ⵜⴰⴳⵓⵔⵉ ⵏ ⵎⴰⵙⵙ ⴰⵎⴰⵔⵉ ⵎⵓⵃⴰⵎⵎⴰⴷ ⴰⵃⵡⵉⵟ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵓⵙⵖⵓⴷⵓ ⵏ ⵡⴰⵏⴰⵡⵏ ⵏ ⵜⵓⴷⵔⵜ ⴷ ⵉⵙⵏⴼⵍⵏ ⵊⴰⵔ ⵡⴰⵎⵓⵏⵏ ⵓⵖⵔⵉⵎⵏ ⴷ ⵜⴷⵍⵙⴰ, ⵖ ⵜⵙⵎⵓⵏⵉ ⵏ ⵜⵙⵇⵇⵉⵎⵜ

ⴰⵣⵓⵍ ⴼⵍⵍⴰⵡⵏ, 

ⵉⵙⵜ ⵎⴰⵙⵙⴰ ⴷ ⵉⴷ ⵎⴰⵙⵙ ⵉⴳⵎⴰⵎⵏ ⵏ ⵜⵙⵇⵇⵉⵎⵜ;

ⵉⵏⴱⴳⵉⵡⵏ ⵏ ⵍⵎⵖⵔⵉⴱ ;

ⵜⵉⵏⴳⴳⵯⴰ ⴷ ⵉⵏⴳⴳⵯⴰ ⵏⵏⵡ.

ⵉⵇⵇⴰⵏ ⴷ ⴰⴷ ⵣⵡⵔ ⵙⵔⵓⵏ ⵙⴱⵔⵔⴽⵖ ⵖ ⵓⵏⵎⵓⵇⵇⴰⵔ ⴰⴷ, ⵖⵉ ⴷ ⵖ ⵕⵕⴱⴰⵟ ⵖ ⵓⵙⴰⵢⵔⴰⵔ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ, ⵃⵎⴰ ⴰⴷ ⵏⵣⵣⵉⴳⵣ ⵖ ⵓⵎⵙⴰⵡⴰⵍ ⵏⵏⵖ ⵉⵏⵏⵓⵕⵥⵎⵏ ⵖ ⵓⴳⵏⵙ ⵏ ⵜⵎⵙⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵉ ⵜⴰⵎⵓⵏⵜ ⵅⴼ ⵓⵏⴰⵎⵎⴰⵙ, ⵖⵎⴽ ⴰⵏⵏ ⵓⵍⴰ ⵖ ⵓⴳⵏⵙ ⵏ ⵜⵙⵇⵇⵉⵎⵜ ⵏ ⵓⵙⵖⵓⴷⵓ ⵏ ⵜⵓⴷⵔⵜ ⴷ ⵉⵙⵏⴼⵍⵏ ⵊⴰⵔ ⵡⴰⵎⵓⵏⵏ ⵓⵖⵔⵉⵎⵏ ⴷ ⵜⴷⵍⵙⴰ, ⵏⴻⵏⵏⵓⵔⵣ ⴰⴷ ⵏⵚⴽⵓ ⵢⴰⵏ ⵓⵙⵡⵉⵏⴳⵎ ⵉⵛⵛⴰⵔⵏ ⴼ ⵜⵎⵙⴰⵔⵉⵏ ⵉⴽⵛⵎⵏ ⵖ ⵜⵎⵥⵍⴰⵢⵉⵏ ⵏ ⵜⵙⵇⵇⵉⵎⵜ ⵏⵏⵖ, ⵏⵔⴰ ⴰⴷ ⵏⵙⵎⵓⵏ ⵉⵙⵡⵉⵏⴳⵉⵎⵏ ⵏⵏⵖ ⵃⵎⴰ ⴰⴷ ⵏⵉⵥⴹⵉⵕ ⴰⴷ ⵏⴻⵏⵢⵍⴽⴰⵎ ⴳⵔⴰⵜⵏⵖ ⵖ ⵜⵉⴼⴰⵡⵜ ⵏ ⵢⴰⵜ ⵜⵎⵥⵕⴰ ⵓⵕⵓ-ⵜⴰⵏⴰⵎⵎⴰⵙⵜ ⵉⴱⴷⴷⵏ ⴼ ⴰⵢⵍⵍⵉ ⵏⴷⵔⵓ ⵖ ⵓⵙⵡⵉⵏⴳⵎ ⴷ ⵜⴷⵍⵙⴰ ⴷ ⵜⴼⴼⵓⴳⵏⴰ, ⵏⵔⴰⵔ ⵜⴰⵢⵏⵉⵜ ⵓⵍⴰ ⵙ ⵜⵎⵥⵍⴰⵢ ⵏⵏⵖ ⵓⵕⵓ-ⵜⵉⵏⴰⵎⵎⴰⵙⵉⵏ ⵉⴳⴰⵏ ⵜⵉⴷⵙⵍⴰⵏⵉⵏ, ⵙⵍⵡⴰⵏ ⴰⴽⴽⵯ ⵍⵍⵉⵖ ⵉⴳⴰ ⵍⵃⴰⵍ ⵢⴰⵏ ⵉⵎⵔⵙⵉ ⵉⴳⴰⵏ ⵓⴷⴷⵉⵔ, ⴰⴷⵙⵍⴰⵏ ⴷ ⵡⵉⵏ ⵓⵣⵎⵣ ⴰⴷ, ⵉⴳⴰ ⵜ:” ⴰⵎⵢⴰⵏⴰⵡ ⴰⴷⵙⵍⴰⵏ ⴷ ⵓⵙⵏⵉⵍⵙ ⵖ  ⵜⵙⴳⴰ ⵓⵕⵓ-ⵜⴰⵏⴰⵎⵎⴰⵙⵜ”, ⵍⵍⵉⵖ ⵉⴳⴰ ⵜⴰⵎⵙⵙⵉⵍⵉⵜ ⵏ ⵓⵙⴱⵓⵖⵍⵓ ⴷ ⵓⵙⵏⴼⵍ ⴰⴷⵍⵙⴰⵏ.

ⵖ ⵓⵎⵏⴰⴹ ⴰⴷ, ⵔⴰⴷ ⵏⴱⴷⵔ ⵙ ⵉⵣⵡⴰⵔ ⴰⵍⵖⵓ ⵏ « ⵍⵢⵓⵏⵉⵙⴽⵓ ⴰⴳⵔⴰⵖⵍⴰⵏ ⵉⵥⵍⵉⵏ ⵙ ⵓⵎⵢⴰⵏⴰⵡ ⴰⴷⵍⵙⴰⵏ ⵉⵍⵍⴰⵏ ⵙ ⵜⴽⵎⵙⵉⵙⵉⵜ ⵖ ⵓⴳⵔⴰⵡ ⴰⴳⵔⴰⵖⵍⴰⵏ ⵏ ⵜⵎⴰⴷⴷⴰⵙⵜ ⴰⴷ ⵏ ⵜⵎⵜⵜⴰ ⵉⵎⵓⵏⵏ, ⵖ ⵓⴳⵔⴰⵡ ⴰⵎⴰⵜⴰⵢ ⵏ ⵍⵢⵓⵏⵉⵙⴽⵓ ⵖ ⵜⵙⵓⵜⵍⵜ ⵏⵏⵙ ⵜⵉⵙ 31 ⵉⵍⵍⴰⵏ ⵖ ⴱⴰⵔⵉⵣ ⵖ 02 ⵏⵓⵡⴰⵏⴱⵉⵔ 2001, ⴰⴳⵔⴰⵡ ⴰⵏⵏ ⵉⴳⴰⵏ ⵜⴰⵙⵎⵓⵏⵉ ⵜⴰⵎⵣⵡⴰⵔⵓⵜ ⵏ ⵉⵎⴰⵡⵙⴰⵙⵏ ⴷⴼⴼⵉⵔ ⵏ ⵜⵎⵙⴰⵔⵉⵏ ⵀⵔⵛⵏⵉⵏ ⵏ 11 ⵛⵓⵜⴰⵏⴱⵉⵔ 2001, ⴰⴳⵔⴰⵡ ⴰⴷ ⵉⴳⴰⵏ ⴰⵣⵎⵣⵣⵓ ⵉ ⵉⵡⴰⵏⴽⵏ ⴰⴷ ⵎⵛⴰⵛⴽⴰⵏ ⴼ ⵡⴰⵜⵉⴳ ⵏ ⴰⵎⵙⴰⵡⴰⵍ ⴰⵖⵔⵎⴰⵏ, ⴰⵎⵙⴰⵡⴰⵍ ⵊⴰⵔ ⵜⴷⵍⵙⵉⵡⵉⵏ ⵜⵉⵏⴼⴳⴰⵏⵉⵏ ⴰⴽⴽⵯ, ⵍⵍⵉⵖ ⵉⴳⴰ ⵢⴰⵏ ⵓⵎⵏⵉⴷ ⵎⵓ ⵏⵥⴹⴰⵕ, ⴰⵎⵏⵉⴷ ⵉⵥⵉⵍⵏ ⵉ ⵓⴼⵔⴰ ⴰⵎⴰⴹⵍⴰⵏ, ⵉⴳ ⵓⵍⴰ ⵜⴰⴳⵉⵜ ⵜⴰⵎⴳⵔⵓⵜ ⵉ ⵎⴰⴷ ⵉⵜⵜⵓⵙⴽⴰⵔⵏ ⴼ « ⵓⵣⵓⵛⵛⵍ» ⵏ ⵜⵎⴰⵖⵜ ⴷ ⵓⵎⵏⵣⴰⵖ ⵏ ⵜⵖⵔⵎⵉⵡⵉⵏ ⴷ ⵜⴷⵍⵙⵉⵡⵉⵏ. 

ⵉⴳⴰ ⵓⵡⵜⵜⴰⵙ ⴰⵙⵉⵍⴰⵏ ⵏ ⵓⵍⵖⵓ ⴰⴷ ⴰⵎⴰⴹⵍⴰⵏ ⴰⴷ ⵉⵙⴽⵔ ⵖ ⵓⵎⵢⴰⵏⴰⵡ ⵢⴰⵏ ⵓⵎⵎⵉⵥ ⴰⵏⴼⴳⴰⵏ ⴷ ⵜⵔⵙⵍⵜ ⵏ ⵡⴰⵢⴷⴰ ⵉⵛⵛⴰⵔⵏ ⵏ ⵜⴼⴳⴰⵏⵉⵜ...ⵉⵙ ⴰⴽⴽⵯ ⵉⵙⵙⵎⵖⵔ ⵙ ⵡⴰⵜⵉⴳ ⵏ ⵓⵎⵢⴰⵏⴰⵡ ⴰⴷ ⵙ ⵓⵙⵡⵉⵔ ⵏ ⵓⵎⵢⴰⵏⴰⵡ ⴰⴱⵢⵓⵍⵓⵊⵉ ⵉ ⴽⵓ ⵎⴰⵖ ⵜⵍⵍⴰ ⵜⵓⴷⵔⵜ, ⵢⵓⴳⵔ ⴰⴽⴽⵯ ⵜⵉⵎⴰⴳⵉⵜⵉⵏ ⵇⵇⵏⵏⵉⵏ, “ⵜⵉⵎⴰⴳⵉⵜⵉⵏ ⵏⵇⵇⴰⵏⵉⵏ” ⵖⵎⴽ ⵍⵍⵉ ⴰⵙⵏⵜ ⵉⴳⴰ ⵓⵎⴰⵔⴰ ⴰⵄⵕⴰⴱ ⴰⵍⵓⴱⵏⴰⵏⵉ ⴰⵎⵉⵏ ⵎⴰⵄⵍⵓⴼ, ⴳⴰⵏⵜ ⵓⴳⴳⴰⵔ ⵏ ⵉⵙⵡⵉⵏⴳⵉⵎⵏ ⵉⵙⵉⵍⴰⵏⵏ ⵉⵜⵜⵉⵏⵉⵏ ⵎⴰⵙ ⵎⵎⴰⵖⵏ ⴼ ⵜⵎⵥⵍⴰⵢ ⵜⵉⴷⵖⵔⴰⵏⵉⵏ, ⴰⴳⵉⵏ ⵜⵉⵢⴰⴼⵓⵜⵉⵏ ⵏ ⵓⵏⵏⵓⵕⵥⵎ ⴰⴷⵍⵙⴰⵏ ⴷ ⵓⵖⵔⵎⴰⵏ, ⴰⴳⵉⵏ ⵓⵍⴰ ⴰⴷ ⵙⵙⵏⵏ ⵙ ⵡⴰⵜⵉⴳ ⵏ ⵓⵎⵣⴰⵔⴰⵢ.   

ⵖⵉ ⴷ ⴰⵖ ⵉⵍⵍⴰ ⵓⵙⵡⵉⵏⴳⵎ ⵏ ⵓⵙⵏⴼⵍ ⵏ ⵉⵙⵡⵉⵏⴳⵉⵎⵏ ⴷ ⵜⵙⵓⵎⵔⵉⵏ ⵉⴼⵔⴽⵏ ⵙ ⵓⵎⵙⴰⵡⴰⵍ ⵏ ⵜⴷⵍⵙⵉⵡⵉⵏ ⴷ ⵓⵙⵎⴰⴷ ⵏⴳⵔⴰⵜⵜⵙⵏⵜ, ⴷ ⵡⴰⵜⵉⴳ ⵏ ⵓⵎⵣⴰⵔⴰⵢ  ⴷ ⵓⵎⵢⴰⵏⴰⵡ, ⵃⵎⴰ ⴰⴷ ⵉⵍⵉⵏ ⵖ ⵜⵎⵢⴰⵇⵇⴰⵏⵜ ⵉⵍⵍⴰⵏ ⴼ ⵉⵡⴰⵏⴽⵏ ⵉⴳⵎⴰⵎⵏ, ⵜⴳ ⵢⴰⵏ ⵡⴰⵔⵔⴰ ⵏ ⵜⵖⴰⵔⵉⵡⵉⵏ ⵉⵙⵙⵎⵖⵔⵏ ⵙ ⵓⴼⵔⴰⴽ ⴰⵏⴼⴳⴰⵏ ⵍⵍⵉ ⵢⵓⴳⵉⵏ ⴽⵓ ⴰⵏⴰⵡⵏ ⵏ ⵓⵔⴳⴰⵍ ⴰⵏⵉⵎⴰⵏ, ⵉⵣⵣⵉⴳⵣ ⵙ ⵢⴰⵏ ⵓⵙⵎⴰⵇⵇⵍ  ⴰⴳⵔⴰⵖⵍⴰⵏ ⵉⵎⵏⴰⴷⵏ ⴰⴷ ⵢⵉⵍⵉ ⵉⵎⴰⵏ ⵏ ⵓⴼⵔⴰ ⴷ ⵡⴰⵜⵉⴳⵏ ⵏ ⵓⵏⵏⵓⵕⵥⵎ ⴷ ⵓⵎⵙⴰⵡⴰⵍ ⴷ ⵓⵙⵏⴼⵍⵓⵍ ⴷ ⵜⵎⵙⴽⴰⵔ ⵜⵉⴷⵉⵎⵓⵉⵇⵔⴰⵟⵉⵢⵉⵏ ⵙ ⵓⵏⴰⵎⴽ ⵏⵏⵙ ⴰⵙⵉⵍⴰⵏ ⴷ ⵓⵙⵔⵜⴰⵏ ⴷ ⵓⴷⵙⵜⴰⵔ ⴷ ⵓⵣⵣⵔⵉⴼ ⴷ ⵓⴷⵍⵙⴰⵏ ⴷ ⵡⵉⵏ ⵓⵙⵡⵉⵏⴳⵎ. ⵖⵉⴽ ⴰⵏⵏ ⴰⴼ ⵉⴳⴰ ⵡⴰⵔⵔⴰ ⴰⴷ ⵢⴰⵏ ⵖ ⵉⴹⵕⵉⵚⵏ ⵉⵜⵔⴰⵔⵏ “ⵉⵎⵙⴽⴰⵔⵏ ⵏ ⵜⴼⵍⵙⴰⴼⵜ ⵜⴰⵎⴰⵢⵏⵓⵜ ⵏ ⵜⵖⴰⵔⵉⵡⵉⵏ” ⵎⴽ ⵏⵉⵜ ⵉⵏⵏⴰ ⵜⵉⵣⵉ ⴰⵏⵏ ⴰⵏⵎⵀⴰⵍ ⴰⵇⴱⵓⵔ ⵏ ⵍⵢⵓⵏⵉⵙⴽⵓ ⵎⴰⵙⵙ ⴽⵡⵉⵛⵉⵔⵓ ⵎⴰⵜⵙⵓⵔⴰ. 

ⴰⵙⵙ ⴰ, ⵎⵍⵍⵉⵖ ⴷ ⵉⴼⴼⵓⵖ ⵓⵍⵖⵓ ⴰⵎⴰⴹⵍⴰⵏ ⵖ ⵜⵣⵡⵉⵔⵉ ⵏ ⵜⵏⵉⴹⴼⵜ ⵜⵉⵙ ⴽⵕⴰⴹⵜ, ⵢⵉⵍⵉ ⵓⵍⴰ ⵓⴼⵔⴰⴽ ⵙ ⵡⴰⵜⵉⴳ ⵏ ⵓⵎⵢⴰⵏⴰⵡ ⴰⴷⵙⵍⴰⵏ ⴷ ⵓⵙⵏⵉⵍⵙ, ⵖⵎⴽ ⴰⵏⵏ ⴷ ⵓⴼⵔⴰⴽ ⵙ ⵜⵉⵍⵉⵜ ⵏ ⵜⴷⵍⵙⵉⵡⵉⵏ ⵥⵍⵉⵏⵉⵏ ⴳⴳⵓⵜⵏⵉⵏ ⵖ ⵡⴰⵎⵓⵏⵏ ⵏ ⵓⵎⴰⴹⴰⵍ, ⵓⵍⴰ ⵖ ⵡⴰⵎⵓⵏ ⵉⴳⴰⵏ ⴰⴽⴽⵯ ⵢⴰⵏ, ⴰⵔ ⵓⴽⴰⵏ ⵙⵓⵍ ⵏⵥⵕⵕⴰ ⵙ ⴽⵉⴳⴰⵏ ⵏ ⵓⵖⵉⵍⵓⴼ ⵎⴰⵙ ⵍⵍⴰⵏ ⴽⵔⴰ ⵏ ⵉⵎⵏⵖⵉⵜⵏ,  ⴷ ⵜⴽⵕⴹⵉ,ⵉⵍⵉⵏ ⵓⴷⵎⴰⵡⵏ ⵏ ⵓⴽⵙⴰⵏ ⴷ ⵜⴽⵕⴹⵉ ⴷ ⵓⵙⵏⵓⵃⵢⵓ, ⴷ ⵜⴷⵎⴰⵡⵉⵏ ⵏ ⵜⴰⴳⵯ ⵉⵜ ⵏ ⵡⴰⵢⵢⴰⴹ ⴷ ⵜⵓⵙⵙⵏⴰ ⵏⵏⵙ; ⵉⴳ ⵖ ⵓⵖⵉⵍⵓⴼ ⵎⴰⵙ ⵓⵔ ⵉⵍⵍⵉ ⵎⴰ ⴰⴷ ⵖⴰⵙ ⵖ ⵜⵎⵉⵣⴰⵔ ⵖ ⵉⵍⵍⴰ ⵓⵣⴷⴰⵔ-ⴰⴽⵙⴰⵍ, ⵎⴰⵛ ⵉⵍⵍⴰ ⴰⴽⴽⵯ ⵖ ⵜⵎⵉⵣⴰⵔ ⴷ ⵜⵙⴳⴳⵉⵡⵉⵏ ⵖ ⵜⵍⵍⴰ ⵜⵣⵣⵉⴳⵣⵜ; ⵜⵉⵍⵉ ⴳⵉⵙⵏⵜ ⵜⵙⴳⴰ ⵏⵏⵖ ⵓⵕⵓ-ⵜⴰⵏⴰⵎⵎⴰⵙⵜ ⵖ ⵍⵍⴰⵏ ⵉⵙⵓⵏⴰⴼ ⴰ, ⴰⵔ ⵓⴽⴰⵏ ⵙⵓⵍ ⵏⵥⵕⵕⴰ ⵎⴰⵙ ⵍⵍⴰⵏⵜ ⵜⵎⵙⴰⵔⵉⵏ ⴷ ⵉⴱⴽⴽⵉⴹⵏ ⵍⵍⵉ ⵉⵙⵎⵓⵙⵙⵓ ⵓⴽⵙⴰⵏ ⵏ ⵉⵡⵏⵏⴰ ⵏ ⵡⵉⵢⵢⴰⴹ, ⵉⴷⵍⵙⴰⵏⵏ, ⵉⵏⴰⵎⵓⵏⵏ, ⵉⵥⵓⵕⴰⵏⵏ, ⴷ ⵡⵉⵏ ⵓⵙⴳⴷ…

ⵉⵣⴷⵉ ⵓⵎⵏⵣⴰⵢ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⴰⴷ ⵏⵉⵔⵉ ⵜⴰⴼⴰⴷⴰ ⵏⵏⵖ ⵜⴰⵏⴼⴳⴰⵏⵜ, ⵏⵙⵙⵏ ⵉⵙ ⵏⵍⵍⴰ ⵖ ⵢⴰⵏ ⵓⵎⴰⴹⴰⵍ ⵎⵓ ⴳⴳⵓⵜⵏⵜ ⵜⴷⵍⵙⵉⵡⵉⵏ ⵏⵏⵙ, ⵉⵙⴳⴷⴰⵏ ⵏⵏⵙ,ⵜⵓⵜⵍⴰⵢⵉⵏ ⵏⵏⵙ, ⴷ ⵉⵖⴱⵓⵍⴰ ⵏⵏⵙ ⵉⵏⴰⵎⵓⵏⵏ, ⵉⵎⵣⵔⴰⵢⵏ ⴷ ⵉⴷⵍⵙⴰⵏⵏ...ⵉⴳⴰ ⵜ ⴰⴷ ⵏⵉⵔⵉ ⵎⴰⵙ ⵓⵔ ⵏⵓⴼⵉ ⴰⴷ ⵏⴱⵣⵣⵉⵣ ⴽⵔⴰ ⵏ ⵜⴷⵍⵙⴰ ⴰⴷ ⵜⴳ ⵜⴰⴷⵍⵙⴰ ⵜⴰⵢⴰⵏⵜ ⵏⵖ “ⵜⴰⴷⵍⵙⴰ ⵜⴰⵎⵙⴰⵔⵉⵜ”. ⵍⵍⵉⵖ ⵏⴳⴰ ⵉⴼⴳⴰⵏⵏ ⵉⵇⵇⴰⵏ ⴰⵖ ⴷ ⴰⴷ ⵏⵙⴼⵍ ⴰⵜⵉⴳⵏ ⵉⴷⵍⵙⴰⵏⵏ ⵥⵍⵉⵏⵉⵏ, ⵏⵓⵇⵇⵔ ⵉⵎⵣⴰⵔⴰⵢⵏ ⵍⵍⵉ ⵍⵍⴰⵏⵉⵏ, ⵖⵎⴽ ⴰ ⴷ ⴰⵙ ⵉⵜⵜⵓⵙⴽⴰⵔ ⵓⵎⴰⴹⴰⵍ, ⵙ ⵓⵎⵢⴰⵏⴰⵡ ⴰⴷ ⵉⵍⵍⴰⵏ ⴷⴰⵔ ⵉⵏⴰⵎⵓⵏⵏ ⵖ ⵜⴷⵍⵙⵉⵡⵉⵏ, ⵜⵉⵎⵢⵓⵔⵉⵏ, ⵜⵉⵎⵍⵙⵉⵜ, ⵜⵉⵏⵡⵉⵜ, ⵜⴰⵥⵓⵕⵉ, ⵜⵉⵎⵙⴽⴰⵔⵉⵏ, ⴰⵜⵉⴳⵏ, ⵉⵏⴳⵔⴰⵡⵏ ⵉⵏⴰⵎⴽⴰⵏⵏ ⴷ ⵡⵉⵏ ⵜⵙⵓⵏⴰⴳ, ⴷ ⵉⵙⵏⴼⵍⵏ ⴰⴽⴷ ⵜⵉⵍⴰⵡⵜ ⵜⴰⴷⵖⴰⵔⴰⵏⵜ ⴷ ⵓⵎⴰⴹⴰⵍ.

ⵉⴳⴰ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵙⵏⵉⵍⵙ ⵜⴰⴼⴰⴷⴰ ⵏ ⵜⵉⵍⵉⵜ ⵜⴰⵏⴼⴳⴰⵏⵜ ⴰⵎ ⴰⵎⵢⴰⵏⴰⵡ ⴰⴱⵢⵓⵍⵓⵊⵉ - ⵎⴽ ⵢⴰⴷ ⵏⵏⵉⵖ- ⵍⵍⵉ ⵙ ⵏⵙⵙⵏ ⵉⵙ ⵉⴳⴰ ⵢⴰⵜ ⵜⴼⴰⴷⴰ ⵏ ⵜⵣⵣⵉⴳⵣⵜ ⵏ ⵜⵓⴷⵔⵜ ⴷ ⵓⵖⵉⵎⵉ ⵏ ⵜⴷⵓⵔⵜ ⴷ ⵓⴼⴳⴰⵏ ⴷ ⴽⵓ ⵎⴰⴷ ⵉⴷⴷⵔⵏ ⵖ ⵉⴳⴳⵉ ⵏ ⵡⴰⴽⴰⵍ.

ⵉⴳⴰ ⵖ ⵜⵎⴰⵙⴰⵢⵜ ⵏⵏⵖ ⵏ ⵜⵉⵍⵉⵜ ⴷ ⵜⵉⵏ ⵜⵙⵓⵏⴰⴳ, ⵣⵡⴰⵔ ⴰⴷ ⵜⴳ ⵢⴰⵏ ⵓⵣⵓⵛⵛⵍ ⴰⵙⵔⵜⴰⵏ, ⴰⴷ ⵏⵎⵎⴰⵖ ⴼ ⵓⵃⵟⵟⵓ ⵏ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵓⵙⵏⵉⵍⵙ, ⵍⵍⵉⵖ ⵉⴳⴰ ⵓⵎⵄⵉⵏ ⵓⵔ ⵉⴷⵔⵓⵙⵏ ⴼ ⵓⵣⵓⵛⵛⵍ ⵏ ⵓⵃⵟⵟⵓ ⵏ ⵓⵎⵢⴰⵏⴰⵡ ⴰⴱⵢⵓⵍⵓⵊⵉ, ⵖⵎⴽ ⵍⵍⵉ ⵓⵔ ⵉⴷⵔⵓⵙ ⴼ ⵓⵣⵓⵛⵛⵍ ⵏ ⵓⵃⵟⵟⵓ ⵏ ⴽⵓ ⴰⵏⴰⵡⵏ ⵏ ⵉⵏⴳⵔⴰⵡⵏ ⵉⴽⵓⵍⵓⵊⵉⵢⵏ ⵏ ⵜⵓⴷⵔⵜ ⵏⵏⵖ ⵜⴰⵏⴼⴳⴰⵏⵜ.  

ⵖⵉⴽ ⴰ ⴷ, ⴰⴼ ⴷ ⵉⵇⵇⴰⵏ ⴰⴷ ⵏⵓⵇⵇⵔ ⵏⵖⵔ ⵉ ⵓⵡⵇⵇⵔ ⵏ ⵜⴷⵍⵙⵉⵡⵉⵏ ⵥⵍⵉⵏⵉⵏ ⵖ ⵡⴰⵎⵓⵏ ⴰⵎⵢⵉⵡⵏ ⴷ ⵡⴰⵎⵓⵏⵏ ⵥⵍⵉⵏⵉⵏ, ⵖ ⵜⵙⵔⵜⴰⵢ ⵏⵏⵖ, ⴷ ⵉⵖⴰⵡⴰⵙⵏ ⵏⵏⵖ, ⴷ ⵉⵣⵣⵔⴰⴼⵏ ⵏⵏⵖ, ⴷ ⵜⵎⵙⴽⴰⵔⵜ ⵏⵏⵖ ⵜⴰⴽⵓⵢⴰⵙⵜ, ⵖ ⵜⵙⵓⵏⴰⴳ ⵏⵏⵖ, ⵖ ⵉⵙⴳⴷⴰⵏ ⵏⵏⵖ, ⵖ ⵉⵖⴰⵡⴰⵙⵏ ⵏ ⵓⵙⵍⵎⴷ ⵏⵏⵖ ⴷ ⵓⵙⴳⵎⵉ ⵏⵏⵖ. ⵉⵇⵇⴰⵏ ⴷ ⴰⴷ ⵏⵎⵎⴰⵖ ⴼ ⵓⵙⴱⴷⴷⵉ ⵏ ⴽⵓ ⵓⴷⵎⴰⵡⵏ ⵏ ⵜⴽⵕⴹⵉ ⵏ ⵓⵙⴳⴷ ⴷ ⵜⵏⵛⵓⵔⵉⵜ ⴷ ⵓⵥⵓⵕ ⵖ ⵓⵎⴰⴹⴰⵍ ⵏ ⵖⵉⵍⴰⴷ, ⵉⵇⵇⴰⵏ ⴷ ⴰⴷ ⵏⴰⴳⵉ ⴰⵏⴰⵡⵏ ⵏ ⵓⵙⵎⵥⵥⵉ ⵙ ⵜⵓⵜⵍⴰⵢⵉⵏ ⴷ ⵜⵏⵜⴰⵍⵉⵡⵉⵏ ⵥⵍⵉⵏⵉⵏ, ⵙⵍⴰⵡⴰⵏ ⴰⴽⴽⵯ   ⵖ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵓⵥⵟⵟⴰ ⵏ ⵓⵏⵢⴰⵍⴽⴰⵎ ⴰⵏⴰⵎⵓⵏ.

ⵖ ⵜⴳⵉⵔⴰ, ⵏⵥ ⴹⴰⵔ ⴰⴷ ⵏⵙⵙⵏⵜⵉ ⴰⵙⵡⵉⵏⴳⵎ ⵏⴳⵔⴰⵜⵏⵖ ⵖ ⵜⵉⵔⵎⵉⵜⵉⵏ ⵏⵏⵖ ⴷ ⵎⴰ ⴰⴷ ⴰⵖ ⵉⵥⵍⵉⵏ, ⴷ ⴰⵢⵍⵍⵉ ⵙⴽⵔⵏⵜ ⵜⵎⵉⵣⴰⵔ ⵏⵏⵖ, ⴷ ⵎⴰⵙ ⴷ ⵉⵇⵇⴰⵏ ⴰⴷ ⵜ ⵙⴽⵔⵏⵜ ⵖ ⵓⵎⵢⴰⵏⴰⵡ ⴰⴷⵙⵍⴰⵏ ⴷ ⵓⵙⵏⵉⵍⵙ, ⴷ ⵜⵎⵓⴽⵔⵉⵙⵉⵏ ⵍⵍⵉ ⴷⵉⴷⵙ ⵉⵣⴷⵉⵏ ⵖ ⵓⵣⵣⵔⴰⴼ ⴷ ⵓⵣⵔⴼ ⴷ ⵜⵙⵔⵜⵉⵜⵉ ⴷ ⵡⴰⵎⵓⵏ.

ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵉⴳⴰ ⵓⵎⵢⴰⵏⴰⵡ ⴰⴷⵙⵍⴰⵏ ⴷ ⵓⵙⵏⵉⵍⵙ ⵢⴰⵜ ⵖ ⵜⵢⴰⴼⵓⵜⵉⵏ ⵏ ⵜⵖⵔⵎⴰ ⵜⴰⵜⵔⴰⵔⵜ, ⵉⵍⵍⴰ ⴼⵍⵍⴰⵖ ⴰⴷ ⵏⵣⵣⵉⴳⵣ ⵖ ⵜⵡⵓⵔⵉ ⵉⵛⵛⴰⵔⵏ ⵖ ⵜⵙⴳⴰ ⵏⵏⵖ ⵓⵕⵓ-ⵜⴰⵏⴰⵎⵎⴰⵙⵜ ⵓⵍⴰ ⵖ ⵓⵎⴰⴹⴰⵍ ⵃⵎⴰ ⴰⴷ ⵉⴳ ⵓⵎⵢⴰⵏⴰⵡ ⴰⴷ ⵢⴰⵏ ⵖ ⵜⵔⵏⵏⴰⵡⵉⵏ ⵏⵏⵖ ⵥⵉⵍⵏⵉⵏ.

ⵜⴰⵏⵎⵎⵉⵔⵜ