ ⵓⵙⵖⵉⵎ ⵏ ⵓⵙⵇⵇⵉⵎ, ⴰⵏⵏⵓⵕⵥⵎ ⵏ ⵜⵙⵓⵜⵍⵜ ⵜⵉⵙ ⵙⵏⴰⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ 2019-2020, ⵙ ⵜⵉⵍⵉⵜ ⵏ ⴽⵔⴰ ⵏ ⵉⵎⵓⵔⴰ,  ⵍⵍⵉⵖ ⵍⵍⴰⵏⵜ ⵜⵎⵙⴽⴰⵔ ⵏ ⵡⴰⵔⴰⵢ ⵍⵍⵉ ⵙ ⴼⴼⵓⵖⵏ ⵉⵏⴳⵎⴰⵎⵏ ⵏ ⵓⵙⵇⵇⵉⵎ ⵖ  ⵜⵎⵙⵓⵜⴰⵍ ⴰⴷ ⵍⵍⵉ ⵜⴷⴷⵔ ⵜⵎⴰⵣⵉⵔⵜ ⵏⵏⵖ.

ⵙ ⵓⵣⵎⵣⵣⵓ ⴰⴷ, ⵉⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵃⴼⴹ ⵕⴱⴱⵉ, ⵏ ⵜⵓⴳⴳⴰⵙ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ ⴷ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏⵏⵙ ⵉⴷⴰⵡⵙⴰⵏⵏ ⴷ ⵉⵏⴰⵎⵓⵏⵏ ⴷ ⵉⴷⴰⵎⵙⴰⵏⵏ. ⵉⵙⴷⴷⵉⴷ ⵎⴰⵙ ⴳⴰⵏⵜ ⵜⵎⵙⴽⴰⵔ ⵜⵉⵎⵣⵡⵓⵔⴰ ⵍⵍⵉ ⵙ ⵉⵏⵏⴰ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜⵜⵓⵙⴽⵉⵔⵜⵏ ⵖ ⵓⵙⴽⴰⵔ ⵏ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵖ ⵜⵎⴰⵣⵉⵔⵜ ⵃⵎⴰ ⴰⴷ ⵓⵔ ⵉⵣⵣⵉⴳⵣ ⵓⴱⴰⵢⵢⵓⵕ, ⵏⵖ ⴰⵙⵓⵊⴷ ⵏ ⵜⵖⴰⵡⵙⵉⵡⵉⵏ ⵏ ⵜⵙⵏⵉⵊⵊⵉⵜ ⴷ ⵜⵖⴰⵡⵙⵉⵡⵉⵏ ⵜⵉⵥⵕⴰⴼⵉⵏ ⴷ ⵜⴷⵎⵙⴰⵏⵉⵏ ⴷ ⵜⵏⴰⵎⵓⵏⵉⵏ ⵍⵍⵉ ⵉⵎⵓⵏⵏ ⴷ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ ⵍⵍⵉ ⵙ ⴷ ⵉⵇⵇⴰⵏ  ⴰⴷ ⵉⵍⵉⵏⵜ ⴷ ⵜⵎⵙⵓⵜⵍⵉⵏ ⵜⵉⴷⵎⵙⴰⵏⵉⵏ ⵥⵍⵉⵏⵉⵏ ⵖ ⵜⵍⵍⴰ ⵜⴷⵎⵙⴰ ⵜⴰⵏⴰⵎⵓⵔⵜ, ⴳⴰⵏⵜ ⴰⵙⵎⵀⵍ ⵏ ⵜⵎⵥⵍⴰ ⵏ ⵜⵎⴰⵙⴰⵢⵜ ⵜⴰⵎⵣⵔⴰⵢⵜ ⵖ ⵜⵉⵣⵉ ⴰⴷ ⵉⵛⵇⵇⴰⵏ.

ⵉⵙⵓⵜⴳ ⵎⴰⵙⵙ ⵍⵎⴰⵍⴽⵉ ⵜⴰⵙⵏⵜⴰⵢⵜ ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵉ ⵓⵙⴽⴰⵔ ⵏ  ⵢⴰⵏ ⵓⴼⵏⵉⵇ ⵉⴳⴰⵏ  ⴰⵎⵉⴹⴰⵏ ⵏ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⵏ ⴽⵓⵕⵓⵏⴰ, ⵉⵙⵓⵜⴳ ⵓⵍⴰ ⴰⵏⵛⴽ ⵏ ⵜⵡⵉⵙⵉ ⵖ ⵓⵎⵉⴹⴰⵏ ⴰⴷ ⴷ ⵓⴽⴽⵓⵙ ⴰⵏⴰⵎⵓⵔ ⴰⵏⵉⵔⴰⵏ ⵉ ⵓⵙⵏⴰⵍ ⵏⵏⵙ ⴷⴰⵔ ⵜⵎⵔⵙⴰⵍ ⴷ ⵎⵉⴷⴷⵏ ⴷ ⵓⴷⴳⴰⵔ ⴰⵏⴰⵎⵓⵔ. ⴷ ⵡⴰⵎⵎⴰⵥ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵖ ⵡⴰⵜⵉⴳⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵓⵙⴼⴰⵙⴽⴰ.

ⵉⵣⵎⵎⵉⵎ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴳⴰⵏⵜ ⵜⵎⵙⴽⴰⵔ ⵍⵍⵉ ⵙⴽⵔⵏⵜ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵖ ⵜⵍⵍⴰ ⵜⵏⴱⴰⴹⵜ ⴷ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ, ⵙ ⵉⵙⵡⴰⵍⴰⵜⵏ ⵉⴳⵍⴷⴰⵏⵏ, ⵙⵡⵓⵔⵉⵏⵜ ⴳⵉⵙⵏⵜ ⵜⵎⵔⵙⴰⵍ ⵜⵉⵥⵕⴰⴼⵉⵏ ⵜⵉⵏⴰⵎⵓⵔⵉⵏ ⴷ ⵉⵏⴳⵎⴰⵎⵏ ⵏ ⵜⵡⵉⵣⵉ, ⵃⵎⴰ ⴰⴷ ⵢⵉⵍⵉ ⵓⵃⵟⵟⵓ  ⵏ ⵜⵖⵔⴰⴷ ⵏ ⵡⵉⵍⵍⵉ ⵜⵜⵓⴹⵕⵕⴰⵏⵉⵏ ⵖ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ, ⴳⴰⵏⵜ ⵜⴰⵎⴰⵜⴰⵔⵜ ⴼ ⵡⴰⵜⵉⴳⵏ ⵏ ⵜⵡⵉⵣⵉ ⴷ ⵓⵎⵢⴰⵡⴰⵙ ⴷ ⵓⵙⴽⴰⵔ ⵏ ⵜⵎⵥⵍⴰ ⵏ ⵜⵎⴰⵙⴰⵢⵜ ⴰⴷ ⵓⵔ ⵏⴼⵍ ⴰⵡⴷ ⵢⴰⵏ ⵖ ⵜⴰⵔⵡⴰ ⵏ ⵜⵎⵓⵔⵜ ⵖ ⵉⵣⵎⴰⵣ ⴰⴷ ⵛⵇⵇⴰⵏⵉⵏ.

ⵉⵙⴰⵡⵍ ⵎⴰⵙⵙ ⵍⵎⴰⵍⴽⵉ ⵖ ⵜⴳⵓⵔⵉ ⵏⵏⵙ ⴼ ⵓⵙⵓⵜⴳ ⵏ ⵉⵙⴼⴰⵙⴽⴰⵜⵏ ⵏ ⵉⵎⵙⵡⵓⵔⵉⵢⵏ ⵖ ⵢⵉⴳⵔ ⴰⴷⴰⵡⵙⴰⵏ ⴷ ⵎⴰⴷ ⵜ ⵉⵔⵡⴰⵙⵏ, ⵉⵖⵔⵎⴰⵏⵏ ⴷ ⵉⵄⴰⵙⴽⴰⵔⵉⵢⵏ, ⴷ ⵉⵎⵙⵖⴰⵏⵏ ⵏ ⵡⴰⵔⴰⵢ ⴰⵖⵔⵎⴰⵏ, ⴷ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⴷ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵜⵏⴱⴰⴹⵜ, ⴷ ⵜⵏⴼⵔⵓⵜ ⵜⴰⵏⴰⵎⵓⵔⵜ, ⴷ ⵜⵊⴹⵕⵎⵜ ⵜⴰⴳⵍⴷⴰⵏⵜ, ⴷ ⵜⴳⴳⴰⵍⵉⵏ ⵏ ⵜⵡⵉⵙⵉ, ⴷ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⵏ ⵓⵙⵍⵎⴷ, ⴷ ⵉⵙⴱⴱⴰⴱⵏ ⴷ ⵉⴼⵍⵍⴰⵃⵏ, ⴷ ⵜⵎⵖⴰⵔⵉⵏ ⴷ ⵉⵔⴳⴰⵣⵏ ⵏ ⵜⵖⵓⵙⵉ, ⴷ ⴽⵓ ⵎⵉⴷⴷⵏ ⵏ ⵓⵎⴰⴷⴰⵏ ⴰⵎⵖⵔⵉⴱⵉ ⵉⵜⵜⴰⵡⵙⵏ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴰⴷ.

ⵡⴰⵅⵅⴰ ⴰⵎⵏⴰⴹ ⴰⴷ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⴷ ⵉⵇⵇⴰⵏ ⴰⴷ ⵣⵣⵉⴳⵣⵏⵜ ⵜⵎⵔⵙⴰⵍ ⵖ ⵓⵙⴽⴰⵔ ⵏ ⵜⵉⵍⴰⵍ ⵏⵏⵙⵏⵜ ⴷ ⵜⵥⵍⴰⵢⵉⵏ ⵏⵏⵙⵏⵜ ⵙ ⴰⵢⵍⵍⵉ ⵜⵔⴰ ⵜⴼⵔⴽⴰ ⴰⴷ. ⵖ ⵓⵎⵏⵉⴷ ⴰⴷ, ⵉⴱⴷⵔ ⵜⵉⵙⵎⵓⵏⴰⵢ ⵍⵍⵉ ⴽⵓⵍⵍⵓ ⵙⴽⵔⵏⵜ ⵜⵙⵇⵇⵉⵎⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵍⵍⵉⵖ ⵜⵣⵣⵔⵉ ⵜⵙⵇⵇⵉⵎⵜ ⵏ ⵜⴳⵯⵏⵙⴰⵏⵜ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ  ⴷ ⵓⵣⴷⴷⵓⵖ ⴷ ⵜⵙⵔⵜⵉⵜ ⵏ ⵜⵎⴷⵉⵏⵜ ⴰⵙⵙ ⵏ ⵓⵙⵉⵏⴰⵙ 23 ⵎⴰⵕⵚ 2020 ⵙ ⵓⵎⴽⵕⴰⴹ ⴰⵙⵏⴼⴰⵔ ⵏ ⵓⵎⵕⵚⵓⵎ ⵉⴳⴰⵏ ⴰⵙⵍⴳⵏ ⵏ ⵓⵙⵔⵓⵙ ⵏ ⵉⴱⴹⵉⵢⵏ ⵥⵍⵉⵏⵉⵏ ⵙ ⵡⴰⴷⴷⴰⴷ ⵏ ⵉⵖⴰⵡⴰⵍⵏ ⵉⴷⴰⵡⵙⴰⵏⵏ. ⵖⵎⴽ ⵍⵍⵉ ⵜⵙⴽⵔ ⵜⵙⵇⵇⵉⵎⵜ ⵏ ⵜⴷⵔⵉⵎⵜ ⴷ ⵜⴳⵎⵉ ⵜⴰⴷⵎⵙⴰⵏⵜ ⵜⴰⵙⵎⵓⵏⵉ ⵉⵥⵍⵉⵏ ⵉ ⵜⵏⴽⴷⴰ ⵏ ⵓⵙⵏⴼⴰⵔ ⵏ  ⵓⵎⵕⵚⵓⵎ ⵏ ⵓⵙⴽⴰⵔ ⵏ ⵓⵎⵉⴹⴰⵏ ⵉⵜⵜⵓⴼⴽⴰⵏ ⵉ ⵜⵖⴰⵡⵙⵉⵡⵉⵏ ⵥⵍⵉⵏⵉⵏ ⵍⵍⵉ ⵉⵜⵜⵓⵙⴽⴰⵔⵏ ⵙ ⵉⵙⵡⴰⵍⴰⵜⵏ  ⵏ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ, ⵃⵎⴰ ⴰⴷ ⵢⵉⵍⵉ ⵓⵙⴱⴷⴷⵉ ⵏ ⵉⴷⵔⵉⵣⵏ ⵏ ⵓⴱⴰⵢⵢⵓⵕ ⴰⴷ ⵖ ⵉⵙⵡⵉⵔⵏ ⵏ ⵜⴷⴰⵡⵙⴰ ⴷ ⵡⴰⵎⵓⵏ ⴷ ⵜⴷⵎⵙⴰ ⴷ ⵓⵥⵕⴼ. ⵖⵎⴽ ⵍⵍⵉ ⵜⵙⴽⵔ ⵜⵙⵇⵇⵉⵎⵜ ⴰⴷ ⵢⴰⵜ ⵜⵙⵎⵓⵏⵉ ⵢⴰⴹⵏⵉⵏ ⴰⵙⵙ ⵏ 7 ⵉⴱⵔⵉⵔ ⵜⵥⵍⵉ ⵉ ⵓⵣⵣⵔⴰⵢ ⵏ ⵓⵙⴽⵯⴼⵍ ⵏ ⵉⵙⵙⵥⵕⴼⵏ ⵏ ⴱⵕⵕⴰ. ⵖ ⵜⵙⴳⴰ ⵏⵏⵙ, ⵜⵙⴽⵔ ⵜⵙⵇⵇⵉⵎⵜ ⵏ ⵉⴳⵔⴰⵏ ⵉⵏⴰⵎⵓⵏⵏ ⵢⴰⵜ ⵜⵙⵎⵓⵏⵉ ⵙ ⵜⵉⵍⵉⵜ ⵏ ⵓⵎⴰⵡⵙⴰⵙ ⵏ ⵜⴷⵓⵙⵉ ⵍⵍⵉⵖ ⵉⴼⴽⴰ ⵢⴰⵜ ⵜⴽⵛⵛⵓⵎⵜ ⴼ ⵜⵎⵙⴽⴰⵔ ⵏ ⵡⴰⵔⴰⵢ ⴷ ⵉⵙⵡⵓⴷⴷⵓⵜⵏ ⵉⵜⵜⵓⵙⴽⴰⵔⵏ ⵉ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴰⴷ.  

ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵎⴰⵙ ⴷ ⵎⵛⴰⵛⴽⴰⵏ ⴽⵓ ⵉⴼⵔⴷⴰⵙ ⵏ ⵓⵙⵇⵇⵉⵎ ⵃⵎⴰ ⴰⴷ ⵜⵣⵣⵉⴳⵣ ⵜⵡⵓⵔⵉ ⵏ ⵜⵎⵔⵙⵍⵜ ⵖ ⵜⵙⴳⴳⵉⵡⵉⵏ ⵏ ⵜⵉⴹⴰⴼ ⴷ ⵓⵣⵣⵔⴰⴼ ⴷ ⵓⵣⵣⵔⴰⵢ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⵢⵉⵍⵉ ⵓⵙⴽⴰⵔ ⵙ ⵓⴷⵓⵙⵜⵓⵔ, ⵜⴳ ⵢⴰⵏ ⵓⴳⵣⵣⵓⵎ ⵏ ⴽⵓ ⵜⵉⵎⵔⵙⴰⵍ ⵖ ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ ⵙ ⵜⵏⴽⴷⴰ ⵏ ⵜⵙⵓⵎⴰⵔ ⴷ ⵉⴼⵙⵙⴰⵢⵏ ⴷ ⵓⵙⵏⴰⵍ ⴰⵙⵔⵜⴰⵏ ⴷ ⵓⵎⵔⵙⵍⴰⵏ ⵉ ⵜⵏⴱⴰⴹⵉⵏ  ⵢⴰⴹⵏⵉⵏ. ⵉⵙⴷⴷⵉⴷ ⵎⴰⵙ ⵜⵔⴰ ⵜⴼⵔⴽⴰ ⴰⴷ ⵏⵎⵓⵏ ⴷ ⵓⴳⵍⵍⵉⴷ ⴱⴰⴱ ⵏ ⵡⴰⴷⴷⵓⵔ ⴰⴷ ⵜ ⵉⵃⴼⴹ ⵕⴱⴱⵉ, ⴰⴷ ⵜⵉⵍⵉ ⴽⵉⴳⴰⵏ ⵏ ⵜⵉⴹⴰⴼ ⴷ ⵜⵎⴰⵙⴰⵢⵜ ⴷ ⵜⵡⵉⵣⵉ ⴷ ⵓⵎⵢⴰⵎⴰⵥ ⴰⵏⴰⵎⵓⵏ ⴷ ⵜⴰⵎⵓⵏⵜ ⵜⴰⵏⴰⵎⵓⵔⵜ ⴷ ⵓⵡⵇⵇⵔ ⵏ ⵜⵖⵜⴰⵙⵉⵏ ⴷ ⵜⵎⵙⴽⴰⵔ ⵏ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⵉⵙⵉⴳⴳⵉⵍⵏ ⴰⵃⵟⵟⵓ ⵏ ⵡⴰⵎⵓⵏ ⴷ  ⵓⵙⴱⴷⴷⵉ ⵏ ⵓⴱⴰⵢⵢⵓⵕ ⴷ ⵉⴷⵔⵉⵣⵏ ⵏⵏⵙ.