ⵉⴷⵔⵓ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⵜⵉⵏⵏⴰⵡⵜ ⵜⴰⴳⵔⴰⵖⵍⴰⵏⵜ ⴼ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵉⵢⵉⵏ ⴳ ⵓⵙⵏⴱⴷⴷⵉ ⵏ ⵍⵉⵜⵜⵉⵀⴰⵍ ⵏ ⵜⴰⵣⵣⴰⵏⵉⵏ

ⵉⴷⵔⵓ ⵓⵎⴰⵔⵉ ⵎⵓⵚⵟⴰⴼⴰ ⵔⴷⴷⴰⴷ ⴷ ⵓⵎⴰⵔⵉ ⵄⵓⵎⴰⵔ ⵃⵊⵉⵔⴰ ⴷ ⵜⵎⴰⵔⵉⵜ ⵅⴷⴷⵓⵊ ⵙⵙⵍⴰⵙⵉ ⵉⴳⵎⴰⵎⴰⵏ ⵏ ⵜⴰⵢⵢⴰⵡⵜ ⵜⴰⴱⵕⵍⴰⵎⵏⵉⵜ ⵜⴰⵎⵖⵔⵉⴱⵉⵜ ⵖⵔ ⵜⴰⵎⵓⵏⵜ ⵜⴰⴱⵕⵍⴰⵎⴰⵏⵉⵜ ⵜⴰⴳⵔⴰⵖⵍⴰⵏⵜ, ⴰⵙⵉⵏⴰⵙ 8 ⴱⵕⴰⵢⵕ 2022 ⵙ ⵓⴼⵉⵣⵢⵓⴽⵓⵏⴼⵉⵕⵓⵏⵚ, ⴳ ⵜⵉⵏⵏⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵜⴰⵎⵓⵏⵜ ⵜⴰⴱⵕⵍⴰⵎⵏⵉⵜ ⵜⴰⴳⵔⴰⵖⵍⴰⵏⵜ ⴷ ⵜⵎⴰⴷⴷⴰⵙⵜ ⵏ ⵜⴷⵓⵙⵉ ⵜⴰⵎⴰⴹⵍⴰⵏⵜ ⴼ: ⴰⵙⴱⴷⴷⵉ ⵏ ⵍⵉⵜⵜⵉⵀⴰⵍ ⵏ ⵜⴰⵣⵣⴰⵏⵉⵏ ⴳ ⵓⵣⵎⵣ ⵏ ⴽⵓⴼⵉⴷ19: ⵎⴰⵏ ⵜⵉⵍⴰⵍⵜ ⴷⴰⵔ ⵉⴱⵕⵍⴰⵎⴰⵏⵉⵢⵉⵏ”.

ⵉⵜⵜⵓⵙⴽⴰⵔ ⵓⵏⵎⵓⵇⵇⴰⵔ ⴰⴷ ⵙ ⵓⵎⵢⴰⵡⴰⵙ ⴰⴽⴷ ⴰⵖⴰⵡⴰⵙ ⴰⵎⴰⴹⵍⴰⵏ ⵏ ⵢⵓⵏⵉⵙⵉⴼ ⴷ ⵓⴼⵏⵉⵇ ⵏ ⵜⵎⵜⵜⴰ ⵎⵓⵏⵏⵉⵏ  ⵉ ⵉⵎⵣⴷⴰⵖⵏ, ⵉⵡⴰⵜⵜⵙ ⴰⴷ ⵜⵉⵍⵉ ⵜⵉⴼⴰⵡⵜ ⴼ ⵜⵎⵓⴽⵔⵉⵙⵜ ⵏ ⵍⵉⵜⵜⵉⵀⴰⵍ ⵏ ⵜⴰⵣⵣⴰⵏⵉⵏ ⴳ ⵓⵎⴰⴹⴰⵍ, ⴷ ⵜⵓⵙⵙⵏⴰ ⵏ ⵜⵉⵔⵎⵉⵜⵉⵏ ⵜⵉⵏⴰⵎⵓⵔⵉⵏ ⴷ ⵓⵙⵏⴼⵍ ⵏ ⵜⵎⵓⵛⴰ ⴷ ⵓⵙⴷⵓⵙ ⵏ ⵓⵎⵙⴰⵡⴰⵍ ⵊⴰⵔ ⵉⴱⵕⵍⴰⵎⴰⵏⵉⵢⵉⵏ ⴷ ⵡⵉⵢⵢⴰⴹ.

ⵜⵙⴷⴷⵉⴷ ⵜⵎⵣⴷⴰⵢⵜ ⵏ ⵓⵖⴰⵡⴰⵙ ⴰⵎⴰⴹⵍⴰⵏ ⵏ ⵢⵓⵏⵉⵙⵉⴼ ⴷ ⵓⴼⵏⵉⵇ ⵏ ⵜⵎⵜⵜⴰ ⵎⵓⵏⵏⵉⵏ ⵏ ⵉⵎⵣⴷⴰⵖⵏ ⵏⴰⵏⴽⴰⵍⵉ ⵎⴰⴽⵙⵓⴷ ⵎⴰⵙ ⵉⵍⵍⴰ ⵍⵉⵜⵜⵉⵀⴰⵍ ⵏ 12 ⵎⵍⵢⵓⵏ ⵏ ⵜⵔⴱⴰⵜ ⴷⴷⴰⵡ ⵏ 18 ⵏ ⵓⵙⴳⴳⵯⴰⵙ, ⴰⵙⵖⵍ ⴰⴷ ⵉⵣⵣⵉⴳⵣⵙⴳ ⵜⵉⵣⵡⵉⵔⵉ ⵏ ⵓⴱⴰⵢⵢⵓⵔ ⵏ ⴽⵓⵕⵓⵏⴰ 19, ⵜⵉⵏⵉ ⵎⴰⵙ ⵉⵔⴰ ⵓⵖⴰⵡⴰⵙ ⴰⴷ ⵉⵙⴱⴷⴷ ⵜⴰⵎⵓⴽⵔⵉⵙⵜ ⴰⴷ ⴳ 2030 ⵙ ⵉⵡⵜⵜⴰⵙⵏ ⵏ ⵜⴳⵎⵉ ⵜⴰⵙⵓⵍⴰⵏⵜ ⵙ ⵓⵙⴱⴷⴷⵉ ⵏ ⵓⵙⵏⵓⵃⵢⵓ ⵎⴳⴰⵍ ⵏ ⵜⵎⵖⴰⵔⵉⵏ ⴷ ⵓⵡⵇⵇⵔ ⵏ ⵜⵎⵢⴰⵇⵇⴰⵏⵉⵏ ⵏ ⵉⵣⵔⴼⴰⵏ ⵏⵓⴼⴳⴰⵏ ⴷ ⵡⴰⵣⵣⴰⵏ, ⴷ ⵓⵙⴷⵓⵙ ⵏ ⵜⵎⴰⴷⵔⴰⵡⵜ ⵊⴰⵔ ⵉⴱⵕⵍⴰⵎⴰⵏⵉⵢⵏ.

ⵜⵉⵏⵉ ⵎⴰⵜⵉⵍⴷⴰ ⵔⴰⵏⵙⵄⵏ ⵜⵎⵙⵜⴳⴳⴰⵔⵜ ⵏ ⵜⵙⵔⵜⴰⵢ ⵎⴰⵙ ⵉⴳⴰ ⵓⵥⵍⴰⴹ ⴷ ⵜⴽⵕⴷⵉ ⵏ ⵜⴳⵎⵎⵉ ⴷ ⵓⴼⵓⵖ ⵙⴳ ⵜⵉⵏⵎⵍ ⴷ ⵡⴰⵔⵜⵉⵍⵉⵜ ⵏ ⵜⵏⵓⴼⴰ ⵜⵉⴷⵓⵙⴰⵏⵉⵏ ⵜⵉⵎⵏⵜⴰⵍ ⵏ ⵍⵉⵜⵜⵉⵀⴰⵍ ⴰⵎⵏⵣⵓ, ⵜⵖⵔ ⴳ ⵓⵎⵏⵉⴷ ⴰⴷ ⵉ ⵓⵙⴷⵓⵙ ⵏ ⵜⵎⴰⴷⵔⴰⵡⵜ ⵊⴰⵔ ⵉⴱⵕⵍⴰⵎⴰⵏⵉⵢⵉⵏ  ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⴰⵖⵔⵎⴰⵏ.

ⴳ ⵓⵎⵏⵉⴷ ⵏⵏⵙⵏ, ⵙⴷⴷⵉⴷⵏ ⵉⴳⵎⴰⵎⵏ ⵏ ⵜⴰⵢⵢⴰⵡⵜ ⵜⴰⴱⵕⵍⴰⵎⵏⵉⵜ ⵜⴰⵎⵖⵔⵉⴱⵉⵜ ⵎⴰⵙ ⵉⴳⴰ ⵍⵉⵜⵜⵉⵀⴰⵍ ⵏ ⵜⴰⵣⵣⴰⵏⵉⵏ ⵢⴰⵏ ⵓⵙⵏⵜⵍ ⵉⵛⴷⴷⴰⵏ ⵙ ⵉⴼⵔⴽ ⵍⵎⵖⵔⵉⴱ, ⵉⵏⵉⵏ ⵎⴰⵙ ⴷ ⵜⵇⵇⴰⵏ ⴰⴷ ⵜⵉⵍⵉ ⵢⴰⵜ ⵜⵙⵔⵜⵉⵜ ⵜⴰⵎⴰⵜⴰⵢⵜ ⵢⵓⵎⴰⵏ ⵖ ⵉⵍⵍⴰ ⵓⵡⵇⵇⵔ ⵏ ⵉⵣⵔⴼⴰⵏ ⵏ ⵜⴰⵣⵣⴰⵏⵉⵏ ⴷ ⵉⵣⵔⴼⴰⵏ ⵏⵏⵙⵏ ⴳ ⵓⵙⵙⵍⵎⴷ ⴷ ⵜⴷⵓⵙⵉ ⴷ ⵓⵙⴼⵔⴽ ⵏ ⵉⴷ ⴱⴰⴱⴰⵜⵙⵏ ⵏ ⵜⴰⵣⵣⴰⵏⵉⵏ.

ⵙⴰⵡⵍⵏ ⵓⵍⴰ ⵏ ⵜⵉⵍⴰⵍⵜ ⵏ ⵉⴱⵕⵍⴰⵎⴰⵏⵉⵢⵏ ⵍⵍⵉ ⴰⵙⵏ ⵉⴼⴽⴰ ⵓⴷⵓⵙⵜⵓⵔ ⵙ ⵜⵙⵏⵜⴰⵢⵜ ⵜⴰⵣⵣⵔⴰⴼⵜ, ⵖⵔⵉⵏ ⵉ ⵓⵣⵣⵔⴰⵢ ⵏ ⵓⵎⵏⵏⵉ 20 ⴳ ⵓⵙⵍⴳⵏ ⵏ ⵜⵓⵡⵊⴰ ⵉⵙⴰⵡⵍⵏ ⴼ ⵜⵉⵍⴰⵍⵜ ⵏ ⵓⵎⵏⴱⴰⴹ ⴳ ⵍⵉⵜⵜⵉⵀⴰⵍ ⵏ ⵜⴰⵣⵣⴰⵏⵉⵏ ⵎⴽ ⵉⵍⵍⴰⵏ ⴳ ⵓⵎⵏⵏⵉ 19  ⵏ ⵓⵙⵍⴳⵏ ⴰⴷ.

ⵥⵕⴰⵏ ⵉⵎⴷⵔⴰⵡⵏ ⵓⵍⴰ ⵜⵉⵔⵎⵉⵜⵉⵏ ⵜⵉⵏⴰⵎⵓⵔⵉⵏ ⵏ ⵍⵀⵉⵏⴷ ⴷ ⵥⴰⵎⴱⵢⴰ ⴷ ⵍⵎⵉⴽⵙⵉⴽ ⴷ ⵜⵓⴳⴳⴰⵙ ⴳ ⵓⵙⴱⴷⴷⵉ ⵏ ⵍⵉⵜⵜⵉⵀⴰⵍ ⵏ ⵜⴰⵣⵣⴰⵏⵉⵏ.

ⴳ ⵜⴳⵉⵔⴰ ⵙⴷⴷⵉⴷⵏ ⵉⵎⴷⵔⴰⵡⵏ ⴼ ⵓⵙⴷⵓⵙ ⵏ ⵜⵎⴷⵔⴰⵡⵜ ⴷ ⵓⵎⵢⴰⵡⴰⵙ ⵊⴰⵔ ⵉⴱⵕⵍⴰⵎⴰⵏⵉⵢⵏ ⴷ ⵜⵎⵙⵎⵓⵏⵉⵏ ⵏ ⵡⴰⵎⵓⵏ ⴰⵖⵔⵎⴰⴰⵏ ⵉ ⵓⴼⵙⵙⴰⵢ ⵏ ⵓⵎⵓⴽⵔⵉⵙ ⴰⴷ.