ⴳ ⵉⵎⴹⴰⴽⴰⵕⵏ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⴽⴰⴱⴰⵕ ⴰⴱⵕⵍⴰⵎⴰⵏⵉ ⴳ ⵜⴳⴷⵓⴷⴰⵏⵜ ⵏ ⵛⵛⵉⵍⵉ: ⴰⵎⵢⴰⵡⴰⴹ ⴰⵙⵓⵍⴰⵏ ⵉⵕⵡⴰⵏ ⴷ ⵓⵎⵙⴰⵡⴰⵍ ⴰⴱⵕⵍⴰⵎⴰⵏⵉ

ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⵢⵏⴰⵙ 20 ⵢⵓⵏⵢⵓ 2022 ⴳ ⵓⵙⵖⵉⵎ ⵏ ⵓⵙⵇⵇⵉⵎ, ⴰⴽⴰⴱⴰⵕ ⴰⴱⵕⵍⴰⵎⴰⵏⵉ ⵏ ⵜⵎⵖⴰⵔⵉⵏ ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ ⵙ ⵜⵏⵙⵙⵉⵅⴼⵜ ⵏ ⵎⴰⵙⵙⴰ Claudia Nathalie Jimenez Mix ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ, ⵉⵙⴽⴰⵔⵏ ⴰⵔⵣⴰⴼ ⵉ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴰⵔ 25 ⵢⵓⵏⵢⵓ 2022.

ⴳ ⵓⵏⵎⵓⵇⵇⴰⵔ ⴰⴷ, ⵉⵍⵍⴰ ⵓⵎⴹⴰⴽⴰⵕ ⴼ ⵜⵣⴷⴰⵢⵉⵏ ⵍⵍⴰⵏⵉⵏ ⵊⴰⵔ ⵙⵉⵏ ⵉⵙⵇⵇⵉⵎⵏ ⵏ ⵉⵎⵓⵔⴰ ⴳ ⵍⵎⵖⵔⵉⴱ ⴷ ⵛⵛⵉⵍⵉ, ⵢⵉⵍⵉ ⵓⵙⴷⴷⵉⴷ ⴼ ⵜⵙⵓⵍⴰⵏⵜ ⵏ ⵓⵎⵢⴰⵡⴰⴹ ⵉⵕⵡⴰⵏ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⴷ ⵓⴷⵔⴰⵡ ⵏ ⵜⵉⵔⵎⵉⵜⵉⵏ ⵅⴼ ⵜⵎⵙⴰⵔⵉⵏ ⵣⴷⵉⵏⵉⵏ ⴷ ⵜⵣⵣⵉⴳⵣⵜ ⵜⴰⴷⵙⵜⴰⵔⵜ ⴷ ⵜⵎⵔⵙⵍⴰⵏⵜ ⴷ ⵜⴳⵯⵙⴰⵙⵜ ⵏ ⵜⵎⵖⴰⵔⵉⵏ, ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵡⴰⵎⴰⵏ ⴷ ⵓⵣⵡⴰⴳ ⴷ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵉⵄⵔⵔⵉⵎⵏ ⴷ ⵜⵓⵏⵏⵓⵏⵜ, ⵖⵎⴽ ⴰⵏⵏ ⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵉⵢⵉⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴳⵔⴰⵖⵍⴰⵏ ⴷ ⵓⵏⵎⵏⴰⴷ ⵉ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵏⵔⴰⵎⴰⵙ ⴷ ⵓⵣⴷⴷⵓⵢ ⵉ ⵓⵙⴱⴷⴷⵉ ⵏ ⵜⵏⴰⵥⴰⵕⵉⵏ ⵛⵛⴰⵔⵏⵉⵏ.

ⵉⵙⴷⴷⵉⴷ ⵎⴰⵙⵙ ⵕⴰⵛⵉⵔ ⵟⴰⵍⴱⵉ ⵍⵄⴰⵍⴰⵎⵉ ⴼ ⵡⴰⵜⵉⴳ ⵏ ⵓⵔⵣⴰⴼ ⴷ ⵓⵏⵎⵓⵇⵇⴰⵔ ⴰⴷ ⵉ ⵓⵙⴷⵓⵙ ⵏ ⵓⵎⵙⴰⵡⴰⵍ ⴷ ⵓⵎⵢⴰⵡⴰⴹ ⵍⵍⵉ ⵔⴰⴷ ⵢⴰⵡⵙ ⴳ ⵜⵓⵙⵙⵏⴰ ⵏ ⵜⵣⵣⵉⴳⵣⵜ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴳ ⵉⵙⵡⵉⵔⵏ ⵏ ⵓⴷⵓⵙⵜⵓⵔ ⴷ ⵉⵣⵔⴼⴰⵏ ⴷ ⵜⵏⴼⵔⵓⵜ ⴷ ⵜⵥⴹⴰⵕⵜ ⴷ ⵡⴰⵡⵏⴰⴷ  ⴷ ⵓⴷⵡⴰⵙ  ⴷ ⵡⴰⵎⵓⵏ. ⵉⵙⵎⵏⵉⴷ ⵓⵍⴰ ⵜⴰⵣⵣⵉⴳⵣⵜ ⵜⴰⵎⵔⵙⵍⴰⵏⵜ ⴳ ⵜⵎⵔⴰⵡⵜ ⵉⴳⴳⵓⵔⴰⵏ ⴷ ⵜⴳⵯⵏⵙⴰⵙⵜ ⵏ ⵜⵎⵖⴰⵔⵉⵏ ⴷ ⵉⵄⵔⵔⵉⵎⵏ ⴳ ⵜⴳⵔⴰⵡⵉⵏ ⴷ ⵜⵎⵔⵙⴰⵍ, ⴷ ⵓⵎⵎⵉⵥⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵉⵟⵟⴰⴼⵏ ⴰⴷⵖⴰⵔ ⵉⵥⵉⵍⵏ ⴷⴰⵔ ⴽⵉⴳⴰⵏ ⵏ ⵜⴳⵔⴰⵡⵉⵏ ⴷ ⵜⵎⴰⴷⴷⴰⵙⵉⵏ.

ⴳ ⵓⵎⵏⵉⴷ ⵏⵏⵙ, ⵜⵙⵓⵜⴳ ⵎⴰⵙⵙⴰ Claudia Nathalie Jimenez Mix ⵜⴰⵏⵙⵙⵉⵅⴼⵜ ⵏ ⵓⴽⴰⴱⴰⵕ ⴰⴷ ⴰⵏⵎⵓⵇⵇⴰⵔ ⴰⴷ ⴷ ⵓⵎⵙⴰⵡⴰⵍ ⴰⴷ ⵉⵏⵏⵓⵕⵥⵎⵏ , ⵜⵉⵏⵉ ⵎⴰⵙ ⵉⵔⴰ ⵓⴽⴰⴱⴰⵕ ⵏ ⵜⵎⵖⴰⵔⵉⵏ ⵜⵉⵎⵓⵔⴰ ⵙⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ ⴰⴷ ⵢⵉⵍⵉ ⵓⵙⵏⴼⵍ ⵏ ⵜⵎⵓⵣⴰⵢⵉⵏ ⴷ ⵜⵉⵔⵎⵉⵜⵉⵏ  ⵣⴷⵉⵏⵉⵏ ⴷ ⵡⴰⵏⴰⵡ ⴰⵎⵖⵔⵉⴱⵉ ⴳ ⵉⴳⵔⴰⵏ ⵏ ⵉⵣⵔⴼⴰⵏ ⴷ ⵜⵏⴼⵔⵓⵜ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵡⴰⵎⴰⵏ ⴷ ⵓⴼⵔⴰⴳ ⵏ ⵡⴰⵡⵏⴰⴹ, ⵖⵎⴽⵍⵍⵉ ⵔⴰⴷ ⵉⵙⴽⵔ ⴽⵉⴳⴰⵏ ⵏ ⵉⵏⵎⵓⵇⵇⴰⵔⵏ ⴰⴽⴷ ⵉⵎⵙⵜⴳⴳⴰⵔⵏ ⵉⵎⵖⵔⵉⴱⵉⵢⵏ ⴷ ⵉⵔⵣⴰⴼⵏ ⵢⴰⴹⵏⵉⵏ.

ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⴽⴰⴱⴰⵕ ⴰⴷ ⵉ ⵜⵏⵖⵎⴰⵙⵜ ⵎⴰⵙ ⵟⵟⴰⴼⵏ ⵙⵉⵏ ⵉⵙⵇⵇⵉⵎⵏ ⵜⵉⵎⵙⴰⵔⵉⵏ ⵛⵛⴰⵔⵏⵉⵏ ⵍⵍⵉ ⴼ ⵔⴰⴷ ⵢⵉⵍⵉ ⵓⵙⵡⵓⵔⵉ ⴰⵎ ⵜⴰⵥⴹⴰⵕⵜ ⴷ ⵉⵙⵏⴼⵍⵏ ⵏ ⵓⵏⵣⵡⵉ ⴷ ⵡⴰⵎⴰⵏ ⴷ ⵜⵏⴼⵔⵓⵜ, ⵜⵉⵏⵉ ⵎⴰⵚ ⵥⵉⵍⵏ ⵉⵎⴹⴰⴽⴰⵕⵏ ⴰⴽⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵍⵎⵖⵔⵉⴱ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴳ ⵉⵍⵍⴰ ⵓⵎⴹⴽⴰⵕ ⵅⴼ ⵜⵣⵔⴼⵜ ⵜⴰⵎⴰⵜⵜⴰⵢⵜ ⴷ ⵜⵣⵣⵉⴳⵣⵜ ⵜⴰⵣⵔⴼⴰⵏⵜ ⴷ ⵜⴷⵉⵎⵓⵇⵔⴰⵟⵉⵜ ⴷ ⵜⵎⵔⵙⵍⴰⵏⵜ, ⵜⵉⵏⵉ ⵎⴰⵙ ⵜⵓⵎⵎⵔ ⵙ ⵓⵏⵎⵓⵇⵇⴰⵔ ⴰⴷ ⴷ ⵜⵉⵢⵢⴰⴼⵓⵜⵉⵏ ⵏⵏⵙ.

ⵉⴳⴰ ⵓⵏⵎⵓⵇⵇⴰⵔ ⴰⴷ ⵜⴰⵎⵍⴷⴰ ⵏ ⵓⵙⵏⴼⵍ  ⵏ ⵜⴰⵏⵏⴰⵢⵢⵉⵏ ⵅⴼ ⵜⵉⵣⴷⴰⵢⵉⵏ ⵜⵉⵙⵏⵔⴰⵏⵉⵏ ⴷ ⵜⴳⵜⵉⵔⴰⵏⵉⵏ ⴳ ⵉⵙⵡⵉⵔⵏ ⴰⴽⴽⵯ ⴷ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵉⵢⵏ  ⵖⵎⴽ ⴰⵏⵏ ⵓⵍⴰ ⴷ ⵜⵎⵙⴰⵔⵉⵏ ⵛⵛⴰⵔⵏⵉⵏ.

ⵢⵓⵎⴰ ⵓⴽⴰⴱⴰⵕ ⴰⴱⵕⵍⴰⵎⴰⵏ ⵏ ⵛⵛⵉⵍⵉ ⵉⵙⵜ ⵎⴰⵙⵙⴰ ⵜⵉⵎⵓⵔⴰ: Julia Lorena Monleon Fries, Helia Agueda Milman Molina,  Marcela Patricia Rotricia Roquelme Aliaga, Maria Mercedes Bulnes Nunes. ⴷ ⵎⴰⵙⵙⴰ ⵜⴰⵎⵏⵀⴰⵍⵜ ⵏ ⵜⵣⴷⴰⵢⵉⵏ ⵜⵉⴳⵔⴰⵖⵍⴰⵏⵉⵏ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵛⵛⵉⵍⵉ.