ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵓⵏⴳⵔⴰⵡ ⴰⴷⵓⵙⴰⵏ ⴷ ⵓⵙⵎⵍ ⴳ ⵜⵣⵣⵓⵍⵓⵏ ⴰⵜⵜⵓⵢⵏⵉⵏ
ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 7 ⴷⵓⵊⴰⵏⴱⵉⵔ 2022, ⴰⵙⵏⴼⴰⵔ ⵏ ⵓⵙⵍⴳⵏ ⴼ ⵓⵏⴳⵔⴰⵡ ⴰⴷⵓⵙⴰⵏ ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴼ ⵓⵙⵎⵍ ⴳ ⵜⵣⵣⵓⵍⵉⵏ ⴰⵜⵜⵓⵢⵏⵉⵏ, ⴳ ⵜⵖⵉⵎⵉⵜ ⵜⴰⵣⵣⵔⴰⴼⵜ ⵍⵍⵉ ⵉⵙⵙⵉⵅⴼ ⵓⵎⴰⵔⵉ ⵏ ⵓⵏⵙⵙⵉⵅⴼ ⵎⴰⵙⵙ ⴷⵔⵉⵙ ⵜⵉⴱⵉ, ⴷ ⵜⵉⵍⵉⵜ ⵏ ⵎⴰⵙⵙ ⵅⴰⵍⵉⴷ ⴰⵢⵜ ⵟⴰⵍⴱ ⴰⵎⴰⵡⵙⴰⵙ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ.
ⵙ ⵜⵓⴳⵜ, ⵉⵍⵍⴰ ⵓⵙⵖⵣⵏ ⵏ ⵓⵙⵍⴳⵏ ⴰⵙⴰⵜⵉ 06.22 ⴼ ⵓⵏⴳⵔⴰⵡ ⴰⴷⵓⵙⴰⵏ ⴰⵏⴰⵎⵓⵔ ⴳ ⵓⵙⴰⵜⵉ ⵏ ⵉⵙⵡⴰⵍⴰⵢⵏ ⵉⴳⵍⴷⴰⵏⵏ ⴰⵜⵜⵓⵢⵏⵉⵏ, ⴷ ⵓⵎⵓⴽⵏ ⴰⵎⴰⵜⴰⵢ ⵏ ⵓⵏⴳⵔⴰⵡ ⴰⵏⴰⵎⵓⵔ ⴰⴷⵓⵙⴰⵏ, ⴷ ⵓⵙⵕⵚⵓ ⵏ ⵓⵡⴰⵏⴽ ⴰⵏⴰⵎⵓⵏ.
ⵉⵡⴰⵜⵜⵙ ⵓⵙⵏⴼⴰⵔ ⴰⴷ ⴰⴼⵓⴽⴽⵓ ⵏ ⵜⵎⵓⴽⵔⵉⵙⵜ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⴳ ⵓⵎⵏⴷ ⵏ ⵓⵛⵃⵓ ⵏ ⵓⵏⴳⵔⴰⵡ ⴰⴷⵓⵙⴰⵏ ⴳ ⵜⵏⵏⵓⴱⴹⴰ ⴷ ⵡⴰⵔ ⴰⵙⵎⴰⴷ ⵊⴰⵔ ⵉⴳⵔ ⴰⵎⴰⵜⴰⵢ ⴷ ⵓⵙⵍⵉⴳ ⴼ ⴳ ⵎⴰⴷ ⵉⵥⵍⵉⵏ ⵙ ⵓⵙⵎⵏⵉⴷ ⴰⴷⵓⵙⴰⵏ ⴷ ⵡⴰⵔⵎⵢⴰⵙ ⴷ ⵜⵎⵔⴰⵔⵓⵜ ⵉ ⵉⵏⴰⵔⵓⵣⵏ ⵏ ⵉⵏⵎⵓⵔⴰⵏ.
ⵔⴰⴷ ⵢⴰⵡⵙ ⴰⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 06.22 ⴳ ⵓⵙⵉⴷⴼ ⵙ ⵜⵏⴼⵓⴼⴰ ⵜⵉⴷⵓⵙⴰⵏⵉⵏ ⴷ ⵓⵙⵖⵓⴷⵓ ⵏⵏⵙⵏⵜ, ⴷ ⵜⵉⵍⵉⵜ ⵏ ⵉⵙⴰⴼⴰⵔⵏ ⴷ ⵉⵢⴰⴼⵓⵜⵏ ⵉⴷⵓⵙⴰⵏⵏ ⴷ ⵓⵙⵙⵔⵇⴱ ⵏ ⵓⵔⵣⵣⵓ ⴰⵎⴰⵙⴰⵏ ⴳ ⵢⵉⴳⵔ ⵏ ⵜⴷⵓⵙⵉ ⴷ ⵜⵏⴳⴰⴷⴷⴰⵢⵜ ⴳ ⵓⴽⵛⵓⵎ ⴷ ⵓⴼⵔⴰ ⵏ ⵜⵏⵓⴼⴰ ⵜⵉⴷⵓⵙⴰⵏⵉⵏ.
ⵉⴱⴷⴷ ⵓⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ ⴼ ⵓⵙⵕⵚⵓ ⵏ ⵜⵏⵏⵓⴱⴹⴰ ⵏ ⵓⵏⴳⵔⴰⵡ ⴰⴷⵓⵙⴰⵏ ⵙ ⵓⵙⴽⵔ ⵏ ⵓⵏⴳⵔⴰⵡ ⵏ ⵜⵎⵓⵛⴰ ⴷ ⵓⵙⵓⵜⴳ ⵏ ⵉⵙⵓⴳⴰⵎ ⵉⵏⴼⴳⴰⵏⵏ ⵙ ⵓⵙⴽⵔ ⵏ ⵓⵙⵍⴳⵏ ⵏ ⵜⵡⵡⵓⵔⵉ ⵜⴰⴷⵓⵙⴰⵏⵜ ⴷ ⵓⵏⵏⵓⵕⵥⵎ ⴼ ⵉⴹⴱⵉⴱⵏ ⵏ ⴱⵕⵕⴰ ⴷ ⵓⵙⵙⵔⵇⴱ ⵏ ⵉⴹⴱⵉⴱⵏ ⵉⵎⵖⵔⵉⴱⵉⵢⵏ ⵍⵍⴰⵏⵉⵏ ⴳ ⴱⵕⵕⴰ ⴷ ⵓⵎⵓⴽⵏ ⵏ ⵓⵏⴳⵔⴰⵡ ⵏ ⵓⵙⵎⵓⵜⵜⴳ.
ⵉⵍⵍⴰ ⵓⵍⴰ ⵓⵙⵖⵣⵏ ⵙ ⵓⵎⴽⵕⴰⴹ ⵏ ⵓⵙⵏⴼⴰⵔ ⵏ ⵓⵙⵍⴳⵏ ⴰⵎⴰⴷⴷⴰⵙ 48.22 ⵉ ⵓⵙⵏⴼⵍ ⴷ ⵓⵙⵎⴰⴷ ⵏ ⵓⵙⵍⴳⵏ ⴰⵎⴰⴷⴷⴰⵙ 02.12 ⵉ ⵓⵙⵎⵍ ⴳ ⵜⵣⵣⵓⵍⵉⵏ ⴰⵜⵜⵓⵢⵏⵉⵏ ⵉ ⵓⵎⵙⴰⵙⴰ ⴷ ⵓⵎⵏⵏⵉ 49 ⴷ 92 ⴳ ⵓⴷⵓⵙⵜⵓⵔ, ⵉⵡⴰⵜⵜⵙ ⴰⵙⵏⴼⵍ ⴷ ⵓⵙⵎⴰⴷ ⵏ ⵜⵎⵔⵙⴰⵍ ⵜⵉⴳⴷⵓⴷⴰⵏⵉⵏ ⴷ ⵜⵣⵣⵓⵍⵉⵏ ⴰⵜⵜⵓⵢⵏⵉⵏ ⵜⵜⴰⵡⴱⴷⴰⵔⵉⵏ ⴳ ⵓⵎⴹⴼⵓⵕ ⵡⵉⵙ 2 ⵏ ⵓⵙⵍⴳⵏ ⴰⵎⴰⴷⴷⴰⵙ 02.12.
ⵙ ⵓⵍⴳⵏ ⴰⴷ, ⵉⵍⵍⴰ ⵓⵙⵉⵔⴰ ⴰⵎⵖⵔⵉⴱⵉ ⵏ ⵉⵣⵔⴼⴰⵏ ⵏ ⵓⵎⴰⵔⴰ ⴷ ⵜⵎⵔⵙⵍⵜ ⵉⵛⵛⴰⵔⵏ ⵉ ⵓⵙⵎⵖⵔ ⵏ ⵜⵡⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ ⵏ ⵉⵎⵙⵡⵓⵔⵉⵏ ⵏ ⵜⵎⵙⵙⵓⴳⵓⵔⵉⵏ ⵜⵉⴳⴷⵓⴷⴰⵏⵉⵏ ⴳ ⵜⵍⴳⴰⵎⵜ ⵏ ⵜⵎⵔⵙⴰⵍ ⵍⵍⵉ ⵔⴰ ⵉⵣⵣⵔⵉ ⵓⵙⵇⵇⵉⵎ ⵏ ⵜⵏⴱⴰⴹⵟ ⵉⵎⴰⵙⴰⵢⵏ ⵏⵏⵙⵏⵜ.