ⵜⴷⵔⵓ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ, ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴳ ⵜⵙⵓⵜⵍⵜ ⵜⴰⵎⵙⴽⴰⵔⵜ ⵏ ⵓⵏⵎⵓⵇⵇⴰⵔ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ

ⵜⴷⵜⵔⵓ ⵎⴰⵙⵙⴰ ⵅⴰⴷⵉⵊⴰ ⵣⵣⵓⵎⵉ ⵜⴰⵎⴰⵔⵉⵜ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵍⵓⵔⴰ ⴰⵙⵙ ⵏ 1 ⵢⵓⵏⵢⵓ ⴳ ⵕⵕⴱⴰⵕ ⴳ ⵜⵙⵓⵜⵍⵜ ⵜⴰⵎⵙⴽⴰⵔⵜ ⵏ ⵓⵏⵎⵓⵇⵇⴰⵔ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ, ⴷⴷⵓ ⵜⵎⴰⵜⴰⵔⵜ: “ⵎⴰⵏ ⵜⴰⵙⵔⵜⵉⵜ ⵜⴰⵏⵎⵏⴰⴹⵜ ⵜⴰⴽⴰⴰⵍⵏⵜ ⵉ ⵉⵄⵔⵔⵉⵎⵏ”.

ⵙ ⵉⵙⵎ ⵏ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⵜⵙⵎⵏⵉⴷ ⵎⴰⵙⵙⴰ ⵣⵣⵓⵎⵉ ⵜⴰⴳⵓⵔⵉ ⵖ ⵜⵙⴷⴷⵉⴷ ⴼ ⵜⵉⵍⴰⵍⵜ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⴳ ⵓⵚⴽⵓ ⵏ ⵓⵡⴰⵏⴽ ⴰⵏⴰⵎⵓⵔ ⴷ ⵓⵚⴽⵓ ⴰⴷⵉⵎⵓⵇⵔⴰⵟⵉ ⴷ ⵜⴳⵎⵉ, ⵜⵉⵏⵉ ⵎⴰⵙ ⴷ ⵜⴰⴳⵍⴷⵉⵜ ⵜⴰⵎⵖⵔⵉⴱⵉⵜ ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵄⵣⵣⵓ ⵕⴱⴱⵉ ⵜⴳⴰ ⵉⵣⵔⴼⴰⵏ ⵏ ⵉⵄⵔⵔⵉⵎⵏ ⴳ ⵓⴷⵓⵙⵜⵓⵔ ⴷ ⵉⵇⵇⴰⵏ ⴰⴷ ⵉⵙⴽⵔ ⴽⵓ ⵢⴰⵏ ⴳ ⵜⵏⴱⴰⴹⵉⵏ ⴷ ⵜⵎⵔⵙⴰⵍ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ.

ⵜⵉⵏⵉ ⵎⴰⵙⵙⴰ ⵣⵣⵓⵎⵉ ⵎⴰⵙ ⴷ ⵉⵇⵇⴰⵏ ⵍⴼⴰⵍ ⵎⵏⵉⴷ ⵏ ⵉⵏⴰⵔⵓⵣⵏ ⵏ ⵉⵄⵔⵔⵉⵎⵏ, ⵏⵥⵕ ⵉⵎⵓⵔⵙⵏ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⵍⵍⵉ ⵉⵡⵙⵏⵉⵏ ⴳ ⵜⵏⴰⴼⵜ ⵜⴰⵙⵔⴷⴰⵙⵜ, ⵟⵟⴼⵏ ⵜⴰⵏⵏⴰⵢⵜ ⵏⵏⵙⵏ, ⵙⵡⵓⵔⵉⵏ ⴳ ⵜⵓⴷⵔⵜ ⵏ ⵜⵓⵏⵏⵓⵏⵜ ⴷ ⵜⴷⵍⵙⴰ ⴷ ⵡⴰⵎⵓⵏ ⴰⵖⵔⵎⴰⵏ, ⵓⴷⵎⴰⵡⵏ ⴰⴽⴽⵯ ⵙⵖⴰⵡⵙⴰⵏ ⵙ ⵓⵙⵓⵜⴳ ⴷ ⵓⵙⴰⵜⵉ ⴰⵎⵔⵙⵍⴰⵏ.

ⵜⵉⵏⵉ ⵎⴰⵙⵙⴰ ⵣⵣⵓⵎⵉ ⵎⴰⵙ ⵉⵡⵙⵏⵜ ⵜⵎⵢⵓⵔⵉⵏ ⴷ ⵜⵎⵙⴽⴰⵔ ⵜⵉⵙⵔⵜⴰⵏⵉⵏ ⴳ ⵍⵎⵖⵔⵉⴱ ⴳ ⵓⵙⴷⵔⵓ ⵏ ⵉⵄⵔⵔⵉⵎⵏ, ⵖⵎⴽ ⵍⵍⵉ ⵜⵣⵎⵎⵉⵎ ⵜⵉⵍⴰⵍⵜ ⵏ ⵜⵎⴰⴷⴷⴰⵙⵉⵏ ⵏ ⵉⵄⵔⵔⵉⵎⵏ ⴷⴰⵔ ⵉⴽⴰⴱⴰⵕⵏ  ⴳ ⵓⵙⵖⵏⵓ ⵏ ⵜⵡⵡⵓⵔⵉ ⵜⴰⵙⵔⵜⴰⵏⵜ.

ⵜⵖⵔ ⵓⵍⴰ ⵉ ⵓⵙⵏⴼⵍ ⵏ ⵜⴰⵏⵏⴰⵢⵜ ⵏⵏⵖ ⵎⵏⵉⴷ ⵏ ⵉⵄⵔⵔⵉⵎⵏ, ⵏⴼⵔⴽ ⵙ ⵜⵥⴹⴰⵕⵉⵏ ⵏⵏⵙⵏ ⴳ ⵉⴳⵔⴰⵏ ⵏ ⵓⵙⵏⴼⵍⵓⵍ  ⴷ ⵓⵙⵙⴰⵔⵓ ⴳ ⵓⵙⵓⵜⴳ  ⴷ ⵓⵙⵉⴷⴼ ⴷ ⵓⵕⵥⵥⵓⵎ ⵏ ⵉⵎⵏⴰⴷⵏ ⵏ ⵓⵙⵡⵉⵏⴳⵎ ⵙ ⵓⵏⵍⵉ.

ⵜⵉⵏⵉ ⵎⴰⵙⵙⴰ ⵣⵣⵓⵎⵉ ⵎⴰⵙ ⵉⵡⵙⵏ ⵉⵎⵓⴽⵏⵏ ⵉⵎⵔⵙⵍⴰⵏⵏ ⴷ ⵉⵣⵣⵔⴰⴼⵏ ⵍⵍⵉ ⵜⵙⴽⵔ ⵜⴳⵍⴷⵉⵜ ⵏⵏⵖ ⴳ ⵙⵏⴰⵜ ⵜⵎⵔⴰⵡⵉⵏ ⴰⴷ ⴳⴳⵓⵔⴰⵏⵉⵏ, ⵙ ⵜⵏⴰⵔⴰ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵎⴰⴷ ⵉⵥⵍⵉⵏ ⵙ ⵉⵄⵔⵔⵉⵎⵏ, ⴰⴷ ⵉⵍⵉⵏ ⵉⵄⵔⵔⵉⵎⵏ ⵙⵓⴳⵔⵏⵉⵏ ⴳ ⵜⵎⵔⵙⴰⵍ ⴰⵎ ⵜⵉⴳⵔⴰⵡⵉⵏ ⵜⴰⵉⵏⴽⴰⵍⵉⵏ ⴷ ⵜⵎⵔⵙⵍⵜ ⵜⴰⵣⵣⵔⴰⴼⵜ, ⵓⴳⴳⴰⵔ ⵏ 41% ⵏ ⵉⴳⵎⴰⵎⴰⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵖⵓⵔⵙⵏ ⵎⴰⴷ ⵉⴷⵔⵓⵙⵏ ⴳ 50 ⵏ ⵓⵙⴳⴳⵯⴰⵙ, ⵓⴳⴳⴰⵔ ⵏ 17 % ⵖⵓⵔⵙⵏ ⵎⴰⴷ ⵉⴷⵔⵓⵙⵏ ⴳ 40 ⵏ ⵓⵙⴳⴳⵯⴰⵙ, ⴰⵢⵍⵍⵉ ⵏⵉⵜ ⵉⵍⵍⴰⵏ ⴳ ⴽⵉⴳⴰⵏ ⵏ ⵉⴱⵕⵍⴰⵎⴰⵏⵏ ⵉⵇⴱⵓⵔⵏ ⴳ ⵜⴷⵉⵎⵓⵇⵔⴰⵟⵉⵜ ⴰⵎ ⵡⵉⵏ ⵓⵕⵓⴱⴱⴰ ⴳ ⵏⵜⵜⴰⴼⴰ ⵉⵄⵔⵔⵉⵎⵏ ⵍⴽⵎⵏⵉⵏ 40 ⵏ ⵓⵙⴳⴳⵯⴰⵙ ⵓⵔ ⴰⴽⴽⵯ ⴰⴳⴳⵓⴳⵏ ⴼ ⵎⴰⴷ ⵉⵍⵍⴰⵏ ⴳ ⵓⴱⵕⵍⴰⵎⴰⵏ ⵏ ⵍⵎⵖⵔⵉⴱ.

ⵜⵉⵏⵉ ⵎⴰⵙⵙⴰ ⵣⵣⵓⵎⵉ ⵎⴰⵙ ⴷ ⵉⵇⵇⴰⵏ ⵓⵙⵓⵜⴳ ⵏ ⵜⵉⵔⵎⵉⵜ ⵏ ⴽⵉⴳⴰⵏ ⵏ ⵉⵎⵓⵔⴰ ⵉⵎⵖⵔⵉⴱⵉⵢⵏ ⵣⵔⵉⵏⵉⵏ ⴳ ⵓⵎⵏⵉⴷ ⵏ ⵓⵙⵡⵓⵔⵉ ⴳ ⵜⵖⴰⵡⵙⴰ ⵜⴰⵙⵔⵜⴰⵏⵜ, ⴰⵡⵉⵏ ⵜⴰⵎⵢⵉⵎⴰⵏⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ  ⵍⵍⵉ ⵜⵏ ⵉⴳⴰⵏ ⴷ ⵉⴳⵎⴰⵎⵏ ⴳ ⵜⵏⴱⴰⴹⵜ ⴷ ⵉⵎⵙⵜⴳⴳⴰⵔⵏ ⴳ ⵜⵎⵔⵙⴰⵍ ⵜⵉⵎⵣⵣⴳⴰⵔⵉⵏ, ⵖⵎⴽ ⵍⵍⵉ ⴷ ⵢⵉⵡⵉ ⵉⴷⵓⵙⵜⵓⵔ ⵏ ⵜⴳⵍⴷⵉⵜ  ⵜⵉⵥⴹⴰⵕⵉⵏ ⴷ ⵉⵣⵔⴼⴰⵏ ⵉ ⵜⴳⵔⴰⵡⵉⵏ ⵏ ⵡⴰⵎⵓⵏ ⴰⵖⵔⵎⴰⵏ.

ⴳ ⵜⴳⵉⵔⴰ, ⵜⵙⴷⴷⵉⴷ ⵎⴰⵙⵙⴰ ⵣⵣⵓⵎⵉ ⵎⴰⵙ ⵜⵣⴷⵉ ⵜⵣⵣⵉⴳⵣⵜ ⵏ ⵜⵎⵜⵜⵉⵡⵉⵏ ⴷ ⵓⴷⵔⴰⵡ ⵏ ⵉⵔⴳⴰⵣⵏ ⴷ ⵜⵎⵖⴰⵔⵉⵏ ⴷ ⵓⵙⵉⴷⴼ ⵏⵏⵙ  ⴳ ⵜⴳⵎⵉ, ⵜⵉⵏⵉ ⵎⴰⵙ ⵉⵕⵥⵎ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ ⴷ ⵉⵎⵓⴽⵏⵏ ⵉⵎⵔⵙⵍⴰⵏⵏ ⴷ ⵉⴷⵎⵙⴰⵏⵏ ⴷ ⵉⵏⴰⵎⵓⵏⵏ ⴳ ⵜⵎⴰⵣⵉⵔⵜ ⵏⵏⵖ ⵉⵎⵏⴰⴷⵏ ⵉⵅⴰⵜⴰⵔⵏ ⵉ ⵉⵄⵔⵔⵉⵎⵏ ⴳ ⵓⵙⵏⴼⵍⵓⵍ ⴷ ⵜⵎⵙⵙⵏⵜⵉⵜ ⴷ ⵜⵡⵡⵓⵔⵉ ⵜⴰⵏⴰⵎⵓⵏⵜ, ⵉⴳ  ⵓⵄⵔⵔⵉⵎ ⴰⵎⵙⵡⵓⵔⵉ ⵓⵔ ⴰⵔ ⵉⵜⵜⵍⵉ ⵙ ⵜⵡⵡⵓⵔⵉ.

ⵉⵥⵍⵉ ⵓⵏⵎⵓⵇⵇⴰⵔ ⴰⴷ ⵙ ⵜⴳⵓⵔⵉ ⵏ ⵎⴰⵙⵙ ⵏⵏⵄⵎⴰ ⵎⵉⵢⵢⴰⵕⴰ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ, ⴷ ⵎⴰⵙⵙ ⵎⵓⵃⴰⵎⵎⴰⴷ ⵍⵎⵀⴷⵉ ⴱⵏ ⵙⵄⵉⴷ ⴰⵎⴰⵡⵙⴰⵙ ⵏ ⵉⵄⵔⵔⵉⵎⵏ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ.

ⵔⴰⴷ ⵢⵉⵍⵉ ⵓⵎⴹⴽⴰⵕ ⵏ ⵉⵎⵔⵙⵉⵡⵏ ⴰⴷ ⴳ ⵓⵏⵎⵓⵇⵇⴰⵔ:

• ⵜⴰⵙⵜⵔⴰⵜⵉⵊⵉⵜ ⵜⴰⵏⴰⵎⵓⵔⵜ ⵏ ⵓⵙⵉⴷⴼ ⵏ ⵉⵄⵔⵔⵉⵎⵏ.
• ⵜⴰⵎⵢⴰⴷⴰⵙⵜ ⵜⴰⴷⵎⵙⴰⵏⵜ ⴷ ⵜⵏⴰⵎⵓⵏⵜ ⵏ ⵓⵙⵉⴷⴼ ⵏ ⵉⵄⵔⵔⵉⵎⵏ.
• ⵜⵉⵕⵡⵉ ⵏ ⵉⵣⵔⴼⴰⵏ ⵏ ⵓⴼⴳⴰⵏ.
• ⴰⴷⵖⴰⵔ ⵏ ⵉⵄⵔⵔⵉⵎⵏ ⴳ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ.
• ⵜⴰⵙⵔⵜⵉⵜ ⵜⴰⵏⴰⴽⴰⵍⵜ ⵜⴰⵏⵎⵏⴰⴹⵜ ⵏ ⵉⵄⵔⵔⵉⵎⵏ.
• ⵜⵉⵎⵉⵜⴰⵔ ⵏ ⵜⵙⵔⵜⵉⵜ ⵜⴰⵏⴰⴽⴰⵍⵜ ⵉ ⵉⵄⵔⵔⵉⵎⵏ.
• ⵜⴰⵙⵔⵜⵉⵜ ⵏ ⵓⵙⵉⴷⴼ ⵉ ⵉⵄⵔⵔⵉⵎⵏ: ⵜⴰⵎⵓⴽⵔⵉⵙⵜ ⵏ ⵓⵣⵣⴳⵉⵔ.

ⵉⵡⴰⵜⵜⵙ ⵓⵏⵎⵓⵇⵇⴰⵔ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⵏ ⵉⵄⵔⵔⵉⵎⵏ ⵉⵎⵖⵔⵉⴱⵉⵢⵏ ⴰⴷ ⵢⵉⵍⵉ ⵓⵙⵡⵉⵏⴳⵎ ⴰⵎⴳⵔⵓ ⴷ ⵓⵎⴹⴰⴽⴰⵕ ⵅⴼ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵏ ⵉⵄⵔⵔⵉⵎⵏ ⴳ ⵉⵙⵡⵉⵔⵏ ⴰⵏⴰⵎⵓⵔ ⴷ ⵓⴽⴰⵍⴰⵏ, ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⵊⴰⵔ ⵉⵄⵔⵔⵉⵎⵏ ⴷ ⵜⵏⴱⴰⴹⵉⵏ ⵜⵉⴳⴷⵓⴷⴰⵏⵉⵏ ⴷ ⵜⴳⵔⴰⵡⵉⵏ ⵜⵉⵏⴰⴽⴰⵍⵉⵏ ⴷ ⵜⵎⵔⵙⴰⵍ ⵏ ⵜⵏⵏⵓⴱⴹⴰ ⵃⵎⴰ ⴰⴷ ⵜⵉⵍⵉ ⵜⵎⴷⵔⴰⵡⵜ ⵜⴰⴷⵉⵎⵓⵇⵔⴰⵟⵉⵜ ⵏ ⵉⵄⵔⵔⵉⵎⵏ ⴳ ⵓⵙⴽⵔ ⵏ ⵜⵖⵜⴰⵙⵜ.