ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵜⴰⵙⵓⵎⵔⵜ ⵏ ⵓⵙⵍⴳⵏ ⴷ ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵡⴰⵎⵓⵏ ⴷ ⵜⴷⵎⵙⴰ ⴷ ⵜⵣⵔⴼⵜ

ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵡⴰⵙ 8 ⵢⵓⵍⵢⵓⵣ 2021 ⵙ ⵓⵎⴰⴽⵕⴰⴹ ⵙⵎⵎⵓⵙ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴼ ⵜⵡⵡⵓⵔⵉ ⵜⴰⵎⵅⴰⵙⵜ ⴷ ⵜⵉⵏ ⵜⵎⴰⵖⵓⵏⵜ, ⴰⵎⵓⴽⵏ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ, ⴰⵎⵓⴽⵏ ⵏ ⵉⵔⴳⴰⵢⵏ, ⴰⵏⴳⵔⴰⵡ ⴰⴷⵙⵍⴰⵏ ⴰⵎⴰⵜⴰⵢ ⵏ ⵜⵣⵣⵓⵍⵜ ⵜⴰⴳⴷⵓⴷⴰⵏⵜ, ⵜⴰⵎⴳⴳⵉⵡⵙⵜ ⵜⴰⵎⴰⵜⴰⵢⵜ ⵏ ⵜⵖⴰⵡⵙⵉⵡⵉⵏ  ⵜⵉⵣⵔⴼⴰⵏⵉⵏ, ⴷ ⵜⵙⵓⵎⵔⵜ ⵏ ⵓⵙⵍⴳⵏ ⴼ ⵜⵣⵣⵓⵍⵜ ⵏ ⵓⵎⴰⵏⴰⵔ ⵏ ⵜⵎⴰⵍⵍⴰⵢⵜ, ⴳ ⵜⵖⵉⵎⵉⵜⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⵉⵙⵙⵉⵅⴼ ⵎ.ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴷ ⵎ.ⵙⵓⵍⴰⵢⵎⴰⵏ ⵍⵄⵓⵎⵕⴰⵏⵉ, ⴰⵎⴰⵔⵉ ⴰⵎⵣⵡⴰⵔⵓ ⵏ ⵓⵏⵙⵙⵉⵅⴼ, ⵙ ⵜⵉⵍⵉⵜ ⵏ ⵉⴷ ⵎⴰⵙⵙ: ⵎⵓⵃⴰⵎⵎⴰⴷ ⴱⵏ ⵄⴰⴱⴷ ⵍⵇⴰⴷⵔ ⴰⵎⴰⵡⵙⴰⵙ ⵏ ⵜⵣⵔⴼⵜ, ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ, ⵎⵓⵃⴰⵎⵎⴰⴷ ⴰⵎⴽⵔⴰⵣ ⴰⵎⴰⵡⵙⴰⵙ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ.

ⵉⵙⴷⴷⵉⴷ ⵎ. ⵎⵓⵃⴰⵎⵎⴰⴷ ⴰⵎⴽⵔⴰⵣ ⴰⵎⴰⵡⵙⴰⵙ ⵏ ⵓⵙⵡⵓⵔⵉ ⴷ ⵓⵙⵉⴷⴼ ⴰⵣⵣⵓⵍⴰⵏ, ⴳ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ 06.18 ⴼ ⵜⵡⵡⵓⵔⵉ ⵜⴰⵎⵅⴰⵙⵜ ⴷ ⵜⵉⵏ ⵜⵎⴰⵖⵓⵏⵜ, ⴼ ⵓⵎⵏⴰⴹ ⴰⴳⵔⴰⵖⵍⴰⵏ ⴷ ⵓⵏⴰⵎⵓⵔ ⵉⴱⴷⴷⵏ ⴼ ⵡⴰⵜⵉⴳ ⵏ ⵜⵡⵡⵓⵔⵉ ⴰⴷ ⴳ ⵓⵣⵣⴳⵉⵔ ⵏ ⵜⵙⵏⵜⴰⵢⵉⵏ ⵏ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⵓⵙⴽⵔ ⵏ ⵜⴳⵎⵉ, ⴷ ⵓⵙⵉⵥⴹⵕ ⴰⴷⵎⵙⴰⵏ ⴷ ⵓⵏⴰⵎⵓⵏ ⵏ ⵉⵡⴷⴰⵏ ⵛⵃⴰⵏⵉⵏ, ⵢⵉⵏⵉ ⵎⴰⵙ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ ⴳ ⵉⵏⴰⵡ ⵏ ⵓⵕⵥⵥⵓⵎ ⵏ ⵜⵙⵓⵜⵍⵜ ⵜⴰⵎⵣⵡⴰⵔⵓⵜ ⵏ ⵓⵙⴳⴳⵯⴰⵙ ⴰⵣⵣⵔⴰⴼ ⵡⵉⵙ ⴽⵕⴰⴹ ⵏ ⵜⵡⴰⵍⴰ ⵜⴰⵣⵣⵔⴰⴼⵜ ⵜⵉⵙ ⵎⵔⴰⵡⵜ ⴼ ⵡⴰⵜⵉⴳ ⵏ ⵜⵎⵅⴰⵙⵜ, ⵉⵖⵔ ⵉ ⵓⵙⵙⵔⵇⴱ ⵏⵏⵙ ⴷ ⵓⵙⵙⵔⵅⵓ ⵏ ⵜⴱⵔⵉⴷⵉⵏ ⵏⵏⵙ.

ⵉⵙⵔⵙ ⵓⵙⵏⴼⴰⵔ ⵏ ⵓⵙⵍⴳⵏ ⴰⵔⵎⵎⵓⵙ ⵏ ⵜⵡⵡⵓⵔⵉ ⵏ ⵜⵎⵅⴰⵙⵜ ⴷ ⵜⵉⵏ ⵜⵎⴰⵖⵓⵏⵜ, ⴰⵏⴳⵔⴰⵡ ⴷ ⵜⴼⴰⴷⵉⵡⵉⵏ ⵏⵏⵙ, ⵜⵉⴱⵔⵉⴷⵉⵏ ⵏⵏⵙ, ⴰⵙⵏⵎⴰⵍⴰ ⵏ ⵉⵣⵔⴼⴰⵏ ⴷ ⵓⵛⵛⵉⵍⵏ ⵏ ⵉⵎⵙⵜⴳⴳⴰⵔⵏ ⵏⵏⵙ, ⵉⵎⴰⵙⵙⵏ ⵏ ⵜⵉⴹⴰⴼ, ⴰⵏⴳⵔⴰⵡ ⵏ ⵜⴼⴳⵓⵔⵉⵏ ⴷ ⵉⵚⴰⵃⴰⵜⵏ, ⴰⵣⵎⵎⴻⵎ ⴰⵏⴰⵎⵓⵔ ⵉⵥⵍⵉⵏ ⵙ ⵜⵡⵡⵓⵔⵉ ⵜⴰⵎⵅⴰⵙⵜ ⴷ ⵜⵉⵏ ⵜⵎⴰⵖⵓⵏⵜ.

ⵎⴹⴰⴽⴰⵕⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴼ ⵓⵙⵏⴼⴰⵔ ⵍⵍⵉ ⵉⴳⴰⵏ ⵙⴳ ⵜⵎⵔⵙⴰⵍ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵉⵍⵍⴰⵏ ⴳ ⵓⴷⵓⵙⵜⵓⵔ ⵏ 2011, ⵉⴳ ⵢⴰⵏ ⴳ ⵉⵖⴱⵓⵍⴰ ⵏ “ⵓⴳⴰⴷⴰⵔ ⴰⵏⴰⵎⵓⵏ” ⴷ ⵓⵙⵎⵖⵔ ⵏ ⵓⵙⴳⵓⴷⵉ ⵏ ⵜⵡⵡⵓⵔⵉ ⵜⴰⵎⵙⵎⵓⵏⴰⵏⵜ ⴷ ⵜⵎⵅⴰⵙⵜ  ⴳ ⵍⵎⵖⵔⵉⴱ. ⵖⵔⵉⵏ ⵉ ⵓⵙⵙⵔⵇⴱ ⵏ ⵜⵙⵏⵜⴰⵢⵉⵏ ⵏ ⵜⵎⵅⴰⵙⵜ ⴷ ⵓⵙⵙⵔⵅⵓ ⵏ ⵜⵓⵜⵔⴰⵡⵉⵏ ⵏⵏⵙ, ⴷ ⵓⵙⴷⵓⵙ ⵏ ⵜⴷⵉⵎⵓⵇⵔⴰⵟⵉⵜ ⵜⴰⵎⴰⴷⵔⴰⵡⵜ ⵙ ⵎⴰⴷ ⵉⵎⵙⴰⵙⴰⵏ ⴷ ⵜⵣⵣⵉⴳⵣⵜ ⵏ ⵜⵎⴰⵣⵉⵔⵜ ⵏⵏⵖ ⴳ ⴽⵓ ⵉⴳⵔⴰⵏ.

ⵉⵙⵎⵏⵉⴷ ⵎ. ⵎⵓⵃⴰⵎⵎⴰⴷ ⴱⵏ ⵛⴰⵄⴱⵓⵏ ⴰⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵎⵓⴽⵏ ⵏ ⵜⵎⵙⵙⵓⴳⵓⵔⵜ ⴰⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 50.21 ⴼ ⵓⵎⵓⴽⵏ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 69.19 ⴼ ⵓⵎⵓⴽⵏ ⵏ ⵉⵔⴳⴰⵢⵏ. ⵢⵉⵏⵉ ⵎⴰⵙ ⴷ ⴰⵙⵖⵣⵏ ⵏⵏⵙⵏ ⴷ ⵓⵙⴽⵔ ⵏ ⵓⴼⵏⵉⵇ ⵏ ⵎⵓⵃⴰⵎⵎⴰⴷ ⵡⵉⵙ ⵚⴹⵉⵚ  ⵉ ⵓⵙⵙⴰⵔⵓ ⴷ ⵓⵖⴰⵡⴰⵙ ⵏ ⵓⵙⵎⵖⵔ ⵏ ⵜⴷⵎⵙⴰ ⵜⴰⵏⴰⵎⵓⵔⵜ, ⴳⴰⵏ ⵉⵎⵓⴽⵏⵏ ⵉⵅⴰⵜⴰⵔⵏ ⴳ ⵙⵎⵎⵓⵙ ⵉⵙⴳⴳⵯⴰⵙⵏ, ⵔⴰⴷ ⵙⴽⵔⵏ ⴰⴼⵔⴰⴳ ⴰⵏⴰⵎⵓⵏ ⵏ ⴽⵉⴳⴰⵏ ⵏ ⵉⵏⵎⵓⵔⴰⵏ, ⴷ ⵡⴰⵍⴰⵢ ⵏ ⵓⵣⵓⵛⵛⵍ ⴰⴷⵎⵙⴰⵏ ⴷ ⵜⵉⵕⵡⵉ ⵏ ⵜⵎⵔⵙⴰⵍ, ⴷ ⵉⵖⴰⵡⴰⵙⵏ ⵉⵎⴰⵢⵏⵓⵜⵏ ⵏ ⵓⵙⵙⴰⵔⵓ ⵏ ⵓⴼⴰⵔⵙ, ⴷ ⵓⵙⴽⵔ ⵏ ⵜⵣⵣⵓⵍⵉⵏ, ⴷ ⵓⵙⴽⵔ ⵏ ⵉⵎⵏⴰⴷⵏ ⵉⴷⵎⵙⴰⵏⵏ ⵉⵏⴰⵔⵓⵣⵏ ⵉ ⵜⴳⵍⴷⵉⵜ, ⵍⵍⵉⵖ ⵔⴰⴷ ⵢⵉⵍⵉ ⵡⴰⵏⴰⵡ ⵓⵏⴳⵉⵎ ⴰⵎⴰⵢⵏⵓ.

ⵔⴰⴷ ⵉⵙⵎⴽⵍ ⵓⵙⵏⴼⴰⵔ ⵏ  ⵓⵙⵍⴳⵏ ⴰⵙⴰⵜⵉ 50.21 ⴼ ⵓⵎⵓⴽⵏ ⵏ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ, ⵜⵉⵎⵓⴽⵔⵉⵙⵉⵏ ⵏⵏⵙⵏⵜ, ⴷ ⵡⴰⵍⴰⵢ ⵏ ⵓⴼⴰⵔⵙ ⵏⵏⵙⵏⵜ, ⴷ ⵓⵙⵏⴼⵍ ⵏ ⵓⵏⵛⴽ ⵏ ⵢⵉⴳⵔ ⴰⵎⴰⵜⴰⵢ, ⴷ ⵡⴰⵍⴰⵙ ⵏ ⵓⵙⵏⴳⵉⴷⴷⵉ ⵏⵏⵙ, ⴷ ⵓⵏⴱⴰⴹ ⵏ ⵉⵙⴳⵓⵎⵏ ⵏ ⵓⵡⴰⵏⴽ, ⴷ ⵓⵙⵙⵔⵅⵓ ⵏ ⵡⴰⵍⴰⵙ ⵏ ⵓⵙⵏⴳⵉⴷⴷⵉ ⵏ ⵜⵎⵔⵙⴰⵍ ⵏ ⵢⵉⴳⵔ ⴰⵎⴰⵜⴰⵢ ⴷ ⵓⵙⵖⵓⴷⵓ ⵏ ⵓⵏⴱⴰⴹ ⵏⵏⵙⵏⵜ, ⴷ ⵓⵙⵏⴳⵉⴷⴷⵉ ⵏ ⵓⵙⴽⵔ ⵏ ⵜⵉⴷ ⴳⴰⵏⵉⵏ ⵜⵉⵎⴰⵢⵏⵓⵜⵉⵏ, ⴷ ⵓⵙⵎⴰⵢⵏⵓ ⵏ ⵉⵎⴰⵙⵙⵏ ⵏ ⵜⵉⴹⴰⴼ ⵜⴰⵥⵕⴼⴰⵏⵜ ⵏ ⵓⵡⴰⵏⴽ.

ⵉⵡⴰⵜⵜⵙ ⵓⵙⵏⴼⴰⵔ ⵏ ⵓⵙⵍⴳⵏ ⴰⵙⴰⵜⵉ 69.19 ⴼ ⵓⵎⵓⴽⵏ ⵏ ⵉⵔⴳⴰⵢⵏ, ⴰⵣⵣⵔⴰⵢ ⵏ ⵜⵎⵓⴽⵔⵉⵙⵉⵏ ⵏ ⵓⵏⴳⵔⴰⵡ ⵏ ⵉⵔⴳⴰⵢⵏ ⵏ ⵖⵉⵍⴰⴷ, ⴷ ⵓⵙⴽⵔ ⵏ ⵜⵣⵔⴼⵜ ⵏ ⵉⵔⴳⴰⵢⵏ ⴷ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⵊⴰⵔ ⵜⵎⵙⵙⵓⴳⵓⵔⵜ ⴷ ⵉⵏⵎⵓⵔⴰⵏ, ⴷ ⵓⵙⵎⵓⵙⵙⵓ ⵏ ⵜⵥⴹⴰⵕⵉⵏ ⵏ ⵉⵔⴳⴰⵢⵏ ⵉ ⵓⵙⵙⵥⵕⴼ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴷ ⵓⵙⵎⴽⵍ ⵏ ⵓⵏⴳⵔⴰⵡ ⵏ ⵉⵔⴳⴰⵢⵏ ⵏ ⵜⴳⵔⴰⵡⵉⵏ ⴷ ⵡⵉⴷ ⵜⵏ ⵉⵔⵡⴰⵙⵏ ⴷ ⵓⵙⴷⵓⵙ ⵏ ⵓⵏⴱⴰⴹ ⵉⵕⵡⴰⵏ ⴳ ⵢⵉⴳⵔ ⴰⴷ.

ⴳ ⵓⵎⴹⴰⴽⴰⵕ, ⵏⵏⴰⵏ ⵉⴳⵏⵙⴰⵙⵏ ⵏ ⵜⵔⵓⴱⴱⴰ ⴷ ⵜⴳⵔⵓⵎⵎⴰ ⵜⵉⴱⵕⵍⴰⵎⴰⵏⵉⵢⵉⵏ ⵎⴰⵙ ⴳⴰⵏ ⵙⵉⵏ ⵉⵙⵏⴼⴰⵔⵏ ⵏ ⵉⵙⵍⴳⵏⵏ ⴰⵎⵓⴽⵏ ⴰⵎⵣⵡⴰⵔⵓ ⴰⵏⴰⵎⵓⵔ ⵍⵍⵉⵖ ⵉⵟⵟⴰⴼ ⵓⵔⴳⴰⵢ ⵜⵉⵍⴰⵍⵜ ⵏⵏⵙ ⴳ ⵓⵙⵙⵥⵕⴼ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⴰⵢⵍⵍⵉ ⵔⴰⴷ ⵉⴼⵔⴳ ⵉⵎⵙⴰⵜⵏ ⵉⵎⴽⵕⵓ ⵉⴷⵎⵙⴰⵏⵏ ⵍⵍⵉⵖ ⵟⵟⴰⴼⵏⵜ ⵜⵎⵔⵙⴰⵍ ⴷ ⵜⵎⵙⵙⵏⵜⴰⵢ ⵜⵉⴳⴷⵓⴷⴰⵏⵉⵏ ⵜⵉⵍⴰⵍ ⵜⵉⵙⵜⵔⴰⵜⵉⵊⵉⵢⵏ. ⴱⴷⴷⵏ ⵉⴷ ⵎⴰⵙⵙ ⴷ ⵉⵙⵜ ⵎⴰⵙⵙⴰ ⵉⵎⵓⵔⴰ ⴼ ⵜⵏⴰⵥⴰⵕⵉⵏ ⴷⴰⵜ ⵏ ⵢⵉⴳⵔ ⵏ ⵉⵔⴳⴰⵢⵏ ⴷ ⵓⵙⵡⵓⴷⴷⵓ ⵏ ⵜⵎⵔⵙⴰⵍ ⴰⵏⵏ.

ⵉⵙⵎⵏⵉⴷ ⵎ.ⴱⵏ ⵛⴰⵄⴱⵓⵏ ⴰⵙⵏⴼⴰⵔ ⵏ ⵓⵙⵍⴳⵏ 39.21 ⵉ ⵓⵙⵎⴰⴷ ⵏ ⵓⴹⴰⵀⵉⵕ 1.58.008 ⵏ 4 ⵛⵄⴱⴰⵏ 1377 (24 ⴱⵕⴰⵢⵕ 1958) ⵉⴳⴰⵏ ⴰⵏⴳⵔⴰⵡ ⴰⴷⵙⵍⴰⵏ ⴰⵎⴰⵜⴰⵢ ⵏ ⵜⵣⵣⵓⵍⵜ ⵜⴰⴳⴷⵓⴷⴰⵏⵜ, ⵙ ⵓⵍⵇⵎ ⵏ ⵉⵎⵙⵡⵓⵔⵉⵢⵏ ⵏ ⵜⴷⵓⵙⵉ ⴳ ⵢⵉⴳⵔ ⴰⵎⴰⵜⴰⵢ ⵉ ⵜⴷⵓⵍⴰ ⴼ ⵓⵔ ⵉⵍⵍⵉ ⴰⴹⴰⵀⵉⵕ ⴰⴷ, ⵃⵎⴰ ⴰⴷ ⵉⵜⵜⵓⵙⴽⵉⵔ ⵓⵏⴳⵔⴰⵡ ⴰⴷⵙⵍⴰⵏ ⵍⵍⵉ ⴷⵉⴷⵙⵏ ⵉⵎⵙⴰⵙⴰ ⵙ ⵓⴹⵕⵉⵚ ⴰⵣⵣⵔⴰⴼ ⵉⵎⵙⴰⵙⴰⵏ ⴷ ⵜⵙⵎⵉⴳⴰⵍ ⵏⵏⵙⵏ ⴳ ⵓⵏⴳⵔⴰⵡ ⴰⴷⵓⵙⴰⵏ ⴷ ⵜⵏⴰⵥⴰⵕⵉⵏ ⴷ ⵉⵎⵉⵣⵉⵜⵏ ⵏⵏⵙⵏ.

ⵉⵙⴷⴷⵉⴷ ⵎ. ⵎⵓⵃⴰⵎⵎⴰⴷ ⴱⵏ ⵄⴰⴱⴷ ⵍⵇⴰⴷⵔ ⴰⵎⴰⵡⵙⴰⵙ ⵏ ⵜⵣⵔⴼⵜ ⴳ ⵓⵙⵎⵏⵉⴷ ⵏ ⵓⵙⵏⴼⴰⵔ ⵏ ⵓⵙⵍⴳⵏ  ⴼ ⵓⵙⵏⵎⴰⵍⴰ ⵏ ⵜⵎⴳⴳⵉⵡⵙⵜ ⵜⴰⵎⴰⵜⴰⵢⵜ ⵏ ⵜⵖⴰⵡⵙⵉⵡⵉⵏ ⵜⵉⵣⵔⴼⴰⵏⵉⵏ ⴷ ⵜⵎⵥⵍⴰⵢⵉⵏ ⵏⵏⵙ ⴷ ⵜⵔⵙⴰⵍ ⵏ ⵓⵙⵏⵎⴰⵍⴰ ⵏⵏⵙ ⴷ ⵉⵣⵔⴼⴰⵏ ⵏ ⵉⴳⵎⴰⵎⵏ ⵏⵏⵙ ⴷ ⵓⵛⵛⵉⵍⵏ ⵏⵏⵙⵏ, ⵎⴰⵙ ⵉⴳⴰ ⵓⴹⵕⵉⵚ ⴰⴷ ⴳ ⵓⵙⴰⵡⵔ ⵏ ⵓⵎⵓⴽⵏ ⵏ ⵜⵣⵔⴼⵜ ⴷ ⵓⵙⵎⴰⴷ ⵏ ⵓⵚⴽⴰ ⴰⵎⵔⵙⵍⴰⵏ ⵏ ⵜⵏⴱⴰⴹⵜ ⵜⴰⵣⵔⴼⴰⵏⵜ ⴳ ⵜⵎⴰⵣⵉⵔⵜ ⵏⵏⵖ, ⴷ ⵓⵙⵎⵀⵍ ⵏ ⵜⵙⴷⴷⴰⵔⵜ ⵜⴰⵎⵣⵡⴰⵔⵓⵜ ⵏ ⵓⵎⵏⵏⵉ 53 ⵏ ⵓⵙⵍⴳⵏ ⴰⵎⴰⴷⴷⴰⵙ 100.13 ⴼ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵣⵔⴼⴰⵏⵜ, ⴷ ⵓⵙⴽⵔ ⵏ ⵜⵎⴳⴳⵉⵡⵙⵜ ⵜⴰⵎⴰⵜⴰⵢⵜ ⵏ ⵜⵖⴰⵡⵉⵙⵉⵡⵉⵏ ⵜⵉⵣⵔⴼⴰⵏⵉⵏ ⵉⴹⴼⵕⵏ ⴰⵙⵇⵇⵉⵎ ⴰⴷ, ⵔⴰⴷ ⵉⵙⴽⵔ ⵓⵙⵍⴳⵏ ⴰⵙⵏⵎⴰⵍⴰ ⴷ ⵜⵎⵥⵍⴰⵢ ⴷ ⵜⵔⵙⴰⵍ ⴷ ⵉⵣⵔⴼⴰⵏ ⴷ ⵓⵛⵛⵉⵍ ⵏ ⵉⴳⵎⴰⵎⵏ ⵏⵏⵙ.

ⴳ ⵜⵖⵉⵎⵉⵜ ⵜⴰⵣⵣⵔⴰⴼⵜ ⴼ ⵜⵙⵓⵎⵔⵉⵏ ⵏ ⵉⵙⵍⴳⵏⵏ, ⵉⵙⵖⵣⵏ ⵓⵙⵇⵇⵉⵎ ⵏ ⵉⵎⵓⵔⴰ ⵙ ⵓⵎⴰⴽⵕⴰⴹ ⵜⴰⵙⵓⵎⵔⵜ ⵏ ⵓⵙⵍⴳⵏ ⵉⵙⵏⴼⵍ ⵏ ⵓⵙⵍⴳⵏ 133.13 ⵉ ⵓⵙⵏⴼⵍ ⵏ ⵓⵙⵍⴳⵏ 05.12 ⴼ ⵓⵙⵏⵎⴰⵍⴰ ⵏ ⵜⵣⵣⵓⵍⵜ ⵏ ⵓⵎⴰⵏⴰⵔ ⵏ ⵜⵎⴰⵍⵍⴰⵢⵜ, ⵍⵍⵉ ⵔⴰⴷ ⵉⴼⵓⴽⴽⵓ ⵜⵉⵎⵓⴽⵔⵉⵙⵉⵏ ⴼ ⵓⵙⵎⵔⵙ ⵏ ⵓⵙⵍⴳⵏ ⵏ ⵜⵣⵣⵓⵍⵜ ⴰⴷ ⴳ ⵓⵙⵉⵍⵖ ⴷ ⵉⵡⵜⵜⴰ ⵏ ⵓⵙⵡⵓⵔⵉ, ⴰⵢⵍⵍⵉ ⵔⴰⴷ ⵢⴰⵡⵙ ⴳ ⵜⵉⵍⵉⵜ ⵏ ⵜⵣⵣⵓⵍⵉⵏ ⴷ ⵓⴼⵓⴽⴽⵓ ⵏ ⵜⵎⵓⴽⵔⵉⵙⵉⵏ ⵜⵉⵏⴰⵎⵓⵏⵏ ⵏ ⵉⵎⴰⵏⴰⵔⵏ ⵏ ⵜⵎⴰⵍⵍⴰⵢⵜ.