ⴰⵙⴰⵢⵔⴰⵔ ⵏ ⵜⵏⵙⵙⵉⵅⴼⵜ : ⵜⴰⵡⴰⵍⴰ ⵜⴰⵣⵣⵔⴰⴼⵜ 2016/2021 :
ⵉⵙⴰⵡⵍ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⴱⵕⵉⵟⴰⵏⵢⴰ ⴼ ⵜⵉⵔⴰⵜ ⵉⴷⵓⵙⵏ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵜⵉⵙⵉⵏⵔⴰⵏⵉⵏ ⵊⴰⵔ ⵍⵎⵖⵔⵉⴱ ⴷ ⴱⵕⵉⵟⴰⵏⵢⴰ ⵙ ⴽⵉⴳⴰⵏ ⵏ ⵓⵎⵢⴰⴷⴰⵙ ⴷ ⵓⵙⵎⴰⴷ
ⵉⵎⴹⴰⴽⴰⵕ ⵎⴰⵙⵙ ⵍⴰⵃⴱⵉⴱ ⵍⵎⴰⵍⴽⵉ, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ, ⴰⴽⵕⴰⵙ 30 ⵢⵓⵏⵢⵓ 2021 ⵙ ⵓⴼⵉⵣⵢⵓⵏⴽⵓⵏⴼⵉⵕⵓⵏⵚ ⴷ ⵎⴰⵙⵙ Lindsay Hoyle ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴱⵕⵉⵟⴰⵏⵉ, ⴼ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ ⴷ ⵜⵎⵔⵙⴰⵍ ⵜⵉⵣⵣⵔⴰⴼⵉⵏ ⴷ ⵉⵎⵏⴰⴷⵏ ⵏ ⵓⵎⵢⴰⵡⴰⵙ.
ⵙⵓⵜⴳⵏ ⵙⵉⵏ ⵉⵎⵙⵜⴳⴳⴰⵔⵏ ⵜⴰⵣⵣⵉⴳⵣⵜ ⵏ ⵓⵎⵢⴰⵡⴰⵙ ⴰⵎⵖⵔⵉⴱⵉ-ⴰⴱⵕⵉⵟⴰⵏⵉ, ⵉⵍⵍⴰⵏ ⵙⴳ ⵜⴰⵙⵓⵜⵉⵏ, ⵙⵓⵜⴳⵏ ⵜⴰⵎⴷⵔⴰⵡⵜ ⵜⴰⵙⵜⵔⴰⵜⵉⵊⵉⵜ ⵉⵥⵉⵍⵏ ⵉⵙⵎⵓⵏⵏ ⵙⵏⴰⵜ ⵜⵎⵉⵣⴰⵔ ⴷ ⵉⴱⵕⵍⴰⵎⴰⵏⵏ, ⵉⵏⵉⵏ ⵜⵉⵔⴰⵜ ⵏⵏⵙⵏ ⵉⴷⵓⵙⵏ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵍⵎⵖⵔⵉⴱ ⴷ ⴱⵕⵉⵟⴰⵏⵉⵢⴰ ⵉ ⴽⵉⴳⴰⵏ ⵏ ⵓⵎⵢⴰⴷⴰⵙ ⴷ ⵓⵙⵎⴰⴷ.
ⵉⵙⴷⴷⵉⴷ ⵎⴰⵙⵙ Lindsay Hoyle, ⴰⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⴱⵕⵉⵟⴰⵏⵢⴰ, ⵎⴰⵙ ⵉⴳⴰ ⵍⵎⵖⵔⵉⴱ ⵜⴰⵙⴳⴰ ⵏ ⵓⵔⴳⴳⵉⴳ, ⵉⵙⵙⴷⵓⵙ ⵜⴰⵏⴼⵔⵓⵜ ⴷ ⵓⴼⵔⴰ, ⵖⵓⵔⵙ ⵜⵉⵍⴰⵍⵜ ⵜⴰⵅⴰⵜⴰⵔⵜ ⴳ ⵓⵙⴱⴷⴷⵉ ⵏ ⵓⴱⵔⵙⵙⵉⵡⴷ ⴷ ⵜⴻⵟⵟⵓⵕⴼⴰ ⴷ ⵓⵙⴷⵓⵙ ⵏ ⵜⵏⴼⵔⵓⵜ ⴷ ⵓⵔⴳⴳⵉⴳ, ⵉⴱⴷⵔ ⴰⵍⵜⴰⵖ ⵏ ⵉⵄⵔⵔⵉⵎⵏ ⴷ ⵜⵎⵖⴰⵔⵉⵏ ⴳ ⵜⵡⵓⵔⵉ ⵜⴰⴷⵉⵎⵓⵇⵕⴰⵟⵉⵜ, ⴰⵢⵍⵍⵉ ⵉⴳⴰⵏ ⵜⴰⵏⴰⵥⴰⵕⵜ ⵜⴰⵅⴰⵜⴰⵔⵜ ⵎⵏⵉⴷ ⵏ ⵡⴰⵎⵓⵏⵏ ⵉⴷⵉⵎⵓⵇⵕⵟⵉⵢⵏ.
ⵉⵙⵎⵏⵉⴷ ⵎⴰⵙⵙ Lindsay Hoyle ⵉⵎⵏⴰⴷⵏ ⵎⵇⵇⵓⵔⵏⵉⵏ ⵏ ⵓⵎⵢⴰⵡⴰⵙ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⴱⴷⵔ ⴰⵜⵉⴳ ⵏ ⵓⵙⵏⴼⵍ ⴰⵏⴼⵍⴰⵃ ⵍⵍⵉⵖ ⵉⵥⴹⴰⵕ ⵍⵎⵖⵔⵉⴱ ⴰⴷ ⵉⵔⴰⵔ ⵉ ⵉⵙⵖⴰⵡⵙⴰⵜⵏ ⵏ ⴱⵕⵉⵟⴰⵏⵢⴰ ⵖⵎⴽ ⴰⵏⵏ ⴷ ⵡⴰⵏⵏⴰⵣⵏ ⵍⵍⴰⵏⵉⵏ ⴳ ⵜⵎⴰⵍⵍⴰⵢⵜ ⴷ ⵜⴷⵎⵙⴰ, ⵢⵉⵏⵉ “ⵎⴰⵙⵙ ⵍⵍⴰⵏⵜ ⴽⵉⴳⴰⵏ ⵏ ⵜⵖⴰⵡⵙⵉⵡⵉⵏ ⵛⵛⴰⵔⵏⵉⵏ ⵊⴰⵔ ⴱⵕⵉⵟⴰⵏⵢⴰ ⴷ ⵍⵎⵖⵔⵉⴱ, ⴽⵓ ⵢⴰⵏ ⴷⴰ ⵉⵙⴷⵓⵙ ⵡⴰⵢⵢⴰⴹ, ⴽⵓ ⵢⴰⵏ ⵉⵙⵖⴰⵡⵙⴰ ⵙ ⵡⴰⵢⵢⴰⴹ”.
ⵢⵉⵏⵉ ⵎⴰⵙⵙ ⵍⵎⴰⵍⴽⵉ ⵎⴰⵙ ⵉⴳⴰ ⵓⴼⵓⵖ ⵏ ⴱⵕⵉⵟⴰⵏⵢⴰ ⵙⴳ ⵜⴰⵎⵓⵏⵜ ⵏ ⵓⵕⵓⴱⴱⴰ ⵢⴰⵏ ⵡⴰⵏⵏⴰⵣ ⵏ ⵜⵉⴷⵜ ⵉ ⵓⵙⵎⵖⵔ ⵏ ⵜⵣⴷⴰⵢⵉⵏ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵖⵔ ⵉ ⵓⵙⵎⵔⵙ ⵏ ⵡⴰⵏⵏⴰⵣⵏ ⵍⵍⴰⵏⵉⵏ ⴷ ⵓⵙⵙⵔⵇⴱ ⵏ ⵉⵙⵙⴰⵔⵓⵜⵏ ⵏ ⴱⵕⵉⵟⴰⵏⵢⴰ ⴳ ⵍⵎⵖⵔⵉⴱ ⵍⵍⵉⵖ ⵟⵟⴰⴼⵏ “ⵜⴰⴷⵎⵙⴰ ⵉⵙⵎⴷⵏ”.
ⵉⵙⵎⵏⵉⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⵎⴰⵇⵇⵍ ⴼ ⵓⵎⵏⵣⴰⵖ ⵉⵜⵜⵓⵙⴽⴰⵔⵏ ⴼ ⵚⵚⵃⵕⴰ ⵜⴰⵎⵖⵔⵉⴱⵉⵜ ⴷ ⵜⵓⴳⴳⴰⵙ ⵏ ⵜⴳⵍⴷⵉⵜ ⵉ ⵓⴼⵓⴽⴽⵓ ⵏ ⵓⵙⴷⴰⵡ ⴰⴷ ⵉⴳⴰⵏ ⵙⴳ “ⵉⵖⴷ ⵏ ⵜⵎⴰⵖⵜ ⵜⴰⵚⵎⵎⴰⴹⵜ” , ⵉⵙⵙⴽⵜⵉ ⴷ ⵜⴰⵙⵓⵎⵔⵜ ⵏ ⵓⵏⴱⴰⴹ ⴰⵏⵉⵎⴰⵏ ⵏ ⵍⵎⵖⵔⵉⴱ ⴷ ⵓⵙⵓⵜⴳ ⵏⵏⵙ ⵙⴳ ⵓⵎⴰⴹⴰⵍ ⴷ ⵜⵎⵜⵜⴰ ⵎⵓⵏⵏⵉⵏ, ⴷ ⵜⵣⵣⵉⴳⵣⵜ ⵏ ⵜⴳⵎⵉ ⵉⵍⵍⴰⵏ ⴳ ⵜⵙⴳⴳⵉⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ.
ⴳ ⵓⵙⵡⵉⵔ ⴰⴱⵕⵍⴰⵎⴰⵏⵉ, ⵉⵙⵙⵓⵎⵔ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⵙⴽⵔ ⵏ ⵓⵏⵎⵓⵇⴰⵔ ⴰⴱⵕⵍⵎⴰⵏⵉ ⵊⴰⵔ ⵙⵉⵏ ⵉⵙⵇⵇⵉⵎⵏ ⵉⴱⵕⵍⴰⵎⴰⵏⵉⵢⵏ ⵉ ⵓⴹⴼⵕ ⵏ ⵜⵎⴰⴷⵔⵡⵜ ⴷ ⵓⵎⵙⴰⵡⴰⵍ ⴰⵙⵜⵔⴰⵜⵉⵊⵉ ⵊⴰⵔ ⵙⵏⴰⵜ ⵜⵎⵉⵣⴰⵔ, ⵉⵖⵔ ⵉ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴳ ⴱⵕⵉⵟⴰⵏⵢⴰ ⵉ ⵓⵔⵣⴰⴼ ⴰⵎⴰⴷⴷⵓⴷ ⵉ ⵍⵎⵖⵔⵉⴱ ⵉ ⵓⵔⵣⵣⵓ ⵏ ⵉⴱⵔⵉⴷⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⵊⴰⵔ ⵏⵏⵙⵏ.
ⵉⵃⴰⴹⵕ ⴳ ⵓⵏⵎⵓⵇⴰⵔ ⴰⴷ ⵎⴰⵙⵙ Anthony Smith ⴰⵏⵙⵙⵉⵅⴼ ⵏ ⵜⵎⵔⵙⵍⵜ ⵏ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵕⴰⵟⵉⵜ , ⵉⵙⵓⵜⴳ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵉⵎⵓⵔⴰ ⴰⴱⵕⵉⵟⴰⵏⵉ ⵜⴰⵢⴰⴼⵓⵜ ⵏ ⵓⵖⴰⵡⴰⵙ ⵏ ⵓⵎⵢⴰⵡⴰⵙ ⵉⵙⵎⵓⵏⵏ ⴰⵙⵇⵇⵉⵎ ⵏ ⵉⵎⵓⵔⴰ ⴷ ⵜⵎⵔⵙⵍⵜ ⵡⵉⵙⵜⵎⵉⵏⵙⵜⵔ ⵉ ⵜⴷⵉⵎⵓⵇⵔⴰⵟⵉⵜ ⵙⴳ ⵎⵔⴰⵡ ⵉⵙⴳⴳⵯⴰⵙⵏ, ⵔⴰⴷ ⵉⴽⵛⵎ ⵜⴰⴼⵔⴽⴰ ⵜⴰⵎⴰⵢⵏⵓⵜ ⴳ ⵙⵎⵎⵓⵙ ⵉⵙⴳⴳⵯⴰⵙⵏ ⴷ ⵓⵛⴽⴰⵏⵉⵏ ⴷⴼⴼⵉⵔ ⵏ ⵓⵣⵎⵎⵉⵎ ⵏ ⵜⵎⵙⵙⴽⵜⵉⵜ ⴼ ⵓⵎⵏⵉⴷ ⴰⴷ.