ⴰⵎⴹⴰⴽⴰⵕ ⵏ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵍⵎⵖⵔⵉⴱ-ⵍⵎⵉⴽⵙⵉⴽ ⵖ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵉⴽⵙⵉⴽ

ⵉⵙⵏⵓⴱⴳ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵙⵙ ⵏ ⵓⵙⵉⵏⴰⵙ 14 ⵉⵏⵏⴰⵢⵔ 2020 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⵎⴰⵙⵙⴰ ⴽⴰⵔⵎⵉⵏ ⴱⵓⵜⵉⵙⵜⴰ ⴱⵉⵍⴰⵢⵣ ⵜⴰⵏⵙⵙⵉⵅⴼⵜ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵜⴰⵎⵉⴽⵙⵉⴽⵉⵜ-ⵜⴰⵎⵖⵔⵉⴱⵉⵜ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵉⴽⵙⵉⴽ, ⴷ ⵉⵎⵎⵓⴷⴷⴰⵏ ⵙ ⵜⵎⴰⵣⵉⵔⵜ ⵏⵏⵖ ⵓⵙⵙⴰⵏ ⴰ ⵜⵉⵍⵉ ⴳ ⵢⵉⵅⴼ ⵏ ⵓⴽⴰⴱⴰⵔ ⵉⵙⵜⴰⵡⵀⵎⵎⴰⵏ  ⴳ ⵜⵉⴳⴳⵉⵜ ⵏ ⵜⵡⵓⵔⵉ ⴷ ⵜⴷⴷⵓⴽⵍⴰ.

ⴳ ⵜⵣⵡⵉⵔⵉ ⵏ ⵓⵏⵎⵓⵇⵇⴰⵔ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵙ ⵜⵉⴳⴳⵉⵜ ⴰ, ⵉⵙⵙⵎⵖⵔ ⵜⴰⵜⵜⵓⵢⵜ ⵏ ⵜⵣⴷⴰⵢⵉⵏ ⵜⵉⵎⵣⵔⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵎⵉⴽⵙⵉⴽ, ⵢⵉⵏⵉ ⵎⴰⵙ ⴷⵔⵓⵏⵜ ⵙⵏⴰⵜ ⵜⵎⵉⵣⴰⵔ ⴰⵢⴷⴰ ⵏ ⵜⵖⵔⵎⴰ ⵏ ⵍⴰⵏⴷⴰⵍⵓⵙ, ⵉⵍⵉⵏⵜ ⵜⵣⴷⴰⵢⵉⵏ ⵏⵏⵙⵏⵜ ⵜⵉⵙⵉⵏⵔⴰⵏⵉⵏ ⴳ ⵜⵣⵣⵉⴳⵣⵜ ⵉⵥⵉⵍⵏ ⵣⵖ ⵜⵉⴳⴳⵉⵜ ⵜⴰⵎⵣⵔⴰⵢⵜ ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵉ ⵍⵎⵉⴽⵙⵉⴽ ⴳ 2004, ⴷ ⵜⵉⴳⴳⵉⵜ  ⵉⵙⴽⵔ ⵓⵏⵙⵙⵉⵅⴼ ⵏ ⵍⵎⵉⴽⵙⵉⴽ ⵉ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⵉⴹⴼⵕⵏ, ⵢⵉⵏⵉ ⵎⴰⵙ ⵉⵍⵍⴰ ⵓⵏⵣⴳⵓⵎ ⴰⵎⴼⴽⴰⵡ ⵉⵣⵣⵉⴳⵣⵏ ⵙ ⵎⴰⴷ ⵉⵙⵙⴰⵔⵏ ⴳ ⵙⵏⴰⵜ ⵜⵎⵉⵣⴰⵔ.

ⵉⴱⴷⴷ ⵎⴰⵙⵙ ⵍⵎⴰⵍⴽⵉ ⵅⴼ ⵓⵎⵛⴰⵛⴽⴰ ⵏ ⵜⴰⵏⵏⴰⵢⵉⵏ ⵏ ⵙⵏⴰⵜ ⵜⵎⵉⵣⴰⵔ ⵅⴼ ⵛⵉⴳⴰⵏ ⵏ ⵉⵙⵇⵙⵉⵜⵏ ⵉⵎⴰⴹⵍⴰⵏⵏ ⵓⴷⴷⵉⵔⵏ, ⵢⴰⵡⵉ ⴷ ⵙ ⵓⵎⴷⵢⴰ ⵜⴰⵎⵓⴽⵔⵉⵙⵜ ⵏ ⵜⵣⵡⴰⴳⵜ ⴷ ⵉⵙⵏⴼⵍⵏ ⵏ ⵓⵏⵣⵡⵉ, ⵢⵉⵏⵉ : « ⵢⵓⵎⵥ ⵍⵎⵖⵔⵉⴱ ⵜⴰⵙⵔⵜⵉⵜ ⵜⴰⵏⴼⴳⴰⵏⵜ ⴳ ⵢⵉⴳⵔ ⵏ ⵜⵣⵡⴰⴳⵜ, ⵉⴳ ⴳ ⵜⵎⵉⵣⴰⵔ ⵜⵉⵎⵣⵡⵓⵔⴰ ⵉⵙⴽⴰⵔⵏ ⵙ ⵜⵖⵜⴰⵙⵉⵏ ⵏ ⵜⵎⵜⵜⴰ ⵉⵎⵓⵏⵏ ⴳ ⵎⴰⴷ ⵉⵥⵍⵉⵏ ⵙ ⵜⵎⴰⵖⵜ ⵎⴳⴰⵍ ⵏ ⵉⵙⵏⴼⵍⵏ ⵏ ⵓⵏⵣⵡⵉ ».

ⴳ ⵎⴰⴷ ⵉⵥⵍⵉⵏ ⵙ ⵜⴰⵢⴰⵏⵜ ⵏ ⵡⴰⴽⴰⵍ ⵏ ⵜⴳⵍⴷⵉⵜ, ⵉⵙⴷⴷⵉⴷ ⵎⴰⵙⵙ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ : « ⵜⴰⵏⴼⵔⵓⵜ ⴷ ⵓⵔⴳⵉⴳ ⴳⴰⵏ ⵜⵉⵎⵣⵡⵓⵔⴰ ⴷⴰⵔ ⵓⵎⴰⴹⴰⵍ ⵏ ⵖⵉⵍⴰⴷ, ⵎⵏⵛⴽⴽ ⴰⵢⴰ ⴰⴷ ⵉⵙⵎⴷ ⵓⵣⵎⵣ ⵏ ⵉⵎⵏⵖⵉ ⴰⵚⵎⵎⴰⴹ ⴳ ⵉⵜⵜⵓⵙⴽⴰⵔ ⵓⵎⵏⵣⴰⵖ ⵅⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ », ⵉⵙⵙⴽⵯⵜⵉ ⴷ ⴳ ⵓⵎⵏⴰⴹ ⴰ ⵙ ⵜⵖⵜⴰⵙⵉⵏ ⵏ ⵜⵎⵜⵜⵉ ⵉⵎⵓⵏⵏ ⴳ ⵓⵎⵏⵉⴷ ⴰ, ⴷ ⵜⵙⵓⵎⵔⵜ ⵏ ⵍⵎⵖⵔⵉⴱ ⵏ ⵓⵏⴱⴰⴹ ⴰⵢⵉⵎⴰⵏ ⵉⴳⴰⵏ ⴰⴼⵙⵙⴰⵢ ⴰⵏⵉⵍⴰⵡ ⵉⵟⵟⴼⵏ ⵜⴰⵙⴼⵍⵙⵉⵢⵜ ⵍⵍⵉ ⵔⴰⴷ ⵉⴱⴱⵉ ⴷ ⵓⵙⴷⵔⵉⴳ ⵏ ⵜⵓⴳⴳⴰⵙ ⵏ ⵜⵎⵜⵜⵉ ⵉⵎⵓⵏⵏ ⴳ ⵓⵙⴼⵙⵉ ⵏ ⵓⵎⵏⵣⴰⵖ ⴰ. ⵉⴱⴷⵔ ⵜⵓⴳⵜ ⵏ ⵜⵎⵉⵣⴰⵔ ⵏ ⵎⴰⵔⵉⴽⴰⵏ ⵏ ⵜⵓⵥⵥⵓⵎⵜ ⴷ ⵉⴼⴼⵓⵙ ⴷ ⵍⴽⴰⵕⵉⴱⵉ ⴷ ⵉⴼⵔⵉⵇⵢⴰ ⴷ ⵜⵎⵉⵣⴰⵔ ⵢⴰⴹⵏⵉⵏ ⵏ ⵓⵎⴰⴹⴰⵍ ⵉⵍⵍⴰⵏ ⴷ ⵡⴰⴷⴷⴰⴷ ⵏ ⵍⵎⵖⵔⵉⴱ ⴷⴼⴼⵉⵔ ⵙⵙⵏⵜ ⵉⴼⵔⵓⵔⵉⵢⵏ ⵏ ⵓⵙⴷⴰⵡ ⴷ ⵜⵉⵍⴰⵡⵜ ⵉⵍⵍⴰⵏ ⴳ ⵜⵎⵏⴰⴹⵜ.  

ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵖⵔⴰ ⵎⴰⵙⵙ ⴰⵏⵏⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵉⵔⴰ ⴷⵉ ⵍⵎⵉⴽⵙⵉⴽ ⵃⵎⴰ ⴰⴷ ⵜⵙⴽⵔ ⵜⵉⴳⴳⵉⵜ ⵏ ⵜⵡⵓⵔⵉ ⵉ ⵜⵎⴰⵣⵉⵔⵜ ⵏⵏⵖ, ⵔⴰⴷ ⵜⴳ ⵜⴰⵎⵍⴷⴰ ⵏ ⵓⵙⵎⵔⵙⵍ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵓⵙⵉⴳⴳⵍ ⵏ ⵜⴱⵔⵉⴷⵉⵏ ⵏ ⵓⵙⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵙ ⵓⵙⴰⵢⵔⴰⵔ ⵏ ⵓⵎⵢⴰⵡⴰⵙ ⴷ ⵓⵎⵛⴰⵡⴰⵕ ⵉⵅⴰⵜⵔⵏ.

ⴳ ⵜⵙⴳⴰ ⵏⵏⵙ, ⵜⵙⴷⴷⵉⴷ ⵎⴰⵙⵙⴰ ⴽⴰⵔⵎⵉⵏ ⴱⵓⵜⵉⵙⵜⴰ ⴱⵉⵍⴰⵢⵣ ⵎⴰⵙ ⴷⴷ ⵜⵉⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ « ⴰⵔ ⵣⵣⵔⴰⵢⵏⵜ ⴳ ⵜⴼⵔⴽⴰ ⵉⵙⵜⴰⵡⵀⵎⵎⴰⵏ ⵛⵉⴳⴰⵏ », ⵜⵙⵙⵓⵜⴳ ⵜⵉⵡⵉⵙⵉ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ 2018 ⵙ ⵉⵙⵡⴰⵍⴰⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵜⴼⵓⴳⵍⴰ ⵏ ⵜⵙⵍⵙⴰⵡⵜ ⵏ ⵓⵏⵙⵙⵉⵅⴼ ⴰⵎⴰⵢⵏⵓ ⴰⵎⵉⴽⵙⵉⴽⵉ  ⵎⴰⵙⵙ ⴰⵏⴹⵕⵉ ⵎⴰⵏⵡⵉⵍ ⵍⵓⴱⴱⵉⵥ ⵓⴱⵕⴰⴹⵓⵕ, ⵜⵉⵏⵉ : « ⵏⵔⴰ ⴰⴷ ⵏⵙⵙⴷⵓⵙ ⵜⵉⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵍⵎⵖⵔⵉⴱ ⵉⴳⴰ ⵜⴰⵣⵉⵣⵔⵉⵜ ⵙ ⵉⴼⵔⵉⵇⵢⴰ, ⵍⵍⴰⵏⵜ ⵛⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵍⵍⵉ ⵔⴰⴷ ⵏⵍⵎⴷ ⴷⴰⵔ ⵍⵎⵖⵔⵉⴱ ». ⵜⵉⵏⵉ ⵎⴰⵙ ⴷ ⵉⵇⵇⴰⵏ ⵓⵙⴷⵓⵙ ⵏ ⵜⵡⵓⵔⵉ ⵜⴰⴱⵕⵍⴰⵎⴰⵏⵉⵜ ⵊⴰⵔ ⵙⵉⵏ ⵉⵙⵇⵇⵉⵎⵏ, ⵜⵍⵇⵎ : « ⴰⵏⵎⵓⵇⵇⴰⵔ ⴰ ⵓⵔ ⵉⴳⵉ ⵖⴰⵙ ⵜⵉⵣⵡⵉⵔⵉ, ⵖⵓⵔⵏⵖ ⵜⵉⵔⴰⵜ ⵎⵇⵓⵔⵏ ⴰⴷ ⵏⵙⵙⴷⵓⵙ ⵜⵉⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ».

ⴳ ⵓⵎⵏⵉⴷ ⵏⵏⵙ, ⵉⵙⴷⴷⵉⴷ ⵎⴰⵙⵙ ⴰⵍⴼⵕⵉⴹⵓ ⴼⵉⵎⴰⵜ ⴱⴰⵏⵡⵉⵓⵍⵓⵚ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵣⴷⴰⵢⵉⵏ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵉⴽⵙⵉⴽ ⴷ ⵓⴳⵎⴰⵎ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⴱⵕⵍⴰⵎⴰⵏⵉⵜ ⵜⴰⵎⵉⴽⵙⵉⴽⵉⵜ-ⵜⴰⵎⵖⵔⵉⴱⵉⵜ, ⵎⴰⵙ ⵜⴳⴰ ⵜⵙⵓⵎⵔⵜ ⵏ ⵓⵏⴱⴰⴹ ⴰⵢⵉⵎⴰⵏ ⵉⴼⴽⴰ ⵍⵎⵖⵔⵉⴱ ⵉ ⵓⴼⵙⵙⴰⵢ ⵏ ⵓⵎⵏⵣⴰⵖ ⵅⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ,« ⵜⴰⵙⵓⵎⵔⵜ ⵜⵓⵏⵥⵉⵥⵜ » ⵎⴽ ⵉⵏⵏⴰ. ⵉⵙⵙⵓⵜⴳ ⵜⵓⴳⴳⴰⵙ ⵏ ⵍⵎⵖⵔⵉⴱ ⵃⵎⴰ ⴰⴷ ⵉⵜⵜⵢⵓⴼⴰ ⵓⴼⵙⵙⴰⵢ ⵏ ⵓⴼⵔⴰ ⴼ ⵉⵍⵍⴰ ⵓⵎⵛⴰⵛⴽⴰ. ⵉⵙⵙⵎⵖⵔ ⵓⵍⴰ ⵜⴰⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⵍⵍⵉ ⴷ ⵢⵉⵡⵉⵏ ⴰⴷ ⵙⵏⴼⵍⵏⵜ ⵛⵉⴳⴰⵏ ⵏ ⵜⵎⵉⵣⴰⵔ ⴰⴷⴷⴰⴷ ⵏⵏⵙⵏⵜ ⵅⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ.

    ⵉⵍⵍⴰ ⴳ ⵓⵏⵎⵓⵇⵇⴰⵔ ⴰ ⵎⴰⵙⵙ ⵄⴰⴱⴷⵍⴼⴰⵜⵜⴰⵃ ⵍⴱⴱⴰⵕ, ⴰⵎⵙⵇⵇⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵍⵎⵉⴽⵙⵉⴽ, ⵎⴰⵙⵙ ⵊⴰⵎⴰⵍ ⴱⵏⵛⵇⵔⵓⵏ ⴽⴰⵔⵉⵎⵉ, ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⵍⴰ ⵜⴰⵎⵖⵔⵉⴱⵉⵜ-ⵜⴰⵎⵉⴽⵙⵉⴽⵉⵜ, ⵎⴰⵙⵙ ⵢⵓⵙⵓⴼ ⵖⴰⵔⴱⵉ, ⴰⵏⵙⵙⵉⵅⴼ ⵏ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵏ ⵍⵉⵙⵍⴰⵎ ⴷ ⵉⵎⵖⵔⴰⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ.