ⴰⵕⵥⵥⵓⵎ ⵏ ⵜⵙⵎⵓⵏⵉ ⵜⵉⵙ ⴽⴽⵓⵥⵜ ⴷ ⵎⵔⴰⵡⵜ ⵏ ⵓⵥⵟⵟⴰ ⵏ ⵉⴱⵕⵍⴰⵎⴰⵏⵉⵢⵏ ⵏ ⵜⵙⴳⴰ ⵜⴰⴳⵔⴰⴽⴰⵍⵜ ⵉ ⵜⴳⵎⵉ ⵜⴰⵙⵓⵍⴰⵏⵜ

ⵉⵙⵙⵉⵅⴼ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵕⵥⵥⵓⵎ ⵏ ⵜⵙⵎⵓⵏⵉ ⵜⵉⵙ ⴽⴽⵓⵥⵜ ⴷ ⵎⵔⴰⵡⵜ ⵏ ⵓⵥⵟⵟⴰ ⵏ ⵉⴱⵕⵍⴰⵎⴰⵏⵉⵢⵏ ⵏ ⵜⵙⴳⴰ ⵜⴰⴳⵔⴰⴽⴰⵍⵜ  ⵉ ⵜⴳⵎⵉ ⵜⴰⵙⵓⵍⴰⵏⵜ.  ⵜⴳⴰ ⵜⵙⵎⵓⵏⵉ ⴰ, ⴷⴰ ⵉⵙⵏⵓⴱⴳ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵙ  ⵏ ⵓⵙⵉⵏⴰⵙ 17 ⴷⵓⵊⴰⵏⴱⵉⵔ 2019, ⴰⵣⵎⵓⵣⵣⵓ ⵖ ⵉⵖⵔⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⴰⴷ ⵢⵉⵍⵉ ⵓⵙⵙⴰⵔⵓ ⴳ ⵓⵔⵣⵣⵓ ⴰⵎⴰⵙⵙⴰⵏ ⴷ ⵓⴼⴰⵔⵙ ⵏ ⵜⵥⴹⴰⵕⵜ ⵙⴳ ⵉⵙⵓⴳⴰⵎ ⵉⵜⵜⵓⵙⵎⴰⵢⵏⵓⵏⵏ, ⴷ ⵓⵙⵀⵡⵏ ⵏ ⵓⵙⵎⴰⵜⵜⵉ ⵏ ⵜⴻⵜⵉⴽⵏⵓⵍⵓⵊⵉⵜ ⵖ ⵢⵉⴳⵔ ⴰⴷ. ⵉⵎⵍⵉ ⴷ ⵜⴰⵣⵡⵉⵔⵉ ⵏ ⵍⵎⵖⵔⵉⴱ ⵖ ⵓⴼⴰⵔⵙ ⵏ ⵜⵥⴹⴰⵕⵜ ⵉⵖⵓⵙⵏ ⵉⴳⴰⵏ ⵣⵖ ⵜⴰⴷⴰⵎⵙⴰ ⵜⴰⵣⴳⵣⴰⵡⵜ ⵎⵓ ⵜⵜⵓⵙⵔⴰⵙⵏⵜ ⵜⵙⵜⵔⴰⵜⵉⵊⵉⵢⵉⵏ ⵜⵉⵎⴽⴰⵢⵍⴰⵍⵉⵏ ⴳ ⵓⴱⵔⵉⴷ ⵏ ⵓⵙⵉⴳⴳⵍ ⵙ ⵜⵥⴹⴰⵕⵜ.

ⵢⵉⵏⵉ  ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴹⴼⴰⵕ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵡⴰⵍⴰ ⴰⵙⵜⵔⴰⵜⵉⵊⵉ ⵏ ⵜⴳⵍⵉⴷⵉⵜ ⵏ ⵍⵎⵖⵔⵉⴱ ⴳ ⵓⵎⵏⵉⴷ ⵏ ⵓⵙⵙⴰⵔⵓ ⴳ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ, ⵙⵍⵉⵀⵡⴰⴷⴷ ⵍⵍⵉⵖ ⵜⵜⵓⵙⴽⴰⵔ ⵜⵙⵇⵇⵉⵎⵜ ⵜⴰⵙⴳⵓⵎⴰⵏⵜ ⵉⵥⵍⵉⵏ ⵙ ⵜⴷⴰⵎⵙⴰ ⵜⴰⵣⴳⵣⴰⵡⵜ, ⵜⵡⴰⵜⵜⵙ ⴰⴷ ⵜⴼⴽ ⵜⵉⵙⵓⵎⴰⵔ ⵖ ⵢⵉⴳⵔ ⵏ ⵓⵣⵣⵔⴰⴼ ⴷ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵃⵎⴰ ⴰⴷ ⵉⴱⵓⵖⵍⵓ ⵓⵙⵎⵔⵙ ⵏ ⵜⵥⴹⴰⵕⵜ ⵣⵖ ⵉⵙⵓⴳⴰⵎ ⵉⵜⵜⵓⵙⵎⴰⵢⵏⵓⵏⵏ.

ⵉⵏⵏⴰ ⵎⴰⵙⵙ ⵍⵎⴰⵍⴽⵉ ⵎⴰⴼ ⵉⵍⵍⴰ ⴼ ⵉⴱⵕⵍⴰⵎⴰⵏⵉⵢⵏ ⴰⴷ ⵙⴽⵔⵏ ⴽⵉⴳⴰⵏ ⵏ ⵜⵡⵓⵔⵉ ⵖ ⵓⵎⵏⵉⴷ ⵏ ⵓⵣⵣⵔⴰⴼ ⴷ ⵓⵎⵢⴰⵡⴰⵙ ⴷ  ⵜⵏⴱⴰⴹⵜ ⵃⵎⴰ ⴰⴷ ⵜⵙⵜⵉ ⵜⵉⵙⵔⵜⴰⵢ ⵥⵉⵍⵏⵉⵏ ⵖ ⵉⴳⵔⴰⵏ ⵏ ⵡⴰⵡⵏⴰⴹ ⴷ ⵜⴳⵎⵉ, ⵖⵎⴽⴰⵏⵏ ⴷ ⵓⵙⵎⵓⵙⵙⵓ ⵏ ⵓⴳⴷⵓⴷ ⴷ ⵓⵙⴼⵔⴽ ⵏ ⵡⴰⵎⵓⵏ ⵓⵖⵔⵉⵎ ⵙ ⵜⵍⵍⵓⵎⵜⴰ ⵏ ⵉⵡⵜⵜⴰⵙⵏ ⵏ ⵓⵙⵎⵓⵙⵙⵓ ⴼ ⵓⵃⵟⵟⵓ ⵏ ⵡⴰⵡⵏⴰⴹ ⴷ ⵓⵙⵎⵔⵙ ⵉⵥⵉⵍⵏ ⵏ ⵉⵙⵓⴳⴰⵎ ⵏ ⵡⴰⵎⴰⵏ, ⴷ ⵓⵣⵓⵣⵣⵔ ⵏ ⵜⴷⵍⵙⴰ ⴼ ⵜⴳⵎⵉ ⵜⴰⵙⵓⵍⴰⵏⵜ.

ⵖ ⵜⴳⵉⵔⴰ, ⵉⵏⵏⴰ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙ ⵜⵔⴰ ⵜⴳⵎⵉ ⵜⴰⵙⵓⵍⴰⵏⵜ ⵜⴰⴷⵍⵙⴰ ⵜⴰⵎⴰⵢⵏⵓⵜ ⵖ ⵓⵎⵏⵉⴷ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵜⵎⵙⴽⵔⵜ ⵜⴰⵎⴳⵔⵓⵜ ⵓⵍⴰ ⵜⵓⴼⵔⵉⴷⵜ, ⵜⵉⵔⵉ ⵓⵍⴰ ⴰⵙⵏⴼⵍ ⵏ ⵉⵙⵡⵉⵏⴳⵉⵎⵏ ⴷ ⵓⵙⵔⵓⵙ ⵏ ⵡⴰⵏⴰⵡ ⴰⵏⴳⵎⵓ ⴰⵎⴰⵢⵏⵓ.  

ⵖ ⵜⵙⴳⴰ ⵏⵏⵙ, ⵉⵙⵙⵉⵙⴼⵉⵡ  ⵎⴰⵙⵙ  ⵎⵓⵃ ⵔⵊⴷⴰⵍⵉ, ⴰⵎⴰⵔⵉ ⴷ ⵓⵏⵙⵙⵉⵅⴼ ⵏ ⵓⵥⵟⵟⴰ, ⵎⴰⵙ ⵉⴳⴰ ⵓⵥⵟⵟⴰ ⴰ ⵢⴰⵏ ⵓⵙⴰⵢⵔⵓⵔ ⵏ ⵓⵎⵙⵙⵉⵡⵍ ⵏⴳⵔ ⵉⴱⵕⵍⴰⵎⴰⵏⵉⵢⵏ ⵏ ⵜⵙⴳⴰ ⴰⴷ ⵅⴼ ⵜⵉⵏⵥⴰⵕ ⵏⵏⵙ ⵜⵉⵏⵎⵏⴰⴹ. ⵢⴰⵡⵉ ⴷ  ⵓⵍⴰ ⴼ  ⵜⵎⵓⴽⵔⵉⵙⵉⵏ ⵜⵉⵏⵎⵏⴰⴹ ⵉⵍⵍⴰⵏ ⵖ ⵓⵎⴷⴰ ⵏ ⵢⵉⵍ ⴰⴳⵔⴰⴽⴰⵍ, ⵢⵉⵏⵉ ⵎⴰⵙ ⴷⴷ ⵉⵎⴹⴰⴽⴰⵕⵏ ⵏ ⵜⵙⵎⵓⵏⵉ ⵣⵎⵔⵏ ⴰⴷ ⴼⴽⵉⵏ ⵜⵉⵎⵔⴰⵔⵓⵜⵉⵏ ⴼ  ⵜⵎⵓⴽⵔⵉⵙⵉⵏ ⵏ ⵓⵙⵏⴼⵍ ⵏ ⵓⵏⵣⵡⵉ.

ⵖ ⵓⵎⵏⵉⴷ ⵏⵏⵙ, ⵉⵙⵙⵓⵜⴳ ⵎⴰⵙⵙ ⵎⵉⴽⴰⵢⵍ ⵙⴽⵓⵍⵓⵙ, ⵉⵎⵉⵔⵉ ⴰⵎⴰⵜⴰⵢ ⵏ ⵓⵥⵟⵟⴰ, ⵙ ⵜⵣⵡⵉⵔⵉ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵖ ⵉⴳⵔⴰⵏ ⵏ ⵜⵥⴹⴰⵕⵉⵏ ⵉⵜⵜⵓⵙⵎⴰⵢⵏⵓⵏⵏ ⴷ ⵓⵙⵡⵓⴷⴷⵓ ⵏ ⵡⴰⵎⴰⵏ, ⵉⴱⴷⴷ ⴼ ⵜⵉⵍⴰⵍⴰⵜ ⵜⴰⴽⵙⴰⵡⵜ ⵏ ⵉⴱⵕⵍⴰⵎⴰⵏⵏ ⵖ ⵓⵙⵙⴷⵓⵙ ⵏ ⵜⵏⵏⵓⴱⴹⴰ ⵉⵀⵢⵢⴰⵏ ⵖ ⵢⵉⴳⵔ ⵏ ⵜⵥⴹⴰⵕⵜ ⴷ ⵓⵙⵡⵓⵔⵉ ⵉ ⵜⴳⵎⵉ ⵜⴰⵙⵓⵍⴰⵏⵜ ⵙ ⵓⵎⵏⴰⴷ ⴰⵏⵎⵏⴰⴹ.

ⵜⵙⵎⵓⵏ ⵜⵙⵎⵓⵏⵉ ⴰ 120 ⵏ ⵉⵎⴷⵔⴰⵡⵏ: ⵉⵎⴳⵣⵉⵡⵏ ⵏ ⵉⴱⵕⵍⴰⵎⴰⵏⵏ ⵏ ⵜⵙⴳⴰ ⵜⴰⴳⵔⴰⴽⴰⵍⵜ, ⵉⴳⵎⴰⵎⵏ ⵏ ⵓⵙⵉⵔⴰ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵉⵏⵙⵙⵉⵅⴼⵏ ⵏ ⵜⵔⵓⴱⴱⴰ ⴷ ⵜⵙⵇⵇⵉⵎⵉⵏ ⵜⵉⵎⵖⵍⴰⵍⵉⵏ, ⵜⵉⵎⵙⵎⵓⵏⵉⵏ ⵜⵉⵖⵔⵎⴰⵏⵉⵏ, ⵉⵎⵓⵣⴰⵢⵏ, ⵉⵏⵖⵎⴰⵙⵏ ⴷ ⵡⵉⴷ ⵜⵜ ⵢⵉⵡⵉⵏ ⴳ ⵜⴳⵎⵉ ⵜⴰⵙⵓⵍⴰⵏⵜ.

ⵜⴰⵙⵎⵓⵏⵉ ⴰ ⵜⵙⵜⴰⵡⵀⵎⵎⴰ ⵍⵍⵉⵖ ⵉⴳⴰ ⵢⵉⵍ  ⴰⴳⵔⴰⴽⴰⵍ ⴰⵎⴷⴰ ⵎⵇⵇⵓⵔⵏ ⴰⴽⴽⵯ ⴳ ⵓⵎⴰⴹⴰⵍ  ⵙ ⵜⵉⵖⵣⵉ ⵏ ⵜⵖⴰⵔⵜ ⵏⵏⵙ ⵉⵍⴽⵎⵏ 46.000 ⴽⵍⵎ, ⵖⵓⵔⵙ ⵓⵍⴰ ⴽⵉⴳⴰⵏ ⵏ ⵜⵏⵥⴰⵕ ⵣⴷⵉⵏⵉⵏ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵉⴹⴰⵚⵏ ⵏⵏⵙⵏ ⴼ ⵜⴳⵎⵉ ⵏ ⵜⵙⴳⴰ ⴷ ⵉⵎⵣⴷⴰⵖⵏ ⵏⵏⵙ.

ⴰⵥⵟⵟⴰ ⴰ ⵉⵜⵜⵓⵙⴽⴰⵔ ⵙ ⵜⵙⵏⵜⴰⵢⵜ ⵏ ⵓⵙⵉⵔⴰ ⴰⵏⵖⵎⴰⵙ ⵏ ⵜⵙⴳⴰ ⵜⴰⴳⵔⴰⴽⴰⵍⵜ ⵉ ⵡⴰⵡⵏⴰⴹ ⴷ ⵜⴷⵍⵙⴰ ⴷ ⵜⴳⵎⵉ ⵜⴰⵙⵓⵍⴰⵏⵜ, ⴷ ⵜⵎⴷⵔⴰⵡⵜ ⵜⴰⵎⴰⴹⵍⴰⵏⵜ ⵉ ⵡⴰⵎⴰⵏ ⴳ ⵜⵙⴳⴰ ⵏ ⵢⵉⵍ ⴰⴳⵔⴰⴽⴰⵍ ⴳ ⴷⵓⵊⴰⵏⴱⵉⵔ 2002 ⵜⵉⵣⵉ ⴳ ⵉⵜⵜⵓⵙⴽⴰⵔ ⵓⵏⵎⵓⵇⵇⴰⵔ ⴰⵎⴰⴹⵍⴰⵏ ⵉ ⵜⴳⵎⵉ ⵜⴰⵙⵓⵍⴰⵏⵜ ⴳ ⵊⵓⵀⴰⵏⵙⴱⵓⵔⴳ ⴳ ⵉⴼⴼⵓⵙ ⵏ ⵉⴼⵔⵉⵇⵢⴰ. ⵉⴳ ⵖ ⵉⵡⵜⵜⴰⵙⵏ ⵏⵏⵙ ⴰⴷ ⵉⵙⵙⴷⵓⵙ ⵜⵉⴳⵎⵉ ⵜⴰⵙⵓⵍⴰⵏⵜ ⴳ ⵜⵙⴳⴰ ⴰⴷ ⵙ ⵜⴱⵔⵉⴷⵜ  ⵏ : ⵜⴰⵎⵙⵙⵓⴳⵓⵔⵜ ⵏ ⵉⵙⵓⴳⴰⵎ, ⴰⵡⵏⴰⴹ ⴰⴷⴰⵡⵙⴰⵏ, ⴰⵃⵟⵟⵓ ⵏ ⵜⵎⴰⵏⴰⵡⵜ ⵜⴰⴱⵢⵓⵍⵓⵊⵉⵜ ⴷ ⵜⴷⵍⵙⴰⵏⵜ.