ⵓⵕⵓⴳⵡⴰⵢ: ⵉⵎⴹⴰⴽⴰⵕⵏ ⵥⵉⵍⵏⵉⵏ ⵊⴰⵔ ⵓⴽⴰⴱⴰⵕ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ ⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵓⵕⵓⴳⵡⴰⵢ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵡⴰⵏⴽ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵓⴷⵔⴰⵡ ⴳ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵉⵏ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ

ⵙ ⵜⵎⵍⴷⴰ ⵍⵍⵉⵖ ⵉⴷⵔⵓ ⴳ ⵓⴳⵔⴰⵡ ⴰⵎⴰⴹⵍⴰⵏ ⵡⵉⵙ ⵙⵉⵏ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ ⴳ ⵎⵓⵏⵜⵉⴼⵉⴷⵓ ⴳ ⵓⵕⵓⴳⵡⴰⵢ, ⵙⴳ 25 ⴰⵔ 27 ⵛⵓⵜⴰⵏⴱⵉⵔ 2023, ⵚⴰⵃⴰⵏ ⵉ ⵓⴽⴰⴱⴰⵕ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ ⵙ ⵜⵏⵙⵙⵉⵅⴼⵜ ⵏ ⵓⵎⴰⵔⵉ ⵎⴰⵙⵙ ⵖⵉⵢⵢⴰⵜ,  ⵙⵉⵏ ⵉⵙⵏⵓⴱⴳⵏ ⴷⴰⵔ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵓⵕⵓⴳⵡⴰⵢ  ⵎⴰⵙⵙⴰ ⴱⵉⵢⴰⵜⵔⵉⵣ ⴰⵔⴳⵉⵎⵓⵏ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵡⴰⵏⴽ, ⴷ ⵎⴰⵙⵙ ⵅⵓⵚⵚⵉ ⴽⴰⵕⵍⵓⵙ ⵎⴰⵀⵢⴰ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ.

ⵃⴰⴹⵔⵏ ⴳ ⵉⵙⵏⵓⴱⴳⵏ ⴰⴷ ⵎⴰⵙⵙ ⵎⵓⵃⴰⵎⵎⴰⴷ ⵖⵉⵢⵢⴰⵜ, ⵎⴰⵙⵙ ⵕⴰⵛⵉⴷ ⵃⵎⵓⵏⵉ ⴰⵏⵙⵙⵉⵅⴼ ⵏ ⵜⵔⴰⴱⴱⵓⵜ ⵏ ⵡⴰⵍⴰⵢ ⴷ ⵉⵙⴽⵉⵍ, ⵎⴰⵙⵙ ⵕⴰⵛⵉⴷ ⴱⵓⴳⵟⴰⵢⴰ ⵙⴳ ⵜⵔⴰⴱⴱⵓⵜ ⵏ ⵜⵥⵖⵓⵕⵜ ⴷ ⵜⵎⴰⵜⵔⴰⵔⵜ, ⵎⴰⵙⵙⴰ ⵃⴰⵏⴰⵏ ⴼⵟⵕⴰⵙ, ⵙⴳ ⵜⵔⴰⴱⴱⵓⵜ ⵜⴰⵙⵔⵎⵓⵏⵜ-ⵜⴰⵣⵓⵍⵜ ⵏ ⵍⵉⵜⵜⵉⵃⴰⴷ, ⵉⵍⵉⵏ ⴼ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ.

ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ ⵜⴰⵣⵣⵉⴳⵣⵜ ⵜⴰⴷⵉⵎⵓⵇⵔⴰⵜⵉⵜ ⵉⵍⵍⴰⵏ ⴳ ⵓⵕⵓⴳⵡⴰⵢ, ⵉⵙⵓⵜⴳ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵍⵍⴰⵏⵉⵏ ⵊⴰⵔ ⵜⵉⵎⵔⵙⴰⵍ ⵜⵉⵣⵣⵔⴰⴼⵉⵏ, ⵢⵉⵏⵉ ⵎⴰⵙ ⵉⵔⴰ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴰⴷ ⵉⴼⴽ ⵓⵏⴼⵓⵙ ⴰⵎⴰⵢⵏⵓ ⵉ ⵜⵣⴷⴰⵢⵉⵏ ⴰⴷ ⵙ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵉⵙⵏⴼⵍⵏ ⵉⵏⵙⴱⴰⴱⵏ ⴳ ⵉⴳⵔⴰⵏ ⵉⵎⵏⵏⴰⵡⵏ.  

ⵜⵙⴰⵡⵍ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵓⵕⵓⴳⵡⴰⵢ ⴼ ⵜⵓⵎⵔⵜ ⵏⵏⵙ ⴳ ⵓⵙⵏⵓⴱⴳ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ, ⵜⴼⴽ ⴰⴼⵛⴰⴷ ⵉ ⵓⵎⴰⴷⴰⵏ ⴰⵎⵖⵔⵉⴱⵉ ⴷ ⵓⵏⴳⵉⵙⵏ ⵏ ⵓⵎⴷⵓⴷⵉ ⵉⵣⵔⵉⵏ ⴳ ⵜⴳⵍⴷⵉⵜ.

ⵜⵙⴷⴷⵉⴷ ⴼ ⵡⴰⵜⵉⴳ ⵏ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⵏⵉⵜ ⵙ ⵓⵙⵏⵓⴱⴳ ⵏ ⵉⴳⵔⴰⵡⵏ ⵉⴳⵔⴰⵖⵍⴰⵏⵏ ⴰⵎ ⴰⴳⵔⴰⵡ ⴰⵎⴰⴷⵍⴰⵏ ⵡⵉⵙ ⵙⵉⵏ ⵏ ⵜⵙⵇⵇⵉⵎⵉⵏ ⵏ ⵉⵎⴰⵍ ⴳ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵉⵡⴰⵏⴽⵏ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⵉ ⵓⵙⴷⵓⵙ ⵏ ⵉⴱⵔⴷⴰⵏ ⵏ ⵜⴷⵉⵎⵓⵇⵔⴰⵟⵉⵜ, ⵜⵉⵏⵉ ⵎⴰⵙ ⵜⵏⵏⵓⵕⵥⵎ ⵓⵕⵓⴳⵡⴰ ⵙ ⵜⵎⵔⵙⵍⵜ ⵏⵏⵙ ⵜⴰⵣⵣⵔⴰⴼⵜ  ⴼ ⵜⵎⴷⵔⴰⵡⵉⵏ ⴰⴽⴷ ⵜⵉⵎⵉⵣⴰⵔ ⵏ ⵍⵎⵖⵔⵉⴱ, ⴷⵉⴳⵙⵏ ⵜⴰⴳⵍⴷⵉⵜ  ⵏ ⵍⵎⵖⵔⵉⴱ.

ⵜⵙⵓⵜⴳ ⵓⵍⴰ ⴰⵙⴽⵔ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵓⵕⵓⴳⵡⴰ-ⵍⵎⵖⵔⵉⴱ ⴷ ⵜⵉⵍⴰⵍⵜ ⵏⵏⵙ ⵉⵕⵡⴰⵏ ⴳ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵢⵉⵏ ⴷ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⵕⵓⴳⵡⴰⵢ.

ⴳ ⵓⵏⵎⵓⵇⵇⴰⵔ ⵡⵉⵙ ⵙⵉⵏ, ⵉⵙⵏⵉⵎⵎⴰⵔ ⵎⴰⵙⵙ ⵖⵉⵢⵢⴰⵜ, ⴰⵏⵙⵙⵉⵅⴼ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ,  ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵕⵓⴳⵡⴰⵢ ⴼ ⵓⵙⵏⵓⴱⴳ, ⵉⵙⵓⵜⴳ ⵜⵉⵣⴷⴰⵢⵉⵏ ⵥⵉⵍⵏⵉⵏ ⵊⴰⵔ ⵍⵎⵖⵔⵉⴱ ⴷ ⵓⵕⵓⴳⵡⴰⵢ ⴳⴰⵏⵉⵏ ⵉⵎⴷⴷⵓⴽⴽⵯⴰⵍ ⵙ ⵜⵣⴷⴰⵢⵉⵏ ⵜⵉⴷⵉⴱⵍⵓⵎⴰⵙⵉⵢⵉⵏ ⵙⴳ 1962, ⴷⵔⵢⵏ ⴰⵜⵉⴳⵏ ⵛⵛⴰⵔⵏⵉⵏ, ⵜⵓⵎⴰⵢⵜ ⵏ ⵓⴽⴰⴱⴰⵕ ⵏ ⵍⵎⵖⵔⵉⴱ ⴳ ⵜⵍⵍⴰ ⵜⵓⴳⵜ ⵓⵍⴰ ⵜⵓⵣⵍⵜ , ⴰⵔ ⵜⵎⵎⴰⵍ ⵜⵉⵔⴰⵜ ⵏ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ ⴰⴷ ⵜⵉⵍⵉ ⵜⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⴳ ⵜⵣⴷⴰⵢⵉⵏ ⴳⵔ ⵙⵏⴰⵜ ⵜⵎⵉⵣⴰⵔ.

ⵉⵙⵎⵏⵉⴷ ⵓⵍⴰ ⵉⵙⴰⵡⵓⵔⵏ ⵉⵅⴰⵜⴰⵔⵏ ⵏ ⵍⵎⵖⵔⵉⴱ ⴳ ⵉⴳⵔⴰⵏ ⵉⵎⵏⵏⴰⵡⵏ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜⵉⵏⵥⵕ ⵕⴱⴱⵉ. ⴷ ⵜⵣⵣⵉⴳⵣⵜ ⵏ ⵜⵎⵙⴰⵔⵜ ⵏ ⵜⵢⴰⵏⵜ ⵏⵏⵖ ⵜⴰⵏⴰⴽⴰⵍⵜ, ⴳ ⵉⵍⵍⴰ ⵓⵙⵎⵖⵔ ⵏ ⵓⵙⵏⴰⵍ ⴰⴳⵔⴰⵖⵍⴰⵏ ⵉ ⵡⴰⴷⴷⴰⴷ ⵏ ⵍⵎⵖⵔⵉⴱ ⴳ ⵜⵎⵙⴰⵔⵜ ⵏ ⵜⵅⵅⵓⵜⵔⴰ ⵏⵏⵙ ⴳ ⵜⵎⵏⴰⴹⵉⵏ ⵏⵏⵙ ⴳ ⵚⵚⵃⵕⴰ, ⵍⵍⵉⵖ ⵙⵙⵏⵜ ⴽⵉⴳⴰⵏ ⵏ ⵜⵎⵉⵣⴰⵔ ⴰⵎ ⵎⴰⵔⵉⴽⴰⵏ ⴷ ⵚⴱⴰⵏⵢⴰ ⴷ ⴰⵍⵎⴰⵏⵢⴰ ⵙ ⵜⵎⵖⵔⵉⴱⵉⵜ ⵏ ⵚⵚⵃⵕⴰ, ⵕⵥⵎⵏⵜ ⵓⵍⴰ ⴽⵉⴳⴰⵏ ⵏ ⵜⵙⵇⵓⵏⵙⵓⵜⵉⵏ ⴳ ⵍⵄⵢⵓⵏ ⴷ ⴷⴷⴰⵖⵍⴰ.

ⵉⵙⴰⵡⵍ ⵎⴰⵙⵙ ⵖⵉⵢⵢⴰⵜ ⴼ ⵡⴰⵜⵉⴳ ⵏ ⵓⵙⵎⵀⵍ ⵏ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⵍⵎⵖⵔⵉⴱ-ⵓⵕⵓⴳⵡⴰⵢ, ⴳ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⵙ ⵉⵜⵜⵓⵙⵏⴼⴰⵍⵏ ⵊⴰⵔ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ, ⵉⵖⵔ ⵉ ⵡⴰⵍⴰⵙ ⵏ ⵜⵎⵢⴰⵇⵇⴰⵏⵜ ⵏ ⵓⵏⵔⴰⵎⴰⵙ ⵉⵜⵜⵓⵣⵎⵎⴰⵏ ⵊⴰⵔ ⵙⵉⵏ ⵉⵙⵇⵇⵉⵎⵏ ⴳ ⵉⵏⵏⴰⵢⵔ 2004, ⵉⵙⴷⴷⵉⴷ ⴼ ⵡⴰⵜⵉⴳ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴳ ⵓⵏⵏⵓⵕⵥⵎ ⵏ ⵉⴳⵔⴰⵏ ⵏ ⵓⵎⵢⴰⵡⴰⵙ ⴳ ⵉⴳⵔⴰⵏ ⵏ ⵜⵙⵔⵜⵉⵜ ⵏ ⴱⵕⵕⴰ ⴷ ⵓⵙⵙⵍⵎⴷ ⴷ ⵜⴷⵍⵙⴰ ⴷ ⵜⵙⴱⴱⴰⴱⵜ.

ⵉⵙⴰⵡⵍ ⵓⵏⵙⵙⵉⵅⴼⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵓⵕⵓⴳⵡⴰⵢ ⵎⴰⵙⵙ ⵅⵓⵚⵚⵉ ⴽⴰⵕⵍⵓⵙ ⵎⴰⵙ ⴼ ⵓⴼⵔⴰⴽ ⵏⵏⵙ ⴳ ⵓⵚⴽⵢ ⵏ ⵜⵣⴷⴰⵢⵉⵏ ⵜⵉⵎⴰⵢⵏⵓⵜⵉⵏ ⴱⴷⴷⵏⵉⵏ ⴼ ⵓⵎⵢⴰⵡⴰⵙ ⴷ ⵓⵡⵇⵇⵔ ⵉⵜⵜⵓⵙⵏⴼⴰⵍⵏ, ⵢⵉⵏⵉ ⵎⴰⵙ ⵔⴰⴷ ⵉⵙⵡⵓⵔⵉ ⵙ ⵜⵔⴰⴱⴱⵓⵜ ⵏ ⵜⴷⴷⵓⴽⴽⵯⵍⴰ ⵜⴰⴱⵕⵍⴰⵎⴰⵏⵉⵜ ⴼ ⵓⵚⴽⵓ ⵏ ⵜⵣⴷⴰⵢⵉⵏ ⵜⵉⵎⴰⵢⵏⵓⵜⵉⵏ, ⴷ ⵔⴰⴷ ⵉⵙⵎⵔⵙ ⴰⵔⵣⴰⴼ ⵏⵏⵙ ⵉ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⵉⵥⵥⵓⵎⵜ ⵏ ⵓⵙⴳⴳⵯⴰⵙ ⴷ ⵢⵓⵛⴽⴰⵏ ⵉ ⵡⴰⵍⴰⵙ ⵏ ⵜⵎⵢⴰⵇⵇⴰⵏⵜ ⵏ ⵓⵏⵔⴰⵎⴰⵙ.