ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2021-2026:
ⵉⵎⴹⴰⴽⴰⵕⵏ ⵊⴰⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵏ ⵍⵎⵖⵔⵉⴱ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵍⵓⵕⴹⵓⵏ
ⵉⴼⴰⵡ ⴷ ⵉⵙⵓⵍ ⵡⴰⴷⴷⴰⴷ ⵏ ⵜⴳⵍⴷⵉⵜ ⵏ ⵍⵓⵕⴹⵓⵏ ⵜⴰⵀⴰⵛⵉⵎⵉⵜ ⴳ ⵚⵚⵃⵕⴰ ⵜⴰⵎⵖⵔⵉⴱⵉⵜ, ⵜⵙⵏⴰⵍ ⵄⵓⵎⴰⵏ ⵜⵉⵅⵅⵓⵜⵔⴰ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴼ ⵉⴽⴰⵍⵉⵡⵏ ⵏⵏⵙ ⴰⴽⴽⵯ
ⵉⵙⵏⵓⴱⴳ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙⵙ ⴼⴰⵢⵚⴰⵍ ⵄⴰⴽⵉⴼ ⵍⴼⴰⵢⵣ ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵍⵓⵕⴹⵓⵏ, ⴰⵢⵏⴰⵙ 7 ⵎⴰⵕⵚ. ⵙⴰⵡⵍⵏ ⴼ ⵓⵙⵏⴼⵍ ⵏ ⵜⵉⵔⵎⵉⵜⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴷ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⴳ ⵜⴷⵎⵙⴰ ⴷ ⵓⵙⵖⵏⵣⵉ ⵊⴰⵔ ⵙⵏⴰⵜ ⵜⵎⵉⵣⴰⵔ.
ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⵉⵣⴷⴰⵢⵉⵏ ⵜⵉⵎⵣⵔⵓⵢⵉⵏ ⵍⵍⴰⵏⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⴷ ⵓⵙⵡⵉⵔ ⵉⵥⵉⵍⵏ ⵉⵍⵍⴰⵏ ⵊⴰⵔ ⵄⵓⵎⴰⵏ ⴷ ⵕⵕⴱⴰⵟ, ⴰⵢⵍⵍⵉ ⵉⵎⵎⴰⵍ ⵓⵎⵙⴰⵙⴰ ⵊⴰⵔ ⵜⴰⵏⵏⴰⵢⵢⵉⵏ ⵅⴼ ⵜⵎⵙⴰⵔⵉⵏ ⵛⵛⴰⵔⵏⵉⵏ.
ⵉⵙⴰⵡⵍ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵜⵣⴷⴰⵢⵉⵏ ⵏ ⵓⵎⵣⵔⵓⵢ ⴷ ⵜⴷⵍⵙⴰ ⵙⵎⵓⵏⵏⵉⵏ ⵊⴰⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⵍⵉⴷⵜ ⵏ ⵍⵓⵕⴹⵓⵏ, ⴷ ⵉⴳⵍⴷⴰⵏ ⵏⵏⵙⵏⵜ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵄⴰⴱⴷⵓⵍⵍⴰⵀ ⵡⵉⵙ ⵙⵉⵏ ⴱⵏ ⵍⵃⵓⵙⴰⵢⵏ, ⴰⴷ ⵜⵏ ⵉⵃⴼⴹ ⵕⴱⴱⵉ, ⵉⵙⵓⵜⴳ ⴰⵙⵡⵉⵔ ⵏ ⵜⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⴱⴷⴷⵏⵉⵏ ⴼ ⵓⵣⴷⴷⵓⵢ ⴷ ⵓⵏⵏⵓⵕⵥⵎ ⴼ ⵜⵎⵙⴰⵔⵉⵏ ⵏ ⵜⴷⵎⵙⴰ ⴷ ⵜⴼⵍⵍⴰⵃⵜ ⴷ ⵓⵙⵖⵏⵣⵉ ⴷ ⵜⵎⴰⵍⵍⴰⵢⵜ.
ⵉⵙⴰⵡⵍ ⵎⴰⵙⵙ ⵕⴰⵛⵉⴷ ⵟⴰⵍⴱⵉ ⵍⵄⴰⵍⴰⵎⵉ ⴼ ⵜⴷⵉⵏⴰⵎⵉⵜ ⵉⵍⵍⴰⵏ ⴳ ⵍⵎⵖⵔⵉⴱ ⴳ ⵓⵚⴽⵓ ⵏ ⵜⵎⵔⵙⴰⵍ ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⴷⵎⵙⴰ ⴷ ⵓⵡⴰⵏⴽ ⴰⵏⴰⵎⵓⵏ, ⵉⵙⴷⴷⵉⴷ ⴼ ⵓⵙⵡⵉⵔ ⵉⵥⵉⵍⵏ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷⴰⵔ ⴽⵉⴳⴰⵏ ⵏ ⵜⵎⴰⴷⴷⴰⵙⵉⵏ ⵜⵉⴱⵕⵍⴰⵎⵏⵉⵢⵉⵏ ⴰⵍⵍⵉⵖ ⵉⴳⴰ ⵢⴰⵏ ⵡⴰⵏⴰⵡ ⴰⵎⵔⵙⵍⴰⵏ, ⵢⵉⵏⵉ ⵎⴰⵙ ⵢⵓⵊⴰⴷ ⵓⵙⵇⵇⵉⵎ ⵏ ⵉⵎⵓⵔⴰ ⵉ ⵓⵙⵏⴼⵍ ⵏ ⵜⵎⵓⵣⴰⵓⵜ ⵏⵏⵙ ⴷ ⵉⵏⴳⴳⵯⴰ ⵏⵏⵙ ⴳ ⵜⴳⵍⴷⵉⵜ ⵏ ⵍⵓⵕⴹⵓⵏ.
ⴳ ⵓⵎⵏⵉⴷ ⵏⵏⵙ, ⵉⵙⴰⵡⵍ ⵎⴰⵙⵙ ⴼⴰⵢⵚⴰⵍ ⵃⴰⴽⵉⴼ ⵍⴼⴰⵢⵣ ⴼ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⵍⵓⵕⴹⵓⵏ ⵍⵍⵉ ⴱⴷⴷⵏⵉⵏ ⴼ ⵓⵎⵣⵔⵓⵢ ⴷ ⵜⴳⵯⵎⴰⵜ ⵊⴰⵔ ⵉⵅⴰⵜⴰⵔⵏ ⵏⵏⵙⵏ, ⵉⵙⴷⴷⵉⴷ ⴼ ⵡⴰⴷⴷⴰⴷ ⵏ ⵍⵓⵕⴹⵓⵏ ⵎⵏⵉⴷ ⵏ ⵚⵚⵃⵕⴰ ⵜⴰⵎⵖⵉⵔⴱⵉⵜ, ⴷ ⵎⴰⵙ ⵜⴱⴷⴷ ⵄⵓⵎⴰⵏ ⴷ ⵜⵅⵅⵓⵜⵔⴰ ⵏ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴼ ⵉⴽⴰⵍⵉⵡⵏ ⵏⵏⵙ ⴰⴽⴽⵯ.
ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵛⵛⵉⵡⴰⵕ ⴳ ⵍⵓⵕⴹⵓⵏ ⵜⵉⵣⴷⴰⵢⵉⵏ ⵜⵉⴱⵕⵍⴰⵎⴰⵏⵉⵢⵉⵏ, ⵉⵖⵔ ⵉ ⵓⵙⴷⵓⵙ ⵏⵏⵙⵏⵜ ⵙ ⵉⵔⵣⴰⴼⵏ ⴷ ⵜⵔⵓⴱⴱⴰ ⵏ ⵜⴷⴷⵓⴽⴽⵯⵍⴰ , ⴷ ⵓⵎⵢⴰⵡⴰⵙ ⴳ ⵓⵙⵖⵏⵣⵉ ⴷ ⵓⵣⴷⴷⵓⵢ ⵊⴰⵔ ⵜⵉⵎⵚⵕⴰⵢ ⵏ ⵓⵙⵖⵏⵣⵉ ⴷ ⵜⵎⴳⵓⵔⵉ ⴳ ⵙⵏⴰⵜ ⵜⵎⵉⵣⴰⵔ ⴷ ⵓⵙⴽⵔ ⵏ ⵜⵎⵢⴰⵇⵇⴰⵏⵉⵏ ⵜⵉⵙⵉⵏⵔⴰⵏⵉⵏ, ⴷ ⵓⵎⵢⴰⵡⴰⵙ ⴳ ⵓⵎⵏⵉⴷ ⵏ ⵜⵎⴰⵍⵍⴰⵢⵜ.
ⵢⵉⵏⵉ ⵎⴰⵙⵙ ⴼⴰⵢⵚⴰⵍ ⵄⴰⴽⵉⴼ ⵍⴼⴰⵢⵣ ⵎⴰⵙ ⴷ ⵉⵇⵇⴰⵏ ⴰⴷ ⵢⵉⵍⵉ ⵚⴰⵃⴰ ⵙⴳ ⵜⵉⵔⵎⵉⵜ ⵜⴰⵎⵖⵔⵉⴱⵉⵜ ⴳ ⵢⵉⴳⵔ ⵏ ⵜⴷⵎⵙⴰ ⴷ ⵜⴼⵍⵍⴰⵃⵜ ⴷ ⵓⵙⵡⵓⴷⴷⵓ ⵏ ⵡⴰⵎⴰⵏ ⴷ ⵜⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏⵏ ⴷ ⵜⵙⵔⵜⴰⵏⵉⵏ ⵜⵉⵎⵖⵔⵉⴱⵉⵢⵉⵏ ⴷ ⵓⵏⴳⵔⴰⵡ ⴰⵣⵔⴼⴰⵏ ⵉⵣⴷⵉⵏ ⴷ ⵉⵙⵜⴰⵢⵏ ⴷ ⵉⴽⴰⴱⴰⵕⵏ ⵉⵙⵔⵜ ⴰⵏⵏ ⴷ ⵜⴷⵔⴰⵡⵜ ⵜⴰⵙⵔⵜⴰⵏⵜ ⵏ ⵉⵄⵔⵔⵉⵎⵏ ⴷ ⵜⵎⵖⴰⵔⵜ.
ⴳⴰⵏ ⵉⵎⴹⴰⴽⴰⵕⵏ ⴰⴷ ⵢⴰⵜ ⵜⵎⵍⴷⴰ ⵏ ⵓⵔⵣⵣⵓ ⴷ ⵓⵙⵏⴼⵍ ⵏ ⵜⴰⵏⵏⴰⵢⵢⵉⵏ ⵅⴼ ⵜⵎⵙⴰⵔⵉⵏ ⵜⵉⴱⵕⵍⴰⵎⴰⵏⵉⵢⵉⵏ ⵜⵉⵙⵉⵏⵔⵏⵉⵏ ⴷ ⵜⵙⴳⴰⵡⴰⵏⵉⵏ ⴷ ⵜⴳⵔⴰⵖⵍⴰⵏⵉⵏ.