ⵜⴰⵙⵎⵓⵏⵉ ⵉⵛⵛⴰⵔⵏ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ, ⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵡⴰⵙⵙⴰⵢ ⴷ ⵜⵎⴳⵓⵔⵉ ⴷ ⵉⵏⵢⴰⵍⴽⴰⵎⵏ ⴷ ⵜⵥⴹⴰⵕⵉⵏ ⴷ ⵜⵎⴰⵙⵙⴰⵏⵉⵏ ⴷ ⵜⵉⴽⵏⵓⵍⵓⵊⵉⵜ ⵏ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ

ⵍⵍⴰⵏⵜ ⴰⵙⵙ ⵏ ⵡⴰⵢⵏⴰⵙ 02 ⵎⴰⵕⵚ 2020 ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⵉⵛⵛⴰⵔⵏ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ, ⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵡⴰⵙⵙⴰⵢ ⴷ ⵜⵎⴳⵓⵔⵉ ⴷ ⵉⵏⵢⴰⵍⴽⴰⵎⵏ ⴷ ⵜⵥⴹⴰⵕⵉⵏ ⴷ ⵜⵎⴰⵙⵙⴰⵏⵉⵏ ⴷ ⵜⵉⴽⵏⵓⵍⵓⵊⵉⵜ ⵏ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ ⵍⵍⵉ ⵉⵙⴱⵔⵔⴽ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵙⴳ 02 ⴰⵔ 06 ⵏ ⵡⴰⵢⵢⵓⵔ ⴰⴷ ⵏ ⵎⴰⵕⵚ.

ⵜⵥⵍⵉ ⵜⴳⵉⵡⵔⵜ ⵏ ⵓⵏⵏⵓⵕⵥⵎ ⵙ ⵜⴳⵓⵔⵉ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵖ ⵉⵙⴷⴷⵉⴷ ⵎⴰⵙ ⴱⴷⴷⴰ ⵜⵍⵍⴰ ⵉⴼⵔⵉⵇⵢⴰ ⵖ ⵜⵙⴰⵖⵓⵍⵜ ⵏ ⵜⵖⵔⵎⴰ ⵜⴰⵎⵖⵔⵉⴱⵉⵜ, ⵓⵍⴰ ⵖ ⵜⵎⴽⵯⵜⵉⵜ ⵏ ⵉⵎⵖⵔⵉⴱⵉⵢⵏ ⴷ ⵓⵥⵟⵟⴰ ⵏⵏⵙⵏ ⴰⴷⵍⵙⴰⵏ, ⵉⵍⵇⵎ ⵎⴰⵙ ⴱⴷⴷⴰ ⵉⵍⵍⴰ ⵍⵎⵖⵔⵉⴱ ⴷ ⵜⵎⵙⴰⵔⵉⵏ ⵜⵉⵙⵉⵍⴰⵏⵉⵏ ⵏ ⵉⴼⵔⵉⵇⵢⴰ.

ⵉⵙⵙⵉⵙⴼⵉⵡ ⴷ ⵎⴰⵙⵙ ⵍⵎⴰⵍⴽⵉ ⵎⴰⵙ ⵜⵍⵍⴰ ⵉⴼⵔⵉⵇⵢⴰ ⵖ ⵉⵏⵣⴳⵓⵎⵏ ⵉⴳⵔⴰⵖⵍⴰⵏⵏ ⴰⵜⵔⴰⵔⵏ, ⵖⵎⴽ ⵍⵍⵉ ⵜⵍⵍⴰ ⵖ ⵓⵅⵎⵎⴻⵎ ⵏ ⵜⵎⵉⵣⴰⵔ ⵜⵉⵅⴰⵜⴰⵔⵉⵏ ⴷ ⵜⵎⵔⵙⴰⵍ ⵜⵉⴳⵔⴰⵖⵍⴰⵏⵉⵏ ⵏ ⵜⴷⴰⵎⵙⴰ ⴷ ⵓⵥⵕⴼ, ⵙ ⵓⵏⵛⴽ ⵏ ⵉⵎⵣⴷⴰⵖⵏ ⵏⵏⵙ ⵉⵍⴽⵎⵏ 1,3 ⵎⵍⵢⴰⵕ  ⴷ ⵓⴳⵓⴷⵎ ⵏⵏⵙ ⵉⴳⴳⵓⵜⵏ, ⴷ ⵓⵎⵢⴰⵏⴰⵡ ⵏ ⵜⵥⴹⴰⵕⵉⵏ ⵏⵏⵙ ⵜⵉⴳⴰⵎⴰⵏⵉⵏ ⴷ ⵜⴳⴰⵡⵎⵍⴰⵏⵉⵏ ⴷ ⵜⴰⵔⴳⴰⵡⵎⵍⴰⵏⵉⵏ ⵍⵍⵉ ⴼ ⵓⵔⵜⴰ ⵉⵍⵍⵉ ⵓⵙⵙⴰⵔⵓ ⵙ ⵎⴰⴷ ⵉⴳⵓⵎⵏ ⴷ ⵎⴰⴷ ⵢⵓⵙⴰⵏ.

ⵉⵖⵔⴰ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵛⵛⵉⵍ ⵏ ⵡⴰⵣⵣⴰⵣ ⵏ ⵡⴰⵏⵢⴰ ⵏ ⵓⵙⵉⴷⴼ ⴰⴷⵎⵙⴰⵏ ⵖ ⵓⵎⵏⵥⴰⵡ ⵏ ⵉⴼⵔⵉⵇⵢⴰ, ⵖⵎⴽ ⴰⵏⵏ ⵓⵍⴰ ⴷ ⵓⵣⵣⵔⴰⵢ ⵏ ⵉⵍⵓⴳⵏⵏ ⵏ ⵜⵙⵎⴰⴹⴰⵍⵜ ⵙ ⴰⵢⵍⵍⵉ ⵉⵍⵍⴰⵏ ⵖ ⵚⴰⵃⴰ ⵏ ⵜⵎⵉⵣⴰⵔ ⵏ ⵉⴼⴼⵓⵙ, ⴷ ⵓⴼⵓⵖ ⵏ ⵜⵓⴼⵔⵉⵏⵜ ⵜⴰⵙⵔⵜⴰⵏⵜ ⴷ ⵜⴷⵎⵙⴰⵏⵜ ⵜⴰⵎⴰⵢⵏⵓⵜ ⵉⵛⵛⵓⴽⴽⴰⵏ ⵜⵉⴳⵎⵉ ⵏ ⵜⵎⵉⵣⴰⵔ ⵏ ⵓⵎⵏⵥⴰⵡ ⵖ ⵉⴳⵔⴰⵏ ⴰⴽⴽⵯ, ⵉⵙⵙⵓⵜⴳ ⴰⵙⵎⴰⵇⵇⵍ ⵏ ⴱⴰⴱ ⵏ ⵡⴰⴷⴷⵓⵔ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵃⵎⴰ ⴰⴷ ⵜⵉⵍⵉ “ ⵉⴼⵔⵉⵇⵢⴰ ⵜⴰⵎⴰⵢⵏⵓⵜ, ⵉⴼⵔⵉⵇⵢⴰ ⵉⵍⴰⵏ ⴰⴷⴷⵓⵔ ⵙ ⵜⵎⴰⴳⵉⵜ ⵏⵏⵙ, ⵉⵛⵛⵓⴽⴽⴰⵏ ⴰⵣⵎⵣ ⵏⵏⵙ, ⵉⴼⵔⵉⵇⵢⴰ ⵉⴳⴰⵏ ⵜⵉⵍⴻⵍⵍⵉⵜ ⵙⴳ ⵉⵙⴽⵔⴰⴼ ⵏ ⵜⴷⵢⵓⵍⵓⵊⵉⵜ ⴷ ⵜⵎⵓⴽⵔⵉⵙⵉⵏ ⵣⵔⵉⵏⵉⵏ, ⵉⴼⵔⵉⵇⵢⴰ ⵉⵣⵄⵎⵏ ⵉⵣⵡⵓⵔⵏ ⵙ ⵜⵙⵏⵜⴰⵢⵜ”.

ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵎⴰⵔⵉ ⴰⵎⵣⵡⴰⵔⵓ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵎⴰⵙⵙ ⵄⴰⴱⴷⵚⵚⴰⵎⴰⴷ ⵇⵢⵢⵓⵃ ⵎⴰⵙ ⵜⵙⵔⵙ “ⵜⵎⵢⴰⵇⵇⴰⵏⵜ ⵏ ⴽⵉⴳⴰⵍⵉ” ⵉⵥⵍⵉⵏ ⵙ ⵓⵕⵚⵚⵓ ⵏ “ⵜⵙⴳⴰ ⵜⴰⵎⵏⵥⴰⵡⵜ ⵜⴰⴼⵔⵉⵇⵉⵜ ⵏ ⵓⵙⵏⴼⵍ » (ZLECAF)  ⵉⵍⵍⴰⵏ ⵖ ⵓⵣⵣⴳⵉⵔ ⵙⴳ 30 ⵎⴰⵢⵢⵓ 2019, ⴽⵉⴳⴰⵏ ⵏ ⵜⵏⵥⴰⵕ ⴷⴰⵜ ⵏ ⵉⴳⵎⴰⵎⵏ ⵏ ⵉⴱⵕⵍⴰⵎⴰⵏⵏ ⵉⴼⵔⵉⵇⵉⵢⵏ, ⵖ ⵉⵍⵍⴰ ⵓⵎⵙⴰⵙⴰ ⵏ ⵜⵣⵣⵔⴰⴼⵉⵏ ⵜⵉⵏⴰⵎⵓⵔⵉⵏ ⴷ ⵜⵓⵎⴰⵢⵜ ⵏ ⵜⵎⵢⴰⵇⵇⴰⵏⵜ ⴷ ⵉⴱⵕⵓⵟⵓⴽⵓⵍⵏ ⵏⵏⵙ, ⴰⵎⵢⴰⵡⴰⵙ ⴰⴽⴷ ⵜⵎⴰⵡⵙⴰⵙⵉⵏ ⵃⵎⴰ ⴰⴷ ⵢⵉⵍⵉ ⴰⵎⵛⴰⵛⴽⴰ ⵖ ⵜⵙⵔⵜⴰⵢ ⵏ ⵓⵙⵖⵣⵏ ⴷ ⵓⵥⵕⴼ ⴷ ⵜⴷⵉⵡⴰⵏⵜ ⵖ ⵜⵎⵢⴰⵇⵇⴰⵏⵉⵏ ⵜⵉⵙⵉⵏⵔⴰⵏⵉⵏ ⵏⵖ ⵜⵉⴳⵜⵉⵔⴰⵏⵉⵏ  ⵏⴳⵔ ⵜⵎⵉⵣⴰⵔ ⴰⴽⴽⵯ, ⵖⵎⴽ ⴰⵏⵏ ⵓⵍⴰ ⴷ ⵜⵔⵓⴱⴱⴰ ⵜⵉⴷⵎⵙⴰⵏⵉⵏ ⵜⵉⵙⴳⴰⵡⴰⵏⵉⵏ ⵖ ⵓⵎⵏⵥⴰⵡ ⴰⴼⵔⵉⵇⵉ.  

ⵜⵎⵍⴰ ⴷ ⵜⴰⵎⴰⵔⵉⵜ ⵜⵉⵙ ⵙⵏⴰⵜ ⵏ ⵓⵏⵙⵙⵉⵅⴼ ⵏ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ ⵎⴰⵙⵙⴰ Haidara Aichata ⵙ ⵓⵣⵎⵣⵣⵓ ⴰⴷ ⴰⵙⵏⵉⵎⵎⵔ ⵏⵏⵙ ⵍⵍⵉⵖ ⵉⵙⴱⵔⵔⴽ ⵓⴱⵕⵍⴰⵎⴰⵏ ⴰⵎⵖⵔⵉⴱⵉ ⵜⴰⵙⵎⵓⵏⵉ ⴰⴷ ⵉⵙⵜⴰⵡⵀⵎⵎⴰⵏ, ⵜⵙⵙⵉⵙⴼⵉⵡ ⵎⴰⵙ ⵉⵍⵍⴰ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ ⴷ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵖ ⵓⵙⵔⵓⵙ ⵏ ⵜⵣⵣⵔⴰⴼⵉⵏ ⴷ ⵜⵎⵢⴰⵇⵇⴰⵏⵉⵏ ⵖ ⵓⵙⵡⵉⵔ ⴰⴼⵔⵉⵇⵉ. ⵜⵣⵎⵎⵉⵎ ⵎⴰⵙ ⵉⵣⵡⴰⵔ ⵍⵎⵖⵔⵉⴱ ⵖ ⵓⵎⵏⵉⴷ ⵏ ⵓⵙⵏⴼⵍ ⵏ ⵓⵙⵖⵏⵣⵉ ⴷ ⵜⴷⴰⵎⵙⴰ ⵖ ⵜⵙⴳⴳⵉⵡⵉⵏ ⵏ ⵉⴼⵔⵉⵇⵢⴰ.

ⵉⵙⴷⴷⵉⴷ ⵎⴰⵙⵙ Albert M. Muchanga ⴰⵎⴰⵍⴰⵍ ⵏ ⵜⴰⵎⵓⵏⵜ ⵜⴰⴼⵔⵉⵇⵉⵜ ⵉ ⵓⵙⵖⵏⵣⵉ ⴷ ⵜⵎⴳⵓⵔⵉ ⴼ ⵓⵛⵛⵉⵍ ⵏ ⵜⴰⵣⵣⴰⵣⵜ ⵖ ⵓⵙⵖⵣⵏ ⵏ ⴽⵓ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ ⵏ ⵜⵎⵢⴰⵇⵇⴰⵏⵜ ⵏ ⴽⵉⴳⴰⵍⵉ ⵉⵥⵍⵉⵏ ⵙ ⵓⵙⵔⵓⵙ ⵏ “ⵜⵙⴳⴰ ⵜⴰⵎⵏⵥⴰⵡⵜ ⵜⴰⴼⵔⵉⵇⵉⵜ ⵏ ⵓⵙⵏⴼⵍ ⵉⵍⴻⵍⵍⵉ“ (ZLECAF), ⵎⴰⵙⵙ Mc Henry Venaani, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ ⵖ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ, ⵏⵜⵜⴰⵏ ⵉⵙⴷⴷⵉⴷ ⴼ ⵓⵅⵎⵎⴻⵎ ⵖ ⵉⵄⵔⵔⵉⵎⵏ ⴷ ⵜⵎⵖⴰⵔⵉⵏ ⵍⵍⵉⵖ ⴳⴰⵏ ⴰⴳⵍⴰ ⵏ ⵉⴼⵔⵉⵇⵢⴰ ⴷ ⵉⵎⴰⵙⵙⵏ ⵏ ⵜⴳⵎⵉ ⵏⵏⵙ.

ⵖ ⵜⴳⵓⵔⵉ ⵏⵏⵙ, ⵉⵎⵍⴰ ⴷ ⵎⴰⵙⵙ ⵎⵓⵍⴰⵢ ⵃⴰⴼⵉⴹ ⵍⵄⴰⵍⴰⵎⵉ, ⴰⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵓⵙⵖⵏⵣⵉ ⴷ ⵜⴷⴰⵎⵙⴰ ⵜⴰⵣⴳⵣⴰⵡⵜ ⴷ ⵜⵎⵓⵟⵟⵓⵏⵜ ⵎⴰⵙ ⵉⵍⵍⴰ ⵓⵙⵖⵏⵣⵉ ⵊⴰⵔ ⵉⵡⴰⵏⴽⵏ ⵏ ⵓⵎⵏⵥⴰⵡ ⴰⴼⵔⵉⵇⵉ ⴷⴷⵓ ⵏ ⵉⵏⴰⵔⵓⵣⵏ ⵏ ⵉⵎⴰⴷⴰⵏⵏ ⵏ ⵓⵎⵏⵥⴰⵡ, ⵉⵍⵉⵏⵜ ⴳⵉⵙ ⵜⵎⵓⴽⵔⵉⵙⵉⵏ ⵉⵣⴷⵉⵏ ⴷ ⵉⵡⵜⵜⴰ ⴷ ⵡⴰⵙⵙⴰⵢ ⵏ ⵉⵡⴷⴰⵏ ⴷ ⵜⴳⵓⵔⴰ, ⵢⵉⵏⵉ ⵎⴰⵙ ⵔⴰⴷ ⵉⴼⴽ ⵓⵙⵎⵀⵍ ⵏ ⵜⵎⵢⴰⵇⵇⴰⵏⵜ ⵏ ⵓⵙⵏⴼⵍ ⵉⵍⴻⵍⵍⵉ ⵊⴰⵔ ⵉⵡⴰⵏⴽⵏ ⵏ ⵓⵎⵏⵥⴰⵡ ⵉⴼⵙⵙⴰⵢⵏ ⵉ ⵜⵎⵓⴽⵔⵉⵙⵉⵏ ⴰⴷ, ⴰⵢⵍⵍⵉ ⵔⴰⴷ ⵉⵙⵙⵎⵖⵔ ⵜⴰⵔⴰⵔⵉⵢⵜ ⴷ ⵜⴳⵎⵉ ⵖ ⵉⴼⵔⵉⵇⵢⴰ. ⵖ ⵓⵎⵏⴰⴹ ⴰⴷ, ⵉⵖⵔⴰ ⵎⴰⵙⵙ ⴰⵎⵡⵙⴰⵙ ⵉ ⵓⵙⵔⵇⴱ ⵏ ⵜⵎⵙⵙⵏⵜⴰⵢ ⵜⵉⴼⵔⵉⵇⵉⵢⵉⵏ ⴷ ⵓⵙⵔⵇⴱ ⵏ ⵜⵡⵓⵔⵉ ⵏ ⵜⵎⴳⵓⵔⵉ ⴷ ⵉⵢⴰⴼⵓⵜⵏ ⵉⴼⵔⵉⵇⵉⵢⵏ ⴷ ⵓⵙⴽⴰⵔ ⵏ ⵓⴳⴰⴷⴰⵣ ⴰⴼⵔⵉⵇⵉ ⵉⵛⵛⴰⵔⵏ.

ⵖ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵎⴰⵙⵙ ⵎⵓⵃⵙⵉⵏ ⵍⵊⴰⵣⵓⵍⵉ, ⴰⵎⴰⵡⵙⴰⵙ ⴰⵎⴰⵔⵉ ⴷⴰⵔ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵉⵣⴷⵖⵏ ⴳ ⴱⵕⵕⴰ ⵎⴰⵙ ⵜⴳⴰ “ⵜⵙⴳⴰ ⵜⴰⵎⵏⵥⴰⵡⵜ ⵜⴰⴼⵔⵉⵇⵉⵜ ⵏ ⵓⵙⵏⴼⵍ ⵉⵍⴻⵍⵍⵉ »(ZLECAF) ⵜⴰⵎⵙⵙⵉⵍⵉⵜ ⵏ ⵜⴳⵎⵉ ⵖ ⵉⴼⵔⵉⵇⵢⴰ, ⵉⵙⴰⵡⵍ ⵓⵍⴰ ⴼ ⵡⴰⵜⵉⴳ ⵉⵍⵍⴰⵏ ⴷⴰⵔ ⵜⵣⵣⵉⴳⵣⵜ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵉⵏⵢⴰⵍⴽⴰⵎⵏ ⵍⵍⵉ ⵔⴰⴷ ⵉⵙⵔⵙ ⵜⵉⴼⴰⴷⵉⵡⵉⵏ ⵏ ⵓⵎⵓⵔⵙ ⵏ ⵓⵙⵏⴼⵍ ⵏ ⵜⴷⴰⵎⵙⴰ ⴷ ⵓⵙⵖⵏⵣⵉ ⵏⴳⵔ ⵜⵉⵎⵉⵣⴰⵔ ⵏ ⵉⴼⵔⵉⵇⵢⴰ, ⵉⵖⵔ ⵉ ⵓⵙⵀⵡⵏ ⵏ ⵜⴱⵔⵉⴷⵉⵏ ⴷ ⵜⵎⵙⴽⴰⵔ ⵃⵎⴰ ⴰⴷ ⵜⵉⵍⵉ ZLECAF ⵖ ⵜⵉⵍⴰⵡⵜ.

ⵔⴰⴷ ⵙⵓⵍⵏⵜ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⵉⵛⵛⴰⵔⵏ ⵏ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵓⵙⵖⵏⵣⵉ ⴷ ⵜⴷⵉⵡⴰⵏⵜ ⴷ ⵜⵣⵡⴰⴳⵜ, ⴷ ⵜⵙⵇⵇⵉⵎⵜ ⵜⴰⵎⵖⵍⴰⵍⵜ ⵏ ⵡⴰⵙⵙⴰⵢ ⴷ ⵜⵎⴳⵓⵔⵉ ⴷ ⵉⵏⵢⴰⵍⴽⴰⵎⵏ ⴷ ⵜⵥⴹⴰⵕⵉⵏ ⴷ ⵜⵎⴰⵙⵙⴰⵏⵉⵏ ⴷ ⵜⵉⴽⵏⵓⵍⵓⵊⵉⵜ ⵏ ⵓⴱⵕⵍⴰⵎⴰⵏ ⵏ ⴽⵓ-ⵉⴼⵔⵉⵇⵢⴰ ⴰⵔ ⴰⵙⵙ ⵏ ⵓⵙⵉⵎⵡⴰⵙ 06 ⵎⴰⵕⵚ. ⴷⵔⵓⵏ ⴳⵉⵙ ⵉⵎⴰⵡⵙⴰⵙⵏ ⴷ ⵉⴳⵎⴰⵎⵏ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⴷ ⵜⵎⵓⵏⵉⵏ ⵜⵉⵏⵎⵏⴰⴹⵉⵏ ⴷ ⵜⵎⵏⵥⴰⵡⵉⵏ ⴷ ⵉⵎⵓⵣⴰⵢⵏ, ⵔⴰⴷ ⵢⵉⵍⵉ ⵓⵎⴹⴰⴽⴰⵕ ⴼ ⵓⴷⵎⴰⵡⵏ ⵉⵥⵍⵉⵏ ⵙ ⵉⵙⵍⴳⵏⵏ ⴷ ⵜⵎⵔⵙⴰⵍ ⴷ ⵍⵓⵊⵉⵙⵜⵉⴽ ⴷ ⵜⵉⴽⵏⵓⵍⵓⵊⵉⵜ ⵉⵣⴷⵉⵏ ⴷ ⵢⵉⴳⵔ ⵏ ⵓⵙⵖⵏⵣⵉ ⴷ ⵡⴰⵙⵙⴰⵢ, ⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵏ ⵉⵏⴰⵎⵓⵔⵏ ⵖ ⵓⵙⵏⴰⵍ ⵏ ⵉⵙⵏⴼⵍⵏ ⵏ ⵓⵙⵖⵏⵣⵉ ⵊⴰⵔ ⵉⵡⴰⵏⴽⵏ ⵉⴼⵔⵉⵇⵉⵢⵏ.

ⵖ ⵜⴳⵉⵔⴰ, ⵔⴰⴷ ⵙⴽⵔⵏ ⵉⴳⵎⴰⵎⵏ ⵏ ⵙⵏⴰⵜ ⵜⵙⵇⵇⵉⵎⵉⵏ ⴰⴷ ⵢⴰⵏ ⵓⵔⵣⴰⴼ ⵉ ⵓⴼⵜⴰⵙ ⴰⵏⴰⵎⵎⴰⵙ ⵏ ⵟⴰⵏⵊⴰ, ⴰⴷ ⴳⵉⵙ ⵥⵕⵉⵏ ⵜⵉⵥⴹⴰⵕⵉⵏ ⵍⵍⵉ ⴳⵉⵙ ⵉⵍⵍⴰⵏ ⴰⵛⴽⵓ ⵉⴳⴰ ⴰⵣⵣⴳⵯⵔ ⵏ ⵓⵙⵖⵏⵣⵉ ⴰⴳⵔⴰⵖⵍⴰⵏ ⵖ ⵜⵙⴳⴰ ⴰⴷ.