ⵜⵉⵏⴰⵡⵜ ⵏ ⵜⵙⵇⵇⵉⵎⵜ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⴼ ⵓⵙⵎⴰⴷ ⵊⴰⵔ ⵜⴰⴷⵉⴱⵍⵓⵎⴰⵙⵉⵜ ⵜⴰⵎⴰⴷⴷⴰⴷⵓⵜ ⴷ ⵜⴷⵉⴱⵍⵓⵎⴰⵙⵉⵜ ⵜⴰⵎⵙⴰⴷⴰⵖⵜ
ⵜⵙⵏⵎⴰⵍⴰ ⵜⵙⵇⵇⵉⵎⵜ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵣⴰⵖ ⴰⵏⴰⵎⵓⵔ ⴷ ⵜⵖⴰⵡⵙⵉⵡⵉⵏ ⵜⵓⵙⵍⵉⵎⵉⵏ ⴷ ⵉⵎⵖⵔⵉⴱⵉⵢⵏ ⵏ ⵜⵎⵉⵣⴰⵔ ⵏ ⴱⵕⵕⴰ ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵙ ⵓⵎⵢⴰⵡⴰⵙ ⴰⴽⴷ ⴰⵏⴰⵎⵎⴰⵙ ⴰⵎⵖⵔⵉⴱⵉ ⵉ ⵜⵡⵉⵣⵉ ⴷ ⵜⵏⵎⵓⵔⵉ, ⴰⴽⵕⴰⵙ 27 ⵢⵓⵍⵢⵓⵣ 2022, ⵜⵉⵏⴰⵡⵜ ⴼ ⵜⴷⵉⴱⵍⴰⵎⵙⵉⵜ ⵜⴰⵎⴰⴷⴷⴰⴷⵓⵜ ⴷ ⵜⴷⵉⴱⵍⵓⵎⴰⵙⵉⵜ ⵜⴰⵎⵙⴰⴷⴰⵖⵜ, ⵜⴰⵏⴰⵡⵜ ⵜⴰⵄⵕⴰⴱⵜ ⵜⵉⵙ ⵙⵏⴰⵜ, ⵙ ⵜⴷⵔⴰⵡⵜ ⵏ ⵉⵎⵙⵇⵇⴰⴷⵏ ⴷ ⵉⵙⵇⵓⵙⵓⵜⵏ ⴷ ⵉⵎⵙⴽⴰⵔⵏ ⵉⵏⴰⵎⵓⵏⵏ.
ⵜⵙⵎⵏⵉⴷ ⵏⴰⴷⵢⴰ ⴱⵓⵄⵉⴷⴰ, ⵜⴰⵏⵙⵙⵉⵅⴼⵜ ⵏ ⵜⵙⵇⵇⵉⵎⵜ ⵜⴰⴳⵓⵔⵉ ⴳ ⵜⵙⴰⵡⵍ ⴼ ⵜⴷⵉⴱⵍⵓⵎⴰⵙⵉⵜ ⵜⴰⵎⵙⴰⴷⴰⵖⵜ ⴳ ⵓⵣⵎⵣ ⵏ ⵜⵎⴰⴹⵍⴰⵏⵜ ⵉⵙⵏⴼⵍⵏ ⵜⵉⵣⴷⴰⵢⵉⵏ ⵊⴰⵔ ⵉⵡⴰⵏⴽⵏ ⴳ ⵓⵡⵙⵡⵉⵔ ⴰⵙⵔⵜⴰⵏ ⴷ ⵓⴷⵍⵙⴰⵏ ⴷ ⵓⴷⵎⵙⴰⵏ, ⵖⵎⴽ ⴰⵏⵏ ⴰⴼ ⵜⵎⵎⴰⵖ ⴽⵓ ⵜⴰⵎⴰⵣⵉⵔⵜ ⴰⴷ ⵜⵙⵎⵖⵔ ⵜⴰⵡⵡⵓⵔⵉ ⵏⵏⵙ ⵜⴰⴷⵉⴱⵍⵓⵎⴰⵙⵉⵜ.
ⵜⵙⴰⵡⵍ ⵎⴰⵙⵙ ⴱⵓⵄⵉⴷⴰ ⵓⵍⴰ ⴼ ⵡⴰⵜⵉⴳ ⴼ ⵜⴷⵉⴱⵍⵓⵎⴰⵙⵉⵜ ⵉⵥⴹⴰⵕⵏ ⴰⴷ ⵜⵙⴷⵓⵙ ⴰⴷⵖⴰⵔ ⵏ ⵍⵎⵖⵔⵉⴱ ⴳ ⵓⵣⵎⵣ ⴰⴷ, ⵙⵍⴰⵡⴰⵏ ⴰⴽⴽⵯ ⵜⴰⴷ ⵉⴳⴰⵏ ⵜⴰⴱⵕⵍⴰⵎⴰⵏⵉⵜ ⴷ ⵜⵉⵏ ⵉⴽⴰⴱⴰⵕⵏ ⴷ ⵜⴷⵎⵙⴰⵏⵜ ⴷ ⵜⵉⵏ ⵓⵙⴳⴷ, ⵜⵉⵏⵉ ⵎⴰⵙ ⵜⴳⴰ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⵜⴰⵡⵓⵔⵉ ⵏ ⴽⵓ ⴰⵏⵎⵓⵔⵉ ⵓⵔ ⴷ ⵖⴰⵙ ⵜⴰⵏⴱⴰⴹⵜ ⴷ ⵓⴱⵕⵍⴰⵎⴰⵏ ⴷ ⵉⴽⴰⴱⴰⵕⵏ ⵉⵙⵔⵜⴰⵏⵏ ⴷ ⵡⴰⵎⵓⵏ ⴰⵖⵔⵎⴰⵏ.
ⵉⵙⴰⵡⴰⵍ ⵎⴰⵙⵙ ⵎⵓⵃⴰⵎⵎⴰⴷ ⵍⵄⵓⵚⴼⵓⵕ, ⴰⵏⵙⵙⵉⵅⴼ ⵏ ⵡⴰⵎⵎⴰⵙ ⴰⵎⵖⵔⵉⴱⵉ ⵉ ⵜⵡⵉⵣⵉ ⴷ ⵜⵏⵎⵓⵔⵉ, ⴼ ⵓⵙⵎⴰⵜⵜⵉ ⴰⵎⴰⵢⵏⵓ ⵉⵍⵍⴰⵏ ⴳ ⵜⵡⵡⵓⵔⵉ ⵜⴰⴷⵉⴱⵍⵉⴰⵎⴰⵙⵉⵜ, ⵙⵍⴰⵡⴰⵏ ⵍⵍⵉⵖ ⵜⴳⴰ ⵜⴷⵉⴱⵍⵓⵎⴰⵙⵉⵜ ⵏ ⵜⵡⵉⵣⵉ ⵜⴰⴷ ⵉⴳⴰⵏ ⵜⴰⵎⵔⵙⵍⴰⵏⵜ ⴷ ⵜⵉⵏ ⵓⵎⵛⴰⴱⴱⴰⴽ ⵉⵍⴰⵏ ⵉⴷⵔⵉⵣⵏ ⴷ ⵓⴼⴰⵔⵙⵙ, ⵢⴰⴽⴽⴰⵏ ⴰⵜⵉⴳ ⵉ ⵜⵎⵓⵔⴰ ⴷ ⵡⴰⵎⵓⵏⵏ, ⵜⵣⵓⵣⵣⴻⵔ ⵓⵍⴰ ⴰⵜⵉⴳⵏ ⵏ ⵓⵎⵢⴰⵡⴰⵙ ⴷ ⵓⵎⵛⴰⴱⴱⴰⴽ ⵊⴰⵔ ⵎⵉⴷⴷⵏ.
ⵉⵙⴰⵡⵍ ⵎⴰⵙⵙ ⵓⴱⵓⴱⴽⵔ ⵉⴱⵕⴰⵀⵉⵎ, ⴰⵎⵙⵇⵇⴰⴷ ⴰⵍⵉⴱⵉ, ⴼ ⵜⴷⵉⴱⵍⵓⵎⴰⵙⵉⵜ ⵜⴰⴱⵕⵍⴰⵎⴰⵏⵉⵜ ⴷ ⵡⴰⵜⵉⴳ ⵏⵏⵙ ⴳ ⵓⵙⴷⵓⵙ ⵏ ⵜⵣⴷⴰⵢⵉⵏ ⵜⵉⵎⴰⴷⴷⵓⴷⵉⵏ ⴷ ⵜⵎⴷⵏⴰⵏⵉⵏ ⵊⴰⵔ ⵉⵡⴰⵏⴽⵏ ⴷ ⵉⵎⴰⴷⴰⵏⵏ, ⴷ ⵓⵙⴽⵔ ⵏ ⵓⵎⵢⴰⴷⴰⵙ ⵊⴰⵔ ⵉⵎⴰⴷⴰⵏⵏ, ⵉⵙⵓⵜⴳ ⵓⵍⴰ ⵜⴰⵣⵣⵉⴳⵣⵜ ⵏ ⵍⵎⵖⵔⵉⴱ ⴳ ⵢⵉⴳⵔ ⴰⴷ ⴳ ⵉⵙⴳⴳⵯⴰⵙⵏ ⴰⴷ ⴳⴳⵓⵔⴰⵏⵉⵏ.
ⵜⵙⴰⵡⵍ ⵎⴰⵙⵙⴰ ⵢⴰⵙⵎⵉⵏ ⵙⴰⵍⵎⴰⵏ ⵍⵊⵄⵉⴼⵔⴰ, ⵜⴰⵎⴰⵔⵉⵜ ⵏ ⵓⵎⵙⵇⵇⴰⴷ ⵏ ⵍⵄⵉⵕⴰⵇ, ⴼ ⵜⴷⵉⴱⵍⵎⴰⵙⵉⵜ ⵜⴰⵎⵙⴰⴷⴰⵖⵜ ⴷ ⵜⵉⵍⴰⵍⴰⵜ ⵏ ⵡⴰⵎⵓⵏ ⴰⵖⵔⵎⴰⵏ ⴳ ⵓⵣⵣⴳⵉⵔ ⵏⵏⵙ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵜⴻⵟⵟⴰⴼ ⴽⵕⴰⴹ ⵓⴷⵎⴰⵡⵏ, ⵜⴰⴷⵉⴱⵍⴰⵎⴰⵙⵉⵜ ⵜⴰⵎⴰⴷⴷⵓⴷⵜ ⴷ ⵜⵓⵏⴱⵉⴹⵜ ⴷ ⵜⵎⴷⵏⴰⵏⵜ.
ⵉⵙⴰⵡⴰⵍ ⵜⴰⵏⵉ ⵔⵔⵎⵉⵜⵉ, ⴰⵎⵙⴽⴰⵔ ⵏ ⵜⵡⵡⵓⵔⵉⵡⵉⵏ ⴳ ⵜⵎⵙⵇⵇⴰⴷⵜ ⵏ ⵍⵉⵎⵉⵕⴰⵜ, ⵎⴰⵙ ⴰ ⵜⵜⴰⵡⵙ ⵜⴷⵉⴱⵍⵓⵎⴰⵙⵉⵜ ⴳ ⵓⵎⵢⴰⴷⴰⵙ ⵏ ⵜⴰⵏⵏⴰⵢⵢⵉⵏ, ⵉⵙⵎⵏⵉⴷ ⵜⵉⵔⵎⵉⵜ ⵏ ⵜⵎⴰⵣⵉⵔⵜ ⵏⵏⵙ ⴳ ⵓⵎⵏⵉⴷ ⴰⴷ ⵍⵍⵉ ⵢⴰⴽⴽⴰⵏ ⴰⵏⴰⵡ ⵉⵙⵎⴷⵏ ⵊⴰⵔ ⵙⵉⵏ ⵡⴰⵏⴰⵡⵏ ⵏ ⵜⴷⵉⴱⵍⴰⵎⴰⵙⵉⵜ ⵉ ⵓⵙⴷⵓⵙ ⵏ ⵜⵏⴼⵔⵓⵜ ⴷ ⵓⴼⵔⴰ.
ⵜⵙⴰⵡⴰⵍ ⵎⴰⵙⵙ ⵄⵉⵛⴰ ⵍⴽⵔⵊⵉ, ⵜⴰⵎⴰⵔⵉⵜ ⴷ ⵜⴳⵎⴰⵎⴰⵜ ⵏ ⵜⵙⵇⵇⵉⵎⵜ, ⴼ ⵜⴷⵉⴱⵍⵓⵎⴰⵙⵉⵜ ⵜⴰⵎⴰⴷⴷⵓⴷⵜ ⴳ ⵓⵎⵣⴰⵖ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⵉ ⵉⵡⴰⵏⴽⵏ, ⵜⴳ ⴰⵙⴰⵔⵓ ⴰⵇⴱⵓⵔ ⴳ ⵓⵎⵣⴰⵖ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ ⵏ ⵉⵡⴰⵏⴽⵏ, ⵜⵉⵏⵉ ⵎⴰⵙ ⵜⵉⵡⵙ ⵜⵎⵙⴽⵔⵜ ⵜⴰⴷⵉⴱⵍⵓⵎⴰⵙⵉⵜ ⴳ ⵓⵙⵎⵖⵔ ⵏ ⵜⵡⵡⵓⵔⵉ ⵜⴰⴷⵉⴱⵍⵓⵎⴰⵙⵉⵜ.
ⴳ ⵓⵎⴹⴰⴽⴰⵕ, ⵜⵜⵓⴼⴽⴰⵏ ⵉⵙⵖⵍⴰⴼ ⵍⵍⵉ ⵔⴰⴷ ⵢⴰⵡⵙ ⴳ ⵓⵙⵖⵓⴷⵓ ⵏ ⵜⵡⵡⵓⵔⵉ ⵜⴰⴷⵉⴱⵍⵓⵎⴰⵙⵉⵜ ⵉ ⵚⴰⵃⴰ ⵏ ⵜⵎⵙⴰⵔⵉⵏ ⵜⵉⵏⴰⵎⵓⵔⵉⵏ. ⵉⵜⵜⵓⵙⴽⴰⵔ ⵡⴰⵎⵎⴰⵙ ⴰⵎⵖⵔⵉⴱⵉ ⵉ ⵜⵡⵉⵣⵉ ⴷ ⵜⵏⵎⵓⵔⵉ ⴳ 2013, ⵉ ⵓⵣⵓⵣⵣⴻⵔ ⵏ ⵜⴷⵍⵙⴰ ⵏ ⵜⵡⵉⵣⵉ ⴷ ⵜⵏⵎⵓⵔⵉ ⴷ ⵓⵎⵙⵓⵔⵓⴼ ⴷ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵔ ⵉⵜⵜⴰⵡⵙ ⴳ ⵓⵙⴳⵎⵉ ⵏ ⵓⵏⵎⵓⵔⵉ ⴰⵎⵖⵔⵉⴱⵉ ⴼ ⵉⵙⵏⴼⴰⵔⵏ ⵏ ⵓⵙⵎⵖⵔ ⵏ ⵜⵡⵉⵣⵉ.